TI AGU aregbo mi adu sukuru yo, badungu apai anaarianga tihe rogo gaani gbata te. Rogo gu sukuru mi adu rogoho, boro anitona sukuru na ngisa aboro ki digisihe a kina yo a; zaatu, boro ani ini rimo badungu agu aboro naanidu rogo gu gbata re, na i ki ini gani a.

Rukutu aati ake gu gbata ake kirikiri nga Liberty, na guhe gbe i anaarũhe nga ngbaya. Ho i avungure ni, buba anaamangasunge fu kura basopobino sa nga guko naadu rogo gu gbata re. Ho mi adu ni ni sosono kumbagude, mi awiriki wai ka kama teretere (tracteur) na mi ki wiriki kura asunge ati a.

Paranga boro nangia buba te. Garãko adu nga 56 ti gu regbo i avungure; garã nina kidu nga 35. Ono wa si avura duwo, buba angia gu kumba naadu na umba kpotoko ti ni na kpotoko kidu ngiangia na ko kidu na ome tiko, ko aima kpinyemu nyanyaki sunge na ko ki raba awiriko dunduko i naabihe na nyanyakipaha. Ko anaagbianga bakere marã te, ono ko aima mbakada bambu ani naara rogoho, aroko kidu kina tirani ani naavoho, na riahe kidu kinaho ani naarihe, na ko anaadia regbo dedede na ani. Garãko adu nga 93 ho ko akpi ni. Nina akpi ho garãri adu ni nga 86. Boro ho dagbayo yo nairisi Yekova te. Kina tamere sa dagba awirinami yo nairiso Yekova ni ruruko na ko atona mangasunge ni bakumba rogo 1972 kada ku areme.

Nina angia kakaka boro pambori. Ri anaandu na ani ku rogo gu kanisa nga Baptist na arago poso dũ. Gu bambata regbo mi agipai tipa Tirinita angia gu regbo garãre adu nga 12. Mi ki sana nina ki ya: “Wai du rengbe Yesu kadu nga Wiri kidu berewe nga Ba kina ti ngisa regbo?” Mi natingida gupai nga gari karagapai angia: “Wire, misterio du. Ka ani rugunga tirani na ni te.” Nirengo, misterio du nangia gupai re fere. Ono wa si avura duwo, ho garãre adu ni nga 14, mi azi bapatiza rogo wiri di nga gu naadu rogo gu gbata re, i arindosi re ku ime yo bara biata ti rimo Tirinita!

Ho mi adu ni sinia yo (École secondaire), bakureami adu kinaho nga guko naana manga gu sunge nga ga takpata ti marã, na ko ki sare mi asadi sunge takpata ti marã. Sidu, mi ki tona wirikaha, na mi ki rimi gu riigbu nga ga takpata ti marã nga Golden Gloves. Mi aangianga wene batakpata gimi te, sidu, fuo ta mi kpata tipa bete regbo, mi kini mbu guhe re. Kusa, i adi re ku rogo gu Riivura nga ga Amerika na i ki kedi re ku Germani yo. Ho mi aamangasunge ni yo, gimi kikiipa aboro akedi re ku rogo gu bawirikapai nga ga asekere mbiko i aberẽ gupai nga mi ima rengba kada ni wene bangbembatayo. Gu sunge i aaida mi kakuti ni rogo gimi raka yo nga sunge asekere. Mi aadunga na nyemu ka nye ti ngba sunge asekere te, sidu, rogo 1956 tingbafuo mi nyasi gu garã ue nga ga sunge nga gu i adi re tipaha, mi ambu sunge asekere. Ono tie, si aaimanga te mi ki rimi gu sunge asekere nga gu naadu tigaha kia.

Mbata fu mi wiriki rengo, mi adu na gu bipai nga si naida kumba du ni gu boro du na ome tiní kurii aboro. Gu berãpai nga ga wai si aida kumba du nga gu naadu rogo avidio na ti agu aboro mi adu dagbayo adu na bakere maapai kurire. Gu berã naanidu rire yo nga ndikidi akumba nga agu akumba natungusapai te. Ono mi atona ka wirika agu apai nga gu naaˈaria gimi raka. Rogo kura uru sa, mi aaora ti gene vuru gbata rogo gimi zamba tarambiri, paranga adegude ue ki baya re fuoyo. Mi aima inoyo, i angia rukutu adawiri gu kumba naadi sosono dawire. Agu adegude ue re angia aDezire Yekova. I aima fu agu amagazini nga Ngbaõbambu Sinziri na Awake! mbata kusayo fere, ono mi aabihe nga Ngbaõbambu Sinziri ima kpakara fere tipa mi girogoyo. Ono bara gure, i ayambu re mi ye tipa gu Wisigo Buku Nga ga Dungurati, nga gu umba dunguratise nangia ga wisigo Ziazia Kekeapai gbiati sakaapai nga gu naana manga kpuyo yo. Mi agumba gupai fuyo nga mi nika bihe. Agu adegude naadu na mongo kpakpuyo yo re ki sana re nga, “Mo kido rani?” Mi ki ya fuyo, “Mi kidohe.”

Mi aima bira tire mbiko gu kidohe mi amangihe re, ono mi ki bihe nga ka mi gunga rii gimi kidohe te. Sidu, ni gu nyemu re, mi andu. Agude aima zeresa ngbare kisusi. Kina ngbare nazere ka bi gu badungu apai i ainihe tipa Ziazia Kekeapai! Wa vura duhe nga ani aima digo nindu na nina ku kanisa yo na aposo dũ, mi adu kindi na tooni inohe tipa Ziazia Kekeapai. Awere tie, mi aima diaberã nga mi naida ka wirika badungu apai. Mi ki idi i wisigi Ziazia Kekeapai na mi. Kina ti tonatonaha, mi awiriki gupai nga rimo gu Mbori du na Tanduapai Dũ nga Yekova. Agarã kusayo mbata fu gure, ho mi asana nina ni tipa aDezire Yekova, gupai ri agumbaha gbua nga, “Ya agu aboro re, i nairiso kura gbinza bakumba sa du rimoko nga Yekova.” Ono mi abihe nga bangire aazaka!

Mi amangi sonakumbatayo ni kina boro ipo, bambiko gupai nga mi aima inoho nga mi ima gbia rengo. Naatona ti gu regbo mi andu tipa bambata dunguratise re, si adi adiwi ribua gbua mi ki zi bapatiza, rogo Marungu 1957. Gu bipai mi adu na ni tipa raka abˈariatihe. Ho mi aberãpa gu bipai ni tipa wai si aida kumba du nga gu mi adu na ni mbata, mi na ngbarago nga mi aima wirika gupai Ziazia Kekeapai ayugoho tipa wai du ndikidi kumba. Yesu angia rengberengbe kumba. Ko adu na ome tiko kisusi akumba dunduko. Ono wa si avura duwo, ko  anaazubongo aboro na kpata te, kuba gure, ko ambu tiko i ‘umbasi pa ko,’ a wa i afura tipaha kumbatayo. (Yes. 53:​2, 7) Mi awiriki gupai nga si naida ndikidi pefuo Kristo “du ni bayee ni fu aboro dũ.”​​—⁠2 Tim. 2:​24.

Mi atona sunge abazakigene rogo gu garã nangbe fuoho rogo 1958. Ono tie, si aaimanga te si ki idi mi rugusihe mbata tipa wiri bete regbo. Tipagine? Mi adiberã nga mi naida ka manga rogatise na Gloria, nga guri naadu dagba agu adegude yo ue nga aguyo nayambu re tipa wisigo buku! Uru aadunga ho mi abira tire ti gu diaberã mi amangihe re te. Gloria adu ti gu regbo re wakina kikii geno mbia fongo, na ri areme kindi wakina ha a. Pari ima kio bangire kisusi gu mbiafongo paha nakii bangiri aboro kisusi, na mi na bakere ngbarago nga mi aima dia ri! Ri pekenga pa tiri tooni furoni:

“I avungurani dunduko 17. Nina angia Dezire Yekova na ri aima nye ni ruru ri. Ri akpi ho garãre adu ni nga 14. Gu regbo re du buba atona wirika Ziazia Kekeapai. Fuo kpio Nina, Buba amangi mbakadapai na gu bangerekurii abayugupai nga ga gu sukuru mi adu rogoho. Gure angia yangara garã fu unvurami tipa ri nyasi sinia, na Buba ki sanahe singia ani rengbe kaa ndu ku sukuru yo nga guni nandu areme guni ki nye kporo guni ki ndu gba guni ki nye tigani. Si adu nga si naida ani naandu wo tipa gupai nga boro du kinaho sa kporo kaa ngerafuo rukutu agude na gu regbo Buba ayego basunge yo ko ki ye ki bi gupai nga ni ima manga riahe fu aboro. Bangerekurii abayugupai aima dakuti gu mbakadapai re, na si ki ndu daho unvurami anyasi sukuru ni. Angbadimokporo ue nga ga aDezire Yekova naawisigo Ziazia Kekeapai na ani, na aboro 11 dagbarani yo wa ani angia agude ki sono ki da ni aDezire Yekova. Mi anaagbia ngbarago ni kerehe ti sunge tungusapai, wa vura duhe nga mi aima digo ni sovura na gupai nga ga zee. Vuru agu agarã yo ninaasusa, Sam ima undo re mi dibe gupai re.”

Ani amangi rogatise na Gloria rogo Wegebe 1959. Ani agbia ngbarago ti sunge abazakigene kina sa. Rogo Bamburu nga ga gu garã re, ani ahiisi fuomu nga ani naida ka ndu tipa sunge Betere, mbiko ani adu na bakere nyemu ka mangasunge rogo gaani bakere basunge nga ga zegino. Wirina nangia Simon Kraker nga guko naamangasunge ti gu regbo re Betere yo afura na ani tingbafuo ko bi gaani fuomu. Ko ape gupai furani nga arogotise ho i aadia yo ti gu regbo re ku Betere yo te. Ono ani adu kindi na nyemu ka mangasunge Betere yo.

Ani ake waraga fu gaani bakere basunge nga ga zegino, ki pe gupai nga ani naida i kedi rani ku rogo gu ba du na bakere zingo abatungusipai rogoho. Gu karagapai ani agbiaha nga kina ba sa rengbe ani ka ndu ku rogoho nga: Pine Bluff, Arkansas yo. Ti agu aregbo re, adungurati adu ue Pine Bluff yo, gu sa nga ga pusi aboro gu kuraha kingia ga bi aboro. I akedi rani ku rogo gu dungurati nangia ga “bi aboro,” nga gu naadu na abatungusipai rogoho gbua 14.

Mo ima rengba kaa bakabangiro nga tipagine kparakaro adu ti ni rogo gu dungurati nga ga aDezire Yekova. Na gu karagapai duho kuti gu sanahe re nga, ti agu aregbo re, pai anaadunga ho ka boro amangihe te. Ndiko anaaidanga ha fu agu aboro du na rangi kpotoyo kia i naakoda tiyo te, gu kurapai adu berewe nga gupai nga ga zuu. Rogo badungu aba, awirina aduadu na wene ndupai beyo kaa gunde nga ka pusi aboro na bi aboro koditiyo sa tipa irisombori, i ima rengba ka gbarasa gayo Bambu Kindo. Gu ngbatunga apai re anaamanga amanga. Ka agu aDezire Yekova nga bi aboro anitungusipai rogo gu dagbarago pusi aboro anaaraka rogoho, ka aborisi ani zi yo na isoke ki fu kpata fuyo. Sidu, tipa kaa tungusapai, ani airisa agu andiko re, kini moibangirani nga apai nika ariatihe ki da wenengai.

Akpakarapai adu kinaho ani anaagbiaha ti ngba gaani sunge tungusapai. Ho ani anaatungusapai ni rogo gu dagbarago nga ga bi aboro, kura aregbo anidu kinaho ani aningoka gu ngbadimo nga ga pusi aboro zanga ani ini. Si ani idi ani diberã ni ipo singia si naida ani asadi ka yugo wiripai rogo Ziazia Kekeapai yo ni guruhe watadu ani ho mbupai be airakporo na ki ndu mbatayo. Rogo gu kura aba, wo du apai anidu ti agu aregbo re.

Rengo ngaha nga, si anaaida ani naamangasunge amanga nyanyaki tipa ka gbia marã ka songoda gaani sunge abazakigene. Ani anaagbia wiri marã gbua tooni ti badungu agu asunge ani anaamangaha. Bete asunge adu kinaho nga ga ngerafuo kporo Gloria aamangaha. Rogo gu kura ba sa, i anaambugene fere mi naaundo ri tipa ri naanyesa sunge mbu regbo koyo kindi. I anaafu riahe furani nga ga bebere uru na ani anaarihe na Gloria mbata fu ani ga. Aposo dũ Gloria anaamakua aroko fu kura ngbadimokporo sa. Mi anaangerafuo vurukporo, kini zundu abangiri bambu, na kini mangi gu kura asunge. Rogo gu kporo nga ga gu kura pusi aboro sa, ani azundu abangiri bambu, Gloria aazundaha ku dimoyo, mi kini zunduhe ku zagi. Ani amangihe rogo gu uru re pitipiti, sidu, i ki fu riahe furani bebere uru ani rihe.  Gloria arihe tigari dimoyo ono angianga sa na agu aborokporo re ya, mi ki rihe tigimi zagiyo bambakada atarambiri yo. Si aabingo re na pai te. Gu riahe re aima nzira. Agu aborokporo re aima du ni wene aboro, ono agu aboro naadu patiyo aima du na maapai kuriyo. Regbo kinaho mi atingidaha nga gu ani andu ku rogo gu ba nga gu i agbia ime we rogoho. Tingbafuo ani hiisi gaani tarambiri na ime we, mi asana gu kumba naamangasunge ho singia Gloria rengbe ka ndu ku rogo gu bambu agino naadu ho. Ko angana re na zinga kpakpuko yo ki gumba gupai nga, “Si ni kisikisihe.”

Wa agu apai re avura kaa manga rani, ani aima gbia ngbarago ti agu aregbo ani aadia ha na awirina, na ani aima kpinyemu gaani sunge tungusapai! Ho ani adaada ni Pine Bluff yo, ani atona raka kua gu wirina yo nangia moyambu dungurati ti gu regbo re. Ti gu regbo re, diako aangianga Dezire Yekova te, na Gloria ki tona wisigo Ziazia Kekeapai na ri. Ti kina gu bangisa regbo re, mi atona wisigo Ziazia Kekeapai na wiri agu arogotise re gbiati kumbari. Gu nagude re gbiati gu wiiri nangia degude re ki diberã ka iriso Yekova na i ki zi bapatiza.

Wene abakurearani adu kina ti ni rogo gu dungurati nangia ga pusi aboro. I anaayamba rani tipa riahe ku kpuyo yo, ono i anaayamba rani kina yuru tipa ka boro bingo rani wa sa na yo ya. Ku Klux Klan (KKK) nga gu riigbu naasonosa gu sogote nga ga angbatunga gbiati zuu aamangasunge ti gu regbo re ni kerehe. Mi natingida gu regbo atingida mi abi kumba ko nasungu ngbadimo gako bambu ki vo gu ngbatunga roko aboro KKK anaavoho. Ono tie, gu ngbatunga apai re aakanga na awirina ti yugo wenesino te. Ti kura regbo sa, ani aaida marã tipa ka ndu tipa bakere dunguratise, na kura wirina sa ki ngbe gaani tarambiri berani tipa gupai nga ani gbia marã tipa ka ndu. Rogo kura uru sa tingbafuo diwi sa kusa, ani adu na bakere mbugo tingbafuo tungusa ani pai kporo na kporo rogo kere uru na tingbafuo wirika ani Ziazia Kekeapai na aboro. Ani ayego ku kporo ki bipai nga gu ani aainongo nga si nika manga ya. Ani abi tarambiri i narugusihe ngbadimo gaani bambu! Kekepai adu kpakpuhe yo ti wiri waraga naaya: “Mi nakaraga gaoni tarambiri ni gimi gamahe furoni. Mi du nga wirinaroni.”

Gu kura wenesino kinaho berewe nazi ngbadureyo dudunguro. Rogo 1962, mi agbia yambahe tipa Gu Sukuru Nga ga Sunge Kindo nga gu naamangi South Lansing, New York yo. Gu sukuru re adu tipa ka raba ababiapai nga ga adungurati, badona adungurati, na rimbasa adungurati, na si adi diwi sa. Ono tie, ho mi agbia gu yambahe re ni, sunge marã aadunga ho mi aamangaha te na zingo marã adu na mi ti gu regbo re ni kerehe. Ono tie, basunge nga ga aterefuni Pine Bluff yo aima yamba re ki fuku asasahe fere tipa gupai nga ka dia re tipa sunge. Ka i adi re tipa sunge, mi kangia bambata bi boro ka mangasunge rogo gu basunge re. Niyangaraha, i ki gumba gupai fere nga i ima ida ka dia re tipa sunge. Ginipai ka mi arengbe ka mangaha? Marã aadunga bere tipa ka ndu nunguro na ni ku New York yo te. Mi aberẽ dudunguro ni kerehe na mi ki dakuti gupai nga mi nadia gu sunge re adia na ki ka gu yambahe naadu tipa sukuru. Mi aambakada tire zaatu ka ke waraga nga mi ayengo berewe tipa sukuru te ho kurapai amangi ni nga gu bangire nikaa gonga ti ni ya.

Wirina rogo gaani dungurati kumbari aangianga Dezire Yekova ya, aye rogo kura uru sa ngbatutu wiso ku  kpurani na ki fu zerifu fere. Gu zerifu re ahi be marã. Ri na kura badungu awiiri aima digo nindu na awiso dũ kaa mo rende rogo gu kura ati kusayo tipa ka gbia marã wa ka mi ndu gimi nunguro ku New York yo. Ri aya, “Mo ndu ku sukuru yo ki wirikipai wenengai, na ki yego ka yugopai furani!” Kusa, mi asana gu basunge nga ga aterefuni re singia mi rengbe ka tona sunge fuyo tingbafuo aposo bisue kusa. Gu karagapai i afuhe fere nga, “Oó!” Ono si aabingo re na pai te. Mi aima diaberã. Mi na bakere ngbarago nga mi aaidanga pa gu sunge re te!

Were du Gloria atingida pa agu aregbo ani adihe ku Pine Bluff yo: “Mi aye ka kpinyemu gu dagbarago re ni kerehe! Aboro adu bere 15 kuti 20 mi aawirika Ziazia Kekeapai na yo. Sidu, ani anaandu kporo na kporo wiso na fuani ani kini wiriki Ziazia Kekeapai na aboro rogo gu yangara uru re, ti kura aregbo, ani anaawirikapai na aboro dati ndu uru 11 yuru. Ani aagbia ngbarago ni kerehe ti sunge tungusapai! Mi aima du na ngbarago ka nye ti ngba gu sunge re. Ka pe guhe nga rengo, mi aaidanga nzunzu ka mbu gu sunge ani aamangaha re tipa kaa manga gu sunge nga ga ta kaa biko adungurati te, ono Yekova adu na kurapai kia ko aaberãha tipa rani.” Nirengo, ko aima du na kurapai tipa rani.

Ho ani aamangasunge abazakigene ni Pine Bluff yo, ani ahiisi fuomu tipa kada ni kparakpara abazakigene. Ani adu na gu maabangirise nga ani nika daada ni kparakpara abazakigene mbiko gaani babi rimbasa adungurati aaida ani ndu ka undo kura dungurati sa naadu Texas yo, na ko aaida ani ndu koyo ni kparakpara abazakigene. Gupai re aima ngba tirani ni kerehe. Ani apidi karagapai be Riigbu tipa gbanga regbo, ono ka ani abingo waraga karagapai ya. Niyangaraha, waraga aye rogo kura uru sa, i afu sunge furani nga ga ta kaa biko adungurati! Gupai re amangi rogo Ngi 1965. Wiriba Leon Weaver nga guko namangasunge awere rogo gu Rondo nga ga gu Be Basunge nga ga Amerika, i amoi ko a ti kina gu ngisa regbo re ni babi adungurati.

Wiri gunde adu kina kpotoreyo nibipa da ni babi adungurati. He wa garã sa mbata kusayo, gu babi rimbasa adungurati nangia James A. Thompson, Jr., awisigi apai tipa re singia mi ima rẽ. Ko ayugu bete abangiriaba fere nga gu mi arengbe ka manga ariapai rogoho, ki pekepa agu asino si aida wene babi adungurati du na ni. Mi amangi gu sunge nga ga gu babiapai ninaata ata tipa kina bete regbo mi ki bi gupai nga si aaida aida nzunzu ko fu gu rugute fere ko afuhe re. Tingbafuo mi da ni babi adungurati, Wiriba Thompson nangia gu bambata babi rimbasa adungurati mi amangisunge na ni. Badungu apai mi awirikihe be gu ruru wirina re.

Ti agu aregbo re, ababi adungurati anaagbianga bakere rabahe te. Mi adi poso sa kaa bi kura babi adungurati wa ko andu ka bi kura dungurati sa. Fuani, gu poso nangbe fuo gure, ko kini bi re a wa mi aandu ka bi gu kura dungurati. Ko afuku aberãpai na ki yugu kuraapai fere. Ono tingbafuo gure, ko ki mburani nisarani. Mi natingida gupai atingida nga mi ape gupai fu Gloria nga, “Ya mo awere du nzunzu si aida ko mburani?” Ono tie, fuo bete regbo kusa, mi aye ka ino kura nyanyakipa pai sa. Wene awirina kinaho ti aregbo dũ nga aguyo  rengbe ka undo ro, ka si du nga mo mbugene fuyo i undo ro. Mi nabi gu undo kindi na nyanyakipaha mi agbiaha be gu ngbatunga awirina du na bakere inohe wa J. R. Brown, nga guko naadu ti gu regbo re ni gu babiapai ninaata ata, gbiati Fred Rusk nga guko nangia vuru Betere.

Sogote nga ga angbatunga adu ti gu regbo re rogo aba dũ. Ti kura regbo sa, aboro KKK adunguratiyo kaa ndu ti bangirigene rogo gu gbata nga gu ani aandu ka bi dungurati rogoho Tennessee yo. Mi natingida gu regbo atingida ani arugusi tungusapai tooni tipa ka ri riahe mataamu yo (restaurant). Mi andu ku rogo gu bambu agino nga ga akumba, na mi ki bi gupai nga kura kere kumba na kekekeke apai tiko wakina ga agu aboro nasoga kura angbatunga guari kuari na ki tona kaa peka re. Ono kura wirina nangia pusi boro nga guko naaima iriwo kisusi re watadu kisusi gu kere kumba re, aguari ki ye fuo rani. Ko asana re nga, “Wiriba Herd, ya mo apai dunduko wenengai?” Gu kere kumba re ki guari ni ipo zanga ndu ku bambu agino yo. Vuru agu agarã yo ninaasusa, mi ye ka bi gupai nga soga kura aboro ayengo nzunzu mbikopa wai du kpotoboro te; si naye mbiko ingapai, nga gu ingapai ani adihe ti Adamu nga gu du tirani dunduko. Na mi wiriki gupai a nga, wirina nga kina wirina ka rangi kpotoni vura du kina wai vurũ, na ni ima rengba ka kpi tipa ro ka si du nga si naidaha wo.

Ani adi agarã 33 kutingba gu sunge nga ga gu babiapai nata ata. Agu agarã re aima du ni kumukokumuko ho na amosoro rogo, na ki hi be agu apai nangarasa boro. Ono tie, kura mosoro kinaho berewe naaye. Rogo Buza 1997, gu sasa ani adu na ni tipa dungu agarã adati rengo. Ani agbia yambahe ka mangasunge rogo gu Betere nga ga Amerika, agarã 38 kusa wa ani ahiisi fuomu ni bambataha. Gu diwi nangbefuo ho, ani ki tona gaani sunge nga ga Betere. Mi aaberã gupai nga agu awirina nangbembatayo Betere yo aaida mi mangisunge yo kina tipa umba regbo, ono anga gure nga gupai naye ka manga te.

I afu re mbata mi mangisunge rogo Gu Papara Basunge Nangerakurii Sunge Tungusapai. Mi aima wirika badungu apai yo. Agu awirina namangasunge yo nagbia kere kpakarakpakara asanahe be gu rondo nga ga abaakumba na be ababi adungurati rogo ringara dunduko. Mi aima du na bakere tambuahe tipa gu zerangbaduse awirina adu na ni koyo du mi ni na tipa gu undo a i aafuhe fere ho i aaraba re ni. Ono wa vura duhe wo, ka i fu re mi ndu ka mangasunge yo berewe, badungu apai kindi ka mi wirikihe yo.

Ani na Gloria ima kpinyemu gu raka nga ga Betere. Sinorani niingia zinga kina boro ngbawiso, na gu sino re naundo boro Betere yo ni kerehe. Tingbafuo he wa garã sa, mi atona mangasunge ni moundo Gu Rondo Nabipa Sunge Tungusapai nga ga gu Riigbu Bipasunge nga ga aDezire Yekova. Fuani rogo 1999, i adi re ku rogo Riigbu Bipasunge. Mi ima wirika badungu apai tingba gi sunge re, ono gu nyanyakipa pai kisusi mi nawirikihe nga, Yesu Kristo du nga rii gu dungurati nga ga aKristano angianga wiri boro ya.

Ho mi angera ni kusayo ka bi gimi raka, kura regbo mi nabi tire wakina gu nebi nangia Amosa. Yekova agbe berãko koyo du gu rungorungo babanda akandoro re ni nga guko naamanga gu sunge aboro anaabihe na taatapaha nga ga ngerafuo angua duwa birikita, nga gu riahe aboro anaabihe nga si rẽ tipa kina rungorungo aboro. Mbori asia Amosa ko da ni nebi, nga gu sunge naaima du nirengo ni kumukokumuko sunge rogo toro yo. (Amosa 7:​14, 15) Teketeke a, Yekova agbeberã ko koyo du mi ni, nga wiri rungorungo basopobino rogo gu gbata nga Liberty, Indiana yo na ki kusuko bakere amaku kurire nga gu adunga bagedaha ti ni ya! (Snz. 10:22) Nirengo, mi nabihe nga raka re atona ni rungorungoho be zingo ahe, ono wai si adigo ima hi be agu aũkumuko nga ga toro, si ima kumuko kisusi wai ka mi arengbe ka berãha!