CHINELI tunakushakama mukaayi mudi yuma yatama, twatela kuzata nañovu hakwila twikali mukuwunda. Hela chakwila tudi nakuwunda kwantesha, ilaña chatukalilaña kutwalekahu kwikala naku. Yumanyi yashimuna Izu daNzambi yinateli kutukwasha kwikala nakuwunda kwalala nawa kwabulaña kumana? Nawa tunateli kukwasha ñahi amakwawu?

Hakwila nawu tudiluñishi kuwunda kwalala, twatela kwikala akiñewa nawa akola kumujimba. Twatela cheñi kwikala nawubwambu wawuwahi nawakwetu. Chasweja kulema, hakwila twikali nakuwunda kwabulaña kumana, twatela kwikala nawubwambu wawuwahi naNzambi. Tunateli kwila ñahi mwenimu?

Neyi twovwahila yishina ninshimbi jaYehova jaloña, tukumwekesha netu twamukuhwelela nawa tunakufwila kwikala mukuwunda nayena. (Yere. 17:7, 8; Yak. 2:22, 23) Chikufumamu, wukuswina kwakwihi nanetu nawa wukutukwasha kwikala nakuwunda kwamuyitoñojoka. Isaya 32:17 yahosha nawu: “Mudimu wakoñaña kuloña yowu kumwena; kuloña kwakakoña kuwunda nakuduñumika haya nyaka.” Tunateli kwikala nakuwunda kwamuyitoñojoka neyi tumwovwahilaña Yehova chakufuma hamuchima.—Isa. 48:18, 19.

Tata yetu wamwiwulu watwinka chawaana, spiritu yindi yajila yatukwashaña kwikala nakuwunda kwabulaña kumana.—Yilw. 9:31.

Hampinji yachindileñayi kapostolu Pawulu “nyikabu yaspiritu,” kuwunda dikwadiña kwamuchisatu. (Ñal. 5:22, 23) Chineli kuwunda kwalala kwenzaña hamuloña waspiritu yaNzambi, twatela kwiteja spiritu yajila yitukwashi kwikala nakuwunda kwalala. Tuhanjekenu njila  jiyedi munateli kutukwashila spiritu yajila kwikala nakuwunda.

Yatachi, kutaña Izu daNzambi donenawu mpinji yejima kwatukwashaña kwikala nakuwunda kwalala. (Mas. 1:2, 3) Neyi tutoñojoka hansañu yekala muBayibolu, spiritu yaNzambi yikutukwasha kwiluka chatoñojokañayi Yehova. Chakutalilahu, twadizaña chabulilañayi kuzuwa nichekalilayi wawunda. Neyi tuzatisha iyi yikuma yekala Mwizu daNzambi, tukwikala nakuwunda kwakweni muchihandilu chetu.—Yish. 3:1, 2.

Yamuchiyedi, twatela kulomba spiritu yajila yaNzambi. (Luka 11:13) Yehova watukana nindi neyi tulomba wukwashu, “kuwunda kwaNzambi kwabadika kwiluka kwejima kwakahemba nyichima [yetu] niyitoñojoka [yetu] kuhitila mudi Kristu Yesu.” (Fwi. 4:6, 7) Neyi tulombaña mpinji yejima spiritu yaYehova, Nzambi yetu wukutwinka kuwunda kwamuyitoñojoka kwekalaña hohu nawantu adi nawubwambu wawuwahi nayena.—Rom. 15:13.

Antu amakwawu anazatishi ñahi iku kufumba kwamuNsona nawa kunayikwashi ñahi kwikala mukuwunda kwabulaña kumana—naYehova, awenawu ninawakwawu antu?

Muchipompelu chawakwaKristu makonu mudi antu adiña ‘azuwa’ ilaña ichi atoñojokelañaku akwawu, akweti luwi, adiwunjika nawa azataña nawakwawu mukuwunda. * (Yish. 29:22) Dichuma cheliliwu akwakushimwina aWanta ayedi akwashiliwu kumanisha kuzuwa nakwikala awunda nawakwawu.

Yilwilu yatama yadiña naDavid yamuletesheli kwikala nanhoshelu yatama. Henohu kanda yadihani kudi Nzambi, wadiña nakutiyañana nawakwawu wanyi nawa wadiña nakuzuwila chisaka chindi. Chimwahitili mpinji, David wamweni nindi watela kuhimpa nakwikala wawunda. Wekalili ñahi wawunda? Wahosheli nindi, “Natachikili kuzatisha yishina yamuBayibolu muchihandilu chami, nkumininaku twatachikili kudilemesha muchisaka.”

Chihandilu chakunyima chamuleñeleli Rachel kwikala nayilwilu yatama. Wahosheli  nindi, “Nichayinu mpinji chankalilaña kwikala wawunda muloña nakulilili muchisaka mwadiña antu azuwa.” Chumanyi chamukwashili kwikala wawunda? Wahosheli nindi, “Kulomba kudi Yehova dikwankwashili.”

Chakutalilahu chaDavid niRachel chinamwekeshi nawu neyi tuzatisha yishina yamuNsona yonenewa nikulomba spiritu yaNzambi netu yitukwashi, tukwikala awunda. Mwamweni, hela chakwila tunakushakama mukaayi katama, tunateli kwikala nakuwunda kwamuyitoñojoka kukutukwasha kutiyañana chiwahi muchisaka ninawakwetu akwaKristu. Chasweja kulema, Yehova watuleja kwikala “awunda nawantu ejima.” (Rom. 12:18) Komana chumichi chapela, nawa yumanyi yayiwahi yikufumamu neyi tuleta kuwunda?

Chitwayaña nakushimwina, twayilejaña antu nsañu yetu yakuwunda yahosha haWanta waNzambi. (Isa. 9:6, 7; Mat. 24:14) Chamuzañalu, amavulu anakwiteja. Chinafumimu, hiyatiyaña kutama hela kuhila nayuma yinakumonawu mukaayiku. Ichi adi nakuchiñeja kwalala kwakumbidi nawa ‘anakukeñakeña kuwunda nawa anakukuhaña chakukuhaña.’—Mas. 34:14.

Hela chochu, bayi neyi ejima etejaña iyi nsañuku, hela chakwila dikatachi kuyishimwina. (Yow. 3:19) Ilaña, spiritu yaNzambi yatukwashaña kuyishimwina nsañu yayiwahi mukuwunda nawa nakalemesha. Neyi twila mwenimu, dikwila nawu tunakulondela nshimbi yatwinkeliyi Yesu neyi tunakushimwina yekala haMatewu 10:11-13, hahosheliyi nindi: “Chimweñila mwitala, imushenu antu amunodu itala. Neyi antu amunodu itala anateleli, kuwunda kwenu kwiikali nawena; ilaña neyi anateleli wanyi, kuwunda kwenu kufunti cheñi kudi enu aweni.” Neyi tulondela mwatulejeliyi Yesu, tukwendaña nakuwunda kwetu mpinji yejima nawa tunateli kukwasha antu amakwawu kumbidi.

Twaletaña cheñi kuwunda neyi tuhoshaña nawakulumpi janfulumendi nakalemesha—kushilahu niantu adiwulaña mudimu wetu. Chakutalilahu, nfulumendi yamwituña dimu damuAfrica yakaanini kutwinka lusesa lwakutuña Matala aWanta. Hakwila amanishi kukala munjila yayiwahi, manakwetu wadiña nakuzata wumishonali mudina ituña amulejeli kuya nakudimona naHigh Commissioner wamunidi ituña wadiña nakushakama kuLondon, muEngland. Wayileña nakumuleja hamudimu wazatañawu aYinsahu jaYehova mukuwunda mwituña dindi. Yumanyi yafuminimu hanyima yakuya nakumuleja?

Wahosheli nindi: “Chinashikili, namweni chavwalili muntu wunadimweni nindi katachi nami watela wahoshaña idimi dinadizili. Dichi, namwimushili mwidimi dindi. Wahayamini, nawa wañinhwili nindi, ‘Munenzi nakwiladi?’ Namulejeli nakalemesha nami inakukeña kuhosha naHigh Commissioner. Wamutuminini mukulumpi foni, wenjili nakunwana nawa wañimushili mwidimi dawu. Kufumahu, wantiyilili chikupu chinalumbulwileña nyidimu yayiwahi yazataña aYinsahu.”

Manakwetu wamulumbulwililili nakalemesha ona mukulumpi, dichi welukili chekala mudimu wetu. Chimwahitili mpinji, nfulumendi yamunidi ituña damuAfrica yayitejeli kutachika kutuña. Amanakwetu atiyili kuwaha chikupu hayuma yafumini mukuhosha mukuwunda! Mwamweni, kuhosha nawantu munjila yakalemesha mwafumaña yuma yayiwahi, kushilahu nikuwunda.

Makonu, antu jaYehova adiluñishaña paradisa yakuspiritu mwekala kuwunda. Hakwila nawu iku kuwunda kutwalekihu mwatela kwikala naniwu mukabu waspiritu muchihandilu chenu. Chuma chasweja kulema, Yehova wukuyiteja nawa mukwikala nakuwunda kwakweni nikuwunda kwahaya nyaaka mwituña daNzambi dadiha.—2 Pet. 3:13, 14.