1. Soqqamaasinchu Phaawuloosi Ibiraawete Kiristaani ‘mimmitonsa albinni roorse jawaachishanno’ gede kulinohu mayiraati?

MIMMITONKE albinni roorsine jawaachishate sharrama hasiissannonkehu mayiraati? Soqqamaasinchu Phaawuloosi Ibiraawete Kiristaanira sokka borreessi woyite tenne assa hasiissannonkehu mayiraatiro xawisino. Togo yiinonsa: “Baxille afiˈratenna dancha looso loosate mimmitonke kakkayinso. Mitu mitu agurtunte gede, ronsoommoha xaadonke agurroonke. Roorenka Mootichu daanno barri gamba yiinota qaagginanna, mimmitonke albinni roorsine jawaachinsho.” (Ibi. 10:24, 25) Yerusaalamete heeˈrannohu Ayihudete Kiristaani onte diro meddi yitanno yanna giddo Yihowa “barri” gambisinota leellishanno malaate laˈˈaraati; hattono Yesuusi kulinonsa garinni heeshshonsa gatisirate katamunni fultanno yanna gambissinota huwatanno. (Soq. 2:19, 20; Luq. 21:20-22) Yihowa hajajino garinni 70 M.D. Roomu Yerusaalame huni yannara hakku barri dayino.

2. Yannankera mimmito albinni roore jawaachisha hasiissannonkehu mayiraati?

² Yannankerano ‘wolqaataamunna waajjishannohu’ Yihowa barri  gambisinota leellishshannoti baca taje no. (Iyu. 2:11) Masaalaanchu Soffooniyaasi “Jawu Mootichu [“Yihowa,” NW] barri gambisino; daasino addintanni rakkino” yee coyiˈrino. (Sof. 1:14) Kuni qorowishshi yannankerano loosanno. Heeˈnoommohu Yihowa barri gambisino yannara ikkino daafira xaa yannarano Phaawuloosi “Baxille afiˈratenna dancha looso loosate mimmitonke kakkayinso” yee amaalino amaale harunsa hasiissannonke. (Ibi. 10:24) Konni daafira, roduuwinkera jawaante hasiissannonsa yannara jawaachisha dandiineemmo gede insa daafira albinni roore heda hasiissannonke.

3. Phaawuloosi woloota jawaachishate daafira mayyiino? (Hanafote noo misile lai.)

³ Qullaawu Maxaafi, “Wodanu yaaddo dadille abbitanno; danchu hasaawi kayinni hagiirsiisanno” yaanno. (Law. 12:25) Konni daafira, ninke baalunkura jawaante hasiissannonke woti no. Phaawuloosi woloota jawaachishshannorira nafa jawaante hasiissannonsata coyiˈrino. Isi Roomaho heeˈranno Kiristaanira togo yee borreessino: “Ammaˈnatenni kaajjishannoˈneha ayyaanaamo afansha beehammoˈnera hasiˈroommo daafira laˈˈammoˈnera quqquxamoommo. Hatto yaaˈyano ani kiˈne ammananni, kiˈneno ane ammananni mimmitonke jawaachinsheemmo gedeeti.” (Rom. 1:11, 12) Ee, Phaawuloosi woloota jawaachishinoha ikkirono, isi umisira jawaante hasiissinosi woti no.—Roomu Sokka 15:30-32 nabbawi.

4, 5. Yannankera ayeoo jawaachisha dandiineemmo? Mayira?

⁴ Uminsa horo agurte Yihowara soqqantannore galanteemmonsa. Kuri giddo mitu ammanantino suwisaanooti. Batinye suwisaano Maganoho soqqamate yite uminsa horo facci assite agurtino. Misiyoone ikkite soqqantannori, Beeteelete soqqantannori, woradu aliidi laˈˈaanonna minaamuwinsa, hattono tirote biirora loossannorino hatto assitino. Kuri roduuwi qullaawa soqqansho soqqantanno yanna afiˈrate uminsa horo agurtino. Konni daafira insarano jawaante hasiissannonsa. Woˈma yanna soqqansho giddo soqqama hasidhe heedhe, babbaxxino korkaatinni tenne assa agurtinorirano jawaante hasiissannonsa.

⁵ “Ammaninohu” ledo calla adhamme yitannota Qullaawu Maxaafi hajajo ayirrisse adhantukki heedhanno roduuwirano jawaante hasiissannonsa. (1 Qor. 7:39) Worbu minaamuwi minaannuwinsa jawaachishannonsa woyite baasa hagiidhanno. (Law. 31:28, 31) Qoleno iillitannonsa miico woy xibba dandee sae ammaname soqqamanno Kiristaanira jawaante hasiissannonsa. (2 Tes. 1:3-5) Yihowanna Yesuusi kuri ammanantino roduuwa sheshifachishshannonsa.—2 Teselonqe 2:16, 17 nabbawi.

6. Isayaasi 32:1, 2 te kulli cimeeyye loosi maati?

⁶ Isayaasi 32:1, 2 nabbawi. Heeˈnoommohu qarrissanno yannara ikkino daafira baalunku dadillineemmonna hexxo mudhineemmo woti heeˈrara dandaanno; Yesuusi Kiristoosi buurantinonna wolootu geˈreewi wido ikkitino cimeeyye yaano ‘gashshaanote’ widoonni jawaachishannonke, hattono biddishsha aannonke. Kuri cimeeyye ‘duha leddannonkere’ ikkitukki ‘hagiidhineemmo gede ledonke loossannore’ ikkitino daafira jawaachishshannonke.—2 Qor. 1:24.

7, 8. Cimeeyye coyidhannorinni calla ikkikkinni woloota ma garinni jawaachishate sharrama hasiissannonsa?

⁷ Soqqamaasinchu Phaawuloosi dancha lawishsha ikkinonke. Isi Teselonqe heeˈrannohu dartu iillinonsa roduuwira togo yee borreessino: “Lowo geeshsha banxeemmoˈne daafira, Maganunniha Dancha Duduwo kula  calla ikkikkinni, kiˈnera lubbonke nafa aate qixxaambe heeˈnoommo.”—1 Tes. 2:8.

⁸ Phaawuloosi jawaachishannore coyira calla ikkitannokkita xawisate, Efesooni heedhanno cimeeyyera togo yee borreessino: “Mootichu Yesuusi, ‘Adhannonkunni aannohu baˈraaˈrinoho’ yiinonte gede, angankenni loonse wolqa hoogginore kaaˈla hasiissannonketa batinye doogonni kuloommoˈne.” (Soq. 20:35) Phaawuloosi roduuwasi jawaachishate calla ikkikkinni, insara ‘woxesi aa agurina isonooto nafa sayise aate’ sumuu yiino. (2 Qor. 12:15) Konni daafira cimeeyye roduuwansa coyidhannorinni calla jawaachishanna sheshifachisha agurte, insara heddannota leellishannore assiteno kaaˈla hasiissannonsa.—1 Qor. 14:3.

9. Cimeeyye woloota jawaachishanno garinni amaala dandiitannohu hiittoonniiti?

⁹ Woloota jawaachishate amaale aa hasiissanno woti heeˈrara dandaanno; tenne yannarano cimeeyye woloota jawaachishanno garinni amaala dandiinanni gara afate Qullaawu Maxaafi biddishsha harunsa hasiissannonsa. Yesuusi Kiristoosi reyotenni kai gedensaanni uyino amaale tennera kaaˈlitannonsa. Hanni isi Shiimiidi Iisiyira noo songuwara kaajjado amaale uyi yannara assinore hedi. Isi, Efesooni, Phergamooninna Tiyaxiroosi noo songuwa amaalansara albaanni balaxe galatinonsa. (Aju. 2:1-5, 12, 13, 18, 19) Yesuusi Loodooqiyu songora togo yiino: “Ani baxeemmoha baala seejjeemmo; qorichisheemmono. Kunni daafira diinaggaawoottoha ikki! Cubbokkino aagintaawi!” (Aju. 3:19) Cimeeyyeno woloota amaaltanno yannara Kiristoosi lawishsha harunsa hasiissannonsa.

10. Baalunku mimmitonke jawaachisha dandiineemmohu hiittoonniiti?

¹⁰ Woloota jawaachisha hasiissannonsari cimeeyye calla diˈˈikkitino. Phaawuloosi baalunku Kiristaani ‘Wole manna hasiisinonsa garinni dhaawannohanna macciishshitannorira qiniite ikkanno gede dancha coye’ coyiˈranno gede kulino. (Efe. 4:29) Mitti mittinke woloota “hasiisinonsa garinni”  jawaachisha dandiineemmo gara heda hasiissannonke. Isayaasi togo yee borreessino: “Daafurtino anguwa jawaachishshe! Leqe leqe yitino gulubba kaajjishshe!” (Isa. 35:3; Ibi. 12:12, 13) Wedelluno ikko ninke baalunku woloota jawaachishannore coyiˈne mimmito dhaawa dandiineemmo.

11. Mitte rodoo quwa saˈino yaaddo amaddinoseta Maarti yinanni rodoo kaaˈlitinohu hiittoonniiti?

¹¹ Maarti * yinanniti quwa saˈino yaaddo amaddinose rodoo togo yitino: “Mitto barra jawaante afiˈrate huuccatto assiˈranni heeˈre mitte jawa rodoonni xaadumma; ise hatte yannara hasiise nooe baxillenna mararro leellishshinoe. Iserano alba hattoo qarri iillinoseta kultueta macciishshantannoe callimmanni fooliishsho afiˈroomma.” Hatti jawa rodoo, coyidhinori Maarti jawaachishanno yite heddinokkiha ikkara dandaanno.

12, 13. Filiphisiyusi Sokka 2:1-4 noo amaale harunsa dandiineemmohu hiitte doogganniiti?

¹² Phaawuloosi Filiphisiyusi noo songora togo yee sokka borreessino: “Mitte hedonni, baxillunni, ayyaanunninna gawalotenni sumuu yitine hagiirreˈya wonshe. Umoˈne roorsidhine haafu adawarshinni mittore nafa assitinoonte. Hatteentenni wolu manni kiˈnenni roorinohu gede assitine hedde. Mittu mittunku woleho woyyannore hedo ikkinnina, umisira woyyannore calla laoonke.”—Fil. 2:2-4.

¹³ Ee, baalunku mimmitonke kaaˈlineemmo faro hasiˈra hasiissannonke. Roduuwanke jawaachishate, insa ‘baxillunni sheshifachisha,’ insara hendeemmota leellisha, hattono giddonkenni ‘baxanna mararro’ leellisha hasiissannonke.—Fil. 2:1, NW.

14. Jawaanteemmo gede assannonkeri maa ikkara dandaanno?

¹⁴ Konni albaanni kaaˈlinoommonsa manni ammaname Yihowara soqqamanni noota macciishshanke lowo jawaante ikkitannonke. Soqqamaasinchu Yohaannisi tenne daafira coyiˈranni, “Oosoˈya halaalaancho heeshsho heedhannota macciishshatenni roorino hagiirri dinoe” yiino. (3 Yoh. 4) Batinye suwisaanono tini gara ikkitinota huwattino; lowo diri albaanni Qullaawa Maxaafa xiinxallissino manni xaa geeshsha Yihowara ammaname soqqamanni nootanna mitu isinni suwisaano ikke soqqamanna laˈˈansa lowo geeshsha jawaachishshannonsa. Mitto hexxo mudhino suwisaancho alba Yihowara ammaname hagiirrunni soqqamino gara qaagiissinummosiro lowo geeshsha jawaatanno.

15. Yihowara ammanante soqqantanni noore jawaachisha dandiineemmo doogga giddo mitte maati?

¹⁵ Batinyu woradu aliidi laˈˈaanonna minaamuwinsa songuwa towaati gedensaanni songuwa borreessitinonsati galatu sokka lowo geeshsha jawaachishshinonsata coyidhino. Ammanante soqqantanno cimeeyye, misiyoone ikkite soqqantannori, suwisaanonna Beeteelete maateno galantanninsa woyite jawaattanno.

16. Woloota jawaachishate maa assa dandiineemmo?

¹⁶ ‘Waajjishannoe daafira woloota jawaachisha didandeemmo’ yine heda soˈrote. Woloota jawaachisha hakkeeshshi geeshsha qarrissannota diˈˈikkitino; mitto mancho keere haaˈneemmo woyite faasiinqe hasaawisa calla jawaachishshasira dandiitanno. Mittu manchi ninke faasinqe hasaawinseemmosi woyite isi qole hatto assannokkiha ikkiro, tini qarru iillinosita leellishshara dandiitanno; tenne yannara hasaaphanno woyite seekke macciishsha jawaachishshasira dandiitanno.—Yai. 1:19.

17. Mittu wedellichi jawaante afiˈrinohu hiittoonniiti?

 ¹⁷ Enirii yinannihu wedellichu rodii cimeessa ikkino annisinna wolu muli fiixisi halaalu mininni fuli yannara lowo geeshsha dadillino. Mittu woradu aliidi laˈˈaanchi Enirii shaete minira haaˈre haˈre Enirii giddosita kuˈlanna seekke macciishshino; hatte yannara Enirii lowo geeshsha jawaatino. Qoleno fiixisi halaalu minira higanno gede kaaˈlate, isi Yihowara ammaname heeˈra hasiissannosita huwatino. Enirii Faarso 46; Soffooniyaasi 3:17 nna Maarqoosi 10:29, 30 nabbawasi lowo geeshsha jawaachishshinosi.

18. (a) Moote Selemooni mayyee borreessino? (b) Soqqamaasinchu Phaawuloosi maa assineemmo gede kulinonke?

¹⁸ Maartinna Enirii lawishshi, jawaante hasiissinonsa roduuwinkera jawaantete buicho ikka dandiineemmota leellishanno. Moote Selemooni togo yee borreessino: “Yannasira coyiˈnoonni coyi hiittoo danchaati! Hisataamo alba laˈˈa wodana hagiirsiissanno; dancha duduwo macciishsha jawaachishshanno.” (Law. 15:23, 30) Agarooshshu Shaenni woy webisayitenke aaninni mite hedo nabbawano hexxo mudhinoha jawaachishshara dandiitanno. Phaawuloosi coyiˈrinori, mitteenni Maganu Mangiste faarso faarsano jawaachishshannota leellishanno. Isi togo yee borreessino: ‘Egenno baaletenni mimmitoˈne rosiissenna seejje. Faarsotenninna guwishshunni Magano wodaniˈnenni galattinanni faarse.’—Qol. 3:16; Soq. 16:25.

19. Mimmitonke albinni roore jawaachisha hasiissannonkehu mayiraati? Hiittenne amaale harunsa hasiissannonke?

¹⁹ Yihowa barri “gamba yaanni” haˈranno woyite, mimmitonke albinni roorsine jawaachisha hasiissannonke. (Ibi. 10:25) Phaawuloosi ammanate roduuwasi yiino garinni “xa assitinanni heedhinoonninte gede mimmitoˈne jawaachishanna [dhaawa]” agurtinoonte.—1 Tes. 5:11.