EMAI sikuli bona taoni ai gau momo idia idau lasi. Unai negai, sikuli ai matamaia hebou taudia be nega tamona ai noho ela bona emai sikuli ai haorea; bona unai taoni be maragi dainai unuseni idia noho taudia edia ladana lau laloatao diba, bona egu ladana idia laloatao danu.

Ai noho taoni, Liberty be fam momo ia noho gabuna bona unai fam ta ta ai koni sibona idia hadoa. Lau vara neganai, egu tamana be bisinesi tauna ta ena fam ai ia gaukara. Lau matamata neganai, trakta taria dalana lau dibaia bona fam ai gaukara idauidau karaia dalana lau diba.

Lau vara neganai, egu tamana ena mauri lagani be 56, bona egu sinana be 35. To, egu tamana be ia gorere momo diba lasi, ena tauanina be ia goada bona ia be gaukara momo tauna. Unai dainai ai ibounai ia hadibaia do ai gaukara goada danu be namo. Ena be ena moni gaukara amo pei bada ia abia lasi, to emai ruma, dabua bona aniani totona unai moni ia gaukaralaia namonamo​—⁠bona ena nega bada ia henia ai ia durua totona. Ena mauri lagani be 93 neganai ia mase. Danu egu sinana be 86 neganai ia mase. Idia ruaosi be Iehova ena Witnes lasi. To, egu tadina ta be kongrigeisen elda ta. Lagani 1970 amo orea ese elda maduna abia hidi bona huaia dalana idia matamaia.

Egu sinana be tomadiho ia laloa bada. Sunday ibounai, Baptist dubu dekenai ai ia hakaua lao. Egu mauri lagani be 12 neganai, egu nega ginigunana toi tamona ena lalohadai lau kamonai. Lau daradara dainai, egu sinana lau nanadaia: “Edena dala ai Iesu be Natuna bona Tamana ai ia lao diba?” Iena haere lau laloatao, ia gwau: “Egu natuna e, unai be hunia gauna. Unai do ita lalopararalaia lasi.” To unai lau do daradaralaia. Egu mauri lagani be 14 neganai, sinavai maragina ta ai lau idia bapatisoa​—⁠toi tamona ena lalohadai dainai nega toi ranu lalonai lau vareai bona raka-lasi!

Lau be haisikuli ai lau noho neganai, lau be mai egu turana merona ta, ia be moni abia totona boksini gadara ia karaia, bona ia ese lau ia doria unai gadara lalonai do lau vareai totona. Unai dainai lau treinini matamaia, bona boksini gadara ena orea, Golden Gloves ai lau vareai. To lau gadara namonamo lasi dainai, nega sisina murinai, unai lau rakatania. Gabeai U.S. Army ai lau vareai bona Germany dekenai lau idia siaia. Unuseniai, egu bosi taudia ese sikuli ta (Noncommissioned Officers Academy) dekenai lau idia atoa, idia laloa lau be hegeregere bosi tauna ta ai lau lao totona. Idia ura egu mauri ibounai lalonai ami gaukara lau karaia. Ami gaukara be egu ura gauna lasi, unai dainai lagani rua sibona lau noho bona lagani 1956 ai unai gaukara lau rakatania. Daudau lasi murinai, ami orea idauna dekenai lau vareai.

Guna, hereva momokani lau do dibaia lasi neganai, lau laloa tau korikori ai lau lao totona, egu masolo lau habadaia be namo. Unai lalohadai be muvi bona tatau ma haida edia toana amo lau itaia. Danu lau laloa, haroro taudia be goada o tatau korikoridia lasi. To, gau haida lau dibaia matamaia bona unai ese egu mauri ia haidaua vaitani. Dina ta, egu motuka amo taoni dekenai lau lao noho lalonai, kekeni matamatadia rua be lau idia itaia dainai lau idia boiria. Idia lau diba​—⁠idia be egu nakimi tauna ena taihudia rua. Unai kekeni rua be Iehova ena Witnes taudia. Guna idia amo Gima Kohorona bona Noga! magasin lau abia, to Gima Kohorona lau lalopararalaia totona be ia auka. Hari, lau idia boiria Kongrigeisen Buka Stadi dekenai lau lao totona, unai hebou maragina be edia ruma ai idia karaia. Idia lau hamaoroa, unai do lau lalohadailaia. Unai kekeni rua be mai edia kiri toana ida lau idia nanadaia, idia gwau: “Do oi mai?” Bena lau gwau: “Do lau mai.”

Idia dekenai lau gwauhamata dainai lau lalohisihisi, to gabeai lau laloa egu gwauhamata lau badinaia be namo. So, unai hebou dekenai lau lao. Natu maragidia edia kara lau itaia neganai, lau moale. Baibel idia diba namonamo. Egu sinana ida Sunday ibounai dubu ai lau lao to Baibel lau diba namonamo lasi. Hari lau ura egu diba lau habadaia. Unai dainai Baibel stadi lau abia dae. Lau dibaia gauna ginigunana be, Siahu Ibounai Diravana ena ladana be, Iehova. Lagani gunanai, egu sinana lau nanadaia, “Iehova ena Witnes taudia be daidia?” Bona ia gwau, “idia be tau burukana ta ladana, Iehova, idia tomadiho henia.” To hari lau mamia egu matana be idia kehoa bamona!

Karaharaga egu mauri lau haidaua, badina lau diba hereva momokani lau davaria. Hua nain murinai, bapatiso lau abia​—⁠unai be lagani 1957, March ai. Egu mauri ia idau momokani. Egu mauri gunana ai lau abia lalohadaina be maoro lasi, to hari lau moale badina Baibel amo tatau korikori edia kara  lau dibaia. Iesu be goevadae tauna. Ia be mai ena goada bona siahu. Bona mai edia masolo bada tatau ia hagaria diba. To, ma haida ida ia heai lasi, to “ia idia dagedage henia bona ia idia hahisia,” peroveta herevadia hegeregerena. (Isa. 53:2, 7) Baibel amo lau diba, Iesu ena murinai ia raka tauna be “taunimanima ibounai ia hebogahisi henia” be namo.​—⁠2 Tim. 2:24.

Lagani 1958 ai, painia gaukara lau hamatamaia. To gabeai nega sisina lalonai painia gaukara lau hadokoa. Dahaka dainai? Palani lau karaia, Gloria lau adavaia totona​—⁠buka stadi totona edia ruma ai lau ia boiria taihuna. Unai abia hidi dainai lau lalohisihisi lasi. Unai nega ai Gloria be hairai momokani, hari danu ia be hairai momokani. Lau dekenai ia be dava bada nadina ta bamona. To iena hairai ese dava bada nadi ia hereaia. Lau moale ia lau adavaia! Taihu ese ena mauri sivarai sisina do ia gwauraia:

“Emai ruma bese lalonai, ai ibounai be 17. Egu sinana be taihu goadana ta. Egu mauri lagani be 14 neganai, ia mase. Unai nega ai egu tamana be ia stadi matamaia. Egu sinana ia mase dainai, egu tamana ese emai sikuli hedmasta ia hereva henia. Egu taihuna be ena lagani dokona haisikuli ai, bona emai tamana ese hedmasta ia noia bema namo ai abia hidi dinadia dekenai do ai lao sikuli. Ai be dina ta ta ai makaia sikuli ai lao totona, unai amo emai tadidia ai naridia bona adorahi ena aniani ai hegaegaelaia. Sikuli ena hedmasta be ai abia hidi dalana dekenai ia lalotamona, bona unai ai badinaia ela bona egu taihuna be sikuli amo ia gradueit. Witnes ruma bese rua be ai idia stadi henia bona emai ruma bese amo, ai ibounai 11 be bapatiso ai abia. Herevana lau hemarai momo, to haroro gaukara lau moalelaia. Idia hanaia laganidia lalonai, Sam ese lau ia durua unai lau hanaia totona.”

February 1959 ai, lau bona Gloria ai headava. Painia gaukara ai moalelaia. July ai, Betele aplikeisen ai atoa, badina ai ura bada hedikwota dekenai do ai gaukara. Tadikaka Simon Kraker ese ai ia intaviu henia. Ai ia hadibaia, unai negai headava taudia be Betele ai do idia boiria lasi. Emai ura Betele totona be ia goada noho​—⁠to lagani daudau ai naria!

Ai ese hedikwota dekenai revareva ai siaia bona idia ai noia bema namo pablisa momo lasi gabuna dekenai ai idia siaia. Pine Bluff Arkansas dekenai ai idia siaia. Unai negai, Pine Bluff ai be kongrigeisen rua sibona idia noho​—⁠ta be nao taudia totona bona ta be kopi korema taudia totona. Kopi korema taudia edia kongrigeisen dekenai ai idia siaia. Unai kongrigeisen lalonai be pablisa ibounai 14 sibona idia noho.

Reana do oi henanadai, dahaka dainai Iehova ena Witnes taudia ese nao pablisa bona kopi korema pablisa idia hapararaia. Unai negai, ai be dala lasi. Badina nao taudia bona kopi korema taudia idia noho hebou karana be gavamani ese ia taravatua, bona dagedage karana danu be bada herea. Gabu momo ai, tadikaka be idia gari badina bema nao bona kopi korema tadikaka idia hebou ma haida ese edia Kingdom Hall do idia gabua. Unai bamona gaudia idia vara. Bema kopi korema tadikaka be nao taudia edia ruma dekenai idia haroro, pulisi taudia ese dibura ruma ai do idia atodia eiava do idia botadia. Unai dainai emai haroro gaukara ai hagugurua totona, taravatu ai badinaia be namo. Ai abia dae nega ta gau ibounai do idia namo.

Emai haroro gaukara be mai ena hekwarahi. Kopi korema taudia edia teritori dekenai ai haroro neganai ai diba lasi ai be nao taudia edia iduara dekenai ai pidipidi noho. Ai be karaharaga abia hidi do ai karaia. Baibel siri tamona sibona ai herevalaia eiava sori herevana ai gwauraia bona raka-siri. Unai nega ai, gabu haida dekenai unai bamona gaudia idia vara.

Oibe, ai painia dainai moni gaukara ai karaia ai sibona ai naria totona. Ai karaia moni gaukara ena dina tamona pei be 3 dola sibona. Gloria be ruma hagoevaia gaukara ia karaia. Lau dekenai gwaumaoro idia henia ia lau durua totona, unai amo ia karaia gaukara ena kahana ai haorea haraga diba. Ai dekenai dina tubu ena aniani idia henia ai ania gabeai emai ruma dekenai ai lao. Wiki ibounai Gloria be ruma bese ta edia dabua ia aenia. Lau be ruma ena murimuri ai lau gaukara, windo lau huria, bona gaukara ma haida lau karaia. Nao ruma besena ta edia ruma ena windo ai hagoevaia neganai​—⁠Gloria be windo ena lalona kahana bona lau be  murimuri kahana lau huria. Dina tamona lalonai unai ai karaia, unai dainai dina tubu ena aniani idia henia. Gloria be ruma lalonai ia aniani to nao ruma besena ida lasi, bona lau be murimuri dekenai lau aniani. To unai lau laloa lasi. Ai dekenai aniani namodia idia henia. Idia be ruma bese namona, to bese hapararaia taravatuna ese edia lalohadai ia biagua. Lau laloatao nega ta sevis steiseni ai, petrol ai abia murinai, gaukara tauna ta lau noia bema hegeregere Gloria be toileti ia gaukaralaia. Lau ia raraia auka bona ia gwau, “toileti be idia koua.”

Tadikaka bona taihu edia hebamo karana ai moalelaia, bona emai haroro gaukara ai laloa bada! Pine Bluff dekenai ai ginidae neganai, tadikaka ta​—⁠ia be kongrigeisen hesiai tauna​—⁠ena ruma dekenai ai noho. Iena hahine be Witnes lasi, unai dainai Gloria ese Baibel amo ia stadi henia. Daudau lasi, edia natuna kekeni bona ena adavana lau stadi henidia. Unai tadikaka ena adavana bona edia natuna kekeni idia ura Iehova do idia hesiai henia, unai dainai bapatiso idia abia.

Kopi kurokuro taudia edia kongrigeisen ai, emai turadia idia noho, nega haida aniani totona ai idia boiria, to gabu ia dibura neganai unai ai karaia. Unai nega ai, orea ladana Ku Klux Klan (KKK)​—⁠kopi idauidau ia inai henia bona ia dagedage henia oreana​—⁠ia noho. Lau laloatao Halloween hanuaboi ta ai, tau ta be unai (KKK) oreana edia dabua ia karaia bona ena ruma vairanai ia helai. Unai ese tadikaka taihu edia kara namodia ia koua lasi. Nega ta hebouhebou ai ura lao, to ai be moni lasi dainai, tadikaka ta be ai totona motuka ta ia hoia. Hua ta ia ore murinai, ai be haroro bona Baibel stadi karaia totona aena amo ai raka bona dina ia siahu dainai ai hesiku bada. Ruma dekenai ai ginidae neganai ai itaia ai gaukaralaia motuka be emai ruma vairana idia rakatania! Motuka ena galasi dekenai revareva ta ai itaia ia gwau: “Inai motuka be egu harihari gauna umui dekenai, umui abia diba. Emui tadikaka.”

Hebogahisi karana ma ta ese egu kudouna ia hamarerea. Lagani 1962 ai, South Lansing, New York dekenai Basileia Hesiai Gaukara Sikuli totona lau idia boiria. Unai sikuli be hua tamona lalonai do ai abia bona unai be kongrigeisen naria taudia, sekit naria taudia bona distrik naria taudia totona. Leta lau abia, to unai negai lau be moni gaukara lau karaia lasi bona moni dalanai lau dabu. Pine Bluff ai telefon kampani ta be gaukara totona lau idia intaviu henia. Bema lau idia abia dae, lau be kopi korema tauna ginigunana unai kampani totona do lau gaukara. Gabeai, lau idia hadibaia idia ida do lau gaukara. Dahaka do lau karaia? Lau be moni lasi New York dekenai lau lao totona. Egu lalona lau hadaia sikuli do lau lao lasi, to moni gaukara do lau karaia. Momokani, lau ura revareva lau torea bona lau lao lasi ena badina lau gwauraia. To lau dekenai ia vara gauna do lau laloaboio lasi.

Aiemai kongrigeisen ai ia noho taihu ta, ena adavana be Witnes lasi, dabai kahana ai emai ruma dekenai ia mai bona lau dekenai envelop ta ia henia. Inai envelop lalonai be moni ia noho. Unai taihu bona ena natuna haida be dabai ibounai kotini umana dekenai idia lao bona uma idia hagoevaia. Edia  gaukara amo idia abia moni sisina amo lau idia durua. Unai amo New York dekenai lau lao diba. Unai taihu, ia gwau: “Sikuli oi lao, diba oi abia bona oi giroa mai neganai ai oi hadibaia!” Gabeai, Telefon kampani ena bosi lau noia bema namo lau giroa mai neganai idia ida lau gaukara. To ia ura lasi. Lau lalohisihisi lasi. Egu abia hidi lau karaia vadaeni. Lau moale badina unai moni gaukara lau abia dae lasi!

Pine Bluff dekenai ai noho neganai, Gloria be ai moalelaia gaudia ia laloatao: Ia gwau: “Unai teritori lau ura henia bada! Egu Baibel stadi ibounai be 15 ia lao 20 bamona. Daba kahana ai, ruma-ta-ruma-ta haroro gaukara ai karaia bona adorahi ai, Baibel stadi ai karaia, bona nega haida ai gaukara ela bona 11 oklok hanuaboi. Emai hesiai gaukara ai moalelaia bada! Lau ura unai hesiai gaukara lau karaia noho. Oibe, lau ura lasi egu asainmen ia idau bona sekit gaukara ai karaia, to Iehova be ai totona palani ia karaia vadaeni.” Bona iena palani ia hagugurua.

Pine Bluff dekenai regula painia gaukara ai karaia lalonai, spesel painia totona aplikeisen ai siaia. Ai diba emai aplikeisen do idia abia dae, badina emai distrik naria tauna be ai ia hadibaia ia ura Texas ai, ia noho kongrigeisen ta ai durua. Ia gwauraia gauna ese emai lalona ia veria. So, ai naria, ai laloa Society amo emai haere do ai abia, to nega momo emai mailbox ai sekea neganai, revareva ta ai davaria lasi. Bena dina ta ai, revareva ta ai abia–ai idia hadibaia ai be sekit gaukara do ai karaia! Unai be lagani 1965, January ai. Tadikaka Leon Weaver, hari ia be United States Brens Komiti edia kodineita, unai nega ai ia danu idia abia hidi sekit gaukara ia karaia totona.

Sekit naria tauna ai lau lao neganai, lau gari. Lagani ta o ma haida gunanai, distrik naria tauna, tadikaka James A. Thompson, Jr ese lau karaia gaukara ia sekea. Bona mai manau ida lau ia hamaoroa egu sekit gaukara lalonai gau haida lau hanamoa be namo, bona sekit naria tauna namona ai lau lao daladia ia gwauraia danu. Sekit gaukara be lagani haida sibona lalonai lau hamatamaia, to lau davaria ena sisiba herevadia ese lau idia hagoadaia. Lau idia abia hidi murinai, egu nega ginigunana be distrik naria tauna, Tadikaka Thompson ida lau gaukara hebou. Ia amo gau momo lau dibaia.

Unai nega ai, sekit naria taudia be treinini bada idia abia lasi. Sekit naria tauna be kongrigeisen ta ia vadivadi henia neganai, wiki ta lalonai ia karaia gaudia ibounai lau itaia namonamo. Bena wiki ma ta ai kongrigeisen ta ai vadivadi henia neganai, ia ese egu gaukara ia itaia danu. Ia ese lau dekenai sisiba bona hakaua herevadia ia henia. To unai murinai, ai parara bona ai ta ta be emai sekit kahana sibona ai karaia. Lau laloatao, unai negai Gloria lau hamaoroa, lau gwau: “Dahaka dainai ita ia rakatania haraga?” To gabeai mai anina bada gauna ta lau lalopararalaia. Orea lalonai oi idia durua diba  tadikaka momo idia noho​—⁠bema edia heduru oi abia dae. Unai bamona tadikaka ese lau idia durua bada, hegeregere, tadikaka James. R. Brown, ia be sekit naria tauna, bona tadikaka Fred Rusk, ia be guna Betele famili ena memba ta.

Unai nega ai bese hapararaia karana be ia goada momokani. Nega ta, Tennessee ai, ai vadivadi neganai bese hapararaia oreana (KKK) be taoni lalonai idia protes. Lau laloatao nega ta, haroro murinai ai ibounai be laga-ani totona aniani gabuna ta lalonai ai vareai. Toileti lau lao neganai lau itaia nao tauna ta, ia be mai ena goada bona masolo, iena imana ai be bese hapararaia tatoo idia noho. Ia toreisi bona egu murinai ia raka mai. To nao tadikaka ta, ia danu be mai ena goada bona masolo, ia raka vareai bona lau dekenai ia gwau: “Tadikaka Herd, gau ibounai ia namo?” Unai tauna be toileti ia gaukaralaia lasi, to murimuri dekenai ia raka-lasi sibona. Lagani momo idia hanaia vadaeni, lau itaia bese idauidau inai henia karana be ta ena kopina ena kala dainai lasi, to ia be Adamu amo ita abia kara dikana amo. Bona lau laloparara tadikaka ta herevana ena kopina kala be idau, to ena tadikaka totona ia mase diba.

Ai be lagani 12 sekit gaukara ai karaia bona lagani 21 be distrik gaukara ai karaia. Unai lagani lalodiai, mauri namona ai moalelaia bona ekspiriens momo ese ai idia hagoadaia. Hahenamo ma ta ai abia danu. Emai tahua gauna be lagani 1997 August ai, ia guguru. Lagani 38 murinai United States Betele dekenai ai idia boiria. Bena hua ta murinai emai Betele gaukara ai hamatamaia. Lau laloa Brens Komiti idia ura dina haida sibona ai heduru, to unai bamona ia vara lasi.

Egu asainmen ginigunana be Haroro Naria Dipatmen ai lau gaukara. Gau momo lau dibaia. Unuseniai idia gaukara tadikaka ese sekit naria taudia bona elda oreana edia henanadai idauidau idia haerelaia. Tadikaka ese lau dekenai treinini idia henia neganai, edia haheauka bona edia heduru lau moalelaia. To, lau mamia bema unai Dipatmen dekenai lau gaukara lou, treinini do lau abia lou be namo.

Lau bona Gloria be Betele maurina ai ura henia bada. Ai be hanaihanai daba momokani ai noga, unai dainai emai Betele gaukara ai moalelaia. Lagani ta murinai, Iehova ena Witnes taudia edia Hakaua Oreana ena Haroro Naria Komiti edia durua tauna ta ai lau lao. Bena lagani 1999 ai, Hakaua Oreana ena memba ta ai lau lao. Inai asainmen lalonai gau momo lau dibaia, to lau dibaia gauna be inai; Iesu Keriso sibona be Keristani kongrigeisen ena kwarana, to taunimanima ta lasi.

Egu mauri lau laloa lou neganai, nega haida lau mamia lau be peroveta tauna Amosa bamona. Ia be mamoe ia naridia bona sikamoa fig audia ia naria danu​—⁠fig be ogogami taudia edia aniani. Iehova ese Amosa ia laloa bada. Dirava ese Amosa ia abia hidi peroveta tauna ai ia lao totona. Momokani, unai be hahenamo badana. (Amo. 7:14, 15) Unai hegeregerena, Iehova ese lau ia hanamoa danu. Lau be fam ai ia gaukara tauna ena natuna, to Dirava ese lau dekenai hahenamo momo ia henia​—⁠momo herea bona ibounai lau gwauraia diba lasi! (Aon. 10:22) Momokani, lau be ogogami ruma besena amo lau tubu daekau, to hari hahenamo momo lau abia!