NGENCA yekutsi siphila eveni lelibi, kufanele sisebente kamatima kute sibe nekuthula. Ngisho noma sinako kuthula, kufanele siphindze sisebente kamatima kuze sikulondvolote. LiBhayibheli litsi yini lengisisita sitfole kuthula sibili nalokuhlala njalo? Singabasita njani labanye kutsi babe nekuthula sibili?

Kuze sibe nekuthula sibili, kufanele sitive sivikelekile futsi singakhatsateki ngalutfo. Kufanele siphindze sibe nebuhlobo lobuhle nalabanye bantfu. Lokubaluleke kakhulu kutsi sibe nebuhlobo lobuhle naNkulunkulu. Singakwenta njani loko?

Nasilalela imiyalo yaJehova kanye netimiso takhe, sikhombisa kutsi siyafuna kuba nebuhlobo lobuhle naye. (Jer. 17:7, 8; Jak. 2:22, 23) Nasenta njalo Jehova utawusondzela kitsi futsi utasibusisa ngekuthula. Isaya 32:17 utsi: “Sitselo sekulunga siyawuba kuthula nenhlalakahle, umphumela wekulunga uyawuba kuphumula nekulondvoloteka phakadze naphakadze.” Nasilalela Jehova ngalokusuka enhlitiyweni singaba nekuthula sibili.​—Isa. 48:18, 19.

Umoya longcwele losipho lesivela kuBabe wetfu losezulwini ungasisita kutsi sibe nekuthula.​—Imis. 9:31.

Nakabala “titselo temoya,” umphostoli Pawula waveta kutsi kuthula kusitselo sesitsatfu. (Gal. 5:22, 23) Njengobe kuthula kusitselo semoya waNkulunkulu, kufanele sivume kucondziswa ngumoya longcwele kuze sibe nako. Ase sicoce ngetindlela letimbili umoya longcwele longasisita ngato kutsi sibe nekuthula.

 Kwekucala, kufundza liVi laNkulunkulu njalo kusisita kutsi sibe nekuthula. (Hla. 1:2, 3) Nasizindla ngemlayeto weliBhayibheli, umoya waNkulunkulu usisita kutsi sicondze umbono waJehova. Siyabona kutsi yini lementa ahlale anekuthula kanye nekutsi kuthula kubaluleke ngani kuye. Nangabe sikusebentisa lesikufundza eBhayibhelini, sitawuba nekuthula lokukhulu.​—Taga 3:1, 2.

Kwesibili, kufanele sicele Jehova asiphe umoya longcwele. (Luk. 11:13) Jehova usetsembisa kutsi nangabe sifuna lusito lwakhe, ‘kuthula kwakhe lokwendlula konkhe kucondza kutawulondza tinhlitiyo netingcondvo [tetfu] ngaKhristu Jesu.’ (Fil. 4:6, 7) Nangabe sithantaza njalo futsi sicela Jehova asiphe umoya wakhe, ubese usipha kuthula lokutfolwa bangani bakhe labaligugu.​—Rom. 15:13.

Labanye basisebentise njani leseluleko seliBhayibheli baphindze benta netingucuko letidzingekako kuze babe nekuthula lokuhlala njalo, futsi babe nebuhlobo lobuhle naJehova nalabanye bantfu?

Ebandleni lebuKhristu kunebantfu ‘lebebasheshe batfukutsele’ kodvwa nyalo sebayacabangela, banemusa, bayabeketela, futsi sebanekuthula nalabanye. * (Taga 29:22) Naka lokwenteka kubamemeteli lababili labasitwa kutsi bancobe intfukutselo futsi babe nekuthula nalabanye bantfu.

David bekanemkhuba lomubi wekukhulumisa kabi labanye bantfu. Asengakatinikeli kuNkulunkulu, bebakabachwensa labanye futsi awakhulumisa kabi emalunga emndeni wakhe. Ngekuhamba kwesikhatsi, David wasibona sidzingo sekutsi ashintje futsi abe nekuthula nalabanye bantfu. Wakutfola njani kuthula? Utsi: “Ngacala kusebentisa timiso teliBhayibheli ekuphileni kwami, futsi umphumela waba kutsi ngacala kuwahlonipha emalunga emndeni wami futsi nawo enta lokufanako.”

 Rachel bekangabaphatsi kahle bantfu ngenca yendlela lakhula ngayo. Utsi: “Ngisho nanyalo kusematima kuncoba intfukutselo, ngobe sonkhe ekhaya besisheshe sitfukutsele.” Yini lemsitile kutsi abe nekuthula? Utsi: “Bengithantaza njalo futsi ngicela Jehova angisite.”

Sibonelo saDavid naRachel sikhombisa kutsi sitawuba nekuthula nangabe siphila ngetimiso taNkulunkulu letiseBhayibhelini futsi sicela umoya wakhe kutsi usisite. Kuyacaca kutsi noma siphila kulelive lelibi singaba nekuthula lokutasenta sibe nebunye nemalunga emindeni yetfu kanye nemaKhristu lesikanye nawo. Jehova usincusa kutsi sibe “nekuthula nabo bonkhe bantfu.” (Rom. 12:18) Kungenteka mbamba yini loko, futsi ngutiphi tinzuzo lesingatitfola nasetama kuba nekuthula?

Nasishumayela sisuke sisita bantfu kutsi bazuze emlayetweni wekuthula lomayelana neMbuso waNkulunkulu. (Isa. 9:6, 7; Mat. 24:14) Kuyajabulisa kutsi bantfu labanyenti bayawulalela. Umphumela waloko kutsi tintfo letentekako atisabatfukutselisi kakhulu noma tibadvumate. Esikhundleni saloko sebanelitsemba lelihle ngelikusasa futsi bayakhutsateka kutsi bafunisise kuthula, futsi bakubambisise.​—Hla. 34:14.

Noma kunjalo, labanye bantfu abawutsandzi umlayeto wetfu, ikakhulukati nabasacala kuwuva. (Joh. 3:19) Kodvwa umoya waNkulunkulu uyasisita kutsi sibe nekuthula futsi sibahloniphe bantfu lesibashumayelako. Nasenta njalo sisuke silalela umlayeto Jesu lasinika wona lokuMatewu 10:11-13 lotsi: “Naningena emtini, babingeleleni labakulowo muti. Nangabe banemukela, batawusitakala ekuvakasheni kwenu, kodvwa nangabe banganemukeli, ngeke basitakale.” Nasilalela leseluleko saJesu siba nekuthula futsi sibe nelitsemba lekutsi lomuntfu utosilalela nasiphindze sibuya.

Sisuke sikhutsata kuthula nangabe sikhuluma ngenhlonipho netiphatsimandla, ngisho noma tingamelana nemsebenti wetfu. Nasi sibonelo, lomunye hulumende wakulelinye live lase-Africa akazange abavumele BoFakazi kutsi bachubeke nekwakha emaHholwa eMbuso. Kuze kulungiswe lenkinga ngekuthula, umzalwane lebekake waba sitfunywa selivangeli kulelive lase-Africa wabelwa kutsi aye eLondon, Engilandi kute ayokhuluma naMbasada wakulelive lase-Africa. Lomzalwane bekufanele amchazele ngemsebenti lowentiwa BoFakazi BaJehova eveni lakhe. Waba yini umphumela waloluhambo lwalomzalwane?

Lomzalwane utsi: “Nangibuka indlela labegcoke ngayo umuntfu lowangemukela, ngavele ngabona kutsi naye ukhuluma lulwimi nami lengalufundza. Ngako ngase ngimbingelela ngelulwimi lwakhe. Wamangala, wase ungibuta kutsi: ‘Utowentani lapha?’ Ngemusa ngacela kukhuluma naMbasada. Wamshayela lucingo, futsi weta wangikhulumisa ngelulwimi lwakhe. Ngemuva kwaloko wangilalelisisa nangimchazela kutsi umsebenti waBoFakazi BaJehova awuphatamisi kuthula.”

LoMbasada wabese sewuba nembono lokahle ngemsebenti wetfu ngenca yekutsi lomzalwane wamchazela ngenhlonipho. Ngekuhamba kwesikhatsi lohulumende wakulelive lase-Africa waphindze wabavumela kutsi bachubeke nekwakha emaHholwa eMbuso. Loko kwabajabulisa kakhulu bazalwane! Ecinisweni kuphatsa labanye ngenhlonipho kusiletsela tinzuzo letinyenti letifaka ekhatsi kuthula.

Lamuhla bantfu baJehova bajabulela kuthula sibili. Nawe ungakutfutfukisa kuthula kubantfu baNkulunkulu nangabe ulwela kuba nalesitselo semoya ekuphileni kwakho. Lokubaluleke kakhulu kutsi utawemukelwa nguJehova futsi ube nekuthula kuze kube phakadze eveni lelisha.​—2 Phet. 3:13, 14.