1, 2. (a) Byo kwashajiletu pacheche kuba’mba bamwipaye, ñanyi byambo Yesu byo abuujile baana banji ba bwanga? (Monai kipikichala kitanshi.) (b) Mambo ka o kyanemena kuyuka ene mambo o tuyila na kusapwila? (c) Tusakwisamba pa ka?

BUFUKU bwapeleleko Yesu saka bakyangye kumwipaya, wisambile na batumwa banji pa kimye kyabaya bingi ne kwibabuula byo ebatemenwe. Kabiji wibelele kishimpi kya muñanzañanza kyo twisambilepo mu mutwe wafumako. Kwingijisha kino kishimpi, Yesu watundaikile baana banji ba bwanga kutwajijila ‘kupanga bipangwa byavula’ pa kuba’mba bakachinchikenga mu mwingilo wa kusapwila byambo bya Bufumu.—Yoa. 15:8.

² Nangwa byonkabyo, Yesu wabuujile baana banji ba bwanga bintu byo bafwainwe kuba ne ene mambo a kwibyubila. Wibalumbulwijile ene mambo o bafwainwe kwingila mwingilo wa kusapwila. Mambo ka o kyanemena kwisamba pa bino bishinka? Inge twayuka ene mambo etulengela kusapwila, tukatundaikwa kuchinchika pa kushimuna “bukamonyi ku bisaka byonse.” (Mat. 24:13, 14) Onkao mambo, twayai twisambe bishinka bina bya mu Binembelo bitulengela kusapwila. Kabiji tusakwisamba pa bya bupe  bina bitupa Yehoba bitukwasha kuchinchika mu mwingilo wa kupanga bipangwa.

3. (a) Ñanyi kishinka kiji pa Yoano 15:8 kitulengela kusapwila? (b) Mañanzañanza aambilepo Yesu mu kishimpi emenako ka, kabiji mambo ka kino kishimpi o kyayilamo?

³ Kishinka kikatampe kitulengela kusapwila ke kutumbijika Yehoba ne kuzhijika jizhina janji ku bantu. (Tangai Yoano 15:1, 8.) Vulukai’mba Yesu waesakenye Shanji, aye Yehoba, ku njimi ujima miñanzañanza. Kabiji Yesu wiesakenye aye mwine ku muñanzañanza, nangwa’mba kishina, kabiji baana banji ba bwanga wibesakenye ku misampi. (Yoa. 15:5) Onkao mambo, mañanzañanza apanga ku ino misampi emenako bipangwa bya Bufumu bipanga baana ba bwanga ba kwa Kilishitu. Yesu wabuujile batumwa banji amba: “Batata batumbijikilwa mu kyonka kino, kuba’mba anweba mupangenga bipangwa byavula.” Kino kishimpi kyayilamo mambo byonkatu miñanzañanza yawama byo ilengela njimi kumvwa bulongo, ne atweba tuleta munema, nangwa’mba tutumbijika Yehoba inge ketusapwile byambo bya Bufumu papelela bulume bwetu.—Mat. 25:20-23.

4. (a) Twakonsha kuzhijika byepi jizhina ja Lesa? (b) Mumvwa byepi pa mwingilo wenu wa kuzhijika jizhina ja Lesa?

⁴ Mwingilo wetu wa kusapwila utumbijika byepi jizhina ja Lesa? Kechi twakonsha kuzhijika jizhina ja Lesa kukila byo jazhila kala ne. Mambo jizhina ja Lesa jazhila bingi. Pano akimonai byaambile ngauzhi Isaya amba: “Yehoba wa mabumba, ye yenkatu ye mwafwainwa kumona’mba wazhila.” (Isa. 8:13) Tuzhijika jizhina ja Lesa kupichila mu kwijimona’mba japusanako na mazhina akwabo onse, ne kukwasha bantu kuyuka’mba jazhila. (Mat. 6:9) Umvwe ketufunjishe bantu pa byubilo byawama bya Yehoba, ne bintu byawama byo akobila bantu, tulengela bantu kuyuka’mba bintu byonse byamba Satana pe Lesa bya bubela. (Nte. 3:1-5) Kabiji inge twakwasha bantu bekala mu nyaunda yetu kuyuka’mba Yehoba ye wafwainwa “kutambula lukumo ne buneme ne bulume,” tuzhijika jizhina ja Lesa. (Lum. 4:11) Painiya uji na myaka 16 aye Rune waambile’mba: “Kuyuka’mba bampa mwingilo wa kusapwila pa Mulenga walengele bintu byonse kundetela lusekelo. Kabiji kino kindengela kwikala na kizaku kya kutwajijila na kusapwila.”

5. (a) Ñanyi kishinka kitulengela kusapwila kyatongolwa pa Yoano 15:9, 10? (b) Yesu waambilepo’mba ka pa kuchinchika?

⁵ Tangai Yoano 15:9, 10. Kutemwa Yehoba ne Yesu na muchima yense kyo kintu kikwabo kitulengela kusapwila byambo bya Bufumu. (Mako 12:30; Yoa. 14:15) Yesu wabuujile baana banji ba bwanga amba bafwainwa kutwajijila “kwikala monka mu butemwe [bwanji],” kechi kupelelatu pa kumutemwa ne. Mambo ka? Mambo kutwajijila kwikala mwana wa bwanga wa Kilishitu kukebewa kuchinchika. Yesu wamwesheshe buneme bwa kuchinchika mambo bimye byavula pa Yoano 15:4-10, waingijishe byambo bya kuba’mba “kwikala.”

6. Twakonsha kumwesha byepi amba tukeba kutwajijila kwikala monka mu butemwe bwa Kilishitu?

⁶ Tumwesha byepi amba tukeba kutwajijila kwikala monka mu butemwe bwa Kilishitu? Kupichila mu kukookela mikambizho yanji. Mu jishinda jikwabo, Yesu ubena kwitwambila’mba, ‘Nkookelainga.’ Bino Yesu witukambizha kuba bintu byonka byo aubilepo, mambo waambile’mba: “Byonkatu byo nalama mikambizho ya Batata ne kwikala monka mu butemwe bwabo.” Yesu witushila mwakulondela.—Yoa. 13:15.

7. Butemwe ne lukookelo byakwatankana byepi?

⁷ Yesu waambile pa lukwatankano luji pakachi ka lukookelo ne butemwe byo abuujile batumwa banji amba: “Yense umvwa mikambizho  yami ne kwiilama, ye wantemwa.” (Yoa. 14:21) Kupichila mu kukookela mukambizho wa kwa Yesu wa kusapwila, ne atweba tumwesha’mba twatemwa Lesa mambo mukambizho wa kwa Yesu umwesha bikeba Bashanji. (Mat. 17:5; Yoa. 8:28) Yehoba ne Yesu betutemwa umvwe twamwesha’mba twibatemwa.

8, 9. (a) Ñanyi kintu kikwabo kitulengela kusapwila? (b) Nga byambo bya kwa Yehoba biji pa Ezikyo 3:18, 19 ne 18:23 bitutundaika byepi kutwajijila na kusapwila?

⁸ Kuji kintu kikwabo kitulengela kutwajijila na kusapwila. Tusapwila mambo tujimunako bantu. Mu Baibolo, Nowa bamutela’mba “musapwishi.” (Tangai 2 Petelo 2:5.) Muyulo saka akyangye kwiya, Nowa waingijile mwingilo wa kujimunako bantu pa lonaiko lwaishilenga. Mambo ka o twaambila byobyo? Mambo Yesu waambile’mba: “Mambo mu oa moba Muyulo saka akyangye kwiya, bantu bajiilenga ne kutoma, basongwelenga ne kusongolwa, kufikatu ne kimye Nowa kyo atwelele mu bwato, kabiji kechi bateleko muchima ne, kufikatu ne kimye Muyulo kyo aishile ne kwibalobeshatu bonse shata, bino byo byo kikekala ne pa kwikalapo kwa Mwana muntu.” (Mat. 24:38, 39) Nangwa kya kuba bantu bakainenga, Nowa watwajijile kwingila mu bukishinka mwingilo ye bamupele wa kujimunako bantu.

⁹ Ne lelo jino, tusapwila byambo bya Bufumu pa kuba’mba tukwashe bantu kufunda pa kyaswa muchima wa Lesa ku bantu. Byonkatu bikeba Yehoba, ne atweba tukeba kuba’mba bantu batambwile byambo bya Bufumu ne ‘kukekala na bumi.’ (Ezi. 18:23) Kabiji inge tubena kusapwila ku nzubo ku nzubo ne busapwishi bwa ku mvula bantu, tujimunako bantu bavula amba Bufumu bwa Lesa bukeya na kufumyapo ino ntanda yatama.—Ezi. 3:18, 19; Da. 2:44; Lum. 14:6, 7.

10. (a) Ñanyi kishinka kitulengela kusapwila kyatongolwa pa Mateo 22:39? (b) Shimikizhai Paulo ne Silasa byo bakwashishe muota mu Filipai.

¹⁰ Kishinka kikwabo kyanema kitulengela kutwajijila kusapwila ke kino: Tusapwila mambo twatemwa bakwetu. (Mat. 22:39) Buno butemwe bwitulengela kuchinchika pa kusapwila, mambo twayuka’mba bantu bakonsha kupimpula byubilo byabo umvwe bwikalo bwabo bwaaluka. Akimonai byapichilemo Paulo ne mulunda nanji aye Silasa. Byo bajinga mu muzhi wa Filipai, balwanyi bebatayile mu kaleya. Bino byo kyafikile pakachi ka bufuku, kwaubiwe kitentanshi kikatampe ne binzhilo bya kaleya byashinkukile. Muota waumvwine moyo ne kukeba kwiipaya mambo walangulukile’mba bakaili banyema. Bino Paulo wabijikile’mba: “Kange wiube kyatama ne!” Uno muota washikishe’mba: “Mwane, nafwainwa kuba byepi pa kuba’mba nkapuluke?” Bamubuujile’mba: “Itabila mwi Nkambo Yesu, kabiji ukapuluka.”—Byu. 16:25-34.

11, 12. (a) Jishimikila ja muota jitufunjishapo ka pa mwingilo wetu wa kusapwila? (b) Twafwainwa kwinengezha kuba byepi?

¹¹ Kyaubile muota kitufunjishapo ka pa mwingilo wetu wa kusapwila? Monai kyamwekele: Muota wapimpwile milanguluko yanji ne kulomba bukwasho kimye kyo kwaubiwe kitentanshi.  Ne lelo jino, bantu bakana kumvwa byambo bya mu Baibolo bakonsha kupimpula milanguluko yabo ne kukeba bukwasho umvwe kwamweka bintu byatama. Bantu bamo baji mu nyaunda yetu nkito yo baingila pa myaka yavula yakonsha kupwa kya kubazhimukilatu kabiji bakonsha kwikala na bijikila. Bakwabo nabo bakonsha kwikala na bijikila inge masongola apwa. Kabiji bakwabo nabo bakonsha kwikala na lukatazho lwa kikola kikatampe, nangwa bakonsha kwikala na bulanda na mambo a kufwisha mulongo wabo. Umvwe bintu bya uno mutundu byamweka, bamo baji na ano makatazho bakonsha kutendeka kwipuzha mepuzho anema a pa bwikalo, o babulanga kulangulukapo kala. Kampe bakonsha ne kwipuzha amba, ‘Nafwainwa kuba byepi pa kuba’mba nkapuluke?’ Umvwe twamonañana nabo, bakonsha kukeba kuteleka kimye kitanshi ku byambo bya luketekelo byo tusapwila.

¹² Onkao mambo, inge twajijila kusapwila mu bukishinka, twinengezha kutekenesha bantu inge baswa kuteleka ku byambo bya Bufumu. (Isa. 61:1) Ba Charlotte baingila mwingilo wa kimye kyonse pa myaka 38 baambile’mba: “Bantu lelo jino balubilamo. Babena kukebewa kwibasapwila mambo awama.” Ba Ejvor nabo baingila bupainiya pa myaka 34 baambile’mba: “Ano moba, bantu baji bingi na bijikila. Nkebesha bingi kwibakwasha. Kino kintundaika bingi kuya na kusapwila.” Kine, kutemwa bantu ke kintu kikwabo kyanema kitulengela kutwajijila kusapwila.

13, 14. (a) Ñanyi kya bupe kyatongolwa pa Yoano 15:11? (b) Lusekelo lwa kwa Yesu lwakonsha kwikala byepi ke lwetu? (c) Lusekelo lwitukwasha kwingila byepi mu mwingilo?

¹³ Bufuku bwapeleleko Yesu saka bakyangye kumwipaya, wabuujile batumwa banji bya bupe bikebakwasha kuchinchika pa kupanga bipangwa. Ñanyi bya bupe byonkabyo, kabiji bitukwasha byepi?

¹⁴ Kya bupe kya lusekelo. Nanchi mukambizho wa kwa Yesu wa kusapwila wakatazha nyi? Ine. Yesu byo apwishishe kwamba kishimpi kyanji kya miñanzañanza, waambile’mba basapwishi ba Bufumu bakela na lusekelo. (Tangai Yoano 15:11.) Witulayile’mba lusekelo lwanji lukekala mwi atweba. Mu ñanyi jishinda? Byonkatu byo twaji kwamba ku ntendekelo, Yesu wiesakenye aye mwine ku muñanzañanza kabiji baana banji ba bwanga wibesakenye ku misampi. Ku muñanzañanza ko kufuma misampi. Umvwe misampi babula kwiikopolako, itwajijila kutambula mema ne kajo. Kyo kimotu ne atweba, inge twatwajijila kwikala mwi Kilishitu ne kulondela mu ngayo yanji, twikala na lusekelo lo ekalapo nalo pa kuba kyaswa muchima wa Shanji. (Yoa. 4:34; 17:13; 1 Pe. 2:21) Ba Hanne baingila bupainiya myaka kukila pa 40, baambile’mba: “Lusekelo lo ngikala nalo inge nafuma mu mwingilo lundengela kutwajijila kwingila mwingilo wa Yehoba.” Kya kine, lusekelo lwitulengela kutwajijila kusapwila nangwa kya kuba nyaunda yo tusapwilamo yakatazha.—Mat. 5:10-12.

15. (a) Ñanyi kya bupe kyatongolwa pa Yoano 14:27? (b) Mutende witulengela byepi kutwajijila na kupanga bipangwa?

¹⁵ Bupe bwa mutende. (Tangai Yoano 14:27.) Bufuku bwapeleleko saka bakyangye kumwipaya, Yesu wabuujile batumwa banji amba: “Nemupa mutende wami.” Mutende wanji witukwasha byepi kupanga bipangwa? Inge twatwajijila kuchinchika, twikala na mutende pa kuyuka’mba Yehoba ne Yesu betutemwa. (Sala. 149:4; Loma 5:3, 4; Kolo. 3:15) Ba Ulf baingila mwingilo wa kimye kyonse pa myaka 45 baambile’mba: “Mwingilo wa kusapwila unkookesha, bino undetela lusekelo lwa kine.”  Tusanchila bingi Lesa pa kwitupa mutende wa myaka.

16. (a) Ñanyi kya bupe kyatongolwa pa Yoano 15:15? (b) Batumwa bakonsheshe kutwajijila byepi kwikala balunda ba kwa Yesu?

¹⁶ Bupe bwa kwikala balunda ne Yesu. Yesu byo apwishishe kwamba’mba ukeba batumwa kwikala na lusekelo ne kuba’mba luno lusekelo lwabo “lubaye,” walumbulwile ne buneme bwa kwikala na muchima wa kwipana. (Yoa. 15:11-13) Wanungilepo kuba’mba: “Nemutela’mba balunda nami.” Ke kintu kyanema bingi kwikala balunda ne Yesu. Batumwa bakonsheshe kuba byepi pa kuba’mba batwajijile kwikala balunda nanji? Bafwainwe ‘kupanganga bipangwa byavula.’ (Tangai Yoano 15:14-16.) Myaka ibiji ya kunyuma saka akyangye kwamba pa kupanga bipangwa, Yesu wakambizhe batumwa banji amba: “Byo musakuyanga musapwilenga amba: ‘Bufumu bwa mwiulu bwafwenya pepi.’” (Mat. 10:7) Onkao mambo, mabanga pa juba japeleleko, wibatundaikile kuchinchika pa kwingila mwingilo ye batendekele. (Mat. 24:13; Mako 3:14) Kechi kyapeelele kwingila mwingilo wibakambizhe Yesu ne, bino bakonsheshe kwingila inge batwajijila kwikala balunda nanji. Mu ñanyi jishinda? Na bukwasho bwa kya bupe kikwabo.

17, 18. (a) Ñanyi kya bupe kyatongolwa pa Yoano 15:15? (b) Kino kya bupe kyakwashishe byepi baana ba bwanga ba kwa Yesu? (c) Ñanyi kya bupe kitukosesha lelo jino?

¹⁷ Bupe bwa milombelo. Yesu waambile’mba: “Kyonse kyo mukalomba Batata mu jizhina jami, [bakemupakyo].” (Yoa. 15:16) Uno mulaye wafwainwa watundaikile bingi batumwa. * Nangwa kya kuba kechi baumvwishishe uno mulaye ne, kwashajiletu pacheche Ntangi wabo kufuma pa ntanda, bino kechi wibashiletu bunke bwabo ne. Yehoba wipaine kukumbula milombelo yabo pa kuba’mba batwajijile kusapwila byambo bya Bufumu. Kabiji kechi pabanjile ne, bemwenejile Yehoba byo akumbwile milombelo yabo ya kukeba bukwasho.—Byu. 4:29, 31.

¹⁸ Byo byo kiji ne lelo jino. Byo twatwajijila kupanga bipangwa na kuchinchika, twiyowa bulunda ne Yesu. Kabiji twafwainwa kushiinwa’mba Yehoba ukakumbula milombelo yetu byo tumulomba kuba’mba etukwashe kushinda makatazho o tupitamo pa kusapwila mambo awama a Bufumu. (Fili. 4:13) Tumusanchila bingi Lesa pa kukumbula milombelo yetu ne pa bulunda bwetu ne Yesu. Abino bya bupe byafuma kwi Yehoba bitukwasha kutwajijila kupanga bipangwa.—Yako. 1:17.

19. (a) Mambo ka o twingijila mwingilo wa kusapwila? (b) Ki ka kitukwasha kwingila bulongo mwingilo wa Lesa?

¹⁹ Byonkatu byo twisamba mu uno mutwe, twingila mwingilo wa kusapwila kuba’mba tutumbijike Yehoba ne kuzhijika jizhina janji, tumwesha byo twatemwa Yehoba ne Yesu, tujimunako bantu, ne kumwesha byo twatemwa bakwetu. Kunungapo, bya bupe bikwabo, ko kuba’mba lusekelo, mutende, kwikala na balunda, ne milombelo bitukwasha kwingila bulongo mwingilo wa Lesa. Yehoba utemwa bingi inge wamona saka twibikako kya kine kine ‘kupanga bipangwa byavula.’