სკოლას ახალ მუთუნ ვა რდუ. მიდგაწკუმა ართო პირველ კლასის ბგურაფლენდინ, კინ თინეფწკუმა ართო ვათე სკოლას გურაფა. თაშ ნამდა, თი ქალაქის უმენტაშის იფჩინენდჷ დო აშო ხოლო მიჩინენდეს.

თე ქალაქიშ გოხოლუას ჭიჭე ფერმეფ რდუ დო ძირითადო მარცვლეულიშ მოსავალს ეჭუფუნდეს. მუჟამსით დებაბდინ, მუაჩქიმ ართ-ართ ადგილობრივ ფერმერწკუმა მუშენდჷ. მარდუ ვორდინ თიმწკუმა დიბგურე ტრაქტორიშ ჸონაფა დო ფერმაშ შხვა საქმეეფიშ კეთება ხოლო შემლებუდ.

მუაჩქიმიშ ახალგაზრდობა ვაფშჷ, მუშენდა თინა 56 წანერ რდუ მუჟამსით დებაბდინ დო დიაჩქიმ 35 წანერ. მუაჩქიმ სუსტ, ჯამრთელ დო ძალიერ კოჩ რდუ, ნამუსით მანგარო უჸორდჷ მუშობა დო ჩქი ხოლო მოგურუანდეს შრომაშ ფასის. თის დღას ვა უღუდ ბრელ ფარა, მარა ჸუდე ქომღუდეს, ბარგი მიკმოქუნდეს დო შკირენ ვამაფდეს; თინა ირიათო ხუც მიკინენდეს. მუაჩქიმქ 93 წანერ რდუნ თეშ ღურ დო დიაჩქიმქ 86 წანერ რდუნ თეშ. თინეფ ნამთინ ვამსახურუდ იეჰოვას. ჩქიმ და დო ჯიმალეფშე, ხვალე ართ ჯიმა რდუ იეჰოვაშ მოწმე. თინა 1970-იან წანეფშე ღურა დღაშა ართგურო მსახურენდჷ უხუცესო. ზუსტას თე წანეფშე დიჭყეს ორგანიზაციას უხუცესეფიშ დანიშვნა.

დიაჩქიმ რელიგიურ ოსურ რდუ დო ირ ჟეშხა დღას ბაპტისტურ ეკლესიაშა გილაპჸუნდით. სამებაშ გურშენ პირველო 12 წანერ ვორდინ თიმწკუმა გებგი. მანგარო მოინტერესუდ თე საკითხ დო დიაჩქიმს პკითხ: „მუჭო რე შეიოლებერ იესო ქოთ სქუა რდას დო ქოთ მუმა?“. მა ჯგირო ფშუ თიშ პასუხი: „სქუა, თენა საიდუმლო რე. ჩქი თეს ბოლოშა დღას ვენვანჭუთ“. დასურო, თენა ჩქიმო ხოლო საიდუმლოთ სქიდუდ. მუჟამსით 14 წანერ ვორდინ, იშენით დიბნათ ჭიჭე ღალწყარს. თექ სამებაშ სახელით დუდ სუმშა მონწყუაფეს.

სკოლას ბგურაფლენდინ თიმწკუმა ართ მეგობარ პჸუნდჷ, ნამუთ ფარაშა ჩხუპენდჷ დო მა ხოლო ელამიჩ, ნამდა თე საქმე ქუდომჭყაფუდკო. მა ქუდვაჸუნ თის, ვარჯიშ ქიდიპჭყჷ დო კრივიშ ორგანიზაციაშ (Golden Gloves) წევრო გინიფრთ. თე საქმე ჯგირო ვეგშმალედ, ათეშენ მუსხირენ ჩხუპიშ უკულ დუდ დუვანებ. უმოს მოგვიანებით, ჯარშა მიდამჸონეს დო გერმანიაშა გომტუეს. მუჟამსით ჯარს ვმსახურენდინ, ჩქიმ უნჩაშეფქ „უნტერ-ოფიცერეფიშ აკადემიაშა“ გომტუეს, სოდეთ ჯარიშკოჩეფს ჯარიშ მეთაურეფო ამზადენდეს. თინეფ ფიქრენდეს, ნამდა მა მეთაურობაშ უნარ დაბადებაშე ეთოპჸუნდჷ. უნჩაშეფს ოკოდეს ჯარს მსახურება გამგრძელებუდკო. მარა მა ვა მოკოდ თექ გაჩერება დო ჟირ წანაშ უკულ 1956 წანას, მუჟამსით მსახურებაშ დროქ გემეთუნ, ჯარ ქიდიპტე. ჭიჭე ხანშა, შხვა ჯარს ქუვაკათი.

ჭეშმარიტებაშ გაგებაშახ არასწორ წარმოდგენა მიღუდ თიშ გურშენ, მუნერ ოკო რდუკო ნამდვილ ქომოლკოჩ, მუშენდა ჩქიმწკუმა დიდ გავლენა უღუდ კინოეფს დო თი ხალხის, მიდგაწკუმა ურთიერთობა მიღუდ. ფიფქრენდჷ, ნამდა კოჩ, ნამუთ ბიბლიათ ქადაქენდუნ კოჩანიერ კოჩ ვა რდუ. მარა ბიბლიაშე თიცალ მუდგარენეფ გებგჷ, ნამუთიქ დოთირუ ჩქიმ ცხოვრება. ართ დღას, მუჟამსით ჩქიმ ჭითა კაბრიოლეტით ქალაქის მიფშინ, ჟირ ძღაბიქ ხე ქუდომვალუ. მა თინეფს იფჩინენდ, თე ძღაბეფ ჩქიმ სინჯაშ (უნჩაშ დაშ ქომონჯ) დალეფ რდეს. ჟირხოლო იეჰოვაშ მოწმე რდუ. მოწმეეფშა ადრე ხოლო მაფუდ გიწნაღელ ჟურნალეფ „გინაჯინალ კოშკი“ დო „გეგშაკურცხით!“, მარა „გინაჯინალ კოშკი“ რთულ გაგებელ რდუ ჩქიმო. თე დალეფქ ჭიჭე შეხვალამაშა, წიგნიშ გურაფაშა ქუდმაპეჯეს, ნამუთ მუნეფიშ ჸუდეს იტარებუდ. ვუწი, ნამდა ქიფიფქრენდჷ თეშ გურშენ. ძღაბეფქ მიწუეს: „პირობას მარზენთო?“. „ქო, პირობას გარზენთ“, — ვუპასუხ მა.

ჭიჭეს ქობნარღენდ პირობა მეფჩინ, მარა თიმ ონჯუას იშენით ქემეფრთ. არძაშ უმოსო თიქ გუმაკვირ, ნამდა ბაღანეფს ჯგირო უჩქდეს ბიბლია. ირ ჟეშხას მახოლო გილაპჸუნდ ჩქიმ დიდას ეკლესიაშა, მარა ბიბლიურ რჩქინა ვამღუდ. გეგნოპჭყვიდ უმოს მეტ ქუგამგებუდკო, ათეშენ ბიბლიაშ გურაფა ქიდიპჭყჷ. არძაშ უმოს პირველო თინა გებგჷ, ნამდა უზენაეს ღორონთიშ სახელ იეჰოვა რდუ. წანეფიშ წოხოლე, მუჟამსით ჩქიმ დიდას იეჰოვაშ მოწმეეფიშ გურშენ პკითხინ, თიქ მიპასუხ: „თინეფ თაყვანს ცენა ართ მოხუცებულ კოჩის, ნამუსით იეჰოვა ჯოხო“. მარა ასე ირფელს ქინვანჭჷ.

სულიერო ხეთეშე მიდაფრთ წოხოლე, მუშენდა მიჩქუდ, ნამდა ჭეშმარიტება მაფუდ გორილ. თი შეხვალამაშ დასწრებაშე ჩხორო თუთაშ უკულ 1957 წანაშ მარტის დიმნათ. ცხოვრებას შხვანერ თოლით ქუდვუჭყჷ ჯინა. ბედნერ ვორექ, ნამდა ქიგებგ, მუს ოგურუანს ბიბლია სინამდვილეს კოჩანაშ გურშენ. იესო სრულყოფილ რდუ. თის ძალაუფლება დო  ფიზიკურ ძალა ხოლო უღუდ, მარა თინა დღას მითინს ვაჩხუპუდ. მუჭოთ ნაწინასწარმეტყველებ რდუნ, თიქ „დუდ დაჩაგრებაფუ“ შხვეფს (ეს. 53:2, 7). ბიბლიაშე ქიგებგ, ნამდა იესოშ ჭეშმარიტ მიმაჸუნალეფქ „არძას პატიცემათ ოკო მექცუან“ (2 ტიმ. 2:24).

პიონერო მსახურება ნათუაშ უკულ ართ წანაშა, 1958 წანას ქიდიპჭყჷ. მარა ჭიჭე ხანშა პიონერობაშ დროებით მეტება გინობჭყვიდ. თეშ მიზეზ თინა რდუ, ნამდა ოსურო მოკოდ მიპჸუნკო გლორია, ართ-ართ თი ჟირ ძღაბშე, ნამუთიქ წიგნიშ გურაფაშა დუმაპეჯეს. თე გადაწყვეტილება დღას ვამნარღებ. გლორია თიმწკუმა ხოლო ძვირფას რდუ ჩქიმო დო ამდღა ხოლო ძვირფას რე. თინა არძანერ ბრილიანტშა მისხუნ. ბედნერ ვორექ, ნამდა დეფქორწინით. ასე ჭიჭეს გლორია ხოლო ქიგეჩიებნა მუშ ამბეს:

„17 და დო ჯიმა ვორდით. ჩქიმ დიდა იეჰოვაშ ართგურ მსახურ რდუ. 14 წანერ ვორდ, მუჟამსით თიქ ღურ. თიმ დროს ჩქიმ მუმაქ ბიბლიაშ გურაფა ქიდიჭყჷ. ჩქიმ დიდაშ ღურაშ უკულ მუაჩქიმ სკოლაშ დირექტორს ქოთხუ, ნამდა მა დო ჩქიმ უნჩაშ დაქ, ნამუთ თიმ წანას სკოლას ათენდუნ, ირ მაჟია დღას გილამრთუმდესკო სკოლაშა. თეგვარო, ჩქი შემალებედეს ვეთირითკო ართიანს დო ქიმკვოჯინითკო უკლაშ და დო ჯიმალეფს. თეს გეძინელ, ოჭკუმალს ხოლო ქუდვოხვამილუანდით მთელ ოჯახის დო სამუშაშე დორთელ მუაჩქიმს. დირექტორქ ქუდაჸუნ მუაჩქიმს დო ჩქი თაშ გილეფშით სკოლაშა, ონდო ჩქიმ და სკოლას ათენდკო. თიმ დროს იეჰოვაშ მოწმეეფიშ ჟირ ოჯახ ბიბლიას მოგურუანდეს დო ჩქინდე 11 ბაღანაქ იეჰოვაშ მოწმეთ გინირთ. მართალ რე, ონჯღორიან ვორდ, მარა მანგარო მიჸორდ მსახურება. სემიქ მანგარო მიმეხვარ გივორჯგინკო თე პრობლემას“.

მა დო გლორიაქ 1959 წანაშ ფრევალს დეფქორწინით დო ართო ვმსახურენდით პიონერო. თი წანაშ კვირკვეს ბეთელიშ ბლანკი შევავსით, მუშენდა მანგარო მოკოდეს მთავარ სამმართველოს მსახურება. ართ ძვირფას ჯიმაქ, სიმონ კრაკერქ მიწის, ნამდა თი დროშო ბეთელშა დაქორწინებულ წყვილეფს ვაღებულენდეს. ჩქი დღას ვამდინუაფნა ბეთელს მსახურებაშ სურვილ, ნამუთიქ ბრელ წანაშ უკულ გემირთეს.

მთავარ სამმართველოს ქიმეპჭარით, გუტებდითკო თექ, სოდეთ მაქადაქებელეფიშ დიდ საჭიროება რდუ. ქუმოპჭარეს, ნამდა მიმსახურებდესკო ქალაქ ფაინ-ბლაფის (არკანზასი). თიმ დროს თექ ხვალე ჟირ კრება რდუ — ართ ჩეკანიანეფშო დო მაჟია ფერად კანიანეფშო. ჩქი ფერად კანიანეფიშ კრებაშა გომტეს, სოდეთ ხვალე 14 მაუწყებელ რდუ.

შილებე გიკვედან, მუშენ იშაყარდეს ცალ-ცალკე ჩეკანიან დო ფერად კანიან მაუწყებელეფ. თეშ პასუხ მარტივ რე, მუშენდა თიმ დროს შხვა შარა ვა არსებენდ. კანონი ვერზენდ უფლებას შხვადოშხვა რასაშ ხალხიქ ართო დიშაყარკო. თეს გეძინელ, ოშკურანჯ რდუ, ნამდა თეს ძალადობაქ ქუმაჸუნკო. მაგალთო, ბრელ დიხას და დო ჯიმალეფს ოშკურდეს, ნამდა ჩეკანიან დო ფერადკანიანეფ ართო გეკიშაყარუდეს-და, თინეფიშ სამეფო დარბაზეფს ქიგიანთხუდეს. თეცალ მუდგარენ დასურო ხვადუდ. ფერად კანიანეფ კარდოკარ ჩეკანიანეფს ქუქადაქდეს-და, თინეფ შილებე უჭოფდესკო დო გულახდესკო. სამეფოშ საქმექ ვა გაჩერდუკონ თიშენ, ვომორჩილდით კანონეფს დო მიღდეს იმენდი, ნამდა სიტუაცია დითირუდ.

სირთულეეფს მსახურებაშ დროს ხოლო შეფხვადუდით. მუჟამსით ფერადკანიანეფ ცხოვრენდესინ ფერ ტერიტორიას ვმსახურენდითინ, შემთხვევით მინშა ჩეკანინეფიშ ჸუდეს ვუხაკუანდით. ჩქი უცფას ოკო გეგნოპჭყვიდითკო, მუჭო მიფქციებუდით: ვარდა მოკლე შეთავაზება გამკეთებდსკო, ვარდა ბოდიშ ქომთქუალდესკო დო ქუდომტებდესკო თექიანობა. თეცალ სიტუაცია რდუ თიმ დროს ნამთინე ადგილს.

დუდიშ ეიოჯუმალარო, სოდგაინ ოკო იმუფშეთკო. ჩქი თიცალ სამუშას მუფშენდით, სოდეთ დღაშე ხვალე 3 დოლარს მარზენდეს. გლორია მუსხირენ ოჯახის დამლაგებელო მუშენდჷ. ართ ოჯახის მა ხოლო ქომჩეს უფლება, ქიმვეხვარკო თის, ნამდა საქმე უმოს ჩქარას გუთებუდკო. თე ოჯახი ონდღეს ოჭკომალს მარზენდეს, ნამდგას მა დო გლორია იფრთუნდით. ირ მარას გლორია ართ ოჯახის ოუნთალეფს უნთანდ. მა აკოშკეფს პწიმინდანდჷ დო შხვა მძიმე საქმეს ხოლო ვორთუდ. ართ ჸუდეს, სოდეთ ჩეკანიანეფ ცხოვრენდესინ, გლორია დინახალეშე წიმინდანდჷ აკოშკეფს, მა — გალეშე. თეშო მთელ დღა მოკოდეს, ათეშენ თექ ხოლო ოჭკუმალს მარზენდეს. გლორია დინახალე ჭკომუნდ ოღონდ ოჯახშე ცალკე, მა გარაჟის პჭკომუნდ. მარა თენა შუროთ ვამაწუხენდ, ოჭკომალ გვალო ჯგირ რდუ. ოჯახიშ წევრეფ  ხოლო გვალო ჯგირეფ რდეს, უბრალოთ თინეფ თიმ დროშ სისტემაშ გავლენაშ თუდო რდეს. ართშა ბენზინიშ ენაბუნალ სადგურწკუმა გაფჩენდით. თექ ართ ჩეკანიან კოჩ მუშენდ დო მანქანას ბენზინ ქინვობინ თიშ უკულ, ქოფთხი გლორია ტუალეტშა გემნუშკუმალუდკო. თიქ ართ ქენმოჯინ დო მიწუ: „კილერ რე“.

მუშო ოკო რაგად, ჩქინ და დო ჯიმალეფწკუმა ჯგირ დროს ვატარენდით დო მსახურება ხოლო მანგარო მიჸორდეს. პირველო ფაინ-ბლაფშა მეფრთითინ, ართ ჯიმაწკუმა ფცხვორენდით, ნამუთ თიმ დროს კრებაშ მსახურ (უხუცესი) რდუ. თიშ ოსურ ვარდ იეჰოვაშ მოწმე დო გლორიაქ თიწკუმა ბიბლიაშ გურაფა ქიდიჭყჷ. ჭიჭეხანშა მა თინეფიშ ძღაბ დო სინჯას ქუდვუჭყ ბიბლიაშ გურაფა. თე ჯიმაშ ოსურქ დო ძღაბიქ გეგნოჭყვიდეს იეჰოვაშ მსახურება დო დინათეს.

ჩქი მეგობრეფ პჸუნდეს კრებას, სოდეთ ჩეკანიან და დო ჯიმალეფ იშაყარდეს. თინეფ მუნეფიშ ჸუჩა მაპეჯენდეს, მარა თინეფიშ ჸუჩა სერით მიფშით. თიმ დროს მანგარო აქტიურენდჷ ართ ორგანიზაცია (კუ-კლუქს-კლანი), ნამუთ რასიზმ დო ძალადობას უნწყუნდჷ ხეს. დღას ვაგმოჭყორდუ ართ კოჩ, ნამუთ ჰელოუინიშ სერს მუშ აბარწას ეწოხედ დო კუ-კლუქს-კლანიშ წევრეფცალო მიკაქუნდჷ. თეცალ სიტუაციეფიშ უმკუჯინუო, და დო ჯიმალეფ იშენით გიმირჩქინანდეს ართიანიშ პატიცემას. ართშა კონგრესიშ ოულარო ფარაქ დემესაჭირეს. კონგრესშა მიდამრთუმდესკონ თიშენ, ართ ჯიმას 1950 წანას გიშნაშკუმელ ფორდი ქიმეპჸიდით. თეშ უკულ ართ თუთაქ მიკილ; ართ დღას პაპანაქება ჩხანას კარდოკარ ქადაქებაშ დო ბიბლიაშ გურაფეფიშ უკულ მანგარ შულადერფქ დიფრთით ჸუდეშა, სოდეთ სიურპრიზიქ ქუდოფხვადეს. ჩქინ მანქანა ჸუდეშ წოხოლე ქიგერდ. მანქანაშ სარკესწკუმა წერილქ ქუდოფხვადეს: „თე მანქანა ჩქიმდე საჩუქარ ქორდას. თქვან ჯიმა“.

და დო ჯიმალეფიშ ხოლო ართ ჯგირ საქციელქ მანგარო იმოქმედ ჩქიმწკუმა. 1962 წანას სამეფო მსახურებაშ სკოლაშა ქუდომძახეს, ნამუთ საუთ-ლანსინგის (ნიუ-იორკი) იტარებუდ. თენა ართ თუთიან გურაფა რდუ კრებაშ უხუცესეფშო დო სარაიონო დო საოლქო ზედამხედველეფშო. თე დროს სოთინ ვამუფშენდ დო მანგარო მიჭირდეს. ფაინ-ბლაფის სამუშაშ გურშენ ტელეფონიშ კომპანიაშა ინტერვიუშა ქუდომძახეს. თაქ ომუშებშა გეპჭოფუნდეს-და, პირველ ფერადკანიან იპჸიდ თე კომპანიას. ინტერვიუშ უკულ მიწის, ნამდა აპირენდეს სამუშაშა ჩქიმ ეჭოფუას. მუ ოკო მიკეთებუდკო? ნიუ-იორკშა ოულარ ფარა დასურო ვამღუდ. სერიოზულო ფიფქრენდ, ქუდომჭყაფუდკო მუშობა დო ვარია ქომთქუალუდკო სკოლას გურაფაშ გურშენ. ზუსტას თი დროს, მუჟამსით სკოლაშა წერილიშ მეჭარუას ვაპჸირენდინ, დღას ვაგმოჭყორდუნ ფერ მუდგარენქ ქუმოხვად.

ჩქინ კრებაშე ართ დაქ, ნამდგაშ ქომონჯ ვა რდუ იეჰოვა მოწმე, გოთანაშა კარს ქუდომხაკუეს დო კონვერტი ქუდმოკინუ. თინა ფარათ რდუ ეფშა. თე და მუშ ბაღანეფწკუმა ართო ირ ოჭმარეს ადრე ენოდგინუე, ბამბეშ პლანტაციეფშა მინოვე, სოდეთ ტყას ეშმაპუტორუნდეს, ნამდა დუშაყარდესკო ჩქიმდა ნიუ-იორკიშ  ოულარ ფარა. თიქ მიწუ: „მეუ სკოლაშა დო მუთ შეილებუნ ბრელ ქიდიგურე, უკულ დირთ დო ჩქი ხოლო ქუდმოგურეთ!“. ტელეფონიშ კომპანიას პკითხ, ხომ ვეშემლებუდ თექ მუშობაშ დოჭყაფა 5 მარაშ უკულ. თინეფქ ვარია მიწის. მარა თეს უკვე ვა უღუდ ჩქიმო მნიშვნელობა, მუშენდა მა უკვე გინოჭყვიდილ მაფუდ. მანგარო მოხიოლ, ნამდა ვარია ფთქვი სამუშაშე.

გლორია იშინანს ჩქიმ მსახურებას ფაინ-ბლაფის: „მანგარო ქიმეჸოროფ თაქიანობაქ. სოდგარენ 15—20 ბიბლიაშ გურაფა მიღუდ. ოჭმარეს კარდოკარ ვმსახურენდით, უკულ მთელ დღას ბიბლიაშ გურაფეფს ვატარენდით, მინშა სერიშ 11 საათშა ხოლო. თე ირფელს მართალო დიდ ხიოლ მოუღუდ. ოკო ვაღიარე, ნამდა დასურო ვამოკოდ დითირკო თე დანიშნულებაქ დო გილმალ მსახურება ქიდიპჭყითკო, მარა იეჰოვა შხვა მუდგარენს მიმზადენდეს“. ქოთ თაშ ქიჸუ.

ფაინ-ბლაფის მსახურებაშ დროს სპეციალურ პიონერობაშ ბლანკი შევავსით. დიდ იმენდ მიღდეს, მუშენდა ჩქინ სარაიონო ზედამხედველს ოკოდ ქიმვეხვარითკო ართ კრებას ტეხასის დო თექ სპეციალურ პიონერეფო მიმსახურებდესკო. თე აზრი ჩქი ხოლო მანგარო მოპწონდეს. თაშ ნამდა ჩქი ვუჯინედით პასუხის მთავარ სამმართველოშე, მარა საფოსტო ყუთი ირიათო ცარიელ დოფხვადუდეს. საბოლათ, 1965 წანაშ იანარს ქუმორთ წერილქ, სოდეთ ჭარუდ, ნამდა გილმალ მსახურეფო ვორდით დანიშნულ. ჯიმა ლეონ ვივერ, თიმ დროს შეერთებულ შტატეფიშ ფილიალიშ კომიტეტიშ კოორდინატორ დო თეწკუმა ართო რაიონულ ზედამხედველო ხოლო რდუ დანიშნულ.

მანგარო მნერვიანენდჷ რაიონულ მსახურებაშ გურშენ. საოლქო ზედამხედველქ, ჯეიმზ ტომფსონქ, გემინწყჷ ჩქიმ მოვალეობეფ. თიქ რბილას ქუმოძირუ, მუ მხარეეფს მოსაჭირუდ გაუჯგუშება დო მუ უნარ ჩვევეფ მოსაჭირუდ, ნამდა ქოპჸოფედკო ჯგირ ზედამხედველ. ჭიჭეხანშა ქიმეფხვად, ნამდა თიშ რჩევა დასურო საჭირო რდუ. ჯიმა ტომფსონი რდუ პირველ რაიონულ ზედამხედველ, მიდგაწკუმა ართო დიპჭყჷ მსახურება, მუჭოთ რაიონულ ზედამხედველქ. მა ბრელ მუთუნ დიბგურე თე ართგურ ჯიმაშე.

თიმ დროს რაიონულ ზედამხედველეფს ბრელ გურაფა ვა უღდეს. რაიონულ ზედამხედველწკუმა ართო ართ მარას კრებას იმნახულენდით, მუ დროსით ვოკვირუდ თის. მაჟია მარას შხვა კრებაშ მონახულებაშ დროს, თინა მოკვირუდ მა დო მარზენდ საჭირო რჩევეფს დო ხემძღვანელობას. თეშ უკულ ხვალე ოკო გუვაგრძელითკო კრებეფიშ მონახულება. ართშა გლორიას რაიონულ ზედამხედველიშ გურშენ პკითხჷ: „დასურო აპირენსო ჩქინ დოტებას?“. დრო ხანიშ უკულ ართ მნიშვნელოვან მუდგარენს ქიმეფხვად: ირიათო იჸუაფნა თიცალ ჯიმალეფ, მით  მზათ რენა ქიმგეხვარან, მთავარ რე თეშ საშუალება ქიმეჩათ თინეფს. მანგარო ვაფასენქ თი ჯიმალეფს, მიდგაქ მიმეხვარეს. თინეფ რდეს: რაიონულ ზედამხედველ ჯეიმზ ბრაუნი დო ბეთელიშ ოჯახიშ წევრი ფრედ რასკი.

თიმ დროს რასიზმ მანგარო რდუ გავრცელებულ. ართშა რასისტულ ორგანიზაციაქ ტენესიშ შტატიშ ართართ ქალაქის სოდეთ ჩქი მონახულება მიღდესინ, აქცია ჩატარ. გუმაშინე ართ შემთხვევა, მუჟამსით ჩქინ სამქადაქებლო ჯგუფიქ მსახურებაშ დროს ისვანჯუდ დო სასადილოს რდუ. ქომოლკოჩეფიშ ტუალეტშა მოკოდ მინულა თე დროს თოლქ ქუმომიოლ ართ კოჩშა ნამუსით მკაცრ სახე დო ბრელ ტატუეფ უღუდ. თიქ გედირთ დო ქეკმაჸუნ. მარა ართ ჩეკანიან ჯიმაქ, ნამუთ ჩქიმდე დო თი კოჩშე ჯგიროთ უმაღალაშ რდუნ ჩქი ქეკმაჸუნეს. თიქ პკითხ: „მუთუნ ხომ ვაჭირს ჯიმა ჰერდ?“. თიმწკუმა თე კოჩიქ ხეთეშე ქუდომტეს. წანეფიშ დინახალე ქობძირ, ნამდა რასიზმიშ მიზეზ კანიშ ფერ ვარინ, მემკვიდრეობათ მეღებულ ცოდა რე, ნამუთ არძას მიღნა. მა თინა ხოლო ქიდიბგურე, ნამდა კანიშ ფერიშ უმკუჯინუო ჯიმა ჯიმა რე დო საჭიროქ ქიუდა თინა მზათ რე, სიცოცხლე დათმას სკან გურშენ.

ჩქი 33 წანა გილმალ მსახურებას გუვატარით, თავრეშე 21 წანა საოლქოთ მსახურენდით. თე წანეფიშ დინახლე ბრელ კურთხევა დო გურიშ ელმაკინალ შემთხვევეფ მიღდეს. ჩქი ხოლო ართ კურთხევა მელდეს წოხოლე. 1997 წანაშ არგუსოს ბრელ ხანიშ ოცნებაქ გემირთეს. ბეთელიშ ბლანკიშ პირველო შევსებაშე სოდგარენ 38 წანაშ უკულ, ჩქი შეერთებულ შტატეფიშ ბეთელშა ქუდომძახეს. სექტემბერიშ თუთაშე ჩქი ბეთელს მსახურება ქიდიპჭყით. ფიფქრენდ, ნამდა პასუხიშმგებელ ჯიმალეფს დროებით ოსაჭირდეს ჩქინ მოხვარა ბეთელს, მარა საქმექ გვალო შხვანერო მიდართჷ.

დუდშე სამსახურებრივ განყოფილებას დუმანიშნეს. თაქ ბრელ მუთუნ დიბგურე. ჯიმალეფს გინაჭყვიდირალ აფდეს ბრელ რთულ საკითხ, ნამდგაშ წოხოლე უხუცესეფ დო რაიონულ ზედამხედველეფ გერდეს. მანგარ მარდულ ვორდ ჯიმალეფიშ, მით მოთვინებას გიმირჩქინანდეს დო მზათ რდეს მოგურუესკო. მაგალთო, თე განყოფილებაშა კინ დუმორთინეს-და, თექ მსახურენან ფერ ჯიმალეფშე ბრელ მუთუნ მაჸი კინ დუდშე დაგურაფალ.

მა დო გლორიას მანგარო მოპწონა ბეთელს მსახურება. ჩქი ადრე ედგინას მერჩქვანელ ვორდით დო თე ჩვევაქ ბეთელს ხოლო გუმმოდირთეს. სოდგარენ ართ წანაშა ხელმძღვანელ საბჭოშ სამსახურებრივ კომიტეტიშ დამხმარეთ ქიდიპჭყჷ მსახურება. 1999 წანას ხელმძღვანელ საბჭოშ წევრო დებნიშნი. თაქ ბრელ მუთუნ დიბგურე, მარა მუთ არძაშ უმოს მნიშვნელოვან რენ, არგამათ ქობძირ, ნამდა კრებას მითინ კოჩ ვარინ, იესო ქრისტე ხელმძღვანელენს.

მუჟამსით ჩქიმ ცხოვრებას გინვოჯინექინ, წინასწარმეტყველ ამოსცალო ბგინაფლენქ დუც. იეჰოვაქ ყურადღება ქიმიაქცუ თე თანდაბალ ჭყიშის, ნამუთ სეზონურ სამუშას ასრულენდ დო მოჸუნდ სიკომოროშ ლუღი. თი დროს თე ხილი ღარიბ ხალხიშ ოჭკუმალო ითვალუდ. ღორონთიქ თის დიდ პასუხიშმგებლობა ქიმიანდჷ დო წინასწარმეტყველო დანიშნჷ (ამოს. 7:14, 15). თეგვარო, იეჰოვაქ მა ხოლო მუმაქცუ ყურადღება, ჭიჭე ქალაქ ლიბერთის დაბადებულ ღარიბ ფერმერიშ სქუას დო კურთხევეფით ემოფშჷ, ნამუთ ნინათ ვეკმარაგადე (იგავ. 10:22). მართალ რე, სიღარიბეს იბრდუდ, მარა ამდღა მიღჷ სულიერ სიმდიდრე, ნამუსით დღას ვეფიფქრენდჷ.