SUN DAN le meha naubei leskuela, úati meha asansiruni lidan nibagari. Irahüñü ha meha úmabaña nagumesera leskuela hagía meha nánigubaña paaná darí weresibihan. Sun meha gürigia subudiguatiña houngua lidan aüdü le ñein lubéi neredera.

Geyegu liña meha Liberty lau bunaguaü ani awasitima ábunawagubei ñein. Dan le nágurahounbei, lidan meha aban lídangiñe fulasu le lawadigimarida núguchi. Ligíati, lúmagiñe nibureingidina furendeitina abugaha ñondili luma adüga amu burí katei lidan luáguti wadagimanu le.

Wéiyaali meha núguchi dan le nágurahounbei, 56 meha irumu lau, ánhounti núguchu, 35 meha irumu tau. Lau sun lira, héreti meha núguchi ani buiti meha látuadi, íbini bürüraü lan. Nadagimeinti meha saragu ani arufudahati houn sun lisaanigu lun benefa hamá. Íbini magañeirun lan meha saragu seinsu, gabantiwa meha, gadaüragun ani geigin. Súnwandan meha ñein lan wama lun letenirun woun. Dan le lóunwenbei, 93 meha irumu lau, ánhounti núguchu, 86 meha irumu tau tóunwenbei. Meseriwiduntiña meha lun Heowá, gama lumoun, leseriwiduña aban hádangiñe namulenu lau úaraguni lun Heowá keisi wéiyaali lidan afiñeni lúmagiñe irumu 1972.

Ganigitu meha núguchu ligilisi, ani sagü meha dimaasu woudin tidan ligilisi bautista. Dan meha le 12  lubéi irumu nau, aba naganbun layanuhóun luagu Trinidad, ábati nálügüdünu núguchu: “Ida liña san Irahü lan Hesusu ani Úguchili ligía?”. Haritaguanagili tariñagun nun: “Ábantia katei le ibidiñeti woun, niráü. Siñá wamuti gunfuranda”. Ani le linarün katei, úati meha gunfuranda nani. Íbini ítara, aba nabadiseirun dan le 14 lubéi irumu nau lidan aban duna le éibaagubei lidan aüdü le ñein lubéi weredera. Ǘrüwañein wéiyaasu habuluchagüdünina: aban luagu liri Úguchili, aban luagu liri Irahü ani le aban luagu liri sífiri sandu.

Dan meha le kolehiu nubéi, anihein meha aban numada le hínsiñeti meha lun laboksiha, aba labimehanina lun naboksiha, ábati nánharun. Aba nagumeserun afurendera aboksiha, lárigiñe aba nabürüdagun nungua tidan aban óundaruni lánina aboksihani gíritu Golden Gloves. Siñaguatina meha nungua lun lira, ligíati, lárigiñe nageindagun fiu wéiyaasu aba nígiruni. Dan lárigiñe, aba nebelurun hadoun milidaru merigana, lárigiñe aba nóunahoun Yámani. Ñein, aba hóunahanina nábutigu tidoun aban leskuela houn milidaru ladüga samina hamá meha buidu nan lun ábuti nan. Busentiña meha lun milidaru nan le aturiahati, gama lumoun, mama meha ligía nabusenrubei. Lidan irumu 1956, lárigiñe nagumuchuni bián irumu le meha lunbei neseriwidun ñein, aba neresibihan. Gama lumoun, murusun dan lárigiñe, aba nebelurun lidoun amu luwuyeri asudarahani.

Lumoun meha dan ligía, “wügürihadina” meha. Úarati meha ligaburi nasaminarun luma le áfuachubei tidan pelikula luma le hasaminarubei gürigia luagu ídatima luba lan lóuserun aban wügüri. Lidan nisaminan, mama meha wügüriña ha apurichihabaña. Gama lumoun, aba nagumeserun afurendeira fiu katei le asansirubalin nibagari. Aban weyu, dan le nídiña lan tidan tanarime nikarün to funaboun, aba habusuragun bián nibureintiña würiña nun. Subudi numutiña meha, lamulenu meha wügüri le amarieidubei tuma nitu. Ani gefentiña meha luagu Heowá nibureintiña hagía. Ígira hamaaru meha garüdia Awisahatu tuma ¡Despertad! nun lun naliihanu, lau sun samina nan meha hénrengu lan lun gunfurandawa lan ariñahani le tídanbei Garüdia Awisahatu. Guentoti, hagunbirahañadina meha lun nidin lidoun Taturiahóun Líburu lidan Damuriguaü, aban liraüraü adamuridaguni le adügǘbei hábiñe, ñein lubéi taturiahóua Bíbülia ani ru hagía óunabagülei. Aba nariñagun houn nasaminarubei lan. Ábati hálügüdünina hayéina: “Füramase bumuti?”. Aba nariñagun houn: “Aayé, füramase numuti”.

Aba nasakürihan luagu nadügüni füramase ligía, gama lumoun, sanditina meha mosu lan nagunfulirun lau. Ábati nidin guñoun ligía lidoun adamuridaguni. Irahüñütima aweiridagüdübarun nanigi ladüga subudi hamá meha saragu katei tídangiñe Bíbülia. Lau sun meha ñüdün nan sagü dimaasu ligilisirugu tuma núguchu, lóuguati meha nisubudin tuagu Bíbülia. Ánheinti guentó, busenhadina meha nafurendeirun, ábati nánharun lun naturiahanu Bíbülia. Aban lídangiñe furumiñeti katei le nafurendeirubei Heowá lan líribei Bungiu le Suntigabafu. Irumu burí lubaragiñe, dan le nálügüdübarun núguchu kátaña lan gefentiña luagu Heowá, aba tariñagun nun: “Ah, lun aban wéiyaali mutu gíriti Heowá háhuduragua ha”. Ánheinti guentó, léfegechuña meha nagu.

Fureseti nawanserun ladüga subudi numuti meha darinaali lan inarüni. Aba nabadiseirun lidan ǘrüwa-hati, irumu 1957, nefu hati lárigiñe nagumeserun abasiha lidoun adamuridaguni. Aba lasansirun ligaburi nisaminan. Dan le nasaminarun luagu igaburi le meha nuágubei, gúndaatina lau nafurendeiruni le tarufudahabei Bíbülia luagu ídatima liña lan ligaburi aban wügüri. Mafigounti meha Hesusu. Héretimati meha ani gabafutimati sügǘ luéi furumiñeguarügü wügüri. Lau sun lira, mageindaguti meha luma ni aban, lubaragiñe lira, kei aubei lariñawagúa lidan aban profesía “ígiraguagüdati lungua lau ǘnabuguni” (Isa. 53:2, 7). Furendeitina  lunti lan buidu lan lóuserun aban lani Hesusu disipulu le inarüniti hama sun gürigia (2 Tim. 2:24).

Gumesetina eseriwida kei prekursoru lidan irumu 1958. Gama lumoun, murusun dan lárigiñe, aba nígiruni. Ka uagu? Ladüga aba lan namarieidun. Aba namarieidun tuma Gloria, aban hádangiñe nibureintiña ha agunbirahabadina lidoun adamuridaguni. Masakürihantina luagu lamarieidun tuma Gloria ladüga ítara tiña meha nun kei aban dübü buíduburiti, ani ítaramemegiru. Gebegitumatu sügǘ lau déimani le buídutimabei ani gúndaatina lau namarieidun tuma. Guentó, tabahüdagua Gloria murusun hun luagu tibagari:

“Gasaanigutiña meha nagübürigu 17 irahüñü. Aban meha Gefentu úaraguatu núguchu ani aba tounwen dan le 14 lubéi irumu nau. Lárigiñe, ligía lagumeserun núguchi aturiahoun Bíbülia. Kei meha úaaru lubéi núguchu, aba ladügün núguchi aban daradu luma le arihibei tau waleskuela. Murusunrügaali meha dan lubá tagumuchunu níbugaña kolehiu, ábati lálügüdahan núguchi anhein gayara lubéi wabasihan leskuela aban weyu nuguya aban weyu tuguya. Weyu le midin tan aban wádangiñe leskuela, mosu meha terederun múnada óunigiraña wamulenu luma aranserei éigini lun weigin súngubei lidan aban danme lachülürün wáguchi lídangiñe wadagimanu. Ánhati le arihibei tau waleskuela lun daradu le ani ítara liña wadügüni darí teresibihan níbugaña. Rútiña bián iduheñu Gefentiña aturiahani woun tídangiñe Bíbülia ani 10 hádangiñe níbirigu aba hadügagun houngua gefentiñame luagu Heowá. Hínsiñeti meha apurichihani nun, íbini hénrengu lan meha nun lun nayanuhan hama amu. Íderagua laadina Sam lau lira lidan burí sun irumu le”.

Lidan bián-hati, irumu 1959 namarieida tuma Gloria. Gúndaatiwa meha lau weseriwidun úara kei prekursorugu. Kei meha busén wamá weseriwidun tidan Beteli to Brooklynboun, lidan sedü-hati, irumuméme ligía, aba wabuinchagüdünu gárada lun weseriwidun ñein. Aba ladügün íbiri Simon Kraker, aban íbiri le meha eseriwidubei Betelirugu, álügüdahani woun lárigiñe larihinu gárada to wabuinchagüdüboun. Gama lumoun, aba lariñagun woun mama lan heresibihaña maríeitiña lun heseriwidun ñein dan ligía. Lau sun busenmémegidiwa lan meha weseriwidun Betelirugu, sügüti saragu irumu lubaragiñe lagunfulirun le wayumahabei.

Aban wabürühan tun Beteli to Brooklynboun lun hóunahaniwa eseriwida ñein lubéi mégeiwa lan. Dan le hóunabuniwa, ábanrügüñein fulasu híchiga woun lun wanúadahan: Pine Bluff, Arkansas (Meriga). Lidan meha dan ligía, biánrügüñein meha damuriguaü lidan fulasu ligía, aban houn íbirigu harutiña ani le aban houn íbirigu wuritiña. Aba wounahóun lidoun damuriguaü le ñein habéi wuritiña ani katorusurügüñanu meha apurichihatiña ñein.

Háfuga hálügüdagun hungua ka lan meha uagu fánreinguañu lubéi hani Gefentiña damuriguaü ladüga harasan. Le linarün katei, mabafutiwa meha lun wadügün ni kata lidan dan ligía. Mígirunti meha lúrudu lun ñein hamá wuritiña haganagua harutiña. Ani gayaraati meha hadügün amu wuribani bun ánhabu maganbadi lun lúrudu ligía. Lidan saragu fulasu, hanufudetiña meha íbirigu lun hóundarun harutiña hama wuritiña lidan adamuridaguni luéi tagudún Luban Adamuridaguni. Ani susereti meha katei ligía. Ánhaña meha apurichiha Gefentiña wuritiña lidan fulasu le ñein lubéi heredera harutiña gayaraati meha hadaürǘn buleseiwa hagía. Ligíati, lun gayara lan wapurichihan, mosu meha gaganbadi wamá lun lúrudu hemenigiñu lasansiruba lan katei.

Gagibuguatiwa meha luma saragu lénrengunga lidan apurichihani. Anihein meha dan, dan le wapurichihan lidan aban fulasu le ñein lubéi heredera wuritiña aba meha wadarirun muna to haban harutiña, ibidiñeti meha woun haban lan. Mosu méhati wasaminarun furesegueina anhein wapurichihaba lubéi houn murusun o anhein buídutimati lubéi lun wamuriahan ferudun hama luma lun woudin ñéingiñe. Ítara liña meha katei lidan besafu fulasu.

Mosu meha wawadigimaridun saragu lun gayara lan wasigirun eseriwida kei prekursoru. Ǘrüwa meha fiádürü merigein wafayeirun luagu weyu. Nadagimeintu meha Gloria arumadaha tidan fiu muna, ani rútiña meha taburiña üma nun lun níderagunu tidan aban tídangiñe muna tuguya lun furesetima lan tagumuchun. Rútiña meha éigini lánina amidi woun lubaragiñe woudin. Sagü dimaasu, aba meha tabuchigüdagunu Gloria hálagu aban iduheñu harutiña, ánheinti au, aba meha nawadigimaridun lidan hani fuluri-agei, arumadaha numuti giñe tufunederan haban luma amu burí katei. Tidan haban aban iduheñu harutiña, arumadaha numuti meha tufunederan haban tuma Gloria, Gloria múnadagiñe ani au bóugudigiñe. Kei meha sun lan weyu wau arumadaha funedera, aba meha híchugun éigini lánina amidi woun. Múnada meha  teiga Gloria, fánreinguañu hawéi taburiña muna, ánheinti au, bóugudi meha neiga, ñein lubéi tareidúa karü. Mebeserenguntina meha lau lira. Semeeti meha éigini. Buiti meha hagaburi iduheñu hagía, gama lumoun, úarati meha hasaminan luma ligaburi hasaminan amu lidan luáguti ligaburi houserún ha lídangiñetiña amu rasa. Haritaguanagili le asuseredubei aban weyu dan le wararamunbei lidan fulasu le ñein lubéi lalugurahóua gasolina. Lárigiñe wabuinchagüdünu wakarün, aba nálügüdüni le nadagimeinbei ñein anhein gayara lubéi tayusurunu Gloria kumú. Aba larihin nuagu lau mínsiñehabuni, ábati lariñagun nun: “Darugu tiña!”.

Buiti meha wásügürüni hama wíbirigu ani hínsiñeti meha apurichihani woun! Dan le wachülürünbei uburugun Pine Bluff, aba woudin awinwanda luma íbiri le alidihabalin damuriguaü lidan dan ligía. Mama meha Gefentu lani weiriou, ábati tagumeserun Gloria íchiga aturiahani tun. Lídanmeme dan ligía, aba nagumeserun íchiga aturiahani tun hasaani luma lun tani weiriei. Aba teseriwidun úguchuru tuma isaani lun Heowá, ábati habadiseirun.

Gamadaguatiwa meha hama íbirigu hínsiñehabutiña lidan damuriguaü le ñein habéi harutiña. Agunbiraha hamutiwa meha lun woudin eiga hábiñe, gama lumoun, gayaraarügüti meha woudin dan le guñounhali lun marihíniwa wamá. Tínchahañanu meha óundaruni to gíriboun Ku Klux Klan gürigia lun anarimeni luma lun mínsiñegu hamá amu rasa hámawagua dan ligía. Haritaguanagili aban guñoun, ñun liña meha aban gürigia tigibugiñe luban tau ladaüragun harutu darugu lau ligibu, ítara kei hadügüni lílana Ku Klux Klan. Lau sun lira, madügünti katei burí le lun masigirun hamá íbirigu arufuda lubuidun igaburi hámagua. Luagu aban dan, irumurugu, mégeitiwa meha seinsu lun woudin lidoun adamurini, ábati lagañeihanu aban íbiri wakarün lun gayara lan woudin. Hati lárigiñe, dan le wachülürünbei wábiñe lárigiñe wapurichihan luma wíchugun aturiahani, siñaguadiwa meha woungua lau lanarime lárouga. Aba taweiridun wanigi lau warihinu wakarün tigibugiñe waban tau aban tiraüraü gárada luagu parabrisas, to ariñaguboun ítara: “Nagiribudagüdüñoun hugune hun. Aban idewesei. Híbiri”.

Arufudúayati lubuidun igaburi woun le aweiridagüdübarun nanigi. Lidan irumu 1962, aba nagunbirahóun tidoun Leskuela houn Wéiyaaña hama Ídehatiña South Lansing, Newayoru. Arufudahóuati meha luagu aban hati houn óunigirutiña sirkuitu, óunigirutiña distritu hama ha alidihabalin damuriguaü. Dan le nagunbirahounbei, mawadigimaridutina meha ani lougua ligía waseinsun. Ñǘdünhadina meha ariha luagu aban wadagimanu tidan aban kónpeni lani telefonu, uburugu Pine Bluff. Ánhaña meha ánhara nun, auba meha furumiñeti wuriti awadigimarida ñein. Ábati hariñagun nun busén hamá lun nawadigimaridun ñein. Kaba méhati nadüga? Maseinsuntina meha lun nidin Newayoru. Samina numuti buidu anhein nánharuba lubéi lun wadagimanu o anhein nídiba lubéi Leskuela. Le linarün katei, dan le aranseedina lan yebe lun nabürüdünu gárada lun nariñagun mídinbadina lan Leskuela, aba lasuseredun aban katei le mabulieidun nubéi.

Aban weyu binaafin, aba tachülürün aban íbiri to mama Gefenti tani weiriei adaünha luagu wabenari ani aba tíchugun aban gárada nun. Buin tiña gárada tuguya lau seinsu. Tuguya hama fiu hádangiñe tisaanigu ha ñǘbürigiña, saragiñeheitiña meha sagü binaafin lun hawadigimaridun áraabu agidahei híduru le mabuidunti luéi tídibu mouru. Hadügünbalin lira ladüga hasaminaruña  lan meha híchuguni seinsu le hagañeirubei nun lun nidin Newayoru. Aba tariñagun íbiri nun: “Beiba Leskuela ani furendeibéi sun le biyaraati. Danme bagiribudun, ábame barufudahan woun”. Lárigiñe, aba nálügüdünu kónpeni lani telefonu anhein gayara lubéi nagumeserun awadigimarida seingü dimaasu lárigiñe dan le hariñagubei nun. Aba hariñagun nun: “Uá!”. Lau sun lira, mebereseguntina meha ladüga desidírühadina luagu le lunbei nadügüni. Ma nugundan lau mánharun nan lun wadagimanu ligía!

Tabahüdaguali Gloria hun ida liña lan taritaguni dan le wásügürübei Pine Bluff: “Wéiriti meha línsiñe fulasu ligía nun lun wapurichihan. Rútina meha aturiahani tídangiñeti Bíbülia houn saragu gürigia. Apurichihatiwa meha binaafin tidan burí muna ani rábounweyu meha wíchiga aturiahani. Anihein meha dan darí ladáün 11 guñoun wagumucha. Buiti meha wásügürüni lidan apurichihani! Hínsiñeti hamuga nun lun nerederun eseriwida ñein lun sun dan. Ani le linarün katei, mabusenruntina meha nidin ñéingiñe lun nidin eseriwida lidan sirkuitu. Gama lumoun, amu meha le lasaminarubei Heowá ladügün wabá”. Chóuruti ítara liña lan!

Dan meha weseriwiduña lubéi kei prekursorugu Pine Bluff, aban wabuinchagüdün gárada lun weseriwidun kei prekursorugu espechalitiña. Busenti meha óunigiruti distritu le lídanbei wani distritu lun woudin ídeha lidan aban damuriguaü Texas kei prekursorugu espechalitiña, ligíati, hemenigitiwa meha luagu lanharúba lan woun lun woudin. Memeniha meha wanigi wadügüni asansiruni le! Ábati wagurabahan saragu, gama lumoun, maganbutiwa ni kata. Dan lárigiñe, aban weyu enerurugu, lidan irumu 1965, aba weresibirun aban gárada. Wóunahouña meha eseriwida lidan sirkuitu! Lidan meha giñe dan ligía, iridúati íbiri Leon Weaver keisi óunigiruti sirkuitu, guentó ligíaali íbiri le arihibei lau hawadigimari lílana Sétanu le arihibei tau Sukursáli Meriga.

Ruti meha anufudei nun dan le nasaminarun neseriwiduba lan keisi óunigiruti sirkuitu. Kéiburi aban irumu lubaragiñe, aba lakutihani íbiri James A. Thompson, Jr., le meha óunigiruti distritu, le burí gayara nubéi adüga buidu. Ariñagati nun lau ínsiñehabuni lunti lan nabuíduragüdün fiu katei, kéiburi nigaburi luma ligaburi narufudahan lun aban nan óunigiruti sirkuitu le buiti. Murusun dan lárigiñe nagumeserun eseriwida keisi óunigiruti sirkuitu, aba níchugun fe le lan lúgubu megei numuti lan adundehani le líchugubei íbiri le nun. Lárigiñe niridún kei óunigiruti sirkuitu, íbiri Thompson ligía furumiñeti óunigiruti distritu le abisidahabaliwa. Furendeitina saragu lúmagiñe íbiri úaraguati ligía.

Lidan dan ligía, marufudahóuati meha saragu houn óunigirutiña sirkuitu. Aba netenirun lun le ladügübei aban óunigiruti sirkuitu dan le labisidahabalin aban damuriguaü luagu aban dimaasu. Dimaasu lárigiñe, ligíaali etenira lun le nadügübei lidan amu damuriguaü. Ruti fiu adundehani nun ariñaga ligía nun ka lan gayaraabei nadügüni lun buídutima lan nigaburi luma ligaburi narufudahan. Lárigiñe, aba lidin, ábati  nerederun nábugua. Haritaguanagili nariñagun tun Gloria: “Mosu san lidin oura le?”. Dan lárigiñe, aba nafurendeirun aban katei súdiniti: súnwandan badariruba íbirigu ha lúnbaña híderagunibu ánhabu ígiraguagüda bungua lun hadügüni. Mabulieidun nubéi sun ídemuei le híchugubei fiu íbirigu nun ha meha barühaña saragu irumu lidan heseriwidun, kei burí íbiri James R. Brown, le meha eseriwidubei lidan lounigirún sirkuitu luma distritu, luma íbiri Fred Rusk, le meha eseriwidubei Betelirugu.

Wéiritimahali meha mínsiñehabuni le luágubei aban rasa luagu le líbiri. Aban weyu, amarücharatiña lílana Ku Klux Klan lidan aüdü le wabisidahabei Tennessee. Haritaguanagili giñe le asuseredubei aban weyu dan le wararamagunbei lidan wapurichihan hama íbirigu lun woudin eiga tidan aban éigagülei. Dan le nídinya lubéi tidoun kumú, aba níchugun fe anite lan aban gürigia nárigi nárigi, le wuribati larihín ani buin liña meha lura lau adibuhani le arufudubei iyereehabúni hawagu amu rasa. Ábati liabin aban íbiri wárigi, le wéiriti ani héretimati sügǘ nuéi luma luéi wügüri ligía. Aba lálügüdünina íbiri: “Buiti san léibugun sun katei íbiri Herd?”. Ábati láfuridun wügüri ligía furesegueina ñéingiñe, sin layusurunu kumú. Lau lásügürün dan, furendeihadina luagu mama lan likolorun gürigia adügübei lun ñein lan iyereehabúni hadan ámuñegueinarügü rasa, figóu, le wibihibei lúmagiñe Adán, ligía adügübei lun hóuserun gürigia ítara. Furendeihadina giñe íbirigu lan sun wagía meberesenga ka lan wakolorunbei ani líchugubei lan aban íbiri libagari buagu anhein mosu lubéi ladügüni.

Seriwitiwa luagu 33 irumu lidan lounigirún sirkuitu luma distritu, 21 lídangiñe lidan lounigirún distritu. Buiti wásügürüni lidan eseriwiduni ligía, ibihatiwa saragu abiniruni luma lubuidun burí sügǘ. Lau sun lira, anihagua meha amu katei lun lasuseredun. Lidan widü-hati, irumu 1997, aba lagunfulirun le meha wayumahabei luagu saragu dan. Darandi-widü irumu lárigiñe wabuinchagüdünu gárada luagu furumiñeti wéiyaasu lun woudin eseriwida Betelirugu Meriga ligía wamisurahóun! Hati lárigiñe, aba wagumeserun eseriwida ñein. Saminatina yebe busenrügü hamá íbirigu ha arihubaña lau wadagimanu tidan Beteli lun weseriwidun ñein luagu murusun dan, gama lumoun, mítaranti.

Dan le nachülürünbei Betelirugu, nadagimeintina lidan Departamentu lánina Eseriwiduni. Furendeitina saragu ñein. Óunabatiña lílana sétanu le álügüdahani le burí hénrenguti le hadügübei íbirigu wéiyaaña lidan afiñeni luma le hadügübei óunigirutiña sirkuitu ha lídangiñetiña sun ubóu. Wéiriti lebegi sun ídemuei le híchugubei íbirigu ha nun luma gurasu le harufudubei dan le harufudahabei nun. Lunya hamuga hóunahanina eseriwida lidan departamentu le aransegidina lun nasigirun afurendeira.

Wéiriti línsiñe wabagari tidan Beteli nun luma tun Gloria. Súnwandan saragia wamá ani huuti échuni le saragu lidan eseriwiduni le. Kéiburi irumu lárigiñe wachülürün Betelirugu, aba nagumeserun eseriwida kei ídehati lidan Sétanu lánina Eseriwiduni lani Sétanu le Arihibei lau Hawadigimari Gefentiña luagu Heowá lidan sun Ubóu. Lárigiñe, lidan irumu 1999, aba niridún keisi aban hádangiñe lílana Sétanu le. Furendeihadina saragu lidan eseriwiduni le, gama lumoun, katei súdinitimati le furendeinalibei Hesukrístu lan adundehabalin damuriguaü kristiánu, mama aban wügüri.

Dan le nasaminarun luagu nibagari, anihein dan sandiguatina nungua kei profeta Amosu. Aba larihin Heowá luagu aban hóuniri mudún ǘnabuguti, le meha abudahabei igu áraabuna, to meha harihiboun gürigia kei heigin gudemetiña. Anúadira lumuti Heowá Amosu lun leseriwidun kei profeta ani buíngüda lumuti libagari lau abiniruni (Amos. 7:14, 15). Ítarameme, aba larihinina Heowá, au le liráü aban ábunaguti gudemeti le lílana aüdü Liberty, aba labuinchagüdünina lau abiniruni darí lun siñá lan labahüdǘniwa súngubei (Ari. 10:22). Íbini lidan lan gudemei nágurahoua, rísigüda laali Heowá nibagari lau saragu abiniruni lidan neseriwidun lun, sügǘ luéi le nagurabubei.