1. Малы апостол Павел еврей калыкысь христианъёсты ӧтиз ог-огзэс юнматыны, уката ик со вакытэ?

 МИЛЕМЛЫ ваньмылы туж тыршоно луэ, ог-огмес юнматон понна. Нош малы? Та юанлы валэктонэз ми шедьтӥськомы апостол Павеллэн гожтэтысьтыз, кудзэ со еврей калыкысь христианъёслы гожтӥз. Со гожтӥз соослы: «Огмылы огмы юрттӥськыса уломе, яратыса, ӟеч ужъёс лэсьтыса улыны мылкыдмес ӝутоме. Огазьын вӧсяськонъёсы ветлытэк ум улэ, кызьы вырыны даурто куд-огъёсыз. Огмылэсь огмы мылкыдмес лӧпкытыломе, уката ик, Солэн нуналэзлэсь матэгес вуэмзэ шӧдӥськоды ке» (Евр. 10:24, 25). Вить ар гинэ ортчыса вуиз но, еврей калыкысь христианъёс, кудъёсыз Иерусалимын улӥзы, валазы, «Кузё-Инмарлэн... нуналэз» матэктэ шуыса но соослы Иисуслэн кылъёсызлэсь кылзӥськоно но городысь пегӟоно шуыса (Ап. уж. 2:19, 20; Лука 21:20—22). Иеговалэн нуналыз вуиз асьме эраысь 70-тӥ арын, куке рим ожгарчиос Иеговалэсь  Иерусалим пумысен верам приговорзэ быдэстӥзы.

2. Малы милемлы тужгес но тыршоно ог-огмес юнматыны?

² Туннэ ми но шӧдӥськомы, Иеговалэн быдӟым но укыр кышкыт нуналыз матэктэ ини шуыса (Иоиль 2:11). Пророк Софония вераз: «Матын Кузё-Инмарлэн быдӟым нуналыз, матын — но туж дыртэ» (Соф. 1:14). Та алонлэсь туннэ нуналэ улӥсь вань адямиослы кылзӥськоно. Соин ик милемлы пелямы пононо Павеллэсь верам кылъёссэ: «Огмылы огмы юрттӥськыса уломе, яратыса, ӟеч ужъёс лэсьтыса улыны мылкыдмес ӝутоме» (Евр. 10:24). Милемлы эшшо но тросгес тунсыкъяськоно вын-агайёсынымы но сузэр-апайёсынымы, ми соосты кулэ дыръяз юнматыны мед быгатомы шуыса.

3. Мар Павел гожтӥз юнматон сярысь? (Учке статья кутсконысь суредэз.)

³ Мадёнъёсын 12:25 гожтэмын: «Сюлмын улӥсь ӝожлык адямиез зӥбыса возе, нош ӟеч кыл сое шулдыртэ». Та кылъёсын котькудӥз соглаш кариськоз. Дырын-дырын котькудмылы кулэ, милемыз ӟеч кылъёсын мед юнматозы шуыса. Павел пусйиз, кин кенешын буйгатыны пуктэмын, сое ассэ но юнматоно луэ шуыса. Римысь христианъёслы со гожтӥз: «Мынам тӥледыз туж адӟеме потэ: тӥледыз юнматон понна кыӵе ке но духовной кузьым тӥледлы сётыны мед быгатом, мукет сямен вераса, асьмелэн огъя осконэнымы огмес огмы юнматыны мед быгатомы шуыса» (Рим. 1:11, 12). Павелэз гинэ но, кудӥз ачиз котькинэ юнматъяз, куддыръя ассэ юнматыны кулэ вал. (Лыдӟе Римъёслы 15:30—32.)

4, 5. Кинэ ушъяно но юнматоно но малы?

⁴ Ваньзы, кинъёс вань кужымзэс но дырзэс сёто Инмарлы ужан-тыршон понна, ушъямон луо. Соос пӧлын пионеръёс, кудъёсыз тросэзлэсь куштӥськизы, пионер луыса ужаны-тыршыны кутскон понна. Сое ик вераны луоз миссионеръёс, ёросэз чакласьёс но соослэн кышнооссы сярысь, нош озьы ик, филиалын но палэнын берыктон ужез нуись офисын тыршисьёс сярысь но. Ваньзылы соослы улонзэс воштоно вал, ужан-тыршонлы тросгес дырзэс висъян вылысь. Со понна соосты ушъяны луоз. Ушъян кылъёс озьы ик шумпоттозы соосты но, кинъёслэн вань дырзэс сётыса ужамзы-тыршемзы потэ, но малы ке уг быгато.

⁵ Кинэ эшшо юнматоно на? Вын-агайёсты но сузэр-апайёсты, кудъёсыз семья уг кылдыто, нош кылзӥсько косонлэсь, кудӥз вера, «Кузё-Инмарлы оскись муртэн» гинэ кузпалъяськоно шуыса (1 Кор. 7:39). Нош макем шумпото кышноос, куке картъёссы ушъяло соосты мылысь-кыдысь тыршемзы понна! (Мад. 31:28, 31). Озьы ик ушъяно соосты но, кинъёс, уйылон-уллянъёс но висёнъёс шоры учкытэк, Инмарлы оскымон кылё (2 Фес. 1:3—5). Иегова но Христос ваньзэсты сыӵе оскымон ужась-тыршисьёсты юнмато. (Лыдӟе 2 Фессалоникаослы 2:16, 17.)

6. Кыӵе уж сётэмын тӧроослы, Исаиялэн 32:1, 2 верамъя?

⁶ Лыдӟе Исаиялэсь 32:1, 2. Та секыт дыръёсы Иисус Христос чигиськем  мылкыдоосты юнматэ «кивалтӥсьёс» пыр, яке аслаз зырӟем вын-агайёсыз но мукет ыжъёс пӧлысь оскымон тӧроос пыр. Тӧроос кенешысь христианъёслэн осконэнызы уг кузёясько, соос юртто вын-агайёслы но сузэр-апайёслы шумпотон басьтыны (2 Кор. 1:24).

7, 8. Кызьы тӧроос кенешысь христианъёслы юрттыны быгато?

⁷ Апостол Павел тӧроослы туж умой пример возьматӥз. Тани мар гожтӥз со Фессалоникаысь христианъёслы, кудъёсыз уйылон-уллянъёсын пумиськизы: «Ми тӥледыз вань лулынымы-сюлмынымы яратӥмы, соин ик Инмарлэсь Ӟеч Иворзэ гинэ ӧвӧл, асьмелэсь лулмес но тӥледлы сётыны дасесь вал, сокем тӥ милемлы дуноесь-гажаноесь луиды» (1 Фес. 2:8).

⁸ Шуныт кылъёс гинэ тырмыт уг луо шуыса возьматон понна, Павел Ефесысь тӧроослы шуиз: «Тӥ но... лябъёслы юрттӥськыны, Кузё-Инмарлэсь Иисуслэсь кылъёссэ тодады возьыны кулэ... Уго Со Ачиз шуиз: „Басьтон сярысь, сётыны умойгес“» (Ап. уж. 20:35). Вын-агайёсыз понна Павел дась вал шумпотыса сётъяны сое, маиз солэн вал. Ужъёсыныз со возьматӥз, соос понна со ваньзэ карыны дась шуыса (2 Кор. 12:15). Павеллэсь адӟем карыса, тӧроослы мукетъёссэ кылъёсын гинэ юнматоно ӧвӧл, нош сюлмаськемзэс уж вылын возьматоно (1 Кор. 14:3).

9. Кызьы тӧроос, вын-агайлы яке сузэр-апайлы визь-кенеш сётыса, соосты юнматыны быгато?

⁹ Вын-агайёсты но сузэр-апайёсты юнматыны тыршыса, тӧроос куддыръя соослы визь-кенеш сёто. Тӧроослы дышетсконо озьы визь-кенеш сётыны, со огъя оскисьёссылэсь мылкыдзэс мед ӝутоз шуыса. Солы соос Библиысь дышетскыны быгатозы. Тӧроослы туж умой пример возьматӥз Иисус Христос. Улӟемез бере солы Пичи Азиысь куд-ог кенешъёслы шонерак визь-кенеш сётоно луиз. Кызьы со сое сётӥз? Ефесысь, Пергамысь но Фиатираысь кенешъёсты тупатон азяз со соосты сюлмысь ушъяз (Усьт. 2:1—5, 12, 13, 18, 19). Лаодикияысь кенешлы со шуиз: «Кинъёсты Мон яратӥсько, соосты шарае поттӥсько, вӧсь но карисько. Озьыен, тыршись лу, ӧпкельыса сьӧлыкъёсыдлэсь куштӥськы» (Усьт. 3:19). Тӧроос Христослэсь адӟем карыны быгато.

10. Кызьы ваньмы асьмеос ог-огмес юнматыны быгатӥськомы?

¹⁰ Вын-агайёсты но сузэр-апайёсты тӧроослы гинэ юнматоно ӧвӧл. Павел христианъёсты ӧтиз: «Ӟечъёсыз гинэ, осконэз юнматӥсь-дышетӥсь кылъёс гинэ ымысьтыды мед потозы, кылзӥськисьёслы соос пайда мед ваёзы» (Еф. 4:29). Котькудмылы адӟыны тыршоно, кызьы мукетъёсызлы юрттыны быгатомы. Еврейёслы гожтэтаз Павел гожтӥз: «Каньсырам киостэс, куалекъясь пыдесъёстэс юнматэлэ. Шонер вамышъялэ: чутӥсь пыдды йыромон пала медаз ни кожы, умой луысал, нош ик со йӧнасал ке» (Евр. 12:12, 13). Ваньмы асьмеос, туж егитъёсыз но, ог-огмес ӟеч кылъёсын юнматыны быгатӥськомы.

11. Мар юрттӥз Марталы, кудӥзлэн депрессия вал?

¹¹ Тани мар гожтӥз Марта a нимо сузэр, кудӥзлэн депрессия вал: «Одӥг пол  мон вӧсяськи, монэ кин ке но мед юнматоз шуыса. Со нуналэ ик мон пумитай арлыдо сузэрез. Со монэн лякытэн вераськиз но монэ валаны тыршиз. Ӵапак со мыным туж кулэ вал. Эшшо со вераз на, ачиз но со выллем югдурен пумиськиз шуыса. Со сузэрен вераськеме бере мон шӧдӥ, огнам ӧвӧл шуыса». Арлыдо сузэр ӧз но малпа, дыр, макем юрттӥзы солэн кылъёсыз Марталы.

12, 13. Кызьы ми Филиппыослы 2:1—4 гожтэм визь-кенешлэсь кылзӥськыны быгатӥськомы?

¹² Павел Филиппы кенешысь вань христианъёслы таӵе визь-кенеш сётӥз: «Христос бордысь мылкыддэс ӝутон шедьтӥськоды ке, солэн яратонэз тӥледыз буйгатэ ке, Дух пыр куспады герӟаськиськоды ке, гажан-жалянды, ӟеч карыны сюлмаськонды вань ке, соку тӥ монэ пумтэм юн шумпоттӥськоды; одӥг малпанэн улэ, ог-огдэс яратэ, огмылкыдын, тупаса улӥсесь луэ. Номыре но эн лэсьтэ, асьтэлы гинэ пайда басьтыны турттыса, ушъян-данъянэз эн яратэ. Асьтэдыз покчи каре, нош мукетъёссэ асьтэ сярысь умоесьгес шуыса лыдъялэ. Нокин но ас сярысьтыз гинэ медаз сюлмаськы, мукетъёс сярысь но мед сюлмаськоз» (Флп. 2:1—4).

¹³ Вын-агайёсмес но сузэр-апайёсмес юнматон понна, милемлы соосты буйгатоно, гажано-жаляно но сюлмаськоно соос сярысь.

14. Мар Иеговалэн ужась-тыршисьёсызлэсь мылкыдзэс ӝутыны быгатоз?

¹⁴ Куке ми тодӥськомы, соос, кинъёслы ми куке но зэмлык пала кариськыны юрттӥмы, Иеговалы оскымон кылё  шуыса, со милесьтым мылкыдмес туж ӝутэ. Апостол Иоаннлэн но со выллем шӧдонъёсыз кылдылӥзы. Со гожтӥз: «Мынам нылпиосы зэмлык бордын уло шуыса кылӥсько ке, мон понна солэсь бадӟымез шумпотон ӧвӧл» (3 Иоанн 4). Тросэз пионеръёс соглаш луозы, туж шумпотоно шуыса, куке дышетскисьёс трос аръёс ӵоже Инмарлы оскымон кылё, нош куд-огъёсыз пионеръёс луыса ужало-тыршо. Мылкыдыз куашкам пионерлы тодаз вайытӥд ке, макем трос ӟеч ужъёс со лэсьтӥз мукетъёсызлы, со солэсь мылкыдзэ ӝутыны быгатоз.

15. Кызьы ми юнматыны быгатӥськомы Инмарлы оскымон ужась-тыршисьёсты?

¹⁵ Тросэз ёросэз чакласьёс верало, куке соос кенешъёсы лыкто но соослы тау карыса пичи гинэ открытка ке но кузьмало, соос но кышнооссы солы туж шумпото шуыса. Оскымон ужам-тыршемзы понна ушъяса верам кылъёс бадӟым шумпотон ваё тӧроослы, миссионеръёслы, пионеръёслы но Вефильын ужась-тыршисьёслы.

16. Мар карыны луоз, кинэ ке юнматон понна?

¹⁶ Шонертэм луысал малпаны, ми вераськисесь ӧвӧл ке, нокинэ но буйгатыны ум быгатэ шуыса. Юнматон понна трос кулэ ӧвӧл — куддыръя пальпотэм гинэ тырмыт луэ. Адями пумитамы паль ӧз поты ке, соку солэн мар ке но луиз, вылды, яке сое кылзыны но буйгатыны кулэ (Иак. 1:19).

17. Кыӵе юрттэт басьтӥз егит вын-агай кайгырыкуз?

¹⁷ Анри нимо егит вын-агаймы туж  кайгыре вал, малы ке шуоно солэн матысь ӵыжы-выжыосыз, озьы ик, тӧро луыса ужась-тыршись атаез но, зэмлыкез кельтӥзы. Анрилы юрттӥз ёросэз чаклась. Со сое кафее кофе юыны ӧтиз но туж сак кылзӥз. Ёросэз чакласен вераськемез бере Анри валаз, ӵыжы-выжыосызлы юрттыны быгатоз шуыса соку гинэ, ачиз Иеговалы оскымон кылиз ке. Со сяна, сое туж юнмато вал 45-тӥ Псаломысь, Софониялэн 3:17 но Марклэсь 10:29, 30 кылъёс.

18. а) Мар гожтӥз Соломон эксэй юнматон сярысь? б) Кыӵе визь-кенеш сётӥз апостол Павел христианъёслы?

¹⁸ Мартаен но Анриен луэм учырысь адӟиське, вын-агайёсты но сузэр-апайёсты, кудъёссэ юнматыны кулэ, ми юнматыны быгатӥськомы шуыса. Соломон эксэй гожтӥз: «Макем умой ас дыраз верам кыл! Чылкыт синмын [яке «шумпотӥсь синмын»] шоре учко ке, сюлэм шумпотэ, ӟеч ивор лыосты юнматэ» (Мад. 15:23, 30). Куашкам мылкыдоосты юнматыны луоз, соослы публикациосысьтымы мае ке лыдӟыса. Павеллэн верамезъя, эшшо одӥгез амал, кызьы буйгатыны быгатомы,— со Эксэйлык кырӟанъёсты ӵош кырӟаны. Со гожтӥз: «Огдэс огды псаломъёсын, кылбуранъёсын, духовной кырӟанъёсын дышетэ, визьмалэ, сюлмысьтыды Кузё-Инмарлы тау карыса кырӟалэ» (Кол. 3:16; Ап. уж. 16:25).

19. Малы туж кулэ ог-огмес юнматыны но мар кароно со понна?

¹⁹ Иеговалэн нуналыз вуэмъя, туж кулэ ог-огмес юнматыны (Евр. 10:25). Ойдолэ кылзӥськомы Павеллэн христианъёслы сётэм визь-кенешезлэсь: «Кызьы тӥ али лэсьтӥськоды, азьланяз но ог-огдылэсь мылкыддэс ӝутэ, ог-огдэс юнматэ» (1 Фес. 5:11).