MENA ROKUTJA tu hupa mouye mbwe ura nozondjito ozombi, eṱe tu hepa okuungra oukukutu okukara nohange. Nandarire kutja povikando tjiva tu yenena okuraisa ohange, povikando ovingi irira ouzeu okukara nayo. Embo ra Mukuru ri tja vi ohunga nokumuna ohange ya tjiri nu ndji karerera? Nu eṱe matu yenene vi okuvatera varwe okutjita nao?

Kutja tu kare nohange ya tjiri, eendu tji tu nondjeverero na tji tu norusuvo momuinyo. Eṱe wina matu hepa okukurisa oupanga oupame kuna varwe. Otjiṋa otjinanḓengu tjinene kutja tu mune ohange yaaruhe, matu sokukara noupanga wopopezu kuna Mukuru. Matu yenene vi okutjita nao?

Tji matu ṱakamisa omatwako nomirari vya Mukuru omisemba, tu raisa kutja tu nongamburiro mu ye nu tu nonḓero yokukara noupanga wohange kuna ye. (Jer. 17:7, 8; Jak. 2:22, 23) Mukuru wina u ya popezu na eṱe nu u tu sere ondaya yokukara nohange momuinyo. Jesaja 32:17 ma ri tja: “Auhe tjinga ama tjiti imbi mbi ri ovisemba, otjinga amape kara ohange norusuvo orukarerere.” Tji matu kara nonḓuviro ku Jehova okuza komutima matu munu ohange yatjiri.—Jes. 48:18, 19.

Tate wetu womeyuru u tupa ombepo ye ondjapuke, tji tjiri otjiyandjewa tji tji tu vatera okukara nohange yaaruhe.—Oviung. 9:31.

Omuapostele Paulus wa tamuna ohange otjotjikaṋena otjitjatatu ‘tjovihape vyOmbepo.’ (Gal. 5:22, 23) Tjinga ohange ya tjiri aiza mombepo ya Mukuru, eṱe matu sokuyandjera ombepo ondjapuke kutja i tu vatere okukara nohange ya tjiri. Indjo tu tare komiano vivari ombepo ya Mukuru mu mai tu vatere okukara nohange ya tjiri.

 Otjitenga, tji matu lese Embo ra Mukuru aruhe, ri tu vatera okukara nohange. (Eps. 1:2, 3) Otja tji matu ripurire oukoto kombuze ndji ri mOmbeibela, ombepo ya Mukuru i tu vatera okukara noumune wa Jehova ohunga noviṋa. Otjotjihorera, tu muna omuano mbwe raisa ohange nokutja ongwaye okuraisa ohange tje ri otjiṋa otjinanḓengu. Indu tji matu tjiti imbi mbi twe rihongo okuza mEmbo ra Mukuru, tu kara nohange onyingi mehupo retu.—Omiano 3:1, 2.

Otjitjavari, tu sokunyingira Ombepo Ondjapuke ku Mukuru mongumbiro. (Luk. 11:13) Jehova we tu kwizikira kutja tji twa paha ombatero ye, eye me tu pe ‘ohange ye ndja kapita ozondunge azehe zovandu nu mai ṱakamisa omitima vyetu nouripura wetu mu Kristus Jesus.’ (Fil. 4:6, 7) Tji matu ningire ombepo ya Jehova mongumbiro, Mukuru wetu u tu pa ohange momuinyo, ndje yandja ku imba mbe noupanga ouwa kuna ye uriri.—Rom. 15:13.

Hapo tjiva va ṱakamisa vi omaronga wOmbeibela nga, nokutjita omarundurukiro nga ye heperwa po, kutja ve kare nohange ongarere puna Jehova, mu wo oveni, na ku novandu varwe?

Mombongo yOvakriste ndinondi muna tjiva mba ri ovandu mbe “pindika tjimanga” posi yokutja nai kave pindike tjimanga, ve notjari, ve nomuretima, nu ve nohange kuna varwe. * (Omiano 29:22) Tara komuano ovazuvarise vevari vOuhona mba, mu va vaterwa okuisa omazenge nokukurisa ohange kuna ovandu varwe.

David; ongaro ye ombi ya ṱuna komuano we wokuhungira. Ngunda ehe ri yandja ku Mukuru, eye wa ri omundu ngwa kwekurura varwe nu aa hungire eraka ehazendu mu imba oveṱunḓu re. Oruveze tja rukayenda, David wa muna kutja ma sokutanaura ongaro ye nokurira omundu wohange. Hapo imbi wa yenenisa vi? Eye wa tja: “Ami mba uta okuungurisa omirari vyOmbeibela mehupo randje, mena ranao ondengero pokati kandje neṱunḓu randje ya uta okukura.”

Rachel; omuano mbwe kura wa ṱuna kongaro ye. Eye wa tja: “Ami mbe kurira meṱunḓu  romazenge tjinene, nandarire nai mbi kondja okuhanda omapindi wandje.” Otjikwaye tji tje mu vatera okukara nohange? Eye wa tja: “Okukumba nokuṱaṱera ku Jehova.”

David na Rachel i vemwe vovihorera tjiva vyohange ndji za mokuṱakamisa omirari vyOmbeibela nokuṱaṱera kombepo ya Mukuru, kutja i tu vatere okukara nohange. Nandarire kutja tu hupa mouye ovandu mu ve ha raisa ohange, eṱe matu yenene okukara nohange momuinyo, na meṱunḓu retu na wina ku novakambure ovakwetu. Posi yokutja, Jehova u tu tunduza kutja tu kare “nohange novandu avehe.” (Rom. 12:18) Hapo iho mape ya atu tji yeninisa, nu ouwa waye mbu za mozongondjero zetu zokutjita ohange?

Okupitira motjiungura tjetu tjokuzuvarisa, tu ṋanga ovandu okumuna ouwa mombuze yohange ohunga nOuhona wa Mukuru. (Jes. 9:6, 7; Mat. 24:14) Nu otjiṋa otjiwa kutja ovengi ve yakura ombuze yetu nawa. Kunao, owo kave nomeripura womerihahiziro poo okupindikira ovitjitwa mbi ve muna ongondoroka na wo. Owo nai ve na omaundjiro yatjiri woruyaveze nu ihi tji ve hinga okuṱakamisa omambo nga; “paha ohange nu u teze yo nomutima woye auhe.”—Eps. 34:14.

Ka vandu avehe, mbe yakura ombuze yetu pomautiro. (Joh. 3:19) Posi yokutja, tu vaterwa i yombepo ya Mukuru okuvezuvarisira ombuze ombwa momuano wohange nu wondengero. Momuano mbwi, tu kongorera otjihorera tja Jesus tjokuzuvarisa tji tjiri mu Mateus 10:11-13, eye pa tja: “Tji mwa kahita mondjuwo yorive katjeye: ‘Ohange ngai kare na eṋe.’ Novandu mondjuwo ndjo tji ve mu yakura, ombinika yeṋu yohange ngai kare na wo; nungwari owo tji ve he mu yakurire, ohange yeṋu ngai kotoke ku eṋe.” Tji twa kongorere omambo wa Jesus inga, matu kara nohange nu atu kara nomaundjiro wokutja omundu ngo moruyaveze ma puratene.

Wina tu kara nohange tji matu hungire kuna ovanavihako vohoromende, mokuvepa ondengero, nandarire imba mbe pirukira oviungura vyetu. Otjotjihorera, ohoromende mehi rimwe ra Africa kai vanga oviungura vyetu, nu ihi tja tjita kutja ave ha yandjere omatungiro wOmatuwo wOmerikotameneno. Mokukondja okuzengurura otjiṋa hi mohange, omurumendu omukambure ngwa karera otjomuhindwa mehi ndo, wa hindwa okuyenda komberoo yomukuramene po wehi ndo ndji ri moLondon, tja England. Eye aa sokukemuraera ohunga noviungura oviwa vyohange Ovahongonone va Jehova mbi ve ungura mehi re. Nu hapo kwa kongorera ye?

Eye wa tja: “Tji mba uta okuhita poruveze romayakuriro wovandu, ami mba hakaena nomukazona ngu ungura mbo. Okwisira kozombanda nḓa zarere ami mba muna kutja u hungira eraka ndi mbe rihonga. Nu mbe mu korisa meraka re. Wa ri a kumwa nu e ndji pura kutja, ‘Mo paha ye?’ Mbe mu raera nombepo ombore kutja me vanga okuhakaena nomukuramene po wehi ndo. Wa tona ongoze tjimanga ku ye, nu omukuramene po ngo eya, e ndji korisa meraka ndi tu hungira mo. Okuzambo we ndji puratena nawa tji mbe mu raera ohunga noviungura vyohange vyOvahongonone va Jehova.”

Omahandjauriro womurumendu omukambure ngwi ya isa po omazuviro aehe woposyo nondorora ndji hakerwa moviungura vyetu. Kombunda yoruveze, ohoromende yehi ra Africa ndjo, ya yandjera oviungura vyetu vyokutunga mehi ndo. Tjiri ovakambure ovakwetu va yoroka tjinene mena rotjiṋa hi! Okutja tjiri, okutjinda varwe nondengero ku yeta oviṋa oviwa, nohange wina.

Ndinondi, ovandu va Jehova ve yorokera oparandisa yopopambepo mohange onene. Ove mo yenene okuweza kohange ndjo, otja tji moungurire kotjikaṋena tjovihape vyombepo hi mehupo roye. Otjiṋa otjinanḓengu tjinene, Jehova me kuyakura nu mokara nohange yaaruhe mouye wa Mukuru oupe.—2 Petr. 3:13, 14.