1, 2. (a) Shimbu kanda Yesu afwenga, vyuma muka ashimutwilile natumbaji twenyi? (Talenu muvwimbimbi wakulivanga.) (b) Mwomwo ika chapwila chachilemu kwanuka ovyo vyeji kutulingisanga twambulule? (c) Vyuma muka natushimutwila?

YESU ashimutwilile navaposetolo jenyi halwola lwalusuku haufuku wamakumishilo shimbu kanda afwenga, nakuvafwelelesa ngwenyi avazanga. Kaha avalwezele nawa chifwanyisa chamuvinyo, chize twashimutwilanga muchihande chinafumuho. Muchifwanyisa kana, Yesu akolezezele tumbaji twenyi vatwaleho lika ‘kwima mihako yayivulu’ mangana vapwenga nalukakachila hakwambulula mujimbu waWangana.—Yowa. 15:8.

² Chipwe ngocho, omu Yesu alwezele tumbaji twenyi vyuma vatelele kulinga, avalwezele nawa ovyo vatelelele kulingila vyuma kana. Avalwezele vyuma vyatelelele kuvalingisa vazate mulimo wakwambulula. Mwomwo ika twatela kushimutwila havishina kana? Nge natwanukanga ovyo vyeji kutulingisanga tutwaleho lika kwambulula, kaha nachitukafwa tupwenga nalukakachila hakuhana “unjiho kuli vaka-mafuchi osena.” (Mateu 24:13, 14) Shikaho, tushimutwilenu vishina viwana vyamuVisoneka vize vyeji kutulingisanga twambulule. Kaha nawa natushimutwila havyuma  viwana vize atulingila Yehova mangana vitukafwe tupwenga nalukakachila hakwima mihako.

3. (a) Kweseka nachisoneka chaYowano 15:8, chuma muka cheji kutulingisanga twambulule mujimbu waWangana? (b) Uno mihako yamuchifwanyisa ahanjikile Yesu yemanyinako ika, kaha mwomwo ika chapwila chakutamo?

³ Chuma chachilemu cheji kutulingisanga twambulule mujimbu wamwaza shina mwomwo yakusaka kutohwesa Yehova nakulingisa lijina lyenyi kupwa lyajila. (Tangenu Yowano 15:1, 8.) Yesu afwanyishile Ise Yehova kuli muka-kulima mihako. Kaha ivene alifwanyishile kumuvinyo, chipwe kuchishina, kaha nawa vaka-kumukavangiza avafwanyishile kumitango. (Yowa. 15:5) Shikaho, mihako kana yemanyinako mihako yaWangana yize veminenga vaka-kukavangiza Kulishitu. Yesu alwezele tumbaji twenyi ngwenyi: “Tata veji kumutohweselanga hakwimanga chenu mihako yayivulu.” Muka-kulima eji kuwahililanga chikuma hakumona muvinyo wenyi unemi mihako yamwaza. Ngocho nayetu tweji kutohwesanga Yehova kachi nge natuvilikanga mujimbu waWangana natwima.—Mateu 25:20-23.

4. (a) Mujijila muka tweji kulingisanga lijina lyaKalunga kupwa lyajila? (b) Mweji kwivwanga ngachilihi hakutokwa mwatwama nacho chakulingisa lijina lyaKalunga kupwa lyajila?

⁴ Mulimo wetu wakwambulula weji kulingisanga ngachilihi lijina lyaKalunga kupwa lyajila? Etu katweshi kuhasa kujilika lijina lyaKalungako mwomwo lyapwa lyehi lyajila mujila yakulipwila. Kapolofweto Isaya ambile ngwenyi: “Yehova wamayongomena ikiye mwatela kumona kupwa wajila.” (Isa. 8:13) Tweji kulingisanga lijina lyenyi kupwa lyajila hakulimona kupwa lyakulipwila hamajina osena, nakukafwa nawa vatu valimone kupwa lyajila chikuma. (Mateu 6:9, kwinyikila chamwishi) Chakutalilaho, kukafwa vatu vatachikize vilinga vyaYehova vyamwaza navyuma ajina kukalingila vatu kulutwe, nachitukafwa tuhakwile lijina lyaKalunga lize veji kusaulanga kuli Satana uze apwa muka-kwonga. (Kupu. 3:1-5) Kaha nawa tweji kuhakwilanga lijina lyaKalunga hakufwila kwambulila vatu vamungalila yetu mangana vatachikize ngwavo Yehova ikiye kaha ‘atamo kutambula upahu nakavumbi nangolo.’ (Kuso. 4:11) Rune uze nazate upayiniya hamyaka 16 ambile ngwenyi: “Kutachikiza ngwami ngwapwa nguChinjiho chaTengi wavyuma vyosena cheji kungwivwisanga kuwaha chikuma. Echi cheji kungulingisanga ngutwaleho lika kwambulula.”

5. (a) Kweseka nachisoneka chaYowano 15:9, 10, chuma muka cheji kutulingisanga twambulule mujimbu waWangana? (b) Yesu ashindakanyine ngachilihi hachishina chakusaka tupwenga nalukakachila?

⁵ Tangenu Yowano 15:9, 10. Kuzanga Yehova naYesu chikiko cheji kutulingisanga twambulule mujimbu waWangana. (Mako 12:30; Yowa. 14:15) Omu Yesu alwezele tumbaji ngwenyi vamuzangenga, avalwezele nawa ngwenyi ‘vatwamenga muzangi yenyi.’ Mwomwo ika? Mwomwo kupwa tutumbaji twaKulishitu lwola lwosena chasakiwa kupwa nalukakachila. Yesu azachishile lizu ‘kutwama’ hali Yowano 15:9, 10, hakusaka kulumbununa kulema chakupwa nalukakachila.

6. Tweji kusololanga ngachilihi ngwetu twasaka kutwama muzangi yaKulishitu?

⁶ Tweji kusololanga ngachilihi ngwetu twasaka kutwama muzangi yaKulishitu mangana atwivwile kuwaha? Hakukavangiza jishimbi jenyi. Chinafwane kwijiva nge Yesu ali nakutulweza ngwenyi, ‘Ononokenu kuli ami.’ Chipwe ngocho, atulweza tulingenga vyuma vize alingile naikiye. Ambile ngwenyi: “Nganomu ngunalame ami jishimbi jaTata nakutwama muzangi yenyi.” Chikupu vene Yesu atusela chakutalilaho chamwaza.—Yowa. 15:9, 10.

7. Uno kwononoka nazangi vyatambukila ngachilihi hamwe?

⁷ Hakusaka kulumbununa omwo kwononoka chatambukila hamwe nazangi, Yesu alwezele  vaposetolo jenyi ngwenyi: “Weshowo etavila jishimbi jami nakujilamanga, ou ikiye anguzanga ami.” (Yowa. 14:21) Shikaho, nge natwononoka lushimbi lwaYesu lwakuya nakwambulula, kaha tuli nakusolola ngwetu twazanga Kalunga mwomwo lushimbi kana lwatambukila hamwe namwaya kujina chaIse. (Mateu 17:5; Yowa. 8:28) Nge natutwalaho kuzanga Yehova naYesu, kaha navakiko navatwalaho kutuzanga.

8, 9. (a) Chuma cheka muka cheji kutulingisanga twambulule mujimbu? (b) Mwomwo ika mazu ahali Ezekele 3:18, 19; na 18:23 eji kutulingisanga tutwaleho lika kwambulula?

⁸ Kwatwama chuma chikwavo chize cheji kutulingisanga tutwaleho lika kwambulula. Tweji kwambululanga mangana tuhuhumune vatu. Kweseka naMbimbiliya Nowa vamuvuluka kupwa “muka-kwambulula.” (Tangenu Petulu 2, 2:5.) Shimbu kanda Livaji lizenga, Nowa ahuhumwine vatu vyakunongesa chize chapwile nakwiza. Tunatachikiza ngachilihi ngocho? Yesu ambile ngwenyi: “Mwomwo ngana muze vatu vapwile mumakumbi aze shimbu kanda Livaji, valilenga, vanwinenga, malunga vambachilenga mapwevo, mapwevo vavasombweselenga, palanga nakulikumbi lize engilile Nowa muwato, kaha kavahakileko manganako palanga nomu lyejile Livaji nakuvakomba vosena, ngocho nakupwako chaMwanamutu nawa mukiko vene munachikapwa.” (Mateu 24:38, 39) Numba tuhu vatu kana vapwile navilinga vyakuhuka, Oloze Nowa atwalileho lika kuvilika mujimbu wakuhuhumuna uze vamulwezele ambulule.

⁹ Makumbi ano, tweji kwambululanga mujimbu waWangana mangana tukafwe vatu vatachikize vyuma ajina Kalunga kukalingila vatu kulutwe. Tweji kulondezezanga Yehova hakufwila kukafwa vatu vetavile mujimbu wamwaza mangana ‘vayoyenga lika.’ (Ezeke. 18:23) Tweji kwambulwilanga nawa kuzuvo hizuvo nakuvihela vyasanga mangana tuhuhumune vatu ngwetu Wangana waKalunga naukeza nakunongesa kano kaye kakuhuka.—Ezeke. 3:18, 19; Ndanye. 2:44; Kuso. 14:6, 7.

10. (a) Kweseka nachisoneka chaMateu 22:39, chuma muka cheji kutulingisanga twambulule mujimbu waWangana? (b) Paulu naShilase vakafwile ngachilihi muka-kulama kamenga muFwilipi?

¹⁰ Chuma chikwavo cheji kutulingisanga tutwaleho kwambulula mujimbu shina mwomwo twazanga vakwetu vatu. (Mateu 22:39) Zangi kana yikiko yeji kutulingisanga tuzate ou mulimo nalukakachila, nakwijiva ngwetu vanahase kwalumuka. Tuchitalenu vyuma vyasolokele kuli kaposetolo Paulu naShilase. Omu vapwile munganda yaFwilipi, vavakashile mukamenga kuli vaka-kole javo. Kuheta mukachi kaufuku, kwejile mundenda uze wanyikishile kamenga nakusokolola vikolo vyacho. Muka-kulama alizakaminyine ngwenyi pamo vafunge vanachinyi ngocho asakile kulijiha. Oloze Paulu atambakanyine ngwenyi: “Kanda ulilemekako.” Uze muka-kulama kamenga avahulishile ngwenyi: “Vyuma muka ngwatela kulinga mangana vangulwile?” Vakiko vamulwezele ngwavo: “Itavila muli Mwata Yesu, kaha navakulwila.”—Vili. 16:25-34.

11, 12. (a) Uno mujimbu wamuka-kulama kamenga walifwana ngachilihi namulimo wetu wakwambulula? (b) Chuma muka twatela kulinga?

¹¹ Uno mujimbu wamuka-kulama kamenga walifwana ngachilihi namulimo wetu wakwambulula? Anukenu ngwenu ou muka-kulama kamenga  alumwine muchima wenyi nakulomba vamukafwe hanyima yauze mundenda. Chochimwe nawa, vatu vamwe makumbi ano vaze veji kukananga kwitavila mujimbu wamuMbimbiliya, vanahase kwalumuka mukuhita chalwola mwomwo yakuhita muvyeseko. Chakutalilaho, vatu vamwe mungalila yetu vanahase kulizakamina mwomwo yakuvafumisa hamilimo chipwe mwomwo yakulilukulula. Veka nawa vanahase kuhomba namisongo chipwe mwomwo yakufwisa mutu vazanga. Shikaho nge ukalu wangana unavasolokela, vatu kana veji kuhulisanga vihula vize kavahulishilengako. Pamo vanahase kulihulisa ngwavo: ‘Vyuma muka ngwatela kulinga numba vakangulwile?’ Nge tunawane vatu vakufwana ngana, veji kufwilanga kwivwilila kumujimbu wamwaza halwola lwatete.

¹² Ngocho nge natutwalaho kuzata mulimo wakwambulula, kaha tunahase kuvendejeka vatu halwola luze vali nakusakiwa kuvambulila. (Isaya 61:1) Charlotte uze nazate mulimo washimbu yosena hamyaka 38 ambile ngwenyi: “Vatu makumbi ano vali muupuputa wakushipilitu. Shikaho vali nakusakiwa kuvambulila mujimbu wamwaza.” Ejvor uze nazate upayiniya hamyaka 34 ambile ngwenyi: “Makumbi ano, vatu vavavulu vali nakuhomba chikuma. Shikaho ngwafwila kuvakafwa. Echi chikiko cheji kungulingisanga ngwambulule natwima.” Ngocho kuzanga vakwetu vatu chatela kutulingisa tutwaleho lika kuzata mulimo wakwambulula.

13, 14. (a) Chuma muka vavuluka hali Yowano 15:11? (b) Mujila muka tweji kupwilanga nakuwahilila chize apwile nacho Yesu? (c) Uno kuwahilila cheji kutukafwanga ngachilihi hakuzata mulimo wakwambulula?

¹³ Haufuku wamakumishilo shimbu kanda afwenga, Yesu alwezele nawa vaposetolo jenyi vyuma vize vyatelelele kuvakafwa vemenganga mihako nalukakachila. Vyuma muka vene evi, kaha vinahase kutunganyalisa ngachilihi?

¹⁴ Kuwahilila. Uno kwononoka lushimbi lwaYesu lwakwambulula mujimbu chapwa chachikalu tahi? Nduma. Omu Yesu akumishile kuhanjika chifwanyisa chamuvinyo, ambile ngwenyi vaka-kwambulula Wangana navapwanga vakuwahilila. (Tangenu Yowano 15:11.) Atufwelelesa ngwenyi natupwanga nakuwahilila chize apwile nacho. Mujila muka? Nganomu twavulukanga kumaputukilo, Yesu alifwanyishile ivene kumuvinyo kaha tumbaji twenyi avafwanyishile kumitango. Muvinyo ukiko weji kutwalanga meya nawilo kumitango, chikalu kaha nge mutango kana kaveshi kuupamunako. Chochimwe nawa, nge natutwalaho kulikata naKulishitu nakukavangiza mujitambo jenyi, kaha natupwa tuvakuwahilila ngana muze eji kuwahililanga ikiye hakulinga mwaya muchima waIse. (Yowa. 4:34; 17:13; Petu. 1, 2:21) Hanne uze nazate upayiniya hamyaka yakuzomboka 40 ambile ngwenyi: “Kuwahilila ngweji kwivwanga nge ngunafumu muwande cheji kungukafwanga ngutwaleho lika kuzachila Yehova.” Chikupu vene, kuwahilila tweji kwivwanga chikiko cheji kutukafwanga tutwaleho kwambulwila nakuvihela kuze vatu kavetavila mujimbu wetuko.—Mateu 5:10-12.

15. (a) Chuma muka vavuluka hali Yowano 14:27? (b) Mwomwo ika kuunda chinahase kutukafwa twimenga mihako?

¹⁵ Kuunda. (Tangenu Yowano 14:27.) Hachingoloshi vene chize chamakumishilo shimbu kanda afwenga, Yesu alwezele vaposetolo jenyi ngwenyi: “Nangumihana vene kuunda chami.” Uno echi kuunda chaYesu nachitukafwa ngachilihi twimenga mihako? Nge natupwa lika nalukakachila, kaha natupwa nakuunda chamwenemwene chize cheji kwizanga mwomwo yakutachikiza ngwetu Yehova naYesu vatuzanga. (Samu 149:4; Loma 5:3, 4; Kolo. 3:15) Ulf uze nazate mulimo washimbu yosena hamyaka 45, ambile ngwenyi: “Numba tuhu mulimo wakwambulula weji kunguzeyesanga oloze weji kungulingisanga nawa nguwahilile nakupwa wakusuuluka mukuyoya chami.” Tweji kusakwililanga chikuma Yehova hakutuhana kuunda chamwenemwene.

16. (a) Chuma muka chize vavuluka hali Yowano 15:15? (b) Chuma muka vatelelele kulinga vaposetolo numba vatwaleho kupwa masepa jenyi?

 ¹⁶ Usepa. Omu Yesu akumishile kulweza vaposetolo jenyi ngwenyi ‘navawahililanga chikuma,’ avalumbunwinyine nawa kulema chakupwa namuchima wakulisuula. (Yowa. 15:11-13) Kufumaho ambile ngwenyi: “Ami ngunamivuluka ngwami, mumasepa [jami.]” Chikupu vene kupwa masepa jaYesu hikutokwa chachinene chikuma. Jino chuma muka vatelelele kulinga vaposetolo numba vatwaleho kupwa masepa jenyi? Vatelele ‘kutwalaho lika kwimanga mihako.’ (Tangenu Yowano 15:14-16.) Omu mwahichile myaka yivali, Yesu atumine vaposetolo jenyi ngwenyi: “Kahomu namuya, ambululenunga ngwenu: ‘Wangana wamelu unapandama kwakamwihi.’” (Mateu 10:7) Ngocho hachingoloshi chize chamakumishilo, avakolezezele vapwenga nalukakachila hakuzata mulimo uze aputukile ikiye. (Mateu 24:13; Mako 3:14) Numba tuhu kukavangiza elu lushimbi lwaYesu kachapwile chachashiko, oloze avafwelelesele ngwenyi navafukila nakutwalaho kupwa masepa jenyi. Jino chuma muka chatelelele kuvakafwa? Palangalafu yinakavangizaho nayishimutwila chuma kana.

17, 18. (a) Chuma muka chize vavuluka hali Yowano 15:16? (b) Kaha chuma kana chakafwile ngachilihi tumbaji twaYesu? (c) Vyuma muka vyeji kutukolezezanga makumbi ano?

¹⁷ Kukumbulula kulomba chetu. Yesu ambile ngwenyi: ‘Cheshocho namulomba kuli Tata mulijina lyami, mwamihanacho.’ (Yowa. 15:16) Mazu kana akolezezele vaposetolo. * Numba tuhu Twamina yavo apwile hakamwihi nakufwa, oloze kachalumbunwine nge navasala chakuzeneka muka-kuvakafwako. Yehova apwile wakulizanga kukumbulula kulomba chavo nakuvakafwa mangana vatesemo kuzata mulimo wakuvilika mujimbu waWangana. Kaha nakushimbula chiku, Yehova aputukile kukumbulula kulomba chavo.—Vili. 4:29, 31.

¹⁸ Omu mukiko chili namakumbi ano. Nge natutwalaho kwima mihako, kaha natupwa tumasepa jaYesu. Kaha nawa natufwelela ngwetu Yehova mwakumbululanga kulomba chetu hakutukafwa tufungulule vyeseko vize natuwana omu natwambululanga mujimbu wamwaza waWangana. (Fwili. 4:13) Tweji kusakwililanga Yehova hakukumbulula kulomba chetu nakutukafwa tupwenga tumasepa jaYesu. Vyuma kanevi eji kutulingilanga Yehova vyeji kutukafwanga tutwaleho lika kwima mihako.—Yako. 1:17.

19. (a) Mwomwo ika tweji kutwalangaho kwambulula mujimbu? (b) Vyuma muka vyeji kutukafwanga tutesemo kuzata mulimo waKalunga?

¹⁹ Nganomu tunashimutwila muchihande chino, tweji kutwalangaho kwambulula mujimbu mwomwo twasaka kutohwesa Yehova nakulingisa lijina lyenyi kupwa lyajila, nakusolola zangi yakuzanga Yehova naYesu, nakuhuhumuna vatu, nakusolola zangi yakuzanga vakwetu vatu. Kaha nawa vyuma vyeji kutukafwanga tutwaleho kuzata mulimo waKalunga shina vyuma vize eji kutulingilanga Yehova vyakufwana nge kuwahilila, nakuunda, nausepa, nakukumbulula kulomba chetu. Yehova eji kuwahililanga chikuma hakutumona tuli nakukilikita mangana ‘tutwaleho kwima mihako yayivulu.’