1, 2. (1) Itini ˈayaw no kinafalah ci Yis to ˈorip a dadaya, pasowalay to nisawawaan to maanan hani? (Nengnengen ko satapangan coka.) (2) Songilaˈen ita a misimsim koniya lalangian hano masakalimelaan hani? (3) Oniya lalakaw wa milengo to maanan?

ITINI ˈayaw no kinafalah ci Yis to ˈorip a dadaya, halafinay masasowal to tarokos, mikiˈok cangranan tangongolay ko olah no niyah cangranan, pasowal cangranan to kilang no fadisosoˈa sapatinako. Pakaynian ni Yis toniya sapatinako a pakalalok ko nisawawaan ‘padotoc a ciheci’, fanekfek a patenak to lihaf no Hongti Kitakit.​—Yohani 15:8.

² Cowa ko pasowal aca ni Yis to nisawawaan mamidemak to maanan, pasowalayho to misamaanay hano mihaen to demak. Mitadtadan ni Yis ko nisawawaan to lalangian a mitosil, songilaˈen ita a misimsim koniya lalangian hano masakalimelaan hani? Ano haratengen ita koni lalangian, wa fanekfek a ‘misawacay i polong no finawlan.’ (Matay 24:13, 14) Oniya lalakaw wa milengo to sepat lalangian a mitosil, wa milengoho to sepat sapafeli ni Yihofa kitaanan a sapatelong, padama kitaanan mihadidi a ciheci.

3. (1) Pakayni i Yohani 15:8, o maanan ko lalangian ita a mitosil? (2) O sapatinako ni Yis a fadisosoˈmitaypiyaway to maanan? Misamaanay hano matatodongay koniya sapatinako?

³ Mitosil kita o sakakaay lalangian, o papaˈdil ci Yihofaan ato patahekal to ngangan Ningra. (ˈOsien ko Yohani 15:1, 8.) Sinanoten, palinian ni Yis ko Wama ningra to palahaday to fadisosoˈa tamdaw, o kilang no fadisosoˈko niyah, o caˈang ko nisawawaan. (Yohani 15:5) Mihaenay, o heci no Hongti Kitakit no Krisciyang patinakoen to fadisosoˈo matatodongay. Sanay ko sowal ni Yis to nisawawaan: ‘Padotoc kamo a ciheci . . . mihaen mapaˈdil ko Wama ako.’ O ngaˈayay a fadisosoˈ, o sakaliko no palahaday a tamdaw, misarocod to ˈicel kita a milasil to lihaf no Hongti Kitakit, wa paˈdil ci Yihofaan.—Matay 25:20-23.

4. (1) Sasamaan kita patahekal to ngangan no Kawas? (2) Pakayni i patahekal to ngangan no Kawas, samaanay ko harateng iso hani?

⁴ Mitosilay a demak ita, samaanay patahekal to ngangan no Kawas hani? Soˈlinay haw i, awaay ko pakayraan ita mitongal to kafangcal no ngangan no Kawas, samanen o fangacalay ko ngangan Ningra, nikawrira sinanoten ko sowal ni Isaya: ‘Kangodoen ko makomoday tatapangan ci Yihofa.’ (Isaya 8:13) O pakayraan ita a patahekal to fangcalay ngangan no Kawas i, mihayi to saˈakawangay ko ngangan Ningra, halo padama to tao mikangodo toni fangcalay a ngangan. (Matay 6:9) Tinakoen pasowal kita to tamdaw to makapahay capeling ni Yihofa, ato cowa ka falic ko araaw Ningra i tamdaw, mihaen a micoli to mangah ato paoraf ni Satan. (Satapangan 3:1-5) O roma i, misaˈicel kita papadama to tamdaw mihapinang to citatodongay ci Yihofa milifok to ‘ˈdil, pikangodo, ˈicel,’ mihaen o patahekalay to ngangan ni Yihofa. (Paˈarawan 4:11) Ci Lofin 16 miheca a misakafah sanay ko sowal: “Miakoˈiday kako to misangaˈay to pohong a Tatapangan pafeli takowanan to toki a misawacay Cingranan, maharateng konini pairaay to ˈicel ako a padotoc mitosil.”

5. (1) Pakayni i Yohani 15:9, 10, o maanan ko lalangian ita a mitosil hani? (2) Samaanay paihekal ci Yis to kalimelaan ko mihadidiay?

⁵ ˈOsien ko Yohani 15:9, 10. O kalimelaan a lalangian ita a milasil to lihaf no Hongti Kitakit pakayniay kaolah ci Yihofaan aci Yisan. (Marko 12:30; Yohani 14:15) Pasowalan ni Yis ko nisawawaan, cowa ko itini aca i olah ningra, ‘wa mararid i olah [ningra].’ Hano mihaen ko sowal ni Yis hani? Samanen ira ko mihadidiay a pinangan no tamdaw ngaˈ, ngaˈay fanekfek to kaˈorip no Krisciyang. Itini Yohani 15:4-10 toni pina sinael, kinapinaay masowal ni Yis ko ‘mararid’ sanay a tilid, paihekal to kalimelaan ko mihadidiay.

6. Samaan kita paihekal to makalimay ko niyah mararid i olah ni Kristo hani?

⁶ Samaan kita paihekal to makalimay ko niyah saka raridaw itini i olah ni Kristo, ngaˈay a cadaen ningra kita hani? Midofdof to limoˈot ni Yis. Misaaliay ci Yis kitaanan mitodong cingranan, samaanay ko demak ningra hani? Sanay ko sowal ni Yis: ‘Midofdofay kako to limoˈot no Wama, hato marariday i olah Ningra.’ Soˈlinay ci Yis patireng to taˈarawan no mita.—Yohani 13:15.

7. O midoedoay ato olah iraay ko maanan kalaliting?

⁷ ˈAyaw no pasowal ci Yis to kilang no fadisosoˈa sapatinako, somowalay to tarokos to kalaliting no midoedoay ato olah, sanay: “O micaˈedongay [micadaay] to limoˈot ako ato midoedoay to limoˈot ako a tamdaw i, o maolahay i takowanan.” (Yohani 14:21) O  roma i, midoedo to limoˈot ni Yis a mitosil paihekalay to maolahay kita to Kawas, samanen o limoˈot ni Yis paihekalay to harateng no Wama ningra. (Matay 17:5; Yohani 8:28) Tano waywayan kita paihekal to maolahay ci Yihofaan aci Yisan, mihaen wa ngaˈay materek i olah Nangra.

8, 9. (1) O roma a lalangian ita a mitosil o maanan hani? (2) Itini Icikil 3:18, 19 ato 18:23 samaanay padama kitaanan fanekfek a mitosil i tamdaw?

⁸ O roma lalangian ita a mitosil pasayra i tamdaw mihadak to sarikec. Itini Fangcalay Cudad, panganganan ci Nowa to “o patenakay to moecelay a demak no Kawas.” (ˈOsien ko 2 Pitiro 2:5.) O mitosilay a demak ningra iˈayaw no Lenlen mahaopay ko pirikec to tamdaw mangataayto ko sakalaˈafo. Hano mafanaˈkita hani? Sinanoten samaanay ko sowal ni Yis: “Iˈayaw no kalenlenan a romiˈad i, komaen, mitaˈowak, cifaˈinay, cifafahi ko tamdamdaw tangasa i picomodan na Nowa i tamina. Tangasa i nika iraan no Lenlen a mikeric i cangraan a maemin i, caay ka fanafanaˈ cangra. O mamahaen ko nipiliyaw noya tamdaw a tayni.” (Matay 24:38, 39) Soˈlin caka pisikol ko tamdaw to sarikec ni Nowa itiya, o madimadiay a Nowa kamayan padotoc milasil to mikitiniay ci Yihofaan sakalaˈafo a lihaf.

⁹ Anini, milasil kita to lihaf no Hongti Kitakit, pairaay to hatoki no tamdaw cipinang to araaw no Kawas i tamdaw. Mahecaday kita ci Yihofaan, makalimay micada ko tamdaw to soˈlinay kimad a ‘maˈorip’. (Icikil 18:23) Pakalomalomaˈkita mitosil anca itini kaˈalomanan a misawacay i, wa misaˈicel pasifanaˈto tamdaw mangataayto ko Hongti Kitakit no Kawas, hanaca wa palaˈafo to tatiihay a hekal.​—Icikil 3:18, 19; Taniil 2:44; Paˈarawan 14:6, 7.

10. (1) O sowal i Matay 22:39, o maanan ko lalangian ita a mitosil? (2) Tadtaden to samaanay ci Pawlo aci Silas i Filipi a padama to milaocay to kapalitan a tamdaw.

¹⁰ O roma papadama kitanan fanekfek mitosil a lalangian i maolahay kita to tao. (Matay 22:39) Samanen maolahay kita to tao, mafanaˈayho ano tahalifa ko tamdaw to maanan a demak mamafalic ko harateng halatek, mihaenay wa fanekfek kita a mitosil i tamdaw. O tarokos ci Pawlo ato cafay ningra ci Silas, iraay ko mahecaday a milifetan. Itini Filipi i, mipalitan no misafelitay cangra, tahini lafii, fahal sanay ko taˈangayay ˈatoray, mafohatay ko fawahan no kapalitan. Calemcemay ko milaocay to kapalitan milaliw ko mapalitay, sakinasoˈotaw. Owaw sanay ci Pawlo: “Aka piriˈang to tireng!” Ikor milicayay ko milaocay to kapalitan: “Maanen ako ko demak ta mapaˈorip kako saw?” Pasowalan ni Pawlo aci Silas cingra: “Pasoˈlinen ko tapang a Yis ta mapaˈorip kiso,” sanay.​—Dmak 16:25-34.

11, 12. (1) O pakayniay i milaocay to kapalitan a maˈoningay, iraay ko maanan a kalaliting to mitosilay a demak hani? (2) Hano papadotoc kita a mitosil i tamdaw?

¹¹ O pakayniay i milaocay to kapalitan a maˈoningay iraay ko maanan a kalaliting to mitosilay a demak hani? Sinanoten, ikor no  tahalifa ko milaocay to kapalitan to ˈatoray i, mafalicay ko waywayan, misaaliayto sapadama. Mahecaday onini, o roma tamdaw soˈlin caay sapitengilaw to lihaf no Fangcalay Cudad, kawra ano tahalifa cangra to taˈangayay kafalic i, mamafalic ko harateng halatek, misaali to sapadama. Tinakoen, fahal saan malahedaw ko ngaˈayay katayalan a fahekaˈen, anca caka ngaˈay ko raramod mamalicinowasto; o roma tamdaw iraay ko pakidemay a adada rawraw sanay ko harateng, anca mapatay ko kaolahan a tamdaw masomad ko falocoˈ. Ano tahalifa cangra to pasangaray i, wa misatapang miharateng to araaw no tamdaw maˈorip, caayho ka harateng nangra konini i saˈayaw. Mihaen ko harateng nangra halatek, “Maanen ako ko demak ta mapaˈorip kako saw?” Mihaenay, ano tosilen ita ko hatiniay tamdaw i, sapitengilaw cangra to mitenakan ita a hatokel halatek.

¹² Madimadi kita to mitosilay a demak, itini kaolahan no tao a mitengil i, ngaˈay mihinom cangranan. (Isaya 61:1) 38 miheca miemin to toki dademak a Salot, sanay ko sowal: “O tamdaw anini cowa pakahela to patosokan no kaˈorip, misaaliay cangra sapitengilaw to ngaˈayay lihaf.” Ci Afin 34 miheca misakafah, sanay ko sowal: “Palinien to salakatay, ˈalomanay tamdaw tada matoleday ko falocoˈ, makalimay kita sapadamaaw cangranan, mitosil cangranan.” O olah to tao, o kalimelaan a lalangian, micoroh kitanan padotoc a mitosil i tamdaw!

13, 14. (1) Itini Yohani 15:11 somowalay to maanan a sapatelong hani? (2) O lipahak ni Yis samaanay malo lipahak no mita hani? (3) O lipahak samaanay padama kitaanan i mitosilay demak?

¹³ ˈAyaw no kinafalah ci Yis to ˈorip a dadaya, pahapinangay to tarokos, iraay ko pina sapatelong ngangaˈay padama cangranan mihadidi a ciheci. O maanan a sapatelong hani? Mikitini toniya sapatelong wa samaan kita milifok to saka ciepoc hani?

¹⁴ O lipahak. Midoedo to limoˈot ni Yis a mitosil, o karetengay a ˈinorong han? Cowa, mahererek ci Yis somowal to kilang no fadisosoˈa sapatinako, mamahapinang ita, o tahalifa ko mitosilay a tamdaw to lipahak. (ˈOsien ko Yohani 15:11.) Mikiˈokay ci Yis, o lipahak ningra o mamalo lipahak no mita. Wa samaan a mahaen hani? Mahecad o masowalay iˈaˈayaw, palinian ni Yis ko niyah to kilang no fadisosoˈ, palini to nisawawaan to caˈang. Painiay ko kilang no fadisosoˈto saali no caˈang. Makakiting ko caˈang ato kilang, wa malifok ko nanom ato haled. Mahecaday kita, mikelec mikotod to pasalipaˈan ni Kristo, ngaˈayto kita malacecay cingraanan, mikitini milifet to lipahak ningra i pidoedo to araaw no Wama. (Yohani 4:34; 17:13; 1 Pitiro 2:21) 40 miheca a misakafah a Hanian, sanay ko sowal: “O malifaay a lipahak mitosil padamaay takowanan fanekfek dademak ci Yihofaan.” O hatiniay tangongolay a lipahak paˈicelay kitanan padotoc a mitosil, ano itinito pasangaray tosilen a kilac wa ngaˈay padotoc a tanektek.​—Matay 5:10-12.

15. (1) Itini i Yohani 14:27 somowalay to maanan a sapatelong hani? (2) O dipayal samaanay padama kitaanan a ciheci hani?

¹⁵ Dipayal. (ˈOsien ko Yohani 14:27.) ˈAyaw no somowal ci Yis to kilang no fadisosoˈa sapatinako pasowalay to tarokos: ‘Pafelien ako kamo to dipayal no mako.’ O sapafeli ni Yis a dipayal samaanay padama kitanan a ciheci hani? Ano mihadidi kita i, mafanaˈto kahemekan ni Yihofa aci Yis ko niyah, itini falocoˈwa ira ko dipayalay a harateng. (ˈOlic 149:4; Loma 5:3, 4; Kolosay 3:15) Ci Ofing 45 miheca a miemin to toki a tayal, sanay ko sowal: “Soˈlin marorayay mitosil, kawra marenecay ko falocoˈ, tada ciepocay ko kaˈorip.” Tada miakoˈiday kami ci  Yihofaan aci Yisan padotoc pafeli to dipayal tamiyanan!

16. (1) Itini i Yohani 15:15 somowalay to maanan a sapatelong hani? (2) Wa samaan ko tarokos padotoc malawidang ci Yisan hani?

¹⁶ Malawidang. Sowal ni Yis tokel ningra to lipahak no tarokos nanay ‘o awaay ko dangoc,’ halo pitadtad to kalimelaan no kinafalahay a olah. (Yohani 15:11-13) Dotoc sanay ko sowal ni Yis: ‘O widang hanto ako kamo a mitahidang.’ Ngaˈay malo widang ni Yis, tada o kalimelaan a sapatelong! Wa samaan ko tarokos padotoc malawidang ci Yisan hani? Wa ‘padotoc a ciheci’ cangra. (ˈOsien ko Yohani 15:14-16.) Somowal ci Yis toniya sowal ˈayaw no tosa miheca, na miocoray to tarokos: ‘Ka lomakat kamo patenak, mangatato a talahekal ko pikowan no Kawas.’ (Matay 10:7) Mihaenay, ˈayaw no kinafalah ci Yis to ˈorip a dadaya pakalalokay cangranan fanekfek a mitosil. (Matay 24:13; Marko 3:14) Sapidoedoaw ko tarokos to limoˈot ni Yis, cowa ko madoloay, kawra wa ngaˈay malaˈosi cangra, hanaca mararid a malawidang ni Yis. O salicay i, sasamaan cangra ngaˈmalaˈosi ko mitosilay ˈinorong hani? O caˈof milingatay to roma a sapatelong.

17, 18. (1) Itini i Yohani 15:16 somowalay to maanan a sapatelong hani? (2) Oniya sapatelong samaanay padama to nisawawaan hani? (3) O maamaan a sapatelong paˈicelay kitaanan hani?

¹⁷ Milifok to caˈof ko satolon. Sowal ni Yis, “O sapafeliaw no Wama to ningitangitan namo Cingraan a maamaan pakayni i ngangan ako.” (Yohani 15:16) Pakaynien i tarokos koniya sowal, oniya sakiˈok pakalalokay to falocoˈ! * Soˈlin cowa ka cipinang ko tarokos to mamahererek to ko ˈorip no mikayatay cangranan a Yisan, kawra cowa ko cecayay a matoˈol cangra. Makahiay ci Yihofa a pacaˈof to satolon no tarokos, padama cangranan a midemak to mitosilay a ˈinorong. Caka halafin, soˈlinay malifet nangra ko pitengil ni Yihofa to satolon nangra, padama cangraanan.​—Dmak 4:29, 31.

¹⁸ Anini, mihadidi kita a ciheci, wa mahecad to tarokos a malawidang ni Yis. Cowa ka hatini aca, wa ngaˈay pasoˈlin kita makahiay ci Yihofa pacaˈof to satolon no mita, padama kitaanan miremo to pasangaray i pitosilan. (Filipi 4:13) Tada mahemekay kita tengilen no Kawas ko satolon, hanaca ngaˈay a malawidang ni Yis! Oniya mikitiniay ci Yihofaan a sapatelong paˈicelay kitaanan padotoc a ciheci.​—Yakop 1:17.

19. (1) Hano padotoc kita mitosil to tao hani? (2) O maamaan sapatelong papadama kitaanan milaheci to patorodan no Kawas a demak hani?

¹⁹ Mikitini toniya lalakaw mananamay ita ko sepat a lalangian to sapadotocaw a mitosil: Paˈdil ci Yihofaan ato patahekal to ngangan Ningra, maolah ci Yihofaan aci Yisan, mihadak to sarikec i tamdaw, maolah to tao. O roma, iraay ko sepat a sapatelong no mita, o lipahak, dipayal, malawidang ni Yis, milifok to caˈof ko satolon. Oniya sapatelong paˈicelay kitaanan milaheci to patorodan no Kawas a demak. Maˈaraw ni Yihofa misarocod ko falocoˈato harateng no mita ‘padotoc a ciheci,’ tada o mamahemek Cingra!