СКЪОЛАЙ рӕстӕгути, зӕгъӕн ес, ӕма мӕ царди неци ӕййивта. Фиццаг къласӕй фӕстаг къласмӕ еци еу сувӕллӕнтти хӕццӕ фӕййахур кодтон. Минкъий горӕти ке цардан, уомӕ гӕсгӕ еугурӕйдӕр кӕрӕдзей хуарз зудтонцӕ.

Нӕ горӕти алливарс минкъий фермитӕ адтӕй ӕма си адӕн нантихуар аразтонцӕ. Ку райгурдтӕн, уӕд мӕ фидӕ еу уӕхӕн ферми куста ӕма ӕз дӕр уой фӕрци берӕ цӕбӕлдӕрти исахур дӕн, зӕгъӕн, тракторбӕл цӕун.

Ку райгурдтӕн, уӕд мӕ фидӕ ӕригон нӕбал адтӕй, цудӕй ибӕл 56 анзи, мӕ мадӕбӕл ба – 35. Фал ма мӕ фидӕ федӕрттӕ ӕма хъаурӕгин лӕг адтӕй. Удта хъӕбӕр косагӕ адтӕй ӕма мах дӕр уобӕл ахур кодта. Берӕ ӕхца нӕмӕ некӕд хаудтӕй, фал кӕми цӕрӕн, ци бахуӕрӕн ӕма нӕ уӕле ци искӕнӕн, е ба нин алкӕддӕр адтӕй. Удта нӕ фидӕ махӕн дӕр рӕстӕг иссеридӕ. Ку рамардӕй, уӕд ибӕл цудӕй 93 анзи, мӕ мадӕ ба 86 анзи фӕццардӕй. Йеговӕн си неке лӕггадӕ кодта. Ӕрмӕстдӕр ме ’нсувӕртӕй еу иссӕй Ӕвдесӕн ӕма 1972 анзи хестӕр нӕлгоймӕгти советтӕ ку фӕззиндтӕнцӕ, уӕдӕй нурмӕ хестӕр нӕлгоймагӕй лӕггадӕ кӕнуй.

Мӕ мадӕ Хуцаубӕл ӕууӕндӕг силгоймаг адтӕй. Алли хуцаубон дӕр нӕ баптистити аргъауӕнмӕ хонидӕ. Троици ахурадӕ фиццаг хатт фегъустон 12 анзи мӕбӕл ку цудӕй, уӕд. Гъуди ’й кӕнун, уой туххӕй мӕ мади куд фарстон: «Киристе еци еу рӕстӕг фидӕ дӕр ӕма фурт дӕр куд ӕй?» Е ба мин уотӕ: «Уомӕн базонӕн нӕййес, мӕ биццеу! Мах бон ӕй балӕдӕрун нӕй». Ӕма раст загъта, ӕцӕгӕйдӕр ин балӕдӕрӕн нӕййес. Фал уӕддӕр 14-анздзудӕй донаргъуд райстон,  нӕ хӕдзари рӕзти ка цудӕй, еци цӕугӕдони. Ӕртеуон хуцауи номбӕл мӕ дони ӕртӕ хатти ранихъулдтонцӕ.

Хестӕр кълӕсти мин адтӕй, боксмӕ ка цудӕй, уӕхӕн ӕмбал, ӕма мӕнӕн дӕр дзурдта, цӕмӕй мӕхе еци спорти бавзурстайнӕ. Гъема ӕз дӕр райдӕдтон тренировкитӕ кӕнун, уой фӕсте ба бацудтӕн, «Сугъзӕрийнӕ къохӕрходтӕ» ке худтонцӕ, еци клубмӕ. Еу цалдӕр надей фӕсте исбӕрӕг ӕй, еци спорт мӕнбӕл конд ке н’ адтӕй, е, ӕма ’й ниууагътон. Фӕстӕдӕр ба мӕмӕ ӕфсадмӕ фӕдздзурдтонцӕ ӕма мӕ Германимӕ рарвистонцӕ. Ӕфсади хецауадӕ уотӕ гъуди кодтонцӕ, ӕма разамунд дӕттунмӕ хуарз исарӕхсдзӕн ӕма мӕ ӕфсӕддон академимӕ ахур кӕнунмӕ рарвистонцӕ. Уотӕ сӕ фӕндадтӕй, цӕмӕй ми ӕфсӕддон лӕг рауадайдӕ, фал мӕхе ба нӕ фӕндадтӕй, ӕма дууӕ анзей фӕсте 1956 анзи нӕхемӕ раздахтӕн. Фал фӕстӕдӕр ба бацудтӕн ӕндӕрхузи ӕфсадмӕ.

Рӕстдзийнадӕ ку нӕма базудтон, уӕд мӕмӕ уотӕ кастӕй, ӕма ӕцӕг лӕг гъӕуама уа, киноти ке февдесунцӕ, уӕхӕн, ӕма ӕз дӕр мӕхецӕй уӕхӕн лӕг уайун кодтон. Уотӕ мӕмӕ кастӕй, ӕма адӕнӕн Хуцауи туххӕй дзорун лӕги бӕрӕггӕнӕн нӕй. Фал фӕстӕдӕр мӕ гъуди цӕхгӕрмӕ раййивтон. Еухатт нӕ горӕти мӕ сурх кабриолетбӕл цудтӕн ӕма мӕ дууӕ кизги бауорӕдтонцӕ. Етӕ разиндтӕнцӕ мӕ сиахси кӕстӕр хуӕртӕ – Йегови Ӕвдесӕнтӕ. Еци кизгуттӕ мин раздӕр дӕр журналтӕ раттиуонцӕ, фал сӕ некӕд кастӕн, уомӕн ӕма мӕмӕ зинлӕдӕрӕн кастӕнцӕ. Аци хатт ба мӕ, сӕ хӕдзари ка цудӕй, еци минкъий фӕмбӕлдмӕ худтонцӕ. Ӕз дӕр син загътон, ӕрбацӕудзӕн, зӕгъгӕ. Етӕ ба мӕ рафарстонцӕ, нӕ сайис, зӕгъгӕ. Ӕма син загътон: «Нӕ сайун».

Уой фӕсте ма ибӕл бӕргӕ рафӕсмон кодтон, фал мин ӕндӕр гӕнӕн нӕбал адтӕй. Гъема изӕрӕй еци фембӕлдмӕ ӕрбацудтӕн. Тӕккӕ хъӕбӕрдӕр си сувӕллӕнттӕбӕл дес кодтон. Библи куд хуарз зудтонцӕ, е мӕмӕ хъӕбӕр дессаг фӕккастӕй. Ӕз дӕр ма си уойбӕрцӕ нӕ зудтон, кӕд мӕ мади хӕццӕ уал анзи аргъауӕнмӕ фӕццудтӕн, уӕддӕр. Гъема мӕн дӕр бафӕндадтӕй Библи ахур кӕнун. Фиццаг ци базудтон, е адтӕй, Хуцауи ном Йеговӕ ке ӕй, е. Гъуди ма ’й кӕнун, Йегови Ӕвдесӕнтӕ ка ’нцӕ, уой туххӕй мӕ мади ку фарстон, уӕд мин ци загъта, уой: «Магъа, Йеговӕ ке хонунцӕ, уӕхӕн цидӕр зӕронд лӕгӕн ковунцӕ». Фал нур ба мӕ цӕститӕ райгон ӕнцӕ!

Ба ’й лӕдӕрдтӕн, рӕстдзийнадӕ ке иссирдтон, уой ӕма Хуцауи гъуддаги къахдзӕфтӕ кӕнун тагъд райдӕдтон. Фиццаг хатт ӕмбурдмӕ ку ’рбацудтӕн, уобӕл фараст мӕйи рацудӕй ӕма 1957 анзи мартъий донаргъуд райстон. Цардмӕ бустӕги ӕндӕрхузи цӕстӕй кӕсун райдӕдтон. Ӕцӕг лӕгдзийнади туххӕй Библи ци зӕгъуй, уой ке базудтон, е мин хъӕбӕр ӕхцӕуӕн адтӕй. Киристе алцӕмӕйдӕр ӕнхӕст лӕг адтӕй, федар ӕма хъаурӕгин. Ӕ лӕгдзийнадӕй ӕй неке баййафтайдӕ, фал нӕмгӕ неке хӕццӕ кодта. Библи куд зӕгъуй, уомӕ гӕсгӕ е «ӕхе равардта, цӕмӕй фӕгъгъезӕмарӕ кодтайдӕ» (Ис. 53:2, 7). Ба ’й лӕдӕрдтӕн, Киристей ӕцӕг фӕдбӕлдзӕуӕг «алке хӕццӕ дӕр... фӕлмӕн» ке гъӕуама уа (2 Тим. 2:24).

1958 анзи райдӕдтон пионерӕй лӕггадӕ кӕнун. Фал мӕ еци лӕггадӕ рӕстӕгмӕ фӕууадзун багъудӕй. Цӕмӕн? Уомӕн ӕма исфӕндӕ кодтон бийнонтӕ искӕнун. Цардӕмбалӕн ке равзурстон, е адтӕй Глорийӕ – ӕмбурдмӕ мӕ ка ӕрбахудта, еци хуӕртӕй сӕ еу. Глорий ке равзурстон, уобӕл еунӕг хатт дӕр нӕ рафӕсмон кодтон. Нур дӕр ма мин цийфӕнди  бриллиантӕй дӕр рӕсугъддӕр ӕй. Ӕма мӕ цардӕмбал ке ӕй, уой туххӕй хъӕбӕр амондгун дӕн! Е дӕр ӕхе туххӕй цубуртӕй радзордзӕй:

«Нӕ бийнонти 17 сувӕллони адтан. Мӕ мадӕ Йеговӕн еузӕрдонӕй лӕггадӕ кодта. Ку рамардӕй, уӕд мӕбӕл цудӕй 14 анзи. Мӕ фидӕ гъе уӕд райдӕдта Библи ахур кӕнун. Нӕ мади мӕлӕти фӕсте нӕ фидӕ скъолай директори хӕццӕ бадзубанди кодта, цӕмӕй ӕз ӕма мӕ хестӕр хуӕрӕ скъоламӕ кезугай цудайанӕ. Мӕ хуӕрӕ уӕд хестӕр кълӕсти ахур кодта. Гъема цалинмӕ нӕ еу скъолай уидӕ, уӕдмӕ иннӕ ба хӕдзари кӕстӕр хуӕртӕ ӕма ӕнсувӕртӕмӕ кастӕй, удта нӕ фиди ӕрбацудмӕ хуӕруйнаг искӕнидӕ. Уотӕ адтӕй цалинмӕ мӕ хуӕрӕ скъола нӕ фӕцӕй, уӕдмӕ. Нӕ хӕццӕ Библи ахур кодтонцӕ Йегови Ӕвдесӕнтӕй дууӕ бийнонти. Гъема ни 17 сувӕллонемӕй 11 райдӕдтонцӕ Йеговӕн лӕггадӕ кӕнун. Игъосун кӕнун мӕ зӕрдӕмӕ хъӕбӕр цудӕй, фал ӕфсӕрмигӕнагӕ ке адтӕн, уой туххӕй мин ӕнцон н’ адтӕй. Еци гъуддаги мин Сэм алкӕддӕр хъӕбӕр ӕнхус кодта».

Глорий хӕццӕ нӕ цард байеу кодтан 1959 анзи феврали. Нӕ дууей зӕрдӕмӕ дӕр цудӕй пионертӕй лӕггадӕ кӕнун. Июли ба Вефили лӕггадӕ кӕнунмӕ курдиадӕ балӕвардтан. Хъӕбӕр нӕ фӕндадтӕй Ӕгасдуйнеуон сӕйраг хайади лӕггадӕ кӕнун. Нӕ хӕццӕ дзубанди кодта ӕнсувӕр Саймон Крейкер ӕма нин балӕдӕрун кодта, нур, дан, Вефилмӕ бийнонти нӕ хонунцӕ. Раст зӕгъгӕй нӕ уӕддӕр фӕндадтӕй Вефили лӕггадӕ кӕнун, фал нӕ фӕндӕ берӕ ӕнзтӕ фӕстӕдӕр исӕнхӕст ӕй.

Уой фӕсте Сӕйраг хайадӕмӕ ниффинстан, цӕмӕй нӕ рарвистайуонцӕ, игъосунгӕнгутӕ кӕми нӕ фагӕ кодта, уӕхӕн бунатмӕ. Ӕма нӕмӕ фӕстӕмӕ ци финстӕг ӕрбарвистонцӕ, уоми ӕрмӕстдӕр еунӕг горӕт адтӕй – Пайн-Блафф (штат Арканзас). Уӕди рӕстӕги еци горӕти ӕрмӕстдӕр дууӕ ӕмбурди адтӕй, еу уорсцъарӕ хуӕртӕ ӕма ӕнсувӕртӕн, иннӕ ба сауцъарӕ. Мах иснисан кодтонцӕ сауцъарӕ хуӕртӕ ӕма ӕнсувӕрти ӕмбурдмӕ. Ӕдеугурӕй си 14 адӕймаги адтӕй.

Ӕвӕдзи уӕмӕ дессаг кӕсуй, Йегови Ӕвдесӕнти ӕмбурд уотӕ дехгонд цӕмӕн адтӕй, е. Уомӕн ӕма нин ӕндӕр гӕнӕн дӕр н’ адтӕй. Уӕди рӕстӕги закъӕнттӕмӕ гӕсгӕ уорсцъарӕ ӕма сауцъарӕ адӕнӕн еумӕ ӕмбурд кӕнуни барӕ нӕ лӕвардтонцӕ. Еци закъони сӕрти ка рахезидӕ, уой ба хъӕбӕр ӕнӕхатирӕй бафхуӕриуонцӕ. Берӕ рауӕнти ӕнсувӕртӕ тӕрсгӕ кодтонцӕ, сӕ залти уорсцъарӕ ӕма сауцъарӕ Ӕвдесӕнтӕ ку ӕмбурд кӕнонцӕ, уӕд син сӕ зал ке ниппурхӕ кӕндзӕнцӕ, уомӕй. Ӕма хатгай уотӕ дӕр рауайидӕ. Сауцъарӕ Ӕвдесӕнтӕ, уорсцъарӕ адӕн кӕми цӕрдӕй, уоми ку игъосун кӕниуонцӕ, уӕд сӕ ахӕсгӕ дӕр никкӕниуонцӕ, еуӕй-еухатт ба нӕмгӕ дӕр. Уомӕ гӕсгӕ, цӕмӕй игъосун кӕнуни гъуддаг ма ӕрлӕудтайдӕ, уой туххӕй мах дӕр еци закъӕнттӕмӕ игъустан ӕма ӕнгъӕлмӕ кастӕн, уавӕр кӕд фӕххуӕздӕр уодзӕй, уомӕ.

Игъосун кӕнун дӕр нин ӕнцон кӕцӕй адтӕй. Еуӕй-еухатт, сауцъарӕ адӕн кӕми цардӕнцӕ, уоми игъосун кӕнгӕй нӕмӕ уорсцъарӕ бийнонтӕ ракӕсиуонцӕ. Ӕма тагъд-тагъдӕй багъӕуидӕ, ци син зӕгъдзиан, уобӕл расагъӕс кӕнун ӕма цубуртӕй ести радзорун кенӕ ба зӕгъун, хӕдзарӕ ке рахӕлӕмулӕ кодтан ӕма рандӕ ун. Уӕди рӕстӕги нӕ уавӕр уотӕ адтӕй.

Цӕмӕй пионертӕй лӕггадӕ кӕнун нӕ бон адтайдӕ, уой туххӕй нӕ косун дӕр куд нӕ гъудӕй. Ци куститӕ нин адтӕй, уоми нин фулдӕр хӕттити бонмӕ ӕрмӕстдӕр ӕртӕ доллӕри фистонцӕ. Глорийӕ хӕдзӕрттӕ ӕфснайӕгӕй куста. Ӕма мин еци хӕдзӕрттӕй еуеми Глорийӕн ӕнхус кӕнунмӕ барӕ равардтонцӕ, цӕмӕй тагъддӕр исуӕгъдӕ адтайдӕ. Еци хӕдзари нин рӕфтад искӕнунмӕ хуӕруйнаг дӕр раттиуонцӕ. Еци хуӕруйнаг салд уидӕ ӕма ’й Глорий хӕццӕ багъар кӕнианӕ ӕма ’й нӕ дууебӕл радех кӕнианӕ. Уомӕй уӕлдай ма алли къуӕре дӕр Глорийӕ еу хӕдзари туй ӕвардта, ӕз ба ӕндегӕй къӕрӕзтӕ ӕхснадтон, удта ма ӕндӕр куститӕ дӕр кодтон. Удта ма еу уорсцъарӕ бийнонти хӕдзари дӕр къӕрӕзтӕ ӕхснадтан, Глорийӕ медӕггаг фарсӕй, ӕз ба ӕндаг. Еци кустбӕл нин ӕгас бон рандӕ уидӕ, ӕма нин уомӕ гӕсгӕ еци хӕдзари дӕр бахуӕрун кӕниуонцӕ. Глорийӕ медӕгӕй хуӕридӕ, ӕрмӕст бийнонти хӕццӕ нӕ, фал хецӕнӕй, ӕз ба гаражи. Фал мӕ зӕрдӕмӕ алцидӕр цудӕй. Хуӕруйнаг адгин адтӕй, удта кӕмӕ кустан, етӕ дӕр лӕгъуз бийнонтӕ н’ адтӕнцӕ, фал уонӕбӕл дӕр сӕ алливарс, еци адӕни зундахаст бӕрӕг кодта. Еухатт заправки рази ӕрлӕудтӕн, Глорий ба иуазӕгдонӕмӕ  гъудӕй ӕма косӕги бафарстон, зӕгъун, уин уӕ иуазӕгдонӕмӕ бауайун ӕнгъезуй. Ӕма мин е ба еци мӕстгунӕй загъта: «Ӕхгӕд ӕй».

Иннердиги ба не ’нсувӕрти хӕццӕ еу бийнонти хузӕн цардан, удта нӕ лӕггадӕ дӕр нӕ зӕрдӕмӕ хъӕбӕр цудӕй. Пайн-Блафмӕ фиццаг хатт ку ’рбахъӕрдтан, уӕд, еци рӕстӕги ӕмбурди лӕггадгӕнӕг ка хундтӕй, еци ӕнсувӕрмӕ ӕрлӕудтан. Ӕ бийнойнаг Ӕвдесӕн н’ адтӕй, ӕма Глорийӕ ӕ хӕццӕ Библи ахур кӕнун райдӕдта. Ӕз ба син сӕ сиахси ӕма сӕ кизги хӕццӕ ахур кодтон. Рӕстӕг ку рацудӕй, уӕд мадӕ ма кизгӕ исфӕндӕ кодтонцӕ Йеговӕн лӕггадӕ кӕнун ӕма донаргъуд райстонцӕ.

Уорсцъарӕ хуӕртӕ ӕма ӕнсувӕрти ӕмбурди дӕр нин ӕмбӕлттӕ фӕззиндтӕй. Иуазӕгуати нӕ арӕх худтонцӕ. Ӕрмӕст нӕ цӕмӕй маке фӕууидтайдӕ, уой туххӕй сӕмӕ талинги ӕрбацӕуианӕ. Еци рӕстӕги расизм ӕма фудгъуддӕгти сӕрбӕл ка тох кодта, уӕхӕн организаци устурдӕрӕй-устурдӕр кодта. Хундтӕй ку-клукс-клан. Еухатт еу лӕги сӕ хӕдзари къӕсӕрбӕл бадгӕй рауидтон. Ӕ уӕле адтӕй, ку-клукс-клани адӕн ке дардтонцӕ, уӕхӕн уорс дарӕс, ӕма сӕ рӕзти ка рацӕуидӕ, уонӕмӕ еци сӕрбӕрзонд каст кодта. Фал не ’нсувӕртӕ уӕхӕн цӕмӕйдӕрти идард адтӕнцӕ ӕма алкӕмӕдӕр хӕларзӕрдӕ адтӕнцӕ. Еу сӕрдӕ Глорий хӕццӕ исфӕндӕ кодтан конгресмӕ рандӕ ун, фал нӕмӕ ӕхца н’ адтӕй. Ӕма еу ӕнсувӕрӕн рауӕйӕ кодтан нӕ машинӕ – 1950 анзи уагъд «Форд». Уобӕл мӕйӕ рацудӕй, ӕма еу изӕр хӕдзарӕмӕ хъӕбӕр фӕлладӕй ӕрбацудан, уомӕн ӕма ӕгас бон еци хори тӕппи хӕдзарӕй-хӕдзарӕмӕ игъосун кодтан, удта Библий ахуртӕ уагътан. Гъема дин нӕ машинӕ нӕ рази лӕугӕ ку не ’рбаййафианӕ, ӕ раззаг авгӕбӕл ба минкъий финстӕг: «Уӕ хуарзӕнхӕй, уӕ машинӕ райсетӕ. Е уин лӕвар мӕнӕй. Уе ’нсувӕр».

Иннӕ хабар ба нӕбӕл ӕрцудӕй, 1962 анзи Бӕрнон ӕнсувӕрти скъоламӕ мӕмӕ ку фӕдздзурдтонцӕ, уӕд. Еци скъола цудӕй Саут-Лансинги (штат Нью-Йорк). Уоми мӕйи дӕргъи ахур кодтонцӕ ӕмбурди лӕггадгӕнгути ӕма цӕуӕг цӕстӕдаргути. Скъоламӕ мӕмӕ ку фӕдздзурдтонцӕ, уӕд косгӕ некӕми кодтон ӕма ӕхцайӕй тухст адтан. Еци рӕстӕги мӕ гъӕуама телефони компанимӕ кустмӕ райстайуонцӕ Пайн-Блаффи. Ку мӕ райстайуонцӕ, уӕд сӕмӕ ӕз фиццаг сауцъарӕ косӕг адтайнӕ. Ӕз дӕр сагъӕсти бафтудтӕн, куд кӕнон, уой нӕ зудтон. Нью-Йоркмӕ рандӕ унмӕ мӕмӕ ӕхца н’ адтӕй, ӕма мӕ зӕрди адтӕй скъолай гъуддаг бал ниууадзун ӕма еци кустмӕ бацӕун. Гъема ӕнсувӕртӕмӕ финстӕг ниффинсунмӕ ку ’рбадтӕн, уӕд ӕрцудӕй, ка ми некӕд байронх уодзӕн, уӕхӕн хабар.

Сӕумӕраги нин кадӕр нӕ дуар ӕрбахуаста. Е адтӕй, ӕ лӕг Ӕвдесӕн кӕмӕн н’ адтӕй, еу уӕхӕн хуӕрӕ не ’мбурдӕй, ӕма мин мӕ къохи райвардта ӕхцайӕй цъоппидзаг конверт. Еци хуӕрӕ сӕумӕцъӕхӕй исистидӕ ӕма ӕ минкъий сувӕллӕнтти хӕццӕ будурмӕ бӕмпӕг зобат кӕнунмӕ рандӕ уидӕ, цӕмӕй мин Нью-Йоркмӕ нихъхъӕртуни фагӕ надихарз ӕрӕмбурд кодтайдӕ. Еци хуӕрӕ мин загъта: «Фӕццо ӕма дзӕбӕх ахур кӕнӕ, цӕмӕй уой фӕсте мах дӕр ахур кӕнай». Ӕз дӕр, кустмӕ мӕ кумӕ гъӕуама райстайуонцӕ, уоми барӕ ракурдтон, цӕмӕй фондз къуӕрей фӕсте рацудайнӕ.  Фал мин не ’сарази ’нцӕ. Раст зӕгъгӕй мин си нецибал уӕлдай адтӕй. Абони уӕнгӕ дӕр цийнӕ кӕнун, еци кустмӕ ке нӕ рацудтӕн, уобӕл!

Пайн-Блаффи куд лӕггадӕ кодтан, уой туххӕй Глорийӕ зӕгъуй: «Уоми лӕггадӕ кӕнун мӕ зӕрдӕмӕ хъӕбӕр цудӕй! Адтӕй мин си 15–20 Библий ахури. Сӕумӕй хӕдзарӕй-хӕдзарӕмӕ игъосун кӕнианӕ, уой фӕсте ба ӕнӕгъӕнӕ бон Библий ахуртӕ уагътан, сауӕнгӕ ӕхсӕвӕ 11 сахаттемӕ дӕр. Е дессаги рӕстӕг адтӕй! Ӕма мӕ ӕййевун неци фӕндадтӕй. Раст зӕгъгӕй мӕ неци уотӕ фӕндадтӕй, цӕмӕй районон кустмӕ бавналдтайанӕ. Фал Йеговӕмӕ мах туххӕй ӕндӕрхузи пълӕнттӕ адтӕй». Ӕма ӕцӕгӕйдӕр уотӕ разиндтӕй.

Пайн-Блаффи ма пионертӕй ку лӕггадӕ кодтан, уӕд курдиадӕ балӕвардтан сӕрмагонд пионертӕй лӕггадӕ кӕнунмӕ. Ӕма ӕнгъӕлмӕ кастан, тагъд рӕстӕги нӕ ке иснисан кӕндзӕнцӕ, уомӕн ӕма нӕ облӕстон цӕстӕдарӕги фӕндадтӕй, цӕмӕй Техаси ӕмбурдӕн ӕнхус кӕнӕн ӕма си сӕрмагонд пионертӕй лӕггадӕ кӕнӕн. Еци гъуди нӕ зӕрдӕмӕ хъӕбӕр цудӕй. Алли бон дӕр на почти ящикмӕ никкӕсӕ-никкӕсӕ кодтан, не ’Хсӕнадӕй нӕмӕ ести ӕрбацудӕй ӕви нӕ. Гъема нӕмӕ еу бон еци финстӕг ӕрбацудӕй. Иснисан мӕ кодтонцӕ районон цӕстӕдарӕгӕй! Е адтӕй 1965 анзи январи. Еци рӕстӕг ма районон цӕстӕдарӕгӕй иснисан кодтонцӕ ӕнсувӕр Лион Уивери дӕр. Нур еци ӕнсувӕр лӕггадӕ кӕнуй Еугонд Штатти филиали комитети координаторӕй.

Раст зӕгъгӕй, тухсгӕ дӕр кодтон. Еци хабӕрттӕй еу анз раздӕр мин мӕ анкетӕмӕ облӕстон цӕстӕдарӕг Джеймс Томпсон ӕркастӕй, ӕма мин фӕлмӕнӕй балӕдӕрун кодта, цӕбӕл ма мӕ бон ӕй байархайун, удта хуарз районон цӕстӕдарӕгмӕ цӕхуӕн менеугутӕ гъӕуама уа, уой. Гъема тагъд рӕстӕги районон цӕстӕдарӕгӕй лӕггадӕ кӕнун ку райдӕдтон, уӕд ӕй балӕдӕрдтӕн, цӕхуӕн хуарз унаффитӕ мин равардта, уой. Ку мӕ иснисан кодтонцӕ, уӕд фиццаг ци облӕстон цӕстӕдарӕги хӕццӕ лӕггадӕ кодтон, е адтӕй ӕнсувӕр Томпсон. Еци еузӕрдон ӕнсувӕрӕй берӕ цӕбӕлдӕрти исахур дӕн.

Уӕди рӕстӕги районон цӕстӕдаргути берӕ рӕстӕг нӕ ахур кодтонцӕ. Районон цӕстӕдарӕг ӕмбурд куд бӕрӕг кӕнуй, уомӕ къуӕрей дӕргъи ӕз кастӕн, иннӕ къуӕре ба е кастӕй, ӕз куд бӕрӕг кӕнун, уомӕ. Уой фӕсте мин унаффитӕ равардта, ӕма гъе уобӕл мӕ ахур фӕцӕй. Гъуди ма ’й кӕнун, Глорийӕн куд загътон: «Куд мӕ нӕ фӕндуй, цӕмӕй нур рандӕуа». Фал рӕстӕг ку рацудӕй, уӕд еу цидӕр балӕдӕрдтӕн: банхус кӕнунмӕ цӕттӕ ка ӕй, уӕхӕн хуарз ӕнсувӕртӕ алкӕддӕр дӕ фарсмӕ ӕрбалӕудзӕнцӕ, барӕ син ку раттай, уӕд. Устур ӕнхус ма мин фӕцӕнцӕ ӕндӕр фӕлтӕрдгун ӕнсувӕртӕ дӕр, зӕгъӕн, районон цӕстӕдарӕг Джеймс Браун, удта Вефили ка лӕггадӕ кодта, уӕхӕн ӕнсувӕр Фред Раск.

 Уӕди рӕстӕги расизм никки карздӕр кодта. Ӕма еу уӕхӕни бӕрӕг кодтан штат Теннессий еу горӕти ӕмбурд. Уоми ку адтан, уӕд си ку-клукс-кланти марш цудӕй. Гъуди ма ’й кӕнун, къуарӕй ку лӕггадӕ кодтан, уӕд еу кафемӕ ракомидзаг кӕнунмӕ бацудан. Уоми иуазӕгдонӕмӕ бауайунмӕ исистадтӕн, мӕ фӕсте ба ма еу уорсцъарӕ лӕг дӕр рацудӕй. Ӕ мӕстгун цӕсгонӕй ӕма ӕ бауӕрбӕл ци хузтӕ адтӕй, уонӕй ӕй балӕдӕрдтӕн, расист ке адтӕй, уой. Уӕд нӕ фӕсте еу уорсцъарӕ ӕнсувӕр дӕр бацудӕй. Е ба мӕнӕй дӕр ӕма уомӕй дӕр устурдӕр адтӕй, ӕма мӕ рафарста: «Естӕбӕл тухсис, ӕнсувӕр Хёрд?» Еци лӕг дӕр уайтагъд фендӕбилӕ ’й. Ӕнзти дӕргъи ’й уидтон, адӕн кӕрӕдземӕй се ’сӕфт Адами тӕрегъӕди фудӕй ке уинунцӕ, кадӕр уорсцъарӕ, кадӕр ба сауцъарӕ ке ӕй, уой туххӕй нӕ, фал. Ӕнсувӕр ба алкӕддӕр ӕнсувӕр ӕй, цийфӕнди адӕнихаттӕй ма уа уӕддӕр, ӕма ку багъӕуа, уӕд дӕу туххӕй ӕ цард дӕр ратдзӕй.

Цӕуӕг цӕстӕдарӕгӕй фӕллӕгадӕ кодтон 33 анзи, уонӕй 21 анзи облӕстон цӕстӕдарӕгӕй. Етӕ хъӕбӕр дессаги ӕнзтӕ адтӕнцӕ, уомӕн ӕма нӕбӕл берӕ хабӕрттӕ цудӕй, удта нӕ Йеговӕ берӕ арфӕдзийнӕдтӕй исхайгин кодта. Фал ма нӕмӕ разӕй еу ма арфӕдзийнадӕ ӕнгъӕлмӕ кастӕй. 1997 анзи августи нӕ фӕххудтонцӕ Еугонд Штатти Вефили лӕггадӕ кӕнунмӕ. Е адтӕй, фиццаг хатт курдиадӕ ку байдзаг кодтан, уобӕл 38 анзи ку рацудӕй, уӕд. Вефили лӕггадӕ кӕнун райдӕдтан сентябри. Фиццаг мӕмӕ уотӕ кастӕй, цума нӕмӕ рӕстӕгмӕ фӕдздзурдтонцӕ, фал фӕстӕдӕр куд исбӕрӕг ӕй, уомӕ гӕсгӕ уотӕ н’ адтӕй.

Фиццаг мӕ иснисан кодтонцӕ игъосун кӕнунбӕл дзуапдӕттӕг хайади. Цӕйбӕрцӕ нӕуӕг цидӕртӕ си базудтон! Ӕнсувӕртӕ си аллихузи зин фарстатӕ ӕвзарунцӕ. Еци фарстатӕ сӕмӕ ӕрбарветунцӕ ӕгас бӕсти ци хестӕр нӕлгоймӕгти советтӕ ӕма районон цӕстӕдаргутӕ ес, етӕ. Ӕнсувӕртӕй хъӕбӕр боз дӕн, фӕразонӕй мӕ ке ахур кодтонцӕ, уой туххӕй. Раст зӕгъгӕй мӕ нур фӕстӕмӕ еци хайадӕмӕ ку иснисан кодтайуонцӕ, уӕддӕр си мӕхемӕ нӕуӕг ӕма ӕвӕлтӕрд кастайнӕ.

Глорий зӕрдӕмӕ, удта мӕхе зӕрдӕмӕ дӕр Вефили цард цӕуй. Мах раги истунбӕл ӕнӕуой дӕр ахур адтан, ӕма нӕ е Вефили дӕр багъудӕй. Еу анзи фӕсте мӕ иснисан кодтонцӕ Йегови Ӕвдесӕнти Разамонӕг совети Игъосун кӕнунбӕл дзуапдӕттӕг комитети ӕнхусгӕнӕгӕй. 1999 анзи ба райдӕдтон Разамонӕг совети лӕггадӕ кӕнун. Уоми лӕггадӕ кӕнгӕй берӕ цӕбӕлдӕрти исахур дӕн, фал сӕйрагидӕр ци балӕдӕрдтӕн, е ӕй, Хуцауи адӕнӕн разамунд Киристе ке дӕттуй, цӕхуӕндӕр адӕймаг нӕ, фал.

Мӕ цардмӕ фӕстӕмӕ ку ракӕсун, уӕд мӕхемӕ пахампар Амоси хузӕн ӕркӕсун. Амос фиййау адтӕй, удта ма, кадгинбӕл нимад ка н’ адтӕй, уӕхӕн куст дӕр кодта, зилдӕй легъон бӕлӕстӕмӕ, ӕ рӕзӕ мӕгур адӕни хуӕруйнагбӕл нимад кӕмӕн адтӕй, еци бӕлӕстӕмӕ. Йеговӕ Амосӕн ӕ сӕрниллӕгдзийнади туххӕй райарфӕ кодта ӕма ’й пахампарӕй исӕвардта (Амос 7:14, 15). Йеговӕ мӕн дӕр, минкъий горӕт Либертий мӕгур зӕнхкосӕги фурти фӕууидта ӕма мин мӕ цард исгъӕздуг кодта – уойбӕрцӕ арфӕдзийнӕдтӕй мӕ исхайгин кодта, ӕма син банимайӕн дӕр нӕййес (Ӕмб. 10:22). Кӕд мӕгур бийнонти райгурдтӕн, уӕддӕр мӕ Хуцау ба, ӕнгъӕл дӕр куд н’ адтӕн, уотӕ исгъӕздуг кодта!