1. Muloñadi kapostolu Pawulu chayikonkomweneniyi akwaKritu aHeberu kudikolesha wumu namukwawu ‘nankashi’?

MULOÑADI chitwatela kuzatila nañovu kulonda tukolesheña akwetu? Kapostolu Pawulu washimwini mumukanda windi wasonekeleliyi akwaKristu aHeberu chuma chacheni chitwatela kukoleshela akwetu. Wayilejeli nindi: “Tudakameneña wumu namukwawu kulonda tudisañumuni wumu namukwawu kumwekesha kukeña nikukoña nyidimu yayiwahi, bayi tujiñaña kukupompa kwetu neyi chelañawu antu amakwawuku, ilaña tudikolesheña wumu namukwawu, sweje-e dinu nanochu chimunamoni nenu ifuku odu dinakuswina kwakwihi.” (Heb. 10:24, 25) Muyaaka yitanu hohu, akwaKristu aYudeya ashakamineña muYerusalema amweni “ifuku daYehova” chidaswinineña kwakwihi nawa amweni yinjikijilu yayilejeliyi Yesu nindi neyi yinamwekani akafumi munona musumba kulonda akapuluki. (Yilw. 2:19, 20; Luka 21:20-22) Idi ifuku daYehova dashikili mu 70 C.E. hashikijiliwu aRoma wunsompeshi waYehova kuhitila mukujilumuna Yerusalema.

2. Muloñadi chitwatela kusweja kuditoñojokelañaku wumu namukwawu makonu?

 ² Makonu, tukweti wunsahu wawuvulu watukwashaña kwiluka netu ifuku daYehova didi kwakwihi “dakutiya woma nankashi.” (Yoweli 2:11) Kaprofwetu Zefwaniya wahosheli nindi: “Ifuku daYehova deneni didi kwakwihi, didi kwakwihi, didi nakunyakala nankashi.” (Zef. 1:14) Iku kusoñamisha kuchidi kuzatika nimuyinu mpinji. Hahosheleñayi hakuswina kwefuku daYehova, Pawulu watuleja nindi “tuditoñojokeleña, wumu namukwawu kumwekesha kukeña nikukoña nyidimu yayiwahi.” (Heb.10:24, tth) Dichi, twatela kusweja kukeña amanakwetu kulonda tuyikolesheña mpinji yejima.

3. Kapostolu Pawulu washimwini nindidi kutalisha hakukolesha? (Talenu mwevulu wakutachikilahu.)

³ “Kaneñu mumuchima wamuntu kaleta kuzembesha nyima; ilaña izu dadiwahi daletesha kutiya kuwaha.” (Yish. 12:25) Chumichi chatumwekenaña wejima wetu. Nawa wejima wetu twakeñaña kutukolesha mpinji yejima. Pawulu wamwekesheli nindi nimuntu wakoleshaña akwawu wakeñekaña kumukolesha. Wayisonekeleli akwaKristu ashakamineña muRoma nindi: “Inakufwila chikupu kuyimona, nakayinki yawaana yakuspiritu kulonda mwakakoli mbe-e; hela nami twakadikoleshi, muntu-himuntu nachikuhwelelu chamukwawu, dikwila nawu chenwenu nichamami.” (Rom. 1:11, 12) Eña, Pawulu wakolesheleña akwawu ilaña mpinji yikwawu niyena wakeñekeleña kumukolesha.—Tañenu Aroma 15:30-32.

4, 5. Anyi itwatela kukolesha makonu, nawa muloñadi?

⁴ Antu adihanaña akeñekaña kuyikolesha. Hakachi kanawa antu hadi apayiniya ashinshika. Amavulu adibonda yuma yimu kulonda akalakaliku mudimu wawupayiniya. Amishonali, azatilaña haBeteli, ankoñi añiza niañodi jawu niazatilaña hatusanji twakubalumwina niwena ela chuma chochimu. Wejima wawu adibonda yuma yimu yamuchihandilu kulonda azateña mpinji yeneni mumudimu wajila. Dichi, akeñekaña kuyikolesha. Ninawa achidi nampwila yakuzataku mudimu wampinji yejima ilaña aleka mudimu wawu muloña wakuhimpika kwayuma akeñekaña kuyikolesha.

⁵ Amanakwetu niahela anatwalekihu kushakama wujiki muloña wakulondela kufumba kwakusumbula hela kusumbukila “chiña hohu mudi Mwanta,” niwena akeñekaña kuyikolesha. (1 Kor. 7:39) Munjila yoyimu, ambanda adikitaña chikupu atiyaña kuwaha neyi ayihamekaña kudi anfumu jawu. (Yish. 31:28, 31) Cheñi, akwaKristu omikaña makabisha hela yikatu niwena akeñekaña kuyikolesha. (2 Tes. 1:3-5) Yehova niKristu ayikundejaña awa ambuña ejima ashinshika.—Tañenu 2 Atesalonika 2:16, 17.

6. Mudimwinyi wukwetiwu aeluda kwesekeja nachinashimuniwu ha Isaya 32:1, 2?

⁶ Tañenu Isaya 32:1, 2. Yesu Kristu wakoleshaña nikulombola ananeñi nianazeyi muyinu mpinji yakala, wazatishaña amanakwetu awayishewa ‘niatulamba’ ahadi anyikoku acheñi. Niaeluda dichatela kwilawu, bayi neyi “hiyanyanta” hachikuhwelelu chawakwawuku ilaña ‘hiyakwakukalakala hamu nawu’ kulonda amanakwawu azañalaleña.—2 Kor. 1:24.

7, 8. Kubombela hamazu akukolesha, yumanyi yikwawu yatela kwilawu aeluda?

⁷ Kapostolu Pawulu watuleja yuma yitwatela kwila. Wayisonekeleli akwaKristu akabishileñawu muTesalonika nindi: “Chineli twayikeñeli nankashi, hitwafwilileña hohu kuyileja enu nsañu yayiwahi yaNzambiku, ilaña twahanini  nimawumi etu muloña twayikeñeli chikupu.”—1 Tes. 2:8.

⁸ Pawulu wamwekesheli nindi izu dakukolesha hadu hidinateli kukwasha muntu mpinji yejimaku. Dichi wayilejeli aeluda amuEfwesesa nindi: “[Mwatela kukwasha] antu azeya nawa mwatela kwanuka mazu aMwanta Yesu, chahosheliyi yomweni nindi: ‘Mukuhana mwekala muzañalu chikupu kubadika wekala mukutambwila.’” (Yilw. 20:35) Pawulu hafwilileña hohu kukolesha amanakwindiku ilaña ‘wadihanini yomweni kukoola wena’. (2 Kor. 12:15) Munjila yoyimu, aeluda hiyatela kukolesha nikuyizañalesha amanakwawu namazu hohuku ilaña atela kuyikolesha kuhitila mukuyimwekeshela kukeña.—1 Kor. 14:3.

9. Aeluda anateli kufumba ñahi munjila yayiwahi?

⁹ Mukudituña wumu namukwawu mwabombela kufumba, hela chochu aeluda atela kulondela yakutalilahu yekala muBayibolu yashimuna chakufumba munjila yakukolesha. Hanyima yakufwa nikusañuka kwindi, Yesu wamwekesheli chitwatela kufumba muntu munjila yayiwahi. Wafumbili yipompelu yimu yamuAsia Minor chakadi kuhita mumbadi, ilaña talenu chayifumbiliyi. Henohu kanda yayifumbi, wahamekeli chikupu chipompelu chamuEfwesesa, muPerigamu nichamuTiyatira. (Chim. 2:1-5, 12, 13, 18, 19) Walejeli chipompelu chamuLayodikeya nindi: “Antu ejima inakeña, nayizuwilaña nikuyibabesha. Dichi ikalaku neyena nawa balumukaku mumuchima.” (Chim. 3:19) Aeluda atela kumwimbujola Kristu hakufumba muntu.

10. Wejima wetu tunateli kudituña ñahi wumu namukwawu?

¹⁰ Mudimu wakukolesha bayi neyi wawaeluda hohuku. Pawulu wayikonkomweneni akwaKristu ejima kuhosha mazu “amawahi anateli kutuña [akwawu] hampinji yinakukeñawu kuyikwasha kulonda atweshi kuhetesha” amakwawu.  (Efwe. 4:29) Dichi wejima wetu twatela kufwila kwiluka yuma “yinakukeñawu” akwetu. Pawulu wayifumbili akwaKristu aHeberu nindi: “Koleshenu makasa alepuka nimanuñu azeya, nawa twalekenuhu kwolola njila jakwendamu nyendu yenu, kulonda chiidi chawufwayi chibuli kusopoka mwinuñi, ilaña chuukewi.” (Heb. 12:12, 13) Wejima wetu kushilahu niatwansi, twatela kudituña wumu namukwawu namazu akukolesha.

11. Marthe amukolesheli ñahi hampinji yaneñeliyi?

¹¹ Marthe, * muhela wakabakeni hadi mpinji yayilehi nachineñi, wasonekeli nindi: “Ifuku dimu nakeñeleña muntu wakunkolesha, Muhela wakashinakaji wammwekesheleli kukeña niwushona, wankwashili hampinji yatelela. Wanlejeliku cheñi yuma yamumwekeneni yadifwana nakukala kunahitileñamu nawa nakundejeweli chikupu.” Hela chochu, muhela kashinakaji welukili wanyi nindi mazwindi akumukolesha Marthe.

12, 13. Tunateli kuzatisha ñahi mazu ekala haAfwilipi 2:1-4?

¹² Pawulu wayilejeli antu ejima amuchipompelu chamuFwilipi nindi: “Neyi munakudikolesha mudi Kristu, neyi munakudikundeja mukukeña, neyi munakudikunda kuspiritu, neyi munakudikeña nikuditiyila wushona, dichi nzañaleshenuña chikupu kuhitila mukwikala nayitoñojoka yoyimu, nikukeña kwokumu, nikunuñañana chikupu, nikutoñojoka mwomumu. Bayi mukoña chuma hela chimu nantaadi hela nakudivwimba kwamukunkulwayiku, ilaña dizozenuña nakumona akwenu nenu ayibadika enu, iku munakufwila yuma bayi yayitiyishaña kuwaha enu aweni hohuku, chiña yuma yatiyishaña kuwaha niakwenu.”—Fwi. 2:1-4.

¹³ Dichi, wejima wetu twatela kufwilla kwila yuma yayitiyishaña akwetu kuwaha, yidi neyi “kudikundeja mukukeña,” “kudikunda kuspiritu” “nikudikeña nikuditiyila wushona” kulonda tukolesheña amanakwetu niahela.

14. Yumanyi yinateli kutukolesha?

¹⁴ Twakoleshewaña chikupu neyi tutiya nawu antu itwakwashili kunyima anatwalekihu kwikala ashinshika, neyi chatiyiliyi kapostolu Yowanu wasonekeli nindi: “Kwosi chuma chikwawu chanzañaleshaña chikupu kubadika ichi chakutiya nawu: anyanami anatwalekihu kwenda muchalala.” (3 Yow. 4) Apayiniya amavulu atiyaña kuwaha neyi atiya nawu antu iyadizishiliwu chalala kunyima anatwalekihu kwikala ashinshika nawa hadaha amakwawu hiyapayiniya. Neyi tumwanukisha payiniya wunazeyi muzañalu wadiñayi nawu kunyima nateli kukoleshewa.

15. Tunateli kuyikolesha ñahi antu azataña nakashinshi?

¹⁵ Ankoñi añinza amavulu hamu niañodijawu ashimunaña chakoleshewañawu neyi atambwila mukanda wakuyisakilila chiyendeleleliwu chipompelu. Dichatiyañawu niaeluda, amishonali, apayiniya, niamamembala amuchisaka chaBeteli neyi ayisakilila hanyidimu yawu yazatañawu nakashinshi.

16. Munateli kukolesha ñahi muntu?

¹⁶ Chikwikala chaluwa neyi tutoñojokaña netu tunateli kukolesha akwetu wanyi muloña wakwila hitwahanjekaña nawuku. Kukolesha muntu kwakala wanyi. Munateli kukolesha muntu kuhitila mukutumba chimwemweta hakumwimusha. Neyi yabula kutumba chimwemweta, dikwila nawu wudi nakukala, nawa neyi muhanjeka nindi nikumutiyilila nateli kukoleshewa.—Yak. 1:19.

17. Manakwetu wumu wakansi amukwashili ñahi hampinji yaneñeliyi?

 ¹⁷ Henri manakwetu wakansi, waneñeli nankashi chelili antaña jindi kushilahu tuhu niatata yindi adiña aeluda hadi yaaka yayivulu afumi muchalala. Henri amukolesheli kudi nkoñi wañinza wamusendeli kuya nakunwina hamu kofi, nawa wamulejeli kulumbulula chatiyileñayi. Henri welukili nindi njila yimu munateli kukwashilayi antaña jindi kufunta muchalala hikutwalekahu kwikala washinshika. Wakolesheweli chikupu chatañiliyi Masamu 46; Zefwaniya 3:17 niMaku 10:29, 30.

18. (a) Chumanyi chelukiliyi Mwanta Solomoni? (b) Kapostolu Pawulu washimwini nindidi?

¹⁸ Chakutalilahu chaMarthe niHenri chinamwekeshi nawu tunateli kukolesha manakwetu hela muhela wunakukeñeka kumukolesha. Mwanta Solomoni wasonekeli nindi: “Izu dakuhoshela hadu hidinateleli o chidawaha! Kumesu hikutooki to-o nimumuchima to-o; nsañu yayiwahi yaleteshaña manji mumafwaha.” (Yish. 15:23, 30) Kubombelahu, muntu wunaneñi nateli kukoleshewa neyi yataña muKaposhi Kakutalila hela yaya hawebusayiti yetu. Pawulu wamwekesheli nindi kwimbila hamu tumina twaWanta kunateli kutukolesha. Wasonekeli nindi: “Ditañishenuña nikudikolesha wumu namukwawu namasamu, muhamekenuña Nzambi, imbenuña tumina twakuspiritu nakusakilila, mwimbilenuña Yehova munyichima yenu.”—Kol. 3:16; Yilw. 16:25.

19. Muloñadi chitwatela kusweja kudikolesha wumu namukwawu mafuku anakwinza, nawa twatela kwiladi?

¹⁹ Tuswejenu kudikolesha wumu namukwawu nanochu chitunakumona netu ifuku daYehova “dinakuswina kwakwihi.” (Heb. 10:25) Neyi chayilejeliyi Pawulu akwawu akwaKristu amumafuku indi nindi: “Dikoleshenuña wumu namukwawu nikudituña wumu namukwawu neyi chimunakwila.”—1 Tes. 5:11.