ITECH xiujmej keman niyajtoya kaltamachtiloyan, amo teyi semi mopatak. Konemej akin iniuan se peuaya se momachtiaya, iniuan se kisaya. Tein melauj, itech toxolal, timiakej timotokayixmatiaj.

Liberty kiyoualouayaj talmej tein amo uejueyin kampa kitokayaj miak taman, okachi mil. Keman niyolik, nopopaj kitekitiliaya se takat akin kipiaya talmej kampa tatokaya. Yejua ika, keman nikatka nitelpoch, nimomachtij niknejnemiltis se tractor uan nikchiuas okseki taman tekimej ompa.

Nopopaj xiuejya katka. Keman niyolik, nomomaj kipiaya 35 xiujmej uan nopopaj, 56. Maski ijkon, chikauak katka uan amo mokokouaya. No tel tekitikej katka uan kinmachtij ikoneuan maj no tekitikan. Maski amo kitania miak tomin, amo keman techpoloj kani tinemiskej, tein timotaliliskej uan tein tikuaskej. Nochipa kitemoj touan yetos. Nopopaj momikilij keman kipiaya 93 xiujmej, uan nomomaj keman kipiaya 86. Amo kitekitilijkej Jiova. Sayoj ke, semej nokniuan takamej peuak kitekitilia Jiova kemej tayekankej itech xiuit 1972 uan kisentoka ijkon kitekitilia.

Nomomaj tel taneltokaya, uan tonal domingo techuikaya kampa monechikouayaj bautistas.  Keman nikpiaya 12 xiujmej, nikakik ke ika tajtouayaj Trinidad uan niktajtanij nomomaj: “¿Keniuj Jesús uelis yeski Tekoneuj uan Tepopaj?”. Nikelnamiki ke nechiluij: “Amo se kimati, nokonetsin. Amo ueli tikajsikamatij”. Uan yekmelauj amo nikajsikamatia. Maski ijkon, nimoauij keman nikpiaya 14 xiujmej kampa onkaya at, kampa expa nechpankalakijkej: sepa itokaykopa toTajtsin, sepa itokaykopa Tekonetsin uan sepa ika yektikatsin espíritu.

Keman nimomachtiaya secundaria, nikpiaya se notasojikniuj akin katka boxeador, uan nechiluij maj no nimochiuani niboxeador. Yejua ika peuak nimomamachtia, uan nimoijkuiloj itech Golden Gloves, kampa kinixyekanayaj boxeadores. Amo semi niuelia, yejua ika satepan ke nimoteuij iniuan sekin, nikauak. Satepan nechnotskej maj nipoui iniuan tateuianij kayomej Estados Unidos uan nechtitankej Alemania. Keman ompa niyetoya, notaixyekankauan nechtitankej kampa kinmachtiaj tateuianij porin kinemiliayaj ke ueliskia nimochiuas tel kuali nitaixyekankej. Kinekiaj maj nimochiuani tel kuali nitateuijkej. Sayoj ke kemej amo niknekia niksentokas nikchiuas nejon, nikisak satepan ke panok ome xiuit tein monekia nimokauas ompa, itech xiuit 1956. Sayoj ke, tepitsin satepan, peuak nipoui itech okse taman nechikol.

Achto ke nimochiuaskia niitaixpantijkauj Jiova, amo kuali katka kemej niknemiliaya ke monekia yeski se yekmelauj takat. Nikpiaya tanemilil tein nikitaya itech películas uan inintanemilil akin nechyoualouayaj. Niknemiliaya ke takamej akin tanojnotsayaj ika Biblia amo katkaj yekmelauj takamej. Sayoj ke peuak nimomachtia seki taman tein kipatak nonemilis. Se tonal, keman niyajtinemia itech nocarro chichiltik tein tel patiyoj katka, ome ichpochmej nechtajpalojkej. Katkaj iikniuan takat akin iuan monamiktijka nokniuj siuat akin tayekanaya. Ichpochmej katkaj itaixpantijkauan Jiova. Achto ipa nechmakakajya amaixmej Tanejmachtijkej uan ¡Despertad!, sayoj ke nikitaya ke amaix Tanejmachtijkej ouij se kiajsikamatia. Sayoj ke ijkuak, nechyoleujkej maj niyouj Nemachtil ika Amaix itech Nechikol, se nechikol kampa amo miakej mosentiliayaj tein mochiuaya ininchan uan kampa momachtiayaj Biblia. Nikiniluij ke niknemiliskia. Uetskakej uan nechtajtanijkej: “¿Yekmelauj?”. Nejua nikinnankilij: “Kemaj”.

Niknemilij maj amo nikiniluiani ke kemaj, sayoj ke nikmachiliaya ke amo ueliskia nimotajtolkepas. Yejua ika nejon youak niyajki nejon nechikol. Niktelmoujkaitak maj konemej kitelixmatinij Biblia. Maski miak domingos niyajka tiopan iuan nomomaj, amo teyi semi nikmatia. Sayoj ke axkan niknekia okachi nimomachtis, uan niknekik maj nechmachtikan. Niman nikmatik ke itokay Dios akin nochi ueli kichiua yejua Jiova. Xiujmej achto, keman niktajtanijka nomomaj akonimej katkaj itaixpantijkauan Jiova, nechiluij: “Yejuan kiueyichiuaj se takat akin xiuejya akin monotsa Jiova”. Sayoj ke axkan nikmachiliaya kemej yeskia niixtajtapouia.

Niman nikpatak miak taman porin nikmatia ke nikajsika tamachtilis tein melauak. Itech metsti marzo xiuit 1957 nimoauij, sayoj chiknaui metsti satepan ke yekinika niyajka nejon nechikol. Notanemilil mopatak. Niyolpaki porin nimomachtij itech Biblia keniuj monejnemiltia se yekmelauj takat. Jesús amo tajtakolej katka. Kipiaya okachi chikaualis uan tanauatil ke okse takat. Sayoj ke yejua amo keman  tateuij, ta ijkon kemej moijtojka, “mokauak maj kitajyouiltianij” (Is. 53:2, 7). Nimomachtij ke se yekmelauj itatojtokakauj Jesús moneki “ma yolyemankanemi” (2 Tim. 2:24).

Se xiuit satepan, itech xiuit 1958, nimochiuak niprecursor. Sayoj ke tepitsin satepan monekik nikauas seki tonalmej. ¡Nikixtalijka nimonamiktis! Uan nimonamiktij iuan Gloria, semej ichpochmej akin nechyoleujka nechikol. Amo keman niknemiliani maj amo nimonamiktiani, porin Gloria kitelpiaya ipatiuj uan ijkon kisentoka. Nejua okachi nikpatiuita ke se kualtsin tetsin tein patiyoj, uan nitelyolpaki porin iuan nimonamiktij. Axkan Gloria namechtapouiti seki taman tein kipanok:

“Notatuan kinpiakej 17 konemej. Nomomaj amo keman kikauak Jiova uan momikilij keman nikpiaya 14 xiujmej. Ijkuak, nopopaj peuak momachtia Biblia. Kemej nomomaj momikilijkaya, nopopaj iuan tajtoj takat akin taixyekanaya itech kaltamachtiloyan porin kinekia kitajtanis se taman. Nokniuj siuat akin tayekanaya, amo uejkaua kisaskiaya secundaria, uan nopopaj kitajtanij takat ox ueliskia tiyaskej kaltamachtiloyan se tonal yejua uan okse nejua. Ijkon, semej ueliskia mokauas kalijtik uan kinyekpias nokniuan akin okachi nojnelmej uan no kichijchiuas tein tikuaskiaj tiotak keman topopaj mokepaskiaya satepan ke tekitito. Takat techkauak, uan ijkon tikchiujkej hasta keman nokniuj siuat motamimachtij. Ome kalyetouanij techmachtijkej Biblia uan majtakti nokniuan uan nejua timochiujkej tiitaixpantijkauan Jiova. Nechtelyolpaktiaya nitanojnotsas, maski ipa amo semi nitajtoua. Sayoj ke Sam nechtelpaleuiani ijkon kemej panouanij xiujmej.”

Gloria uan nejua timonamiktijkej itech metsti febrero xiuit 1959. Techtelyolpaktiaya tisentekitiskej kemej precursores. Kemej tiknekiaj titekitiskej itech ueyi kali kampa techixyekanaj, itech metsti julio titajtankej titekitiskej ompa. Se tokniuj akin tikteltasojtaj, Simon Kraker, akin ijkuak tekitia Betel techchiuilij seki netajtanilmej. Sayoj ke techiluij ke ijkuak, amo kinseliayaj namikuanij. Uan maski tiknekiajok titekitiskej Betel, panokej miak xiujmej hasta keman techyoleujkej.

Tikintajkuilouilijkej tokniuan itech ueyi kali kampa techixyekanaj uan tikintajtanijkej kani ueliskia titapaleuitiuij. Itech tanankilil, sayoj ika tajtojkej se xolal: Pine Bluff, Arkansas. Ijkuak, ompa onkayaj ome nechikolmej, se kampa mosentiliayaj tokniuan akin ixchijchipaujkej uan okse kampa mosentiliayaj tokniuan akin tiltik ininnakayo. Techtitankej kampa mosentiliayaj tokniuan akin tiltik ininnakayo, kampa pouiaj kemej 14 tanojnotsanij.

Xa nanmotajtaniaj keyej itech ininnechikoluan itaixpantijkauan Jiova kinxelouayaj akin ixchijchipaujkej uan akin tiltik ininnakayo. Panouaya nejon porin amo uelia tikchiuayaj okse taman. Inintanauatiluan tekiuanij amo kinkauaya akin tataman kemej ixtamatiaj maj sayoj seko mosentilianij, uan hasta ueliskia kinteuiskej. Miakkan, tokniuan mouiaj maj kinuejuelouilianij kalmej kampa mosentiliayaj komo mosennechikouayaj. Uan taixejekol, porin nejon panokaya. Komo tokniuan akin tiltik ininnakayo tanojnotsaskiaj kampa nemiaj akin ixchijchipaujkej, policías ueliskiaj kintsakuaskej uan hasta kinteuiskej. Yejua ika, tiktakamatiaj tanauatilmej uan ijkon ueliskia titanojnotsaskej, uan tikchiayaj maj nochi moyektaliani.

Kemansa ouij techkisaya titanojnotsaskej. Keman titanojnotstoyaj kampa nemiaj akin tiltik ininnakayo, kemansa tiajsiaj itech se kali kampa nemiaj kalyetouanij akin ixchijchipaujkej porin amo tikmatiaj. Ijkuak monekia niman tikixejekoskej ox ijsiujka tikinnojnotsayaj oso okachi kuali maj tikiniluianij maj techtapojpoluianij uan maj tiyanij. Yejua nejon panouaya ijkuak.

Melauak ke monekia chikauak titekitiskej uan ijkon ueliskia timoixpanoltiskej. Miakkan semi tepitsin techtaxtauiayaj. Gloria tekitia itech seki kalmej, uan itech semej nechkauayaj maj nikpaleui uan ijkon ueliskia okachi ijsiujka matamis. Kalyetouanij techmakayaj tein tikuaskej uan achto ke tiyaskiaj tikuajteuayaj. Nochi semanas, Gloria kinalaxouiliaya inintilmaj seki kalyetouanij uan nejua nitekitia kampa kitokayaj xochit, nikchipauaya ventanas uan nikchiuaya okseki taman. Ininchan seki kalyetouanij akin ixchijchipaujkej, Gloria kinchipauaya ventanas taijtikkopa uan nejua kalampakopa. Kemej tiuejkauayaj nochi tonal, techtamakayaj. Gloria takuaya  taijtik, sayoj ke amo iniuan kalyetouanij, uan nejua kampa kitaliayaj inincarro. Amo nechtekipachouaya nejon. Tein melauj, takual tel uelik katka. Kalyetouanij tel yolkualmej katkaj, sayoj ke kichiuayaj nejon porin nochin ijkon tanemiliayaj. Nikelnamiki se tonal keman tiktalilijtikiskej gasolina tocarro. Satepan ke kitalilijkej, niktajtanij takat ox Gloria ueliskia panos nekalauiloyan. Nechixitak ika kualanyot uan nechiluij: “Tatsaktok”.

Sayoj ke no tikpanokej miak taman tein kualtsin iniuan tokniuan. ¡Uan tikteluelitayaj titanojnotsaskej! Keman tiajsikej Pine Bluff, tinemitoj ichan tokniuj tayekankej. Inamik amo katka itaixpantijkauj Jiova, uan Gloria peuak kimachtia. Uan nejua peuak nikmachtia ininichpoch uan inamik. Temomaj uan iichpoch kiixtalijkej kitekitiliskej Jiova uan moauijkej.

Tikinpiayaj totasojikniuan akin tikinteltasojtayaj itech nechikol kampa mosentiliayaj tokniuan akin ixchijchipaujkej. Techyoleuayaj maj tiotak tiyanij ininchan titakuatij, sayoj ke sayoj uelia tiyayaj keman tayouaya uan ijkon amo akin techitaskia ke iniuan tiyetoyaj. Itech nechikol tein moixmati kemej Ku Klux Klan, kampa kinoliniaj taltikpakneminij maj techikoitakan uan maj tateuikan, kichiujtoyaj miak taman ijkuak. Nikelnamiki se takat akin tokotsyetoya ikaltenoj se youak uan kipiaya taken tein kikuiaj akin pouiaj iniuan Ku Klux Klan. Sayoj ke nejon amo kintsakuiliaya tokniuan maj kinextianij kualtakayot. Se tonal, techpolouaya tomin tein ika tiyaskiaj ueyi nechikol, uan se tokniuj techkouilij tocarro uan ijkon tikpiaskiaj tomin tein ika tiyaskiaj. Se metsti satepan, titelsioujtoyaj keman tiajsikej kalijtik satepan ke titanojnotsatoj uan titamachtitoj ika Biblia porin tel tonak. ¡Semi tikmoujkaitakej maj tocarro yetoni tokalixpan! Iixpan carro yetoya se amat tein kijtouaya: “Namechkepilia namocarro. Namechtayokolia. Nanmokniuj”.

No semi nikmoujkaitak okse taman kemej nechnextilijkej kualtakayot. Itech xiuit 1962, nechyoleujkej maj nikseliti Tamachtilis tein kiseliaj Tayekananij uan Tapaleuianij itech xolal South Lansing, Nueva York. Se metsti tikseliskiaj tamachtilis takalpanouanij itech circuito, distrito uan akin titaixyekanayaj itech nechikolmej. Sayoj ke ijkuak, amo nikpiaya tekit uan sayoj tepitsin tomin tikpiayaj. Itech se tekitiloyan kampa kitaliaj teléfonos ompa Pine Bluff nechchiuilijkaj netajtanilmej tein ika kiitaskiaj ox nechmakaskiaj se tekit. Komo nechtakeuayaj, niyeskia yekinika taltikpaknenkej akin tiltik inakayo akin ompa tekitiskia. Satepan, nechiluijkej ke nechtakeuaskiaj. ¿Toni nikchiuaskia? Amo nikpiaya tomin tein ika niyaskia Nueva York. Niknemilij nikselis tekit uan nikijtos ke amo nikseliskia tamachtilis. Keman yaya nikintajkuilouiliti tokniuan akin tekitij Betel, panok se taman tein amo keman nikelkauas.

Se tokniuj siuat itech nechikol, akin inamik amo katka itaixpantijkauj Jiova, kualkan yajki tokalijtik uan nechmakak se sobre tein kipiaya miak tomin. Yejua uan seki ikoneuan akin nojnelmej kualkan meujkej seki semanas uan tekititoj kampa kitokayaj  algodón uan kiuiuitiliayaj amo kuali xiuit. Kinemilijkej ke ika nejon tomin nejua ueliskia niyas Nueva York. Tokniuj nechiluij: “Xikonseliti tamachtilis, xionmomachti nochi tein tionuelis uan, keman tionmokepas, xitechonmachti”. Satepan, nikintajtanij akin nechtakeujkaj ox ueliskia nipeuas nitekitis makuil semana satepan, sayoj ke senkis nechiluijkej ke amo. Nejon amo nechtekipachoj porin nikixpejpenkaya tein nikchiuaskia. Nitelyolpaki porin amo nikselij nejon tekit.

Gloria techtapouis keniuj kielnamiki nejon tonalmej keman tiyetoyaj Pine Bluff: “Nikteluelitaya kampa titanojnotsayaj. Niktemakaya kemej 15 hasta 20 nemachtilmej. Kualkan titanojnotsayaj kajkalpan, uan satepan tiyayaj titamachtitij. Kemansa timatamiaj 11 hora youak. ¡Titelyolpakiaj itech tanojnotsalis! Ompa nimokauaskia nochipaya, uan moneki nikijtos ke amo keman niknekia nikauas nejon tekit uan tipeuaskej titakalpanoskej itech nechikolmej. Sayoj ke Jiova kinemilijtoya okse taman”. Uan ijkon kichiuak.

Keman titapaleuijtoyaj kemej precursores ompa Pine Bluff, titajtankej maj techixtalikan kemej precursores especiales. Tiknemiliayaj ke techixtaliskiaj porin tokniuj akin takalpanouaya itech distrito kinekia maj titapaleuitij itech se nechikol ompa Texas kemej precursores especiales. Tiktelnekiaj tikseliskej nejon tekit. Uejkauak timochixtoyaj, sayoj ke amo techtitaniliayaj nion se amat. Satepan, itech metsti enero xiuit 1965, ajsik se amat. ¡Techixtaliayaj kemej takalpanouanij! Ijkuak, no kiixtalijkej kemej takalpanojkej tokniuj Leon Weaver, akin axkan poui iniuan Taixyekananij itech Sucursal tein moajsi Estados Unidos.

Niyolmouia niyeski nitakalpanojkej. Kemej se xiuit achto, tokniuj takalpanojkej itech distrito, James Thompson, kiitak keniuj nitekititoya. Nechiluij toni ueliskia okachi kuali nikyekchiuas uan toni kualneskayomej nechpaleuiskiaj maj niyeskia se kuali takalpanojkej. Tepitsin satepan ke peuak nitakalpanoua, nikitak ke tein nechyolmajxitij nechtelpaleuiaya. Satepan ke nikselij nejon tekit, tokniuj Thompson yejua yekinika takalpanojkej itech distrito akin techkalpanoj. Miak taman nechmachtij nejon tokniuj akin kitekitiliaya Jiova ika nochi iyolo.

Itech nejon tonalmej, tokniuan takalpanouanij itech circuito amo semi kiseliayaj tamachtilis. Itech se semana, nikitak keniuj se tokniuj takalpanouaya itech se nechikol, uan se semana satepan, yejua nechitak uan nechiluij seki taman tein ueliskia nikyekchiuas. Satepan, timokaujkej toselti. Nikelnamiki ke nikiluij Gloria: “¿Yekmelauj moneki yasya?”. Sayoj ke, satepan, nikitak se taman tein motelneki: nochipa moajsiskej tokniuan akin mitspaleuiskej komo  tikinkaua maj mitspaleuikan. Nikelnamikiok keniuj nechpaleuijkej seki tokniuan akin uejkaujya kitekitilijtoyaj Jiova kemej James Brown, akin katka takalpanojkej, uan Fred Rusk, akin tekitia Betel.

Itech nejon tonalmej, taltikpakneminij okachiok techikoitayaj. Se tonal, akin pouiaj iniuan Ku Klux Klan mosentilijkej itech se xolal kampa titakalpanojtoyaj tein pouia Tennessee. Okse tonal, nikelnamiki ke titanojnotstoyaj iniuan seki tokniuan uan titakuatoj kampa kinamakayaj takual. Keman niyajki nekalauiloyan, nikitak ke nechtojtokaka se takat akin taman kemej takentoya uan kipiaya miak tatuajes tein kinextiayaj ke techikoitaya. Sayoj ke se tokniuj akin ixchipauak, akin okachi uejkapantik uan okachi chikauak ke yejua, techtojtokak. Tokniuj nechtajtanij: “¿Nochi kuali yetok, nokniuj Herd?”. Nejon takat ijsiujka yajki uan amo panokok nekalauiloyan. Ijkon kemej panouanij xiujmej, nikitani ke tein kichiua maj techikoitakan amo yejua kemej se ixtamati, ta tajtakol tein techpanoltilij Adán. No nikajsikamatik ke se tokniuj nochipa yeski se tokniuj maski taman kemej ixtamati, uan ke moka momikilis komo moneki.

Titakalpanojkej 12 xiujmej itech circuito uan 21 xiujmej itech distrito. Timomachtijkej miak taman itech nochi nejon xiujmej, tikselijkej miak tatiochiualismej uan tikpanokej miak taman tein kualtsin. Sayoj ke tikseliskiaj okse tatiochiualis. Itech metsti agosto xiuit 1997, mochiuak tein tiktelnekiaj. ¡Techyoleujkej maj titapaleuitij Betel tein moajsi Estados Unidos! Yejua ika, se metsti satepan, kemej treinta y ocho xiujmej satepan ke yekinika titajtankaj, tipeujkej titekitij Betel. Niknemilij ke tokniuan akin taixyekanayaj kinekiaj maj sayoj seki tonalmej ompa titapaleuianij, sayoj ke amo panok nejon.

Yekinika, nitekitik Kampa kiitaj iTekiyo Dios. Miak taman nimomachtij ompa, porin tokniuan kinankiliaj ininnetajtaniluan tein tel ouijkej tokniuan tayekananij uan takalpanouanij akin pouij itech nochi ueyi altepet. Nikteltasojkamati kemej nechpaleuijkej uan nejmachkayot tein ika nechmachtijkej. Niknemilia ke, komo oksepa nechtitaniskiaj maj nitapaleuiti ompa, niksentokaskia nimomachtiskia miak taman.

Gloria uan nejua tikteluelitaj tiyetoskej Betel. Nochipa kualkan timeuanij, uan nejon semi techpaleuia nikan. Kemej se xiuit satepan, peuak nitekiti iniuan Oloch Tokniuan akin Kiitaj tein Mouika ika Tanojnotsalis akin kinpaleuiaj Oloch Taojtokaltianij uan, itech xiuit 1999, peuak nipoui iniuan Oloch Taojtokaltianij. Nimomachtiani miak taman itech nejin tekit, sayoj ke tein okachi kipia ipatiuj yejua ke Jesucristo taixyekana itech inechikol Dios, uan amo se taltikpaknenkej.

Keman nikelnamiki tein nikpanouani, kemansa nimomachilia kemej tanauatijkej Amós. Jiova kiitak nejon ichkatajpixkej, akin kichiuaya se tekit tein amo semi kipiaya ipatiuj kemej kikojkoyonis higos tein taki itech sicómoros, se takilot tein sayoj kikuayaj akin kipanouayaj tatasojtilis. Sayoj ke Dios kiixtalij kemej tanauatijkej uan kimakak miak tatiochiualismej (Amós 7:14, 15). No ijkon, Jiova nechitak nejua, ikoneuj se milajtekitikej akin amo semi teyi kipiaya kayot Liberty, uan nechmakak miak tatiochiualismej, tein amo ueli se kinpoua (Prov. 10:22). Nikmachilia ke maski amo teyi nikpiaya, Jiova nechmakani miak taman itech itekiyo, okachi ke tein ueliskia niknemilis.