1. Apostel Pauluba tae-i ǃaroma Hebre Xristeǁîna ge mîba în “ǃnāsase” ǂkhâǃnâgu?

TAE-I ǃaroma da nî ǁgūtsâ ǂkhâǃnâgusa? Apostel Paulub ge Hebre Xristeǁîn ǃoab ge xoa sîǂkhanis ǃnâ nē ǃaromasa ge mā. ǁÎb ge ge mî: “Î da kōǃgâ ǀnammi tsî ǃgâi sîsengu hōhōǃnâgu ǃoa; î da tā sada ǀhûsa ǀûǀkhā, ǀnîn ǁnaetiba ūhâ khami, î da ǁnamagu, î da ǁîsa ǃnāsase dī, tsēs ra ǀgū ǃkhaisa du ra mû xuige.” (Heb. 10:24, 25) Koro kurigu khaoǃgân ge Jodeǁî Xristeǁîna Jerusalems ǃnâ gere hâna ‘ǃKhūb di kai     tsēsa’ ge mû tsî nēs ǀkha Jesub ge mî mîde ge mûǂan în ǁnā ǃāsa xu ǃkhoe. (ǃNǃkh. 2:19, 20; Luk. 21:20-22) “ǃKhūb di kai     tsēs” ge 70ǁî kuri ge hā, Romeǁîn ge Jerusalems ǃnâ hâ khoena gere ǀgoraǃgâ ǁaeb ai.

2. Tae-i ǃaroma da nētsē ǃnāsase ǂkhâǃnâgusa ǂhâ hâ?

² Nētsē da ge ra ǂgom “kai tsî kaise ǃaoǃaosa” tsēs Jehovab dis ǃgôaxasa. (Joe. 2:11) Sefanjab ge ge mî: “Kaitsēs  ǃKhūb dis ge a ǀgū, ǁîs ge a ǀgū tsî kaise a ǃhae.” (Sef. 1:14) Nē kēbos ge sida tsēdi ǃoas tsîna ra ǁnaeǁgau. Jehovab kai tsēs xab ge Pauluba ge mî: “Î da kōǃgâ ǀnammi tsî ǃgâi sîsengu hōhōǃnâgu ǃoa.” (Heb. 10:24) Nēs ge ra ǂâibasen nau ǃgâsan ǃnâ da ge ǃgâiǃgâibasensa nî ūhâ tsî ǁîna nî ǂkhâǃnâ.

3. Apostel Pauluba tae-e ǂkhâǃnâgus xa ra mî? (Tsoatsoas ǃnâ hâ ai-īsiba mû re.)

³ “Tsûaǂgaob khoeb di ǂgaob ǃnâ hâb ra ǁîba ǃgamǃgam, xawe ǃgâi mîs ra ǁîba ǃgâiaǂgao kai.” (ǂKhm. 12:25) Nēs ge a ama hoa da xa. Hoa da ge ǂkhâǃnâhesa ǂhâ hâ ǁaeba xu ǁaeb ǀkha. Paulub ge ge ǁgau khoe-i hîna nau khoena ra ǂkhâǃnâ î ge ǁî-i tsîna ǂkhâǃnâhesa ǂhâ hâ. Romeb ǃnâ hâ Xristeǁîna ǃoab ge ge mî: “Kaise ta ra ǁkhore, mû tsî ta nî sado ǀnî gagasi hō-e ause, ǀgaiǀgaiǃnâhe du nîga; ǁnās ge sadu ǃnâ ta nî ǁkhaeǂgaoǀhaohega, sada ǁaegu hâ ǂgoms, sadu dis tsî tis tsîra xu.” (Rom. 1:11, 12) Paulub hîna ge nau khoena gere ǂkhâǃnâb tsîn ge ǂkhâǃnâhesa ge ǂhâ hâ i.​—Khomai re Romeǁîn 15:30-32.

4, 5. Ham-e da nētsē nî ǂkhâǃnâ tsî tae-i ǃaroma?

⁴ Khoen hîna ǁîn ûib ǃnâ ǁguibade ra dīn ge nî koahe. Nēs ge aimâba-aona ǃkhōǂgā hâ. ǂGuin ge ǀkharaǀkharana ge dī în aimâba-ao sîsen-e dī ǁkhā. Nēs ge sîsaben, Betelitan, ǃnarimâra mûǂam-aogu tsî ǁîgu taradi tsî ǂnûiǃkhunis berodi tawa ra sîsen an tsîna ǃkhōǂgā hâ. Nē ǃgâsan hoan ge ǁîn ûib ǃnâ ǀkharaǀkharana ra dī în ǃanu ǃoabas ǃnâ ǁhao. ǁNā-amagan ge ǂkhâǃnâhesa ǂhâ hâ. Tsî ǀnîn ge mâsigu mā-am tama hâ ǃkhais ǃgao ǀoasase ge ǃoaba ǀû, ǁnā-amagan ge ǁîna ǂkhâǃnâs hînan ra hōsa kaise ra ǃgôaǃgâ.

⁵ ǃGâsan hîna “ǃKhūb ǃnâ ǀgui” ǃgame di hâ mîmāsa ra ǁnâuǀnam an tsîn ge ǂkhâǃnâhesa ǂhâ hâ. (1Kor. 7:39) ǃGarise ra sîsen taradi tsîn ge ǁîdi aoga xu hoaǁae omkhâi ra mîde ra ǁnâu ǂgao. (ǂKhm. 31:28, 31) ǃGâsan hîna ra mâ-ǃoahen tsî ǀnîn hîna ǀae hân xawe ǂgomǂgomsase ra ǃoaban tsîn ge ǂkhâǃnâhesa ǂhâ hâ. (2Tes. 1:3-5) Jehovab tsî Jesub tsîn ge nē ǂgomǂgomsa ǃgâsana ra ǁkhaeǂgao.​—Khomai re 2 Tesalonikaǁîn 2:16, 17.

6. ǀHaohâb ǃûi-aogu sîsen-e a tae Jesajab 32:1, 2 tsîn ǃoagu?

⁶ Khomai re Jesajab 32:1, 2. Jesub ge ǂkhauhesa ǃgâsan tsî ǀhaohâb ǃûi-aogu “gaosagu” tsîn ǃnâ-ū ǃgâsan hîna ra ǂkhabuǂâina ǂkhâǃnâ tsî ra daoǁgau. ǀHaohâb ǃûi-aogu ge ǁîgu ǃgâsan ǂgomsa ‘gaoǂam’ tama hâ xawe ‘sîsenǀhao-aogu’ ase ǀguiba ra sîsen.​—2Kor. 1:24.

7, 8. ǀHaohâb ǃûi-aoga mati ǁîgu ǃgâsana a omkhâi ǁkhā?

⁷ Paulub ge aiǁgausa ge mā ǁgae da nîse. ǁÎb ge Tesalonikas ǃnâ hâ Xristeǁîna ǃoa ge mî: “ǁNās ǁkhās xase ge ge kaise ǀnam du hâse ge māsenxa i, Elob di ǃgâiǂhôasa ge nî au dus ǀguisa hî tama i, tsî ge nî ǁkhāti sige ǀomdi  ǂûde māsa, ǀnam du ge ge hâ i xui-ao.”​—1Tes. 2:8.

⁸ Paulub ge ge ǁgau mîs ǀguisa dīs ǂâu tama hâsa ǁnā-amagab ge Efesus ǃnâ hâ ǀhaohâb ǃûi-aogu ǃoa ge mî: “Hoana ta ge ǁgau du, ǁnāti sîsen tsîts nî ǁkhā tamana ǃkhōǃoa ǃkhaisa, tsîts nî ǃKhūb Jesub di mîs, mîb geres xa ǂâi: Mās ge ūs ǃgâ-ai a ǃgâi.” (ǃNǃkh. 20:35) Paulub ge ǁîb ǃgâsana ǂkhâǃnâs ǀguisa ge dī tama hâ i xawe ǁîna ‘ǃnāǂamsase’ ge ǀnam i. (2Kor. 12:15) ǀHaohâb ǃûi-aogu ge ǂkhâǃnâ ra mîdi ǀguide mî tide xawe ǃgâsan ǃnâ ǃgâiǃgâibasensa nî ūhâ.—1Kor. 14:3.

9. ǀHaohâb ǃûi-aoga mati ǂkhâǃnâ ra ǀgaub ǃnâ nî ǁnama?

⁹ Omkhâigus ge ǁnamahesa ǃkhōǂgā hâ xawe gu ge ǀhaohâb ǃûi-aoga nî ǂan mati gu ǃgâsana ǂkhâǃnâ ra ǀgaub ǃnâ nî ǁnamasa. Jesub ge ǃgâi aiǁgausa ge ǁgau ǁîb ǁōb tsî khâis khaoǃgâ. ǁÎb ge ǂkhariro Asiab [ǃKhawagasǃhūb] ǃnâ ǀhaohâga gere ǁnama. Xawe ǁnamab nîs aiǃgâb ge ǁîba Efesus, Pergamums tsî Tiatiras tsîn ǃnâ hâ ǀhaohâga gere koa. (J.ǂHa. 2:1-5, 12, 13, 18, 19) Laodiseas ǃnâ hâ ǀhaohâba ǃoab ge ge mî: “ǀNam ta ana ta ra ǂgōǀau tsî ǁkhara; ôasa ǁnâi î ǃhobasen.” (J.ǂHa. 3:19) ǀHaohâb ǃûi-aogu ge Xristub aiǁgausa nî ǁgae ǃgâsana gu ga ra ǁnama o.

10. Mati da nî ǂkhâǃnâgu?

¹⁰ ǂKhâǃnâs ge ǀhaohâb ǃûi-aogu ǀoasa ǁgui-ai tamasa. Paulub ge hoa Xristeǁîna ge mîba în “ǃgâi mî-i ǂnubikhâigusa ǃoa ǂhâbasa-e ǂoa kai, ǁnâu ran nî ǀkhomma hōse.” (Efe. 4:29) Hoa da ge khoen ‘ǂhâsiga’ nî mûǂan. Paulub ge Hebre Xristeǁîna ǃoa ge  mî: “ǁNā-amaga ǁgarasa ǃomga ūkhâi î ǂkhabusa ǁgoade ǁkhawa ǀgaiǀgai; î sadu ǂaide ǂhanu ǂgaroga dība, î-i ǃhora-e tā ǃoe, î-i ǂgau.” (Heb. 12:12, 13) Hoa da ge nî omkhâi gu ǂkhâǃnâ ra mîdi ǃnâ-ū.

11. Martasa mati depresibas gere hōǃâ ǁaeb ǃnâ ge huihe?

¹¹ Marta, * di ǀon hâ ǃgâsas ge depresiba gere hōǃâ. Tsîs ge ǁîsa ge mî: “ǀGui tsē ta ǃgam depresiba ra hōǃâ, hîna ta ge kaira ǃgâsas ǀkha ge ǀhao. ǁÎs ge kaise ǃgâi ǀgaub ǃnâ ge ǂkhâǃnâ te. ǁÎs mîdi ge kaise ge khoakhoa te. ǁÎs ge ge mîba te, ǁîs tsîn ge tita ra hōǃâ tsâsiba gere hōǃâsa. Nēs khaoǃgâ ta ge ge ǀguri tsâsen tama hâ i.” Nē kaira ǃgâsas ge ge ǀū i ǁîs mîdi ge kaise Martasa a tsâǀkhāsa.

12, 13. Mâ ǃgâi ǀgaugu ǃnâ da Filipeǁîn 2:1-4 ǃnâ a xoasa ǁnamasa a ǁgau ǁkhā?

¹² Paulub ge Filipeǁîn ǀhaohâba ǃoa ge xoa: “Khaeǂgao-i ga Xristub ǃnâ hâo, khoakhoa-i ǀnammi di-i ga hâo, ǀhûhâsi-i Gagab di-i ga hâo, ǀnamxaǃnâsi-i tsî ǀkhomxaǂgaosi-i ga hâo, ǁnâi ti ǃgâiaǂgaoba ǀoaǀoa, î du ǀguiǂâixa, î du ǁkhā ǀnamma ūhâ, î du ǁnâugu, î du ǀgui ǂâibasens ǀkha hâ. Xū-i xare-e tā ǂnīǂnīsens tsî ǁîǃgôasensa xu dī, î du ǃgamǃgamsens ǃnâ nē-e nau-e ǁî-i ǃgâ-ai ǀgapise ǃgôa. A i mâ-i hoa-e tā ǁî-i ǃgâib xa ǀgui ǂâi, î-i ǁkhāti nau-i ǃgâib on xa ǂâi.”​—Fil. 2:1-4.

¹³ Ama as ge hoa da ge nau khoen ǃnâ da ǃgâiǃgâibasensa ūhâsa nî ǁgau. Tsî da ge ǁnās ǀkha “ǀnammi”, “ǀhûhâsi-i Gagab,” “ǀnamxaǃnâsi-i tsî ǀkhomxaǂgaosi-i” tsîna nî ǁgau.

14. Tae-e ǁkhaeǂgaos ase aimâba-aona a ība ǁkhā?

¹⁴ Nētsē da ra hui khoen di aiǁgaudi ge hānîǁaeb ǃnâ kaise ǂkhâǃnâs ase nî ība da. Apostel Johaneb ge ge mî: “Kai ǃgâiaǂgao-e ta ūhâ tama hâ, ti ôan ra amab ǃnâ ǃgû ǃkhaisa ta ra ǁnâu-i ǀgui-i xa.” (3Jhn. 4) Aimâba-aon ge kaise ra ǂkhî ǁnâun ga ra o, ǁîn ge amab ǀkha a hui khoen ǂgomǂgomsase Eloba ra ǃoabasa. Tsî ǀnîsis tsîna nētsē aimâba-aon ase ra sîsen. Tsî aimâba-aona hōǃân gere ǂkhîb xa ǁgambas tsîn ge ǁîna ǂkhâǃnâs ase a ība ǁkhā.

15. Mâ ǀgaub ǃnâ da ǁîn hîna ǂgomǂgomsase ǀoasase ra ǃoabana a ǂkhâǃnâ ǁkhā?

¹⁵ ǃNarimâra mûǂam-aogu ge ra mî ǁîgu tsî ǁîgu taradi tsîn ge kaise ra ǂkhî, sîǂkhani-e gu ga ǀhaohâb ǁanin xa saris khaoǃgâ ga ra māhe o. Nēs tsîn ge a ama sîsaben, aimâba-aon tsî Betels omaris ǁanin xa, ǃgôaǃgâs sîǂkhani-en ga ra māhe o ǁîn ǂgomǂgomsa ǃoabas ǃgao.

16. Mâ ǀgaub ǃnâ da khoe-e a ǂkhâǃnâ ǁkhā?

¹⁶ Kaise i ge nî ǁkhōǁkhōsa i, mîsa sada ge khoe-e a ǂkhâǃnâ ǁoa kaise da ǃhoa tama hâ amaga. ǃGom tama i ge hâ khoe-e ǂkhâǃnâsa. Khoe-e du ge ǀgamsa îsa ǀnomsa a ǁgau tsî a tawede ǁkhā. Khoe-i ga ǀnîsi ǀnom ǃoa tama ga ra io, o i ge ǀnîsi xū-e ǁî-i ǀkha ǃgâi tama hâ. Xawe khoe-e ǃgâs tsîn ge ǁî-e ǁkhaeǂgaos ase a ība ǁkhā.​—Jak. 1:19.

17. ǀNî ǂkham ǃgâsaba mati ge huihe ǃgom ǁaeb ǃnâ?

 ¹⁷ Henrib ge kaise ge tsûaǂgao, ǁîb di omaris ǁanin ge amaba a ǁnāxū o, nēs ge dadasab tsîna ge ǃkhōǂgā hâ i. Henrib ge ǃnarimâra mûǂam-aob xa kaise ge ǂkhâǃnâhe. Henrib ge ge mî ǃnarimâra mûǂam-aob ge tita gere ǃhoa xūn hoana ǃamkuse gere ǃgâ. Henrib ge ge mûǂan, ǁîb ga ra ǂhâba o în ǁîb omaris ǁanina amaba ǃoa oaǀkhī ob ge ǂgomǂgomsase amab ǃnâ nî aiǃgû di. ǁÎb ge kaise Psalmdi 46; Sefanjab 3:17 tsî Markub 10:29, 30 xa ge tsâǀkhā-e.

18. (a) Gao-aob Salomoba tae-e ge mûǂan? (b) Tsî apostel Pauluba tae-e ge mî ǂkhâǃnâs xa?

¹⁸ Martas tsî Henrib tsîn di aiǁgaudi ge ra ǁgau, sada tsîn ge nau khoena a ǂkhâǃnâ ǁkhā ǁîn huiba ǂhâ hâ ǁaeb ǃnâ. Gao-aob Salomob ge ge xoa: “Matikōse i a ǃgâi ǁaeb ai ra ǃhoahe mî-e! ǃNâb mûdi dib ra ǂgaoba ǃgâiaǂgao kai, ǃgâi gommi ge ǂkhōga ra kaukau.” (ǂKhm. 15:23, 30) ǃKhē xu ǂgō-ommi tsî sida internets ǂhaweb ai hâ ǁkhauǂuide khomais ge ǂkhabuǂâi ra khoe-e a khoakhoa ǁkhā. Paulub ge ge ǁgau ǀguiba Gaosib ǁnaetsanade ǁnaes tsîn ge khoe-e a ǁkhaeǂgao ǁkhā. ǁÎb ge ge mî: “Î du ǁkhāǁkhāgu, î du ǁnamagu psalmdi tsî karetsanadi tsî gagasi ǁnaetsanadi ǀkha, î du ǃKhūba ǀnamǀnamsase sadu ǂgaob ǃnâ ǁnaeba.”​—Kol. 3:16; ǃNǃkh. 16:25.

19. Tae-i ǃaromas ǂkhâǃnâgusa nētsē kaise a ǂhâǂhâsa?

¹⁹ Hoaǃnâ-aixase ǂkhâǃnâgus ge Jehovab “tsēs ra ǀgū” khami kaise a ǂhâǂhâsa. (Heb. 10:25) Paulub ge ǁîb tsēdi ǃnâ ge hâ i Xristeǁîna ge mîba: “ǁNā-amaga ǁnamagu re, î-i nē-e nau-e ǂnubikhâi, ǁkhāti du ra dī khami.”​—1Tes. 5:11.