ERỌNVWỌN ghwe wene mamọ ọke mi vwo kpo isikuru-u. Ihwo me vẹ ayen gba tọn isikuru phiyọ yen me vẹ ayen gbe ji wontọ. Ihwo eje rehẹ orere na dino vughe ohwohwo.

Orere rẹ Liberty vọnre vẹ aghwa itete ra kọn eka phiyọ. Ọke re vwo vwiẹ vwẹ, jẹ ọsẹ mẹ wian vwọ kẹ ọvo usun rẹ eghwẹrẹ rehẹ orere na. Ọke me vwọ hẹ eghene, mi yono obo ra djẹ imoto rode ra vwọ wian vwẹ aghwa, me je tẹn ona rẹ iruo rẹ aghwa na te asan ọvo.

Oni mẹ hẹ ẹgbukpe 35 ọke ro vwo vwiẹ vwẹ, jẹ ọsẹ mẹ ghwanre te ẹgbukpe 56 ọke yena. Ọsẹ mẹ pha gbrẹnrẹnrẹn sasasa, jẹ ọgbowian. O ji yono emọ rọyen eje obo rọ ghanre te ra vwọ dia ọgbowian. Dede nẹ o feri-i, jẹ avwanre vwo asan rẹ avwanre dia, iwun re kuẹphiyọ, kugbe emuọre. O vwo ọke vuọvo ro vwo chukoku orua rọye-en. Ẹgbukpe 93 yen ọ diarọ o ki ghwu. Oni mẹ de rhe ghwu ọke rọ vwọ hẹ ẹgbukpe 86. Ayen ihwo ivẹ na ga Jihova-a. Oniọvo mẹ ọvo fuevun ga kerẹ ọkpako ukoko rhanvwẹ ọke ọrhuẹrẹphiyotọ yena vwọ tonphiyọ vwẹ ikpe re kpahen 1970.

Oni mẹ mu ẹwẹn kpahen ẹga mamọ. Kẹdidjana kẹdidjana yen o vwo muẹ avwanre kpo ishọshi rẹ Baptist. Me vwọ hẹ ẹgbukpe 12 yen mi tu vwo nyo kpahen eghẹnẹ erha ri kuomakugbe dia ọvo. Kidie me guọnọ riẹn, me da nọ oni mẹ: “Mavọ yen Jesu sa vwọ dia Ọmọ na, ọyen ọvo me je dia Ọsẹ na?” Me je karophiyọ obo rọ kpahen kẹ vwẹ: “Ọmọ mẹ, e che se vwo ẹruọ rọye-en, kidie ohwo vuọvo cha sa riẹn isẹ rọyen dje-e.” Mi ghini vwo ẹruọ rọye-en. Dedena, me vwọ hẹ ẹgbukpe 14, e de bru vwe phiyame vwẹ urhie otete ọvo. Abọ erha yen e duvwun uvwe phiyọ ame na vwo nene uyono rẹ eghẹnẹ erha ri kuomakugbe dia ọvo!

Me vwọ hẹ ikọleji, ugbeyan mẹ ọvo ro djubi de jiro kẹ vwẹ nẹ mi vwomaba ọyen. Ke me rhe ton uyono rọyen phiyọ. Ukuotọ rọyen mi de kpo eha rẹ Golden Gloves re de djubi. Kidie nẹ me ghwa nabọ tẹn ona rẹ obo re djubi-i, me rha ro eha na kodo tavwen mi ki no-o. O kriri-i, e de se vwe nẹ mi vwomaba Isodje rẹ America, e de ji vwe kpo Germany. Me vwọ hẹ etiyin, ega mẹ de ji vwe kpo Isikuru ọvo re se Noncommissioned Officers Academy, kidie ayen rorori nẹ mi vwo ona rẹ isuesun. Ayen guọnọre nẹ me ghwọrọ akpeyeren mẹ eje phiyọ iruo rẹ isodje. Ẹkẹvuọvo, me guọnọ ọyena-a. Me vwọ ga ẹgbukpe ivẹ nu, mi de wontọ nẹ iruo rẹ isodje na vwẹ ukpe rẹ 1956. O kriri-i, me da vwomaba ẹko rẹ isodje ọfa rọ fẹnẹ ọrẹsosuọ na.

Mi phuoma mamọ ọke yena, kidie mi rorori nẹ eriyin ofori nẹ eshare dia. Uruemu mi niso vwẹ oma rẹ eshare rehẹ ekogho me dia, kugbe eshare rehẹ ifimu mi nẹ, yen djobọte vwe. Vwọ kẹ vwẹ, eshare ri ghwoghwo ota, dia eshare kakaka-a. Jẹ, ukuko na mi de rhi yono erọnvwọn evo ri wene akpeyeren mẹ. Ẹdẹ ọvo me vwọ djẹ imoto ọvwavware mẹ vwevunrẹ orere na, emetẹ ivẹ de djuobọ kẹ vwẹ. Mi vughe ayen ihwo ivẹ na. Ayen Iseri rẹ Jihova. Oniọvo rayen ọshare yen rọvwọn oniọvo mẹ ọkpako. Mi reyọ Uwevwin Orhẹrẹ vẹ Awake! mie ayen jovwo, ji mi niro nẹ Uwevwin Orhẹrẹ na gan nọ. Ọ rẹ udje na, ayen de durhie uvwe kpo Uyono rẹ Ubruwevwin re ruẹ vwẹ uwevwin rayen. Me da vuẹ ayen nẹ mi che roro kpahọn. Ọvo usun rayen kọ hwẹ, ọ da nọ vwẹ, “O mu we ẹro nẹ wọ cha rhe?” Me da ta, “Me cha rhe.”

Ọ da vwẹ nẹ mi vuve tiọyen kẹ ayen, ji mi che se si ota mẹ reyọ ọfa-a. Me da ghene ra vwẹ ason yena. Oborẹ emọ re rhe uyono na nabọ riẹn Baibol na te, gbe vwe unu mamọ! Erianriẹn mẹ te ọ raye-en, dede nẹ mi nene oni mẹ kpo ishọshi kẹdidjana kẹdidjana. Mi de rhi vwo ẹwẹn mi vwo yono kpobarophiyọ. Me da rhọnvwe nẹ a vwẹ uyono rẹ Baibol mu kẹ vwẹ. E de yono uvwe nẹ Jihova yen oderhi rẹ Ọghẹnẹ ro me vwo ẹgba. Me karophiyọ nẹ me vwọ nọ oni mẹ kpahen Iseri rẹ Jihova vwẹ ikpe evo re wanre, ọ vuẹ vwẹ nẹ, “Ayen ihwo ri vwẹ ẹga kẹ ọmare ọvo re se Jihova.” Jẹ enẹna, ẹro mẹ rhie re!

Ẹyan-obaro mẹ fobọ teyenphia, kidie obo re yono uvwe na mu vwe ẹro dẹn. Emeranvwe irhirin vwọ wan nu, mi de bromaphiyame vwẹ March 1957. Akpeyeren mẹ de rhi wene. Mi de roro kpahen uruemu rẹ omaẹkparọ mẹ ri jovwo, oma kọ vwerhen ovwẹ, fikirẹ obo mi yonori vwẹ Baibol na kpahen uruemu ra guọnọ mie eshare. Jesu, ọyen ohwo ọgbagba. O vwo ẹgba vrẹ ‘eshare ri phuoma’ shesheri. Dedena, o nene ihwo họnre-e. Jẹ, “e gbe oja kẹ re,” kirobo ra mraro rọyen phiyotọ jovwo. (Aiz. 53:2, 7) Me da rhe mrẹvughe nẹ ofori nẹ Onenikristi  ni “aruẹdọn kẹ ohwo kohwo,” yẹrẹ dia dẹndẹn.​—2 Tim. 2:24.

Me ton iruo ọkobaro phiyọ vwẹ ukpe rẹ 1958. Jẹ, o kriri-i mi de vrẹn nẹ iruo na ọmọke krẹn. Diesorọ? Kidie mi brorhiẹn me vwọ rọvwọn Gloria rọ dia ọvo usun rẹ emetẹ ivẹ ri durhie uvwe kpo Uyono rẹ Ubruwevwin na! Me viẹ idiekpọvwẹ fikirẹ orhiẹn mi bruru ẹdẹ yena-a. Gloria pha ghanghanre kẹ vwẹ te ọke na. Ọ ghanre vrẹ ubioragha rọ ma ghanre kparobọ. Oma vwerhen ovwẹ nẹ ọyen me rọvwọnre! Gbe jọ ta ẹkẹn unu rọyen kẹ ovwan:

“Emọ 17 yen ọsẹ vẹ oni mẹ vwiẹre. Oni mẹ nabọ fuevun ga kerẹ ọvo usun rẹ Iseri rẹ Jihova te ẹdẹ ughwu rọyen. O ghwuru ọke me vwọ hẹ ẹgbukpe 14. Uvwre ọke yena yen ọsẹ me je vwọ ton uyono rẹ Baibol phiyọ. Oni mẹ vwo ghwu nu, ọsẹ mẹ de bru prinspa rẹ isikuru mẹ ra, ra vuẹ vwọ kpahen iroro rọ jẹ kpahen ovwẹ vẹ oniọvo mẹ ọkpako rọ dia ọmọtẹ, rọ je kare ovwẹ ro isikuru. Ọ guọnọre nẹ avwanre ihwo ivẹ na phren ẹdẹ rẹ avwanre vwo kpo isikuru, rere ọvo usun rẹ avwanre dia uwevwin da vwẹrote emọ ichekọ ji chere emu phiyotọ bẹsiẹ ọyen vwo nẹ iruo rhe. Prinspa na da rhọnvwe kẹ. Eriyin kọyen avwanre ruro bẹsiẹ oniọvo mẹ na ki wontọ nẹ isikuru. Orua Iseri rẹ Jihova ivẹ yen nene avwanre yono Baibol. Mẹvwẹ vẹ iniọvo mẹ 10 da rhe dia Iseri rẹ Jihova. Iruo aghwoghwo na kẹ vwẹ omavwerhovwẹn dede nẹ mẹvwẹ ohwo rẹ oma vua. Ọshare mẹ Sam nabọ chọn vwẹ uko vwo phi omavovwẹ na kparobọ.”

Mẹ vẹ Gloria rọvwọnre vwẹ February 1959. Avwanre riavwerhen rẹ iruo rẹ avwanre kerẹ ekobaro. Vwẹ emeranvwe rẹ July rẹ ukpe rẹ avwanre rọvwọnre na, avwanre da ghwobọphiyọ ifọmu rẹ Bẹtẹl kidie avwanre guọnọ ga vwẹ esiri ukoko. Oniọvo Simon Kraker yen riẹnmie avwanre vwẹ echidiotọ na. Dede nẹ ọ vuẹ avwanre nẹ ihwo re je rọvwọ-ọn yen a guọnọre vwẹ Bẹtẹl ọke yena, avwanre si ẹwẹn nẹ ẹga rẹ Betẹl na-a. Jẹ, ọ reyọ ọke grongron uphẹn na ki rhiephiyọ kẹ avwanre!

Avwanre de si ọbe kpo esiri ukoko nẹ avwanre guọnọ kpo asan ra da ma guọnọ ukẹcha. Orere rẹ Pine Bluff rọhẹ ubrotọ rẹ Arkansas kọyen e dje kẹ avwanre. Ikoko ivẹ yehẹ orere rẹ Pine Bluff ọke yena. Ọ rẹ iyibo vẹ ọ rẹ “ihwo ibiebi.” Avwanre da vwomaba ọ rẹ “ihwo ibiebi” ro vwo ighwoghwota 14.

O se gbe we unu oborẹ omaẹfẹnẹ wan ro evun rẹ ikoko rẹ Iseri rẹ Jihova ọke yena. Uruemu yena ro evun rẹ ukoko na, kidie o titiri vwẹ akpọ na ọke yena; e jurhi rẹ omaẹfẹnẹ vwẹ ẹkuotọ sansan, ozighi je vọn asan eje. Vwẹ asan buebun, oshọ mu iniọvo na nẹ a cha guọghọ Ọguan Ruvie na siẹrẹ iniọvo ibiebi vẹ iyibo de ru uyono kugbe. A ghene guọghọ Eguan Ruvie evo fikirẹ okugbe tiọyen. Iniọvo ibiebi de kpo ekogho rẹ iyibo re ghwoghwo ota, e se mu ayen phiyọ uwodi yẹrẹ tobọ hwe ayen ehwe ọgangan. Ọtiọyena, kẹ avwanre nene urhi re jiri na rere e se vwo soseri ro fiotọ. Avwanre ji vwo iphiẹrophiyọ nẹ erọnvwọn che wene.

Egbabọse vọn evun rẹ iruo rẹ aghwoghwo avwanre mamọ. Ọkiọvo, avwanre da wian ekogho rẹ ihwo ibiebi, e se hworo ẹchẹ rẹ iyibo vwọrẹ jẹriẹn. Ọke tiọyena, avwanre me brokpakpa brorhiẹn sẹ e che se ẹkpo rẹ Baibol kprẹn, yẹrẹ yovwunu kẹ ayen rere e kpo asan ọfa. Eriyin ekuakua ghwa hepha vwẹ asan evo.

Avwanre nabọ wian gangan vwọ chọn oma rẹ avwanre uko vwẹ iruo rẹ ọkobaro na. Idọla erha yen a hwa kẹ avwanre kẹdẹ kẹdẹ vwẹ asan buebun rẹ avwanre da wian. Aye mẹ ruiruo rẹ ẹroevwote rẹ iwevwin ọke evo. Vwẹ asan ọvo rọ da wian, a rhọnvwe kẹ vwẹ nẹ me chọn uko rere ọ sa fobọ ruiruo na re. A je kẹ avwanre emu oghẹruvo. Kudughwrẹn kudughwrẹn yen aye mẹ wọ kpa emwa vwọ kẹ orua ọvo. Mi frẹ odin, rien ighegbe, ji ruiruo efa. Avwanre ihwo ivẹ na koko rien ighegbe vwẹ uwevwin rẹ oyibo ọvo. Gloria vwo rien obevun, ji mi rien obotafe. A kẹ avwanre emu oghẹruvo, kidie avwanre ruiruo na nẹ urhiọke re te ovwọnvwọn. Me re ọmẹ vwẹ asan re muẹ imoto phiyọ, Gloria da rha re ọrọyen vwẹ obevun uwevwin na, ẹkẹvuọvo o kuomakugbe orua rẹ iyibo na-a. Ọ ghwa da vwẹ-ẹ, kidie emu na vwerhan mamọ. Ihwo orua na dia erharhe ihwo-o, urhi re jiri na yen ayen di nene. Me karophiyọ ẹdẹ ọvo avwanre vwọ vwẹriẹ asan ra da shẹ ipẹtro. Avwanre vwọ dẹ nu, me da nọ ohwo rọ shẹ  ipẹtro na sẹ Gloria se kpo asan rẹ ayen de kpirhin awọ. Ko di wiẹn ẹro ni vwe, ọ da ta, “a kanre rọ.”

Avwanre vẹ iniọvo na nabọ ghwọrọ ọke kuẹgbe. Avwanre je riavwerhen rẹ iruo rẹ aghwoghwo na! Odibo rukoko na yen avwanre vẹ ọyen gba dia uwevwin ọke rẹ avwanre ghwa vwọ kua rhe Pine Bluff. Ọke yena, aye rọyen ji rhi kurhẹriẹ-ẹ. Gloria de nene ton uyono rẹ Baibol phiyọ. Me da je ton uyono rẹ Baibol phiyọ vẹ ọmọtẹ rẹ oniọvo na kugbe ọshare rọyen. Aye rẹ oniọvo na vẹ ọmọtẹ rayen de rhi brorhiẹn rẹ ayen vwọ ga Jihova, ayen de bromaphiyame.

Avwanre vwo igbeyan buebun vwẹ ukoko rẹ iniọvo re dia iyibo hepha. Ason yen avwanre vwo kpo asan rayen siẹrẹ ayen de durhie avwanre vwọ kẹ emuọre, rere ihwo vwo jẹ avwanre ẹmrẹ. Ukoko ọvo re se Ku Klux Klan (KKK) nabọ ghwobọphiyọ urhi rẹ omaẹfẹnẹ na mamọ ọke yena, o ji titi ozighi. Me karophiyọ nẹ me mrẹ ọshare ọvo ro chidia anurhoro rọyen vwẹ ason rẹ ẹdẹ ọvo rẹ ayen vwo ruẹ orẹ rẹ Halloween. Ọshare na nabọ sẹn osẹnvwe rọ họhọ ọ rẹ KKK na. Uruemu tiọyena sa dobọ rẹ iniọvo na ji, rẹ ayen vwo jẹ ẹse eruo-o. Me karophiyọ ọke ọvo rọ wanre rẹ avwanre vwọ shẹ imoto rẹ avwanre kẹ oniọvo ọvo rere avwanre sa vwọ mrẹ igho vwọ fa oma kpo ọghwẹkoko. Emeranvwe ọvo vwọ wan nu, oma vwọ ghwọrọ avwanre nẹ aghwoghwo te uwevwin ẹdẹ ọvo fikirẹ oheri na vẹ ihwo buebun rẹ avwanre vẹ ayen gbe yono Baibol, avwanre da rhe vwa emu ọvo ro gbe avwanre unu. A nabọ mu imoto rẹ avwanre shẹre na phiyọ obaro rẹ uwevwin rẹ avwanre! Avwanre vwo no, a vwẹ ọbe ọvo vwọ tamuo re si phiyọ nẹ, “Ovwan reyọ imoto rẹ ovwan rhivwin, me vwerọ ruẹse kẹ ovwan. Mẹvwẹ oniọvo rẹ ovwan.”

O ji vwo ẹse ọfa re ru kẹ avwanre rọ cha sa chọrọ ovwẹ ẹro-o. E durhie uwe kpo Isikuru rẹ Ekpako vẹ Idibo Rowian vwẹ South Lansing, New York, vwẹ 1962. A nabọ yono ekpako, iniruo okinriariẹ vẹ iniruo ubrotọ na eje re rare vwẹ uvwre rẹ emeranvwe ọvo re vwo ru isikuru na. Uweren ganre kẹ vwẹ ọke re vwo durhie uvwe kpo isikuru na, kidie mi vwo iruo-o. Jẹ, me guọnọ iruo kpo ikọpini rẹ itẹlifonu rọhẹ Pine Bluff vwẹ ọke ọvo rọ wanre. Ayen da reyọ ovwẹ, ke me cha dia ohwo obiebi rẹsosuọ ro tu nene ayen wian. Ukuotọ rọyen, ayen da vuẹ vwẹ nẹ ayen reyọ ovwẹ re. Kẹ, die yen mi che ru enẹna? Mi vwo igho me cha vwọ fa oma kpo New York re de che ru isikuru na-a. Mi de rhi vwo ẹwẹn mi vwo rhiabọreyọ iruo na rere me ghwa kpairoro vrẹ isikuru na. Mi vwo muegbe mi che vwo si rhe ukoko nẹ mi rhe che se kpo isikuru na ọfa-a, emuọvo da phia rọ cha sa chọrọ ovwẹ ẹro bẹdẹ-ẹ.

Edegburhiọke rẹ ẹdẹ ọvo, oniọvo aye ọvo rọhẹ ukoko rẹ avwanre rẹ ọshare rọyen dia oseri-i de hworo ẹchẹ rẹ avwanre, ọ da vwẹ ẹnvẹlopu kẹ vwẹ. Igho yen vọn evun rọyen. Kurhiọke kurhiọke yen ọ vẹ emọ rọyen evo vwọ gbẹn odi nẹ aghwa ra kọn oruru phiyọ, rere ayen sa vwọ mrẹ igho vwọ kẹ vwẹ, me vwọ fa oma kpo New York. Oniọvo na da ta: “Kpo  isikuru na rere wo re yono emu buebun, ọke wo de rhivwin rhe, wo mi rhi yono avwanre!” Me da nọ ikọpini rẹ itẹlifonu na sẹ ayen sa kẹ vwẹ udughwrẹn iyorin mi vwo ru erọnvwọn efa tavwen me ke rhe ton iruo phiyọ. Ayen da kpahen nẹ, “Kakaka!” Jẹ, ẹkpahọnphiyọ rayen na da vwẹ-ẹ, kidie mi brorhiẹn mẹ nure. Oma vwerhen ovwẹ mamọ nẹ mi kpo iruo yena-a!

Ọnana yen oborẹ Gloria vwọ karophiyọ Pine Bluff: “Ẹkuotọ na je vwe mamọ! Mi vwo ihwo ri te omarẹ 15 fiẹ 20 re me vwẹ Baibol yono. Avwanre de ru aghwoghwo rẹ nuwevwin kpo uwevwin vwẹ urhiọke nu, ke kpo orivwinbrura vẹ uyono rẹ Baibol. Ọkiọvo, a sa tobọ wian te ughọjọ 11 vwẹ ason. Iruo aghwoghwo re ruẹ vwẹ oboyin na vwerhan dẹn! Ọ rha dia emuọvo-o, me rha daji oboyin. Vwọrẹ uyota, mi ghwe vwo ẹwẹn mi vwo vrẹn nẹ etiyin nene ọshare mẹ ọke ra vwọ reyọ vwo mu oniruo okinriariẹ-ẹ. Ẹkẹvuọvo, ọ dia oborẹ mi roro na yen Jihova roro-o.” Ghini uyota, iroro rẹ Jihova fẹnẹ ọ rẹ avwanre.

Ọke rẹ avwanre vwọ hẹ Pine Bluff, avwanre de si rhe ukoko nẹ avwanre guọnọ ga kerẹ ekobaro oghẹresan. Avwanre vwo imuẹro kokoroko nẹ a cha rhọnvwe kẹ avwanre, kidie oniruo ubrotọ ro kiẹn okinriariẹ rẹ avwanre hepha, guọnọre nẹ avwanre ra vwẹ ukẹcha vwọ kẹ ukoko ọvo vwẹ Texas kerẹ ekobaro oghẹresan. Iroro yena je avwanre mamọ. Avwanre hẹrhẹ bẹn sẹ a cha vwẹ ọbe edurhie rhe avwanre, ẹkẹvuọvo avwanre mrẹ emuvuọvo-o. Ukuotọ rọyen, vwẹ January 1965 e de si ọbe rhe avwanre, ra vwọ reyọ ovwẹ vwo mu oniruo okinriariẹ! Ọke vuọvo yena yen a je vwọ vwẹ Oniọvo Leon Weaver rọ vwẹrote Umẹ Rọvwẹrote Oghọn Ukoko rẹ United States enẹna, vwo mu oniruo okinriariẹ.

Oshọ ke mu vwe nẹ mi che se ruiruo na-a. Omarẹ ẹgbukpe ọvo vwọ wan nu, Oniọvo James A. Thompson, Jr. rọ dia oniruo ubrotọ, da rhe fuẹrẹn iruo mẹ. O de dje asan evo kẹ vwẹ ro fori nẹ me wian phiyọ. O de ji dje ena evo kẹ vwẹ ra vwọ riẹn uvi rẹ oniruo okinriariẹ. O kriri-i, me da rhe mrẹvughe nẹ uvi rẹ uchebro yen Oniọvo Thompson vwọ kẹ vwẹ. Oniọvo Thompson yen oniruo ubrotọ rẹsosuọ me vẹ ọyen gbe wian kugbe. Mi ghini yono emu buebun mie.

Vwẹ ọke yena, a vwẹ ugogo uyono vwọ kẹ iniruo okinriariẹ-ẹ. Me vẹ oniruo okinriariẹ ọvo wianre udughwrẹn ọvo ro vwo kin ukoko ọvo, o de rhe nene uvwe wian vwẹ udughwrẹn rọ vwọ kpahọn. Ọ nabọ kẹ vwẹ odjekẹ vẹ uchebro. Jẹ, udughwrẹn yena vwọ wan nu, ọ da yan juvwe vwo. Me karophiyọ ọke me vwọ ta kẹ Gloria nẹ, “Kọyen ọ cha ghene yanjẹ ohwo vwo?” Ẹkẹvuọvo, mi de rhi noso nẹ iniọvo re sa chọn ohwo uko cha sa kanre avwanre-e, siẹrẹ a da vwẹ  uphẹn kẹ ayen rẹ ayen vwo ru ọtiọyen. Me karophiyọ nẹ iniọvo kerẹ J. R. Brown rọ dia oniruo ro kiẹn vwẹ ọke yena, kugbe Fred Rusk rọ ga vwẹ Bẹtẹl, chọn vwẹ uko mamọ.

Ihwo buebun titi uruemu rẹ omaẹfẹnẹ vwẹ ọke yena. Me karophiyọ ọke ọvo rẹ ihwo rẹ ukoko rẹ KKK na vwọ ro orere rẹ Tennessee ọke rẹ avwanre vwo kpo oboyin re kin ikoko evo. Me je karophiyọ obo re phiare ọke ọfa mẹ vẹ iniọvo na vwo kpo aghwoghwo. Vwẹ ọke rẹ omaerovwon, avwanre da vwẹriẹ asan ra da shẹ emu. Me ghwe vwo vrẹn nẹ mi kpo asan re de kpirhin awọ, ọshare ọvo usun rẹ iyibo ri titi uruemu rẹ omaẹfẹnẹ na ro bru oka phiyọ oma, de ghwe nene uvwe. Oniọvo ọvo rọ je dia oyibo, rọ rhuoma nọ avwanre ihwo ivẹ na da vwọ kpahen avwanre. Oniọvo na da nọ vwẹ: “Oniọvo Herd, erọnvwọn eje shephiyọ?” Kpakpata, ọshare rọ vwọ kpahen ovwẹ jovwo na, ko ghwe kuomarhẹriẹ. Obo me rhiẹromrẹ vwẹ ọke sansan djerephia nẹ umwemwu ra riuku rọyen mie Adam yen ghwa omaẹfẹnẹ rhe, ọ dia ohọroma-a. Me da je mrẹvughe nẹ oniọvo wẹn, ghwa oniọvo wẹn, o toro ohọroma ro rhere-e, o se ghwu kẹ wẹ.

Me ghwọrọ ẹgbukpe 12 wọ ga kerẹ oniruo okinriariẹ, me da rha ghwọrọ ẹgbukpe 21 vwo ruiruo rẹ oniruo ubrotọ. Avwanre nabọ riavwerhen rẹ iruo na, vwẹ ikpe yena eje. Jẹ, ọ ba etiyi-in. Vwẹ August 1997 oborẹ avwanre rhẹro rọyen krẹ re na de te avwanre obọ. E de se avwanre nẹ avwanre rhe ga vwẹ Bẹtẹl rẹ United States. Omarẹ ikpe 38 wanre vwo nẹ ọke ẹsosuọ rẹ avwanre vwo tu ghwobọphiyọ ifomu rẹ Bẹtẹl. Avwanre da ton ẹga rẹ Bẹtẹl phiyọ vwẹ August 1997. Mi rorori nẹ iniọvo na de guọnọ nẹ me rhe chọn ayen uko ọmọke krẹn jovwo. Ẹkẹvuọvo, ọ dia eriyin ekuakua wanre-e.

Akon Iruo Rọvwẹrote Iruo rẹ Ẹga na yen me da wian ẹsosuọ. Ọyena ghwa uphẹn mi vwo yono kpahen erọnvwọn efa. Iniọvo re wian vwẹ akon iruo yena yen kpahanphiyọ enọ egangan buebun ri nẹ obọ rẹ ekpako ukoko vẹ iniruo okinriariẹ sansan cha. Oma vwerhen ovwẹ nẹ iniọvo na nabọ chirakon yono uvwe. Dedena, me riẹnre nẹ a da rhoma reyọ ovwẹ kpo etiyin, me je cha dia ogbori.

Mẹ vẹ aye mẹ vwo ẹguọnọ rẹ Bẹtẹl mamọ. Ẹkuruemu rẹ avwanre vwori ra vwọ fobọ vrẹn vwẹ urhiọke, chọn avwanre uko mamọ vwẹ Bẹtẹl. Omarẹ ẹgbukpe ọvo vwọ wan nu, me da rhe dia ọvo usun rẹ iniọvo re vwẹ ukẹcha kẹ Umẹ Rọvwẹrote Iruo rẹ Ẹga rẹ Iseri rẹ Jihova. Vwẹ 1999, a da vwẹ ovwẹ vwo mu ọvo usun rẹ Ẹko Rọvwẹrote Iruo rẹ Iseri rẹ Jihova. Mi yono emu buebun vwẹ iruo nana re. Marho kparobọ, iruo nana yono uvwe nẹ Jesu Kristi rọ dia ọgbuyovwin rẹ ukoko na yen suon, ọ dia ohworakpọ-ọ.

Fikirẹ oborẹ akpeyeren mẹ wanre, ọkiọvo ki mi nẹ oma mẹ kerẹ ọmraro Emọs. Jihova nabọ vwo oniso rẹ osuigodẹ yena rọ nabọ vwomakpotọ vwẹrote emamọ rẹ sikamọ rẹ ihwo buebun niri nẹ ọyen emu rẹ ivwiogbere. Ọghẹnẹ da vwẹ Emọs vwo mu ọmraro. Ọyen ghini uphẹn rode vwẹ ẹga rẹ Jihova. (Emọs 7:14, 15) Ọtiọyen ọ je hepha kẹ vwẹ. Mẹvwẹ rọ dia ọmọ rẹ ọghwẹrẹ ghevweghe, rọ dia orere rẹ Liberty vwẹ Indiana, yen Jihova ni so, o de ji bruba kẹ vwẹ gbidiki. Mi che se djunute erọnvwọn eje ro siobọnu kẹ vwẹ-ẹ! (Isẹ 10:22) Vwọrẹ uyota, mi ton akpeyeren phiyọ kerẹ ovwiogbere, jẹ ukuko na, mi de rhi fe efe me vwẹ ẹro roro-o!