TIYAKORQANI chay llajtita juchʼuylla kasqanrayku, tukuy rejsinakoj kayku. Escuelapipis compañerosniywan sumajta rejsinakoj kayku. Imajtinchus bachillerkama compañeros karqayku.

Llajtitaypeqa sarata astawan tarpoj kanku. Uñitallaraj kashajtiy, tatayqa uj patronpaj trabajaj. Jovencitoña kashaspataj, tractorta manejayta yachakorqani, waj chajra ruwanastawan.

Nacekunaypajqa tatay 56 watasniyojña karqa, mamaytaj 35 watasniyoj. Tatayqa kallpasapa karqa, nitaj onqollajchu. Tataymanqa campopi trabajay mayta gustaj. Noqaykumanpis yachachiwarqayku mana qhellas kanaykuta. Tatayqa pisi qolqellata ganaspapis mikhunata, ropatawan mana faltachiwajchu kayku, wasipis kapuwarqaykupuni. Chantapis tatayqa noqaykuwan parlarejpuni. Tatayqa 93 watasniyoj wañuporqa, mamaytaj 86 watasniyoj. Paykunaqa mana Jehová Diosta rejserqankuchu. Chaywanpis ujnin hermanoy 1972 watamantapacha anciano jina Jehová Diosta sirverqa.

Mamayqa bautista iglesiaman rej. Sapa domingotaj chay iglesiaman pusawaj kayku. 12 watasniyoj kashajtiytaj Trinidad yachachiymanta por primera vez uyarerqani. Chayrayku mamayman nerqani: “¿Imaynatataj Jesús, Wawataj Tatataj kanmanri?”, nispa. Paytaj niwarqa: “Wawáy, chayta ni pi yachanchu. Nitaj entiendenanchejpunichu tiyan”, nispa. Nipunitaj entienderqanichu. Mana entiendespapis, 14 watasniyoj kashaspa uj mayupi bautizakorqani. Kinsa kutita yakuman pʼultiykuwarqanku, Tataj sutinpi, Wawaj sutinpi, espíritu santoj sutinpi ima nispa.

Colegiopi kashajteyqa ujnin amigoy boxeador karqa. Paytaj niwarqa: “Qanpis boxeador kawaj”, nispa. Chayrayku entrenayta qallarerqani. Chantá boxeanaypaj uj grupoman yaykorqani. Chaywanpis boxeopi maqanakuspa mana atipayta atillajchu kani. Chayrayku chay grupomanta llojsiporqani. Pisi tiemponmantaj, Estados Unidosmanta autoridades cuartelman wajyachiwaspa, Alemaniaman kachawarqanku. Alemaniapi kashajtiytaj, generalesqa colegio militarman kachawarqanku. Imajtinchus yuyarqanku soldadosta sumajta kamachinayta. Chaywanpis mana ejercitopi kayta munarqanichu. Chayrayku 1956 watapi, cuartelta tukuytawan riporqani. Tiemponmantaj Jehová Diosmanta yachakuyta qallarerqani.

Niraj Bibliamanta yachakushaspaqa, yuyaj kani qharisqa respetachikunanku kasqanta. Ajinata yuyaj kani peliculasta qhawasqayrayku, sajra runaspa chaupinpi tiyakusqayraykutaj. Yuyajtaj kani Bibliamanta parlajkuna mana qharisituschu kasqankuta. Uj kuti, puka autoyta may maylla manejashajtiy, iskay jovencitas saludarispa sayachiwarqanku. Paykunaqa Jehovaj testigosnin karqanku, cuñadoypa hermanitasnintaj. Paykunaqa aswan ñaupajta Torremanta Qhawaj revistata, ¡Rijchʼariy! revistatawan jaywariwarqankuña. Noqataj yuyaj kani Torremanta Qhawaj revista, mana entiendey atina kasqanta. Chay jovencitasqa uj tantakuyman invitawarqanku. Chay tantakuytaj wasinkupi apakoj, chaypitaj Bibliata estudiaj kanku, comentajtaj kanku. Chay jovencitasmanqa nerqani: “Ichá jamusaj”, nispa. Paykunataj niwarqanku: “¿Jamunkipunichu?”, nispa. Noqataj nerqani: “Jamusajpuni”, nispa.

Chantá nikorqani: “Imapajtaj jamusaj nerqaniri”, nispa. Jinapis nisqayta juntʼanayrayku chay tantakuyman rerqani. Chay tantakuypitaj wawas maytapuni tʼukuchiwarqanku. Chay wawasqa, Bibliamanta sumajta yacharqanku. Noqataj paykunamanta nisqaqa ni imata yacharqanichu, mamay wawa kashajtiy sapa domingo iglesiaman pusawajtinpis. Chayrayku Bibliamanta yachakuyta munarqani. Jinamantataj estudiachiwarqanku, Diospa sutin Jehová kasqantataj yachakorqani. Pasaj wataspi mamayta Jehovaj testigosninmanta tapojtiy, pay niwaj: “Paykunaqa Jehová sutiyoj awelitota yupaychanku”, nispa. Chaywanpis Bibliamanta yachakuspa, entienderqani pipunichus Jehová Dios kasqanta.

Primera vez tantakuyman risqaymanta, jisqʼon killasninman bautizakorqani, marzo de 1957 watapi. Bautizakunaypajqa kausayniyta cambiarqani. Niñataj yuyarqanichu qharisqa respetachikunankupuni kasqanta. Astawanpis yachakorqani Jesús jina kʼacha kanay kasqanta. Jesusqa mana pantaj runachu karqa. Manchay kallpayoj kaspapis, ni piwan maqanakojchu qharisitu creekusqanrayku.  Astawanpis uj profecía nisqanman jina, “maqasqa, ñakʼarichisqataj” kaspaqa, mana kutichikojchu (Isa. 53:2, 7). Ajinamanta yachakorqani Jesuspa yachachisqan kanaypajqa, “tukuywan kʼacha” kanay kasqanta (2 Tim. 2:24).

Kay 1958 watapitaj precursor jina llankʼayta qallarerqani. Chaywanpis uj tiempota saqeporqani, Gloriawan casarakunayrayku. Gloriaqa por primera vez tantakuyman wajyariwarqanku chay iskay jovencitasmanta ujnin karqa. Gloriawan casarakusqaymanta ni imarayku pesachikunichu. Payqa diamante nisqa lliphipej rumimantapis aswan kʼachitapuni. Kunanqa Gloria kausayninmanta willariwasun:

“Noqaqa 16 hermanosniyoj kani. Mamayqa Jehovaj testigon karqa, 14 watasniyoj kashajtiytaj wañuporqa. Tataytaj mamay wañupusqantawanraj Bibliata estudiayta qallarerqa. Mamay wañupusqantawan kuraj hermanaywan hermanitosniykuta qhawanayku karqa. Tatayqa colegiomanta directorwan parlarimorqa, kuraj hermanaywan noqawan colegioman turnakuspa rinaykupaj. Directortaj de acuerdo kasharqa. Hermanay colegioman rinankamaqa, noqa hermanitosniykuta qhawaj kani, waykʼojtaj kani, qʼayantintaj hermanayñataj chayta ruwaj. Tatay trabajonmanta wasiman chayamunanpajqa mikhunata qʼoñi qʼoñisituta suyachej kayku. Chaytaqa ruwaj kayku hermanay bachiller llojsinankama. Noqaykutaqa iskay qhariwarmis Bibliata estudiachiwarqayku. Chunka hermanosniywan noqawan Jehovaj testigosninman tukorqayku. Predicayqa mayta gustawaj, runasta manchachikojtiypis. Qosaytaj mayta yanapawarqa mana manchachikuspa predicanaypaj”.

Gloriawanqa febrero de 1959 watapi casarakorqani. Paywanqa precursores jina kusisqa llankʼaj kayku. Casarakusqaykumanta phishqa killasninmanqa, Betel wasipi trabajanaykupaj uj solicitudta juntʼacherqayku. Maytapuni Betelman riyta munarqayku. Betelpi trabajaj Simon Kraker hermanotaj, niwarqayku Betelman casadosta mana wajyashasqankuta. Ajinapis Betel wasipi trabajanaykupaj wajyarinawaykuta suyakullarqaykupuni.

Chaykamataj Betelman uj cartata apacherqayku, maypichus pisi hermanoslla kanku chayman kachanawaykupaj. Betelmanta hermanostaj Pine Bluff nisqa llajtitaman rinaykuta niwarqayku. Chay tiempopeqa, chay llajtitapi iskay congregacioneslla karqa. Uj congregacionpeqa gringuitos karqanku, ujninpitaj negritos karqanku. Noqaykutataj negritospa congregacionninman kachawarqayku, chaypeqa 14 publicadoreslla karqanku.

Jaqay tiempopeqa autoridades uj leyta orqhorqanku, gringuituswan negrituswan separasqas tiyakunankupaj. Negritosta mayta maqaj kanku. Chayrayku wakin hermanosqa manchachikoj kanku runas Tantakuna Wasita thuñirpanankuta, negrituswan gringuituswan ujllapi tantakojtinku. Chantapis policiasqa negritusta maqaspa presochaj kanku gringuituspa barrionkupi predicajta taripaspa. Chayrayku predicanallaykupajpuneqa, chay leyta kasukoj kayku. Maytataj suyaj kayku chay ley anulakunanta.

Negritospa barrionkupi predicashaspaqa, gringuituswan tinkoj kayku. Chay kutispeqa chay rato yuyaychakunayku karqa, Bibliamanta parlarinaykutachus chayri ripunallaykutachus. Chay tiempopi predicayqa mana facilchu karqa.

Necesitasqaykupajpis trabajaj kayku, ajinamanta precursoresllapuni kanaykupaj. Wakin trabajospeqa, kinsa dolaresllata pagawaj kayku. Señorayqa wasista llimphuchaspa trabajaj. Ujnin wasipeqa señorayta yanapaj kani, khuskan diallapitaj tukoj kayku. Dueñotaj almuerzota qoriwaj kayku. Waj wasipitaj señorayqa trabajaj ropata planchaspa, noqataj jardinta allinchaspa, ventanasta mayllaspa, waj imasta ruwaspataj. Waj wasipitajrí gringuituspa ventanankuta mayllaj kayku, señorayqa ukhumanta mayllamoj, noqataj jawamanta. Chay wasipeqa diantinta trabajaj kayku. Chayrayku dueñosqa miskʼi almuerzota qowaj kayku. Señoraytaqa wasi ukhupi almuerzachej kanku, noqatataj garajepi. Ajinata almuerzachiwajtiykupis, mana sientekojchu kani. Chay gringuito familiaqa kʼacha karqa. Paykunaqa sajra runaspa yuyayninkuwan chimpaykuchikusqankuraykulla negritusta chejnikuwaj kayku. Uj kuteqa,  surtidorpi gasolinata cargaykuytawan, gringuito encargadoman nerqani: “Señoray bañoykiman yaykurinmanchu”, nispa. Paytaj phiñasqa niwarqa: “Chʼatasqa kashan”, nispa.

Chejninakuy chaupipi tiyakojtiykupis, hermanoswan sumajta kausakorqayku. Predicacionpis mayta gustawaj kayku. Pine Bluff llajtitapeqa uj ancianoj wasinpi tiyakorqayku. Chay ancianoj señoranqa mana Jehovaj testigonchu karqa. Señoraytaj paywan Bibliata estudiayta qallarerqa. Noqataj chay ancianoj wawanwan, tolqanwan ima Bibliata estudiayta qallarerqani. Chay ancianoj señoranwan wawanwanqa bautizakorqanku.

Gringuito hermanospis amigosniyku karqanku. Chay gringuito hermanosqa wasinkuman wajyarikuwaj kayku. Chaywanpis chʼisisnillan rej kayku, ni pi rikunawaykupaj. Imajtinchus chay tiempopi, uj pandilla karqa, pikunachus negritusta wañuchej kanku, maqaj kanku, chejnikojtaj kanku. Chay pandillamanta runasqa yuraj sabanawan jina, capuchaswantaj vestikoj kanku. Uj tutaqa, uj wasi punkupi rikorqani uj runata tiyashajta, chay pandillamanta runas jina vestisqata. Chay jina chejninakuy kajtinpis, hermanosqa kʼachasllapuni karqanku. Uj pachaqa, qolqe mana kapuwarqaykuchu jatun tantakuyman viajanaykupaj. Chayrayku autoykuta uj gringuito hermanoman vendeporqayku. Killanmantaj predicacionmanta, estudiosman risqaykumantawan saykʼusqa wasiykuman chayarqayku. Wasiyku punkupitaj autoyku sayashasqa. Ventananpitaj uj notitapi jinata nisharqa: “Autoykichejta apamporqaykichej, uj regalota jinataj japʼikuychej”, nispa.

Kay 1962 watapitaj, Ñaupajman Apajkunapaj Escuelaman rinaypaj invitawarqanku. Chay escuelaqa South Lansing nisqa llajtapi apakorqa, Estados Unidospi. Chay escuelamanqa ancianos, congregacionesta waturejkuna, superintendentes de distrito ima rinanku karqa, uj killapajtaj. Chay kutipajqa mana trabajasharqanichu, pisi qolqellataj kapuwarqa. Niraj chay escuelaman invitashawajtinkoqa, telefonosta atiendej empresamanta gerentewan parlarerqani trabajachinawanpaj. Chay empresapeqa gringuituslla trabajaj kanku, noqallataj negrito kayman karqa. Pisi tiemponmantaj niwarqanku chay empresapi trabajanayta. Ñaupajman Apajkunapaj Escuelaman viajanaypaj qolqe mana kapuwasqanrayku, chay empresapi trabajayta yuyasharqani. Chayrayku Betelpi trabajaj hermanosman uj cartata apachiyta munasharqani chay escuelaman mana rinaypaj.

Jinallapi, congregacionniymanta uj hermana sutʼiyayta wasiykuman jamuspa uj sobreta jaywawarqa. Chay sobrepitaj ashkha qolqe kasqa. Chay hermanaj qosanqa mana Testigochu karqa. Chay hermanataj, wakin wawitasninwan chay qolqeta tantanankupaj, sutʼiyayta jatarikuspa algodón chajrasta qhoraspa trabajamusqanku. Sobreta jaywawaspataj chay hermanaqa niwarqa: “Hermanóy, chay escuelaman rispa sumajta yachakamuy. Kutimuspa sumajta yachachinawaykupaj”, nispa. Chantá telefonosta atiendej empresaman wajyaspa nerqani:  “¿Phishqa semanamantaraj trabajarichiwankichejmanchu?”, nispa. Chay empresamantataj niwarqanku: “Mana suyaykumanchu”, nispa. Jinata niwajtinkupis kusisqa kasharqani, escuelaman rinayrayku.

Kunantaj señoray willarisonqachej imaynachus Pine Bluff llajtitapi riwasqaykumanta: “Chay llajtitapeqa, casi 20 estudiospuni kapuwaj. Chayrayku tutamanta predicamoj kayku, tardenpitaj estudiosniykuman rej kayku, wakin kutistaj las 11 de la nochekamapuni. Predicaspaqa kusisqallapuni kaj kayku. Chay llajtamantaqa ni mayman ripuyta munarqanichu. Chayrayku congregacionesta waturispa sirvinaykuta niwajtiyku, qʼasa sonqolla kasharqani. Chaywanpis Jehová Diosqa mayta bendeciwarqayku”. Arí, maytapuni.

Pine Bluff llajtitapi precursores regulares jina sirvishajtiykoqa, precursores especiales kanaykupaj uj solicitudta juntʼacherqayku. Maytapuni suyakusharqayku precursores especiales kayta. Imajtinchus aswan ñaupajta superintendente de distrito, niwarqayku allin kanman Texas nisqa llajtapi precursores especiales jina sirvinaykuta. Chayrayku mayta suyarqayku precursores especialesta jina kachanawaykuta. Chaywanpis ni ima cartapis chamuwarqaykuchu. Enero de 1965 watapiraj uj carta chayamuwarqayku. Chaypitaj nisharqa, congregacionesta waturejkuna jina sirvinaykuta. Chaypachallataj hermano Leon Weaverta congregacionesta waturejta jina churasqanku. Kunantaj payqa, coordinador del Comité de Sucursal kashan, Estados Unidospi.

Congregacionesta waturispa llankʼanayta niwajtinkutaj, mancharisqa kasharqani. Uj wata ñaupajta, superintendente de distrito James Thompsonqa yuyaychawarqa imaspichus mejoranayta, congregacionesta sumajta waturej kanaypaj. Congregacionesta waturispa sirvispañataj, repararqani hermano James walejtapuni yuyaychawasqanta. Chantapis hermano Jamesllataj primerituta waturikuwarqayku congregacionesta waturispa sirvishajtiyku. Chay kutipi mayta yachakorqani hermano Jamesmanta.

Jaqay tiempopeqa, congregacionesta waturej hermanosta ruwanasninkuta juntʼanankupaj pisillata entrenaj kanku. Chayrayku uj semanapi sumajta yachakunay karqa uj hermanota qhawaspa. Reparanay karqa chay hermano uj congregacionta waturispa imaynatachus ruwanasninta juntʼasqanta. Qhepan semanataj chay hermanoqa, noqatañataj qhawawaj imaynatachus ruwanasniyta juntʼasqayta. Chantá chay hermanoqa, yuyaychawarqa ruwanasniyta allinta juntʼanaypaj. Chaymantataj chay hermano riporqa waj congregacionesta waturimunanpaj. Noqaykutaj sapallaykuña congregacionesta waturimorqayku. Chay kutipi señorayman nerqani: “¿Kunan imanasuntajri? Sapallanchejña kashanchej”, nispa. Pisi tiemponmantaj  yachakorqani, hermanoswan yanapachikunapajqa, kʼumuykukoj sonqopuni kana kasqanta. Noqataqa maytapuni yanapawarqanku hermanonchej James Brown, Fred Rusk ima. Hermano James Brownqa congregacionesta waturispa sirvej. Hermano Fred Rusktaj Betelpi trabajaj.

Chay tiempopeqa tukuynejpi chejninakuy kaj. Uj kuti Tennessee llajtapi congregacionesta waturikushajtiyku, negritosta chejnikoj pandillaqa marchata ruwashasqanku. Waj kutipitaj, predicasqaykutawan uj pensionman rerqayku. Chay pensionpi bañoman rishajtiy, uj phiña runa qhatiykuwarqa. Chay runaqa tatuajes juntʼa karqa, jatuntaj. Tatuajesnintaj negritosta chejnikusqanmanta karqa. Bañopiña kashajtiytaj uj jatun gringuito hermano yaykumuspa, niwarqa: “Hermanóy, ¿tukuy imapis allillanchu?”, nispa. Qhatiykamuwarqa chay phiña runataj, mancharikuspa chay rato bañomanta chinkarqa. Watasninmantaj repararqani, runasqa pantaj runas kasqankurayku chejninakusqankuta, nitaj colorninkuraykuchu. Yachakorqanitaj hermanosqa, munanakunanchej kasqanta ima colorniyoj kaspapis. Yachakullarqanitaj hermanosta munakusqanchejrayku kausayninchejtapis qonanchej kasqanta.

Doce watasta congregacionesta waturej jina sirverqani, 21 watastataj superintendente de distrito jina. Chay wataspeqa ashkha imasta yachakorqani. Chantá agosto de 1997 watapi Estados Unidos Betelman wajyariwarqayku. Betelman rinaykupaj solicitudtaqa 38 watas ñaupajta juntʼacherqayku. Wajyarinawaykukamataj unaytapuni suyakorqayku. Septiembre killamantapachataj Betelpi trabajayta qallarerqayku. Yuyarqanitaj Betelman uj tiempollapaj wajyariwasqankuta, jinapis mana jinachu karqa.

Betelman chayaytawanqa Departamento de Servicio nisqapi trabajarqani. Chaypi trabajaj hermanosmantaqa mayta yachakorqani. Chay Departamentopeqa, kutichinku imastachus ancianos, congregacionesta waturejkuna ima tapusqankuman. May agradecesqataj kashani hermanos yanapariwasqankumanta, pacienciawantaj yachachiwasqankumanta. Chay Departamentopi watejmanta trabajanayta niwankuman chayqa, ashkha imasta yachakullaymanpuni.

Noqawan señoraywanqa may kusisqa kashayku Betelpi trabajaspa. Chantapis niraj Betelman rishaspaqa, sutʼiyaymantapuni sayarikoj kayku, chayrayku Betelpi sutʼiyayta sayarikuytaqa mana qhellakuykuchu. Watanman jinataj Diospa Llajtanta Kamachejkunamanta Willaypaj Comisionpi yanapanayta niwarqanku. Kay 1999 watapitaj Diospa Llajtanta Kamachejkunamanta ujnin kanayta niwarqanku. Chaypi llankʼaspaqa, mayta yachakorqani. Astawanqa yachakorqani Cristo congregacionta ñaupajman apaj kasqanta, nitaj runachu.

Kausayniypi piensarispa, wakin kuti profeta Amós jina sientekuni. Amosqa kʼita higosta pallaj, ovejastataj michej. Jinapis Jehová Diosqa, Amospi repararqa waj imasta ruwayta atisqanta. Chayrayku Jehová Diosqa, Amosta profeta kananta nerqa, maytataj bendicerqa (Amós 7:14, 15). Noqapipis Jehová Diosqa repararqa, paypaj llankʼayta atisqayta. Noqaqa wajcha familiamanta kani, Liberty llajtitamanta. Profeta Amosta jinallataj Jehová Diosqa maytapuni bendeciwarqa (Pro. 10:22). Wajcha familiamanta kaspapis, Jehová Diosmanta yachakuspaqa may qhapaj kani, chaytataj mana suyallarqanipischu.