GE KE be ke tsena sekolo, dilo di be di se tša napa di fetoga gakaalo. Sekolong seo ke bego ke tsena go sona, batho bao o bego o thoma sekolo le bona e be e eba bona bao o fetšago sekolo le bona. Ge e le gabotse, batho ba bantši lefelong leo re be re tsebana ka maina.

Toropo ya Liberty e be e le kgauswi le dipolasa tše dinyenyane, gomme go be go lengwa mafela kudu. Ge ke be ke belegwa, tate o be a šomela yo mongwe wa boradipolasa ba moo re bego re dula gona. Ge ke be ke sa le mofsa, ke ile ka ithuta go reila terekere le go šoma mešomo e mengwe ya dipolaseng.

Ge ke be ke belegwa, tate e be e šetše e le yo mogolo. O be a na le mengwaga e 56 gomme mma a na le e 35. Lega go le bjalo, tate o be a tiile, a phetše gabotse e bile a rata go šoma. Le gona o ile a re ruta ka moka re le bana ba gagwe gore re rate mošomo. Gaešita le ge a be a sa gole tšhelete e ntši, o be a kgonthišetša gore re na le madulo, diaparo le dijo, e bile ka mehla o be a ipha nako ya go ba le rena. O hlokofetše a na le mengwaga e 93. Mma yena o hlokofetše a na le mengwaga e 86. Ka moka ga bona ba hlokofetše e se Dihlatse tša Jehofa. Go bana bešo, moratho wa ka wa mošemane ke yena feela yo a ilego a hlankela Jehofa ka go botega e le mogolo ga e sa le go tloga ka bo-1970.

Mma o be a rata bodumedi kudu. O be a re iša kerekeng ya Baptist Sontaga se sengwe le se sengwe. Ke ile ka thoma go kwa ka thuto ya Borarobotee ge ke be ke na le mengwaga e 12. Ka ge ke be ke nyaka go tseba, ke ile ka botšiša mma gore: “Go tla bjang gore Jesu e be Morwa le Tate ka nako e tee?” Ke gopola mma a mphetola a re: “Morwa, taba ye ga e kwešišege. Ga go na motho yo a ka e kwešišago.” Ruri taba ye e be e mmakatša. Lega go le bjalo, ge ke be ke na le mengwaga e ka bago e 14, ke ile ka kolobetšwa nokeng ya moo ke bego ke dula gona—ka inwa ka makga a mararo ka ge thuto ya Borarobotee e be e ruta bjalo!

Ge ke be ke le sekolong sa sekontari, ke be ke na le mogwera yo e bego e le ramatswele (boxer), gomme o ile a nkgothaletša gore ke tsenele papadi yeo. Ka gona, ke ile ka thoma go rutwa papadi yeo, ke moka ka ba setho sa mokgatlo wa tša matswele wa Golden Gloves. Ke be ke sa nape ke e kgona, ka gona ka morago ga nakwana ke ile ka e tlogela. Ka morago, ke ile ka išwa Bošoleng bja U.S. ke moka ka romelwa Jeremane. Ge ke be ke le moo, batho bao ke bego ke ba šomela ba ile ba nthomela sekolong sa bošole, ka ge ba be ba nagana gore ke be ke na le bokgoni bja go etelela pele. Ba be ba nyaka gore ke be lešole bophelo bja ka ka moka. Ke be ke sa rate bošole, ka gona ka morago ga gore ke fetše mengwaga e mebedi ke le moo, ke ile ka tloga ka 1956. Eupša ka morago ga moo, ke ile ka tsenela bošole bjo bongwe bjoo bo bego go fapane kudu le bja mathomong.

Pele nka ithuta therešo, ke be ke na le kgopolo e fošagetšego tabeng ya gore monnanna o swanetše go ba bjang. Kgopolo yeo ke be ke e tšere dimubing le bathong bao ke bego ke phela le bona gomme e ile ya ntutuetša kudu. Ke be ke nagana gore banna bao ba bolelago ka Beibele ga se bannanna. Eupša ke ile ka thoma go ithuta ka dilo tšeo di ilego tša fetoša bophelo bja ka. Ka letšatši le lengwe ge ke be ke le ka toropong ke reila koloi ya ka ya selahla, dikgarebe tše dingwe tše pedi di ile tša nkemišetša letsogo di ntumediša. Ke be ke di tseba, e be e le baratho ba monna yo a bego a nyetše sesi. Dikgarebe tšeo e be e le Dihlatse tša Jehofa. Di be di kile tša mpha dimakasine tša Morokami le Phafoga!, eupša ke be ke nagana gore Morokami o be o le thata go o kwešiša. Lega go le bjalo, mo lekgeng le, dikgarebe tšeo di ile tša ntaletša gore ke tle Thutong ya Puku ya Phuthego, e lego seboka se senyenyane sa thuto ya Beibele le poledišano. Seboka seo se be se swarelwa gagabo tšona. Ke ile ka di botša gore ke tla nagana ka taba yeo. Dikgarebe tšeo di ile tša mpotšiša di myemyela, tša re: “Na o a re tshepiša?” Ke ile ka re: “Ee, ke a le tshepiša.”

Ke ile ka itsholela gore go re’ng ke ile ka di tshepiša, eupša bošegong bjoo ke ile ka no ya. Ge ke be ke le moo, ke ile ka kgahlwa ke bana kudu. Ke be ke sa tshepe gore ba tseba Beibele gakaakaa! Ke ile ka makatšwa ke gore gaešita le ge ke be ke eya kerekeng le mma ka Disontaga, ke be ke sa dutše ke sa tsebe selo ka Beibele. Ga bjale ke be ke ikemišeditše go ithuta mo gontši. Ka gona ke ile ka dumela go rutwa Beibele. Se sengwe sa dilo tšeo ke ilego ka ithuta sona mathomong ke gore leina la Modimo Ramatlaohle ke Jehofa. Mengwaga pele ga moo, ge ke be ke botšiša mma ka Dihlatse tša Jehofa o ile a no re: “Aa, batho bao ba rapela mokgalabje yo mongwe yo ba mmitšago Jehofa.” Eupša ga bjale ke be ke thoma go bulega mahlo!

Ke ile ka dira tšwelopele ka lebelo ka ge ke be ke tseba gore ga bjale ke hweditše therešo. Pele dikgwedi tše senyane di ka fela, ka morago ga go ya sebokeng sela dikgarebe tšela di ilego tša ntaletša go sona, ke ile ka kolobetšwa. Ke kolobeditšwe ka March 1957. Ke ile ka thoma go lebelela bophelo ka tsela e fapanego. Ga bjale ke thabela gore Beibele e nthušitše go ba le pono e botse mabapi le go ba monnanna. Jesu e be e le monna yo a phethagetšego. O be a na le matla go feta monna le ge e le ofe. Lega go le bjalo, ga se a ka a lwa le motho, eupša “o ile a ikgafela go hlakišwa,” go etša ge go boletšwe e sa le pele. (Jes. 53:2, 7) Ke ile ka ithuta gore molatedi wa  nnete wa Jesu “o swanetše go ba bonolo go bohle.”​—2 Tim. 2:24.

Ke ile ka thoma go bula madibogo ngwageng o latelago, ka 1958. Eupša ka pejana ka morago ga moo, ke ile ka swanelwa ke go emiša ka nakwana. Ka baka la’ng? Ke be ke nyaka go nyala Gloria, e lego yo mongwe wa dikgarebe tšela tša go ntaletša go ya sebokeng sa puku ya phuthego! Ga sa nka ka itsholela go mo nyala. Gloria e be e le leswikana le bohlokwa ka nako yeo, le gona bjale o sa dutše e le lona. Mo go nna, o bohlokwa kudu go feta taamane, le gona ke thabela gore ke mo nyetše. Anke Gloria a le botšeng ganyenyane ka yena.

Gloria o re: “Ka gae re be re le bana ba 17. Mma e be e le Hlatse ya Jehofa e botegago. O ile a hlokofala ke na le mengwaga e 14. Ka nako yeo, tate o ile a thoma go ithuta Beibele. Ka ge mma a be a hlokofetše, tate o ile a kgopela hlogo ya sekolo gore e re dumelele go ya sekolong ka matšatši a go se swane. Ka nako yeo sesi o be a šaletšwe ke ngwaga o tee gore a fetše sekolo sa sekontari. Re be re šielana ka go ya sekolong e le gore yo mongwe wa rena a šale a hlokometše bana ba gešo ba banyenyane le go apea dijo tša mantšiboa gore ge tate a boa mošomong a hwetše di lokile. Hlogo ya sekolo e ile ya dumelela kgopelo yeo, gomme ra dira bjalo go fihlela sesi a fetša sekolo. Malapa a mabedi a Dihlatse tša Jehofa a ile a ithuta Beibele le rena, gomme ba 11 ba rena re ile ra ba Dihlatse tša Jehofa. Ke be ke rata go ya tšhemong, gaešita le ge ke be ke na le dihlong. Sam o be a nthuša go fenya dihlong tša ka.”

Nna le Gloria re nyalane ka February 1959. Re thabetše go bula madibogo re le mmogo. Ngwageng wona woo ka July, re ile ra tlatša fomo ya go yo hlankela Bethele, ka ge re be re duma go yo hlankela ntlongkgolo. Ngwanabo rena yo a rategago e lego Simon Kraker, o ile a boledišana le rena. O ile a re botša gore legaeng la Bethele go be go sa amogelwe banyalani ka nako yeo. Ga se ra ka ra lahlela toulo ya go yo hlankela Bethele, eupša go ile gwa tšea nako e telele!

Re ile ra ngwalela ntlongkgolo re kgopela gore re romelwe go yo hlankela moo go nago le tlhokagalo. Ge ba be ba re araba, re ile ra newa kgetho e tee feela ya gore re ye toropong ya Pine Bluff yeo e lego Arkansas. Ka nako yeo, go be go na le diphuthego tše pedi feela Pine Bluff—e nngwe e le ya makgowa gomme e nngwe e le ya makhalate goba bathobaso. Re ile ra išwa phuthegong ya makhalate, yeo e bego e na le bagoeledi bao e ka bago ba 14 feela.

O ka ba o ipotšiša gore ke ka baka la eng makgowa le bathobaso ba be ba sa kopanele phuthegong e tee mola e le Dihlatse tša Jehofa. Karabo e bonolo ke gore ka nako yeo re be re gapeletšega go se kopanele phuthegong e tee. Merafo ya go se swane e be e se ya dumelelwa go ba mmogo mafelong a batho bohle, go swana le mafelong a borapedi. Le gona ge ba be ba ka ba mmogo, go be go ka tsoga ntwa. Mafelong a mantši, bana babo rena ba be ba tšhoga gore ge e ba merafo ya go se swane e be e ka kopana Holong e tee ya Mmušo, Holo yeo e be e ka senywa. Dilo tše bjalo di be di direga. Ge e ba Dihlatse tša Jehofa di be di ka ya tšhemong ya makgowa, di be di ka swarwa, mohlomongwe le go bethwa. Ka gona e le gore re fetše tšhemo ya rena, re be re latela melao ya naga, re holofetše gore dilo di be di tla fetoga.

Ga se ka mehla tšhemo ya rena e bego e le bonolo. Ge re be re šoma tšhemo ya bathobaso, ka dinako tše dingwe re be re fela re kokota ka ntlong ya makgowa re sa tsebe. Re be re swanetše go nagana kapejana gore re tlo reng. Re be re swanetše go kgetha ge e ba re tla nea motho yoo a bulago mojako thero e kopana goba ra no kgopela tshwarelo gomme ra fetela pele. Ke ka mokgwa wo dilo di bego di dirwa ka gona ka nako yeo.

Ke nnete gore re be re swanetše go šoma ka thata mošomong wa boiphedišo gore re kgone go bula madibogo. E mentši ya mešomo yeo re bego re e šoma e be e patela tšhelete e nyenyane kudu ka letšatši. Gloria o be a šoma mešomo e mmalwanyana ya go hlwekiša dintlo. Ka motseng o mongwe, ke be ke dumeletšwe gore ke mo thuše e le gore a fetše go šoma ka pela. Mosegare, re be re fiwa dijo tšeo di bego di šetše di apeilwe, gomme di beilwe ka foritšing. Nna le Gloria re be re di ja re le gotee pele re sepela. Beke e nngwe le e nngwe, Gloria o be a aenela lapa le itšego. Nna ke be ke hlwekiša jarata, ke hlatswa mafasetere le go dira mešomo e mengwe ya ka moo. Ka lapeng le lengwe la makgowa, re be re hlatswa mafasetere, Gloria a a hlatswa ka gare gomme nna ke a hlatswa ka ntle. Go be go re tšea letšatši ka moka, ka gona mosegare re be re newa dijo. Gloria o be a jela ka ntlong yeo, eupša a sa je le lapa leo, mola nna ke be ke jela ka karatšheng. Ke be ke se na bothata le seo. Dijo tša gona di be di le bose kudu. Lapa leo le be le rata batho, le be le no tutuetšwa ke batho bao ba bego ba dula lefelong leo. Ke gopola ka letšatši le lengwe ge re be re tšhela peterole karatšheng e nngwe, ge re se no fetša, ke ile ka kgopelela Gloria ntlwana go lekgowa leo le bego le  re tšhelela peterole. O ile a re lebelela a sentše sefahlego gomme a re: “E notletšwe.”

Ka lehlakoreng le lengwe, re be re thabela dinako tše dibotse le bana babo rena, le gona re be re rata bodiredi bja rena! Ge re be re fihla Pine Bluff la mathomo, re ile ra yo dula le ngwanabo rena yo e bego e le mohlanka wa phuthego ka nako yeo. Ka nako yeo mosadi wa gagwe e be e se Hlatse ya Jehofa, gomme Gloria o ile a thoma go ithuta Beibele le yena, ke moka nna ka thoma go ithuta le morwedi wa bona le monna wa gagwe. Mma yoo le morwedi wa gagwe ba ile ba phetha ka gore ba hlankele Jehofa gomme ba kolobetšwe.

Re be re na le bagwera ka phuthegong ya makgowa. Ba be ba fela ba re laletša gore re tle re je le bona mantšiboa, eupša ba be ba re re tle ka leswiswi e le gore re se ke ra bonwa ke batho. Ka nako yeo, ditho tša mokgatlo wo o bitšwago The Ku Klux Klan (KKK), woo o kgothaletšago kgethollo le bošoro, di be di dula di ntšhitše mahlo dinameng. Bošegong bjo bongwe ge go be go ketekwa Halloween, ke ile ka bona monna yo mongwe a dutše setupung sa ntlo ya gagwe a apere diaparo tše tšhweu tša go swana le tša ma-KKK. Eupša dilo tša mohuta woo, ga se sa ka sa thibela bana babo rena gore ba re bontšhe botho. Sehleng se sengwe sa selemo, re be re hloka tšhelete ya go ya kopanong, gomme ngwanabo rena yo mongwe o ile a dumela go reka koloi ya rena ya Ford ya ngwaga wa 1950, e le gore re kgone go ya kopanong. Go ile gwa direga selo se sengwe ka morago ga kgwedi re rekišitše koloi yeo. Re kile ra re re boa tšhemong re lapile ka ge re be re šoma letšatšing leo le bego le fiša tšhiritšhiri, e bile re etšwa go badiša dithuto tša rena tša Beibele, ra bona selo se sengwe sa go makatša. Koloi ya rena e be e phakilwe pele ga ntlo yeo re bego re dula go yona! Koloing yeo, go be go na le molaetša wo o rego: “Ke le bušetša koloi ya lena e le mpho e tšwago go nna. Ngwanabo lena.”

Tiro e nngwe ya botho yeo re ilego ra e bontšhwa e ile ya nkgoma kudu. Ka 1962, ke ile ka laletšwa go ya Sekolong sa Bodiredi sa Mmušo seo se bego se swaretšwe South Lansing, kua New York. E be e le kgwedi ya leemaema yeo go bego go tlwaetšwa bana babo rena bao ba eteletšego pele diphuthego, ditikologo le dilete. Eupša ge ke hwetša taletšo yeo, ke ke sa šome e bile ke se na tšhelete. Lega go le bjalo, khamphani e nngwe ya difouno ya Pine Bluff e be e mpiditše gore ke tle ke hlahlobelwe mošomo. Ge ba be ba ka nkhira, ke be ke tla ba mothomoso wa mathomo yo a šomelago khamphani yeo. Mafelelong ba ile ba mpotša gore ba tlo nkhira. Ke be ke tlo dira’ng? Ke be ke se na tšhelete ya go ya New York. Ke ile ka nagana ka mo go tseneletšego ka taba ya go amogela mošomo woo gomme ke tlogele go ya sekolong seo. Ge e le gabotse, ge ke be ke le kgauswi le go ngwala lengwalo la go botša mokgatlo gore nka se kgone go tla sekolong seo, go ile gwa direga selo se sengwe seo nka se tsogego ke se lebetše.

Mesong ya letšatši le lengwe, kgaetšedi yo mongwe wa ka phuthegong ya rena, yoo monna wa gagwe e bego e se Hlatse ya Jehofa, o ile a kokota mojakong wa rena gomme a nnea omfolopo. E be e tletše tšhelete. Yena le bana ba gagwe ba bangwe ba be ba tsoga e sa le mesong gore ba ye mašemong go yo kga leokodi (cotton) le go tumola sekoro seo se bego se mela gare ga leokodi leo. Ba be ba dira se e le gore ba hwetše tšheletše yeo e tlago go  nthuša gore ke kgone go ya New York. Kgaetšedi yoo o itše: “Eya sekolong gomme o ithute ka mokgwa wo o ka kgonago, gomme ge o boa o tle o re rute!” Ka morago, ke ile ka kgopela khamphani yela ya difouno ge e ba nka thoma go šoma moo ka morago ga dibeke tše hlano. Ba ile ba araba ba tiišitše ba re: “Aowa!” Eupša ke be ke se na bothata le seo. Ke be ke šetše ke dirile phetho. Ke thabela gore ga sa nka ka amogela mošomo woo!

Se ke seo Gloria a se gopolago ka nako yeo re e feditšego re bula madibogo kua Pine Bluff. O re: “Ke be ke rata tšhemo ya moo! Ke be ke na le dithuto tša Beibele tše 15 go ya go tše 20. Ka gona re be re eya modirong wa ntlo le ntlo mesong gomme ka morago ga moo re swara dithuto tša Beibele letšatši ka moka, ka dinako tše dingwe go fihlela bošego ka iri ya bo-11. Tšhemo e be e le bose kudu! Ke be nka thabela go dula ke šoma moo. Go bolela nnete ke be ke sa rate go fetoša kabelo ya ka bakeng sa go tsenela modiro wa tikologo, eupša Jehofa o be a nyaka go re nea kabelo e mpsha.” Ka nnete o ile a re nea yona.

Ge re be re bula madibogo kua Pine Bluff, re ile ra tlatša fomo ya go tsenela tirelo ya bobulamadibogo bjo bo kgethegilego. Re be re holofela gore ba tla re bitša ka gobane molebeledi wa rena wa selete o be a nyaka gore re yo thuša phuthegong ya Texas, e bile o be a nyaka gore re ye moo re le babulamadibogo ba kgethegilego. Re be re thabišwa ke go tseba gore kabelo ya rena e be e tlo fetoga. Ka gona re ile ra leta ra ba ra leta, re holofetše gore Mokgatlo o tla re araba, eupša ka mehla re be re hwetša ka posong go se na le ka lengwalo. Mafelelong, lengwalo le ile la fihla—re ile ra abelwa go ba balebeledi ba basepedi! E be e le ka January 1965. Ngwanabo rena Leon Weaver, yoo ga bjale e lego molomaganyi wa Komiti ya Lekala la United States, o ile a kgethwa gore e be molebeledi wa tikologo ka nako e tee le rena.

Ke be ke tšhošwa ke go ba molebeledi wa tikologo. Ngwaga pele ga moo, James A. Thompson, Jr., yoo e bego e le molebeledi wa selete o be a ile a lebeledišiša ditshwanelego tša ka. Ka nako yeo o ile a mpontšha ka botho dilo tšeo ke bego ke swanetše go di lokiša, a bolela le dilo tšeo molebeledi yo a nago le bokgoni a swanetšego go di dira. Ka morago ga nakwana ke le modirong wa tikologo, ke ile ka lemoga gore ke be ke tloga ke hloka tayo yela a nneilego yona. Ka morago ga gore ke kgethwe, Ngwanabo rena Thompson e ile ya ba molebeledi wa mathomo wa selete yo ke ilego ka šoma le yena. Ke ile ka ithuta dilo tše dintši go ngwanabo rena yo, yoo a bego a rata Modimo e bile a botega.

Mehleng yeo, molebeledi wa tikologo o be a sa newe tlwaetšo e ntši. Ke ile ka fetša beke ke lebeletše tsela yeo molebeledi wa tikologo a dirago dilo ka yona ge a be a etetše phuthego e nngwe. Ka morago le yena o ile a fetša beke a lebeletše gore ke dira dilo bjang ge ke be ke etetše phuthegong e nngwe. O ile a mpha ditšhišinyo tšeo ke bego ke swanetše go di diriša le gona o ile a ntlhahla. Eupša ka morago ga moo re ile ra swanelwa ke go ikemela. Ke gopola ke re go Gloria: “Go re’ng a re tlogela ka pela ka tsela ye?” Eupša ge nako e dutše eya, ke ile ka lemoga selo se sengwe se bohlokwa. Ka mehla go tla  dula go na le bana babo rena ba go loka bao ba tlago go go thuša—ge feela o ba dumelela gore ba go thuše. Ke sa dutše ke leboga thušo yeo ke ilego ka e hwetša go banna ba go ba le phihlelo ba bjalo ka J. R. Brown, yoo ka nako yeo e bego e le molebeledi ba tikologo, le Fred Rusk yoo e bego e le setho sa legae la Bethele.

Mehleng yeo go be go na le kgethollo e kgolo kudu. Ka letšatši le lengwe, ditho tša mokgatlo wa KKK di ile tša gwanta toropong yeo re bego re e etetše kua Tennessee. Ke gopola ka nako e nngwe ge sehlopha sa rena sa tirelo ya tšhemo se be se khutšanyana lebenkeleng la go rekiša dijo, ka re ke le tseleng ya go ya ntlwaneng ya banna, ka lemoga gore monna yo mongwe o ntšhetše morago. Monna yoo o be a galefile, e bile a na le di-tatoo tša go bontšha kgethollo. Eupša ngwanabo rena yo mongwe wa lekgowa yoo e bego e le senatla e bile a feta nna le monna yoo ka mmele, o ile a re šala morago. O ile a mpotšiša gore: “Ngwanešo Herd, na dilo ka moka di sepela gabotse?” Monna yoo o ile a sepela kapejana le pele a šomiša ntlwana. Mengwageng ka moka, ke ile ka bona gore kgethollo ga e tlišwe ke gore mmala wa motho o bjang, eupša ke lemogile gore e tlišwa ke sebe—sebe seo ka moka ga rena re se tšerego go Adama. Le gona ke ile ka lemoga gore ngwaneno ke ngwaneno, go sa šetšwe gore o na le mmala o mo bjang, le gona a ka go hwela ge e ba go hlokagala.

Ke feditše mengwaga e 12 ke le molebeledi wa tikologo, gomme e 21 ka e fetša ke le molebeledi wa selete. Mengwaga yeo ka moka ke be ke sepela le mosadi wa ka gomme e be e le e thabišago e bile e tletše ka ditšhegofatšo le diphihlelo tšeo di kgothatšago. Eupša go be go na le moputso o mongwe woo o bego o le tseleng. Ka August 1997, toro yela ya rena yeo e bego e le kgale re e letile e ile ya phethegala. Re ile ra laletšwa go yo hlankela Bethele ya United States—mengwaga e 38 ka morago ga ge re be re dirile kgopelo. Kgweding e latetšego, re ile ra thoma tirelo ya rena ya Bethele. Ke be ke nagana gore bana babo rena bao ba bego ba na le maikarabelo ba be ba nyaka feela ke ba thuša ka nakwana, eupša seo ga se seo se diragetšego.

Ke ile ka abelwa go yo šoma Lefapheng la Tirelo. Ke ithutile dilo tše dintši lefapheng leo. Bana babo rena bao ba šomago moo ba amogela dipotšišo tše dintši tše thata tšeo di tšwago go sehlopha sa bagolo le balebeledi ba tikologo nageng ka moka. Ke leboga tsela yeo bana babo rena ba bego ba sa mphelele pelo le go nthuša ge ke be ke sa tlwaetšwa. Ge ke be nka abelwa go yo šoma moo gape, ke be ke sa dutše nka ithuta dilo tše dintši go bana babo rena bao.

Nna le Gloria re rata bophelo bja Bethele. Ka mehla re be re dutše re tsoga mesong kudu, gomme mokgwa wo o thuša kudu ge o le Bethele. Ka morago ga ngwaga goba go feta moo, ke ile ka thoma go šoma ke le mothuši Komiting ya Tirelo ya Sehlopha se Bušago sa Dihlatse tša Jehofa. Ke moka ka 1999, ke ile ka kgethwa go ba setho sa Sehlopha se Bušago. Ke ithutile dilo tše dintši kabelong ye. Eupša selo se bohlokwa kudu seo ke ithutilego sona ke gore hlogo ya phuthego ya Bokriste ke Jesu Kriste, e sego motho le ge e ka ba ofe.

Ge ke nagana ka bophelo bja ka, ka dinako tše dingwe ke ikwa go swana le moporofeta Amose. Jehofa o ile a bona modiši yoo wa go ikokobetša yo a bego a šoma mošomo wo e sego wa maemo wa go hlaba mago a mesikamore, e lego dijo tšeo di bego di jewa ke badiidi feela. Modimo o ile a kgetha Amose gore e be moporofeta, gomme a mo putsa kudu kabelong yeo. (Amose 7:14, 15) Ka mo go swanago, le nna Jehofa o ile a mpona, nna morwa wa radipolasa wa go diila wa kua Liberty, Indiana. Jehofa o ile a nnea ditšhegofatšo tše dintši kudu, moo e bile ke palelwago le ke go di bala! (Die. 10:22) Ke nagana gore ke be ke le modiidi mathomong, eupša mafelelo ke a mabotse kudu ka gore ke humile moyeng, go feta ka mokgwa wo nka naganago ka gona!