1, 2. (a) Kuzê ki Jizus fla se disiplus na kel últimu noti antis di el móre? (Odja dizenhu na komésu di studu.) (b) Pamodi ki é bon nu lenbra di kes razon ki nu ten pa kontinua ta prega? (c) Kuzê ki nu sta ben odja na es studu?

NA KEL últimu noti antis di Jizus móre, el pasa txeu ténpu ta pâpia ku se apóstlus i el torna fla-s ma el ta amaba es txeu. Tanbê el konta-s un ilustrason sobri un pé di uva ki nu studaba na kel primeru artigu. Jizus uza kel ilustrason pa insentiva se disiplus pa es ‘kontinua ta da txeu frutu’ ô pa es ka dizisti di prega mensaji di Reinu. — João 15:8.

² Má Jizus ka fla se disiplus sô kuzê ki es meste fazeba, má pamodi ki es debe fazeba el. El mostra-s razons pa es kontinua ta prega. Pamodi ki é inportanti nu sabe kes razon? Óras ki nu ta lenbra sénpri pamodi ki nu debe kontinua ta prega, nu ta xinti más forsa pa nu ka dizisti di da ‘tistimunhu pa tudu nason’. (Mat. 24:13, 14) Nton nu sta ben odja kuatu razon ki Bíblia ta da pa nu kontinua ta prega. Dipôs nu sta ben odja kuatu ajuda ki Jeová ta da-nu pa nu ka dizisti di da txeu frutu.

3. (a) Di akordu ku João 15:8, ki razon nu ten pa prega? (b) Na ilustrason di Jizus kuzê ki ta reprizenta kes uva i pamodi ki é un bon konparason?

³ Razon más inportanti di nu bai pregason é da glória pa Jeová i santifika se nómi. (Lé João 15:1, 8.) Repara ma Jizus konpara se Pai, Jeová, ku un agrikultor ki ta planta uva. Jizus konpara se kabésa ku un pé di uva i se disiplus ku kes ramu. (João 15:5 ) Nton, kes uva ta reprizenta frutus ki disiplus di Jizus ta da ô pregason di notísia sábi. Pamodi ki kel-li é un bon konparason? Pamodi Jizus fla se apóstlus: ‘Kel-li ta da glória pa nha Pai: pa nhos kontinua ta da txeu frutu’. Sima un pé di uva ki ta da bons uva, ta da ónra pa se dónu, tanbê óras ki nu ta faze nos midjór na pregason di notísias sábi, ta da glória pa Jeová. — Mat. 25:20-23.

4. (a) Di ki manera nu ta santifika nómi di Deus? (b) Modi ki bu ta xinti pamodi bu ten priviléjiu di santifika nómi di Deus?

⁴ Modi ki pregason ta santifika nómi di Jeová? É klaru ki nu ka ta pode bira nómi di Deus más santu, pamodi se nómi dja é santu ô sagradu. Má repara kuzê ki proféta Izaías fla: ‘Jeová di izérsitu é kel ki nhos debe tene sima santu’. (Isa. 8:13) Kel testu li ta mostra ma un di kes manera di santifika nómi di Deus é pa nu sipara-l di tudu kes otu nómi i djuda otus algen trata-l di mésmu manera. (Mat. 6:9, nóta di rodapé) Pur izénplu, óras ki nu ta inxina otus algen sobri kualidadis bunitu di Jeová i se vontadi pa Téra, nu sta ta mostra-s ma tudu kel ki Satanás fla kóntra Jeová é sô mintira. (Gén. 3:1-5) Tanbê óras ki nu ta sforsa pa djuda pesoas na nos tiritóriu odja ma Jeová merese ‘resebe glória, ónra i puder’, nu sta ta santifika nómi di Deus. (Apo. 4:11) Rui *, ki é pioneru pa 16 anu fla: “N ta agradise txeu pa xansi di ser tistimunha di Kriador di Séu ku Téra. Kel-li ta da-m más vontadi di kontinua ta prega.”

5. (a) Di akordu ku João 15:9, 10 ki otu razon nu ten pa prega? (b) Modi ki Jizus mostra ma é inportanti aguenta firmi?

⁵ Lé João 15:9, 10. Nos amor di korason pa Jeová i pa Jizus é un razon inportanti pa nu prega mensaji di Reinu. (Mar. 12:30; João 14:15 ) Jizus fla se disiplus pa es ‘kontinua na [se] amor.’ Pamodi? Pamodi ser un disiplu di Kristu di verdadi, tudu dia, anu ta sai anu ta entra, ta mostra ma nu ten ki aguenta firmi. Sô na João 15:4-10, Jizus uza palavra ‘kontinua’ txeu bês, pa mostra ma é inportanti aguenta firmi.

6. Modi ki nu ta mostra ma nu krê kontinua na amor di Kristu?

⁶ Modi ki nu pode mostra ma nu krê kontinua na amor di Kristu? É óras ki nu ta obi ku se mandamentus. Kuzê ki Jizus ta pidi-nu é kuza ki el tanbê ta faze. El fla ma nu debe obi ku el ‘sima el ta obi ku se Pai i el ta kontinua na se amor.’ Jizus dexa un izénplu pa nu sigi. — João 13:15.

7. Modi ki obidiénsa ku amor sta ligadu?

⁷ Jizus dja splikaba antis ma obidiénsa ku amor sta ligadu. El fla se apóstlus: ‘Ken ki ta seta nhas  mandamentu i ki ta kunpri-s, é kel ki ta ama-m.’ (João 14:21 ) Óras ki nu ta sigi órdi di prega, tanbê nu sta mostra ma nu ta ama Deus. Pamodi? Pamodi tudu mandamentus di Jizus ta ben di Jeová. (Mat. 17:5; João 8:28 ) I óras ki Jeová i Jizus ta odja ma nu ta ama-s es tanbê es ta mostra ses amor pa nos.

8, 9. (a) Kal ki é otu motivu ki nu ten pa kontinua ta prega? (b) Modi ki palavras di Jeová na Ezequiel 3:18, 19 i 18:23 ta insentiva-nu kontinua ta prega?

⁸ Otu motivu ki nu ten pa nu kontinua ta prega é pamodi nu krê aviza pesoas. Bíblia ta fla ma Nué éra ‘pregador di justisa’. (Lé 2 Pedro 2:5.) Na se pregason, Nué aviza kes algen sobri Dilúviu. Modi ki nu sabe? Repara kuzê ki Jizus fla: ‘Pamodi na kel ténpu antis di Dilúviu, kes algen ta kumeba i es ta bebeba, ómis ta kazaba i mudjeris ta dada pa kazamentu, ti kel dia ki Nué entra na arka, i nen es ka liga, ti ki Dilúviu txiga i kaba ku tudu es, é si ki ta ben ser na prezénsa di Fidju di Ómi.’ (Mat. 24:38, 39) Nbóra kes algen nen ka liga Nué, el mante fiel i el ka dizisti di da avizu ki Jeová manda-l.

⁹ Oji nu ta prega mensaji di Reinu pa da pesoas xansi di prende sobri Deus i se vontadi pa nos. Sima Jeová, nu krê pa kes algen seta kel mensaji i ‘kontinua bibu’ pa tudu ténpu. (Eze. 18:23) Di mésmu manera, óras ki nu ta prega di kaza en kaza i na públiku, nu sta faze nos midjór pa aviza tudu algen ki nu ta pode ma Reinu di Deus sta ta ben i ma el sta ben kaba ku es mundu mau. — Eze. 3:18, 19; Dan. 2:44; Apo. 14:6, 7.

10. (a) Di akordu ku Mateus 22:39, ki razon nu ten pa prega? (b) Konta modi ki Polu ku Silas djuda un guarda di kadia na Filipus.

¹⁰ Un otu razon inportanti pa nu kontinua ta prega é kel-li: Nu ta ama otus algen. (Mat. 22:39) Kel amor li ta djuda-nu kontinua ta faze es trabadju. Pamodi nu sabe ma óras ki situasons di vida di pesoas muda, ses korason tanbê pode muda. Odja kuzê ki kontise ku Silas i apóstlu Polu kantu es staba na sidadi di Filipus. La pa meia noti, dirapenti txon treme ku forsa i pórtas di kadia abri. Guarda di kadia pensa ma tudu prézus dja fujiba, nton el krê mataba kabésa. Polu grita: ‘Ka bu mata kabésa!’ Ku korpu ta treme, kel guarda pergunta: ‘Kuzê ki N meste faze pa N salva?’ Es fla-l: ‘Kridita na Sinhor Jizus i bu ta salva’. — Atos 16:25-34.

11, 12. (a) Kuzê ki nu ta prende di kuza ki kontise ku kel guarda di kadia? (b) Pamodi ki nu ten ki kontinua ta prega?

¹¹ Kuzê ki nu ta prende di kuza ki kontise ku kel guarda di kadia? Repara ma é sô dipôs ki téra treme ku forsa ki se korason muda i el pidi ajuda. Tanbê,  pode kontise mésmu kuza ku kes algen ki ka ta krê obi mensaji di Bíblia. Ses korason pode muda i es ta pidi ajuda óras ki es pasa pa situasons difísil na vida. Pu izénplu, alguns algen na nos tiritóriu di un óra pa otu, pode perde trabadju ki dja es dura na el i es ta fika dizanimadu. Otus ta fika dizorientadu pamodi ses kazamentu kaba. Inda otus ta perde speransa óras ki es diskubri ma es tene un duénsa gravi ô móre algen ki es ta ama. Óras ki kes kuza li kontise alguns di kes algen ta faze perguntas ki nunka es ka fazeba. Talvês es ta pergunta sima kel guarda: ‘Kuzê ki N meste faze pa N salva?’ Asi, óras ki nu pâpia ku es, pode ser ki es ta krê obi nos mensaji di speransa pa primeru bês na ses vida.

¹² Pur isu, nu ten ki kontinua ta prega. Asi óras ki kes algen meste obi, nu ta sta la pa konsola-s. (Isa. 61:1) Karla ki dja ten 38 anu na sirvisu di ténpu interu fla: “Oji pesoas sta sen rumu. Es meste un xansi pa obi notísias sábi.” Eva, ki dja ten 34 anu di pionera tanbê fla: “Oji, más di ki nunka, pesoas sta xinti txeu dizanimadu. I N tene gana djuda-s. É kel-li ki ta pô-m ta prega.” Nos amor pa pesoas é un motivu inportanti pa nu ka dizisti di prega.

13, 14. (a) Ki ajuda nu ta atxa na João 15:11 ? (b) Modi ki nu pode xinti kel mésmu alegria ki Jizus xinti? (c) Modi ki alegria ta djuda-nu na pregason?

¹³ Na kel últimu noti antis di Jizus móre, tanbê el fla se apóstlus ma es ta tinha ajuda pa es kontinuaba ta da txeu frutu. Kal ki é kes ajuda i modi ki es pode djuda-nu?

¹⁴ Alegria. Kel órdi ki Jizus da pa prega é un kuza pizadu dimás? Nau. Dipôs di konta ilustrason di kel pé di uva, Jizus fla ma kes algen ki ta prega ta xinti mésmu alegria ki el. (Lé João 15:11.) Modi? Na kel ilustrason, Jizus fla ma el é kel pé di uva i ma se disiplus é kes ramu. Timenti kes ramu ta kontinua ligadu na pé di uva, es ta txupa agu i tudu otus kuza ki es ta meste. Di mésmu manera, nu meste kontinua unidu ku Jizus i imita se izénplu. Asi nu ta pode xinti kel mésmu alegria ki el ta xinti óras ki el ta faze vontadi di Jeová. (João 4:34 ; 17:13 ; 1 Ped. 2:21) Ana ki dja ten más di 40 anu pionera fla: “N ta fika txeu kontenti dipôs di pregason i N ta xinti más animadu pa N kontinua na sirvisu di Jeová.” Sima Ana, kel alegria ki nu ta xinti, ta da-nu forsa pa nu kontinua ta prega sikrê nos tiritóriu é difísil. — Mat. 5:10-12.

15. (a) Ki ajuda nu ta atxa na João 14:27 ? (b) Modi ki pas ta djuda-nu kontinua ta da frutu sen dizisti?

¹⁵ Pas. (Lé João 14:27.) Inda na últimu noti antis di Jizus móre el fla se apóstlus: ‘N ta da nhos nha pas.’ Modi ki pas ki ta ben di Jizus pode djuda-nu da frutu? Óras ki nu ka ta dizisti di prega, Jeová ku Jizus ta fika kontenti ku nos i nu ta xinti pas na korason. (Sal. 149:4; Rom. 5:3, 4; Col. 3:15) Alfredu ki dja ten 45 anu na sirvisu di ténpu interu fla: “Dipôs di pregason N ta fika kansadu, má es trabadju ta pô-m fika kontenti i ta da-m obijetivu na vida.” Nu debe agradise Jeová ku Jizus pamodi nu ta xinti un pas déntu nos!

16. (a) Ki ajuda João 15:15 ta pâpia di el? (b) Kuzê ki apóstlus tinha ki fazeba pa es kontinuaba ta ser amigu di Jizus?

 ¹⁶ Amizadi di Jizus. Dipôs ki Jizus pâpia di alegria ki se apóstlus pode xintiba, el splika ma é inportanti es ama otus algen más di ki ses kabésa. (João 15:11-13 ) Tanbê el fla: ‘N ta txoma nhos di amigus’. É un grandi priviléjiu ser amigu di Jizus! Má kuzê ki apóstlus tinha ki fazeba pa es kontinuaba se amigu? Es tinha ki ‘bai i kontinua ta da frutu’. (Lé João 15:14-16.) Uns dôs anu antis, Jizus daba se apóstlus un órdi: ‘Óras ki nhos ta bai, nhos prega i nhos fla: “Reinu di Séu sta kuazi ta txiga.”’ (Mat. 10:7) É pur isu ki na kel noti Jizus fla se apóstlus ma es tinha ki kontinuaba ta faze trabadju ki dja es kumesaba. (Mat. 24:13; Mar. 3:14) É ka éra fásil faze kel trabadju li. Má es pode konsigiba faze-l i kontinuaba ta ser amigu di Jizus. Modi? Ku ajuda di un otu kuza.

17, 18. (a) Ki ajuda nu ta atxa na João 15:16 ? (b) Modi ki disiplus di Jizus uza kel ajuda? (c) Ki ajuda ta da-nu forsa oji?

¹⁷ Respóstas di nos orason. Jizus fla: ‘Ka nporta kuzê ki nhos pidi nha Pai na nha nómi, el ta da nhos el.’ (João 15:16 ) Imajina modi ki kel promésa li da apóstlus koraji! * Nbóra na kel momentu es ka ntende dretu ma dja txigaba ténpu di Jizus móre, es ka ta fikaba sen ajuda. Jeová staba prontu pa responde ses orason i pa da-s ajuda ki es mesteba pa es pregaba mensaji di Reinu. Pur izénplu, dipôs ki Jizus móre, Jeová responde orason di apóstlus kantu es pidi-l ajuda pa es pode pregaba. — Atos 4:29, 31.

¹⁸ Oji ta kontise mésmu kuza. Si nu kontinua ta prega, nu ta kontinua ta ser amigu di Jizus. Tanbê, nu pode ten sertéza ma Jeová sta prontu pa responde nos orason i pa djuda-nu lida ku kalker difikuldadi na nos trabadju di pregason di notísias sábi di Reinu. (Fil. 4:13) Nu ta agradise Jeová pa kes dôs ajuda ki nu ten: Sabe ma Jeová ta responde nos orason i ten amizadi ku Jizus! Kes ajuda li ta da-nu más forsa pa nu kontinua ta da frutu. — Tia. 1:17.

19. (a) Pamodi ki nu ta kontinua ta prega? (b) Kuzê ki ta djuda-nu finda trabadju ki Jeová da-nu?

¹⁹ Na studu di oji nu odja ma nu debe kontinua ta prega pa nu da glória pa Jeová i pa santifika se nómi. Tanbê é un manera di mostra nos amor pa Jeová, pa Jizus i pa otus algen. Tanbê nu odja ma alegria, pas, amizadi ku Jizus i respósta di nos orason é otus kuza ki ta djuda-nu finda trabadju ki Jeová da-nu. Si nu sforsa pa nu faze nos midjór i ‘kontinua ta da txeu frutu’ Jeová ta fika rei di kontenti!