我在学期间，学校同小镇都冇咩大嘅改变。从一年级到毕业，我嘅同班同学都系嗰批人。利伯蒂镇好细，镇上大部分人都彼此认识。佢哋知道你嘅名，你亦都知道佢哋嘅名。

利伯蒂镇周围都系一啲小型农场，主要种植粟米。我出世嗰阵，我爸爸系当地嘅一个农夫。我十几岁就识得揸拖拉机，亦都识得其他基本嘅耕作技巧。

我从未见过爸爸年轻嘅样。我出世嗰阵，爸爸已经56岁，妈妈35岁。不过，我爸爸系一个健康强壮嘅人。佢好热爱工作，亦都教导所有仔女要有噉样嘅态度。佢赚嘅钱唔多，但系一直以来我哋都有屋住，有衫着，有饭开。另外，佢都会经常抽时间陪我哋。佢93岁去世，妈妈86岁去世。佢哋都冇事奉耶和华。我其中一个弟弟从1972年就开始做长老，一直忠贞事奉耶和华。

我妈妈好虔诚，每个星期日都会带我哋去浸信会教堂。我12岁嗰阵第一次听到三位一体呢个教义。我好好奇噉问妈妈：“点解耶稣可以系儿子同时又系父亲？”我记得佢嘅回答系：“阿仔，呢个系奥秘，系我哋冇办法明白嘅。”呢个对我嚟讲的确系个奥秘。虽然唔明白，我14岁左右仲系喺本地一条小溪受咗浸。佢哋三次将我浸落水，一次为天父，一次为儿子，一次为圣灵！

我读高中嘅时候，有个朋友系职业拳击手。佢叫我试吓打拳。于是我开始受训，仲加入咗一个叫“金拳套”嘅拳击组织。我打得唔系咁好，所以打咗几场就放弃嘞。之后，我应征加入美国军队，被派去德国。喺德国服役期间，上级派我去一个士官学院，佢哋觉得我有领导天赋，希望我投身军事行业。我唔系好想留喺军队服役，所以两年服役期满咗之后，喺1956年我就光荣退役。不过冇几耐，我就加入咗一支完全唔同嘅军队。

我学习真理之前，由于受到电影同周围环境嘅影响，对点样先系一个真正嘅男人有错误嘅睇法。我认为传讲圣经嘅男子冇乜男子气概。但系我之后学到嘅嘢，改变咗我嘅一生。有一日，我开住部红色开篷车穿过市镇，有两个年轻嘅女子向我挥手。我认得佢哋。佢哋系我姐夫嘅两个妹妹。佢哋系耶和华见证人。之前佢哋已经俾过我《守望台》同《警醒！》杂志，但系我觉得《守望台》对我嚟讲有啲深奥。呢次佢哋邀请我参加会众书籍研究班——喺佢哋屋企举行嘅一个研究圣经嘅小型聚会。我同佢哋讲，我会考虑吓。佢哋微笑住问我：“你保证你会考虑？”我话：“我保证。”

我应承之后有啲后悔，但系我觉得唔应该食言，所以嗰晚我去咗。令我印象最深刻嘅系啲小朋友，估唔到佢哋居然识咁多圣经知识！虽然我同妈妈去咗咁多次教堂，但系我对圣经嘅认识好少。而家我决心要学多啲，所以我同意跟见证人学习圣经。我最开始学到嘅系，全能上帝嘅名叫做耶和华。好多年前，我问妈妈耶和华见证人系咩人，佢只系话：“噢，佢哋崇拜一个叫耶和华嘅老人家。”而家我嘅心眼先真正打开！

我知道自己揾到真理，所以进步得好快。参加聚会唔到9个月，我就喺1957年3月受浸。我嘅人生观发生咗好大改变，我好开心从圣经学到乜嘢先至系真正嘅男子气概。耶稣系个完美嘅人，佢比任何男人都更有力量。不过，佢 并冇参与斗争，而系好似预言所讲嘅噉，“一直甘愿受苦”。（以赛亚书53:2,7）我学到，一个真正嘅基督徒“要对所有人和气”。（提摩太后书2:24）

第二年，即系1958年，我开始做先驱。不过好快，我要暂时停止。点解？因为我决定要同格洛丽亚结婚。佢就系邀请我参加书籍研究班嘅其中一个女仔！我从来都冇后悔做呢个决定。无论之前定系而家，格洛丽亚喺我心目中都系一粒宝石，甚至比“希望之钻”更宝贵，我好开心可以娶到佢！等佢同你哋讲吓佢嘅故事：

“我有16个兄弟姐妹。妈妈系一个忠心嘅见证人，佢喺我14岁嗰阵去世，之后爸爸就开始学习圣经。妈妈走咗之后，爸爸同校长作咗一个安排。当时我家姐仲有一年就高中毕业，爸爸问家姐同我可唔可以一人返一日学。我哋轮流返学，噉其中一个人就可以留喺屋企照顾细佬妹，亦都可以喺爸爸出去工作嘅时候帮手煮饭。校长同意呢个安排，而且一直实行到我家姐毕业。两个见证人家庭帮助我哋学习圣经。我哋兄弟姐妹中有11个长大之后成为耶和华见证人。我好钟意喺地区做传道，不过我好怕丑，而塞缪尔咁多年来都一直帮助我克服呢个弱点。”

格洛丽亚同我喺1959年2月结婚。我哋好开心一齐做先驱。我哋一直都渴望喺世界总部服务，所以同年7月就向伯特利提出申请。当时，亲爱嘅西蒙·克拉克弟兄同我哋见面。佢同我哋讲，伯特利暂时唔招收已婚夫妇。我哋好想喺伯特利服务，不过最终要等好多年先可以如愿以偿！

我哋写信问总部，可唔可以派我哋去需求更大嘅地区。总部嘅答复只有一个：阿肯色州嘅派恩布拉夫。嗰阵时，派恩布拉夫有两群会众，一群系白人会众，另一群系黑人会众。我哋被派去只有14个传道员嘅黑人会众。

你可能觉得奇怪，点解耶和华见证人嘅会众会有种族隔离。答案好简单，喺嗰个年代冇乜选择。黑人同白人一齐集会系非法嘅，亦都好可能因此遭到暴力袭击。喺好多地方，如果呢两个种族嘅见证人喺一齐崇拜，王国聚会所就有可能遭受毁坏，所以弟兄姊妹感到害怕都好正常。噉样嘅事的确发生过。如果黑人见证人喺白人区逐家逐户传道，佢哋会被拘捕，甚至会被殴打。所以，为咗可以传道，我哋遵守法律，期待日后情况会好转。

我哋传道嗰时遇到过好多挑战。例如，喺黑人地区传道嗰阵，我哋有时唔小心敲咗白人家庭嘅门。呢阵时，我哋要尽快决定系向对方作一个简短嘅圣经介绍，定系道歉之后马上离开。当时，呢种情况经常发生。

当然，我哋需要工作嚟维持先驱生活。我哋大部分工作嘅工资都好低。格洛丽亚可以揾到一啲家政工作。有一户人允许我帮助太太，噉太太只系用一半时间就可以完成工作。我同格洛丽亚喺中午会得到一盒快餐，然后两个人分嚟食。格洛丽亚每个星期会为一个家庭熨衫。我就打理花园，洗窗同埋做一啲零散嘅工作。我哋帮一个白人家庭洗窗，格洛丽亚洗入面，我洗出面。因为呢个工作要做一日，所以屋主会提供午饭俾我哋。格洛丽亚可以喺屋入面，不过要同呢家人分开食，而我就喺车库入 面食。我一啲都唔介意，而饭餸亦都好好味。嗰家人好友善，佢哋只不过系受当时嘅环境所影响。记得有一次，我哋喺一个加油站加完油之后，我问服务员，格洛丽亚可唔可以用嗰度嘅洗手间。佢好恶噉望住我话：“锁咗嘞。”

另一方面，我哋同弟兄姊妹享有好多美好嘅时光，我哋亦都好钟意呢度嘅传道工作！我哋搬去派恩布拉夫嘅时候，同当时嘅会众组务仆人（现称长老团协调人）弟兄一齐住。嗰阵时，弟兄嘅太太仲未接受真理，于是格洛丽亚就同佢讨论圣经。同时，我都同呢对夫妇嘅女同女婿讨论圣经。后来，呢个弟兄嘅女同太太都决定事奉耶和华并献身受浸。

喺白人会众，我哋有好多好朋友。佢哋会邀请我哋去佢哋屋企食饭。为咗避免俾人发现，天黑之后我哋先可以去。三K党系一个提倡暴力同种族主义嘅组织，喺当地非常活跃。喺一个万圣节晚上，我见到一个男人坐喺佢屋企门口，好似三K党嘅人噉披住张白布同戴住个头笠。不过呢种情况妨碍唔到弟兄姊妹互相表现仁慈。有一个弟兄为咗使我哋有钱去参加区域大会，就买咗我哋嘅1950年福特车。一个月后，有一日，我哋喺烈日之下行路做传道以及同学生讨论圣经，之后真系觉得好攰。返到屋企嘅时候，我哋好惊喜噉睇到我哋部车竟然停喺屋企前面！挡风玻璃上有张纸条写住：“我将你哋部车作为礼物送翻俾你哋。你嘅弟兄。”

仲有一件事令我印象深刻。1962年，我受邀请参加喺纽约南兰星举办嘅王国职务训练班。呢个系对会众长老、分区监督同区域监督为期一个月嘅培训。不过受到邀请嗰阵，我啱啱失业，经济有啲紧张。派恩布拉夫嘅一个电话公司叫我去面试。如果佢哋雇用我，我就会系呢间公司嘅第一个黑人员工。佢哋最终决定聘用我。我点样选择好呢？当时我冇钱去纽约。我想接受呢份工作，拒绝训练班嘅邀请。其实我已经打算写信谢绝邀请，但系后来发生嘅事令我终生难忘。

我哋会众有一个姊妹，佢先生唔系见证人。有一个早上，姊妹好早就敲我哋嘅门，递咗个信封俾我，入面装咗好多钱。佢同佢啲细路连续几个星期好早起身去帮人除杂草，赚钱使我能够去纽约参加训练班。佢话：“喺训练 班有咁多学咁多，然后返嚟教我哋！”我问咗嗰间公司，可唔可以推迟五个星期返工。佢哋好直接噉话：“唔得！”唔紧要，我已经决定要去参加训练班。我好高兴冇接受嗰份工！

以下系格洛丽亚对我哋喺派恩布拉夫嘅回忆：“我爱上嗰个传道地区！我有15到20个圣经学生。我哋早上逐家逐户传道，跟住就主持圣经课程，有时做到夜晚11点。做传道工作真系好开心！我好想一直做落去。我承认，我真系唔想改变自己嘅委派去做探访工作，不过睇嚟耶和华有唔同嘅谂法。”冇错，耶和华的确有佢嘅安排。

喺派恩布拉夫做先驱嘅时候，我哋已经申请过做特别先驱。我哋觉得受委任嘅可能性好高，因为我哋嘅区域监督想我哋帮助得克萨斯州嘅一个会众，希望我哋去嗰度做特别先驱。我哋都好想去，所以一直等待社方嘅答覆，但系我哋嘅信箱一直都系空嘅。后来，我哋终于收到信，我哋嘅委派系做探访工作！嗰时系1965年1月。同年，利昂·韦弗弟兄受委任做分区监督，佢而家系美国分部委员会嘅协调人。

我担心自己唔可以胜任分区监督嘅工作。大约一年前，区域监督詹姆斯·汤普森评估我嘅资格。然后，佢仁慈噉指出我需要改善嘅地方，亦都提到一个好嘅分区监督所需要嘅技巧。我从事探访工作之后好快就发现佢嘅劝告的确好有用。我受到委派之后，汤普森弟兄系我嘅第一个区域监督。我从呢个忠贞弟兄身上学到好多。

喺嗰个年代，分区监督受到嘅培训唔多。一个分区监督带我一齐探访会众。头一个星期，我观察佢点样做；然后下个星期，佢就观察我。之后，佢向我提出建议同指引，然后我哋就各自做探访工作。我记得自己同格洛丽亚讲：“佢而家真系要走？”不过，一段时间之后我意识到一件好重要嘅事。只要你愿意接受帮助，身边一直都有灵性成熟嘅弟兄可以帮到你。我好珍视呢啲经验丰富嘅弟兄俾我嘅帮 助，例如曾经做过探访工作嘅詹姆斯·布朗同埋喺伯特利服务嘅弗雷德·鲁斯克。

嗰段日子，到处都有种族歧视。有一次，三K党喺我哋探访嘅田纳西州游行。我记得另一次，传道期间我哋喺一间快餐店休息。我去洗手间嘅时候，留意到一个凶神恶煞嘅人起身跟住我，从佢嘅纹身可以睇出佢系个白人至上主义者。一个身型高大嘅白人弟兄马上行入嚟，问我：“赫德弟兄，你冇咩事啊嘛？”嗰个人冇用洗手间就即刻走咗嘞。多年来，我睇出偏见唔系因为人嘅肤色，而系因为亚当遗传嘅罪。我亦都学到，无论一个弟兄嘅肤色系点嘅，佢都系我哋嘅弟兄，必要时佢会为你牺牲生命。

我哋从事咗12年嘅分区探访工作同21年嘅区域探访工作。咁多年来，我哋得到好多福分，亦都有好多振奋人心嘅经历。好快，我哋得到另一个福分。1997年8月，我哋盼望多年嘅梦想终于实现嘞。我哋受邀请去美国伯特利服务——距离我哋第一次提交申请表已经38年。同年9月，我哋就开始喺伯特利服务。我以为我只系暂时喺伯特利帮吓手，不过事实并唔系噉。

我第一个委派系喺传道部工作，我喺嗰度学到好多嘢！弟兄要处理嚟自全国各地嘅长老团同分区监督面对嘅好多敏感而又复杂嘅问题。我好感激弟兄耐心噉训练我。如果我再次返到传道部工作，我仲系有好多嘢需要向嗰度嘅弟兄学习。

格洛丽亚同我好钟意伯特利嘅生活。我哋平时好早起身，呢个习惯有助于我哋适应伯特利嘅生活。大约一年后，我成为中央长老团传道委员会嘅助手。1999年，我受委任成为中央长老团成员。我从呢个委派学到好多嘢，但我学到最重要嘅一点系，基督耶稣先至系基督徒会众嘅头，而唔系任何人。

回顾我嘅一生，我有时觉得自己有啲似先知阿摩司。阿摩司其中一个工作系料理只有穷人先至食嘅桑叶无花果。虽然呢个工作好卑微，但耶和华都留意呢个牧羊人，委任佢做先知，并大大祝福佢嘅工作。（阿摩司书7:14,15）同样，虽然我只系印第安纳州利伯蒂镇一个贫苦农夫嘅仔，但系耶和华都关注我，向我倾注数之不尽嘅福分！（箴言10:22）我最初喺物质方面好贫乏，不过喺人生嘅最后阶段，我确实感受到自己喺属灵上非常富足，远远超乎我嘅想象！