1. Kungani umphostoli Pawula akhutsata emaKhristu langemaHebheru kutsi akhutsatane “ikakhulukati njengobe lilanga lisondzela”?

KUNGANI kufanele sitimisele kukhutsata labanye? Imphendvulo siyitfola emavini umphostoli Pawula lawabhalela emaKhristu angelikhulu lekucala latsi: “Asinakaneni kuze sikhutsatane elutsandvweni nasemisebentini lemihle, singakuyekeli kuhlangana kwetfu ndzawonye njengobe kungumkhuba walabanye, kodvwa asikhutsatane ikakhulukati njengobe nibona lilanga lisondzela.” (Heb. 10:24, 25) Kungakapheli iminyaka lesihlanu, emaJuda labehlala eJerusalema bekatawubona lilanga laJehova lisondzela futsi bekatawubona netimphawu letashiwo nguJesu kuze abaleke kulelidolobha. (Imis. 2:19, 20; Luk. 21:20-22) Lelilanga laJehova lefika nga-70 C.E. ngesikhatsi emaRoma abhubhisa iJerusalema.

2. Kungani kufanele sibakhutsate kakhulu bazalwane betfu lamuhla?

² Lamuhla, sinetizatfu leticinile tekukholelwa kutsi lilanga laJehova ‘lelikhulu nalelesabekako’ selisondzele. (Jow. 2:11) Umphrofethi Zefaniya watsi: “Lilanga lelikhulu laSimakadze selisondzele,  yebo, lisedvute, futsi lita ngekushesha.” (Zef. 1:14) Lesecwayiso sisasebenta nasesikhatsini setfu. Nakakhuluma ngekusondzela kwelilanga laJehova, Pawula watsi: “Asinakaneni kuze sikhutsatane elutsandvweni nasemisebentini lemihle.” (Heb. 10:24) Ngako kufanele sibanake kakhulu bazalwane betfu kuze sikhone kubakhutsata nakudzingeka.

3. Yini leyashiwo ngumphostoli Pawula ngesikhutsato? (Buka sitfombe lesisekucaleni kwalesihloko.)

³ “Kukhatsateka kuyamondzisa umuntfu; kodvwa livi lemusa limenta ajabule.” (Taga 12:25) Loku kuliciniso ngobe sonkhe siyakudzinga kukhutsatwa ngaletinye tikhatsi. Pawula wakwenta kwacaca kutsi nobe ngubani lonemtfwalo wekukhutsata labanye naye uyakudzinga kukhutsatwa. Wabhalela emaKhristu aseRoma watsi: “Nginesifiso lesikhulu sekunibona kuze ngininike sipho lesivela kuNkulunkulu khona nitewucina, nobe kuze sikhutsatane, nguloyo akhutsateke ngekukholwa kwalomunye, ngekwenu nekwami.” (Rom. 1:11, 12) Nanobe Pawula abakhutsata bazalwane, ngaletinye tikhatsi naye bekakudzinga kukhutsatwa.​—Fundza Roma 15:30-32.

4, 5. Bobani labadzinga kukhutsatwa lamuhla, futsi kungani?

⁴ Kufanele sibakhutsate bantfu labenta umsebenti wasikhatsi sonkhe, lokufaka ekhatsi emahlahlandlela latsembekile. Labanyenti badzele tintfo letinyenti kute babe ngemahlahlandlela, titfunywa telivangeli, tisebenti taseBethel, babonisi betigodzi nebafati babo kanye netisebenti letisemahhovisini ekuhumusha. Bonkhe badzele lokutsite kuze bacitse sikhatsi lesinyenti bakhonta Jehova. Ngako bayakudzinga kukhutsatwa. Ngisho nalabo labafisile kwenta umsebenti wasikhatsi sonkhe kodvwa ngenca yetizatfu bangakhoni bayakudzinga kukhutsatwa.

⁵ Bazalwane nabodzadze labangakashadi ngesizatfu sekutsi bafuna kuhlonipha umyalo wekushada “eNkhosini kuphela” bakudzinga kakhulu kukhutsatwa. (1 Khor. 7:39) Ngendlela lefanako bafati labakhutsele bayakhutsateka nangabe bayeni babo babancoma. (Taga 31:28, 31) EmaKhristu lachubeka etsembekile nakashushiswa ngisho noma agula ayakudzinga kukhutsatwa. (2 Thes. 1:3-5) Jehova kanye naJesu badvudvuta tonkhe tinceku letetsembekile.​—Fundza 2 Thesalonika 2:16, 17.

6. Uyini umsebenti walabadzala lokukhuluywa ngabo ku-Isaya 32:1, 2?

⁶ Fundza Isaya 32:1, 2. Asebentisa bazalwane labagcotjiwe kanye ‘nebabusi’ labanguletinye timvu, Jesu uniketa bantfu labacindzetelekile nalabadvumatekile sikhutsato kanye nesicondziso ngesikhatsi labasidzinga ngaso. Labadzala belibandla abatenti ‘emakhosi’ ekukholweni kwetfu kodvwa ‘batisebenti’ lesikanye nato, bafuna kusisita kutsi sihlale sijabulile futsi setsembekile.​—2 Khor. 1:24.

7, 8. Labadzala belibandla bangabakhutsata njani labanye ngaphandle kwekusebentisa emavi?

⁷ Umphostoli Pawula wasibekela sibonelo lesingasilingisa. Wabhalela emaKhristu aseThesalonika watsi: “Ngenca yelutsandvo lolukhulu lesinalo ngani, sakujabulela kuninika tindzaba letimnandzi taNkulunkulu, hhayi tona kuphela, kepha nemiphefumulo yetfu, ngobe natsandzeka kitsi.”​—1 Thes. 2:8.

⁸ Pawula wakhombisa kutsi kukhutsata labanye ngemavi akukeneli, watjela bazalwane base-Efesu watsi: “Kufanele nisite lababutsakatsaka ngekutsi nikhandleke, futsi kufanele nikhumbule emavi iNkhosi Jesu  leyawasho, latsi: ‘Kunenjabulo lenyenti ekupheni kunasekwemukeleni.’” (Imis. 20:35) Pawula bekafuna kukhutsata bazalwane bakhe, ngako bekasebentisa konkhe labenako, futsi naye abesetjentiswa ngalokugcwele ngenca yemiphefumulo yabo. (2 Khor. 12:15) Ngalokufanako labadzala belibandla akukafaneli bagcine ngekukhutsata bazalwane ngemavi kuphela, kepha kufanele babakhutsate nangetento letikhombisa kutsi bayabakhatsalela.​—1 Khor. 14:3.

9. Bazalwane labadzala bangasiyala njani ngendlela lekhutsatako?

⁹ Kukhutsata labanye kungafaka ekhatsi kubayala futsi labadzala belibandla kufanele balandzele sibonelo lesiseBhayibhelini sekuyala labanye ngendlela letabakhutsata. Ngemuva kwekuvuswa kwakhe, Jesu wasibekela sibonelo lesihle sekuniketa siyalo. Bekanesiyalo lesicinile labefuna kusinika emabandla ase-Asia Minor, kodvwa wacale wancoma libandla lase-Efesu, lasePhegamu nelaseThiyathira. (Semb. 2:1-5, 12, 13, 18, 19) Watjela libandla laseLawodisiya watsi: “Bonkhe lengibatsandzako ngiyabakhalimela ngiphindze ngibayale. Ngako-ke timisele futsi uphendvuke.” (Semb. 3:19) Labadzala benta kahle ngekulingisa sibonelo saJesu nakufanele banikete siyalo.

10. Yini sonkhe lesingayenta kuze sikhutsatane?

¹⁰ Kukhutsata labanye akusiwo umsebenti webazalwane labadzala kuphela. Pawula wakhutsata onkhe emaKhristu kutsi akhulume emavi ‘lalungele kwakha kuye ngesidzingo, kuze kuniketwe lokulusito’ kulabanye. (Ef. 4:29) Sonkhe kufanele sihlale sikuphaphamele kunaka tidzingo talabanye. Pawula wakhutsata emaKhristu langemaHebheru watsi: “Cinisani tandla letibutsakatsaka nemadvolo lacegako, nichubeke nicondzisa tindlela tetinyawo tenu, kuze lilunga lelichutako lingabese lichuta kakhulu, kepha liphiliswe.” (Heb. 12:12, 13) Labadzala nalabancane bangabakhutsata labanye ngekutsi basho emavi lakhako.

11. Lomunye dzadze wamsita njani Marthe ngesikhatsi advumatekile

 ¹¹ Dzadze Marthe, * lobekacindzeteleke kakhulu utsi: “Ngalelinye lilanga ngathantaza ngacela Jehova kutsi angikhutsate, ngabese ngihlangana nalomunye dzadze losakhulile lowangikhombisa kutsi uyangitsandza. Wangicocela kutsi naye wake wabhekana nesimo lesifana nalebengikuso futsi loko kwangidvudvuta kakhulu ngobe bengikudzinga kakhulu kukhutsatwa ngaleso sikhatsi.” Kungenteka lodzadze losakhulile akazange anake kutsi wamsita kakhulu Marthe ngekumkhutsata.

12, 13. Singasisebentisa njani ngendlela lephumelelako sikhutsato lesikuFiliphi 2:1-4?

¹² Pawula wakhutsata bazalwane baseFiliphi watsi: “Nangabe kunesikhutsato kuKhristu, kudvudvutwa ngelutsandvo, kuhlanganyela emoyeni, kanye nelutsandvo lolukhulu neluvelo, yentani injabulo yami igcwale ngekutsi nibe nemcondvo munye nelutsandvo lolufanako, ngekuba nebunye ngalokuphelele, nangekucabanga ngendlela lefanako. Ningenti lutfo ngekubanga nome ngekutati, kodvwa ngekutfobeka nitsatse labanye njengalabakhulu kunani. Ningaticabangeli nine kuphela, kodvwa cabangelani nalabanye.”​—Fil. 2:1-4.

¹³ Kuze sikhutsate bazalwane betfu, sonkhe kufanele sitimisele kubacabangela, ‘sibadvudvute ngelutsandvo,’futsi sikhombise kutsi siyabakhatsalela nekutsi siyabatsandza.

14. Nguyiphi lenye indlela lesingakhutsata ngayo labanye?

¹⁴ Siyajabula nasibona kutsi labo lesabasita bachubeka betsembekile kuJehova futsi kwenteka lokufanako kumphostoli Johane lowabhala watsi: “Kute lenye intfo lengijabulisa kakhulu kwendlula loku, kuva kutsi bantfwana bami bayachubeka bahamba ecinisweni.” (3 Joh. 4) Emahlahlandlela lamanyenti angakufakazela kutsi kuwakhutsata kakhulu kubona kutsi bantfu lebebabafundzisa emaciniso bachubeka betsembekile futsi labanye baze babe ngemahlahlandlela. Lihlahlandlela lelidvumatekile lingakhutsateka nangabe silikhumbuta ngetintfo letinhle letenteka esikhatsini lesendlulile.

15. Nguyiphi lenye indlela lesingakhutsata ngayo labo labenta umsebenti wabo ngekwetsembeka?

¹⁵ Babonisi labajikeletako labanyenti kanye nebafati babo batsi bakhutsateka kakhulu nabatfola umlayeto lomfishane wekubonga emabandleni labawavakashele. Kwenteka lokufanako kulabadzala belibandla, titfunywa telivangeli, emahlahlandlela kanye nemalunga emndeni waseBethel nabanconywa ngemsebenti wabo labawenta ngekwetsembeka.

16. Yini lenye lengadvudvuta labanye?

¹⁶ Kutsiwani nangabe ukutfola kumatima kukhutsata labanye? Ecinisweni akusimatima. Yetama kumoyitela nawukhuluma nalotsite, nangabe angamoyiteli kungenteka usuke anenkinga letsite futsi udzinga umuntfu langakhuluma naye. Kumlalela kungamdvudvuta.​—Jak. 1:19.

17. Yini leyasita lomunye umzalwane losemusha ngesikhatsi acindzetelekile?

¹⁷ Henri longumzalwane losemusha bekakhatsateke kakhulu ngesikhatsi tihlobo takhe letisedvute lokufaka ekhatsi babe wakhe lobekangulomdzala welibandla ashiya liciniso. Henri wadvudvutwa ngumbonisi wesigodzi lowammema kutsi bayonatsa litiya futsi wamvumela kutsi atfululele sifuba sakhe kuye. Henri wabona kutsi  kuze umndeni wakubo ubuyele kuJehova bekufanele abeketele ngekwetsembeka. Kwamkhutsata kakhulu kufundza umBhalo weTihlabelelo 46; Zefaniya 3:17 naMakho 10:29, 30.

18. (a) Yatsini iNkhosi Solomoni ngekukhutsata labanye? (b) Yini leyashiwo ngumphostoli Pawula?

¹⁸ Sibonelo saMarthe naHenri sikhombisa kutsi singabakhutsata bazalwane nabodzadze labadzinga indvudvuto. INkhosi Solomoni yabhala yatsi: “Maye! Kuhle kunika imphendvulo lefanele. Buso lobumamatsekako buyajabulisana, tindzaba letimnandzi ticinisa ematsambo.” (Taga 15:23, 30) Ngetulu kwaloko, kufundza Sicongosekulindza noma tintfo letitfolakala ku-website yetfu kungamkhutsata umuntfu lodvumatekile. Pawula wakhombisa kutsi kungasikhutsata kuhlabela tingoma teMbuso ndzawonye. Watsi: “Chubekani nifundzisana futsi nikhutsatana ngetihlabelelo, ngetingoma tekudvumisa, ngekuhlabela tingoma tekukhonta Nkulunkulu ngekubonga, nangekuhlabelela Jehova etinhlitiyweni tenu.”—Khol. 3:16; Imis. 16:25.

19. Kungani kubaluleke kakhulu kutsi sikhutsatane, futsi yini lokufanele siyente?

¹⁹ Njengoba sibona lilanga laJehova “lisondzela” kubaluleke kakhulu kutsi sikhutsatane. (Heb. 10:25) Sitawujabula nangabe silalela seluleko saPawula lesitsi: “Chubekani nikhutsatana futsi nakhana, njengobe nje nenta.”​—1 Thes. 5:11.