1. ¿Andisï Pablu arhiapi kristianu ebreuechani eskaksï jiáni sánderu uinhaperperantapiringa?

IÁSÏMINDU sánderu uétarhisïndi eskachi iáminduecha uinhaperperantaaka. ¿Andi? Kartarhu enga ebreuechani karakuapka, Pablu uandaspti: “Jaue jirinhatsperantani modu nani engachi na uáka jarhuatperani parachi úni uékperani ka ambakiti ambe úni. Ka jaue no kueratani siemprini tánguarhini, ka no ísï úni komueska máru engaksï no pʼindejka tánguarhini, sino jaue uinhaperperantani jarhani máteru ka máteruni jingoni, ka sánderu iásï engajtsï exeni jaka eska juchari Tateeri jurhiatikua janoxamkia” (Ebr. 10:24, 25). Sinku uéxurhini tátsekua, kristianuechaksï exepirindi eska “Tateeri jurhiatikua” janoxapkia Jerusaleni. Kurhangupirindiksï eska Jesusiri profesia kumplirikuarhixapkia ka eskaksï jatsispka para sïpakuarhini iretarhu uératini (Uku. 2:19, 20; Luk. 21:20-22). Ima Jeobaeri jurhiatikua, uéxurhini 70 jimbo niáraspti engaksï romanuecha kʼamajkupka Jerusalenini.

2. ¿Andisï uétarhijki eskachi sánhani arhiaka sánderu pendienti jarhani parachi uinhaperperantani?

 ² Iásï, uánikua rasonichanchi jatsiaska para eratsini eska Jeobaeri kʼéri jurhiatikua axuterku jarhaskia, kʼéri jurhiata enga kánikua chérhikuarhika (Joel 2:11). Ka ambe enga Sofonías 1:14 arhijka, ístu iásï kumplirikuarhixati: “Jeobaeri kʼéri jurhiatikua axuterku jarhastia. Axuterku jarhastia ka sóntku janoxati”. Jimbojtsïnisï Pablu arhijti: “Jaue jirinhatsperantani modu nani engachi na uáka jarhuatperani parachi úni uékperani ka ambakiti ambe úni” (Ebr. 10:24). I ambe arhikuekasïndi eska sánhani arhixaka uétarhini eskachi sánderu pendienti jauaka juchari erachicha jimbo, para uinhaperantaani jiáni engaksï uétarhinchaaka.

3. ¿Ambe uandaspi uinhaperantskueri ambe apostuli Pablu? (Exe je dibujuni enga uénakuarhu jaka).

³ Biblia arhisïndi: “Uandanhiata kʼuiripueri mintsitarhu ma, kánikua no sési pʼikuastasïndi, peru ambakiti uandakuechaksï sési pʼikuastantasïndi” (Prov. 12:25). Ísïsti, iáminduechachi uétarhinchasïnga ménisï eskachi uinhaperanhantaaka. Ka Pablu uandaspti eska asta ima enga uinhaperpentajka, uétarhinchasïnga eska uinhaperanhantaaka. Arini ambe karakuaspti Roma anapu kristianuechani: “Jimbokaksïni xáni exenchaxaka, para eska engachi májku jásï jauakia, jíksïni arhukuchiaka Espiritu Santueri kóntperatechani paraksïni úni uinhaperantani, o paraksïni sánderu jurhimbitku arhini, para eska jíjtuni uinhaperanhantaaka májku jásï chánksïni jingoni” (Rom. 1:11, 12). Eskachi na exejka, asta apostuli Pablu uétarhinchasïrendi ménisï eska uinhaperanhantapiringa (arhinta je Roma 15:30-32).

4, 5. ¿Néksï uétarhinchasïni iásï eskachi uinhaperantauaka ka andi?

⁴ Uánikua erachichaksï kʼérati sakrifisiuechani uásïndi paraksï tiempu kompletueri marhuakuani Jeobani. Máruksï jindesti prekursoricha, misioneruecha, sirkuitueri orhejtsïkuticha ka témbecha, ka imecha engaksï sukursalicharhu ánchikuarhijka o ofisina de traduksionirhu ma. Iámindu imaksï jukanchasti eskachi arhiauaka eskaksï sési úxaka, ka jatsiskachi para ísï úni. Máteru engaksï agradeserijka eskachi uinhaperantauaka, jindestiksï ima engaksï ióntki tiempu kompletueri marhuapka peru engaksï iásï nóteru újkia ísï úni mámaru ambe jimbo.

⁵ ¿Máteruksï né uétarhinchasïni eskachi uinhaperantauaka? Erachicha ka pirenchicha engaksï nótki tembuchajka o uambuchani jimbokaksï uékasïnga úni ambe enga Biblia arhijka, tembuchani o uambuchani ‘jakajkuti’ ma jingoni (1 Kor. 7:39). Uarhiitichaksï uétarhinchasïndi eskaksï uámbecha arhiauaka na engaksï xáni xénchajka ka na engaksï xáni jukaparharajka imecheri ánchikuarhita (Prov. 31:28, 31). Ka nochi mirikurhiauaka erachichani engaksï no jurajkujka Jeobani nájkirukaksï no sési kánhajka oksï pʼamenchani jarhani (2 Tes. 1:3-5). Jeoba ka Jesusi, iámindu ini erachichanksï uinhaperantaasïndi (arhinta je 2 Tesalonika 2:16, 17).

6. ¿Nákiski orhejtsïkuticheri ánchikuarhita seguni Isaías 32:1, 2?

⁶ (Arhinta je Isaías 32:1, 2). Irekaxakachi jurhiatikuechani enga kánikua no sési jánhaskuarheka, jimbosï fásiliti eskachi kómu pʼikuarheraaka. Perujtsïni Jesusi uinhaperantasïndi ‘prínsipechani’ úrapariani, engaksï jindeka orhejtsïkuticha, tanto erakukatecha komu engaksï máteru karichicha jingoni kuenta úkuarhijka. I orhejtsïkutichaksï no ‘juramukuasïndi’ imeri ermanuechani, sánderu sési, jarhuataasïndiksï paraksï tsípini pʼikuarherani. Imajtsïni uékasïndi jarhuatani parachi felisiini ka nochi jurajkuni Jeobani (2 Kor. 1:24).

7, 8. Aparte de uandakuecha jingoni, ¿nénaksï uá orhejtsïkuticha uinhaperantaani erachichani?

⁷ Orhejtsïkutichaksï sési úsïndi engaksï májkueni újka eska apostuli Pablu. Ima arini ambe karakuaspti Tesalonika anapu kristianuechani engaksï no sési kánhenga: “Engaksïni xáni kánikua tsípijka  exeni, jucha ísï pʼikuarherasïrenga enajkiksïni no solu eiangupirini Diosïri ambakiti eianhperakuani, sino asta juchari tsípikuanksï jamberi íntspini chánksïni jimbo, jimbokaksïni xáni mintsita jingoni uékasïnga” (1 Tes. 2:8).

⁸ Pablu xarhataspti eska ménisï no solu uandakuecha jingoni uétarhisïnga uinhaperpentani. Arhiaspti Efesu anapu orhejtsïkutichani: “Jarhuata[...] [je] imechani engaksï no uinhapitiika, miántsparini tata Jesukristueri uandakuechani, jimboka ima ísï uandaska: ‘Sánderu sésisti intsïmpini, ka eska intsïmbinhani’” (Uku. 20:35). Pablu no solu uékasïrendi uinhaperantaani imeri ermanuechani, sino sánderu ambe úni. Arhiaspti: “Kánikua tsípikua jingoni úraaka juchiti ambe ka íntspini asta juchiti tsípikuani jamberi chári almechani jimbo” (2 Kor. 12:15). Májkueni eska Pablu, orhejtsïkutichaksï no solu jatsisti para uandakuecha jingoni uinhaperantaani erachichani ka sési pʼikuastantaani, sino ístu úkuecha jingoni. Ísï úparini, xarhatanksï jarhasïndi eskaksï meru uandanhiasïnga imecha jimbo (1 Kor. 14:3, Táta Diósïri Uandakua Tata Jesukristueri Aiatsperakua [TDU]).

9. ¿Ambe jarhuataua orhejtsïkutichani konseju íntsaani erachichani enga uáka uinhaperantaani?

⁹ Para uinhaperantaani erachichani, orhejtsïkutichaksï ménisï jatsisïndi para konseju íntsaani. Peru engaksï uéjka eska konseju uinhaperantauaka erachichani, jatsistiksï para miáni ambe enga jorhentpejka Biblia. Jesusi ambakiti ejemplu ma íntspespti enga tsíntapkia, jiáni enga jatsipka para xukaani máru kúnguarhikua Asia Menor anapuechani. Efesu, Pérgamu ka Tiatira anapu kúnguarhikuani, uékperakua jingoni felisitariuaspti ante de konseju íntsaani (Jaŋ. 2:1-5, 12, 13, 18, 19). Ka Laodisea anapu kúnguarhikuani arhispti: “Ji xukaasïnga ka kastigariuani imechani engani ji uéajka, ísï jimbo mintsita jukanta ka moanta” (Jaŋ. 3:19). Orhejtsïkutichaksï jánguarhintasïndi májkueni úni eska Kristu engaksï konseju íntspini jámaaka.

10. ¿Ambechi jatsiski para úni iáminduecha parachi uinhaperperantani?

¹⁰ Nóksï orhejtsïkutichajkusï jatsiti responsabilidadi para uinhaperpentani. Pablujtsïni juramuchisti  iámindu kristianuechani parachi uandani imani ambe enga “marhuajka para uinhaperpentani, para eska ima enga[jt]sïni kurhajchaaka, uinhapini pʼikuarheraaka” (Efes. 4:29). Jo ísïsti, iáminduechachi jatsiska para pendienti jarhani juchari erachichani jimbo ka exenchi ambeksï uétarhinchaxaki. Pablu arhiaspti kristianu ebreuechani: “Tarhatantsï je jájkichani engaksï andatserani jakaia, ka jauataa je jurhintskuechani engaksï xúrini [o débili] jaka. Ka jurhimberantskantaa je xanharuechani engaksï no sési jándepka, eska ambakintaaka ima enga no újka xanharani, ka no sánderu kánerani pʼamenchakua” (Ebr. 12:12, 13, TDU). Astaksï tumbiicha uáti uinhaperantaani erachichani uandakuecha jingoni.

11. ¿Ambe jarhuajperata pʼiraspi pirenchi ma enga deprimida japka?

¹¹ Ju je exeni ambe enga nitamanchapka pirenchi ma enga Marthe arhinhajka, * enga depresioni pʼipka. Ima karasti: “Ma jurhiani engani kómarhipka Jeobani eskarini jarhuatapiringa, pirenchini ma exentaspka enga jatirikia. Ima meru imani ambe úspti engani ji uétarhinchani japka: sésirini kámaspti ka uékperakua jingoni. Ísturini aianguspti eska imajtu sáno májkueni ambe nitamakuarhespka eska ji ka nóteruni jandiajku pʼikuarheraspkia”. A lo mejori pirenchi enga jatirikia, no jamberi kuenta íntskukuarhipti na engaksï xáni jarhuatapka imeri uandakuecha Martheni.

12, 13. ¿Nénachi uá úni ambe enga Filipusʌ 2:1-4 arhijka?

¹² Pablu arini konseju íntskuspti Filipusi anapu kúnguarhikuani: “Ú je eskani ji kánikua tsípini pʼikuarheraaka, mítiparini eskajtsï májku ambe eratsixaka ka májku jásï uékperantsï, ka iáminduecha májku mintsita jingoni jámani ka májku ambe eratsini. Ka asï jáma je úni ni ma ambe enbidia jimbo o teparakuarhikua jimbo, sino kaxumbikua jingoni, ka sánderu kʼéri ambe exeani máruteruechani ka eska chájkumindu, ka no solu pendienti páni para chájkumindu sési uérani, sino ístu pendienti páni para máruteruecha” (Filip. 2:2-4).

¹³ I textuechajtsïni exerasïndi eskachi iáminduecha jatsiska para jirinhakuntani néna jarhuajpini. Para jarhuataani juchari erachichani, uákachi sési járhati uandakuecha jingoni uinhaperantaani, uandanhiani imecha jimbo ka xarhatakuani pʼamojperakua ka uékperakua (Filip. 2:1, TNM).

14. ¿Ambe uá kánikua uinhaperpentani?

¹⁴ Ma ambe engajtsïni sési pʼikuastajka, jindesti mítini eskaksï ima engachi ióntki jarhuataaka, seguirixakaksï Jeobani marhuakuni. Apostuli Juanu karaspti: “No ma ambe jimbo sánderuni tsípisïnga ji ka eska para mítini jarhani eska juchiti uátsïcha jámaxaka eska na terokuntajka indeni uandakuani jingoni enga ísïka” (3 Juanu 4). Uánikua prekursorichaksï uandasïndi eska kánikua uinhaperantaasïnga mítini eska ima kʼuiripu engaksï ióntki Bibliaeri ambe jorhendapka, útasï marhuakuxaka Jeobani o eska prekursoriskia. Ísï jimbo, miátantani prekursorini ma enga desanimadu jaka ambe enga xáni úkia máteruecha jimbo, uáti sési pʼikuastantani.

15. ¿Ambechi uá úni parachi uinhaperantaani imechani engaksï jánguarhintajka marhuakuni Jeobani?

¹⁵ Uánikua sirkuitueri orhejtsïkuticha ka témbecha, uandantasïndiksï na engaksï xáni sési pʼikuarherajka enga erachi ma sïranda sapichurhu ma agradeserikuajka engaksï pʼorhembika kúnguarhikuani. Ka májkuenksï pʼikuarherasïndi orhejtsïkuticha, misioneruecha, prekursoricha ka betelitecha engaksï agradeseriminhajka jimbokaksï jánguarhisïnga marhuakuni Jeobani.

16. ¿Uánikua ambe uétarhisïni para uinhaperantani nemani?

¹⁶ Engachi chéjka kʼuiripu jingoni uandaxeni ochi no káni uandariini, nochi jatsiska para eratsini eskachi no uáka uinhaperpentani. Ísï úni, no xáni úkua jukasti. Por ejemplu, engachi erachini ma saludariuaka, uákachi tsípikuni. Engajtsïni no tsípecheska, jamberi jindeti jimboka uandanhiaxaka  ka uékani nema jingoni uandontskuarhini. A lo mejorichi uáka jarhuatani kurhajchaparintku (Sant. 1:19).

17. ¿Ambe jarhuajperata pʼiraspi tumbi ma?

¹⁷ Ju je exeni ambe enga nitamakuarhipka tumbi ma enga Henri arhinhajka. Kánikua desanimadu jarhaspti jimbokaksï máru parienticha jarharespka jurhimbikuani ka ístu tátemba enga orhejtsïkutipka. Peru sirkuitueri orhejtsïkuti ma kafeteriarhu ma páspti Henrini para uinhaperantani ka kurhaaspti ambe enga xáni eiangukuarhipka. Henri kurhanguspti eska paraka imeri familia kʼuanhatsintapiringa jurhimbikuarhu, jatsispka para kurhajchani Jeobani. Ístu, kánikua jarhuataspti arhintani Salmo 46, Sofonías 3:17 ka Markusʌ 10:29, 30.

18. a) ¿Ambe uandaspi rei Salomoni? b) ¿Ambe konseju íntspespi Pablu?

¹⁸ ¿Ambejtsïni jorhendasïni Henriri ka Martheri ejemplu? Eskachi iáminduecha uáka uinhaperantaani imechani engaksï uétarhinchajka. Rei Salomoni karaspti: “Uandakua ma ima tiempu jimbo enga uétarhini jauaka, ¡xáni enga sésiika!”. Ka ístu uandaspti eska ‘tsípetspeni, sési pʼikuastasïnga mintsitani’ ka eska “ambakiti ambe mítini, uinhapiti uásïnga únichani” (Prov. 15:23, 30). Engachi exeska eska nema desanimadu jarhaska, ¿ambechi uá úni? Uákachi arhikuntani rebistani Aianhpiri o informasioni enga juchari pájina Internetirhu jaka. Ka Pablujtu arini konseju íntspespti: “Jorhentpera je ka arhistatsperani [o “uinhaperperantani”, TNM], ka pireku je Diosïni chári mintsitecharhu, salmuechani jingoni ka Diosïri pirekuechani jingoni ka ístu mámaru járhati pirekuechani jingoni engaksï Espiritu Santuni jimboeka” (Kol. 3:16; Uku. 16:25). Eskachi na exejka, májku kʼéri pireani Reinueri pirekuechani, ístujtsïni uáti sési pʼikuastantani.

19. ¿Andisï sánhani arhia jukaparhakueni eskachi uinhaperperantaaka ka ambechi jatsiski para úni?

¹⁹ Entre sánderu axuterku jauakia Jeobaeri jurhiatikua, sánderu uétarhiati eskachi uinhaperperantaaka (Ebr. 10:25). Ísï jimbo, ju je úni ambe enga uandajka ari konseju Pablueri: “Mintsita jatsikpera je, ka uinhaperperantani máteru ka máteruni jingoni ísï eskajtsï na úni jaka” (1 Tes. 5:11).