BANGOD nagakabuhi kita sa magamo nga kalibutan, dapat gid kita magpanikasog para may paghidait kita kag kalinong. Bisan pa may ara na kita sini, nagatinguha kita gihapon nga indi ini madula. Paano makabulig ang Pulong sang Dios para matigayon naton ang matuod nga paghidait? Kag paano naton mabuligan ang iban nga matigayon man ini?

May matuod kita nga paghidait kon kalmado kita kag wala nabalaka. Dapat suod man ang aton kaangtanan sa iban. Labaw sa tanan, dapat may suod kita nga kaangtanan sa Dios. Paano naton ini mahimo?

Kon ginatuman naton ang matarong nga mga sugo kag prinsipio ni Jehova, ginapakita naton nga nagasalig kita sa iya kag gusto naton mangin suod sa iya. (Jer. 17:7, 8; Sant. 2:22, 23) Magasuod man sia sa aton kag hatagan niya kita sing kalinong sang hunahuna. Ang Isaias 32:17 nagasiling: “Ang resulta sang matuod nga pagkamatarong paghidait, kag wala sing katapusan nga kalinong kag kalig-unan.” Matigayon naton ang kalinong sang hunahuna kon tumanon naton si Jehova sing tinagipusuon.—Isa. 48:18, 19.

Matigayon man naton ang matuod nga paghidait paagi sa isa ka dalayawon nga regalo sang aton Amay sa langit, ang iya balaan nga espiritu.—Binu. 9:31.

Ginsiling ni apostol Pablo nga ang paghidait isa sa “mga kinaiya nga ginapatubas sang espiritu.” (Gal. 5:22, 23) Gani dapat kita magpagiya sa gahom sang balaan nga espiritu sang Dios para matigayon naton ang matuod nga paghidait. Binagbinagon naton ang duha ka paagi nga ginabuligan kita sang espiritu sang Dios.

Una, matigayon naton ang paghidait paagi sa pagbasa pirme sang Pulong sang Dios nga  gintuytuyan sang iya espiritu. (Sal. 1:2, 3) Kon ginapamalandungan naton ang mensahe sang Biblia, buligan kita sang espiritu sang Dios nga mahangpan ang panghunahuna ni Jehova. Halimbawa, mahangpan naton kon paano si Jehova nangin mahidaiton kag kon ngaa importante gid sa iya ang paghidait. Kon sundon naton ang ginatudlo sang Pulong sang Dios, mangin malinong gid ang aton kabuhi.—Hulu. 3:1, 2.

Ikaduha, dapat kita mangamuyo nga hatagan kita sing balaan nga espiritu sang Dios. (Luc. 11:13) Nagapromisa si Jehova nga kon mangayo kita sing bulig sa iya, “ang paghidait sang Dios nga labaw sa tanan nga paghangop magabantay sang [aton] tagipusuon kag ikasarang sa paghunahuna paagi kay Cristo Jesus.” (Fil. 4:6, 7) Kon pirme kita nagapangamuyo kay Jehova nga hatagan kita sang iya espiritu, ihatag niya sa aton ang kalinong sang hunahuna nga matigayon lang sang iya mga abyan.—Roma 15:13.

Ginbuligan sang Biblia ang madamo nga maghimo sing pagbag-o amo nga nangin suod sila kay Jehova, may kalinong sila sang hunahuna, kag may maayo sila nga kaangtanan sa ila isigkatawo. Paano nila ini nahimo?

May pila ka kauturan nga “madali maakig” sang una, pero makonsiderasyon na sila subong, mainayuhon, mapinasensiahon, kag mahidaiton sa iban. * (Hulu. 29:22) Naeksperiensiahan ini sang duha ka utod nga nabuligan nga madula ang ila kaakig kag mangin mahidaiton sa iban.

Indi anay maayo ang panimuot ni David kag may epekto ini sa iya ginahambal. Sang wala pa sia makatuon sang kamatuoran, pirme niya ginapakalain ang iban kag masakit sia maghambal sa iya pamilya. Sang ulihi, nahangpan ni David nga dapat sia magbag-o kag mangin mahidaiton. Ano ang iya ginhimo? Nagsiling sia, “Ginsunod ko ang mga prinsipio sa Biblia, gani ginatahod na ako sang akon pamilya.”

May epekto sa panimuot ni Rachel ang iya gindak-an. Nagsiling sia, “Asta subong, nabudlayan ako nga punggan ang akon kaakig kay  nagdaku ako sa pamilya nga pirme lang nagapangakig.” Ano ang nakabulig sa iya nga mangin mahidaiton? Nagsiling sia, “Pirme ako nagapangamuyo kay Jehova kag nagapangayo sang iya bulig.”

Sanday David kag Rachel duha lang sa mga halimbawa nga nagapamatuod nga matigayon naton ang paghidait kon sundon naton ang mga prinsipio sa Kasulatan kag pangayuon ang espiritu sang Dios para buligan kita. Gani bisan pa ara kita sa magamo nga kalibutan, puede naton matigayon ang matuod nga paghidait sa aton pamilya kag mga kauturan. Pero ginapalig-on kita ni Jehova nga ‘magpakighidait sa tanan nga tawo.’ (Roma 12:18) Posible gid bala ini, kag ano ang kaayuhan kon magpakighidait kita?

Paagi sa pagbantala sang mensahe parte sa Ginharian sang Dios, ginabuligan naton ang mga tawo nga matigayon ang paghidait. (Isa. 9:6, 7; Mat. 24:14) Madamo ang malipayon nga nagbaton sini. Gani wala na sila nagabatyag sang sobra nga kabalaka ukon kaakig sa makita nila nga nagakatabo sa kalibutan. May paglaum na sila sa palaabuton kag napalig-on sila nga ‘pangitaon ang paghidait, kag huptan ini.’—Sal. 34:14.

Pero wala ginbaton sang iban ang aton mensahe sang primero naton nga ginsugid ini sa ila. (Juan 3:19) Ginabuligan kita sang espiritu sang Dios para masugid naton sa ila ang maayong balita sing mahidaiton kag matinahuron. Ginasunod naton ang ginsiling ni Jesus sa Mateo 10:11-13 nga dapat naton himuon kon nagabantala: “Kon magsulod kamo sa balay, tamyawa ninyo ang tagbalay. Kon ang balay takus, magdangat sa sini ang paghidait; apang kon indi ini takus, magpabilin ang paghidait sa inyo.” Kon sundon naton ang ginsiling ni Jesus, indi madula ang aton paghidait kag nagalaum kita nga mabuligan ang tagbalay sa ulihi.

Nagapakighidait man kita kon matinahuron kita sa mga opisyal sang gobierno, bisan pa nagapamatok sila sa aton hilikuton. Halimbawa, bangod sang indi makatarunganon nga pagtamod sa aton sang gobierno sang isa ka pungsod sa Aprika, wala ini nagahatag sing permit para makapatindog kita sang mga Kingdom Hall. Gintinguhaan sang isa ka utod nga masolbar ini nga problema sing mahidaiton sang gin-asayn sia nga makigkita sa ambassador sang pungsod sa London, England. Misyonero anay ini nga utod sa sini nga pungsod sa Aprika. Ipaathag niya sa opisyal nga wala sing malain nga tuyo ang hilikuton sang mga Saksi ni Jehova sa ila pungsod. Ano ang natabo?

“Pagsulod ko sa opisina para sa mga bisita,” siling sang utod, “nakita ko nga ang ginasuksok sang receptionist amo ang bayo sang isa ka tribo kag nabal-an ko ang ila lenguahe. Gani gintamyaw ko sia sa sini nga lenguahe. Nakibot sia, kag namangkot, ‘Ano tani?’ Matinahuron ako nga nagsiling nga gusto ko makigkita sa ambassador. Gintawgan niya ang opisyal, nga naggua sa iya opisina kag gintamyaw ako sa ila lenguahe. Dayon, namati gid sia sang ginpaathag ko nga wala sing malain nga tuyo ang hilikuton sang mga Saksi.”

Bangod sang matinahuron nga pagpaathag sang utod, natadlong ang sala nga paghangop kag pagtamod sang opisyal sa aton hilikuton. Sang ulihi, naghatag na sing permit ang gobierno sini nga pungsod sa pagpatindog sang mga Kingdom Hall. Nalipay gid ang mga kauturan! May madamo gid nga kaayuhan ang pagpakita sing pagtahod sa iban, kag lakip sa sini ang paghidait.

May matuod nga paghidait ang katawhan ni Jehova subong. Mapalig-on mo pa gid ini kon panikasugan mo nga ipakita ini nga kinaiya nga ginapatubas sang espiritu sa imo kabuhi. Labaw sa tanan, mapahalipay mo si Jehova kag matigayon mo ang wala sing katapusan nga paghidait sa bag-ong kalibutan sang Dios.—2 Ped. 3:13, 14.