NE YE kalan kɛ lakɔli min na, koow tun tɛ yɛlɛma yen. I tun be lakɔli daminɛ ni minw ye, i tun b’a laban n’olu lo ye. I be dugumɔgɔw fanba tɔgɔ lɔn ani olu fana b’i tɔgɔ lɔn.

Forodenninw tun be yen ka Liberty dugu lamini ani mɔgɔw fanba tun be kaba lo sɛnɛ. Tuma min na n’ wolola, n’ facɛ tun be baara kɛ sɛnɛkɛla dɔ ka foro la. N’ kanbele tuma na, n’ ye sɛnɛkɛmansi bolicogo degi ani ka forobaara wɛrɛw degi fana.

N’ wolola k’a sɔrɔ n’ facɛ tun tɛ kanbele ye tugun. A tun be ni saan 56 ye ani n’ bamuso tun be ni saan 35 ye. N’ facɛ tun man bon ani a tun ka kɛnɛ kosɔbɛ. Baara gwɛlɛ tun ka di a ye ani a y’a deenw bɛɛ degi o la. A ma kɛ nafolotigi ye ka ye. Nka, an tun be ni siyɔrɔ ni faniw ye ani an tun tɛ fɔn an daradumuni na. A tun be wagati kɛ n’an ye tuma caaman na. A sara a saan 93 ani n’ bamuso sara a saan 86. U si ma kɛ Jehova batobagaw ye. N’ dɔgɔcɛ kelen lo be Jehova batora kantigiya la. A ye diinan mɔgɔkɔrɔ ye kabi tuma min na o nɛɛma baara daminɛna saan 1972.

N’ bamuso ka diinanko tun ka bon. Dimansi bɛɛ, a tun be taga n’an ye Batisiw ka legilizi la. N’  saan 12, n’ ye Ala tigiya saba koo mɛn n’ siɲɛ fɔlɔ la. O ye n’ kabakoya! N’ ye n’ bamuso ɲininga ko: “Yezu be se ka kɛ Dencɛ ni Faa ye cogo di?” N’ bamuso ye min fɔ, n’ hakili b’o la. A ko: “N’ dencɛ, o ye gundo lo ye. An tɛ se k’o faamu.” Tiɲɛn na, a tun ka gwɛlɛ ne fɛ k’o faamu. O bɛɛ n’a ta, n’ batizera kɔji dɔ kɔnɔ an ka dugu la. U ye n’ tunu jii la siɲɛ saba: Faa, Deen ani hakili senu tɔgɔ la! O y’a sɔrɔ n’ tun be ni saan 14 ɲɔgɔn ye.

Lise la, n’ tericɛ dɔ tun ye bɔksɛri ŋana ye ani a ye n’ lasun ka bɔksi kɛ. N’ y’a daminɛ ka bɔksi degi ani n’ donna bɔksi jɛnkulu dɔ kɔnɔ min be weele ko: Golden Gloves. N’ tun tɛ se bɔksi la koɲuman. O kama, n’ ye kɛlɛ damanin kɛ ani n’ ye bɔksi dabila. Kɔfɛ, u ye n’ weele sɔrɔdasiya la ani u ye n’ ci ka taga Alemaɲi. Ka n’ to o yɔrɔ la, sɔrɔdasi ɲɛmɔgɔw ye n’ bila ka taga sɔrɔdasi kuntigiw ka lakɔli dɔ la. Olu fɛ, n’ tun be se ka kɛ sɔrɔdasiw kuntigi ɲuman ye. U tun b’a fɛ n’ ka to sɔrɔdasiya la kudayi. Nka, ne tun t’a fɛ k’o kɛ. O kama, n’ tilanin kɔ n’ ka saan fila sɔrɔdasiya baara la, n’ y’a dabila saan 1956. Nka dɔɔni o kɔ, n’ donna sɔrɔdasiya dɔ la min be dan na pewu!

Sanni n’ ka tiɲɛn diinan lɔn, mɔgɔ b’a ka cɛya yira cogo min na, n’ tun tɛ ni miiriya ɲuman ye o koo la. Filimuw ani n’ sigiɲɔgɔnw tun ye nɔɔba to n’ kan o koo la. N’ tun b’a miiri ko minw be mɔgɔw kalan legiliziw kɔnɔ, olu tɛ cɛɛw ye. Nka, n’ y’a daminɛ ka koo dɔw kalan minw ye n’ ka ɲɛnamaya yɛlɛma pewu. Loon dɔ, ka n’ to n’ ka kanbeleba mobili kɔnɔ, sunguru fila y’u bolo kɔrɔta ko n’ ka lɔ. N’ tun b’u lɔn. N’ kɔrɔmuso ka cɛɛ dɔgɔmusow tun lo. O sunguruw tun ye Jehova Seerew ye ani u tun delila ka Kɔrɔsili Sangaso ni Réveillez-vous ! di n’ ma. Ne fɛ, a tun ka gwɛlɛ ka Kɔrɔsili Sangaso faamu. Nka o loon na, o sunguruw ye n’ weele kafo ka kitabu kalan na, o min tun be kɛ u ka soo. Jɛnkulu dennin dɔ tun be ɲɔgɔn lajɛn yen ka Bibulu sɛgɛsɛgɛ ani ka baro kɛ a kan. Ne y’a fɔ u ye ko: “N’ bena a filɛ ni n’ be se ka na.” U ye yɛlɛmisɛn kɛ ani ka n’ ɲininga ko: “I bena na tiɲɛn na wa?” N’ y’u jaabi ko: “Tiɲɛn na, n’ bena na.”

Kɔfɛ, n’ nimisara sabu n’ ko n’ bena taga. Nka komi n’ tun ye n’ daa di, fɔɔ n’ tun ka taga. O kama, n’ tagara o lajɛn na o loon suu la. Denmisɛnw lo ye n’ kabakoya kosɔbɛ yen. N’ tun tɛ se ka la a la ko denmisɛnw be se ka Bibulu lɔn ten! N’ tagara siɲɛ caaman legilizi la ni n’ bamuso ye dimansi loonw na. Nka, n’ bele tun tɛ bɛrɛ lɔn Bibulu kɔnɔ. Sisan kɔni, n’ tun cɛsirinin lo ka Bibulu faamu bɛrɛbɛrɛ. O kama, n’ sɔnna bibulukalan na. N’ ye fɛɛn minw kalan a daminɛ na, u dɔ ye ko Ala kɔrɔtaninba tɔgɔ ko Jehova. Saan caaman ka kɔn o ɲɛ, n’ tun ye n’ bamuso ɲininga Jehova Seerew koo la ani a y’a fɔ dɔrɔn ko: “Oh, u be cɛkɔrɔba dɔ lo bato min tɔgɔ ko Jehova.” Nka sisan, a tun be komi n’ ɲɛɛw yɛlɛla!

N’ ye ɲɛtaga kɛ joona sabu n’ y’a lɔn ko tiɲɛn diinan tun lo. Kalo kɔnɔntɔn n’ ka lajɛn fɔlɔ kɔ, n’ batizera saan 1957 marisikalo la. N’ ka koow filɛcogo yɛlɛmana. Cɛɛ ka ɲi k’a yɛrɛ jati cogo min na, a diyara n’ ye k’a lɔn Bibulu be min fɔ o koo la. Yezu tun ye cɛɛ dafanin ye. Cɛɛ si ka fanga  n’a ka setigiya tun ma se a ta ma. Nka, Yezu tun tɛ kɛlɛ kɛ. Tuma min na ‘u y’a tɔɔrɔ, a y’a yɛrɛ to u bolo’ i ko a tun fɔra cogo min na (Ezayi 53:2, 7). N’ y’a faamu ko Yezu ka kalanden sɔbɛ ka ɲi “ka kɛ dusu sumalen ye mɔgɔw bɛɛ ye.”—2 Tim. 2:24, ABM.

Saan kelen n’ batizenin kɔ, n’ ye piyɔniye baara daminɛ saan 1958. Nka dɔɔni o kɔ, n’ tun ka ɲi k’a lalɔ wagati damanin. Mun na do? Sabu n’ y’a latigɛ ka Gloria furu. Sunguru fila minw tun ye n’ weele kafo ka kitabu kalan na, olu dɔ tun lo. N’ ma nimisa fewu ka Gloria furu. A koo tun ka gwɛlɛ n’ ma i ko kɔnɔkisɛ sɔngɔ gwɛlɛ ani a koo bele ka gwɛlɛ n’ ma ten. Ne fɛ, diyamaw bɛɛ la ɲumanman nafa t’a bɔ ani n’ dusu ka di sabu n’ y’a furu! A’ y’a to a ka dɔɔni fɔ a yɛrɛ koo la:

“N’ wolobagaw tun be ni musoden 9 ani cɛden 8 ye. N’ bamuso tun ye Jehova sagokɛla kantigiman ye. A sara tuma min na n’ tun be ni saan 14 ye. O wagati lo la n’ facɛ y’a daminɛ ka bibulukalan kɛ. Komi n’ bamuso tun sara, n’ facɛ ye labɛn dɔ kɛ n’an ka lakɔliso ɲɛmɔgɔ ye. N’ kɔrɔmuso saan laban tun lo lise la. N’ facɛ y’a ɲini lakɔli ɲɛmɔgɔ fɛ ko a k’a to ni n’ kɔrɔmuso tagara bi lakɔli la, ne be taga sini. O cogo la, an dɔ be to soo k’an dɔgɔninw ladon. O la, sura be mɔn yanni n’ facɛ ka bɔ baara la ka na. An ka lakɔliso ɲɛmɔgɔ sɔnna ani an tora k’o kɛ fɔɔ n’ kɔrɔmuso tilara a ka kalan na. Kerecɛn denbaya fila ye bibulukalan kɛ n’an ye ani an denmisɛn mɔgɔ 11 kɛra Jehova Seerew ye. Waajuli baara tun ka di n’ ye kosɔbɛ hali k’a sɔrɔ n’ tun be maloya kojugu. N’ cɛɛ Sam ye n’ dɛmɛ o koo la saan caaman kɔnɔ.”

Ne ni Gloria furula saan 1959 feburukalo la. A diyara an ye ka piyɔniye baara kɛ ɲɔgɔn fɛ. Zuwekalo la, an ye sɛbɛ dɔ dafa walisa k’a ɲini ka taga baara kɛ an ka sigiyɔrɔsoba la. An tun b’a fɛ sɔbɛ la ka taga baara kɛ yen. Balimacɛ kanulen Simon Kraker ye baro kɛ n’an ye. A k’o wagati la, u tun tɛ mɔgɔ furuninw weele Betɛli la. An bele tun b’a fɛ ka taga baara kɛ Betɛli la. Nka saan caaman o kɔ le, u y’an weele.

An ye lɛtɛrɛ ci an ka betɛli ma ko u k’an ci ka taga yɔrɔ min na waajulikɛlaw man ca. U ye yɔrɔ kelen dɔrɔn lo kofɔ an ye: Pine Bluff dugu, Arkansas mara la. Kafo fila lo tun be yen: Tubabuw ta ani farafinw ta. U y’an ci ka taga farafin kafo kɔnɔ. Weleweledala 14 dɔrɔn lo tun be yen.

N’a sɔrɔ i b’i yɛrɛ ɲininga ko mun na Jehova Seerew ye farafinw ni tubabuw ka kafow kɛ dan na? O wagati la, u bolomako tun tɛ. A tun daganin tɛ sariya kɔnɔ ko farafinw ni tubabuw ka lajɛn ɲɔgɔn fɛ forobayɔrɔw la i n’a fɔ batolikɛyɔrɔw. Ka fara o kan, fariyakow tun be kɛ. Yɔrɔ caaman na, joo tun be balimaw fɛ ka siran ko mɔgɔw tun bena u ka Masaya Boon halaki ni tubabuw ni farafinw tun be lajɛnw kɛ ɲɔgɔn fɛ. Ni farafinw tun be waajuli kɛra tubabuw ka kiin kɔnɔ, polisiw tun be se k’u minɛ ani k’u bugɔ yɛrɛ. O kama, an tun be sariyaw labato walisa waajuli baara ka se ka kɛ ani an jigi tun b’a la ko koow tun bena fisaya.

An ka waajuli baara tun man nɔgɔ tuma dɔw la. K’an to waajuli la farafinw ka kiin kɔnɔ, an tun be se ka fili ka tubabu dɔ ka daa kɔkɔ. N’o tun kɛra, an tun ka ɲi k’a latigɛ joona n’an ka ɲi ka baro kɛ n’a tigi ye dɔɔni Bibulu koo la wala ka yafa deli ani ka taga luu wɛrɛ la. Yɔrɔ dɔw la, koow tun be ten le o wagati la.

Komi an tun ye piyɔniyew ye, an tun ka ɲi ka baara gwɛlɛw kɛ walisa k’an mako wasa. An ka baaraw fanba sara tun tɛ bɛrɛ ye tile kɔnɔ. U tun ye Gloria ta sokɔnɔ baara la luu dɔw kɔnɔ. Luu dɔw la, u tun b’a to n’ b’a dɛmɛ. O la, an tun be tila joona. U tun be tilera dumuni di an ma. An tun b’o dumu ɲɔgɔn fɛ ka sɔrɔ ka taga. Lɔgɔkun o lɔgɔkun, Gloria tun be sokɔnɔ baaraw kɛ luu dɔ kɔnɔ. Ne tun be baara kɛ zaradɛn kɔnɔ, ka finɛtiriw jɔsi ani ka baara wɛrɛw kɛ. An tun be finɛtiriw jɔsi tubabu dɔ ka luu kɔnɔ, Gloria be to boon kɔnɔ ani ne be to kɛnɛma. An tun be tile kuru bɛɛ kɛ o la. O kama, u tun be tilera di an ma. Gloria tun be dumuni kɛ boon kɔnɔ a kelen ani ne tun be dumuni kɛ garazi kɔnɔ. O tun tɛ basi ye. O dumuniw tun ka di kosɔbɛ. O denbayamɔgɔw sɔɔn tun ka ɲi. Nka, duniɲa ka koow lo tun ye nɔɔ to u  kan. N’ hakili b’a la ko loon dɔ, an lɔra ka esansi don mobili kɔnɔ. Tubabucɛ dɔ lo tun be yen. N’ y’a deli ko a k’a to Gloria ka don ɲɛgɛn na. A ye n’ filɛ ni ɲɛɛ jugu ye ani a ko: “Daa sɔgɔnin lo.”

Faan wɛrɛ fɛ, an ye wagati ɲuman kɛ ni balimaw ye ani waajuli tun ka di an ye! Tuma min na an sera Pine Bluff dugu la, an jigira balimacɛ dɔ ka soo. Ale tun ye kafo ɲɛminɛbaga ye o wagati la. A muso tun tɛ Jehova Seere ye ani Gloria ye bibulukalan daminɛ n’a ye. O wagati kelen na, ne ye bibulukalan daminɛ n’o balimacɛ denmuso n’a cɛɛ ye. O balimacɛ muso n’a denmuso batizera ka kɛ Jehova sagokɛlaw ye.

An tun be ni teri gwɛlɛw ye tubabuw ka kafo kɔnɔ. U tun be to k’an weele ka na sura dumu u ka soo. Nka, an tun b’a to dibi be don fɔlɔ ka sɔrɔ ka taga yen. Jɛnkulu min be weele ko Ku Klux Klan (KKK), olu tun be fariyakow kɛ ani ka tubabuw lasun u ka farafinw kɔniya. N’ hakili b’a la ko loon dɔ sufɛ, an ye cɛɛ dɔ siginin ye a ka soda la ani a tun ye Ku Klux Klan mɔgɔw ka fani ɲɔgɔn don. O koo ɲɔgɔn tun tɛ balimaw bali ka ɲumanya kɛ. Wagati dɔ la, an mako tun be wari la walisa ka taga lajɛnba dɔ la. Balimacɛ dɔ sɔnna k’an ka mobili san walisa an ka se ka taga o lajɛnba la. Kalo kelen o kɔ, loon dɔ, yɔrɔ tun gwannin lo ani an tagamana ka taga waajuli kɛ soo ni soo ani ka bibulukalanw kɛ. An sɛgɛnninba segira ka na soo. An kabakoyara k’a ye ko an ka mobili tun bilanin b’an ka luu daa la! Sɛbɛ fitinin dɔ tun b’a vitiri kan. A tun sɛbɛnin b’a kan ko: “N’ b’aw ka mobili segi aw ma kado ye. Aw balimacɛ.”

Ɲumanya wale wɛrɛ kɛra n’ ye n’ tɛ ɲinɛ min kɔ. Saan 1962 la, u ye n’ weele Masaya cidenyabaara lakɔli la Niyɔriki, South Lansing dugu la. O fɔrɔmasɔn tun bena mɛɛn kalo kelen ani a tun labɛnna kafow, kafokuluw ani distriki kɔrɔsibagaw kosɔn. Tuma min na n’ y’o welelisɛbɛ sɔrɔ, n’ tun tɛ baara la ani fantanya tun be n’ na. Nka, baarada min be telefɔnikow ɲɛnabɔ Pine Bluff dugu la, olu tun ye baro kɛ ni n’ ye k’a filɛ n’u be se ka n’ ta baara la. N’o tun kɛra, ne lo tun bena kɛ farafin fɔlɔ ye ka baara kɛ yen. A laban, u y’a fɔ k’u bena n’ ta baara la. Ne tun bena mun lo kɛ do? Wari tun tɛ n’ fɛ ka taga Niyɔriki. O kama, a tun be n’ kɔnɔ ka sɔn o baara la. N’ tun be labɛnna ka lɛtɛrɛ sɛbɛ walisa k’a fɔ ko n’ tɛna se ka taga o fɔrɔmasɔn kɛ Niyɔriki. Nka, kabako dɔ kɛra n’ tɛ ɲinɛ min kɔ.

Loon dɔ sɔgɔma joona, balimamuso dɔ nana anvelɔpu dɔ di n’ ma min tun fanin lo wari la. An tun be kafo kelen kɔnɔ ani a cɛɛ tun tɛ Jehova Seere ye. Ale n’a deen dɔw tun be wuli sɔgɔma joona ka taga biin siɲɛ kɔɔriforo kɔnɔ. U y’o kɛ janko ka wari caaman sɔrɔ k’a di n’ ma walisa n’ ka se ka taga Niyɔriki. O balimamuso ko: “Taga i ka fɔrɔmasɔn kɛ ani a ɲini ka koo caaman faamu. O kɔ, segi ka na an kalan!” Kɔfɛ, n’ ye telefɔni baarakɛyɔrɔ mɔgɔw ɲininga n’u bena sɔn n’ ka  baara daminɛ lɔgɔkun duuru wagati latigɛnin kɔ. U ye n’ jaabi ko: “O tɛ se ka kɛ!” Nka, o tun tɛ basi ye sabu n’ tun ye desizɔn ta ka ban. N’ dusu ka di kosɔbɛ sabu n’ ma sɔn o baara la.

An ye wagati min kɛ Pine Bluff dugu la, Gloria hakili tora min na, o filɛ nin ye: “O kiinmɔgɔw tun koo ka di n’ ye. N’ tun be bibulukalan kɛ ni mɔgɔ minw ye, u hakɛ tun be mɔgɔ 15 ni 20 cɛ. O kama, an tun be taga waajuli kɛ soo ni soo sɔgɔma. O kɔ, an tun be taga bibulukalanw kɛ fɔɔ ka suu ko. Tuma dɔw la sufɛ 11h yɛrɛ tun b’an sɔrɔ yen. Waajuli baara tun ka di kosɔbɛ! A tun bena diya n’ ye ka to o baara la. Tiɲɛn fɔ ka di, tuma min na n’ cɛɛ kɛra kafokulu kɔrɔsibaga ye, n’ tun t’a fɛ k’o kiin to yen ka tugu a kɔ. Nka, Jehova tun be koow filɛ cogo wɛrɛ la.” Tiɲɛn na, an be se k’o fɔ!

K’an to piyɔniye baara la Pine Bluff dugu la, an ye sɛbɛ dɔ dafa k’a ɲini ka kɛ dan na piyɔniyew ye. An jigi tun b’o kan kosɔbɛ sabu an ka distriki kɔrɔsibaga tun b’a fɛ an ka taga kafo dɔ dɛmɛ Texas mara la. Nka, a tun b’a fɛ an ka taga yen i ko dan na piyɔniyew. O tun ka di an ye. O kama, an jigi tun b’a la ko Betɛli bena an jaabi. An ye kɔnɔni kɛ ka mɛɛn, nka an ma lɛtɛrɛ sɔrɔ. A laban, loon dɔ an ye lɛtɛrɛ dɔ sɔrɔ ani u ko an ka kɛ kafokulu kɔrɔsibaga ye! O kɛra saan 1965 zanwiyekalo la. Balimacɛ Leon Weaver min ye Etazini ka tɔnbolo kɔmite ka kɔrdinatɛri ye, ale fana kɛra kafokulu kɔrɔsibaga ye o wagati kelen na.

N’ hakili tun siginin tɛ sabu n’ tun ka ɲi ka kɛ kafokulu kɔrɔsibaga ye. Saan kelen ɲɔgɔn ka kɔn o ɲɛ, distriki kɔrɔsibaga James A. Thompson tun y’a filɛ ni n’ be saratiw dafa k’o baara kɛ. A y’a fɔ n’ ye kafokulu kɔrɔsibaga ɲuman ka ɲi ka kɛ ni jogo minw ye. A y’a yira n’ na fana n’ be se ka n’ seko fisaya cogo min na. Dɔɔni o baara daminɛnin kɔ, n’ y’a ye ko n’ mako tun b’o ladiliw la kosɔbɛ. Balimacɛ Thompson lo kɛra distriki kɔrɔsibaga fɔlɔ ye n’ ye baara kɛ ni min ye. O balimacɛ kantigi ye n’ dɛmɛ ka koo caaman faamu.

O wagati la, kafokulu kɔrɔsibagaw tun tɛ fɔrɔmasɔn bɛrɛ sɔrɔ. N’ tugura u dɔ kɔ lɔgɔkun kelen ani n’ y’a ka koow kɛcogo filɛ. Lɔgɔkun min tugura o kɔ, ale ye ne ka koow kɛcogow filɛ. A ye ladiliw ni cikanw di n’ ma fana. O kɔ, an tora ka taga bɔ kafow ye an kelen na. N’ hakili b’a la ko n’ ye Gloria ɲininga ko: “Waajibi lo a ka taga sisan wa?” Nka kɔfɛ, n’ ye koo kɔrɔtanin dɔ faamu. Tuma bɛɛ, balimacɛ ɲuman dɔw be sɔrɔ minw be se k’an dɛmɛ. A daan ye an k’a to u k’an dɛmɛ. A diyara n’ ye kosɔbɛ ka dɛmɛ sɔrɔ balimacɛ  kolɔnbagaw fɛ i n’a fɔ balimacɛ James R. Brown, o min tun ye kafokulu kɔrɔsibaga ye ani balimacɛ Fred Rusk fɛ. Ale tun ye betɛliden ye.

O wagati la, siyawoloma tun be yɔrɔ bɛɛ. Loon dɔ, an tagara bɔ Tennessee dugu kafo dɔ ye ani Ku Klux Klan mɔgɔw tun be tagamana k’u ka ninsɔngoya yira. N’ hakili b’a la ko loon wɛrɛ, an tun be waajuli kɛra ni balima dɔw ye ani an lɔra ɛrɛsitoran dɔ la ka dumuni kɛ. N’ tun be tagara ɲɛgɛn na ani n’ y’a kɔrɔsi ko cɛɛ ɲɛɛ sisinin dɔ tugura n’ kɔ. Tubabu tun lo ani a tun ye tatuwaz kɛ i n’a fɔ tubabu minw be farafinw kɔniya. Nka, balimacɛ dɔ tugura an kɔ. Tubabu tun lo ani a tun kɔgɔnin lo ka tɛmɛ ne n’o cɛɛ kan. O balimacɛ ye n’ ɲininga ko: “Balimacɛ Herd, kɔni koow ka ɲi?” O cɛɛ tagara joona joona ani a yɛrɛ ma don ɲɛgɛn na tugun. Saanw tɛmɛtɔ, n’ y’a faamu ko fɛɛn min be na ni siyawoloma ye, o tɛ mɔgɔ fari kulɛri ye nka, jurumu lo. An ye o min cɛɛn ta Adama fɛ. N’ y’a faamu fana ko balima ye balima lo ye, a fari kulɛri mana kɛ min o min ye. A yɛrɛ be sɔn k’a niin di i kosɔn n’a tɛ se ka kɛ cogo wɛrɛ la.

N’ kɛra kafokulu kɔrɔsibaga ye saan 12 kɔnɔ ani distriki kɔrɔsibaga saan 21 kɔnɔ. N’ ye ninsɔndiya ni duga caaman sɔrɔ o saanw na ani koo caaman ye n’ jija kosɔbɛ. Nka duga wɛrɛ tun b’an kɔnɔna. An tun ye sɛbɛ dɔ dafa k’a ɲini ka taga baara kɛ Betɛli la. Saan 38 o kɔ, u y’an weele Etazini Betɛli la. O kɛra saan 1997 utikalo la. An ye baara daminɛ sɛtanburu la. An jigi tun be min na kabi saan caaman, o dafara! Minw tun b’an ka baara ɲɛminɛ Betɛli la, n’ tun b’a miiri ko u b’a fɛ n’ ka baara kɛ yen wagati damanin dɔrɔn le. Nka, o tun tɛ.

Biro min be waajuliko ɲɛnabɔ, n’ ye baara daminɛ o yɔrɔ le la. N’ ye koo caaman faamu yen. Etazini jamana yɔrɔ bɛɛ la, diinan mɔgɔkɔrɔw ani kafokulu kɔrɔsibagaw be kaan bɔ o biro mɔgɔw lo ma ka cikanw ɲini walisa ka gwɛlɛyaw ani koo kɔrɔtanin dɔw ɲɛnabɔ. N’ b’o biro mɔgɔw waleɲuman lɔn sabu u muɲuna n’ kɔrɔ ani u ye n’ dɛmɛ kosɔbɛ. Siga t’a la n’u ye n’ bila ka taga yen tugun, a bena kɛ i n’a fɔ n’ b’a daminɛna kura ye le.

A ka di ne ni Gloria ye ka baara kɛ Betɛli la. An delila sɔgɔma joona wuli la ani o b’an dɛmɛ kosɔbɛ Betɛli la. Saan kelen ɲɔgɔn o kɔ, Jehova Seerew ka Koow Ɲɛnabɔla Jɛnkulu ka kɔmite min be waajuliko ɲɛnabɔ, n’ kɛra o dɛmɛbaga dɔ ye. Saan 1999, n’ kɛra Koow Ɲɛnabɔla Jɛnkulu mɔgɔ dɔ ye. Ka n’ to yen, n’ ye koo caaman faamu. Nka min yɛrɛ kɔrɔtanin lo ka tɛmɛ o bɛɛ kan, o ye ko n’ y’a faamu ka gwɛ ko Yezu Krista lo ye kerecɛn kafo kuntigi ye, adamaden tɛ.

Ni n’ miirila saan tɛmɛninw na, n’ be n’ yɛrɛ jati tuma dɔw la i n’a fɔ kira Amɔsi. O cɛɛ tun ye sagadɛndɛla ye, a majiginin tun lo ani a tun be toro sifa dɔ lo sɛnɛ min be jati fantanw ka dumuni ye. Jehova y’o cɛɛ lo sugandi ka kɛ kira ye. O tun ye nɛɛmaba lo ye (Amɔsi 7:14, 15). O cogo kelen na, Jehova ye ne sugandi, ne min ye fantanden ye ka bɔ Liberty dugu la, Indiana mara la. A ye ne duga Alako ta fan fɛ cogo min na, o tɛ se ka fɔ! (Talenw 10:22). Tiɲɛn na, ne ye n’ ka ɲɛnamaya daminɛ fantanya la, nka sisan ne ye nafolotigi ye Alako ta fan fɛ, fɔɔ a tɛ se ka fɔ!