1. Why nao aposol Paul talem olketa Hebrew Christian long first century for duim moa samting for encouragem narawan?

WHY nao iumi shud duim moa samting for encouragem narawan? Insaed leta bilong aposol Paul for olketa Hebrew Christian, hem talem reason why hem important for duim diswan. Hem sei: “Iumi mas barava tingim narawan mekem iumi savve encouragem olketa for showimaot love and duim olketa gudfala samting. No misstim wei for hipap tugeta olsem samfala savve duim, bat encouragem narawan and gohed for duim datwan moa taem iufala lukim datfala day hem kakam klosap.” (Heb. 10:24, 25) No kasem faev year bihaen datwan, olketa Jew wea Christian wea stap long Jerusalem olketa luksavve “day bilong Jehovah” hem kam klosap, and olketa luksavve olketa mas ranawe from datfala taon taem olketa lukim datfala saen wea Jesus talem. (Acts 2:19, 20; Luke 21:20-22) Datfala day bilong Jehovah happen long 70 C.E. taem olketa bilong Rome distroem Jerusalem.

2. Why nao iumi shud barava laek for encouragem olketa narawan distaem?

² Distaem iumi garem staka reason for bilivim hao bigfala day bilong  Jehovah hem barava klosap. (Joel 2:11) Profet Zephaniah sei: “Bikfala De blong [Jehovah] fo jajem pipol hemi barava kolsap nao, an hemi kam kuiktaem.” (Sefenaea 1:14) Datfala warning hem fitim distaem tu. From day bilong Jehovah hem klosap tumas Paul talem iumi for “barava tingim narawan mekem iumi savve encouragem olketa for showimaot love and duim olketa gudfala samting.” (Heb. 10:24) Dastawe, iumi shud duim moa samting for showimaot iumi tingim olketa brata bilong iumi mekem iumi savve encouragem olketa long taem wea olketa needim.

3. Wanem nao aposol Paul talem abaotem wei for encouragem narawan? (Lukim piksa long start bilong study.)

³ Bible sei: “Haat hemi wari, man hemi hevi, bat gud toktok save liftimap tingting blong hem.” (Provebs 12:25) Tru nao, samfala taem iumi evriwan needim encouragement. Paul showimaot hao man wea garem responsibility for encouragem olketa narawan need for kasem encouragement tu. Taem hem raet long olketa Christian long Rome hem sei: “Mi laekem tumas for lukim iufala. Mi laek storyim samting for helpem iufala fren witim God. Wanem mi minim nao hem olsem: Mi laekem iumi evriwan strongim narawan. Faith bilong iufala bae strongim mi, and faith bilong mi bae strongim iufala tu.” (Rome 1:11, 12) Tru nao, nomata Paul givim olketa naes encouragement long olketa narawan, samfala taem hem tu needim encouragement.—Readim Rome 15:30-32.

4, 5. Olketa hu nao iumi savve encouragem distaem, and why nao olsem?

⁴ Iumi shud encouragem olketa wea duim waka bilong Jehovah full-taem. Insaed diswan hem olketa faithful pioneer. Staka sakrifaesim samfala samting mekem olketa fit for duim pioneer waka. Diswan hem semsem tu witim olketa missionary, Bethelite, olketa circuit overseer and waef, and olketa wea waka long olketa remote transleison office. Evriwan hia sakrifaesim samfala samting long laef bilong olketa mekem olketa garem taem for duim waka bilong Jehovah. Dastawe olketa need for kasem encouragement. And tu, olketa wea laek for duim full-taem service, bat samfala samting happen wea mekem olketa no fit for duim datwan, bae hapi tu for kasem encouragement.

⁵ Olketa brata and sista wea gohed stap singol from olketa laek for obeyim Jehovah for maritim nomoa “wanfala disaepol bilong Christ,” olketa tu need for kasem encouragement. (1 Cor. 7:39) And tu, olketa hasband savve talem olketa gudfala toktok for olketa waef bilong olketa wea barava waka hard. (Provebs 31:28, 31) Olketa narawan wea needim encouragement tu hem olketa Christian wea gohed faithful nomata olketa kasem persecution or olketa sik. (2 Thess. 1:3-5) Jehovah and Jesus comfortim evri faithful servant hia.—Readim 2 Thessalonica 2:16, 17.

6. Wanem nao waka bilong olketa elder wea Aesaea 32:1, 2 story abaotem?

⁶ Readim Aesaea 32:1, 2. Thru long olketa anointed wan and olketa elder, Jesus Christ provaedem encouragement and direction for olketa wea feel sorre and wikdaon. Olketa elder no “boss” long faith bilong olketa narawan bat “waka tugeta” witim olketa brata for mekem evriwan hapi.—2 Cor. 1:24.

7, 8. Hao nao olketa elder savve talem and duim samting for encouragem narawan?

⁷ Aposol Paul showimaot nambawan example for olketa elder. Hem raet olsem for olketa Christian long Thessalonica wea kasem persecution: “From mifala lovem iufala tumas, mifala hapi for sharem gud nius bilong God witim iufala and for givim tu laef bilong mifala for helpem iufala.”—1 Thess. 2:8.

 ⁸ Samfala taem for talem nomoa toktok for encouragem narawan hem no inaf. Paul sei olsem long olketa elder long Ephesus: “Iufala tu mas waka for helpem olketa wea wik, and tingim disfala toktok bilong Lord Jesus, ‘Man wea givim samting hem barava hapi winim man wea kasem samting.’” (Acts 20:35) Paul hem laekem tumas for encouragem olketa brata and hem willing tu for ‘givim evri samting wea hem garem and givim hemseleva tu for helpem olketa.’ (2 Cor. 12:15) Olketa elder tu shud no talem nomoa olketa toktok for encouragem olketa brata, bat olketa shud strongim olketa thru long wei for showimaot olketa barava tingim olketa.—1 Cor. 14:3.

9. Hao nao olketa elder savve givim kaonsel long wei wea bae encouragem man?

⁹ For strongim narawan maet samfala taem olketa elder mas givim kaonsel, bat olketa shud followim example insaed Bible abaotem hao for givim kaonsel long wei wea encouragem narawan. Bihaen Jesus dae and resurrect hem showimaot nambawan example long wei for duim diswan. Hem need for givim strong kaonsel long samfala kongregeson long Asia Minor, bat tingim hao hem duim datwan. Bifor hem kaonselem olketa long kongregeson bilong Ephesus, Pergamum, and Thyatira, hem praisem olketa. (Rev. 2:1-5, 12, 13, 18, 19) Hem sei olsem long kongregeson long Laodicea: “Mi helpem olketa wea mi lovem for luksavve long samting olketa duim wea no stret, and mi stretem olketa. So iu mas repent and showimaot iu strong for worshipim God.” (Rev. 3:19) Hem gud for olketa elder followim example bilong Jesus taem olketa need for givim kaonsel.

10. Hao nao iumi evriwan savve waka tugeta for strongim narawan?

¹⁰ Wei for encouragem narawan hem no responsibility bilong olketa elder nomoa. Paul talem evri Christian for “mas talem nomoa gudfala toktok for strongim and helpem olketa wea herem.” (Eph. 4:29) Each wan long iumi shud kwiktaem for luksavve long wanem  olketa narawan needim, mekem iu savve helpem olketa. Paul kaonselem olketa Hebrew Christian olsem: “Strongim olketa hand wea wik and olketa knee wea seksek. Gohed wakabaot followim stretfala road, mekem part long body wea hem nogud hem no kamap worse bat hem savve gud bak.” (Heb. 12:12, 13) Iumi evriwan, nomata olketa young wan tu, savve strongim each other thru long wei for talem toktok wea encouragem narawan.

11. Hao nao Marthe kasem encouragement taem hem stress and sorre?

¹¹ Marthe, * wanfala sista wea stress and sorre, hem sei: “Wanday taem mi prea for kasem encouragement mi meetim wanfala olo sista wea kaen long mi and tingim mi, wea datwan nao mi barava needim long datfala taem. Hem storyim experience bilong hem taem hem feisim kaen test olsem, and datwan mekem mi feel olsem no miseleva nomoa kasem kaen samting olsem.” Datfala olo sista maet no luksavve gud samting wea kamaot from toktok wea hem talem long Martha.

12, 13. Hao nao iumi savve followim advaes wea stap long Philippi 2:1-4?

¹² Paul raet olsem long evri Christian long kongregeson long Philippi: “Iufala wan mind witim Christ. Iufala encouragem and comfortim narawan from iufala lovem olketa. Iufala showimaot iufala tingim olketa narawan, lovem olketa, and sorre long olketa. Bat for iufala mekem mi barava hapi, iufala mas garem sem tingting, sem love, wan mind, and wan tingting. Iufala mas no laek raoa olowe and mas no praod, bat iufala mas hambol and ting long narawan olsem hem winim iufala. Evritaem tingim olketa narawan and no tingim iufala seleva nomoa.”—Phil. 2:1-4.

¹³ Iumi evriwan shud traem best for tingim olketa narawan. Iumi savve encouragem olketa brata and sista bilong iumi taem iumi “comfortim narawan,” “tingim olketa narawan, lovem olketa, and sorre long olketa.”

14. Wanem nao savve encouragem narawan?

¹⁴ Taem iumi herem wei wea olketa wea iumi helpem bifor olketa gohed faithful, datwan barava encouragem iumi. Aposol John tu hem olsem. Hem sei: “Taem mi herem olketa pikinini bilong mi gohed followim olketa tru teaching, diswan mekem mi barava hapi.” (3 John 4) Staka pioneer sei olketa kasem encouragement taem olketa herem samfala wea olketa helpem for kam insaed long truth bifor, olketa gohed faithful and maet olketa pioneer tu distaem. Sapos wanfala pioneer feel wikdaon, iumi savve storyim olketa gud samting wea hem duim bifor for encouragem hem.

15. Hao nao iumi savve encouragem olketa wea gohed faithful for duim waka bilong Jehovah?

¹⁵ Staka circuit overseer sei taem olketa kasem leta for sei thankiu bihaen olketa visitim wanfala kongregeson, datwan barava encouragem olketa and waef bilong olketa. Olketa elder, missionary, pioneer and olketa Bethelite tu kasem encouragement taem iumi showimaot iumi tinghae long wei wea olketa gohed faithful for duim waka bilong Jehovah.

16. Hao nao iumi savve encouragem narawan?

¹⁶ Maet iumi faendem hem no isi for talem samting for encouragem narawan, from iumi no man for story. Bat wei for encouragem narawan hem no hard tumas. Maet iumi savve smile nomoa long olketa. Bat sapos samwan no smile kam bak long iu datwan maet minim hem kasem problem, and taem iu lisin long hem datwan savve comfortim hem.—Jas. 1:19.

17. Hao nao wanfala young brata kasem help taem hem feel wikdaon?

¹⁷ Henri, wanfala young brata, hem feel  sorre taem samfala relative bilong hem olketa lusim truth. Wanfala long olketa nao hem dadi bilong hem wea hem wanfala elder bifor. Henri kasem encouragement from wanfala circuit overseer wea tekem hem for tufala drink coffee and hem letem Henri for storyim feeling bilong hem. Bihaen tufala story, Henri luksavve sapos hem gohed faithful, datwan bae helpem famili bilong hem for kam bak moa long truth. Taem hem readim Sams 46; Sefenaea 3:17; and Mark 10:29, 30, datwan barava comfortim hem.

18. (a) Wanem nao King Solomon talem abaotem wei for encouragem narawan? (b) Wanem advaes nao aposol Paul talem?

¹⁸ Samting wea happen long Marthe and Henri showimaot hao iumi evriwan savve encouragem olketa brata and sista bilong iumi wea needim comfort. King Solomon sei: “Gudfala toktok long barava taem blong hem, hemi nambawan samting. Man smael, yu filhapi. Man talem gud nius, yu filgud.” (Provebs 15:23, 30) Nara samting wea iumi savve duim for encouragem narawan, hem for readim Wastaoa or eni article from website long olketa wea feel wikdaon. And tu, Paul showimaot hao wei for singim Kingdom song witim olketa narawan savve barava encouragem olketa. Hem sei: “Gohed teachim and encouragem narawan long wei for singim olketa psalm, witim olketa song for praisem God, and olketa naesfala song for worshipim God. Singsing long Jehovah from heart bilong iufala.”—Col. 3:16; Acts 16:25.

19. Why nao disfala wei for encouragem each other hem bae kamap moa important, and wanem nao iumi shud duim?

¹⁹ Wei for encouragem narawan hem bae kamap moa important bikos day bilong Jehovah hem “kakam klosap.” (Heb. 10:25) Iumi laek for followim toktok bilong Paul for olketa Christian long taem bilong hem: “Gohed for encouragem and strongim narawan, olsem iufala duim distaem.”—1 Thess. 5:11.