AXKAN onkak tel miak kuejmolmej, yejua ika ouij techkisa tiyolseujtoskej. Uan maski kemansa xa tepitsin tiyolseujtoskej, amo nochipa ueli ijkon tiksentokaj. ¿Toni tein Biblia tayolmajxitia uelis techpaleuis maj tikpiakan yekmelauj yolseuilis uan maj ijkon tiksentokakan? ¿Uan keniuj uelis tikinpaleuiskej oksekin maj kipiakan?

Uelis tikpiaskej yekmelauj yolseuilis komo tikmachiliaj ke amo teyi techpanos maski mochiua miak taman tein amo kuali. No motelneki maj tikinpiakan kuali totasojikniuan. Sayoj ke, tein okachi moneki yejua maj kuali timouikakan iuan Dios. Maj tikitakan keniuj uelis tikchiuaskej.

Tein Jiova tanauatia uan tayolmajxitia nochipa techpaleuiaj. Keman tiktakamatij, tiknextiaj ke iuan titakuaujtamatij uan ke tiknekij kuali iuan timouikaskej (Jer. 17:7, 8; Sant. 2:22, 23). Ijkon, Dios motokia touan uan techmaka yolseuilis. Isaías 32:17 kijtoua: “Yekmelauj melaujkayot kiualkuis yolseuilis, uan itakilo yekmelauj melaujkayot yeski yolseuilis uan yekyetolis nochipaya”. Kemaj, komo tiktakamatij Jiova ika nochi toyolo tikpiaskej yolseuilis (Is. 48:18, 19).

Jiova no techmaka se tel kualtsin netetayokolil tein techpaleuia maj tikpiakan yolseuilis nochipaya: yektikatsin espíritu (Hech. 9:31).

Pablo kijtoj ke yolseuilis poui itech itakilo espíritu (Gál. 5:22, 23). Yejua ika, komo tiknekij tikpiaskej yekmelauj yolseuilis, moneki tikauaskej maj yektikatsin espíritu techpaleui. ¿Keniuj uelis tikchiuaskej?

Yekinika, moneki nochipa tikixtajtoltiskej iTajtol Dios (Sal. 1:2, 3). Keman itech titanemiliaj tein tikixtajtoltiaj, yektikatsin espíritu techpaleuia maj tikajsikamatikan keniuj kiita Jiova miak taman. Kemej neskayot, tikitaj  keyej kisentoka kipia yolseuilis uan keyej kiita ke motelneki. Komo tikchiuaj tein timomachtiaj itech iTajtol, tikpiaskej okachi yolseuilis (Prov. 3:1, 2).

Ojpatika, moneki tiktataujtiskej Jiova maj techmaka iespíritu (Luc. 11:13). Jiova motenkaua nejin iniuan akin kitemouaj inepaleuil: “Dios namechtayokolijtiyas ne yolseuilis ten kachi kuika uelilis hasta amo uelis se kajsikamatis ok de keniu. Uan [...] yejua kinyekantinemis namoyolojuan uan namotamachilisuan” (Filip. 4:6, 7). Komo nochipa tiktajtaniaj iespíritu, Jiova techmakas yolseuilis tein sayoj kinmaka akin kuali mouikaj iuan (Rom. 15:13).

Biblia kinpaleuiani miakej maj mopatakan uan maj kipiakan yolseuilis nochipaya yejuan, iuan Jiova uan iniuan oksekin. Maj tikitakan seki neskayomej.

Itech inechikol Dios, moajsij tokniuan akin achto niman kualaniaj, sayoj ke axkan okachi tepoujkaitaj, amo yolijsiuij, yolnejmachmej uan kualtakamej * (Prov. 29:22). Maj tikitakan keniuj ome tokniuan uelik mopatakej.

Achto ke David mochiuaskia itaixpantijkauj Jiova, nochipa teijijtouaya uan amo kinpoujkaitaya itatuan nion iikniuan. Se tonal, kiajsikamatik ke monekia mopatas. ¿Toni kipaleuij? Yejua kijtoua: “Peuak nikchiua tein Biblia tayolmajxitia. Yejua ika, nochankauan uan nejua peuak okachi timopoujkaitaj”.

Tein kipanok Rachel keman moskaltij kichiuak maj ijsiujka kualanini. Yejua kijtoua: “Niksentoka nimochikaua nimoijkuanilis kualanyot porin keman nimoskaltij nochankauan nochipa mokualantijtoyaj”. ¿Toni kipaleuiani maj amo niman kualani? Yejua kijtoua: “Nochipa niktajtania Jiova maj nechpaleui”.

David uan Rachel sayoj ome neskayomej tein kinextia ke keman se kichiua tein  Biblia tayolmajxitia uan se kitemoua maj iespíritu Dios tepaleui, se kipia yolseuilis. Maski axkan miakej tel niman kualanij, uelis tikpiaskej yolseuilis uan kuali timouikaskej iniuan tochankauan uan tokniuan itech nechikol. Sayoj ke, Jiova techiluia maj tinemikan ika “yolseuilis [...] iuan nochi taltikpakuani” (Rom. 12:18). ¿Keniuj uelis tikchiuaskej? ¿Uan keyej moneki tiktemoskej tinemiskej ika yolseuilis iniuan oksekin?

Keman tikinmatiltiaj taltikpakneminij tein kichiuas iTekiuajyo Dios tikinpaleuiaj maj kipiakan yolseuilis (Is. 9:6, 7; Mat. 24:14, TNM). Uan techyolpaktia maj miakej techkakikan. Nejon kinpaleuia maj amo moteltekipachokanok oso maj kualanikan ika nochi tein panoua. Axkan kichiaj se taman tein yekmelauj mochiuas uan nejin kichiua maj kinekikan kitemoskej yolseuilis (Sal. 34:14).

Sayoj ke, sekin yekinika amo kinekij techkakiskej (Juan 3:19). Maski ijkon, iyektikatsin espíritu Dios techpaleuia maj tikinnojnotsakan ika yolseuilis uan poujkaitalis. Ijkon, tiktakamatij nejin tein Jesús kijtoj: “Keman nankalakiskej kalijtik, xitatajpalokan. Komo kali kinamiki, maj kiseli yolseuilis tein nankinejnekiliaj; sayoj ke komo amo kinamiki, maj yolseuilis kisentoka namouan” (Mat. 10:11-13, TNM). Tikchiuaskej tein kijtoj Jesús techpaleuia maj tiyakan ika yolseuilis uan maj satepan xa tiuelikan tikpaleuikan taltikpaknenkej.

No titapaleuiaj maj onka yolseuilis keman titajtouaj ika poujkaitalis iniuan tekiuanij, hasta akin techixnamikij. Maj tikitakan se neskayot. Akin tekiuajtij itech se altepet tein poui África kinchikoitayaj itaixpantijkauan Jiova uan amo kinkauayaj maj kichijchiuakan Kalmej kampa tiMosentiliaj. Kemej monekia moyektalis kuejmol, kititankej se tokniuj akin ompa tapaleuijka kemej misionero maj kiitati ueyi taixyekankej akin kiixnextia nejon altepet itech xolal Londres (Inglaterra). Kimelauilij tekit tein tikchiuaj tiitaixpantijkauan Jiova uan ke amo ika titakuejmolchiuaj. ¿Toni panok?

Tokniuj kijtoua: “Keman niajsik, nikitak keniuj takentoya siuat akin teseliaya uan nikmatik ke ualeuaya kampa nemij seki maseualmej akin tajtouaj se tajtol tein nejua nimomachtijka. Yejua ika niktajpaloj itech itajtol. Kimoujkakakik uan nechtajtanij keyej nikinkalpanouaya. Ika miak poujkaitalis, nikiluij ke niknekia nitajtos iuan ueyi taixyekankej. Yejua kinotsak ika teléfono, uan takat kisak uan nechtajpaloj itech itajtol. Satepan, ika miak nejmachkayot nechkakik keman nikmelauilij tekit tein kichiuaj itaixpantijkauan Jiova”.

Nejon tein tokniuj kimelauilij ika poujkaitalis tapaleuij maj nejin takat kipatani kemej kinitaya tokniuan. Tepitsin satepan, tekiuanij itech ialtepeuj peuak kinkauaj tokniuan maj kichijchiuakan Kalmej kampa tiMosentiliaj. ¡Tokniuan semi yolpakkej! Kemaj, keman tikinpoujkaitaj oksekin kiualkui tein kuali uan techpaleuia maj tikpiakan yolseuilis.

Axkan, tiitekitikauan Dios tinemij kemej yeskia itech se xochital kampa onkak yolseuilis. Uan tiksentokaskej tikpiaskej komo timochikauaj tiknextiskej nejin kualneskayot tein poui itech itakilo espíritu. Sayoj ke tein okachi moneki yejua ke Jiova techmakas itatiochiualis uan tikpiaskej yolseuilis nochipaya itech yankuik taltikpak (2 Ped. 3:13, 14).