МИ ТУЖГЕС НО огыр-бугыр вакытэ улӥськомы. Соин ик, тупаса но сюлмын каньыллыкен улон понна, милемлы туж тыршоно луэ. Нош огдырлы ке но тупаса улонэз шедьтӥськомы ке, трос кужым пононо луэ, сое ыштонтэм вылысь. Библиысь кыӵе визь-кенешъёс юрттозы милемлы зэмос тупаса улонэз a шедьтыны но сое утьыны? Кызьы ми мукетъёсызлы но юрттыны быгатомы?

Зэмзэ ик тупаса улон понна, сюлмамы оскон но каньыллык луыны кулэ. Озьы ик, милемлы умой эшъёс кулэ. Нош тужгес но кулэез — Инмарен матысь кусыпъёс. Мар кароно, соосты тупатон понна?

Иеговалэн шонерлыко возетъёсызъя но законъёсызъя улыса, ми возьматӥськомы, солы оскиськомы но соин эшъяськеммы потэ шуыса (Иер. 17:7, 8; Иак. 2:22, 23). Нош со ми доры матэ кариське но юрттэ милемлы сюлмамы каньыллык шедьтыны. Исаиялэн 32:17 гожтэмын: «Шонерлыклэн ужез тупаса улон луоз, шонерлыко судлэн емышез — пумтэм вапумъёсы каньылэн, кышкатэк улон луоз». Ми Иеговалэсь кылзӥськиськомы ке, милям сюлмамы тупаса улон луоз (Ис. 48:18, 19).

Мар эшшо юрттоз на милемлы тупаса улонэз шедьтыны? Святой дух — инмысь Атаймылэн паймымон кузьымез (Ап. уж. 9:31).

Апостол Павел тупаса улонэз «духлэн емышез» пӧлы пыртэ (Гал. 5:22, 23). Зэмос тупаса улонэз Инмарлэн духез сётэ бере, милемлы лэзёно со дух милемын мед кивалтоз шуыса. Ойдолэ эскеромы кык амалъёсты, кызьы Инмарлэн духез юрттэ милемлы со сямез будэтыны.

 Нырысетӥез, сюлмамы тупаса улон мед луоз шуыса, милемлы ялан Инмарлэсь Кылзэ лыдӟоно (Пс. 1:2, 3). Библиысь кылбуръёс вылын малпаськыкумы, святой дух юрттэ милемлы валаны, мае Инмар яратэ, нош мае уг. Кылсярысь, малпаськыса ми тодӥськомы, мар каре Инмар тупаса улон понна, но малы со сое сокем дунъя. Нош куке ми Библиысь лыдӟеммес улонамы пыртӥськомы, сюлэммы тупаса улонэн но каньыллыкен пачылме (Мад. 3:1, 2).

Кыкетӥез, милемлы Инмарлэсь святой духсэ курыса вӧсяськоно (Лука 11:13). Иегова кылзэ сётэ, ми солэсь юрттэтсэ куримы ке, соку «Инмарлэн каньыллыкез», кудӥз котькыӵе визьлэсь но вылӥын, милесьтым сюлэмъёсмес но, малпанъёсмес но «Иисус Христос бордын утьыса возёз» шуыса (Флп. 4:6, 7). Инмарлэсь святой духсэ куримы ке, со милемлы тупаса улон но каньыллык сётоз, кудзэ со аслаз эшъёсызлы гинэ сётэ (Рим. 15:13).

Ойдолэ эскеромы соослэсь примеръёссэс, кинъёс Библиысь визь-кенешъёсты санэ понӥзы, кулэ луись воштӥськонъёс лэсьтӥзы но зэмос тупаса улонэз шедьтӥзы — Иеговаен, асэнызы но мукет адямиосын тупаса улонэз.

Куд-ог адямиос, зэмлыкез тодэмзылэсь азьло, асьсэлэсь вожпотэмзэс мукетъёсыз вылэ кисьто вал. Но бератаз соос воштӥськизы но лякытэсь, чидасесь но тупаса улонэз яратӥсесь луизы (Мад. 29:22) b. Ӵапак озьы вал кык адямиосын, кудъёсыз дышетскизы вожзэс поттытэк улыны но мукетъёсыныз лякыт вераськыны.

Дэвидлэн умойтэм сямыз вераськоназ шӧдӥське вал. Инмарлы сӥзиськемезлэсь азьло со ӵемысь мукетъёссэ тэрга вал но матысь адямиосыныз лек кылъёсын вераське вал. Дыр ортчемъя Дэвид валаз, солы воштӥськоно но мукетъёсыныз тупаса улыны тыршоно шуыса. Мар солы юрттӥз? Со вера: «Мон улонам Библиысь возетъёсты кутыны кутски, соин ик семьяямы ог-огмес гажан будӥз».

Тани Рейчеллэн примерез. Югдур, кудаз со будӥз, туж шӧдӥськиз солэн сямъёсыз вылын. Со вера: «Али но мон вожпотонэным  нюръяськисько, малы ке шуоно милям семьяямы туж ӵем ог-огенызы лекен вераськылӥзы». Мар юрттӥз Рейчеллы воштӥськыны? Со вера: «Мон ялан Иеговалэсь юрттэтсэ кури».

Дэвидлэн но Рейчеллэн примеръёсысьтызы адӟиське, Библиысь возетъёсты улонамы кутӥмы но Инмарлэн духезлы оскиськимы ке, милям тупаса улонмы луоз шуыса. Лек дуннеын улыса но, ми сюлмамы тупаса улонэз утьыны быгатӥськомы. Со юрттэ милемлы семья куспамы но, кенешын но тупаса улыны. Нош Иегова ӧте милемыз: «Вань адямиосын тупаса улэ» (Рим. 12:18). Луэ-а озьы улыны? Но малы милемлы мукетъёсыныз тупаса улыны тыршоно?

Инмарлэн Эксэйлыкез сярысь ӟеч иворез вераса, ми адямиослы тупаса улон шедьтыны юрттӥськомы (Ис. 9:6, 7; Матф. 24:14). Шумпотоно, сое тросэз кылзӥзы шуыса. Соин ик, котырысьтызы кылдэм югдурез адӟыса, соос шумпотонзэс уг ышто но вожзэс поттыса уг уло ни. Соослэн вуоноезлы оскиськонзы вань но соос таӵе возетъя уло: «Тупаса улонэз утча — со сьӧры мын» (Пс. 33:15).

Но ӟеч иворез ваньзы ик уг кылзо, тужгес но, куке нырысетӥзэ кыло (Иоанн 3:19). Озьы ке но, святой духлэн юрттэменыз, ми адямиослы ӟеч иворез гажаса вераны быгатӥськомы. Озьы лэсьтыса, ми кылзӥськиськомы визь-кенешъёслэсь, кудъёссэ Иисус Христос аслаз дышетскисьёсызлы сётӥз. Матфейлэсь 10:11—13 солэн визь-кенешез гожтэмын: «Нош корка пырыкуды, ӟечкыласа тазьы шуэлэ: „Каньыллык та коркалы“. Та юрт ярамон ке, тӥляд каньыллыкты со вылэ лыктоз; нош ярантэм ке, тӥляд каньыллыкты тӥ доры берытскоз». Та визь-кенешлэсь кылзӥськимы ке, сюлмамы тупаса улон но каньыллык луэм сяна, ми сярысь мукет адямиос умоен малпалозы на. Мукет дыръя, оло нош, соос Библиысь ӟеч иворез но кылзозы.

Со сяна, ми тупаса улыны тыршиськомы, куке кивалтӥсьёсын гажаса вераськиськомы, озьы ик соосыныз но, кудъёсыз ми шоры умоен уг учко. Кылсярысь, Африкаысь одӥг шаерын кивалтӥсьёс вын-агайёслы Эксэйлык юртъёс пуктыны уг лэзё вал. Вын-агайёс валало вал, соослы та шуг-секытэз умоен сэрттыны-пертчыны тыршоно шуыса. Соос куризы одӥг вын-агаез, кудӥз огвакытэ со шаерын миссионер луыса ужаз-тыршиз, мыныны Лондонэ вылӥ комиссарен пумиськыны но вераны солы, кыӵе уж нуо Иеговалэн Адӟись-Ивортӥсьёсыз но соослэсь тупаса улыны тыршемзэс. Кызьы ортчиз со пумиськон?

Вын-агай тодаз вае: «Приёмное пыреме бере секретарьлэн дӥсезъя мон валай, со сыӵе калыкысь шуыса, кудӥзлэсь кылзэ мон дышетӥ вал. Мон соин солэн вордскем кылыныз ӟечбуръяськи. Со паймиз но юаз: „Кыӵе муген тӥ лыктӥды?“ Мон лякытэн верай солы, мынам вылӥ комиссарен пумиськеме потэ шуыса. Со жингыртӥз кузёезлы, но соиз потыса монэн аслаз кылыныз ӟечбуръяськиз. Мон верай комиссарлы Адӟись-Ивортӥсьёслэн ужзы но тупаса улыны тыршемзы сярысь. Со монэ туж сак кылзӥз».

Вын-агайлэн комиссарен гажаса вераськемез юрттӥз комиссарлы Иеговалэн Адӟись-Ивортӥсьёсыз сярысь шонертэм малпанъёссэ воштыны но соос сярысь зэмзэ тодыны. Кӧня ке дыр ортчыса, Африкаысь со шаерлэн кивалтӥсьёсыз лэзизы вын-агайёслы Эксэйлык юртъёс пуктыны. Макем шумпотӥзы солы вын-агайёс! Зэмзэ ик, мукетъёсыныз гажаса вераськимы ке, милям котькинэн тупаса улонмы луоз.

Иеговалэн калыкез духовной райын улэ, кытын котькудӥз ог-огеныз тупаса улэ. Духлэн емышез пӧлы пырись та сямез возьматӥмы ке, вын-агайёсын но сузэр-апайёсын кусыпъёсмы эшшо но юнгес луозы. Нош тужгес но валтӥсез — озьы ми Иеговалы ярамон луомы но пырак дауръёс ӵоже вуоно райын тупаса улонлы шумпотомы (2 Пётр 3:13, 14).