SIHLALA ephasini elinganakuthula, yeke kufuze silwe ngamandla bona sibe nokuthula. Ngitjho nanyana singaba nakho, kusafuze silwele ukuhlala sinakho. IliZwi lakaZimu lithini ngakho? Lingasisiza njani bona sihlale sinokuthula? Abanye singabasiza njani babe nokuthula?

Wahlala utshwenyekile namkha wazizwa ungakavikeleki awubi nokuthula. Kodwana kufuze sizifundise ukuba netjhebiswano elihle nabanye. Okuqakatheke khulu kukuthi nasizakuhlala sinokuthula kufuze sakhe itjhebiswano elihle noZimu. Lokho singakwenza njani?

Navane silalela imithetho neenkambisolawulo zakaJehova ezilungileko, sisuke simtjengisa bona siyamthemba nokuthi sinesifiso sokuba nokuthula naye. (Jor. 17:7, 8; Jak. 2:22, 23) Bese yena-ke, atjhidelane nathi, asibusise ngokuba nokuthula. U-Isaya 32:17 uthi: “Iinthelo zokulunga zizakuletha ukuthula, iye, umphumela wokulunga ube kuzotha nokuvikeleka nini nanini.” Ngamanye amagama, sizokuhlala sinokuthula nasingalalela uJehova ngeenhliziyo zethu zoke.—Isa. 48:18, 19.

Okhunye okungasisiza bona sihlale sinokuthula, sisipho esisiphiwe nguZimu esimmoya ocwengileko.—IzE. 9:31.

Umpostoli uPowula uthi ukuthula kungesinye ‘seenthelo zommoya.’ (Gal. 5:22, 23) Njengombana ukuthula kuvezwa mmoya kaZimu nje, kufuze siwuvumele bona usisize sihlale sinakho. Nanzi iindlela ezimbili ummoya kaZimu osisiza ngazo.

Kokuthoma, nasilifunda qobe iliZwi  lakaZimu, sizokuba nokuthula. (Rhu. 1:2, 3) Nasisolo sizindla ngalokho iBhayibheli elikutjhoko, ummoya kaZimu uyasisiza bona sizwisise indlela uJehova acabanga ngayo ezintweni ezinengi. Kghani akusiliBhayibheli eliveza bona uZimu uhlala anokuthula nokuthi kuqakatheke kangangani kuye? Yeke nasingasebenzisa lokho okuseliZwini lakaZimu singahlala sinokuthula okukhulu.—IzA. 3:1, 2.

Kwesibili, kufuze sithandaze sibawe ummoya ocwengileko. (Luk. 11:13) UJehova usithembise bona nasibawa isizo lakhe, ‘ukuthula kwakhe okudlula koke ukuzwisisa kuzokuvikela iinhliziyo zethu nemicabango yethu ngoKrestu Jesu.’ (Flp. 4:6, 7) Yeke, nasingathandaza begodu sizithobe emmoyeni kaJehova, uzasenza sihlale sinokuthula okutholwa ngilabo abanetjhebiswano elihle naye.—Rom. 15:13.

Alo, abanye bazisebenzise njani iinluleko ezisemTlolweni? Yini abayenzileko bona bahlale banokuthula noJehova nabanye abantu, nokobana bahlale banakho ngeenhliziyweni zabo?

Namhlanjesi sinabantu ebandleni lobuKrestu ‘ebebathukuthela’ msinya kodwana nje banomusa, abapheli ihliziyo msinyana begodu banokuthula nabanye abantu. * (IzA. 29:22) Lokho khekwenzeka kabanye abatjhumayeli okwafuze basizwe bona bahlule ukuba nelaka begodu babe nokuthula nabanye abantu. Khesikhulume ngababili babo.

UDavid indlela ebekacabanga ngayo beyimenza akhulume amagama alumelako. Angakazinikeli kuZimu, bekathanda ukunyefula abantu, angakhulumi kuhle nomndenakhe. Kwakhamba isikhathi, walemuka bona kufuze atjhuguluke abe nokuthula. Alo, wakuthola njani ukuthulokhu? Uthi, “Ngathoma ukusebenzisa lokho ebengikufunda eBhayibhelini, nangambala kwathoma kwaba nehlonipho emndeninami.”

URachel wakhula anelaka. Uthi, “Ngitjho  nanje, ngisalwa nelaka, ngombana ngakhulela emndenini onelaka.” Wasizwa yini bona abe nokuthula? Nakaphendulako uthi, “Ngasizwa mthandazo nokuthemba uJehova.”

UDavid noRachel babantu ababili kwabanengi abasibonelo sokuthi nasingasebenzisa iinkambisolawulo zeBhayibheli, sizithobe emmoyeni kaZimu singaba nokuthula. Nanyana siphila ephasini elinganakuthuleli, singaba nokuthula ehliziyweni, okwenza sibe nokuthula nemindenethu namaKrestu esikunye nawo. Ngikho uJehova asithi, “Yibani nokuthula nabantu boke.” (Rom. 12:18) Kghani kuyakghonakala lokho? Nakunjalo kusiza ngani ukulinga ukuba nokuthula?

Umlayezo onokuthula womBuso kaZimu esikhuluma ngawo ungenza abantu bavune okuhle ngokuba nokuthula. (Isa. 9:6, 7; Mat. 24:14) Kuyathabisa ukuthi inengi labantu liyawamukela umlayezo lo. Lokho kubenza bahlule ilaka nokuphelelwa lithemba ngezinto ezimbi abazibonako. Kunalokho balindele ingomuso elihle, ngikho nje ‘bafuna ukuthula bakurhuluphele.’—Rhu. 34:14.

Akusiwo woke umuntu okwamukelako esikhuluma ngakho. Abanye abakwamukeli esibatjela khona. (Jwa. 3:19) Nanyana kungaba njalo, ummoya kaZimu uyasisiza bona nasikhuluma nabo sibahloniphe begodu sibe nokuthula nabo. Nasenza njalo sisuke silandela lokho okwatjhiwo nguJesu kuMatewu 10:11-13, okungilokho okufuze sikwenze esimini. Wathi: “Nanifika emzini, lotjhisani. Nangabe bayanamukela, ukuthula enibafisela khona akube lapho; kodwana nangabe abanamukeli ukuthula kwenu akubuyele kini.” Nasingalalela isiluleko sakaJesu, singakhamba sinommoya ophasi, okungenza bona sikghone ukusiza umuntu esikhathini esizako.

Singenza ubujamo bube nokuthula nasingahlonipha iinkhulu zakarhulumende, ngitjho nalezo ezingawuthandi umsebenzethu. Kwakhe kwenzeka kenye inarha e-Afrika ngebanga lebandlululo, urhulumende wakhona wala ukusinikela imvumo yokwakha amaWolo wethu. Umfowethu obekasithunywa sevangeli enarheni leyo wathunyelwa bona ayokuvakatjhela umzenda onguKomitjhinara omKhulu wenarha leyo obekaseLondon e-England. Wamtjela ngendlela aboFakazi bakaJehova abasebenza ngayo ngokuthula enarheni ye-Afrika le. Umphumela waba yini?

“Ngathi nangifika endaweni yokumukela iimvakatjhi,” kutjho yena kazi, “ngaphetha ngokuthi umuntu olapho umbethe njengabantu benarha engafunda ilimi layo leya. Ngafika-ke ngamlotjhisa ngelimi lakhe. Ngamangala sekangibuza athi, ‘ubekwa yini la?’ Ngazithoba ngathi ngizokubona uKomitjhinara omKhulu. Wamdosela umtato, weza wazongihlangabeza wangilotjhisa ngelimi lendawo. Ngemva kwalokho wangilalelisisa njengombana ngimhlathululela ngomsebenzethu nokuthi aboFakazi babantu bokuthula.”

Uthe angamhlathululela, kwakhani kusa engqondweni kaKomitjhinara, wathoma ukuwuzwisisa umsebenzethu. Kwathi ngemva kwesikhathi inarha ye-Afrika leyo yasivumela bona sakhe. Abafowethu bathaba kwamambala! Kusemtarini bona ukuhlonipha abantu kunemiphumela emihle kwenza nokuthula.

Namhlanjesi abantu bakaJehova banokuthula phakathi kwabo ngokwabo. Nawe uzokwenza kube nokuthula njengombana ulwela ukuba neenthelo zommoya kaZimu epilwenakho. Okuqakatheke khulu, uJehova uzokwamukela khona uzakuba nokuthula okungapheliko ephasini lakhe elitjha.—2 Pit. 3:13, 14.