TUNAPANDE kulifwita kukala mu kwoloka mwafwa tuli na kuyoya na vanu va futithi yaivi. Nameme tuli mu kwoloka, oloni tunapande kulifwita mangana kwoloka kwetu kutwaleleleho. Lijwi lya Njambi litukwatha vati tukale mu kwoloka thimbu yoshe? Cho twatha kukwatha vati vakwetu mangana vakale mu kwoloka.

Tunapande kukala na vithinganyeka vyavivwa mangana tukale mu kwoloka. Tunapande kukala lalo na chithzemo ku vakwetu. Oloni chuma chakama chitukwatha kukala mu kwoloka chinapu kulikuta vuthamba na Njambi. Twatha kulinga vati ngocho?

Nga twononoka mashiko a Yehova na vinangulo vyendi, cho tumwetha ngwetu twamukulahela na kushaka kulikuta vuthamba nendi. (Njele. 17:7, 8; Yako. 2:22, 23) Cho nendi alikuta vuthamba netu na kutukwatha kukala mu kwoloka. Mukanda wa Isaya 32:17 ngwawo: “Omwo vanu voshe vakalinga vije vya vuthunga, cho kukakala kwoloka na vuvwa ku myaka yoshe.” Tukala mu kwoloka nga twononoka Yehova kutundilila kwithi ya vimbunge vyetu.—Isaya 48:18, 19.

Sipilitu ya kujela ya Tate yetu wa mwilu yapwa vwana vuje vukatukwatha tukale mu kwoloka thimbu yoshe.—Vili. 9:31

“Vushuka vwa mundthzindthzime” vwa mu chitatu vwathonekele kapositolo Paulu vwapwile kwoloka. (Ngala. 5:22, 23) Tunapande kulomba sipilitu ya Njambi itutwamenene mwafwa ikeyo itukwatha kukala mu kwoloka. Tuchithimutwiyeni ha vingila vivali mangana tumone muyatha kutukwathelamo sipilitu ya Njambi kuyoya mu kwoloka.

Ngila ya kulivanga, tuyoya mu kwoloka nga thimbu yoshe tutanda Lijwi lya Njambi lya kuhwiminina. (Myatho 1:2, 3) Nga  tuthinganyekethetha ha mithzimbu ya mu Mbimbiliya, cho sipilitu ya Njambi itukwatha kumona mwakamwenamo vyuma Yehova. Chakumwenako, tuthzivithitha vyamulingitha apwe wa kwoloka na vuvwa vunatundu mu kulinga ngocho. Nga tupangetha vitulilongetha mu lijwi lya Njambi, cho thimbu yoshe tuyoya mu kwoloka.—Vithi. 3:1, 2.

Ngila yamuchivali, tunapande kulomba sipilitu ya Njambi ya kujela. (Luka 11:13) Yehova natukulahetha ngwendi: “Kwoloka kwa Njambi, kuje munu naumo wai atha kuthzivithitha, kukanyunga vimbunge [vyetu] na viyongola [vyetu] mwamuvwa muli Kilisitu Yesu.” (Fili. 4:6, 7) Nga tulombela kuli Yehova, na kukulahela sipilitu yendi, cho atukwatha kukala mu kwoloka kuje kuvakalikuwu vavuthamba vendi vakama.—Loma 15:13.

Mbimbiliya inakwatha vati vanu vamo kutengulula vuyoye vwavo na kukala mu kwoloka na Yehova na vakwavo na kupwa va kushuvuluka?

Mu chikungulukilo cha vaka-Kilisitu, muli vamo vapwile “vaka-kuluvala luvala vwathi,” oloni matangwa ano vali na kukwata mbunge cho vali na ngothzi, ngechi, vali na kuyoya na vakwavo mu kwoloka. * (Vithi. 29:22) Tuchithimutwiyeni hali vaka-kwambula vya Vumwene vavali vaje vapwile vaka-matoto manene mangana tumone muvatengulukilile na kuyoya mu kwoloka na vakwavo.

Viyongola vyavivi vya David vya kundamene endekethi yendi. Thimbu kanda alikundike kuli Njambi, wapwile muka-kutondethetha manene tupenga twavakwavo, cho lalo wapwile wa matoto manene kuli vaka-nanga yendi. Oloni mu kwita kwa thimbu, David watengulukile na kupwa munu wa kwoloka. Vika vyamukwathele ayoye mu kwoloka? Wendekele ngwendi: “Njashangumukile kupangetha vinangulo vya mu Mbimbiliya mu vyoye vwange, ngechi njakele na kuthingimika vaka-nanga yange.”

Vuyoye vwa Rachel vwa kunima vwakundamene viyongola vyendi. Wendekele ngwendi: “Njichili na kulifwita na kuluvalaluvala, mwafwa njakolelele mu nanga ije vanu voshe vapwile vaka-kuluvalaluvala.” Vika vinamukwatha kuyoya mu kwoloka na vakwavo?  Wendekele ngwendi: “Kulombela na kukulahela Yehova.”

Tunathimutwiya lika ha myanja ya vanu vavali, ije imwetha vuvwa vwa kupangetha vinangulo vya mu Mbimbiliya na kukulahela sipilitu ya Njambi. Nameme tuli na kuyoya mukati ka vanu vaka-vutenu, oloni twatha kuyoya mu kwoloka na vaka-nanga yetu na vakwetu vaka-Kilisitu. Mukemwo Yehova ali na kutushongangeya ngwendi, tunapande “kuyoya mu kwoloka kuli munu na munu.” (Loma 12:18) Twatha kuyoya mu kwoloka na vanu voshe ndi? Vuvwa muka vuli mu kulinga mutwathela mwoshe kuyoya mu kwoloka na vakwetu?

Tuli na kulanya vanu vamone vuvwa vuli mu kuyoya mu kwoloka, kwitila mu chipangi chetu cha kwambulula muthzimbu wa Vumwene vwa Njambi. (Isaya 9:6, 7; Mateo. 24:14) Vanu vavangi vali na kutambula ou muthzimbu. Ngechi, vyuma vyavivi vili nakulingiwa kuvyethi na kuvathzeyetha nambe kuvaluvaletha. Oloni, vali na lilavelelo lya vyuma vya kulutwe, cho vali na ‘kushakethzeka na kukavangeya kwoloka.’—Myatho 34:14.

Oloni kethi voshe vakatambula muthzimbu wetu, maneneni ha vungendthzi vwa kulivanga. (Yowa. 3:19) Nameme ngocho, sipilitu ya Njambi ili na kutukwatha tuvambulwile muthzimbu wauvwa mu ngila ya kwoloka na kathingimiko. Nga tulinga ngocho, cho tukavangangeya majwi a Yesu ali ku Mateo 10:11-13. Wendekele ngwendi: “Omwo mukakovela mu njuvo, endekeni ngweni, ‘kwoloka kukale neni.’ Nga vanu va mu njuvo ije vamitambula mwamuvwa, taveni kwoloka kweni kukalemo, oloni nga kuvamitambula mwamuvwa, kwoloka kweni kwiluke kuli yeni vavenya.” Nga tukavangeya chinangulo cha Yesu, cho kutulingi vyuma vije vyatha kuluvaletha vavenya njuvo na kutwonowetha kwakuvambulwila lalo.

Nga tuthimutwiya mu kathingimiko na vaka-fulumende, cho tuyoya mu kwoloka, nameme vali na kulwitha chipangi chetu. Chakumwenako, vaka-fulumende va mu lifuti limo lya mu Africa, vakele lishiko lya kuvinda kutunga Vinjuvo vya Vumwe mwafwa ya kangu kakele muje mu lifuti. Ngechi, ha kushaka kumanetha vuje vukalu mu kwoloka, vatumine ndolome uje wapwile kamishinali muje mu lifuti lya mu African, ku London, mu England mangana akalimone na Muka-Kwimanenako Lifuti. Wapandele kukamuleka chipangi chachivwa chivali na kulinga Vakaleho va Yehova muje mu lifuti. Vyuma vyakendele vati?

Uje ndolome wendekele ngwendi: “Munjaketele havakatambwila vangendthzi, njawaneneho munakathzi muka-kutambula vangethzi. Munjamwene thzalethi yendi, njanangukile ngwange akendeka ndaka ije injalilongethele. Cho nja mumenekele mu ndaka yendi. Walikomokelele manene, cho wanjihwile ngwendi, ‘vika unethzila kuno?’ Njamukumbulwile mukathingimiko ngwange njitonda kulimona na Muka-Kwimanena Lifuti. Uje munakathzi watuminine foni Muka-Kwimanena Lifuti, cho wethzile na kunjimeneka mu ndaka yowo munathzi. Cho wanjitolilile munjakele na kumuleka vipangi vyavivwa vya Vakaleho.”

Endekethi ya kathingimiko ya uje ndolome yakwathele Muka-Kwimanena Lifuti akale na viyongola vyavivwa ha chipangi chetu. Mukwita kwa thimbu, fulumende ya muje mu lifuti lya mu Africa, yatavethele chipangi chetu cha kutunga. Vandolome vavwahelelele manene ha kumanetha vuje vukalu mu kwoloka. Nga tuthingimika vanu, cho tuwana vivethzikitho vyavingi maneneni kuyoya mu kwoloka.

Vanu va Yehova vali na kulikuwa kuyoya mu kwoloka mu palandaisi ya ku sipilitu. Nga mupanga na ndthzili mu kwima vushuka vwa ku sipilitu vwa kwoloka, cho mukundwiya kwoloka kwomu mu palandaisi. Cho lalo muthzivitha Yehova kuvwaha ku mbunge na kukalikuwa kuyoya mu kaye kakaha ka Njambi muje mukakala kwoloka myaka yoshe.—2 Petu. 3:13, 14.