1. Kay ano nga gin-aghat ni apostol Pablo an Hebreo nga mga Kristiano han siyahan nga siglo nga magparig-onay ha usa kag usa hin mas labi pa?

KAY ano nga sadang kita mas mangalimbasog ha pagparig-on ha iba? Ginsusumatan kita ni apostol Pablo han rason pinaagi han iya surat ha Hebreo nga mga Kristiano. Hiya nagsiring ha ira: “Tagan naton hin atensyon an usa kag usa basi mag-inaghatay kita ha pagpakita hin gugma ngan mag-opay nga buhat, nga diri ginpapabay-an an aton pagkatirok, sugad han nabatasan han iba, lugod nagpaparig-onay ha usa kag usa, labi na nga nakikita niyo nga nagtitikahirani na an adlaw.” (Heb. 10:24, 25) Mga lima ka tuig na la, makikita han Judio nga mga Kristiano nga naukoy ha Jerusalem nga nagtitikahirani na an “adlaw ni Jehova,” ngan makikita nira an mga tigaman nga iginhatag ni Jesus nga magigin pangirilal-an nga kinahanglan na hira pumalagiw tikang ha syudad. (Buh. 2:19, 20; Luc. 21:20-22) Ito nga adlaw ni Jehova inabot han 70 C.E. han iginpadapat han mga Romano an paghukom ni Jehova ha Jerusalem.

2. Kay ano nga sadang kita maghatag hin dugang nga atensyon ha pagparig-on ha usa kag usa yana?

² Yana, nakikita na gud naton an mga ebidensya nga hirani na an  “daku ngan makalilisang” nga adlaw ni Jehova. (Joel 2:11) Hi propeta Sepania nagsiring: “An daku nga adlaw ni Jehova harani na, harani na ngan nagdadagmit gud.” (Sep. 1:14) Ini nga pahamangno aplikado liwat ha aton panahon. Tungod kay hirani na gud an adlaw ni Jehova, hi Pablo nagsiring nga “tagan naton hin atensyon an usa kag usa basi mag-inaghatay kita ha pagpakita hin gugma ngan mag-opay nga buhat.” (Heb. 10:24) Salit sadang gud kita magin mas interesado ha aton kabugtoan basi maparig-on naton hira ha anoman nga panahon nga kinahanglan nira ito.

3. Ano an ginsiring ni Pablo may kalabotan ha pagparig-on? (Kitaa an retrato ha tinikangan hini nga artikulo.)

³ “An kabug-at ha kasingkasing han tawo nakakapaguku hini; kondi an maopay nga polong nakakalipay hini.” (Prob. 12:25) Nahitatabo ito ha aton ngatanan. Kita ngatanan nagkikinahanglan hin pagparig-on ha panapanahon. Iginpatin-aw ni Pablo nga bisan adton may responsabilidad ha pagparig-on ha iba nagkikinahanglan liwat hin pagparig-on. Hiya nagsurat ha mga Kristiano ha Roma: “Naghihingyap gud ako nga makita kamo basi maipaangbit ko ha iyo an espirituwal nga regalo basi maparig-on kamo; o basi magdinasigay kita pinaagi han iyo pagtoo ngan han akon pagtoo.” (Roma 1:11, 12) Oo, bisan hi Pablo, nga naghatag hin pagparig-on ha iba, nagkinahanglan liwat hin pagparig-on ha panapanahon.—Basaha an Roma 15:30-32.

4, 5. Hin-o an mahimo naton parig-unon, ngan kay ano?

⁴ An mga nagkikinabuhi nga may pagsakripisyo sadang kumendasyonan. Kaupod hini an matinumanon nga mga payunir. Damu ha ira an naghihimo hin dagku nga mga sakripisyo basi makagpayunir. Ito liwat an ginbubuhat han mga misyonero, Bethelite, paramangno ha sirkito ngan han ira asawa, ngan hadton nagbuboluntaryo ha mga remote translation office. Hira ngatanan naghihimo hin mga sakripisyo basi magkaada mas daku nga panahon para ha sagrado nga pag-alagad. Salit angayan la nga parig-unon naton hira. Ngan adton mga naruruyag magpabilin sugad nga payunir pero diri na nakakahimo hito tungod han pipira nga rason mapasalamaton liwat han mga pagparig-on nga ira nakakarawat.

⁵ An kabugtoan nga nagpapabilin nga solo tungod kay karuyag nira sundon an sugo nga mag-asawa hin “sumurunod la han Ginoo” kinahanglan liwat parig-unon. (1 Cor. 7:39) Sugad man, gin-aapresyar han maduruto nga mga asawa an makaparig-on nga mga pulong tikang ha ira bana. (Prob. 31:28, 31) An mga Kristiano nga nagpapabilin nga matinumanon bisan pa han pagtimaraot o sakit nagkikinahanglan liwat hin pagparig-on. (2 Tes. 1:3-5) Ginliliaw ni Jehova ngan han Kristo ini ngatanan nga matinumanon nga mga surugoon.—Basaha an 2 Tesalonica 2:16, 17.

6. Ano an responsabilidad han mga tigurang sugad han iginhuhulagway ha Isaias 32:1, 2?

⁶ Basaha an Isaias 32:1, 2. Hi Jesus, pinaagi han iya dinihogan nga kabugtoan ngan adton mabinuligon nga “mga prinsipe” nga kaapi han iba nga mga karnero, naghahatag hin pagparig-on ngan giya ha mga nasusubo ngan nanluluya durante hinin makuri nga panahon. Ito gud an sadang mahitabo, kay ini nga mga tigurang ha kongregasyon diri mga ‘magburuot’ han pagtoo han iba kondi “mga igkasi-magburuhat” para ha kalipay han ira kabugtoan.—2 Cor. 1:24.

7, 8. Labot la ha paghatag hin makaparig-on nga mga pulong, paonan-o pa mapaparig-on han mga tigurang an iba?

⁷ Hi apostol Pablo nagpakita hin ehemplo nga sadang subaron. Hiya nagsurat ha gintitimaraot nga mga Kristiano ha Tesalonica: “Tungod kay pinalangga namon kamo, nalipay kami nga ipaangbit ha iyo diri la an maopay nga sumat han Dios kondi pati an amon mga kalag, kay hinigugma gud namon kamo.”—1 Tes. 2:8.

 ⁸ Basi ipakita nga diri pirme igo an makaparig-on nga mga pulong, ginsidngan ni Pablo an mga tigurang ha Efeso: “Kinahanglan buligan niyo . . . an mga magluya, ngan hinumdoman pirme an ginsiring han Ginoo nga hi Jesus, ‘Mas makalilipay an paghatag kay ha pagkarawat.’” (Buh. 20:35) Andam hi Pablo diri la ha pagparig-on han iya kabugtoan kondi pati liwat ha “paghatag han ngatanan ngan pagsakripisyo han [iya] kalugaringon” para ha ira. (2 Cor. 12:15) Ha pariho nga paagi, diri la sadang parig-unon ngan liawon han mga tigurang an ira kabugtoan pinaagi ha pulong kondi pinaagi liwat ha pagpakita hin sinsero ngan personal nga interes ha ira.—1 Cor. 14:3.

9. Paonan-o an mga tigurang makakaghatag hin sagdon ha makaparig-on nga paagi?

⁹ An pagparig-on ha kabugtoan bangin mag-upod hin paghatag hin sagdon, ngan hini nga kahimtang, sadang liwat sundon han mga tigurang an ehemplo ha Biblia may kalabotan ha paghatag hin sagdon ha makaparig-on nga paagi. An usa nga maopay gud nga ehemplo hini amo an ginbuhat ni Jesus katapos han iya kamatayon ngan pagkabanhaw. Naghatag hiya hin mapwersa nga sagdon ha espisipiko nga mga kongregasyon ha Asia Minor, pero tigamni kon paonan-o niya ito ginbuhat. Antes niya hira sagdonan, naghatag hiya hin sinsero nga kumendasyon ha mga kongregasyon ha Efeso, Pergamo, ngan Tiatira. (Pah. 2:1-5, 12, 13, 18, 19) Iya ginsidngan an kongregasyon ha Laodicea: “An ngatanan nga akon hinigugma ginsasaway ko ngan gindidisiplina. Salit magin aktibo ka ngan magbasol.” (Pah. 3:19) Maopay gud nga subaron han mga tigurang an ehemplo han Kristo kon naghahatag hin sagdon.

10. Paonan-o kita ngatanan makakaparig-on ha usa kag usa?

¹⁰ An pagparig-on ha iba diri la responsabilidad han mga tigurang. Ginsagda ni Pablo an ngatanan nga Kristiano nga magyakan hin “maopay . . . para ha pagparig-on uyon ha panginahanglan, basi makahatag ito hin kapulsanan” ha iba. (Efe. 4:29) An kada tagsa ha aton sadang magin mahunahunaon ha “panginahanglan” han iba. Ginsagdonan ni Pablo an Hebreo nga mga Kristiano: “Parig-ona an mga kamot nga naluyloy ngan an mga tuhod nga  maluya, ngan padayon nga tadonga an mga dalan para ha imo mga tiil, basi kon ano an napiang diri malisa ha kaluluthan, lugod matambal ito.” (Heb. 12:12, 13) Kita ngatanan, pati na an kabataan, mahimo makaparig-on ha iba pinaagi han aton mga ginyayakan.

11. Ano an nakabulig kan Marthe han nagkaada hiya depresyon?

¹¹ Hi Marthe, * usa nga sister nga nagkaada depresyon, nagsurat: “Usa ka adlaw han nag-aampo ako para hin pagparig-on, may nakaistorya ako nga edaran nga sister nga nagpakita ha akon hin gugma ngan pagpaid, nga ginkikinahanglan ko gud hito nga panahon. Iya liwat iginsumat ha akon an iya eksperyensya may kalabotan ha problema nga pariho han akon gin-aatubang, ngan inabat ko nga diri ako nag-uusahan.” Posible nga waray mahunahuna han edaran nga sister an maopay nga epekto kan Marthe han iya mga ginyakan.

12, 13. Paonan-o naton maiaaplikar an sagdon ha Filipos 2:1-4?

¹² Iginhatag ni Pablo ini nga sagdon ha ngatanan nga membro han kongregasyon ha Filipos: “Kon may maihahatag kamo nga bisan ano nga pagparig-on pinaagi han Kristo, bisan ano nga mahigugmaon nga pagliaw, pagtagad ha usa kag usa, pagpalangga ngan pagpaid, lipaya ako niyo hin bug-os pinaagi han iyo pagpakita nga nagkakauruyon kamo ha panhunahuna ngan naghihigugmaay kamo, bug-os nga nagkakaurosa ngan nagkakauruyon an hunahuna. Ayaw pagbuhat hin bisan ano tungod ha pagin makiawayon o tungod ha pagpaimportante ha kalugaringon, lugod mapainubsanon nga tagda nga mas labaw ha iyo an iba. Magin matinagaron kamo, diri la para ha iyo kalugaringon nga kaopayan, kondi para liwat ha kaopayan han iba.”—Fil. 2:1-4.

¹³ Oo, kita ngatanan sadang mangalimbasog nga unahon an kaopayan han iba pinaagi ha paghatag hin “mahigugmaon nga pagliaw,” “pagtagad ha usa kag usa,” ngan “pagpalangga ngan pagpaid” basi maparig-on an aton kabugtoan.

14. Ano an usa nga mahimo magin surok han pagparig-on?

¹⁴ Kon nahibabaroan naton nga nagpapabilin nga matinumanon an aton mga ginbuligan hadto, napaparig-on gud kita pariho han inabat ni apostol Juan, nga nagsurat: “Waray na ako mas maopay nga hinungdan ha pagpasalamat kay ha mabatian ko nga an akon mga anak padayon nga naglalakat uyon ha kamatuoran.” (3 Juan 4) Damu nga payunir an makakagsumat nga napaparig-on gud hira kon nahibabaroan nira nga an ira ginbuligan hadto nga mahibaro han kamatuoran nagpapabilin nga matinumanon ngan bangin nag-aalagad pa ngani sugad nga payunir. Bisan an pagpahinumdom la ha usa nga nanluluya nga payunir mahitungod han iya makalilipay nga mga eksperyensya hadto, mahimo gud makaparig-on ha iya.

15. Ano an usa nga paagi nga mahimo naton maparig-on adton matinumanon nga nag-aalagad?

¹⁵ Damu nga paramangno han sirkito an nagsiring nga napaparig-on gud hira ngan an ira asawa kon nakakakarawat hira hin halipot nga surat ha pagpasalamat katapos han ira pagbisita ha usa nga kongregasyon. Ito liwat an mahimo abaton han mga tigurang, misyonero, payunir, ngan Bethelite kon nakakakarawat hira hin apresasyon para ha ira matinumanon nga pag-alagad.

16. Ano nga simple nga mga butang an mahimo makaparig-on ha usa?

¹⁶ Sayop an paghunahuna nga diri kita makakaparig-on ha iba kay diri kita mahilig mag-istorya han aton inaabat o ginhuhunahuna. Ha pagkamatuod, diri makuri an pagparig-on ha iba—bisan an makisangkayon nga hiyom sugad nga pangumusta ha usa bangin makaparig-on na ha iya. Kon diri hiya humiyom ha imo, mahimo ito magpasabot nga may problema hiya, ngan bisan an pagpamati la ha iya bangin makaliaw na ha iya.—San. 1:19.

17. Ano an nakabulig ha usa nga batan-on nga inabat hin duro nga kasubo?

 ¹⁷ Hi Henri, nga usa nga batan-on, nasubo gud han binaya ha kamatuoran an iya duok nga mga kapamilya, pati na an iya tatay, nga usa nga gintatahod nga tigurang hadto. Ginparig-on hiya han usa nga paramangno han sirkito nga nag-imbitar ha iya nga magkape ngan nag-aghat ha iya nga isumat an iya inaabat. Nasabtan ni Henri nga mabubuligan la niya an iya pamilya nga bumalik ha kamatuoran kon magpapabilin hiya nga matinumanon. Naparig-on gud hiya ha pagbasa han Salmos 46; Sepania 3:17; ngan Marcos 10:29, 30.

18. (a) Ano an ginsiring ni Hadi Solomon mahitungod ha pagparig-on? (b) Ano an igin-aghat ha aton ni Pablo?

¹⁸ An eksperyensya nira Marthe ngan Henri nagpapakita nga mahimo naton maparig-on an kabugtoan nga nagkikinahanglan hin pagliaw. Hi Hadi Solomon nagsurat: “An polong ha panahon nga iginkikinahanglan, pagkamaopay hini! Nakakalipay . . . an maghiyomhiyom nga mga bayhon, ngan nakakaliaw . . . an maupay nga sumat.” (Prob. 15:23, 30; Maupay nga Sumat) Dugang pa, mahimo naton maparig-on an usa nga nanluluya kon babasahan naton hiya hin artikulo ha An Barantayan o ha aton website. Igintutdo liwat ni Pablo nga an pagkanta hin mga kanta han Ginhadian kaupod an iba mahimo magin surok hin pagparig-on. Hiya nagsurat: “Padayon nga magtinutdoay ngan magparig-onay kamo pinaagi hin mga salmo, pagdayaw ha Dios, pagkanta hin espirituwal nga mga kanta upod an pagpasalamat, ngan kinasingkasing nga magkanta kamo kan Jehova.”—Col. 3:16; Buh. 16:25.

19. Kay ano nga an pagparig-onay ha usa kag usa magigin mas importante pa gud ha tiarabot nga mga adlaw, ngan ano an sadang naton buhaton?

¹⁹ An pagparig-onay ha usa kag usa magigin mas importante pa gud samtang nakikita naton nga “nagtitikahirani na” an adlaw ni Jehova. (Heb. 10:25) Sugad han ginsiring ni Pablo ha iya mga igkasi-Kristiano ha iya panahon, “padayon nga magdinasigay ngan magparig-onay kamo sugad han ginbubuhat na niyo.”—1 Tes. 5:11.