KHITINAKAMPITÏ escuelar mantkta ukanakampiw escuel tukuyarakta. Markajanjja niya taqeniw uñtʼasipjjayäta.

Liberty sat marka jakʼanjja, walja granjanakaw utjiri, ukanjja choclonakwa wal yapuchapjjeri. Nayajj naskta ukhajja, tatajajj granjani mä jaqetakiw trabajiri. Qʼajjo waynitüskayät ukhajj tractor apnaqañwa yateqayäta, yapu lurañsa yateqarakiyätwa.

Naskayäta ukhajja, awkijajj 56 maranëjjänwa, mamitajasti 35 maraniraki, awkijarojj janiw waynaskän ukhatpach uñtʼawaykti. Ukampis jupajj kʼumara, chʼamani, trabajiñsa wal muniri ukhamänwa, wawanakaparus ukhamäñatakiw yatichawayapjjetu. Janis walja qollqe gankchïnjja, utanipjjayätwa, isinaksa, manqʼañsa janiw faltayapkitänti, nanakampïñatakis tiemponipuniriwa. 93 maraniw jiwjjäna, mamitajasti 86 maraniraki. Jupanakajj janiw Jehová Diosar serviwayapkiti. Mä jilajakiw 1972 maratpach jilïr irpirita jichhakam serviski.

Mamitajajj iglesiar sarapuniriwa, nanakarus sapa domingow bautista iglesiar irpapjjerïtu. 12 maranïskayäta ukhajj Trinidad yatichäwitwa  istʼta, ukatwa mä kutejj mamitajar akham jisktʼta: “¿Kunjamatsa Jesusajj Yoqäsajj Awkirakïspa?” sasa. Mamitajasti, “wawa, janiw yatiskiti, janirakiw yatiñas waktʼkistuti” sasaw sitäna. Nayas janiw amuykayätti. Ukhamäkchïnsa, mä jiskʼa jawiranwa 14 maranirojj bautisasta. Ukanjja kimsa kutiw Awkina, Yoqana, espíritu santon sutipjjaru umar chhaqtayapjjetäna.

Colegionkaskayäta ukhajja, boxeañ toqet wali yatjjatat amigoniyätwa, jupajj boxeañ yateqañajatakiw wal chʼamañchitäna, ukatwa yateqañ qalltayäta, Golden Gloves sat mä equiporus mantarakiyätwa. Boxeañatakejj janiw khusäkayätti, ukatwa mä qhawqha kuti nuwasisajj jaytjjayäta. Qhepatjja, Estados Unidos ejercitow cuartelar apitäna, ukatsti Alemaniaruw apayapjjarakitäna. Ukanjja, suma pʼeqtʼirïtaj amuyasajj militar escuelaruw jilïrinakajj apayapjjetäna. Jupanakajj ejerciton trabajiñajwa munapjjäna, ukampis janiw nayajj munkayätti, ukatwa pä mara phoqasajj cuartelat 1956 maran mistunjjta. Mä qhawqha tiempotjja, yaqha ejercitoruw mantarakiyäta.

Diosan arunakap janïr yatkasajja, cheqpach mä chachajj kunjamäñapasa uk janiw sum amuykayätti. Peliculanakata, jaqenakatwa uk yateqayäta, Bibliat parlirinakajj janis cheqpach chachäpkaspa ukham amuyayäta. Ukampis kuntï qhepat yateqkayäta ukaw jan ukham amuyjjañatak yanaptʼitäna. Mä urojja, jila alani autojat saraskayäta ukhaw pä tawaqonakajj arunttʼapjjetu. Jupanakajj jilïr kullakajan esposopan sullka kullakapäpjjänwa, Jehová Diosan Testigopäpjjarakïnwa. Uka nayrajj Yatiyañataki revistampi ¡Despertad! revistampwa churapjjetäna, ukampis Yatiyañataki revista amuyañajj chʼamjamänwa. Uka urojja, Taman Bibliat Yatjjatañataki tantachäwiruw invitapjjetu, ukajj utapanwa apasïna. ‘Amuytʼasïwa’ sasaw jupanakar sista. ‘¿Cheqapuni?’ sasaw jupanakajj sapjjetu. ‘Jïsa cheqapuni’ sasaw sista.

‘Amuytʼasïwa’ satajat walpun amtasiyäta, ukampis aruj phoqañajänwa, ukatwa uka arumajj tantachäwir sarta. Wawanakajj Bibliat wal yatipjjatap uñjasajja, wal muspärta. Nayajj sapa domingos mamitajampejj iglesiar sarkchiyätjja, janiw Bibliat ukham yatkayätti, ukatwa Bibliat yatjjatañ qalltta. Taqe chʼamani Diosajj Jehová sutinïtap jankʼakiw yateqta. Testigonakajj khitinakäpjjesa sasaw pasir maranakajj mamitajar jisktʼayäta. Jupajja, ‘Jehová sat mä chuymankipstat chacharuw adorapjje’ sasaw sitäna. Ukampis Bibliat yateqasajja, nayranakajajj jistʼartkaspas ukhamänwa.

Kuntï yateqkayäta ukajj cheqätap amuyasajja, marzo, 1957 maranwa bautisasta, nayrïr kuti tantachäwir sarkta ukhatjja, llätunka phajjsinakakiw pasaskäna. Jichhajj janiw jakañ vidat nayrjam amuyjjtti, kuntï Bibliajj cheqpach chachäñat yatichki uk yateqasajj wal yuspärta. Jesusajj jan juchani, taqe chachanakat sipans jukʼamp munañani, chʼamani ukhamänwa. Ukampis janiw nuwasiñanakar mitisirïkänti, jan ukasti profecianakan qellqatäkäna ukarjamaw jan walinak luratas ‘jan arsuskäntiʼ (Is. 53:2, 7). Jesusan cheqpach arkirinakapajj “taqenirus munasiñampi uñjañapawa” ukwa yateqayäta (2 Tim. 2:24).

 Precursorat serviñjja 1958 maranwa qalltta, ukampis mä qhawqha tiempot janiw precursoräjjayätti. Gloriampi casarasiñwa amtayäta, jupajj Taman Bibliat Yatjjatañataki tantachäwir invittʼapkitäna uka tawaqonakat maynïriwa. Jupamp casarasitajat janipuniw arrepentiskti. Gloriajj wali suma tawaqönwa, jichhas nayatak ukhamäskakiwa. Jupajj mä diamante qaläkaspas ukhamawa, wali kusisitätwa. Jichhajj jupaw mä jukʼa cuenttʼapjjarakïtam.

“Nayajj 16 jilat kullakanakanïtwa. Mamitajajj jan jitheqtasaw Jehová Diosar serviwayi. 14 maranïskayäta ukhaw jupajj jiwjje. Papitujajj ukharakiw Bibliat yatjjatañ qalltäna, kullakajasti colegio niya tukuyañampëjjänwa. Mamitajan jiwatapatjja, papitujajj colegiojankir directorampiw parläna, ukhamat jilïr kullakajampejj colegior sarañ turnasipjjañajataki. Kullakajaw mä urojj sarañapäna, qhepürusti nayaraki. Sullka jilat kullakanakajar uñjañatakiw ukham lurapjjayäta, jaypʼus manqʼjja listokiw papitujan puriniñapatakejj suyayapjjañajäna. Directorajj papitujar iyawsänwa, ukatwa sullkanakajan colegio tukuyapjjañapkam ukham lurapjjayäta. Pä familianakaw Bibliat yatichapjjerïtu, ukhamatwa nanakat tunka mayanejj Jehová Diosan Testigopar tukupjjta. Ajjsarirïkstsa, Diosan arunakap yatiyañajj wali kusiskañänwa, ukampis jan ajjsarañatakejj esposojaw wal yanaptʼawayitu”.

Gloriampejj febrero, 1959 maranwa casarasipjjta, kusisitaw precursorat servipjjayäta. Nueva York markankir Betelan serviñ wal munapjjayäta, ukatwa uka pachpa marajj julio phajjsin mä solicitud phoqantapjjta. Simon Kraker jilataw nanakamp parläna. “Chacha warminakarojj janïraw katoqaskiti” sasaw jupajj sapjjetäna. Ukampis nanakajj Betelar sarañ munasipkakiyätwa, walja maranakaw ukatakejj suyawayapjjta.

Kawkjantï yanaptʼajj jukʼamp munaski ukar sarañatakiw Sucursalar qellqapjjta. Jupanakajj Pine Bluff (Arkansas) markaruw sarapjjasma sasaw sapjjetäna. Ukanjja, pä congregacionaw utjäna, mayninjja chʼiyar jañchininakaw tantachasipjjäna, mayninsti janqʼo jañchininakaraki. Nanakajj chʼiyar jañchininakajj tantachasipkäna ukaruw sarapjjayäta, ukan 14 yatiyirinakakiw utjäna.

Inas jumanakajj ‘¿kunatsa chʼiyar jañchininakampi janqʼo jañchininakampejj jan juntuki tantachasipkäna?’ sasin jisktʼasipjjsta. Uka tiemponjja, juntuki tantachasipjjañapajj leyinakarjam jarkʼatänwa, ukham lurirejj nuwjataw uñjasispäna. Walja lugaranakanjja, Tantachasiñ Utanakwa tʼunjapjjaspa sasaw jilat kullakanakajj ajjsarayasipjjäna. Cheqas uk pasipanwa ajjsarayasipjjäna. Policianakajja, chʼiyar jañchini jilat kullakanakaru janqʼo jañchini jaqenakar predikaskir uñjasajj katuntapjjaspänwa, jan ukajj nuwjapjjaspänwa. Ukatwa predikaskakiñatakejj uka leyinakar istʼapjjayäta, qhepat inach cambiani sapjjayätwa.

Diosan arunakap yatiyañajj chʼamakïnwa. Chʼiyar jañchini jaqenakajj jakapki ukan yatiykasajja, awisajj jan amuyasisaw janqʼo jañchini jaqenakan utap leqtʼapjjerïta. Ukham pasapjjetäna ukhajj Bibliat mä jukʼa parltʼapjjäti, jan ukajj pampachtʼita sasach sarjjapjjä uk jankʼakiw amtapjjañajäna. Uka tiempon yatiyañajj ukhamänwa.

Qollqe ganasiñatakejj wal trabajipjjañajänwa. Jila parte trabajonjja, kimsa dolarakwa jornal trabajitat pagapjjerïtu. Gloriajj mä qhawqha utanakanwa trabajiri, mä utanjja, chika urukam tukuyañatakejj yanaptʼasmaw sasaw utanejj sirïtu. Janïr utar kuttʼkasajj ukanwa manqʼasipjjerïta. Mä familiatakejja, Gloriajj sapa semanaw isinakap planchiri, nayasti jardinanwa trabajirïta, ventananaksa qʼomacharakirïtwa, yaqha ukhamanakwa lurarakirïta. Janqʼo jañchini mä familiatakejja, uta ventananakap jornalaw qʼomachapjjerïta, Gloriajj manqha toqeta nayajj anqa toqetaraki, jornal trabajipjjatajat manqʼjja churapjjerïtuwa. Gloriajj uta manqhanwa manqʼeri, ukampis janiw uka familiamp chik manqʼerïkiti, nayasti anqanakwa manqʼasirïta, ukajj nayatak walikïnwa, manqʼajj sumänwa. Uka familiajj jila parte jaqenakjamas amuyapkchïnjja, suma jaqëpjjänwa. Mä kutejja, gasolina autor warantayiriw sarapjjta, warantjjepansti  ukan trabajiriruw ‘¿esposajajj bañor mantaspati?’ sasin jisktʼta. Mayj uñkatasinjja, “jistʼantatawa” sasaw colerat sitäna.

Maysa toqetjja, jilat kullakanakampïñasa yatiyañas kusiskañänwa. Pine Bluff markar purisajj tama pʼeqtʼiri mä jilatampiw jakasipjjayäta. Esposapajj janiw Testigökänti, ukatwa Gloriajj jupar Bibliat yatichañ qalltäna. Nayasti, phuchapampiru esposopampiruw yaticharakiyäta. Qhepatjja, jilatan esposapasa phuchapas bautisasjjapjjänwa.

Janqʼo jañchininakajj tantachasipkäna uka congregacionanjja, walja amigonakanïpjjayätwa. Jupanakajj manqtʼasiñatakiw invittʼapjjerïtu, ukampis jaqenakampi jan uñjayasiñatakejj arumanakakiw utapar sarapjjerïta. Uka tiemponjja, yaqhachasiña, nuwasiña chʼamañchir Ku Klux Klan sat organizacionaw jaqenakjjar munañanïna. Mä arumajja, uka organizacionankir jaqenakajj isisipkäna ukham isthapitwa mä chacharojj uta punkupan wali wal tuktʼata qonuskir uñjta. Jaqenakajj ukhamäpkchïnsa, jilat kullakanakajj jupanakkam munasisipkakïnwa. Mä kutejja, mä jachʼa tantachäwir sarañatakiw qollqe munapjjayäta, ukatwa mä jilatajj auto alasipjjetäna. Mä phajjsi qhepatjja, yatiyir sarasa Bibliat yateqerinakar yatichasaw utar wali lupjata purisipkayäta. Ukhamaruw aljapkayäta uka auto uta nayraqatan saytʼat uñjapjjta, nayraqat ventänapanjja mä notaw akham sasin qellqatäna: “Autom kuttʼayjjapjjäma, mä regalowa. Jilatama” sasa.

Yaqha urojj ukhamarakiw yaqha suma regalo katoqta. 1962 maranjja, Jilïr Irpirinakataki ukat Taman Yanapirinakapatak Escuela sasin uñtʼatäki ukar sarañatakiw South Lansing (Nueva York) cheqar invitapjjetäna. Ukarojj tamanak tumptʼirinakampi, tamanak tumptʼirinakan uñjirinakapampi, tamanak sarayirinakampiw sarapjjäna, ukajj mä phajjsiw apasïna. Ukapachajj janiw trabajonïkayätti qollqes jukʼakiw utjapjjetäna. Ukapacharakiw Pine Bluff markankir telefononak apnaqer mä empresajj contratañ munitäna. Uka empresajj janis chʼiyar jañchini jaqenakar contratapjjerïkchïnjja, nayar contratapjjetänwa. Nueva York markar sarañatakejj janiw qollqenïkayätti, ukatwa uka escuelar sarañat sipansa uka empresan trabajiñ amtayäta. Escuelar jan sarañatak carta qellqañampïskayät ukhajj kunatï paskäna uk janipuniw armkäti.

Mä alwajja, congregacionajankir mä kullakaw punku leqtʼanïna, ukat qollqen mä sobre churitäna. Uka kullakan esposopajj janiw Testigökänti. Kullakampi yaqhep wawanakapampejja, algodón yapuruw qoranak apsuri wali alwat walja kuti sarapjjatayna, ukhamat qollqe ganañataki. Ukampiw jilatajj Nueva York markar sarani sasaw amuyapjjatayna. Kullakajj akham sitänwa: “Escuelar saram, sum yateqtʼanim, ukat nanakarus yatichtʼapjjetätawa” sasa. Uka qhepatjja, empresarojj “phesqa semananak qhepat trabajiñ qalltirista  ukajj ¿walïspati?” sasaw jisktʼayäta. “Janiwa” sasaw sapjjetäna. Ukhamäkchïnsa, kusisitaw escuelar sarta. Ukham luratajat janiw arrepentiskti.

Jichhajj Gloria esposajaw Pine Bluff markan predikañajj kunjamakïnsa uk cuenttʼarakistani. “Uka cheqan yatiyañajj wali kusiskañänwa, waljaniruw Bibliat yatichayäta. Alwanakajj utat uta yatiyiriw sarapjjerïta. Jaypʼusti, Bibliat yateqerinakaru yatichiriraki. Awisajj 11 horas arumkamaw yatichapjjerïta. ¡Ukham yatiyañajj kusiskañänwa! Jichhakamas janiw ukat jutkiriskayätti, ni tamanak tumptʼiritsa esposojampejj sarapkiriskayätti. Ukampis Jehová Diosajj nanakatak yaqha amtanïnwa”. ¡Cheqas ukhamänwa!

Pine Bluff markan precursorat servisipkayäta ukhaw precursor especialatakejj mä solicitud phoqantapjjta. Tamanak tumptʼirinak uñjiri jilatajja, Texas markan precursor especialat servipjjañajwa munäna, ukatwa ukham serviñ wal suyapjjayäta. Ukampis janipuniw uka toqet kuna cartsa katoqapkayätti, ukatwa suyasipkakiyäta. Enero 1965 maranwa mä carta katoqapjjta. Tamanak tumptʼirit sarañatakiw invitapjjetäna. Ukharakiw Leon Weaver jilatarojj tamanak tumptʼirit uttʼayapjjäna, jichhasti jupajj Estados Unidos markankir Sucursal sarayirinakat maynïriwa.

Tamanak tumptʼirit serviñ wal ajjsarayäta. Niya mä mara nayrajj tamanak tumptʼirinak uñjiri James Thompson jilataw kunansa jukʼamp chʼamachasiñaja uk uñjäna. Ukatwa kunanakansa chʼamachasiskakiñajäna, kunjamäñajasa ukanakat ewjjtʼitäna. Qhepatakwa uka ewjjtʼanakapajj kunja wakiskirïnsa uk amuyta. Tamanak tumptʼirëjjayäta uka qhepatjja, Thompson jilataw tamanak tumptʼirinak uñjirjamajj visittʼapjjetäna. Uka jilatat waljanak yateqawayta.

Uka tiemponjja, tamanak tumptʼirinakarojj mä jukʼa tiempokiw yatichasirïna. Nayajj mä semanakiw kunjamsa tamanak tumptʼir jilatajj congregacionar visittʼäna uk uñjayäta. Qhepa semanasti juparakiw nayar uñjitäna. Jilatajj kunansa chʼamachasiskakiñaja ukanakwa mä qhawqha ewjjtʼitäna. Ukampis qhepatjja, nayakiw esposajampejj congregacionanakar visitjjayäta. Mä kutejj akham sasaw esposajar sista: “¿Jilatajj sarjjañapapuniti?” sasa. Ukampis tiempompejj akwa amuyta: jiwasatï yanaptʼayasiñäni ukhajja, yanaptʼir jilatanakajj utjapuniniwa. Kunjamsa James Brown tamanak tumptʼir jilatasa, Betelan servir Fred Rusk jilatas yanaptʼapjjetäna uk janipuniw armkti.

Uka tiemponakanjja, yaqha kasta jañchininakar uñisiñajj jukʼampiw jiljjattäna. Mä urojja, Tennessee markanwa mä congregacionar visittʼasipkäyäta, ukatsti Ku Klux Klan ukankirinakajj  marcha (huelga) lurasipkäna. Yaqha urusti, mä grupo jilat kullakanakampi predikkasajja, manqʼa aljañ utaruw mä kun alaqtʼasis samartʼañatak sarapjjta. Ukat bañor sarta ukhajj mä jaqew colerata arktanitäna, uka jaqejj yaqha kasta jañchininakar yaqhachapki uka tatuajenakanïnwa. Ukampis janqʼo jañchin mä jilataw uka qhepat jutarakïna, jupajj uka jaqet sipan jukʼamp jachʼänwa, wali chʼamanirakïnwa. “Jilata Herd ¿walikïsktati?” sasaw jisktʼitäna. Nayar arktankitäna uka jaqejj ratukiw sarawayjjäna, janiw bañorus mantjjänti. Ukham uñisisiñanakajj janiw yaqha casta jañchinïtas layku utjkiti, jan ukasti Adanan juchachasitap laykuw ukanakajj utji, ukwa tiempompejj yateqawayta. Mä cristiano jilatajj cheqpachapuniw jilat masiparojj munasi, janiw yaqha casta jañchinïtap laykojj yaqhachkiti, jupa laykojj jakañapsa wakischi ukhajj aptʼasispawa, uksa yateqaraktwa.

Tamanak tumptʼirit 12 maranakaw serviwayta, 21 maranakarakiw tamanak tumptʼirinakan uñjiripjamajj servirakiyäta. Diosan markapan ukham serviñajj wali kusiskañapunïnwa, walja bendicionanakwa katoqta, jan armkay experiencianakas utjarakituwa. Agosto 1997 maranjja, Estados Unidos markankir Betelan trabajiñatakiw invittʼapjjetu, uk walpun munapjjayäta. Betelan trabajiñatak solicitud papel nayrïr kuti phoqantapkta ukhatjja, 38 maranakaw ukhakamajj pasjjäna. Betelan serviñatak invittʼapkitu ukhat mä phajjsi pasatatwa Betelan trabajiñ qalltapjjta. Mä qhawqha tiempo yanaptʼapjjañajatakiw invittʼapjjpachïtu sasaw amuyayäta, ukampis janiw ukhamäkänti.

Qalltanjja, Departamento de Servicio ukanwa yanaptʼta. Ukanjja, kuntï uka markankir jilïr irpirinakasa tamanak tumptʼirinakas chʼama jisktʼanaka, jan ukajj yaqha ukhamanak jisktʼapki ukanakaruw qhanañchasi. Ukan trabajisajj waljanak yateqawayta. Kunjamsa jilatanakajj yanaptʼapjjetäna, wali pacienciampi yatichapjjetäna ukanakat walpun yuspärta. Jichhatï uka departamenton mayampi trabajiñatak invittʼapjjetaspa ukhajja, yanaptʼatäñ munaskakiristwa.

Betelan trabajiñajj Gloria esposajarusa nayarus wal gustapjjetu. Nanakajj wali alwapuniw sartapjjerïta, ukham lurañajj Betelan trabajiñatakejj wali wakiskiriwa. Niya mä mara qhepatwa, Comité de Servicio del Cuerpo Gobernante ukan yanaptʼañ qalltta, ukat 1999 maranarakwa Oraqpachan Jilïr Irpiri jilatanakat maynïrïñatak uttʼayapjjetu. Ukan waljanakwa yateqta, ukanakat maynïrejj akawa: cristiano congregacionarojj janiw khiti jaqes pʼeqtʼkiti jan ukasti Jesucristow pʼeqtʼi, ukajj qhana amuykañawa.

Kunjamsa nayrajj jakasiyäta ukanak awisajj amtta ukhajja, Amós profetjamaw amuyasta. Jupajja, uywa awatiri, pobrenakan manqʼapjam uñtʼatäkäna uka monte higonak apthapis jakasirïnwa. Juparojj Jehová Diosaw profetäñapataki uttʼayäna, walja bendicionanakwa churarakïna (Amós 7:14, 15). Jehová Diosajj ukhamarakiw nayat amtasitu. Liberty sat jiskʼa markankir granjan trabajiri awk taykan uywatäkstsa, jan jaktʼkay walja bendicionanakwa katoqta (Prov. 10:22). Pobrëkchiyätsa Jehová Diosaw qamir tukuyitu, janipuniw ukhamäñap suykayätti.