1, 2. (a) Ari nabbayag kabalin na patay ni Jesus, anni nga informasion i nikagina ta disipulosna? (Innan i letratu ta gafu na artikulo.) (b) Ngatta sigga-nono tam nakuan nu ngatta mallayyagayya ittam? (c) Anni i ikonsidera tam?

TA ULTIMO nga gabi nige na patay ni Jesus, nabayagna nga kinibbida i apostolesna, nga tatun ay nipasiguraduna nira i ayana. Nipakanawagna gapa nira i ilustrasion na fun na ubas, gittana nagigiammu tam ta nappasa nga artikulo. Gukaban natun nga angngarigan, pinagaram ni Jesus i disipulosna nga ari magimmang nga ‘mavvunga tu aru’​—kayàna kagian, tulu-tuloy nga ilayyagayya i mensahe na Pappatulan.​—Juan 15:8.

² Ngem, kinagi ni Jesus ta disipulosna ari laman nu anni i kawagan nga kuadda, nu ari ngatta kuadda yatun. Nitudduna nira i rason ira nu ngatta ituppalda i pallayyagayya. Ngatta importante para nittam nga mammuan danatun nga rason? Nu sigga-nono tam nu ngatta mawag tu itulu-tuloy tam nga mallayyagayya, mapaguyu ittam nga magattam ta ‘pangipakannammu ta ngamin nga sinolay.’ (Mat. 24:13, 14) Ikonsidera tam gafu i appa nga rason maggafu ta Katurakan nu ngatta mallayyagayya ittam. Kunne na gapa, usitakkattam i appa nga regalu ni Jehova nga manguffun nittam tapenu magatta-attam durante nga mavvunga.

3. (a) Ngatta mallayyagayya ittam segun ta Juan 15:8? (b) Anni i irepresenta na vungu-vunga na ubas ira ta ilustrasion ni Jesus, anna ngatta mepangngo yatun nga pangiyarig?

³ I pinakarason nu ngatta makipartisipa ittam ta trabahu nga pallayyagayya ay tapenu medayaw si Jehova anna mapakasanto i ngaganna ta totolay. (Bibbigan i Juan 15:1, 8.) Pansinan nga neyarig ni Jesus i Yamana, nga si Jehova, ta tadday nga manaron, onu makkoman, nga mammula tu ubas. Niyarig ni Jesus i baggina ta tadday nga fun na ubas, anna i disipulosna ta panga-panga. (Juan 15:5) Mepangngo gafu nga iyilustra na vunga-vunga na ubas ira i vunga na Pappatulan nga palattuagan na disipulos ni Cristo. Kinagi ni Jesus ta apostolesna: “Madaya-rayaw i Yamà ta pavvunga nu ta aru, ay yaw i mamakurug tu disipulo takamu.” Nu kunnasi nga makedayaw ta makkoman i fun ira na ubas nga mavvunga tu makasta nga klase, makedayaw tam gapa kani Jehova nu ikagi tam i mensahe na Pappatulan adde ta mawayya tam.​—Mat. 25:20-23.

4. (a) Anni ira i kuattam tapenu mapakasanto i ngagan na Dios? (b) Anni i matageno mu ta pribilehiom nga mapakasanto i ngagan na Dios?

⁴ Kunnasi nga mapakasanto na pallayyagayya i ngagan na Dios? Ariattam mapabbalin nga mas sagradu i ngagan na Dios. Dati ngana nga interamente nga sagradu onu masanto yatun. Ngem daddamman i kinagi ni profeta Isaias: “Si Jehova na armada ira​—yayya i Tadday nga mawag tu imammatannu nga masanto.” (Isa. 8:13) Marayaw tam i ngagan na Dios, fuera paga ta tanakuan nga gannug, gukaban na pangipamamma tam nga nereruma yatun ta maski anni nga ngagan anna panguffun ta tanakuan nga imammatan gapa nga masanto yatun. (Mat. 6:9) Angngariganna, nu iproklama tam i kurug meyannung ta kappabbaw ira nga kualidad anna ari manguli nga gakkag ni Jehova para ta totolay, medefensa tam i ngagan na Dios kontra ta kinaladdug anna pamara-parake ni Satanas. (Gen. 3:1-5) Kunne na gapa, nu kuattam i ngamin tapenu uffunan i totolay ta teritoria tam nga masingan nga si Jehova ay “mekunnay [nisa] i kekakua, dayaw anna pakapangngua,” mapasanto tam i ngagan na Dios. (Nep. 4:11) Kagian ni Rune nga payunir ta 16 dagun: “Mappabalo ngà megafu ta ammù nga egga tiansà nga testiguan i Namaratu ta uniberso. Mas kakayà ku lallagu i mallayyagayya.”

5. (a) Anni nga rason ta pallayyagayya i mabibbig ta Juan 15:9, 10? (b) Kunnasi nga nipatalatto ni Jesus i pakawagan nga magatta-attam?

⁵ Bibbigan i Juan 15:9, 10. I napafutuan nga aya tam kani Jehova anna kani Jesus ay importante nga rason nu ngatta ilayyagayya tam i mensahe na Pappatulan. (Mar. 12:30; Juan 14:15) Kinagi ni Jesus ta disipulosna nga ari laman nga ayatadda yayya, nu ari, ‘mannanayun ta aya na.’ Ngatta? Megafu ta kawagan i pagatta-attam kwenta kurug nga disipulo ni Cristo ta pappasa na tiempo. Nipatalatto ni Jesus i pakawagan nga magatta-attam gukaban na mamippiga nga pangiyusana ta forma ira na termino nga “mannanayun” ta ababba nga rekord ta Juan 15:4-10.

6. Kunnasi tam mepasingan nga kayà tam nga mannanayun ta aya ni Cristo?

⁶ Kunnasi tam mepasingan nga kayà tam nga mannanayun ta aya ni Cristo anna mapattalupaddian i faborna? Gukaban na pattuttul ta dorobna. Gittana kakkagian nittam ni Jesus, ‘Parulattaddà.’ Ngem ikikkiddaw laman nittam ni Jesus nga kuan i gannug nga kingnguana mismu, megafu ta kunna: “Ta kunna pamarulo ku ta bili-bilin na Yamà anna pannanayuk-ku ta aya na.” Nipasingan ni Jesus i apparigan.​—Juan 13:15.

7. Anni i koneksion na pamarulo anna aya?

⁷ Meyannung ta koneksion na pamarulo anna aya, dana nga kinagi ni Jesus ta apostolesna: “I sinni laman nga mangalawa anna mamarulo ta bili-bilik-ku ay yaya i mangaya niakan.” (Juan 14:21) Naggafu ta Yama ni  Jesus i bili-bilinna, yatutta nu parulattattam i bilinna nga mallayyagayya, mepasingattam gapa nga ayatattam si Jehova. (Mat. 17:5; Juan 8:28) Nu ipasingattam i aya kani Jehova anna kani Jesus, pattalupaddianadda gapa ittam ta ayada.

8, 9. (a) Anni paga i rason nu ngatta mallayyagayya ittam? (b) Ngatta makapagaram nittam i Uvovug ni Jehova nga mabibbig ta Ezekiel 3:18, 19 anna 18:23 nga tulu-tuloy nga mallayyagayya?

⁸ Egga paga i rasottam tapenu itulu-tuloy tam i trabahu nga pallayyagayya. Mallayyagayya ittam tapenu mangabiso. Ta tiempo na Biblia, natukoy si Noe nga “nangilayya-gayya.” (Bibbigan i 2 Pedro 2:5.) Manawag nga nelagum ta nilayyagayyana nige na Delubio i pangabiso ta dattal na kadaral. Ngatta kunnatun i konklusiottam? Innan i kinagi ni Jesus: “Nage nuri na delubio, kimi-kiminan anna mini-mininum i totolay. Nangatawa i lallaki anna naki-atawa i babbay adde ta aggaw na tallung ni Noe ta daka-dakal nga sinambaw. Ngem ariad-da nga ammu i mesissimmu [“ariadda inimporta,” NW] adde ta nipaddelubio na, ay nalaggabban ira ngamin. Kunnatun i mesimmu noka nu manoli i Ana na Tolay.” (Mat. 24:38, 39) Maski ta kawan tu interes na totolay, matalo lagapa nga nilammuyag ni Noe i mensahe nga pangabiso nga neyawa sa.

⁹ Ta maddaggun, ilayyagayya tam i mensahe na Pappatulan ta totolay tapenu mapeggan ira tu tiansa nga mammuan i uray na Dios ta totolay. Kagitta ni Jehova, talaga kakayà tam gapa nga alawatan na totolay i mensahe tapenu “mattalupaddian [ira] nga matolay.” (Eze. 18:23) Kunne na gapa, nu mallayyagayya ittam ta babalay anna ta publiko ira nga lugar, abisowattam i kakaruan nga totolay adde ta posible nga duttal noka i Pappatulan na Dios anna panuppalan naw i marake nga mundo.​—Eze. 3:18, 19; Dan. 2:44; Nep. 14:6, 7.

10. (a) Ngatta mallayyagayya ittam segun ta Mateo 22:39? (b) Iyistoria nu kunnasi inuffunan ni Pablo anni Silas i guardia ta Filipos.

¹⁰ Yaw paga i tadday nga importante nga rason ta tulu-tuloy nga pallayyagayya tam: Mallayyagayya ittam megafu ta aya ta kasittoletam. (Mat. 22:39) Mapaguyu ittam na kunnatun nga aya tapenu itulu-tuloy yaw nga trabahu, nga rekunnisiattam nga awayyana mallapo i futu na totolay nu manguli i sirkumstansiada. Ikonsidera tam i naekspiriensa ni apostol Pablo anna i kavuluna nga si Silas. Ta siudad na Filipos, nipafuku ira na mangokkontra nira. Tapus ta mattangnga na gabi, gavva nga nayayyag i ammukutan anna navvuka i ngamin nga puerta. Inabbo na guardia tu nakatammang i presu ira yari tu mappakamatay nakuan. Ngem nikulle ni Pablo: “Ariam-mu nga kuan yatun!” Niyavu na mamippippig nga guardia: “Anni i mawag tu kuak-ku tapenu mapaliag ngà?” Kinagida sa: “Mangurug ka ta Yafu Jesus ay mapaliag ka.”​—King. 16:25-34.

11, 12. (a) Kunnasi meparig i rekord meyannung ta guardia ta ministerio tam? (b) Ngatta ariattam magimmang ta pallayyagayya?

¹¹ Kunnasi nga meparig i nesimmu ta guardia ta trabahu tam nga pallayyagayya? Sifutan yaw: Nallapo i futu na guardia tapus nappoffun laman kabalin na lunig. Kunnatun gapa, egga danuri totolay nga ari nangalawa  ta mensahe na Biblia dati ngem nallapo i futuda anna mappoffun ngana ira kustu nagugguyag i mundoda megafu ta ari inekspekta nga marake nga nesimmu nira. Angngariganna, awayyana nga gavva nga nalsa ira ta nabayag ngana nga trabahuda anna ariadda makapangurug. Marraddam gapa i karuan megafu ta paggungayda na atawana. I karuan gapa ay awayya nga maguluan kabalidda nga nammuan nga egga i serioso nga takida, onu maddaraddam ira ta patay na iddeddukadda. Nu mesimmu ira i kunnatun, awayyana nga iyavu na problemadu ira nga totolay nu anni i gakkag na pattolay nga ariadda importan ta gafu. Awayyada paga iyavu, ‘Anni i mawag tu kuak-ku tapenu mapaliag ngà?’ Nu masimmuattam ira, baka kayàda ngana nga magginna ta makeyawa tu iddanama nga mensahe tam ta ollollu nga tiempo ta pattoleda.

¹² Yatutta, ariattam gafu nakuan magimmang ta pallayyagayya megafu ta kayà tam siguraduan nga sigga-parattam noka nga mamanna-bannay ta totolay sonu alawatadda ngana yatun. (Isa. 61:1) Kunni Charlotte, nga 38 dagun ngana ta ngamin-tiempo nga serbisio: “Magulu i pannonopan na totolay ta maddaggun. Mawagda makaginna tu makasta nga balita.” Kunna gapa ni Ejvor, nga 34 dagun ngana nga payunir: “Ta maddaggun, mas aru nga totolay i maddaraddam. Kakayà ku ira uffunan. Paguyuannà natun nga mallayyagayya.” Talaga dakal nga rason i aya ta kasittolay tapenu itulu-tuloy i ministerio tam!

13, 14. (a) Anni nga regalu i nakagi ta Juan 15:11? (b) Kunnasi tam maekspiriensa i pagayayya ni Jesus? (c) Kunnasi makafekto i pagayayya ta ministerio tam?

¹³ Ta ultimo nga gabi nige na patay ni Jesus, kinagina gapa ta apostolesna i regalu ira nga makoffun nira nga magattam durante nga mavvunga. Anni danaw nga regalu, anna kunnasi ittam mabenefisiowan tatun ira?

¹⁴ I regalu nga pagayayya. Mamakadammo kari i dob ni Jesus nga mallayyagayya? Ari. Kabalin nga nipakoli ni Jesus i ilustrasion meyannung ta fun na ubas, kinagina nga maekspiriensa tam i pagayayya nu ilayyagayya tam i Pappatulan. (Bibbigan i Juan 15:11.) Kakuruganna, nipromesana nittam nga mala tam i pagayayyana. Kunnasi? Kagitta na nakagi ta gafu, niparig ni Jesus i baggina ta fun na ubas anna i disipulosna ta panga-panga. Sustinian na fun i panga-panga. Adde ta nakakonekta i panga-panga tatun, makasussu ira tu danum anna sustansia nga maddalan ta fun. Kunne na gapa, durante nga metadday ittam kani Cristo gukaban na memmugug nga panuttul ta dakkuana ira, maekspiriensa tam i kunna pagayayyana ta pangngua ta uray na Yamana. (Juan 4:34; 17:13; 1 Ped. 2:21) Kunni Hanne, nga 40 dagun ngana nga payunir, “I pagayayya nga matageno ku kabalikku ta ministerio i mamasikan niakan tapenu tulu-tuloy nga makapasserbi kani Jehova.” Wan, i pagayayya nga monag i nikegamuna i mamasikan nittam tapenu tulu-tuloy nga mallayyagayya maski ta mariga ira nga teritoria.​—Mat. 5:10-12.

15. (a) Anni nga regalu i nakagi ta Juan 14:27? (b) Ngatta memammo ittam nu kanayun ittam nga mallayyagayya?

¹⁵ I regalu nga imammo. (Bibbigan i Juan 14:27.) Ta ultimo nga gabi nige na patay ni Jesus, kinagina ta apotolesna: “I imammo nga maggafu niakan i iyawa ku nikamu.” Kunnasi makoffun nittam yatun nga regalu​—i imammo​—tapenu tulu-tuloy nga mallayyagayya? Adde ta kukuattam yatun, mammaguray ta futu tam i imammo nga resulta na pakannammu tam nga apruban ittam na Dios. (Sal. 149:4; Roma 5:3, 4; Col. 3:15) Kunni Ulf, nga 45 dagun ngana ta ngamin-tiempo nga serbisio, “Mabannag ngà gapa ta pallayyagayya, ngem mangirattal yatun tu pakkakontentu anna kurug nga gakkag ta pattolè.” Kuruga dakal i pappabalo tam megafu ta nabendisionan ittam tu manayun nga memammo nga panageno!

16. (a) Anni nga regalu i nakagi ta Juan 15:15? (b) Kunnasi mabbalin tu mannanayun nga kofun ni Jesus i apostoles?

 ¹⁶ I regalu nga pakikkofun kani Jesus. Kabalin nga kinagi ni Jesus nga kayàna nga “awan tu pakkurangan na pagayayya” na apostolesna, niyesplikana nira i importansia na pangipasingan tu minassakrifisio nga aya. (Juan 15:11-13) Kunna paga: “Kakkofun ngana i pagagal ku nikamu.” Talaga nabalor nga regalu nga malawà​—i pakikkofun kani Jesus! Anni i mawag nga kuan na apostoles tapenu mannanayun ta pakikkofunna? Mawagda nga ‘mavvunga tu aru’ (“umay anna tulu-tuloy nga mavvunga,” NW). (Bibbigan i Juan 15:14-16.) Maddua ragun nige natun, nibilin ni Jesus ta apostolesna: “En-nu nga ilayya-gayya, ‘Aranni ngana i Pammaguray na Dios!’” (Mat. 10:7) Yatutta tatun nga ultimo nga gabi, pinagaramna ira nga magattam ta trabahu nga nigafuda. (Mat. 24:13; Mar. 3:14) Mariga i pangituppalda ta bilin ni Jesus, ngem awayyada i mavviktoria​—anna mattalupaddian nga kokkofunna. Kunnasi? Gukaban na uffun na tadday paga nga regalu.

17, 18. (a) Anni nga regalu i nakagi ta Juan 15:16? (b) Kunnasi makoffun yatun nga regalu ta disipulos ni Jesus? (c) Anni nga regalu i mamasikan nittam ta maddaggun?

¹⁷ I regalu nga natabbag ira nga pakimallo. Kinagi ni Jesus: “I anni laman nga kiddawan nu ta Yama ta ngagak-ku, ay iyawa na nikamu.” (Juan 15:16) Talaga makapasikan gafu yaw nga promesa para ta apostolesna! * Maski ariadda kuruga nalippawa nga aranni ngana mangultimo i inango na Liderda ta davvun, nepasiguradu nira nga ari ira nga napagurayan. Sigga-paran si Jehova nga tabbagan i pakimalloda ira ta maski anni nga uffun nga mawagda tapenu balinan i bilin nga ilayyagayya i mensahe na Pappatulan. Wan, ari nabbayag, naekspiriensada nu kunnasi sinabbag ni Jehova i pakimalloda ira para ta uffun.​—King. 4:29, 31.

¹⁸ Kunnatun gapa ta maddaggun. Durante nga magattam ittam nga mavvunga, maekspiriensa tam i pakikkofun kani Jesus. Makasiguradu tam paga nga sigga-paran si Jehova nga tabbagan i pakimallo tam ira tapenu malampasan i problema ira nga meparubang nittam durante nga ilayyagayya tam i mapia nga dumug na Pappatulan. (Fil 4:13, NW) Talaga dakal i appabalo tam nga nabendisionan ittam tu natabbag ira nga pakimallo anna pakikkofun kani Jesus! Pasikannan ittam danaw nga regalu nga naggafu kani Jehova tapenu kanayun ittam makapavvunga.​—Sant. 1:17.

19. (a) Ngatta ariattam magimmang ta trabahu nga pallayyagayya? (b) Anni i makoffun nittam nga balinan i trabahu na Dios?

¹⁹ Kagitta na nagigiammu tam taw nga artikulo, ariattam magimmang ta pallayyagayya tapenu medayaw si Jehova anna mapakasanto i ngaganna, tapenu mepasingan i aya tam kani Jehova anna kani Jesus, tapenu abisowan i totolay, anna tapenu mepasingan i aya ta kasittoletam. Kunne na gapa, pasikannan ittam na regalu ira nga pagayayya, imammo, pakikkofun, anna natabbag ira nga pakimallo tapenu balinan i trabahu na Dios. Talaga magayayya si Jehova nu masingi-singanna i interu-kararua nga appursigi tam nga ‘mavvunga ta aru’!