人物生平
始貧終富
我喺美國印第安納州利伯蒂鎮嘅一間木屋出世。我出世嗰陣，父母已經有三個仔女——我哥哥同兩個姐姐。之後，媽媽又生咗我兩個弟弟同一個妹妹。
我出生嘅木屋
我在學期間，學校同小鎮都冇咩大嘅改變。從一年級到畢業，我嘅同班同學都係嗰批人。利伯蒂鎮好細，鎮上大部分人都彼此認識。佢哋知道你嘅名，你亦都知道佢哋嘅名。
我有6個兄弟姐妹，細個嗰陣就已經識得好多同農作有關嘅嘢
利伯蒂鎮周圍都係一啲小型農場，主要種植粟米。我出世嗰陣，我爸爸係當地嘅一個農夫。我十幾歲就識得揸拖拉機，亦都識得其他基本嘅耕作技巧。
我從未見過爸爸年輕嘅樣。我出世嗰陣，爸爸已經56歲，媽媽35歲。不過，我爸爸係一個健康强壯嘅人。佢好熱愛工作，亦都教導所有仔女要有噉樣嘅態度。佢賺嘅錢唔多，但係一直以來我哋都有屋住，有衫着，有飯開。另外，佢都會經常抽時間陪我哋。佢93歲去世，媽媽86歲去世。佢哋都冇事奉耶和華。我其中一個弟弟從1972年就開始做長老，一直忠貞事奉耶和華。
我嘅早年
我媽媽好虔誠，每個星期日都會帶我哋去浸信會教堂。我12歲嗰陣第一次聽到三位一體呢個教義。我好好奇噉問媽媽：“點解耶穌可以係兒子同時又係父親？”我記得佢嘅回答係：“阿仔，呢個係奧秘，係我哋冇辦法明白嘅。”呢個對我嚟講的確係個奧秘。雖然唔明白，我14歲左右仲係喺本地一條小溪受咗浸。佢哋三次將我浸落水，一次為天父，一次為兒子，一次為聖靈！
1952年——17歲，我應徵參軍之前
我讀高中嘅時候，有個朋友係職業拳擊手。佢叫我試吓打拳。於是我開始受訓，仲加入咗一個叫“金拳套”嘅拳擊組織。我打得唔係咁好，所以打咗幾場就放棄嘞。之後，我應徵加入美國軍隊，被派去德國。喺德國服役期間，上級派我去一個士官學院，佢哋覺得我有領導天賦，希望我投身軍事行業。我唔係好想留喺軍隊服役，所以兩年服役期滿咗之後，喺1956年我就光榮退役。不過冇幾耐，我就加入咗一支完全唔同嘅軍隊。
1954-1956年——我喺美國軍隊服役兩年
開始新嘅生活
我學習真理之前，由於受到電影同周圍環境嘅影響，對點樣先係一個真正嘅男人有錯誤嘅睇法。我認為傳講聖經嘅男子冇乜男子氣概。但係我之後學到嘅嘢，改變咗我嘅一生。有一日，我開住部紅色開篷車穿過市鎮，有兩個年輕嘅女子向我揮手。我認得佢哋。佢哋係我姐夫嘅兩個妹妹。佢哋係耶和華見證人。之前佢哋已經俾過我《守望台》同《警醒！》雜誌，但係我覺得《守望台》對我嚟講有啲深奧。呢次佢哋邀請我參加會衆書籍研究班——喺佢哋屋企舉行嘅一個研究聖經嘅小型聚會。我同佢哋講，我會考慮吓。佢哋微笑住問我：“你保證你會考慮？”我話：“我保證。”
我應承之後有啲後悔，但係我覺得唔應該食言，所以嗰晚我去咗。令我印象最深刻嘅係啲小朋友，估唔到佢哋居然識咁多聖經知識！雖然我同媽媽去咗咁多次教堂，但係我對聖經嘅認識好少。而家我決心要學多啲，所以我同意跟見證人學習聖經。我最開始學到嘅係，全能上帝嘅名叫做耶和華。好多年前，我問媽媽耶和華見證人係咩人，佢只係話：“噢，佢哋崇拜一個叫耶和華嘅老人家。”而家我嘅心眼先真正打開！
我知道自己揾到真理，所以進步得好快。參加聚會唔到9個月，我就喺1957年3月受浸。我嘅人生觀發生咗好大改變，我好開心從聖經學到乜嘢先至係真正嘅男子氣概。耶穌係個完美嘅人，佢比任何男人都更有力量。不過，佢並冇參與鬥爭，而係好似預言所講嘅噉，“一直甘願受苦”。（以賽亞書53:2,7）我學到，一個真正嘅基督徒“要對所有人和氣”。（提摩太後書2:24）
第二年，即係1958年，我開始做先驅。不過好快，我要暫時停止。點解？因為我決定要同格洛麗亞結婚。佢就係邀請我參加書籍研究班嘅其中一個女仔！我從來都冇後悔做呢個決定。無論之前定係而家，格洛麗亞喺我心目中都係一粒寶石，甚至比“希望之鑽”更寶貴，我好開心可以娶到佢！等佢同你哋講吓佢嘅故事：
“我有16個兄弟姐妹。媽媽係一個忠心嘅見證人，佢喺我14歲嗰陣去世，之後爸爸就開始學習聖經。媽媽走咗之後，爸爸同校長作咗一個安排。當時我家姐仲有一年就高中畢業，爸爸問家姐同我可唔可以一人返一日學。我哋輪流返學，噉其中一個人就可以留喺屋企照顧細佬妹，亦都可以喺爸爸出去工作嘅時候幫手煮飯。校長同意呢個安排，而且一直實行到我家姐畢業。兩個見證人家庭幫助我哋學習聖經。我哋兄弟姐妹中有11個長大之後成為耶和華見證人。我好鍾意喺地區做傳道，不過我好怕醜，而塞繆爾咁多年來都一直幫助我克服呢個弱點。”
格洛麗亞同我喺1959年2月結婚。我哋好開心一齊做先驅。我哋一直都渴望喺世界總部服務，所以同年7月就向伯特利提出申請。當時，親愛嘅西蒙•克拉克弟兄同我哋見面。佢同我哋講，伯特利暫時唔招收已婚夫婦。我哋好想喺伯特利服務，不過最終要等好多年先可以如願以償！
我哋寫信問總部，可唔可以派我哋去需求更大嘅地區。總部嘅答覆只有一個：阿肯色州嘅派恩布拉夫。嗰陣時，派恩布拉夫有兩群會衆，一群係白人會衆，另一群係黑人會衆。我哋被派去只有14個傳道員嘅黑人會衆。
應對種族隔離同種族主義
你可能覺得奇怪，點解耶和華見證人嘅會衆會有種族隔離。答案好簡單，喺嗰個年代冇乜選擇。黑人同白人一齊集會係非法嘅，亦都好可能因此遭到暴力襲擊。喺好多地方，如果呢兩個種族嘅見證人喺一齊崇拜，王國聚會所就有可能遭受毁壞，所以弟兄姊妹感到害怕都好正常。噉樣嘅事的確發生過。如果黑人見證人喺白人區逐家逐户傳道，佢哋會被拘捕，甚至會被毆打。所以，為咗可以傳道，我哋遵守法律，期待日後情況會好轉。
我哋傳道嗰時遇到過好多挑戰。例如，喺黑人地區傳道嗰陣，我哋有時唔小心敲咗白人家庭嘅門。呢陣時，我哋要盡快決定係向對方作一個簡短嘅聖經介紹，定係道歉之後馬上離開。當時，呢種情況經常發生。
當然，我哋需要工作嚟維持先驅生活。我哋大部分工作嘅工資都好低。格洛麗亞可以揾到一啲家政工作。有一户人允許我幫助太太，噉太太只係用一半時間就可以完成工作。我同格洛麗亞喺中午會得到一盒快餐，然後兩個人分嚟食。格洛麗亞每個星期會為一個家庭熨衫。我就打理花園，洗窗同埋做一啲零散嘅工作。我哋幫一個白人家庭洗窗，格洛麗亞洗入面，我洗出面。因為呢個工作要做一日，所以屋主會提供午飯俾我哋。格洛麗亞可以喺屋入面，不過要同呢家人分開食，而我就喺車庫入面食。我一啲都唔介意，而飯餸亦都好好味。嗰家人好友善，佢哋只不過係受當時嘅環境所影響。記得有一次，我哋喺一個加油站加完油之後，我問服務員，格洛麗亞可唔可以用嗰度嘅洗手間。佢好惡噉望住我話：“鎖咗嘞。”
令人難忘嘅仁慈表現
另一方面，我哋同弟兄姊妹享有好多美好嘅時光，我哋亦都好鍾意呢度嘅傳道工作！我哋搬去派恩布拉夫嘅時候，同當時嘅會衆組務僕人（現稱長老團協調人）弟兄一齊住。嗰陣時，弟兄嘅太太仲未接受真理，於是格洛麗亞就同佢討論聖經。同時，我都同呢對夫婦嘅女同女婿討論聖經。後來，呢個弟兄嘅女同太太都決定事奉耶和華並獻身受浸。
喺白人會衆，我哋有好多好朋友。佢哋會邀請我哋去佢哋屋企食飯。為咗避免俾人發現，天黑之後我哋先可以去。三K黨係一個提倡暴力同種族主義嘅組織，喺當地非常活躍。喺一個萬聖節晚上，我見到一個男人坐喺佢屋企門口，好似三K黨嘅人噉披住張白布同戴住個頭笠。不過呢種情況妨礙唔到弟兄姊妹互相表現仁慈。有一個弟兄為咗使我哋有錢去參加區域大會，就買咗我哋嘅1950年福特車。一個月後，有一日，我哋喺烈日之下行路做傳道以及同學生討論聖經，之後真係覺得好攰。返到屋企嘅時候，我哋好驚喜噉睇到我哋部車竟然停喺屋企前面！擋風玻璃上有張紙條寫住：“我將你哋部車作為禮物送翻俾你哋。你嘅弟兄。”
仲有一件事令我印象深刻。1962年，我受邀請參加喺紐約南蘭星舉辦嘅王國職務訓練班。呢個係對會衆長老、分區監督同區域監督為期一個月嘅培訓。不過受到邀請嗰陣，我啱啱失業，經濟有啲緊張。派恩布拉夫嘅一個電話公司叫我去面試。如果佢哋雇用我，我就會係呢間公司嘅第一個黑人員工。佢哋最終決定聘用我。我點樣選擇好呢？當時我冇錢去紐約。我想接受呢份工作，拒絶訓練班嘅邀請。其實我已經打算寫信謝絶邀請，但係後來發生嘅事令我終生難忘。
我哋會衆有一個姊妹，佢先生唔係見證人。有一個早上，姊妹好早就敲我哋嘅門，遞咗個信封俾我，入面裝咗好多錢。佢同佢啲細路連續幾個星期好早起身去幫人除雜草，賺錢使我能够去紐約參加訓練班。佢話：“喺訓練班有咁多學咁多，然後返嚟教我哋！”我問咗嗰間公司，可唔可以推遲五個星期返工。佢哋好直接噉話：“唔得！”唔緊要，我已經決定要去參加訓練班。我好高興冇接受嗰份工！
以下係格洛麗亞對我哋喺派恩布拉夫嘅回憶：“我愛上嗰個傳道地區！我有15到20個聖經學生。我哋早上逐家逐户傳道，跟住就主持聖經課程，有時做到夜晚11點。做傳道工作真係好開心！我好想一直做落去。我承認，我真係唔想改變自己嘅委派去做探訪工作，不過睇嚟耶和華有唔同嘅諗法。”冇錯，耶和華的確有佢嘅安排。
從事探訪工作
喺派恩布拉夫做先驅嘅時候，我哋已經申請過做特别先驅。我哋覺得受委任嘅可能性好高，因為我哋嘅區域監督想我哋幫助得克薩斯州嘅一個會衆，希望我哋去嗰度做特别先驅。我哋都好想去，所以一直等待社方嘅答覆，但係我哋嘅信箱一直都係空嘅。後來，我哋終於收到信，我哋嘅委派係做探訪工作！嗰時係1965年1月。同年，利昂•韋弗弟兄受委任做分區監督，佢而家係美國分部委員會嘅協調人。
我擔心自己唔可以勝任分區監督嘅工作。大約一年前，區域監督詹姆斯•湯普森評估我嘅資格。然後，佢仁慈噉指出我需要改善嘅地方，亦都提到一個好嘅分區監督所需要嘅技巧。我從事探訪工作之後好快就發現佢嘅勸告的確好有用。我受到委派之後，湯普森弟兄係我嘅第一個區域監督。我從呢個忠貞弟兄身上學到好多。
我珍視忠心嘅屬靈弟兄俾我嘅幫助
喺嗰個年代，分區監督受到嘅培訓唔多。一個分區監督帶我一齊探訪會衆。頭一個星期，我觀察佢點樣做；然後下個星期，佢就觀察我。之後，佢向我提出建議同指引，然後我哋就各自做探訪工作。我記得自己同格洛麗亞講：“佢而家真係要走？”不過，一段時間之後我意識到一件好重要嘅事。只要你願意接受幫助，身邊一直都有靈性成熟嘅弟兄可以幫到你。我好珍視呢啲經驗豐富嘅弟兄俾我嘅幫助，例如曾經做過探訪工作嘅詹姆斯•布朗同埋喺伯特利服務嘅弗雷德•魯斯克。
嗰段日子，到處都有種族歧視。有一次，三K黨喺我哋探訪嘅田納西州遊行。我記得另一次，傳道期間我哋喺一間快餐店休息。我去洗手間嘅時候，留意到一個兇神惡煞嘅人起身跟住我，從佢嘅紋身可以睇出佢係個白人至上主義者。一個身型高大嘅白人弟兄馬上行入嚟，問我：“赫德弟兄，你冇咩事啊嘛？”嗰個人冇用洗手間就即刻走咗嘞。多年來，我睇出偏見唔係因為人嘅膚色，而係因為亞當遺傳嘅罪。我亦都學到，無論一個弟兄嘅膚色係點嘅，佢都係我哋嘅弟兄，必要時佢會為你犧牲生命。
最終喺屬靈上富足
我哋從事咗12年嘅分區探訪工作同21年嘅區域探訪工作。咁多年來，我哋得到好多福分，亦都有好多振奮人心嘅經歷。好快，我哋得到另一個福分。1997年8月，我哋盼望多年嘅夢想終於實現嘞。我哋受邀請去美國伯特利服務——距離我哋第一次提交申請表已經38年。同年9月，我哋就開始喺伯特利服務。我以為我只係暫時喺伯特利幫吓手，不過事實並唔係噉。
無論結婚嗰陣定係而家，格洛麗亞都係我心目中嘅寶石
我第一個委派係喺傳道部工作，我喺嗰度學到好多嘢！弟兄要處理嚟自全國各地嘅長老團同分區監督面對嘅好多敏感而又複雜嘅問題。我好感激弟兄耐心噉訓練我。如果我再次返到傳道部工作，我仲係有好多嘢需要向嗰度嘅弟兄學習。
格洛麗亞同我好鍾意伯特利嘅生活。我哋平時好早起身，呢個習慣有助於我哋適應伯特利嘅生活。大約一年後，我成為中央長老團傳道委員會嘅助手。1999年，我受委任成為中央長老團成員。我從呢個委派學到好多嘢，但我學到最重要嘅一點係，基督耶穌先至係基督徒會衆嘅頭，而唔係任何人。
從1999年開始，我有殊榮喺中央長老團服務
回顧我嘅一生，我有時覺得自己有啲似先知阿摩司。阿摩司其中一個工作係料理只有窮人先至食嘅桑葉無花果。雖然呢個工作好卑微，但耶和華都留意呢個牧羊人，委任佢做先知，並大大祝福佢嘅工作。（阿摩司書7:14,15）同樣，雖然我只係印第安納州利伯蒂鎮一個貧苦農夫嘅仔，但係耶和華都關注我，向我傾注數之不盡嘅福分！（箴言10:22）我最初喺物質方面好貧乏，不過喺人生嘅最後階段，我確實感受到自己喺屬靈上非常富足，遠遠超乎我嘅想像！
