1, 2. a) A Zeezi kũumã ket tɩ beoogo, bõe yell la a gom ne a karen-biisã? (Ges-y fotã sẽn be yĩngrã.) b) Bõe yĩng tɩ d segd n tẽegd bũmb nins sẽn kɩt tɩ d moond koɛɛgã? d) Bõe yell la d na n gome?

A ZEEZI kũumã ket tɩ beoogo, a sõsa ne a tʋm-tʋmdbã ne yʋngã n kaoose. A wilg-b lame t’a nong-b-la wʋsgo. Yaa wakat-kãng me la a wẽ reezẽ tɩɩgã yel-bũndã d sẽn wɛgs sõsg ning sẽn loogã pʋgẽ wã. Ra yaa sẽn na n sagl a karen-biisã tɩ b “ket n womd biis wʋsgo,” rat n yeel tɩ b kell n wɩng ne Rĩungã koɛɛgã moonego.—Zã 15:8, MN.

² La a Zeezi pa yeel a karen-biisã bũmb ning b sẽn segd n maanã bal ye. A wilg-b-la b sẽn tog n maan dẽ wã võor me. A togs-b-la bũmb nins sẽn kɩt tɩ b segd n ket n wɩngd ne koɛɛgã moonegã. Segdame tɩ tõnd me bao n bãng a sẽn togs-bã. Bõe yĩnga? Bala, rẽ sã n be d yamẽ, na n kɩtame tɩ d rat ne d sũur fãa n mao n kell n wɩng ne koe-moonegã, sẽn na yɩl tɩ yɩ “kaset soolem toay-toayã fãa nebã yĩnga.” (Mat. 24:13, 14) Sõs-kãnga pʋgẽ, d na n goma bũmb a naas yelle. Biiblã wilgdame tɩ bõn-kãens yaa bʋʋm sẽn kɩt tɩ d segd n moond koɛɛgã. D leb n na n yãa bũmb a naas a Zeova sẽn kɩt tɩ d paamdẽ, tɩ sõngd tõnd tɩ d ket n womd biisi.

3. a) Sẽn tɩ yɩɩd fãa, yaa bõe yĩng la d sẽn moond koɛɛgã? b) A Zeezi yel-bũndã pʋgẽ, reezẽ tɩɩgã biis makda bõe? Bõe tɩ makrã zemse?

³ Sẽn tɩ yɩɩd fãa, d sẽn moond koɛɛgã yaa tɩ ne rẽ maasem, d pẽgda a Zeova la d kɩtdẽ t’a yʋʋrã paamd waoogre. (Karm-y Zã 15:1, 8.) D tẽeg t’a Zeezi maka a Ba wã ne reezẽ tɩɩg koaada. A yeelame tɩ yẽ la reezẽ tɩɩgã, la t’a karen-biisã la wilã. (Zã 15:5) Dẽnd reezẽ tɩɩgã biis makda biis nins a karen-biisã sẽn womdã, rat n yeel tɩ Rĩungã koɛɛgã moonego. A Zeezi ra yeela a tʋm-tʋmdbã yaa: “Yãmb sã n wom biis wʋsgo, m ba na n paama waoogre.” Reezẽ tɩɩg sã n wom biis sõma, na n yɩɩ koaadã waoogr yĩnga. Woto me, d sã n moond Rĩungã koɛɛgã d pãng tɛk fãa, a Zeova paamda waoogre.—Mat. 25:20-23.

4. a) Bõe la d tõe n maan tɩ Wẽnnaam yʋʋrã paam waoogre? b) Bõe yĩng tɩ y sũur noom y sẽn paam n tõe n sõng tɩ Wẽnnaam yʋʋrã paam waoogrã?

⁴ La wãn to la koe-moonegã kɩtd tɩ Wẽnnaam yʋʋrã paamd waoogre? Wẽnnaam yʋʋrã zoe n yaa sõng zãnga. D pa tõe t’a yɩ sõng n yɩɩg rẽ ye. La ad no-rɛɛs a Ezayi sẽn yeele: ‘Saasẽ-Pãng-Soabã bal la yãmb tog n ges tɩ b yaa pʋ-peelem soaba[ bɩ ‘sõngo,’ MN]’ (Eza. 8:13) D sã n get Wẽnnaam yʋʋrã wa yʋʋr sẽn welg n yaa toor ne yʋy a taabã fãa, la d sõng d taabã tɩ b bãng tɩ yaa yʋʋr sẽn yaa sõngo, d kɩtdame tɩ Wẽnnaam yʋʋrã paamd waoogre. (Mat. 6:9) Wala makre, d sã n moond koɛɛgã n wilgd nebã a Zeova sẽn yaa Wẽnnaam ning buudã, la t’a ket n datame tɩ ninsaalbã vɩɩmd arzãn pʋgẽ wakat sẽn kõn sa, d sõngd-b lame tɩ b bãng t’a Sʋɩtãan rõda a Zeova, n sãam a yʋʋrã zaalem. (Sɩng. 3:1-5) D sã n sõng nebã tɩ b bãng me t’a Zeova n “zems tɩ reeg ziiri, la waoogre, la pãnga,” kɩtdame t’a yʋʋrã paamd waoogre. (Vẽn. 4:11) A Runi yaa so-pakd na maan yʋʋm 16. Ad a sẽn yeele: “M sẽn mi tɩ m paamame n yaa yĩngr la tẽng Naandã kaset soabã, m sũur nooma hal tɩ m dat n pʋʋs-a barka. Kɩtame tɩ m dat n ket n wɩngd ne koɛɛgã moonego.”

5. a) Bõe la Zã 15:9, 10 yeta, tɩ yaa bʋʋm sẽn kɩt tɩ d moond koɛɛgã? b) Bõe la a Zeezi yeel a karen-biisã, tɩ sõng-b tɩ b bãng tɩ yaa tɩlɛ tɩ b tõog toogo?

⁵ Karm-y Zã 15:9, 10. Bũmb a to me sẽn kɩt tɩ d moond Rĩungã koɛɛgã, yaa d sẽn nong a Zeova ne a Bi-riblã ne d sũur fãa wã. (Mark 12:30; Zã 14:15) A Zeezi yeela a karen-biisã tɩ b ‘pa yẽ nonglmã pʋgẽ.’ Bõe yĩng t’a yeel woto? Bala, a ra miime tɩ yɩlẽ tɩ b kell n yɩ kiris-neb hakɩɩka, ra yaa tɩlɛ tɩ b tõog toogo. A goam nins sẽn be Zã 15:4-10 pʋgẽ, a pʋda gom-biis nins sẽn yaa “paad” la “pa” wã naoor wʋsgo, n na n wilg rẽ vẽenega.

6. Bõe la d tõe n maane, tɩ wilg tɩ d rat n paa Kirist nonglmã pʋgẽ?

⁶ Bõe la d tog n maane, tɩ wilg tɩ d rat n paa Kirist nonglmã pʋgẽ, n kell n ta a yam? A yeelame tɩ yaa d sẽn na n sakd yẽ noyã. Yaa sẽn na n yeel bal tɩ d rɩk yẽ mengã togs-n-taare. Sɩd me, a paasame tɩ ‘yẽ me talla a ba wã tõod n be bãmb nonglem pʋgẽ.’ (Zã 15:10) Dẽnd a Zeezi mengã kõo tõnd mak-sõngo.—Zã 13:15.

7. Bõe n wilgd tɩ sakr la nonglem tũuda taaba?

⁷ A Zeezi ra reng n yeela a tʋm-tʋmdbã gomd sẽn wilgd tɩ sakr la nonglem tũuda taaba. Ad a sẽn yeele: “Ned ning sẽn talld-a mam tõodã n sakd-ba, yaa yẽnda soab n nong maam.” (Zã 14:21) Sẽn paase, d sã n sakd a Zeezi sẽn yeel tɩ d kẽng n tɩ moon koɛɛgã, wilgdame tɩ d nonga Wẽnnaam, bala noy nins a Zeezi sẽn kõ-dã yita a Ba wã nengẽ. (Mat. 17:5; Zã 8:28) D sã n wilgd tɩ d nonga a Zeova ne a Zeezi, bãmb me na n nonga tõndo.

8, 9. a) Bõe me n kɩt tɩ d moond koɛɛgã? b) Bõe yĩng t’a Zeova sẽn togs goam nins tɩ be Ezekɩyɛll 3:18, 19 la 18:23 wã kɩt tɩ d rat n ket n moond koɛɛgã?

⁸ Bũmb a to me sẽn kɩt tɩ d ket n moond koɛɛgã, yaa tɩ d rat n keooga nebã tɩ b bãng t’a Zeova daarã watame. Biiblã yeelame t’a Nowe yɩɩ “tɩrlmã koe-moaanda.” (Karm-y 2 Pɩyɛɛr 2:5.) Nand tɩ sa-kãsengã sɩnge, a Nowe moona koɛɛgã n keoog nebã tɩ Wẽnnaam na n kɩtame tɩ saag ni n sãam dũniyã. Bõe n kɩt tɩ d mi rẽ? Bala, a Zeezi yeelame yaa: ‘Rasem nins sẽn deng sãoong sa-kãsengã, nebã dag n dɩtame la b yũuda, n kẽed kãadem la b yiisd b kamb kãadem, hal tɩ ta daar ning a Nowe sẽn kẽ koom koglgã pʋgẽ wã. Bãmb dag n ka tẽed yell hal tɩ sãoong sa-kãsengã wa n kãag bãmb fãa. Na n yɩɩ a woto me Ninsaal Bi-riblã waoong wakate.’ (Mat. 24:38, 39) A Nowe kell n moona koɛɛg ning a Zeova sẽn yeel t’a moonã, baa ne nebã sẽn da maand b toog kae wã.

⁹ Rũndã-rũndã, d moonda Rĩungã koɛɛgã, n na n sõng nebã tɩ b bãng Wẽnnaam sẽn na n wa maan bũmb ning n kõ ninsaalbã. Wa a Zeova, tõnd me rata ne d sũur fãa tɩ nebã sak n kelge, n wa “paam n vɩɩmde.” (Eze. 18:23) D sã n wa moond koɛɛgã zak-zak wall zãma wã zĩisẽ me, d keoogda nebã wa d sẽn tõe tɛka, tɩ Wẽnnaam Rĩungã na n wa sãama dũni-wẽn-kãngã.—Eze. 3:18, 19; Dãn. 2:44; Vẽn. 14:6, 7.

10. a) Bõe la Matiye 22:39 wã yeta, tɩ yaa bʋʋm sẽn kɩt tɩ d moond koɛɛgã? b) Togs-y sẽn yɩ to-to t’a Poll ne a Sɩlas tõog n sõng bãens roog gũud Filip tẽngẽ wã.

¹⁰ Ad bũmb a to sẽn kɩt tɩ d ket n moond koɛɛgã: D nonga d taabã. (Mat. 22:39) Rẽ kɩtame tɩ d ket n wɩngd ne moonegã, bala d miime tɩ ned yɛl sã n wa toeeme, a tõe teka yam me. Tʋm-tʋmd a Poll ne a tũud-n-taag a Sɩlas yãa a buudu. B sẽn wa n be Filip tẽngẽ wã, b bɛɛbã yõg-b lame n pag bãens roogẽ. La ne yʋn-sʋkã, tẽn-digimdg n zĩnd zĩig pʋgẽ, hal tɩ bãensã roog rigimdi, t’a kʋɩlensã pagse. Rabeem yõka bãensã roog gũudã, t’a ra rat n kʋ a menga, a sẽn da tagsd tɩ bi-beesã zoeeme wã yĩnga. La a Poll yeel-a lame yaa: “Da maan-y y meng bũmb ye!” Gũudã sokame yaa: “Bõe la mam tog n maan n paam fãagre?” T’a Poll ne a Sɩlas leok yaa: “Tẽ-y Zu-soab a Zeezi, la yãmb . . . na n paama fãagre.”—Tʋʋ. 16:25-34.

11, 12. a) Bãens roog gũudã kibar sõngdame tɩ d bãng bõe koɛɛgã mooneg wɛɛngẽ? b) Bõe yĩng tɩ d rat n ket n wɩngd ne koɛɛgã moonego?

¹¹ Bãens roog gũudã kibar sõngda tõnd tɩ d bãng bõe koe-moonegã wɛɛngẽ? D tẽeg tɩ yaa tẽn-digimdgã poor la a yaool n na n tek yam. Rũndã-rũndã me, neb kẽer sẽn pa sakd n kelg koe-noogã wat n teka yam, yell sẽn wõnd tẽn-digimdg sã n wa tiig n paam-ba. Wala makre, kẽer ra tara tʋʋmd hal yʋʋm ka tɛka, tɩ wa tiig n sãame, hal tɩ namsd-ba. Sãnda yaa b kãadem n sãam sẽn nan pa kaoose, tɩ sãamd b sũur wʋsgo. Kẽer me pa mi b sẽn  maande, bala logtoɛɛmbã yeel-b lame tɩ b bẽeda bã-kɛgenga. Sãnda me sũy sãama hal wʋsgo, b ned sẽn maan kaalem yĩnga. Yell a woto buud sã n wa paam nina, a tõe n wa sokda a meng sogsg a sẽn da zɩ n soke. Wala makre, a tõe n dat n bãnga ninsaal sẽn be dũniyã zugã võore. Tõe t’a pʋd n sok a meng yaa: ‘Bõe la m tog n maan n paam fãagre?’ D sã n seg ned a woto koe-moonegã sasa, tõe tɩ yaa a pipi a sẽn na n sak n kelg koɛɛgã.

¹² Dẽnd d sã n ket n wɩngd ne koe-moonegã, na n kɩtame tɩ nebã sã n wa rat n kelg-d n paam belsg la raood kengre, bɩ d paam n sõng-ba. (Eza. 61:1) A Sarlot yaa so-pakd na maan yʋʋm 38. A yeelame: “Rũndã-rũndã, nebã pa mi b sẽn kẽedẽ ye. Yaa tɩlɛ tɩ b paam koe-noogã n kelge.” A Evoor sẽn yaa so-pakd na maan yʋʋm 34 me yeelame: “Neb wʋsg sũy zɩ n sãam wa rũndã-rũndã wã ye. M data ne m sũur fãa n sõng-ba. Yaa rẽ n kɩt tɩ m moond koɛɛgã.” Hakɩɩka, d sẽn nong nebã yaa bʋʋm sẽn kɩt tɩ d segd n ket n moond koɛɛgã!

13, 14. a) Zã 15:11 wilgdame tɩ bõe la d paamda? b) Wãn to la d tõe n paam a Zeezi sũ-noogã buudu? d) Wãn to la sũ-noogã sõngd tõnd koe-moonegã pʋgẽ?

¹³ A Zeezi sẽn na n sõs ne a tʋm-tʋmdbã a kũumã ket tɩ beoogã, a wilg-b-la bũmb kẽer me a Zeova sẽn kɩt tɩ b paamdẽ, tɩ na n sõng-b tɩ b ket n womd biisi. Bõe la rẽ, la wãn to la tõe n sõng tõnd me rũndã-rũndã?

¹⁴ Sũ-noogo. Koɛɛgã moonegã yaa tʋʋmd sẽn yaa toog la sẽn wat ne yam-yiisg bɩ? A bada! A Zeezi sẽn wẽ reezẽ tɩɩgã yel-bũndã poore, a wilgame tɩ d sã n moond Rĩungã koɛɛgã, d paamda sũ-noogo. (Karm-y Zã 15:11.) A pʋd n yeelame tɩ d na n paama yẽ sũ-noogã buudu. Wãn to? D tẽeg tɩ yel-bũndã pʋgẽ, a yeelame tɩ yẽ la reezẽ tɩɩgã, t’a karen-biisã yaa wilã. Yaa wilã sã n be tɩɩgã zug la b na n paam koom la bũmb a taab sẽn yaa tɩlɛ ne-bã. Woto me, yaa d sã n kell n pa Kiristã pʋgẽ, n tũud a naoã sõma la d na n paam sũ-noog ning a sẽn tare, a sẽn maand a Ba wã raab yĩngã. (Zã 4:34; 17:13; 1 Pɩy. 2:21) A Ann yaa so-pakd na maan yʋʋm 40 la zaka. Ad a sẽn yeele: “M sã n yi n moon koɛɛgã fãa, m sũ-noogã rẽ poorã kɩtdame tɩ m dat n kell wɩng ne a Zeova tʋʋmdã.” Hakɩɩka, sũ-noogã kõt-d-la raood tɩ d ket n moondẽ, baa zĩis nins nebã sẽn pa sakd n kelgã.—Mat. 5:10-12.

15. a) Zã 14:27 wilgdame tɩ bõe me la d paamda? b) D sẽn tar sũur pʋgẽ bãanã, wãn to la sõngd tõnd tɩ d ket n womd biisi?

¹⁵ Sũur pʋgẽ bãane. (Karm-y Zã 14:27.) Baraar yʋngã a Zeezi sẽn sõs ne a tʋm-tʋmdbã, a ra reng n yeel-b lame yaa: ‘Mam kõta yãmb m laafɩ.’ Wãn to la laafɩ wã a sẽn kõt tõndã sõngd tõnd tɩ d ket n moond koɛɛgã? D sã n ket n wɩngd ne koe-moonegã, d paamda sũur pʋgẽ bãane, bala d miime tɩ d noogda a Zeova ne a Zeezi sũuri. (Yɩɩn. 149:4; Rom. 5:3, 4; Kol. 3:15) A Uluf sẽn yaa so-pakd na maan yʋʋm 45 wã yeelame: “Yaa sɩd tɩ m sã n moond koɛɛgã, m yaadame. La kɩtdame tɩ m vɩɩmã tar barka, tɩ m tar sũ-noog meng-menga.” D sẽn paam tɩ d sũurã gãe bãan wakat fãa woto wã noom-d-la wʋsgo, tɩ d pʋʋsd Wẽnnaam barka!

16. a) Zã 15:15 wilgdame tɩ bõe me la a Zeezi karen-biisã paamda? b) Bõe la tʋm-tʋmdbã ra segd n maane, n kell n yɩ a Zeezi zo-rãmba?

¹⁶ D paamda a Zeezi zoodo. A Zeezi sẽn yeel a tʋm-tʋmdbã t’a ratame tɩ b sũ-noogã ‘pidã’ poore, a togs-b-la bũmb ning sẽn kɩt tɩ yaa tɩlɛ tɩ b nong b  taabã, hal n tõe n sak n ki b yĩngã. (Zã 15:11-13) Rẽ poore, a yeel-b lame yaa: “Mam boola yãmb tɩ m zo-rãmba.” B paamame n yaa a Zeezi zo-rãmba. Ad yaa bark tɛkẽ! La bõe la b segd n maane, n kell n yɩ a zo-rãmba? A Zeezi yeelame tɩ b segd n ‘kẽng n woma biisi,’ rat n yeel tɩ n kell n wɩng ne koe-moonegã. (Karm-y Zã 15:14-16.) Na maan yʋʋm a yiib sẽn deng rẽ, a Zeezi yeela a tʋm-tʋmdbã yaa: ‘Bɩ y kẽng n moone, n yeel tɩ arzãn soolem kolgame.’ (Mat. 10:7, Wẽnnaam Sebre, 1983) Rẽ n so t’a sẽn wa n sõsd ne a karen-biisã ne yʋngã, a sagl-b tɩ b kell n wɩng ne koe-moonegã. (Mat. 24:13; Mark 3:14, 15) Yɩl n tũ a Zeezi noorã ra pa na n yɩ nana ye. La b ra tõe n tũume, n tõog n kell n yɩ a zo-rãmba. Bõe n da na n sõng-ba? Bũmb a to b sẽn da paamde.

17, 18. a) Zã 15:16 wilgdame tɩ bõe me la kiris-nebã paamda? b) Wãn to la rẽ nafd-ba? d) Bõe la a Zeova kɩt tɩ d paame, tɩ sõngd tõnd rũndã-rũndã?

¹⁷ D paamdame tɩ Wẽnnaam reegd d pʋʋsgo. A Zeezi yeelame: “Bũmb ning fãa yãmb sẽn na kos m ba ne mam yʋʋre, b na kõ yãmba.” (Zã 15:16) A gomdã tog n da kenga a tʋm-tʋmdbã raood sõma! * B ra pa mi tɩ ka la bilfu, b Zu-soabã na n kiime ye. La pa rat n yeel t’a kũumã poore, b pa na n le paamd sõngr ye. Sẽn wa n yaa sõngr ning fãa la b rat sẽn na yɩl n kell n moon Rĩungã koɛɛgã, b sã n pʋʋs a Zeova n kose, b na n paamame t’a reeg b kosgã. A Zeova sɩd maana woto. A Zeezi kũumã poor bilfu, tʋm-tʋmdbã pʋʋsa a Zeova n kos-a t’a kõ-b raoodo, t’a sɩd leok-ba.—Tʋʋ. 4:29, 31.

¹⁸ Yaa woto me rũndã-rũndã. D sã n ket n wɩngd ne koɛɛgã moonego, d na n kell n yɩɩ a Zeezi zo-rãmba. D tõe n kɩsa sɩd me tɩ d sã n wa segd zu-loees koe-moonegã pʋgẽ, n pʋʋs a Zeova n kos-a t’a sõng-d tɩ d tõog toogo, a na n deega d kosgã. (2 Kor. 4:7) D sũur nooma d sẽn paam t’a Zeova reegd d pʋʋsgã, la d paam me n yaa a Zeezi zo-rãmbã! A Zeova sẽn kɩt tɩ d paam woto fãa wã, paasda tõnd raoodo, tɩ d rat n ket n womd biisi.—Zak 1:17.

19. a) Bõe yĩng tɩ d ket n wɩngd ne koɛɛgã moonego? b) Bõe n sõngd tõnd tɩ d tõe n tʋm tʋʋmd ning Wẽnnaam sẽn kõ-dã n baase?

¹⁹ Sõs-kãnga pʋgẽ, d yãa bũmb a naas sẽn kɩt tɩ d ket n wɩngd ne koɛɛgã moonego. Yaa sẽn na n pẽg a Zeova la d kɩt t’a yʋʋrã paam waoogre, n wilg tɩ d nonga a Zeova ne a Zeezi, n keoog nebã, la d wilg tɩ d nonga d taabã. D leb n yãame t’a Zeova kɩtame tɩ d paamd sũ-noogo, sũur pʋgẽ bãane, a Zeezi zoodo, la d paamdẽ me t’a leokd d pʋʋsgã. Woto fãa paasda tõnd raoodo, tɩ d tõe n tʋm tʋʋmd ning a sẽn kõ-dã n baase. A Zeova sã n neẽ tɩ d maanda d sẽn tõe fãa n na n “ket n womd biis wʋsgo,” a sũur nooma hal wʋsgo!