SO E yeke na yâ ti mbeni dunia so ayeke kirikiri, a lingbi e sara ngangu si e duti na siriri. Ye oko, même tongana e yeke na siriri kete, mingi ni, e yeke sara ngangu ti bata ni. Nyen la Bible atene so alingbi ti mû maboko na e ti wara tâ siriri so aninga? Tongana nyen la e lingbi ti mû maboko na ambeni zo ti wara ni?

E lingbi ti duti na tâ siriri gï tongana e duti nzoni nga e gi bê ti e ape. E bezoin nga ti maï kpengba songo na amba ti e. Ti wara tâ siriri so aninga, kota ye ni ayeke ti gi ti duti na kpengba songo na Nzapa. E lingbi ti sara ni tongana nyen?

Tongana e sara ye alingbi na andia nga na amama-ndia ti Jéhovah so ayeke mbilimbili, e yeke fa so e yeke na confiance na lo nga e ye ti duti na siriri na lo (Jér. 17:7, 8; Jacq. 2:22, 23). Tongana e sara tongaso, lo yeke ga nduru na e nga lo yeke mû na e siriri ti bê. Ésaïe 32:17 atene: “Tâ sarango ye na lege ni ayeke sara si siriri aduti dä, nga a yeke sara si azo aduti na siriri ti bê nga na siriri aninga.” E lingbi ti wara tâ siriri ti bê tongana e mä yanga ti Jéhovah na bê ti e kue.—És. 48:18, 19.

Kpengba matabisi so alondo na Babâ ti e ti yayu, so ayeke yingo vulu ti lo, ayeke mû nga maboko na e ti wara siriri so aninga.—Kus. 9:31.

Bazengele Paul azia siriri na ota molongo ti mbage ti “lengo ti yingo”. (aGal. 5:22, 23). Teti so yingo ti Nzapa la asara si zo aduti na tâ siriri, a lingbi e zia yingo vulu amû maboko na e ti wara ni. Zia e bâ alege use so yingo ti Nzapa ayeke mû maboko na e ti wara siriri.

 Kozoni, dikongo Bible lakue ayeke mû maboko na e ti wara siriri (Ps. 1:2, 3). Tongana e gbu li na ndö ti atënë so ayeke na yâ ti Bible, yingo ti Nzapa ayeke mû maboko na e ti hinga apensé ti Jéhovah na ndö ti aye so lo ye na aye so lo ke. Na tapande, e yeke bâ ye so apusu lo ti duti lakue na siriri nga ngbanga ti nyen la siriri ayeke kota ye mingi na lo. Tongana e sara ye alingbi na aye so e manda na yâ ti Bible, e yeke duti na siriri mingi na yâ ti gigi ti e.—aProv. 3:1, 2.

Use ni, a lingbi e sambela ti wara yingo vulu ti Nzapa (Luc 11:13). Jéhovah atene so tongana e gi mungo maboko ti lo, “siriri ti Nzapa so ahon ndö ti bibe kue ayeke bata bê ti [e] nga na lege ti hingango ndo ti [e] na lege ti Christ Jésus.” (aPhil. 4:6, 7). Tongana e sambela lakue nga e hunda yingo ti Jéhovah, Nzapa ti e ayeke mû na e siriri ti bê so gï azo so ayeke na nzoni songo na lo la ayeke na ni.—aRom. 15:13.

Tongana nyen la ambeni zo asara ye alingbi na wango ti Bible so nga ala sara achangement so a bezoin ni so amû lege na ala ti duti na siriri so aninga na Jéhovah, na ala wani nga na amba ti ala?

Laso na yâ ti congrégation ti aChrétien a yeke wara ambeni zo so ândö ayeke “nduru ti sara ngonzo” me fadeso ala yeke pensé na nzoni ti amba ti ala, ala sara nzoni na zo, ala kanga bê nga ala yeke sara ye na siriri na amba ti ala * (aProv. 29:22). Bâ tongana nyen la ye so asi na ambeni wafango tënë ti Royaume use, so a mû lani maboko na ala ti hon ndö ti ngonzo ti ala nga ti duti na siriri na amba ti ala, afa so tënë so ayeke tâ tënë.

Sioni bango ndo ti David ayeke sigi lani na yâ ti atënë ti lo. Kozo ti tene lo mû terê ti lo na Nzapa, mingi ni, lo yeke kasa lani azo mingi nga lo yeke tene sioni tënë na azo ti sewa ti lo. Tongana ngoi ayeke hon, David abâ so a lingbi lo sara achangement nga lo duti na siriri na azo. Lo wara siriri tongana nyen? Lo tene: “Mbi komanse ti sara ye alingbi na amama-ndia ti Bible, na ye ti peko ni ayeke so, mbi na azo ti sewa ti mbi e ne mba mingi.”

 Aye so asi na Rachel ândö asara ngangu na ndö ti bango ndo ti lo. Lo tene: “Même laso, mbi yeke sara ngangu ti hon ndö ti ngonzo ndali ti so mbi kono na yâ ti mbeni sewa so aye ngonzo mingi.” Nyen la amû maboko na lo ti duti na siriri mingi? Lo tene: “Mbi sambela Jéhovah lakue nga mbi hunda lo ti mû maboko na mbi.”

David na Rachel ayeke gï atapande use so afa so tongana e sara ye alingbi na amama-ndia ti Bible nga e hunda na Nzapa ti mû na e yingo ti lo ti mû maboko na e, e yeke wara siriri. Biani, atâa so e yeke na yâ ti mbeni dunia so ayeke sioni mingi, e lingbi ti wara siriri ti bê so ayeke sara si e duti beoko na yâ ti sewa ti e nga na amba ti e aChrétien. Jéhovah ahunda na e ti “duti na siriri na azo kue.” (aRom. 12:18). E lingbi biani ti sara ni? Tongana e sara kue ti duti na siriri na azo, anzoni ye wa la ayeke ga na pekoni?

Na lege ti fango tënë ti e, e yeke tisa azo ti wara ye ti nzoni na lege ti tënë ti siriri na ndö ti Royaume ti Nzapa (És. 9:6, 7; Mat. 24:14). E yeke na ngia so azo mingi ayeda na ni. Ye ti peko ni ayeke so, bê ti ala anze encore ape wala ala sara ngonzo encore ape na bango aye so ayeke passé na terê ti ala. Me fadeso ala yeke na tâ beku ti kekereke na apusu ala ti “gi siriri, na [ti] tomba peko ni.”—Ps. 34:14.

Me azo kue la na tongo nda ni ayeke yeda na tënë so e fa ape (Jean 3:19). Atâa so kue, yingo ti Nzapa amû maboko na e ti fa nzoni tënë na ala na yâ ti siriri nga na nengo zo. Na sarango tongaso, e yeke sara ye alingbi na awango so Jésus amû na ndö ti fango tënë so ayeke na Matthieu 10:11-13, so atene: “Tongana ala lï na yâ ti da ni, ala bara azo ti da ni. Tongana azo ti da ni alingbi, zia siriri ti ala aduti na ndö ti da ni. Me tongana azo ti da ni alingbi pëpe, zia siriri ti ala akiri na ala.” Tongana e sara ye alingbi na wango ti Jésus so, e lingbi ti hon na siriri ti e nga e duti na beku so zo ni alingbi ti mä e mbeni lâ.

E yeke sara nga si siriri amaï tongana e sara ye na mbage ti azo ti gouvernement na nengo zo, même azo so peut-être ake tënë so e yeke fa. Na tapande, gouvernement ti mbeni kodro na Afrika azia si kengo zo senge senge akanga lege na lo ti yeda na e ti leke aDa ti Royaume. So e yeke na beku so e yeke leke tënë ni na yâ ti siriri, a tokua mbeni ita so asara kua ti missionnaire kozo na yâ ti kodro so ti bâ kota zo ti kodro ni na Londres, na Angleterre. A lingbi lo sara tënë na kota zo ni na ndö ti kua so aTémoin ti Jéhovah ayeke sara na yâ ti kodro ni na siriri. Nyen la apassé na pekoni?

Lo tene: “Na ngoi so mbi lï na bureau ti yambango azo, mbi bâ yungo bongo ti wali so asara kua kâ mbi tene lo yeke zo ti mara so mbi manda yanga ti kodro ti ala lani so. Tongaso, mbi bara lo na yanga ti kodro ti lo wani. Li ti lo akpe, lo hunda mbi, lo tene: ‘Mo ga ti sara nyen ge?’ Na nengo zo mbi tene na lo so mbi ye ti bâ ambassadeur. Lo iri ambassadeur ni na téléphone, lo ga lo wara mbi nga lo bara mbi na yanga ti kodro ni so. Na pekoni, lo dengi mê nzoni lo mä mbi na ngoi so mbi yeke sara tënë na lo na ndö ti akua ti aTémoin so ayeke maï siriri.”

So ita-koli ni asara tënë na nengo zo, a zi gbâ ti asioni bango ndo nga na kengo ndo so ambassadeur ni ayeke na ni na ndö ti kua ti e. Ambeni ngoi na pekoni, gouvernement ti kodro ti Afrika ni amû lege na e ti leke ada ni. A nzere na aita ni mingi so na yâ ti siriri a zi lege na e ti leke ada ni. Biani, ti sara ye na azo na nengo zo ayeke ga na apendere ye ti nzoni mingi, so na popo ni mo yeke wara siriri.

Laso, awakua ti Jéhovah ayeke na tâ siriri na popo ti ala. Mo yeke maï siriri so tongana na yâ ti fini ti mo mo yeke gi ti duti na mbage ti lengo ti yingo so. Kota ye ni ayeke so, mo yeke zia ngia na bê ti Jéhovah nga mo yeke duti ande na siriri mingi nga teti lakue lakue na yâ ti fini dunia ti Nzapa.—2 Pi. 3:13, 14.