БИС коркышту кӱч ӧйдӧ јададыс, оныҥ учун амырды табарга, биске сӱреен тыҥ албаданар керек. Је амырды бир эмеш те таап алган болзоос, оны јылыйтпаска албаданар керек. Чын амырды таап аларга ла оны јылыйтпаска, Агару Бичиктиҥ кандый јӧптӧри болужар? Бис улуска бу јанынаҥ канайып болужар аргалу?

Чын амырды, кижи недеҥ де коркыбай, токуналу јӱрзе сезет. Анайда ок кижи јуук најыларлу болзо, амырды база сезет. Је бу амырды јылыйтпаска болужатан эҥ ле керектӱ неме — Кудайла колбуларды тыҥыдары. Оны канайып эдер?

Иегованыҥ чындык принциптерин ле јасактарын тузаланып турганысла, бис ого бӱдӱп турганысты ла оныла јуук колбуларлу болорго турганысты кӧргӱзедис (Иер. 17:7, 8; Иак. 2:22, 23). Мынайып этсеес, ол биске јууктап јат ла токунал табарга болужат. Исаия 32:17-де мынайып айдылат: «Чындык болоры амырга экелер. Чындыктыҥ тӱжӱми ӱргӱлјиге токунал ла јеткер јогын экелер». Бис Иеговага сӧсуккур болзоос, јӱрегисте амыр болор (Иса. 48:18, 19).

Амырды табарга, биске база не болужар? Агару тын — бистиҥ теҥеридеги Адабыстыҥ кайкамчылу сыйы (Ап. ижи 9:31).

Элчи Павел амыр «тынныҥ тӱжӱмине, ЈТ» кирет деп айткан (Гал. 5:22, 23). Кижиге чын амырды јӱк Кудайдыҥ тыны берет, оныҥ учун биске бу тынла башкарынар керек. Кудайдыҥ тыны биске бу кылык-јаҥга ӱренип аларга, канайып болужып турганыныҥ эки эп-аргазын кӧрӱп ийеектер.

 Баштапкызы, чын амырды табарга, Кудайдыҥ Сӧзин улам сайын кычырар керек (Сар. 1:2, 3). Бис Агару Бичиктиҥ кандый бир ӱзӱгин кычырала, шӱӱп сананып турзаас, агару тын биске кандый ла суракка Кудайдыҥ кӧрӱмин оҥдоп аларга болужат. Темдектезе, Кудай амырын канайып јылыйтпай турганын кӧрӱп јадыс ла амырды ол нениҥ учун сӱреен тыҥ баалап турганын оҥдоп јадыс. Је качан бис Агару Бичиктеҥ кычырганысты тузаланып турзаас, јӱрегисте амыр ла токунал болот (Укаа 3:1, 2).

Экинчизи, биске Кудайдаҥ агару тын сураар керек (Лука 11:13). Бис Иегованаҥ болуш суразаас: «Кудайдыҥ не ле сагыштаҥ бийик амыры јӱректеригерди ле сагыжыгарды Христос Иисустыҥ Бойында чеберлеер» — деп, Кудай сӧзин берет (Флп. 4:6, 7). Бис Кудайдаҥ агару тын суразаас, ол јӱрегиске амыр берет. Андый амыр јӱк Кудайла јуук колбуларлу улуста болот (Рим. 15:13).

Эмди библиялык јӧптӧрди тузаланып, керектӱ солынталар эдип, чын амырды алган улустыҥ темдерин кӧрӱп ийеектер. Андый улус јӱрегинде амыр сезет, улусла амыр јӱрет ле Иеговала да амыр болот.

Кезик улус чындыкты билердеҥ озо, чугулданып, улусты базынар болгон. Је солынып калала, ајарыҥкай, јалакай, чыдамкай ла улусла амыр јадар болуп калган (Укаа 29:22) *. Улуска чугулданбай барган ла улусла амыр јӱрерге ӱренип алган аканыҥ ла эјениҥ темин кӧрӱп ийеектер.

Дэвид ака чындыктаҥ озо улусты јамандаар болгон ло јууктарыла кату-кезем куучындажар болгон. Је соондо ол улусла амыр јадарга солынар керек деп оҥдоп алган. Ого не болушкан? Ол: «Мен библиялык принциптерди тузаланып баштаарымда, биледе бой-бойыска тоомјылу баштанар болуп калганыс» — деп айдат.

 А Рейчел эјениҥ кылык-јаҥына оныҥ билезиндеги айалга салтарын јетирген. Ол мынайып куучындайт: «Мен чугулданбаска эмдигенче тартыжып јадым, не дезе, чугулданыш бистиҥ биледе јаҥжыгу болгон». Рейчелге солынарга не болушкан? «Мен Иегованаҥ јаантайын болуш сурагам» — деп, ол айдат.

Бис библиялык принциптерди тузаланып, Кудайдыҥ тынына ижензеес, амырды табып аларыс деп, Дэвидтиҥ ле Рейчелдиҥ теминеҥ кӧрӱнет. Бис калју телекейде јадып турган да болзоос, амыр болуп артар аргалу, бу биске биледе де, христиан јуунда да амыр јӱрерге болужат. Је Иегова бисти: «Ончо улусла амыр јӱригер» — деп кычырат (Рим. 12:18). Мындый амырдыҥ болор аргазы бар ба? Мындый амырга јӱткӱгени кандый тӱжӱм экелер?

Кудайдыҥ Каандыгы керегинде јарлап, бис улуска амыр табарга болужадыс (Ис. 9:6, 7; Матф. 24:14). Кӧп улустыҥ сӱӱнчилӱ јарды угуп турганын кӧрӱп, бис сӱӱнип јадыс. Андый улус айландыра не болуп турганын кӧрӱп, чӧкӧбӧй дӧ јат, чугулданбай да јат. Олор келер ӧйгӧ ижемјилӱ кӧрӧт лӧ «амырды бедиреп, ого јӱткӱп јӱр» деген принципле јӱрет (Сар. 34:14).

Је ӱзе ле улус бистиҥ јарды баштапкы ла уккан кийнинеҥ алынбай јат (Иоанн 3:19). Андый да болзо, бис агару тынныҥ болужына иженип, сӱӱнчилӱ јарды улуска тоомјылу баштанып куучындаар аргалу. Мынайып бис Иисус Христостыҥ берген јакарузын бӱдӱредис. Бу јакару Матфей 10:11—13-те бичилген: «Ӱйге кирзегер оны уткып, „Бу ӱйдеги улуска амыр болзын!“ — дегер. Ӱйдеги улус јарамык болзо, амырыгар олорго једер; јарамык эмес болзо, амырыгар слерге бурылар». Бис бу јакаруны бӱдӱрзеес, јӱрегисте амыр јылыйбас. Анайда ок бис керегинде улустыҥ санаазы солынып, келер тушта олор библиялык јарды угар болор.

Бис јаҥныҥ улузыла, олор бисти јаратпай да турган болзо, тоомјылу куучындашсаас, ортобыста амыр болор. Африканыҥ бир орооныныҥ јаҥы Иегованыҥ Керечилерине Каандыктыҥ Туразын тудар јараду бербей турган болгон. Оныҥ учун алдында ондо миссионер болуп иштеген бир акага, ороонныҥ Лондондогы посолыла барып куучындашсын деп, јакару берилген. Бу ака чиновникке Иегованыҥ Керечилериниҥ ижи керегинде куучындап берер учурлу болгон. Бу туштажу кандый ӧткӧн?

Ака мынайда эске алат: «Приемныйга кирип келеле, секретарьдиҥ кийген кийиминеҥ ол кандый уктаҥ (племя) болгонын танып ийгем. Алдында мен олордыҥ тилин ӱренген болгом. Мен оныҥ тилине јакшылажып ийеримде, ол кайкап: „Слер биске кандый амадулу келдеер?“ — деп сурады. Мен ого тоомјылу баштанып, посолло туштажарга турганымды айттым. Секретарь ӱй кижи посолго телефон согуп ийерде, ол кабинединеҥ чыгып, мени бойыныҥ тилине уткыган. Мен посолго Иегованыҥ Керечилериниҥ ижи керегинде куучындаарымда, ол мени лаптап укты».

Аканыҥ тоомјылу куучындашканынаҥ улам, посол Иегованыҥ Керечилериниҥ ижин јакшы оҥдоп, бойыныҥ јастыра кӧрӱмин солыган. Соондо ол ороонныҥ башкарузы Каандыктыҥ туразын тударына јараду берген. Айалганыҥ мынайып солынганына акалар сӱреен тыҥ сӱӱнген! Айдарда, бис улусла тоомјылу куучындашсаас, сӱрекей јакшы једимдерге једерис ле ончо улусла амыр јӱрерис.

Иегованыҥ албатызы кӧгӱс райда јадат. Олордыҥ ортозында амыр. Бис тынныҥ тӱжӱмине кирип турган бу кылык-јаҥга ӱренип турзаас, ака-эјелерле колбуларыс оноҥ бек болор. Је эҥ керектӱзи, Иегованыҥ јарадузын аларыс ла келер ӧйдӧ ӱргӱлји амырга сӱӱнерис (2 Петр 3:13, 14).