1. Чьрʹа Паԝлосе шанди Мәсиһийед Щьһу һелан дькьрьн, ԝәки «һе зедә» дьл бьдьнә бәр һәв?

ЧЬРʹА лазьм ә әм дьл бьдьнә һәв? Паԝлосе шанди нәʹма хԝәда Мәсиһийед Ибранирʹа гьлийед ӧса ньвиси: «Бьра әм бона һәвдӧ хәм бькьн, ԝәки һʹьзкьрьне у ԛәнщикьрьнеда һелана бьдьнә һәв. Бьра әм дәст жь льһәвщьвине нәкʹьшиньн, чаԝа кӧ һьнәка хԝәрʹа кьрийә хәйсәт, ле әм дьл бьдьнә һәв у һе зедә, чьмки әм дьбиньн кӧ рʹожа ахрәте незик дьбә» (Ибрн. 10:24, 25). Һе пенщ сал дәрбаз нәбу, Мәсиһийед Щьһу кӧ Оршәлимеда дьжитьн, фәʹм кьрьн кӧ «рʹожа Хӧдан» незик ә. Ԝана нишана Иса тедәрхьст кӧ әԝана гәрәке жь шәһәр бьрʹәвьн сәва әʹмьре хԝә хьлаз кьн (Кʹар. Шанд. 2:19, 20; Луԛа 21:20-22). Әв рʹожа Хӧдан һат сала 70 Д.М., гава Рʹомайа Оршәлим кʹӧта кьрьн.

2. Чьрʹа илаһи иро әм гәрәке һе зедә һелана бьдьнә һәв?

² Иро жи әм дәрәща ӧсада ньн. Рʹожа Йаһоԝа кӧ «мәзьн у зәʹф тьрсәһез ә», бәр шемике йә (Йоԝл. 2:11). Сефанйа пʹехәмбәр гот: «Рʹожа мәзьн йа Хӧдан нез ә [незик ә], нез ә  у зәʹф бьләзи те» (Сефн. 1:14). Әԝ пʹехәмбәрти ӧса жи дәрһәԛа рʹожед мә йә. Ләма жи чаԝа Паԝлос гот, әм гәрәке «бона һәвдӧ хәм бькьн, ԝәки һʹьзкьрьне у ԛәнщикьрьнеда һелана бьдьнә һәв» (Ибрн. 10:24). Бәле, илаһи иро әм гәрә һе зедә бона хушк-бьра хәм бькьн, у гава әԝана һʹәԝщә бьн, әм бькарьбьн дьл бьдьнә ԝан.

3. Паԝлосе шанди чь гот дәрһәԛа дьлдайине? (Бьньһерʹә шькле әʹԝльн.)

³ «Кӧл-дәрд дьле мерьв . . . дьһʹәлинә, ле готьнәкә ԛәнщ ԝи ша дькә» (Мәтʹлк. 12:25). Һәр кәс жь мә щара һʹәԝще дьлдайине у гьлийед ширьн ә. Паԝлос да кʹьфше, ԝәки һәла һе жи әԝе кӧ щабдар ә һелана бьдә мәрьва, әԝ жи һʹәԝще дьлдайине йә. Әԝи Мәсиһийед Рʹомерʹа ньвиси: «Әз гәләки һʹәйра дитьна ԝәда мә, ԝәки пʹешкʹешәкә рʹӧһʹани бьгьһиньмә ԝә, кӧ һун баԝәрийеда бьшьдьн. Аԝа готи әз жи тʹәви ԝә, әм дьл бьдьн бәр һәв, бь ԝе баԝәрийа мьн у ԝәйә һәр дӧ алийава» (Рʹом. 1:11, 12). Бәле, Паԝлос кӧ мәсәла мәзьн һишт дьлдайинеда, щара хԝәха жи һʹәԝще ве йәке бу. (Бьхунә Рʹомайи 15:30-32.)

4, 5. Иро әм дькарьн дьл бьдьнә кʹе, у чьрʹа?

⁴ Әԝед кӧ сәва хьзмәтийа һәртʹьм ԛӧрбана дькьн, һежайи пʹайа нә. Нава ԝанда пешәнг ьн. Гәләк жь ԝан зәʹф ԛӧрбана дькьн сәва кӧ бькарьбьн ча пешәнг хьзмәт кьн. Ӧса жи мисйонер, хьзмәткʹаред Бәйтʹәле, бәрпьрсийаред мьһале у жьнед ԝан, у әԝед кӧ офисед ԝәлгәрʹандьнеда дьхәбьтьн, әʹмьре хԝәда тьшта жь хԝә кем дькьн сәва һе зедә Йаһоԝарʹа хьзмәт кьн. Ләма жи әм гәрәке дьл бьдьнә ԝан у пʹайе ԝан бьдьн. У ӧса жи әԝед кӧ бәре хьзмәткʹаред һәртʹьм бун, ле ида нькарьн ӧса хьзмәт кьн, ԝе ша бьн һәрге әм дьл бьдьнә ԝан жи.

⁵ Хушк-бьред кӧ азәп дьминьн чьмки гӧрʹа ве тʹәмийе дькьн кӧ «тʹәне баԝәрмәнде Хӧдан» бьстиньн, әԝана жи һежайи дьлдайине нә (1 Корн. 7:39). Ӧса жи, жьн гәш дьбьн у дьшьдьн чахе мере ԝан пʹайа дьдьнә ԝан бона шьхӧле кӧ әԝана дькьн (Мәтʹлк. 31:28, 31). Һьн жи хушк-бьред кӧ ԝәʹде пәйкʹәтьнада йан жи чахе нәхԝәш ьн, Хԝәдерʹа амьн дьминьн, һʹәԝще дьлдайине нә (2 Тʹеслн. 1:3-5). Йаһоԝа у Мәсиһ жи бәр дьле ԝан һʹәму хьзмәткʹаред амьнда тен. (Бьхунә 2 Тʹесалоники 2:16, 17.)

6. Ль гора Ишайа 32:1, 2, шьхӧле рʹуспийа чь йә?

⁶ Бьхунә Ишайа 32:1, 2. Бь сайа «сәрока», демәк рʹуспийед жь Мәсиһийед бьжарти у пәзед дьн, Иса Мәсиһ бәрдьли у рʹебәрийе дьдә ԝан, йед кӧ дьлшкәсти нә у дьлтәнг ьн. Әԝ рʹуспи «һʹӧкӧми» сәр баԝәрийа хушк-бьра накьн, ле тʹәви ԝан дьхәбьтьн ԝәки әԝана баԝәрийеда шьдийайи бьн (2 Корн. 1:24).

7, 8. Хенщи гьлийед дьлдайине, диса ча рʹуспи дькарьн хушк-бьра бьшьдиньн?

⁷ Паԝлосе шанди мәсәләкә мәзьн һишт дьлдайинеда. Әԝи Мәсиһийед Тʹесалоникирʹа йед кӧ рʹасти зерандьне дьһатьн, ньвиси: «Дьле мә сәр ԝә дьшәԝьти, һʹәта кӧ мә дьхԝәст нә кӧ тʹәне Мьзгинийа Хԝәде бьда ԝә, ле әʹмьре хԝә жи, чьмки һун бьбунә дәлалийед мә» (1 Тʹеслн. 2:8).

⁸ Щара тʹәне пе гьлийа дьл бьдьнә кәсәки бәс нинә. Чьрʹа? Паԝлос рʹуспийед щьвата Әфәсирʹа ньвиси:  «Гәрәке бьхәбьтьн кʹомәке бьдьнә кʹәтийа у хәбәра Хӧдан Иса бир биньн кӧ дьгот: ‹Хԝәзи ль дайийа, нә кӧ ль стандийа›» (Кʹар. Шанд. 20:35). Бәле, Паԝлос һазьр бу нә кӧ тʹәне дьл бьдә хушк-бьра, ле ӧса жи «хԝә жи у мал-һʹале хԝә жи» бьдә (2 Корн. 12:15). Ӧса жи рʹуспи гәрәке нә кӧ тʹәне пе гьлийа хушк-бьра бьшьдиньн, ле пе кьред хԝә. Әԝ йәк дьдә кʹьфше ԝәки әԝана бь рʹасти бона хушк-бьра хәм дькьн (1 Корн. 14:3).

9. Чаԝа рʹуспи дькарьн ӧса ширәта бьдьн ԝәки бьшьдиньн?

⁹ Щара бона һәвшьдандьне ширәт лазьм ьн. Ле һьнге рʹуспи гәрәке гӧһ бьдьнә Кʹьтеба Пироз кӧ ӧса ширәт кьн, ԝәки ԝана ԛәԝи кьн. Иса ве йәкеда мәсәләкә мәзьн һишт. Иса паши рʹабуна хԝә ширәтед сәрт да һьнә щьватед Асйа Бьчʹукда. Ле дина хԝә бьдьне, Иса әԝ йәк ча кьр. Пешийа ширәткьрьне, әԝи бь дьл у щан пʹайи да щьвата Әфәси, Пәргамайе у Тийатирайе (Әʹйан. 2:1-5, 12, 13, 18, 19). Әԝи щьвата Лаԝдькйайерʹа гот: «Әз кʹижана һʹьз дькьм ль ԝан һьлтем у ԝан ширәт дькьм. Бона ве йәке хирәт кә у жь гӧнәкьрьне вәгәрʹә!» (Әʹйан. 3:19). Ԝе баш бә һәрге рʹуспи чʹәʹв бьдьнә Иса чахе ширәта дьдьнә хушк-бьра.

10. Ча әм һʹәмушк дькарьн һәвдӧ бьшьдиньн?

¹⁰ Бь рʹасти тʹәне рʹуспи борщдар ниньн кӧ дьл бьдьнә хушк-бьра у ԝана ԛәԝи кьн. Паԝлос һʹәму Мәсиһи һелан дькьрьн, ԝәки хәбәр дьн дәрһәԛа «тьштед кӧ кери гӧһдара тен у кʹаре дьдьнә ԝан» (Әфәс. 4:29). Һәр кәс жь мә гәрәке дина хԝә бьдә һʹәԝщед хушк-бьра. Паԝлос ширәт да Мәсиһийед Ибрани: «Мьлед хԝәйә сьстбуйи у ԛӧдуме чокед хԝәйә бе тʹаԛәт бьшьдиньн у ньгед хԝә рʹийа рʹастда бавежьн, кӧ йе дькӧлә һол нәбә, ле сәрда ԛәнщ бә» (Ибрн. 12:12, 13). Һәр  кәс жь мә, ӧса жи щаһьл дькарьн пе гьлийа һәвдӧ ԛәԝи кьн у бьшьдиньн.

11. Чаԝа хушкәкә мә аликʹари станд чахе депресийеда бу?

¹¹ Хушкәкә мә гьли дькә кӧ ԝәʹдәки әԝ кʹәтьбу депресийе. Әԝе гот: «Рʹожәке чахе мьн дӧа кьр, ԝәки дьлдайине бьстиньм, әз рʹасти хушкәкә әʹмьрда мәзьн һатьм. Әԝ бәр дьле мьнда һат у әз дьлгәрм кьрьм. Һьнге һәма әԝ йәк мьнрʹа гәләк лазьм бу. Әԝе ӧса жи дәрһәԛа щерʹьбандьна хԝә мьнрʹа гьли кьр, кӧ мина йа мьн бу у мьн ида хԝә тʹәне тʹәхмин нәдькьр». Дьԛәԝьмә әԝ хушка әʹмьрда мәзьн нә жи тедәрхьст, ԝәки әԝе пе гьлийед хԝә әԝ хушк гәләк ԛәԝи кьр.

12, 13. Чаԝа әм дькарьн ширәта жь Филипи 2:1-4 бьдьнә хәбате?

¹² Паԝлос ширәтәкә ӧса да Мәсиһийед Филипи: «Аԝа һәгәр тʹәвбуна ԝәйә тʹәви Мәсиһ бина бәр ԝә йә, һәгәр һʹьзкьрьна ԝи дьл дьдә бәр ԝә, һәгәр рʹӧһʹе пироз ԝә дькә йәк, һәгәр дьлшәԝати у рʹәʹма ԝә һәйә, әшԛа дьле мьн бь тʹьфаԛа хԝә һун бьгьһиньнә сери: Бьра әԝ һʹьзкьрьна нава ԝәда бә у сәр нет у фькьрәке бьн. Тьштәки бь һәврʹькʹийе нәкьн у ль наве хԝә нәгәрʹьн, ле жь ԝә һәр йәк бь мьлуктийе һәвале хԝә сәр хԝәрʹа бьгьрә. Тʹәне ль кʹара хԝә нәгәрʹьн, ле бьра һәр кәс ль кʹара һәвале хԝә жи бьгәрʹә» (Фили. 2:1-4).

¹³ Бәле, һәр кәс жь мә гәрәке алийе хԝәда һәр тьшти бькә, ԝәки бь һʹьзкьрьне, дьлшәԝатийе у рʹәʹме, дьл бьдә бәр хушк-бьра у бона ԝан хәм бькә.

14. Чаԝа әм дькарьн дьл бьдьнә хьзмәткʹаред һәртʹьм?

¹⁴ Әм гәләк ша дьбьн чахе педьһʹәсьн, ԝәки әԝ мәрьвед кӧ мә али ԝан кьрийә, амьн дьминьн. Йуһʹәннайе шанди ньвиси: «Шабуна мьнә жь ве мәстьр тʹӧнә, чахе дьбьһем кӧ зарʹед мьн нава рʹастийеда дьжин» (3 Йуһʹн. 4). Гәләк пешәнг зәʹф ԛәԝи дьбьн, чахе педьһʹәсьн кӧ әԝ мәрьв, кʹижанарʹа ԝана аликʹари дайә кӧ бенә сәр рʹийа рʹаст, бәрдәԝам дькьн амьн бьминьн у дьбәкә бунә пешәнг жи. Ләма жи чахе әм дьвиньн кӧ пешәнг дьлтәнг ә, әм дькарьн кьред ԝийи баш биньн бира ԝи, кӧ әԝи аликʹари дайә йед майин.

15. Диса чь щурʹә әм дькарьн дьлгәрм кьн ԝана, йед кӧ бь амьни хьзмәт дькьн?

¹⁵ Гәләк бәрпьрсийаред мьһале дьбежьн, кӧ әԝана у жьнед ԝан гәләк дьлгәрм дьбьн, чахе нәʹмед рʹазибуне дьстиньн жь хушк-бьра паши тʹәсәлийа щьвате. Рʹуспи, мисйонер, пешәнг у хьзмәткʹаред Бәйтʹәле жи гәләк ша дьбьн у ԛәԝи дьбьн чахе хушк-бьра пе гьлийа рʹазибуна хԝә ԝанрʹа дьдьнә кʹьфше.

16. Диса чь дькʹәвә нава дьлдайине?

¹⁶ Дьԛәԝьмә мәрʹа чәтьн ә бәр дьле кәсәкида бен у ԝи ԛәԝи кьн, ле бь рʹасти гәләк тьшт нәлазьм ә сәва ве йәке. Мәсәлә, әм дькарьн бь бәшәра хԝәш кәсәки сьлав кьн. Ле һәрге әԝ мәрьв мәрʹа накʹәнә, дьԛәԝьмә проблемед ԝи һәнә, у жерʹа лазьм ә гӧһ бьдьне, ӧса әме бәр дьле ԝида бен (Аԛуб 1:19).

17. Бьраки мәйи щаһьл чаԝа аликʹари станд чахе дьлтәнг бу?

¹⁷ Һенри, бьраки мәйи щаһьл, гәләк дьлтәнг бу чахе мәрьвед ԝийи незик у баве ԝи кӧ рʹуспи бу, рʹасти  һиштьн. Бәрпьрсийаре мьһале чахе әԝ йәк дит, ԝи тʹәглифи кафе кьр сәва тʹәви ԝи хәбәр дә. Әԝи мәщал да кӧ Һенри дьле хԝә жерʹа вәкә у хәмед хԝә жерʹа гьли кә. Һенри фәʹм кьр, ԝәки әԝ дькарә али малбәта хԝә бькә кӧ диса вәгәрʹьн рʹастийе, һәрге әԝ бәрдәԝам кә бь амьни Хԝәдерʹа хьзмәт кә. Әԝ гәләк дьлгәрм бу чахе хԝәнд рʹезед жь Зәбур 46; Сефанйа 3:17; у Марԛос 10:29, 30.

18. а) Сьлеман Пʹадша чь ньвиси дәрһәԛа дьлдайине? б) Кʹижан ширәта Паԝлос әм дькарьн бьдьнә хәбате?

¹⁸ Мәсәла хушка мә бәʹса кʹижане мә жоре кьр у ӧса жи йа Һенри, нишан дькьн, ԝәки һәр кәс жь мә дькарә бәр дьле мәрьвада бе. Сьлеман Пʹадша ньвиси: «Чьԛас хԝәшә һәр хәбәр ԝәхте хԝәда! Рʹонайа чʹәʹва дьл ша дькә, мьзгинийа хер жи һәстуйа дьшьдинә» (Мәтʹлк. 15:23, 30). Әм дькарьн әԝед кӧ дьлшкәсти нә бьшьдиньн, мәсәлә һәрге жь «Бьрща Ԛәрәԝьлийе», йан жи жь малпәра мә тьштәки ԝанрʹа бьхуньн. Паԝлос гот кӧ чахе әм тʹәвайи кʹьламед Пʹадшатийе дьстьрен, ӧса әм һәвдӧ дьлгәрм дькьн. Әԝи ньвиси: «Бь һʹәму сәрԝахтийе ль һәв һин кьн у ширәт кьн, зәбура у һәр щурʹә стьранед рʹӧһʹани бь шькьрдари дьле хԝәда бона Хԝәде бьстьрен» (Колс. 3:16; Кʹар. Шанд. 16:25).

19. Чьрʹа мәрʹа ԝе һе лазьм бә дьл бьдьнә бәр һәв?

¹⁹ Әм дьвиньн кӧ рʹожа Йаһоԝа гәләк «незик дьбә», мәрʹа ԝе һе зедә лазьм бә дьл бьдьнә һәвду у һәв бьшьдиньн (Ибрн. 10:25). Ләма жи ԝәрә әм ве ширәта Паԝлос бьдьнә хәбате: «Дьл бьдьнә һәв у аликʹарийа һәвдӧ бькьн, чаԝа һун дькьн жи» (1 Тʹеслн. 5:11).