IJKUAK ninomachtiaya ipan kaltlamachtijli, xmiyek onopatlak ipan nonemilis. Akin imiuan tikalakiya ipan kaltlamachtijli sa no yejuamej imiuan tonkisaya. Kema, ipan nokalpan nochimej toixmatiyaj.

Iyeualiujyan Liberty miyekej chantiyaj kampa intlaluan, yejuamej kitokayaj tlayojli. Ijkuak onitlakat, notaj tekitiya iuan se tlakatl akin tokaya. Kuakon, maski san nitelpokatsin, oniuel niknejnemiltia se tractor niman ouel nikchiua okseki tlemach tlen nochiua tepek.

Xonikitak notaj ijkuak telpochtli katka. Ijkuak oninemiko nonan kipiaya 35 xiuitl niman notaj 56 xiuitl. Maski ijkon, notaj kojtik katka, teuajki niman xkualouaya. Yejua kuelitaya tekitis niman tinochimej otechmachti noijki matiuelikan matitekitikan. Maski xueyi tomin kitlaniya, nochipa otikpixkej tlen tijkuaskej, totlaken niman kanon tikochiskej. Nochipa kinektoya techpaleuis. Notaj kipiaya 93 xiuitl ijkuak omik. Niman nonan omik ijkuak kipiaya 86 xiuitl. Notajuan xokitekichiuilijkej Jehová. Itech nokniuan, se kitekichiuilia Jehová ken tlayekanketl, opeuj itech xiuitl 1972.

Nonan melak tlaneltokaya itech toTajtsin. Yejua techuikaya nochi domingos kampa teopan bautista.  Ijkuak nikpiaya 12 xiuitl, ijkuakon kachtopa onijkak itech Trinidad. Pampa niknekiya nikasikamatis, oniktlajtolti nonan: “¿Kenon Jesús uelis yes teKoneuj niman noijki Tajtli?”. Nikilnamiki ika onechijli: “Nokoneuj, xakaj kimati yejon. Yejon xuelis nasikamatis”. Niman yemelak, xnikasikamatiya. Maski ijkon, ijkuak nikpiaya 14 xiuitl oninoapolakti ipan se pitentsin atentli tlen nisiuj onkatka, niman yexpa onechapolaktijkej: kachtopa ipampa Tajtli, ika okpa ipampa Tekoneuj niman ika yexpa ipampa espíritu santo.

Ijkuak ninemiya secundaria, ninouikaya iuan se akin boxeador katka, niman yejua onechyolchikauj noijki manitlauisoki. Kuakon opeuj ninomajmachtia niman onikalak ipan Golden Gloves, kampa nemiyaj miyekej boxeadores. Xsajnoye niueliya, kuakon sakin ika achijtsitsintin imiuan oninouisok, onikis. Sakin onechuajnotskej manikalaki ipan ejército de Estados Unidos niman onechtitlankej Alemania. Ijkuak ompa ninemiya, akin nechyekanayaj onechtitlankej kampa kinmachtiaj militares pampa kinemiliayaj ika melak niueliya nitlayekanaya. Kinekiyaj maninochiua se militar akin melak maueyixto. San ika, nejua xniknekiya yejon, kuakon, sakin ika oninen ome xiuitl tlen notlajtlaniya ipan yejon kaltlamachtijli, onikis ipan 1956. San ika, sakin onikalak ipan okse ejército tlen melak sejneka katka.

Ijkuak ijkon nopan panotoya, yoninochiujka tlen miyekej kitokayotiaj se “melak tlakatl”. Melak yonechpatlaka tlen nikitaya ipan películas kampa kipanoltiayaj tlen kichiuaya se akin “melak tlakatl” niman ken nochiaya makichiuakan tlakamej. Nejua nikitaya ika akin tenojnotstinemiyaj xsajnoye tlakamej katkaj. San ika, opeuj niueli seki tlemach tlen okipatlak nonemilis. Se tonajli, ijkuak nipaxalojtinemiya ipan nocarro chichiltik tlen melak patioj, omemej ichpokamej onechtlajpalojkej. Nejua nikimixmatstoya: yejuamej ikniuan katkaj tlakatl akin iuan ononamiktijka nokniuj siuatl akin yakatstiuj. Yejuamej katkaj iteixpantijkauan Jehová. Nikinseliliaya revistas Amatl Tekakistilijketl niman ¡Despertad!, san ika, nochipa nikitaya ika Amatl Tekakistilijketl ouijtika katka nikasikamatis. San ika, ipan yejon tonajli, onechnotskej maniuiya ipan Tlamachtijli itech Biblia iuan Tlanechikojli, se pitentsin tlanechikojli tlen nochiuaya iminchan, kampa nomachtiayaj Biblia niman kampa tlanankiliayaj. Onikimijli ika kanaj niaskia. “¿Yemelak?”, onechtlajtoltikej ika pakilistli. “Kema, yemelak”, onikinnankili.

Oninoyolkuep ika onikimijlika yejon, san ika, nikmachiliaya ika xueliskia nikinkajkayauas. Kuakon yejon yeuajli oniaj ipan intlanechikol. Melak onechmojkatlachialti ika kokonej miyek kimatstoyaj itech Biblia. Maski nochi domingos niaya teopan iuan nonan, xmiyek nikmatiya itech Biblia. San ika, aman kuajli yonikijtoka ika ninomachtiskia. Oniknek manechmachtikan itech Biblia. Nimantsin oniuel ika toTajtsin akin nochi ueli kichiua itoka Jehová. Ikipiaya seki xiujtin ijkuak oniktlajtoltijka nonan akinomej katkaj iteixpantijkauan Jehová, yejua san onechnankilijka: “Ah, yejuamej kiueyichiuaj se tlakatl akin iueyi, itoka Jehová”. Onikmachili kentla opeuj nixtlapoui.

Totoka onoskalti notlaneltokil pampa nikmatstoya ika yoniknextijka tlen melauak. Oninoapolakti ipan marzo, xiuitl 1957, san yopanoka naui metstli ijkuak kachtopa oniajka tlanechikojli. Ken nikitaya nemilistli onopatlak. Ijkuak nitlanemilia itech kenon nikchiuaya pampa ninomachiliaya “melak nitlakatl”, melak nipaki pampa onikixmat tlen kijtoua Biblia itech tlenon kichiua akin melauak tlakatl. Jesús xtlajtlakole katka. Yejua melak kojtik katka niman kipiaya chikaualistli xijkon ken okse tlakatl. Maski ijkon, xokitejtemo teuisokis, yejua, ijkon ken yonoijtoka, “okinokauili  makitlajyouiltikan” (Is. 53:2, 7). Oniuel ika akin yemelak kichiua ken Cristo noneki “tenotski yes iuan nochi tlakatl” (2 Tim. 2:24).

Opanok se xiuitl, niman ipan 1958, opeuj nitlapaleuiya ken precursor. San ika, sakin ononek nikajkauas seki metstin. ¿Tleka? ¡Yoniknemilijka ninonamiktis! Oninonamikti iuan Gloria, se itech yejon ichpokamej akin onechnotskaj maniuiya ipan tlanechikojli. Xninoyolkuepa ika iuan oninonamikti, pampa Gloria se kualtsin tetl tlen tsotlani, niman ok ijkon kualtsin. Melak niktlasojkaita Gloria, xsan ken notlasojkaita se tetl tlen melak tlasojti, niman melak nipaki pampa iuan oninonamikti. Aman Gloria achijtsin mechnojnotsas itech inemilis:

“Notajuan okipixkej 17 inkoneuan. Nonan katka se iteixpantijkauj Jehová akin oyolmelaujkanen, niman omik ijkuak nikpiaya 14 xiuitl. Ijkuakon, notaj opeuj nomachtia Biblia. Pampa nonan xok nemiya, notaj otlajto iuan akin tlayekanaya kampa tomachtiayaj niman ijkon kijlis tla ueliskiaj kipatlaskej itlaj. Okitlajtolti tla nokniuj siuatl akin iueyi katka, akin kipolouaya achijtsin ika kitlamiltis secundaria, ueliskia iuan ninopapatlas niman ijkon se tonajli yejua uajnomachtiskia niman okse tonajli nejua. Ijkuak se onnomachtiaya, okse nokauaya tochan kintlajpixtoya toknitsitsinuan niman tlakualchiuaya niman ijkon san sekan titlakuaskej ijkuak totaj uajnokuepaskia itech itekiyo. Akin tlayekanaya ipan kaltlamachtijli otechkauili, niman ijkon otikchiujkej hasta ijkuak nokniuj otlan secundaria. Omemej familias Teixpantijkej touan onomachtijkej Biblia, niman majtlaktli nokniuan niman nejua otochiujkej iteixpantijkauan Jehová. Melak nikuelitaya nitenojnotsas, maski xsajnoye nitenotski. San ika, nochi yejuin xiujtin Sam melak yonechpaleui”.

Gloria niman nejua otonamiktijkej ipan febrero, xiuitl 1959. Melak tipakiyaj titekitiskej ken precursores. Pampa melak tiknekiyaj titlapaleuiskej ipan oficina kampa noyekanaj nochi sucursales, otiktemiltijkej ipan julio itech yejon xiuitl se amatl kampa otiktlalijkej ika tiknekiyaj titlapaleuiskej Betel. Se tokniuj akin melak tiktlasojtlaj, Simon Kraker, akin ijkuakon tlapaleuijtoya Betel, touan otlajto ijkuak okitak amatl tlen otiktemiltijkaj. Otechijli ika Betel xkinselijtoya akin yononamiktijkej. Nochipa otiknejkej titekitiskej Betel, san ika, opanok miyek xiuitl hasta ijkuak otiajkej.

Otikontlajkuilouilijkej oficina kampa noyekanaj nochi sucursales, niman otitetlajtoltijkej kanon ueliskia titlapaleuiskej. Otechnankilijkej ika san ueliskia tiaskej: Pine Bluff, Arkansas. Ijkuakon, ipan Pine Bluff onkatkaj ome tlanechikoltin, se kampa nonechikouayaj tokniuan chipaujkej, niman okse kampa nonechikouayaj tokniuan kapotstikej. Otechtitlankej ipan tlanechikojli kampa tokniuan kapotstikej, kampa san nemiyaj 14 tokniuan akin tenojnotsayaj.

Kanaj nemotlajtoltiaj tleka tokniuan xsan sekan nonechikouayaj san pampa sekimej chipaujkej niman oksekimej kapotstikej. Ijkon nochiuaya pampa ijkuakon xueliskia tikpatlas yejon. Onkatkaj tlanauatiltin tlen xkitekauiliayaj manosentlalikan akin tlamantik tlachiayaj pampa ueliskia kinchiuiliskej tlen xkuajli. Miyekan, tokniuan kinmojtiaya makimixpolokan Kaltin kampa Nosentlaliayaj tla nonechikouayaj tokniuan chipaujkej niman tokniuan kapotstikej. Niman ijkon yopanoka. Tla Teixpantijkej kapotstikej tenojnotsayaj kampa chantiyaj akin chipaujkej, policía ueliskia kintsakuas niman hasta kinuisokis. Kuakon, pampa tiknekiyaj titenojnotsaskej, tikintlakamatiyaj tlanauatiltin. Tikneltokayaj ika sakin yejuin nopatlaskia.

Miyek tikixnamikiyaj ijkuak titenojnotsayaj. Kemantika, ijkuak titenojnotstinemiyaj kampa chantiyaj akin kapotstikej, maski xsan tiknekiyaj noijki tipanouayaj kampa chantiyaj akin chipaujkej. Kuakon nonekiya nimantsin tiktlapejpeniskej tla tikinnojnotsaskiaj noso tikimijliskej matechtlapopoluikan niman oksekan tipanoskej. Ijkuakon ijkon nochiuaya.

Yemelak, nonekiya chikauak titekitiskej niman ijkon tikpiyaskej tlen tijkuaskej. Miyekan kampa otitekitkej, achijtsin techtlaxtlauiliayaj ipan se tonajli. Gloria tekitiya ipan seki kaltin, niman ipan se kajli nechkauiliayaj manikpaleui niman ijkon nimantsin tlamiya. Achto ika tontekitiskej, tijkuayaj tlakuajli tlen itlachijchiujtli katka tlen techmakayaj. Chijchikueyi tonajli, Gloria kinpetsouiliaya intlakenuan se familia, niman nejua nitekitiya kampa kinpiayaj inxochiuan, nikinchipauaya ventanas niman nikchiuaya okseki tekitl. Inchan se familia akin chipaujkej katkaj, tikinpopouayaj ventanas, Gloria ika tlaijtik kinchipauaya niman nejua ika kiyauak. Pampa ompa tisetonalouayaj, ompa techtlakualtiayaj. Gloria kalijtik  tlakuaya, san ika, ximiuan akin ompa chantiyaj, niman nejua nitlakuaya kiyauak kampa kitelketsayaj incarro. Yejon xnechajmanaya. Tlakuajli melak uelik katka. Akin ompa chantiyaj kipiayaj kuajli inyojlo, san ika, yokinmaujkaj ken miyekej tlanemiliayaj. Nikilnamiki ika sejpa otitlatemiltijtikiskej ika gasolina. Sakin ika onitlatemilti, oniktlajtolti akin onechtlatemiltili tla Gloria ueliskia kitlaneuis intlatenko. San onechuajtlaueltlatlatak niman onechijli: “Tsauktika”.

Aman tej, noijki melak kuajli otipanokej imiuan tokniuan. ¡Niman melak tikuelitayaj titenojnotsaskej! Ijkuak san kemach otajsikaj Pine Bluff, otichantikej ichan se tokniuj akin tlapaleuijtoya ken siervo de congregación. Isiuauj xkatka iteixpantijkauj Jehová, niman Gloria opeuj kimachtia itech Biblia. Niman nejua noijki opeuj nikmachtia imichpoch niman inmon. Nantli niman imichpoch okijtokej kitekichiuiliskej Jehová niman onoapolaktijkej.

Niman noijki touikayaj imiuan tokniuan chipaujkej akin nemiyaj ipan okse tlanechikojli. Technotsayaj matitlakuatij inchan, san ika, san ueliya tiayaj ijkuak itlayoua katka, pampa ijkon xtechitayaj ika tinemiyaj imiuan tokniuan. Akin kimixmatiyaj ken Ku Klux Klan melak miyekej katkaj ipan yejon tonaltin, yejuamej melak kinchikoitayaj oksekimej niman teuisokiyaj. Nikilnamiki ika se yeuajli onikitak se tlakatl akin nemiya ichan kampa ikiyauak, noueyimatiya pampa kitlalijtoya se tlakentli tlen kitlaliayaj akin kipaleuiayaj Ku Klux Klan. Maski ijkon panouaya, tokniuan xokikajkaujkej kichiuaj tlen kuajli inpampa oksekimej. Se tonajli, xtikpiayaj tomin tlen ika tiaskej toueyitlanechikol, kuakon, se tokniuj otechkouili tocarro Ford tlen okis ipan 1950 niman ijkon matiakan ipan toueyitlanechikol. Se metstli sakin, ijkuak yotitenojnotsatoj niman yotitemachtitoj, otajsikej tochan melak yotitonalmijkaj pampa sajnoye tona katka. ¡Melak otechmojkatlachialti tikitaskej tocarro ixpan tokal! Niman ixpan onkatka se amatsintli, tlen kijtouaya: “Nimechkuepilia nemocarro. Nimechtlayokolia. Nemokniuj”.

Opanok okse tlemach tlen melak kualtsin niman xkeman nikilkauas. Ipan 1962, onechnotskej maniuiya ipan Tlamachtijli itech iTekiyo Tekiuajyotl tlen nochiuaskia ipan South Lansing, Nueva York. Nochi se metstli kinmachtijtoskiaj tlayekankej ipan circuito, tlayekankej ipan distrito niman akin tikinyekanayaj tlanechikoltin. San ika, ijkuak onechnotskej, xnikpiaya tekitl niman san achijtsin tomin tikpiayaj. Se compañía tlen kintlaliaya teléfonos ipan kalpan Pine Bluff nouan yotlajtoka niman ijkon kitaskiaj tla nechtlakeuaskiaj. Tla nechtlakeuayaj, niyeskia kachtopa tlakatl kapotstik akin ompa tekitiskia. Sakin, onechijlikej ika kema nechtlakeuaskiaj. ¿Tlenon nikchiuaskia? Xnikpiaya tomin tlen ika niaskia Nueva York. Melak oniknemili tla nikselis yejon tekitl niman nikteijlis ika xnias ipan Tlamachtijli. Yemelak, inikijkuilojtoya se amatl kampa nikteijliskia ika xniaskia, san ika, opanok itlaj tlen xkeman nikilkauas.

Se tonajli ika kualkan, se tokniuj siuatl akin touan nosentlaliaya niman iueuentsin xnomachtiaya, otlatetepiniko ipan topuerta niman onechmakuiti se sobre. Tentoya ika tomin. Yejua niman sekimej ikonetsitsinuan youejkaujkaj seki semanas san nimantsin nokuiteuayaj niman ontekipanouayaj kampa kitokayaj ichkatl niman kitlachipauiliayaj. Kinemiliayaj ika yejon tomin nechpaleuiskia maniuiya Nueva York.  Yejua onechijli: “Xmomachtiti niman miyek xueli, niman ijkuak tiuajmokuepas, xtechmachti nochi tlen otiuel”. Sakin, onitetlajtolti kampa compañía tlen kintlaliaya teléfonos tla ueliskia nipeuas nitekitis hasta ipan makuijli semanas, san ika, onechmelajkaijlijkej ika ka. San ika, yejon xonechajman. Kuajli yonikijtojka tlenon nikchiuas. Melak nipaki ika xompa onitekit.

Gloria techijlis kenon kilnamiki ijkuak tinemiyaj Pine Bluff: “Melak onikuelitak kampa titenojnotsayaj. Nikinmachtiaya itech Biblia 15 niman kemantika hasta 20 tlaltikpakchanejkej. Ika kualkan tontenojnotsayaj techajchan, sakin nochi tonajli titemachtiayaj itech Biblia. Kemantika titlamiyaj a las 11 ika yeuajli. ¡Melak techpaktiaya titenojnotsaskej! Ueliskia nochipa ompa ninokauas, niman kipiya ika ninokuitis ika xnikpatlaskia kampa titenojnotsayaj ipampa tekitl tlen nochiua ipan circuito. San ika, Jehová okse kinemilijtoya”. ¡Niman melauak ijkon katka!

Ijkuak titlapaleuijtoyaj ken precursores ipan Pine Bluff otikteijlikej ika tiknekiyaj titekitiskej ken precursores especiales. Tiknemiliayaj ika techseliskiaj pampa se tlayekanketl ipan distrito kinekiya matitlapaleuitij ken precursores especiales ipan se tlanechikojli tlen onkatka Texas. Melak tiknekiyaj ijkon titlapaleuiskej. Kuakon titlamachixtoyaj niman titlamachixtoyaj... San ika, xkeman otechnankilijkej. Sakin, ipan enero, xiuitl 1965 oyejkok se amatl. ¡Otechijlikej ika tikomintlajpaloskiaj tlanechikoltin! Tokniuj Leon Weaver noijki ijkuakon okijlikej ika tlapaleuiskia ken tlayekanketl ipan circuito, yejua aman Akin kixeloua Tekitl ipan Grupo akin kiyekana sucursal ipan Estados Unidos.

Melak nechmojtiaya nitlapaleuis ken tlayekanketl ipan circuito. Yopanoka se xiuitl, se tlayekanketl ipan distrito, James Thompson, okitaka tlen niueliya nikchiuaya. Kualtsin onechijlika ipan tlenon nonekiya nitekitis, niman okinteneuj kualneskayomej tlen nonekiya kipiyas se kuajli tlayekanketl ipan circuito. Ijkuak yopeujka nitlapaleuiaya ken tlayekanketl ipan circuito, onikitak ika tlen onechijlika melak nechpaleuijtoya. Tokniuj Thompson yejua kachtopa tlayekanketl ipan distrito akin otechtlajpaloto ijkuak opeuj nitekiti ken tlayekanketl ipan circuito. Melak miyek oniuel itech yejuin tokniuj akin chikauak itlaneltokil.

Ipan yejon tonaltin, xmiyek kinmachtiayaj akin tlapaleuiayaj ken tlayekankej ipan circuito. Ipan se semana onikitak tlenon kichiuaya se tlayekanketl ipan circuito ijkuak kitlajpalouaya se tlanechikojli, niman okse semana, aman yejua okitak tlenon nikchiuaya niman onechijli tlenon ueliskia nikyektlalis. Sakin san toselti otokaujkej. Nikilnamiki ijkuak onikijli Gloria: “¿Yemelak ika xueliskej nokauaskej okse achijtsin?”. San ika, sakin onikasikamat itlaj tlen melak ueyi kijtosneki: nochipa nemiskej tokniuan akin kuajli inyojlo akin mitspaleuiskej tla timokauilia. Ok kuajli nikilnamiki kenon onechpaleuijkej tokniuan akin chikauak katka intlaneltokil, ken James Brown, akin  kimintlajpalouaya tlanechikoltin, niman Fred Rusk, akin betelita katka.

Ijkuakon, melak chikauak opeuj nochikoitalo. Sejpa, ijkuak tiktlajpalojtinemiyaj se kalpan itech Tennessee, akin nemiyaj ipan Ku Klux Klan onosentlalijkej ipan yejon kalpan. Ipan okse tonajli, nikilnamiki ika titenojnotstinemiyaj inuan sekimej tokniuan niman achijtsin ototeltijkej ipan se restaurante niman ijkon itlaj tijkuaskej. Ijkuak niaya tlatenko, onikitak ika nechuajtokatiaya se tlakatl akin temojti tlachiaya niman yokinoijkuilouilijka ipan inakayo kampa nesiya ika techikoitaya. San ika, se tokniuj chipauak akin melak uejkapan niman kojtik xken yejon tlakatl noijki otechuajtokatia, niman onechtlajtolti: “¿Nochi kuajli nokniuj Herd?”. Yejon tlakatl totoka oyaj niman nion xopanok tlatenko. Itech xiujtin tlen yopanokej, yonikitak ika tlaltikpakchanejkej xnochikoitaj pampa tlamantik ken tlachiaj, nochikoitaj pampa kipiyaj tlajtlakojli tlen Adán tinochimej otechpanoltili. Niman noijki yoniuel ika se tokniuj, yejua tokniuj maski machipauak noso makapotstik, akin ueliskia kitemakas inemilis mopampa tla nonekiskia.

Otiuejkaujkej 33 xiuitl ika tikintlajpalojtinemiyaj tlanechikoltin, niman onitekit 21 xiuitl ken tlayekanketl ipan distrito. Melak miyek otiuelkej ipan yejon xiujtin, otikselijkej miyek tlateochiualistin niman miyek tlen kualtsin topan onochiuj. San ika, ok tikseliskiaj okse itlaj. Ipan agosto, xiuitl 1997, topan onochiuj tlen nochipa tiknekiyaj. ¡Otechnotskej matitlapaleuikan ipan Betel tlen onka Estados Unidos! Yopanoka 38 xiuitl ijkuak otikteijlikaj ika tiknekiyaj ompa titlapaleuiskej. San opanok se metstli, opeuj titekitij Betel. Oniknemilijka ika tokniuan akin ompa tlayekanayaj kinekiyaj ompa manitlapaleui san seki tonaltin, san ika, xopanok yejuin tlen niknemiliaya.

Opeuj nitekiti ipan Grupo akin kiyekana itech ken notenojnotsa. Ompa melak miyek oniuel, pampa ompa tokniuan kipiya ika kinnankiliskej tlayekankej ipan tlanechikojli niman tlayekankej ipan circuito itech nochi país ijkuak itlaj kintlajtoltiaj tlen ouijtika niman tlen noneki melak kuajli nonemilis. Melak niktlasojkamati ika tokniuan xonosiaujkaujkej niman ika melak kuajli onechpaleuijkej ijkuak nechmachtijtoyaj. Niknemilia ika tla oksejpa ompa nechtitlaniskiaj, ninomachiliskia ken akin kemach peua kichiua yejon tekitl.

Gloria niman nejua tikuelitaj titlapaleuiskej Betel. Tejuamej nochipa san nimantsin tokuiteuaj, niman yejon melak techpaleuiya nikan Betel. Opanok kanaj se xiuitl, niman opeuj nikinpaleuiya tokniuan akin kineskayotiaj Grupo akin Tlayekana ipan nochi tlanechikoltin. Sakin, ipan 1999, onechtlapejpenijkej manitekiti iuan Grupo akin Tlayekana ipan nochi tlanechikoltin. Nitekitis ompa miyek yonechmachti, san ika, yejuin tlen melak ueyi yoniuel: kuajli nestika ika Jesucristo yejua akin kinyekana nochi tlanechikoltin niman xse tlaltikpakchane.

Ijkuak nitlanemilia ipan nochi tlen nopan yopanok, kemantika ninomachilia ken teotlajtoketl Amós. Jehová okitak yejon tlakatl akin san tlajpixketl katka niman kintsopiniaya higos, intlakilyo sicómoros, se tekitl tlen xsajnoye nopatiojkaitaya, niman yejon tlakilyotl san kikuayaj akin xkipiayaj tomin. ToTajtsin okitekitlali ken teotlajtoketl niman melak okiteochiuj (Amós 7:14, 15). Noijki ijkon, Jehová onechitak, nejua akin san ikoneuj se tokaketl akin chantiya Liberty niman xmiyek kipiaya, niman hasta xuelis nochi nikteneuas kenon melak yonechteochiuj (Prov. 10:22). Nikmachilia ika maski xmiyek nikpiaya ijkuak onitlakat, Jehová miyek yonechmakak tlen itech ualeua, melak yonechteochiuj ijkon ken xkeman oniknemili.