1. ¿Nda̱chun ni̱ka̱ʼa̱n ta̱ Pablo xíʼin na̱ hermano na̱ hebreo ña̱ ná taxinína ndée ndaʼa̱ táʼanna?

TIEMPO vitin xíniñúʼu taxiyó ndée ndaʼa̱ táʼanyó. ¿Nda̱chun? Nu̱ú carta ña̱ ka̱ʼyí ta̱ apóstol Pablo ku̱a̱ʼa̱n ndaʼa̱ na̱ hebreo ni̱ka̱ʼa̱nra: “Kundi̱ʼi̱-iniyó xa̱ʼa táʼanyó ta ná kuʼvi̱ka-iniyó kuni táʼanyó ta keʼéyó ña̱ va̱ʼa xíʼin táʼanyó, ta kǒo sándákooyó ña̱ ndatakayó reuniónyó, táki̱ʼva íxaa inkana, ná taxikayó ndée ndaʼa̱ táʼanyó, saáchi vitin xa̱a̱ ku̱yatin kixa̱a̱ ki̱vi̱” (Heb. 10:24, 25). Tá ná ya̱ʼa u̱ʼu̱n ku̱i̱ya̱, na̱ hermano kán kunina kixa̱a̱ ki̱vi̱ ña̱ ndiʼi-xa̱ʼa ñuu Jerusalén. Kunda̱a̱-inina xa̱a̱ ku̱a̱ʼa̱n xínu profecía ña̱ ni̱ka̱ʼa̱n ta̱ Jesús ta xíniñúʼu keena ñuu kán (Hech. 2:19, 20; Luc. 21:20-22). Ki̱vi̱ kán ki̱xa̱a̱ña ku̱i̱ya̱ 70, tá sa̱ndiʼi-xa̱ʼa na̱ ñuu Roma na̱ ñuu Jerusalén.

2. ¿Nda̱chun xíniñúʼu kiʼinníyó kuenta ña̱ va̱ʼa taxiyó ndée ndaʼa̱ táʼanyó?

² Tiempo vitin, xa̱a̱ kúnda̱a̱ va̱ʼa iniyó ña̱ xa̱a̱ yatin va̱xi ki̱vi̱ Jehová, ta káʼnuní koo ña̱yóʼo ta nda̱a̱ yi̱ʼvíyó xíʼinña (Joel 2:11). Ta ña̱ káʼa̱n Sofonías 1:14 xínutuña tiempo vitin: “Ña̱ ki̱vi̱ káʼnu Jehová xa̱a̱ yatin va̱xiña. Xa̱a̱ yatin va̱xiña, ná kundi̱ʼi̱-iniyó xa̱ʼaña”. Xa̱ʼa ña̱yóʼo ta̱ Pablo káʼa̱nra xíʼinyó: “Ná kundi̱ʼi̱-iniyó xa̱ʼa táʼanyó  ta ná kuʼvi̱ka-iniyó kuni táʼanyó ta keʼéyó ña̱ va̱ʼa xíʼin táʼanyó” (Heb. 10:24). Ña̱yóʼo kúni̱ kachiña, ña̱ xíniñúʼu kiʼinníyó kuenta xíʼin na̱ hermanoyó ña̱ va̱ʼa taxiyó ndée ndaʼa̱na tá xíniñúʼunaña.

3. ¿Ndáaña ni̱ka̱ʼa̱n ta̱ apóstol Pablo xa̱ʼa ña̱ taxiyó ndée ndaʼa̱ inkana? (Koto na̱ʼná ña̱ va̱xi chí xa̱ʼa).

³ Ña̱ Biblia káchiña “ña̱ ndíʼi̱ní-ini na̱ yiví kúú ña̱ sákusuchí-inina, soo tu̱ʼun va̱ʼa kúú ña̱ sákusi̱í-inina” (Prov. 12:25). Ndiʼivayó xíniñúʼu ña̱ taxina ndée ndaʼa̱yó. Ta̱ Pablo ni̱ka̱ʼa̱nra nda̱a̱ na̱ táxi ndée ndaʼa̱ inkana xíniñúʼu taxituna ndée ndaʼa̱ na̱yóʼo. Xíʼin na̱ xi̱ndoo ñuu Roma ni̱ka̱ʼa̱nra ña̱yóʼo: “Kúni̱i̱ xa̱i̱ kotoi̱ ndóʼó, ña̱ va̱ʼa ka̱ʼi̱n xíʼinndó xa̱ʼa tu̱ʼun Ndióxi̱ ña̱ va̱ʼa ndakú ná koo inindó xíʼinña; ña̱ ndakutáʼanndó ta taxindó ndée ndaʼa̱ táʼanndó xíʼin ña̱ kándíxandó. Ta taxindó ndée ndaʼíi̱, ta yi̱ʼi̱ taxii̱ ndée ndaʼa̱ndó” (Rom. 1:11, 12). Táki̱ʼva xi̱niyó sava yichi̱ nda̱a̱ ta̱ Pablo xi̱niñúʼu ña̱ taxina ndée ndaʼa̱ra (kaʼvi Romanos 15:30-32). *

4, 5. ¿Ndáana xíniñúʼu taxiyó ndée ndaʼa̱ tiempo vitin, ta nda̱chun xíniñúʼunaña?

⁴ Ku̱a̱ʼání na̱ hermano chíka̱a̱nína ndée ta sava yichi̱ ku̱a̱ʼání ña̱ʼa ndákoona ña̱ va̱ʼa kachíñukana ku̱a̱ʼá tiempo nu̱ú Jehová. Na̱yóʼo kúú na̱ precursor, na̱ misionero, na̱ káchíñu Betel, na̱ superintendente ña̱ circuito xíʼin ñá síʼína, saátu na̱ hermano na̱ káchíñu oficina ña̱ traducción. Ndiʼi na̱yóʼo xíniñúʼu taxiyó ndée ndaʼa̱na. Inkatu na̱ hermano na̱ xíniñúʼu taxiyó ndée ndaʼa̱ kúú na̱ xi̱kuu precursor, soo vitin kǒo kívika keʼéna ña̱yóʼo.

⁵ ¿Ndáaka na̱ xíniñúʼu taxiyó ndée ndaʼa̱? Na̱ hermano xíʼin ná hermana na̱ ta̱ʼán tindaʼa̱, chi na̱yóʼo kándíxana consejo ña̱ tindaʼa̱na xíʼin na̱ káʼvi tu̱ʼun Ndióxi̱ (1 Cor. 7:39). Ná xa̱a̱ ti̱ndaʼa̱ xíniñúʼu ka̱ʼa̱n yiíná xíʼinná ña̱ kúni̱níra xíniraná ta ka̱ʼa̱nra xíʼinná ña̱ ndáyáʼviníná nu̱úra (Prov. 31:28, 31). Ta kǒo nandósoyó taxiyó ndée ndaʼa̱ na̱ yáʼa nu̱ú tu̱ndóʼo á na̱ kúúmií kue̱ʼe̱ (2 Tes. 1:3-5). Jehová xíʼin ta̱ Jesús táxira ndée ndaʼa̱ ku̱a̱ʼání na̱ hermano na̱ íyo nda̱kú-ini xíʼinra (kaʼvi 2 Tesalonicenses 2:16, 17). *

6. ¿Ndáa chiñu kúúmií na̱ anciano káchi Isaías 32:1, 2?

⁶ (Kaʼvi Isaías 32:1, 2). * Tiempo yo̱ʼvi̱ ndóoyó vitin, xa̱ʼa ña̱yóʼo sava yichi̱ kúsuchí-iniyó á ndákava-iniyó. Ta̱ Jesús táxira ndée ndaʼa̱yó ta xíniñúʼura na̱ “príncipe”, na̱yóʼo kúú na̱ anciano, kivi koona na̱ ku̱ʼu̱n chí ndiví á na̱ kundoo nu̱ú ñuʼú yóʼo. Na̱ anciano kǒo íxandi̱va̱ʼana xíʼin na̱ hermano, chi na̱ chíndeé táʼanva xíʼinna kúú na̱yóʼo. Na̱yóʼo kúni̱na chindeéna miíyó ña̱ va̱ʼa kusi̱í-iniyó ta nda̱kú koo iniyó xíʼin Ndióxi̱ (2 Cor. 1:24).

7, 8. ¿Ndáaña kivi keʼé na̱ anciano ña̱ va̱ʼa taxina ndée ndaʼa̱ na̱ hermano, ta su̱ví nda̱saa káʼa̱n kuitína xíʼinna?

⁷ Va̱ʼaní kéʼé na̱ anciano tá ndíku̱nna yichi̱ ta̱ apóstol Pablo. Ta̱yóʼo ka̱ʼyíra iin tutu ku̱a̱ʼa̱n ndaʼa̱ na̱ hermano na̱ xi̱ndoʼo tu̱ndóʼo na̱ ñuu Tesalónica ta ni̱ka̱ʼa̱nra xíʼinna: “Kúʼvi̱ní-inindi̱ xínindi̱ ndóʼó, ta xa̱ʼa ña̱yóʼo kúsi̱íní-inindi̱ ña̱ sa̱náʼa̱ndi̱ ndóʼó tu̱ʼun va̱ʼa xa̱ʼa Ndióxi̱, ta nda̱a̱ va̱ʼa kuvindi̱ xa̱ʼandó chi kúʼvi̱ní-inindi̱ xínindi̱ ndóʼó” (1 Tes. 2:8).

 ⁸ Ta̱ Pablo ni̱ka̱ʼa̱nra ña̱ sava yichi̱ su̱ví nda̱saa xíniñúʼu ka̱ʼa̱nyó tu̱ʼun va̱ʼa xíʼin inkana. Ni̱ka̱ʼa̱nra xíʼin na̱ hermano na̱ xi̱ndoo ñuu Éfeso: “Chindeéndó na̱ ndáʼvi, ta ndakaʼánndó xa̱ʼa tu̱ʼun ña̱ ni̱ka̱ʼa̱n tátayó Jesús, tá káchira: ʻTá táxiyó ña̱ʼa ndaʼa̱ inkana ndeéka kúsi̱í-iniyó ta su̱víka ña̱ ndákiʼinyóñaʼ” (Hech. 20:35). Ta̱ Pablo su̱ví nda̱saa ta̱xira ndée ndaʼa̱ na̱ hermano chi ku̱a̱ʼáníka ña̱ ke̱ʼéra. Ni̱ka̱ʼa̱nra xíʼinna: “Taxii̱ ña̱ kúúmiíi̱ ndaʼa̱ndó ta ndeéní kachíñui̱ ña̱ va̱ʼa chindeé táʼi̱n xíʼinndó” (2 Cor. 12:15). Saátu tiempo vitin na̱ anciano su̱ví nda̱saa xíniñúʼu ka̱ʼa̱nna tu̱ʼun va̱ʼa xíʼin inkana, chi xíniñúʼu keʼéna sava ña̱ʼa ña̱ va̱ʼa chindeéna na̱ hermano. Tá saá ná keʼéna na̱ʼa̱na ña̱ ndíʼi̱-inina xa̱ʼa na̱yóʼo (1 Cor. 14:3).

9. ¿Ndáaña chindeé na̱ anciano ña̱ va̱ʼa taxina consejo ndaʼa̱ inkana?

⁹ Ña̱ va̱ʼa taxi na̱ anciano ndée ndaʼa̱ na̱ hermano sava yichi̱ xíniñúʼu taxina consejo ndaʼa̱na á ka̱ʼa̱nna xíʼinna ndáaña va̱ása va̱ʼa kéʼéna. Tá kúni̱na kandíxa na̱ hermano ña̱ káʼa̱nna, xíniñúʼu kundiku̱nna consejo ña̱ va̱xi nu̱ú Biblia. Saátu ta̱xi ta̱ Jesús iin yichi̱ va̱ʼaní tá nda̱takura, tá ta̱xira consejo ndaʼa̱ sava na̱ congregación ña̱ Asia Menor xa̱ʼa ña̱ va̱ása va̱ʼa ke̱ʼéna. Ta na̱ congregación ña̱ Éfeso, Pérgamo xíʼin Tiatira siʼna ni̱ka̱ʼa̱nra tu̱ʼun va̱ʼa xíʼinna saáví ta̱xira consejo ndaʼa̱na (Rev. 2:1-5, 12, 13, 18, 19). Ta xíʼin na̱ congregación ña̱ Laodicea ni̱ka̱ʼa̱nra: “Yi̱ʼi̱ táxii̱ consejo ndaʼa̱ na̱ kúʼvi̱-inii̱ xínii̱. Xa̱ʼa ña̱yóʼo, chika̱a̱ ndée ta ndikó-iniún” (Rev. 3:19). Va̱ʼaníva kéʼé na̱ anciano tá ndíku̱nna yichi̱ ña̱ sa̱ndákoo ta̱ Jesús tá táxina consejo ndaʼa̱ inkana.

10. ¿Ndáaña kivi keʼé ndiʼiyó ña̱ va̱ʼa taxiyó ndée ndaʼa̱ táʼanyó?

¹⁰ Su̱ví iinlá na̱ anciano kúú na̱ xíniñúʼu taxi ndée ndaʼa̱ inkana. Ta̱ Pablo káʼa̱nra xíʼin ndiʼiyó ña̱ ná ka̱ʼa̱nyó tu̱ʼun va̱ʼa xíʼin táʼanyó ta ná ‘chika̱a̱yó ndée inkana ta chindeé táʼanyó xíʼinnaʼ (Efes. 4:29). Ña̱kán ndiʼiyó xíniñúʼu kiʼin kuenta xíʼin na̱ hermano ta kotoyó  ndáaña xíniñúʼuna. Ta̱ Pablo ni̱ka̱ʼa̱nra xíʼin na̱ hermano na̱ hebreo: “Ndasandakúndó ndaʼa̱ndó xíʼin koʼndondó ña̱ ku̱vitá, ta nandukúndó yichi̱ ña̱ nda̱kú, ña̱ va̱ʼa ná kǒo ta̱ʼnu̱ka xa̱ʼandó va̱ʼaka ná ndaʼaña” (Heb. 12:12, 13). Nda̱a̱ na̱ va̱lí kivi taxi ndée ndaʼa̱ inka na̱ hermano.

11. ¿Ndáaña chi̱ndeé táʼan xíʼin iin ñá hermana ñá kúsuchíní-ini?

¹¹ Ná kotoyó ndáa ña̱ ndo̱ʼo iin ñá Testigo ñá naní Marthe, * kue̱ʼe̱ ña̱ kúsuchíní-ini ki̱ʼin-ñaʼá. Ñáyóʼo ni̱ka̱ʼa̱nñá: “Iin ki̱vi̱ tá ndu̱kúi̱ ndée nu̱ú Jehová, nda̱ni̱ʼíi̱ iin ñá hermana ñá xa̱a̱ ku̱chée. Ñáyóʼo chi̱ndeéníñá yi̱ʼi̱, mií ña̱ xíniñúʼi̱ ke̱ʼéñá xíʼi̱n: ku̱ndáʼviní-iniñá xi̱niñá yi̱ʼi̱. Ni̱ka̱ʼa̱nñá xíʼi̱n ña̱ saátu ndo̱ʼo miíñá, tasaá kǒo níkusuchíka-inii̱”. Sana va̱ása níndakanixi̱ní ñá hermana ñá xa̱a̱ ku̱chée yóʼo ña̱ chi̱ndeéníñá ñá Marthe xíʼin tu̱ʼun ña̱ ni̱ka̱ʼa̱nñá xíʼinñá.

12, 13. ¿Ndáaña va̱ʼa keʼéyó ña̱ kundiku̱nyó consejo ña̱ va̱xi nu̱ú Filipenses 2:1-4?

¹² Ta̱ Pablo ta̱xira consejo yóʼo ndaʼa̱ na̱ congregación na̱ ñuu Filipos: “Tá táxi ta̱ Cristo ndée ndaʼa̱ndó ña̱ va̱ʼa ndasandeéndó-ini inkana ta xa̱ʼa ña̱ kúʼvi̱-inindó chíndeé táʼanndó xíʼin inkana, tá ndiʼiyó ná keʼé ña̱yóʼo, tá kúndáʼvi-iniyó xíni táʼanyó, sakusi̱índó-inii̱ ta inkáchi kuʼvi̱-inindó kuni táʼanndó ta inkáchi ndakanixi̱níndó, kǒo keʼéndó iin ña̱ʼa xa̱ʼa ña̱ sáa̱ndó á xa̱ʼa iinlá miíndó, chi xa̱ʼa ña̱ kúúndó na̱ vitá-ini kúnda̱a̱-inindó ña̱ ndáyáʼvika inkana nu̱úndó, su̱ví xa̱ʼa iinlá mií kuitíndó ndi̱ʼi̱-inindó, saá ndi̱ʼi̱tu-inindó xa̱ʼa inkavana” (Filip. 2:1-4).

¹³ Ña̱ káʼa̱n texto yóʼo sánáʼa̱ña miíyó ña̱ ná kotoyó ndáaña xíniñúʼu keʼéyó ña̱ va̱ʼa taxiyó ndée ndaʼa̱ na̱ hermano. Kivi keʼéyó ña̱yóʼo: ná sandi̱koyó-inina, ná kuʼvi̱-iniyó kuniyóna, ná kutáʼan va̱ʼayó xíʼinna, ná kundáʼvi-iniyó kuniyóna.

14. ¿Ndáaña kivi sakusi̱í-iniyó?

¹⁴ Iin ña̱ sákusi̱íníka-iniyó kúú tá kúnda̱a̱-iniyó xa̱ʼa iin na̱ chi̱ndeéyó xi̱naʼá ta vitin ndásakáʼnukana Jehová. Ta̱ apóstol Juan ka̱ʼyíra: “Kǒo inka ña̱ʼa sákusi̱íníka-inii̱ chi ña̱ kúsi̱íní-ini xíʼin kúú ña̱yóʼo: ña̱ xíniso̱ʼi̱ ña̱ kéʼé na̱ se̱ʼi̱ ña̱ kúni̱ Ndióxi̱” (3 Juan 4). Ku̱a̱ʼání na̱ precursor káʼa̱nna ña̱ iin ña̱ si̱íní-ini kúúña tá kúnda̱a̱-inina xa̱ʼa iin na̱ ka̱ʼvina Biblia xíʼin tá ya̱chi̱, ta vitin chíka̱a̱na ndée ña̱ nda̱kú íyo inina xíʼin Jehová ta savana nda̱a̱ precursor kúúna. Xa̱ʼa ña̱yóʼo tá ná sandakaʼányó iin na̱ precursor na̱ nda̱kava-ini xa̱ʼa ndiʼi na̱ chi̱ndeé táʼanna xíʼin, ña̱yóʼo sakusi̱íníña-inina.

15. Ka̱ʼa̱n xa̱ʼa iin ña̱ kivi keʼéyó ña̱ va̱ʼa taxiyó ndée ndaʼa̱ na̱ káchíñu nu̱ú Jehová.

¹⁵ Ku̱a̱ʼání na̱ superintendente ña̱ circuito xíʼin ñá síʼína káʼa̱nna ña̱ va̱ʼaní kúnina xa̱ʼa ña̱ iin na̱ hermano káʼyína tutu nu̱ú táxina tixaʼvi ndaʼa̱na xa̱ʼa ña̱ ni̱xa̱ʼa̱nna congregaciónna. Ta saátu káʼa̱n na̱ anciano, na̱ misionero, na̱ precursor xíʼin na̱ ñúʼu Betel tá táxina tixaʼvi ndaʼa̱na xa̱ʼa ña̱ káchíñuna nu̱ú Ndióxi̱.

16. ¿Á ku̱a̱ʼání ña̱ xíniñúʼu keʼéyó ña̱ va̱ʼa taxiyó ndée ndaʼa̱ inkana?

¹⁶ Tá kúkaʼanní nu̱úyó á va̱ása kútóoyó ka̱ʼa̱n ku̱a̱ʼáyó, ná kǒo ndakanixi̱níyó ña̱ va̱ása kivi taxiyó ndée ndaʼa̱ inkana. Mií ña̱ ndixa su̱ví ña̱ yo̱ʼvi̱ kúú ña̱yóʼo. Tá kúú, tá chíndeéyó iin na̱ hermano, kivi ku̱a̱kuyó xíʼinna. Tá kǒo níxa̱ku̱na xíʼinyó sana íyo iin ña̱ ndóʼona, á kúni̱na ka̱ʼa̱nna xíʼin iinna xa̱ʼa ña̱ ndóʼona. Sana xa̱ʼa ña̱ kuniso̱ʼo kuitíyóna chindeé táʼanña xíʼinna ña̱ va̱ʼa kunina (Sant. 1:19).

17. ¿Ndáaña chi̱ndeé táʼan xíʼin iin ta̱ hermano loʼo?

¹⁷ Ná kotoyó ndáaña ndo̱ʼo iin ta̱ hermano  loʼo naní Henri. Nda̱kavaní-inira chi ku̱a̱ʼá na̱ táʼanra sa̱ndákoona ñuu Ndióxi̱, nda̱a̱ yivára i̱xaa saá, ta ta̱yóʼo iin anciano ta̱ va̱ʼaní xi̱ka̱ʼa̱nna xa̱ʼa xi̱kuura. Ña̱ va̱ʼa chindeé táʼanna xíʼin ta̱ Henri, iin ta̱ superintendente ña̱ circuito ni̱xa̱ʼa̱nra xíʼinra koʼora iin café ta xi̱niso̱ʼora ndiʼi ña̱ ni̱ka̱ʼa̱n ta̱ loʼo yóʼo xíʼinra. Ta̱ Henri na̱kunda̱a̱-inira tá kúni̱ra chindeé táʼanra xíʼin na̱ veʼera ña̱ ndikóna ndasakáʼnuna Jehová xíniñúʼu nda̱kúní koo ini miíra xíʼin Ndióxi̱. Saátu tá ka̱ʼvira Salmo 46, Sofonías 3:17 xíʼin Marcos 10:29, 30 chi̱ndeé táʼanníña xíʼinra.

18. a) ¿Ndáaña ni̱ka̱ʼa̱n ta̱ rey Salomón? b) ¿Ndáaña ni̱ka̱ʼa̱n ta̱ apóstol Pablo?

¹⁸ ¿Ndáaña sákuaʼayó xíʼin ña̱ ndo̱ʼo ta̱ Henri saátu xíʼin ña̱ ndo̱ʼo ñá Marthe ñá ni̱ka̱ʼa̱nyó xa̱ʼa nu̱ú párrafo 11? Na̱kunda̱a̱-iniyó ña̱ ndiʼivayó kivi taxi ndée ndaʼa̱ na̱ nda̱kava-ini. Ta̱ rey Salomón ka̱ʼyíra: “Iin tu̱ʼun ña̱ va̱ʼa, sákusi̱íña-iniyó”. Ta ni̱ka̱ʼa̱ntura “xa̱ʼa ña̱ si̱í íyo níma̱ na̱ yiví va̱ʼa xítona” ta saátu “iin tu̱ʼun va̱ʼa kúú ña̱ táxi ndée ndaʼa̱yó” (Prov. 15:23, 30). Tá xítoyó ña̱ nda̱kava-ini iinna, ¿ndáaña kivi keʼéyó? Kivi káʼviyó nu̱úna ña̱ káʼa̱n Tutu Ña̱ Nátúʼun xíʼinyó á inkaka ña̱ va̱xi nu̱ú página ña̱ kúúmiíyó nu̱ú Internet. Soo ta̱ Pablo ka̱ʼyítura: “Ta sanáʼa̱ táʼanndó ta taxindó consejo ndaʼa̱ táʼanndó ta keʼéndóña xíʼin salmo, ta katandó nu̱ú Ndióxi̱ ta taxindó tixaʼvi ndaʼa̱ra, xíʼin ndiʼi níma̱ndó katandó nu̱ú Jehová” (Col. 3:16; Hech. 16:25). Nda̱a̱ táki̱ʼva na̱kunda̱a̱-iniyó tá ná katayó yaa Ndióxi̱ chindeé táʼanña xíʼinyó ña̱ va̱ʼa kuniyó.

19. ¿Nda̱chun ndáyáʼviní ña̱ ndasandakúyó-ini táʼanyó, ta ndáaña xíniñúʼu keʼéyó?

¹⁹ Xa̱a̱ ku̱a̱ʼa̱n kúyatin ña̱ kixa̱a̱ ki̱vi̱ Jehová, ña̱kán xíniñúʼuníka ña̱ taxiyó ndée ndaʼa̱ táʼanyó (Heb. 10:25). Xa̱ʼa ña̱yóʼo ná keʼéyó ña̱ ni̱ka̱ʼa̱n ta̱ apóstol Pablo: “Sándi̱kondó-ini táʼanndó, ta chindeé táʼanndó táki̱ʼva xa̱a̱ kéʼéndóña tiempo vitin” (1 Tes. 5:11).