1. Mwafwa vika kapositolo Paulu washongangeyeye vaka-Kilisitu va Vahevelu valitakametha umo na mukwavo “na kuhyana”?

MWAFWA vika tunapande kwaka mbunge ku kutakametha vakwetu? Kapositolo Paulu wathonekele vitunapande kulingila ngocho mu mukanda wathonekelele vaka-Kilisitu va Vahevelu. Wavalekele ngwendi: “Ngechi vene, tuliyongoleni umo na mukwavo na kulikwatha umo na umo na kumwetha chithzemo na kulinga mwamuvwa. Kethi tulikele kulikungulula hamo lika, ngwe futithi ya vamo. Oloni tulikoletheni umo na mukwavo na kuhyana, omwo litangwa lya Mwene lili muyehi.” (Heve. 10:24, 25) “Litangwa” lya Yehova lyethzile kuli vaka-Kilisitu va Vayunda vaje vakele mu Yelusalema thimbu kanda myaka 5 ihwe, cho vaje vanangukile vithzivukitho vya kwija kwalyo, vije vyendekele Yesu vatewele muje mu nganda. (Vili. 2:19, 20; Luka 21:20-22) Eli litangwa lya Yehova lyethzile mu mwaka wa 70 C.E. omwo Valoma vethzile na kulwitha Yelusalema.

2. Mwafwa vika tunapande kwaka manene mbunge ku kulitakametha umo na mukwavo?

² Ano matangwa, netu tunatava ngwetu “litangwa lya vukalu” vwa  Yehova lili muyehi. (Njwe. 2:11) Kapolofweto Zefaniya wendekele ngwendi: “Litangwa lije omwo Shukulu Kalunga akathompa vanu lili muyehiyehi, lili na kwija vwathi vwathi.” (Zefa. 1:14) Ovu vupolofweto netu vunatukundama ano matangwa. Paulu wendekele ngwendi kwapwa kwa theho ‘kuliyongola umo na mukwavo na kumwetha chithzemo na kulinga mwamuvwa,’ mwafwa litangwa lya vutenu vwa Yehova lili muyehi. (Heve. 10:24) Ngechi, tunapande kuthzema vandolome vetu mangana tuvatakamethe thimbu yoshe.

3. Kapositolo Paulu wendekele vika ha kulitakametha umo na mukwavo? (Kengeni chikupulo ha liputa 20)

³ “Chishota mbunge chapwa chitele cha kulema, oloni majwi a ngothzi anena kuvwahelela.” (Vithi. 12:25) Echi chikalingiwa kuli yetu tuvavoshe. Tuvavoshe twatonda kututakametha thimbu yoshe. Paulu wamwethele ngwendi nameme vaje vakatakametha vakwavo navo vanapande kuvatakametha. Mukemwo wathonekelele vaka-Kilisitu va mu Loma ngwendi: “Omwo njishaka manene kumimona, njakumyane vwana vwa vivethzikitho vya mundthzindthzime mu kumitakametha. Njendeka ngechi neni nange twakulitakamethe ha thimbu imo lika, yeni ha kukulahela kwange nange ha kukulahela kweni.” (Loma 1:11, 12) Paulu uje wakele na kutakametha vakwavo, nendi vamutakamethele vithimbu vimo.—Tandeni Loma 15:30-32.

4, 5. Veya vatunapande kutakametha ano matangwa, cho mwafwa vika?

⁴ Tunapande kuthzumbangeya vaka-Kilisitu vaje vanalyana mu vipangi vya kulithethzathethza. Vamo vapwa vapainiya va kulongwa. Vavangi vanalyana kwechela kulinga vyuma vimo mangana vapwe vapainiya. Vikevyo vivanalingi na vamishinali na vaka-kupanga ha Mbetele na vantwama va kuthzenguluka na vanakathzi vavo na vaje vakapangela ha ofisi ya kutengulwila. Voshe vanalyana mangana vapange chipangi cha kujela na mbunge imo lika. Ngechi, tunapande kuvatakametha. Tunapande kutakametha lalo vaje vali na lishungu lya kupanga vipangi vya thimbu yoshe mu munga ya Njambi, oloni vanonwa mwafwa ya vyuma vimo.

⁵ Tunapande kutakametha vandolome na vandokathzi vaje vapwa vathzike omwo vali na kuvandamena ‘kushomboka nambe kulyambata na muka-Yesu.’ (1 Koli. 7:39) Vanakathzi va kushomboka vaje vakapanga na ndthzili, navo vakalithzivi mwamuvwa nga vanalume vavo vavashangathzala. (Vithi. 31:28, 31) Tunapande lalo kutakametha vaka-Kilisitu vaje vali na kulifwita na tuyando na mishongo mu kulongwa. (2 Tesa. 1:3-5) Yehova na Kilisitu vakatakametha ava vaka-Kilisitu va kulongwa.—Tandeni 2 Tesalonika 2:16, 17.

6. Vika vivakalingi vakulunu vaje vavanendeka ku Isaya 32:1, 2?

⁶ Tandeni Isaya 32:1, 2. Yesu Kilisitu akapangetha vandolome vendi va kuvwavetha na “vantwama” vaje vali mu vutanga vwa vimanga veka, vakatakametha na kutwamenena vaje vanathzeye na kupokoka vimbunge muno mu matangwa a kukotoka. Vakulunu kuvethi ‘kuthindiya’ vakwavo vaka-kukulahela, oloni ‘vakapangela hamo’ lika na vandolome vavo mu kuvwahelela’.—2 Koli. 1:24.

7, 8. Vyuma muka vikwavo vivanapande kulinga vakulunu mu kutakametha vakwavo?

⁷ Kapositolo Paulu watwakelele mwanja wauvwa utunapande kukavangeya. Wathonekelele vaka-Kilisitu va ku Tesalonika vaje vakele mu mapaketho ngwendi: “Omwo ha chithzemo chetu kuli yeni, twalivwahethela ngechi tulipangethzele neni hamo, kethi lika viñanda vyavivwa vya kutunda kuli Njambi, oloni na myonyo yetu lalo. Omwo yeni munapu vaje vatwathzema manene.”—1 Tesa. 2:8.

 ⁸ Paulu walekele vakulunu va ku Efeso mu kumwetha ngwendi kuvapandele lika kutakametha vakwavo na majwi. Wavathonekelele ngwendi: “Tunapande kukwatha vaka-kuthzeya, kwanuka majwi aje Mwene Yesu vavenya wendekele ngwendi, ‘Muli ku kujolela kwakama manene mu kwana kutuvakana mu kutambula.’” (Vili. 20:35) Paulu katakamethele lika vandolome vendi, oloni walyanene ‘ikeye vavenya mu kuvakwatha.’ (2 Koli. 12:15) Na matangwa ano, vakulunu kuvapandele kushongangeya na kutakametha vandolome vavo na majwi lika, oloni vanapande kuvakwatha.—1 Koli. 14:3.

9. Vakulunu vatha kunangula vati mu ngila yaivwa?

⁹ Kutakametha vakwetu kunambatethelela na kuvanangula, oloni vanapande kukavangeya mwanja wa mu Mbimbiliya uje umwetha ngila yaivwa ya kunangwilamo. Yesu wamwethele mwanja wauvwa mwakulingila ngocho omwo wathangukile. Yesu wanangwile vaka-Kilisitu vaje vakele mu vikungulukilo vya mu Asia Minor, cho tuchimoneni mwavanangwililemo. Thimbu kanda avanangule, washangumukile tahi kushangathzala vaka-Kilisitu va mu chikungulukilo cha Efeso na Pelengamu na Tiyatila. (Kujo. 2:1-5, 12, 13, 18, 19) Walekele chikungulukilo cha Laondisiya ngwendi: “Yange njivindika na kunyanyametha vaje voshe vanjathzema. Ngechi vene, nyanyameni, cho tengulukeni ku vivi vyeni.” (Kujo. 3:19) Vakulunu valinga mwamuvwa nga vatembwinina Kilisitu omwo vanangula vakwavo.

10. Tuvavoshe twatha kulitakametha vati umo na mukwavo?

¹⁰ Chipangi cha kutakametha kuchapwile cha vakulunu lika. Paulu wanangwile vaka-Kilisitu voshe ngwendi vapangethe ‘majwi amavwa a kukwatha, aje atha kutunga na kwana vakwavo vije vivanajeneka, ngechi vyoshe vivendeka vipwe vyavivwa.’ (Efeso 4:29) Tuvavoshe tunapande kunanguka ‘vujene’ vuvali navwo vakwetu. Paulu wanangwile vaka-Kilisitu va Vahevelu ngwendi: “Junduleni mavoko eni aje  anatepuka, cho koletheni mavuli eni a kuthzeya. Endeni mu vingila vya kuthungama, ngechi lindi lije lya vulema kethi litanuke.” (Heve. 12:12, 13) Tuvavoshe twatha kulitakametha umo na mukwavo, ipwe tuvanike nambe tuvakulunu.

11. Marthe vamutakamethele vati ha thimbu yalithzivile kuthzeya?

¹¹ Ndokathzi Marthe, * uje wathzeyele, wathonekele ngwendi: “Litangwa limo munjalombelele kuli Njambi ngwange anjitakamethe, njaliwanene na ndokathzi wa kakulukathzi uje wanjithzivilile ngothzi na mema ku mbunge, cho njatakamene. Wanjilekele lalo na vyuma vyaliwanene navyo mu vuyoye vwendi nomwo njapandele kukolethela vukalu vunjakele navwo, cho oku kwanjitakamethele manene.” Majwi endekele uje ndokathzi wa kakulukathzi akwathele manene ndokathzi Marthe.

12, 13. Ngila muka yaivwa itwatha kupangethelamo majwi ali ku Filipu 2:1-4?

¹² Paulu wanangwile vaka-Kilisitu va mu Filipu ngwendi: “Myonyo yeni muli Kilisitu ili na kumyana ndthzili, na chithzemo chendi chili na kumithzembeleka. Muli na kulitombola na mundthzindthzime, cho muli na mbunge ya ngothzi na kulitetela umo na mukwavo. Ngechi vene, njimilambelela munjithzivithe kuvwaha ha kukala na viyongola vimo na kulipangethzela chithzemo chimo, na kupwa chuma chimo mu mwonyo na mu mana. Kethi mulinge chuma chimo na viyongola vya chipululu, nambe na mashungu a kulishasha, oloni likehetheni ku mesho a umo na umo, thimbu yoshe yongoleni vakweni ngwe vanapu vavavwa kumihyana yeni. Thimbu yoshe shakethzekeni vije vyatha kuthzivitha kuvwaha vakweni veka lalo, kethi mulithzivithe kuvwaha yeni vavenya.”—Fili. 2:1-4.

¹³ Tuvavoshe tunapande kwetheka mutwathela mwoshe kupwa ‘vaka-kuthzembeleka vakwetu mu chithzemo’ na ‘kulitombola ku sipilitu’ na kuvathzivila ‘ngothzi’ omwo tuvatakametha.

14. Ngila muka itunatha kutakamethelamo vakwetu?

¹⁴ Kukatutakametha manene kuthziva mithzimbu yaivwa ya vanu vaje vatwakwathele. Mukemwo mwalithzivilile na kapositolo Yowano, cho wathonekele ngwendi: “Kukwethi chimo chinjinenela kuvwahelela kutuvakana kuthziva ngwavo vana vange vali na kuyoya mu vuthunga.” (3 Yowa. 4) Vapainiya vavangi vakalithzivi mwamuvwa muvakathzivi ngwavo vanu vamo vaje vavanalongetha vuthunga vali na kutwalelelaho kuyoya mu kulongwa, cho vamo vavo vanapu vapainiya. Nga twanukitha painiya uje nathzeye vyuma vyavivwa vyalikuwile kunima, cho atakama.

15. Ngila muka ikwavo itunatha kutakamethelamo vangamba va Njambi va kulongwa?

¹⁵ Vantwama vavangi va kuthzenguluka na vanakathzi vavo vakakanyama ku sipilitu omwo vakatambula tumikanda twa kukandelela ku vungendthzi vwavo vwa kwendela chikungulukilo. Mukemwo muvakalithzivila na vakulunu na vamishinali na vapainiya na vaka-nanga ya Mbetele muvakavashangathzala ha chipangi chivali na kupanga mu kulongwa.

16. Vyuma muka vitunatha kulinga mangana tutakamethe vakwetu?

¹⁶ Kunapu kuthevuka kuthinganyeka ngwetu kutwatha kutakametha vakwetu mwafwa kututhzivuka mwamuvwa kwendeka. Kukwethi vyuma vyavingi vitunapande kulinga mu kutakametha vakwetu, nameme kuvamwethwila lika kunatha kuvatakametha. Nga munu itumwethwila shendi kumwethula, hamo kuli vukalu vumo vunamukwata. Ngechi, kumutolilila kunatha kumutakametha.—Yako. 1:19.

17. Ndolome umo wawanene kuli vukwathi mu thimbu yathzeyele?

 ¹⁷ Ndolome Henri wathzeyele manene omwo vaishe vaje vapwile vakulunu mu chikungulukilo na vavushoko vwendi vechelele kulikwatathana na Vakaleho. Ntwama umo wa kuthzenguluka walanyele Henri akanwe nendi kofi ku chitanda, cho wamulombele ngwendi athzituke kumuleka vyoshe vili mu mbunge yendi. Henri wanangukile ngwendi ngila ya kukwathelamo vavushoko vwendi kwiluka mu vuthunga inapu kukolethela echi chetheko. Kutanda mukanda wa Myatho 46; na Zefaniya 3:17; na Mako 10:29, 30 kwamuthzembelekele manene.

18. (a) Mwene Solomoni wendekele vika? (b) Kapositolo Paulu wendekele ngwendi tulinge vika?

¹⁸ Mwanja wa Marthe nou wa Henri umwetha ngwavo twatha kutakametha ndolome nambe ndokathzi uje nathzeye. Mwene Solomoni wathonekele ngwendi: “Kukumbulula chihula ha thimbu yaivwa, kunenela vanu kuvwahelela. Chihanga cha kujolajola, chithzivitha mbunge kuvwaha, na muthzimbu wauvwa, ukoletha muvila.” (Vithi. 15:23, 30.) Cho lalo, kutanda Kaposhi ka Kukengela nambe kutanda vyuma vili ha wembusaiti yetu kunatha kutakametha munu uje nathzeye. Paulu wamwethele ngwendi kwimba na vakwetu mwatho wa Vumwene kukatakametha. “Longetheni na kulinangula umo na mukwavo na mana oshe. Imbeni myatho ya kuthañulu na myatho na myatho ya mundthzindthzime, imbeni kuli Njambi na kukandelela mu vimbunge vyeni.”—Kolo. 3:16; Vili. 16:25.

19. Kulitakametha umo na mukwavo kukatukwatha vati kulutwe, cho twatha kulinga vati ngocho?

¹⁹ Kulitakametha umo na mukwavo kwapwa kwa theho manene mwafwa litangwa lya Yehova “lili muyehi.” (Heve. 10:25) Tunapande kukavangeya majwi a Paulu aje endekele kuli vaka-Kilisitu va mu thimbu yendi ngwendi: “Litakametheni umo na mukwavo na kulikwatha umo na mukwavo ngwe muje mu muli na kulinga ololo.”