1, 2. a) ¿Ndáaña ni̱ka̱ʼa̱n ta̱ Jesús xíʼin na̱ discípulora tá kúma̱níka kuvira? (Koto na̱ʼná ña̱ va̱xi chí xa̱ʼa). b) ¿Nda̱chun xíniñúʼu kunda̱a̱-iniyó ndáa xa̱ʼa kúú ña̱ nátúʼunyó xa̱ʼa Ndióxi̱? c) ¿Ndáaña sakuaʼayó xa̱ʼa?

TÁ ÑU̱Ú tá kúma̱níka kuvi ta̱ Jesús, na̱túʼunníra xíʼin na̱ apóstolra. Ta ni̱ka̱ʼa̱nra xíʼinna ña̱ kúʼvi̱ní-inira xínirana. Ta táki̱ʼva xi̱niyó nu̱ú inka artículo, miíra ni̱ka̱ʼa̱nra ña̱ kúúra yitu̱n tú uva. Ta saá kúú ña̱ chi̱ka̱a̱ra ndée na̱ discípulora ña̱ ná taxikana ku̱i̱ʼi á ña̱ kakakana natúʼunna xa̱ʼa Reino Ndióxi̱ (Juan 15:8).

² Ta̱ Jesús va̱ása níka̱ʼa̱n kuitíra ndáaña xíniñúʼu keʼéna, chi ni̱ka̱ʼa̱nra xíʼinna nda̱chun kúú ña̱ xíniñúʼu keʼénaña. Ni̱ka̱ʼa̱nra xíʼinna ndáa xa̱ʼa kúú ña̱ xíniñúʼu kakana natúʼunna xa̱ʼa Ndióxi̱. ¿Nda̱chun xíniñúʼu kunda̱a̱-iniyó ndáa xa̱ʼa kúú ña̱ keʼéyó ña̱yóʼo? Saáchi chindeéña miíyó ña̱ kuni̱kayó kakayó natúʼunyó xa̱ʼa Ndióxi̱ ña̱ va̱ʼa “kunda̱a̱-ini ndiʼi na̱ yiví” (Mat. 24:13, 14). Ta xa̱ʼa ña̱yóʼo, sakuaʼayó xa̱ʼa ku̱mí ña̱ʼa ña̱ káʼa̱n Biblia ña̱ kakakayó natúʼunyó xa̱ʼa Ndióxi̱. Ta saátu ka̱ʼa̱nyó xa̱ʼa ku̱mí ña̱ʼa ña̱ táxi Jehová ndaʼa̱yó ta ña̱yóʼo chindeéña miíyó ña̱ taxikayó ku̱i̱ʼi á ña̱ kéʼéyó ña̱ kúni̱ Jehová.

3. a) ¿Ndáa xa̱ʼa kúú ña̱ xíniñúʼu kakayó natúʼunyó xa̱ʼa Ndióxi̱ káchi Juan 15:8? b) ¿Ndáa chíñu kúú ña̱ kítáʼan tí uva xíʼin ka̱chi ta̱ Jesús, ta nda̱chun kúú ña̱ va̱ʼaní ña̱ xi̱niñúʼura tíyóʼo?

³ Xíkaníyó nátúʼunyó xa̱ʼa Ndióxi̱ chi saá ndásakáʼnuyó Jehová ta ndasayi̱i̱yó ki̱vi̱ra (kaʼvi Juan 15:1, 8). * Ná kotoyó chí nu̱ú texto yóʼo chi̱táʼan ta̱ Jesús yivára xíʼin iin ta̱a ta̱ chíʼi tú uva. Ta ni̱ka̱ʼa̱nra ña̱ miíra kúú yitu̱n tú uva ta na̱ discípulora kúú ndaʼa̱ tú yitu̱n uva (Juan 15:5). Ña̱kán tí uva va̱ʼaní kítáʼanrí xíʼin chiñu ña̱ kéʼé na̱ xíka nátúʼun xa̱ʼa Reino Ndióxi̱. Ta̱ Jesús ni̱ka̱ʼa̱nra xíʼin na̱ apóstolra: “Ndásakáʼnundó yivái̱ tá kéʼéndó ña̱ va̱ʼa”. Nda̱a̱ táki̱ʼva íyo iin ta̱ chíʼi tú uva káʼa̱n va̱ʼana xa̱ʼara tá va̱ʼaní tí uva kána, saátu miíyó ndásakáʼnuyó Jehová tá chíka̱a̱níyó ndée ña̱ xíkayó nátúʼunyó xa̱ʼara (Mat. 25:20-23).

4. a) ¿Ndáa ki̱ʼva ndásayi̱i̱yó ki̱vi̱ Ndióxi̱? b) ¿Nda̱saa túvi miíún xa̱ʼa ña̱ táxi Ndióxi̱ chiñu ndaʼún ña̱ ndasayi̱ún ki̱vi̱ra?

⁴ Táki̱ʼva xa̱a̱ sa̱kuaʼayó, tá nátúʼunyó xa̱ʼa Ndióxi̱ saá kúútuña ndásayi̱i̱yó ki̱vi̱ra. ¿Ndáa ki̱ʼva ndásayi̱i̱yóña? Ña̱ nda̱a̱ kúúña kǒo kívi yi̱i̱ka ndasayóña chi xa̱a̱ ña̱ yi̱i̱ kúúvaña. Soo ná kotoyó ndáaña ni̱ka̱ʼa̱n ta̱ profeta Isaías: “Jehová ta̱ kúúmií ndiʼi ndée... ta̱yóʼo kúú ta̱ xíniñúʼu koo santo nu̱úndó” (Is. 8:13). Ña̱kán iin ki̱ʼva ña̱ ndasayi̱i̱yó ki̱vi̱ Jehová kúúña vií ná keʼéyó xíʼinña, ná kǒo chitáʼanyóña xíʼin inka ki̱vi̱ na̱ yiví á inka ndióxi̱, ta saátu ña̱ chindeé táʼanyó xíʼin inka na̱ yiví ña̱ ná kunda̱a̱-inina ña̱ yi̱i̱ kúú ki̱vi̱ Ndióxi̱ (Mat. 6:9, nota). Saátu tá nátúʼunyó xíʼin inkana xa̱ʼa ña̱ va̱ʼa ña̱ kúúmií Jehová xíʼin xa̱ʼa ña̱ káʼa̱nra taxira ndaʼa̱ na̱ yiví chí nu̱únínu, saá kúú ña̱ káʼa̱n va̱ʼayó xa̱ʼa Jehová chi ta̱ Ndi̱va̱ʼa nina ña̱ vatá káʼa̱nra xa̱ʼara (Gén. 3:1-5). Saátu ndásayi̱i̱yó ki̱vi̱ Jehová tá chíndeé táʼanyó xíʼin inkana ña̱ ná kunda̱a̱-inina ña̱ iinlá Jehová kúú ta̱ xíniñúʼu ndasakáʼnuyó (Rev. 4:11). Ta̱ Rune xa̱a̱ xa̱ʼu̱n iin ku̱i̱ya̱ kúúra precursor ta káchira: “Kúsi̱íní-inii̱ xa̱ʼa ña̱ táxi mií Ndióxi̱ ta̱ káʼnu iníísaá ñuyǐví iin chiñu káʼnuní ndaʼíi̱ ña̱ kui̱ Testigora. Ta ña̱yóʼo sákusi̱íña-inii̱ ña̱ xíkakai̱ nátúʼi̱n xa̱ʼara”.

5. a) ¿Ndáa xa̱ʼa kúú ña̱ xíniñúʼu kakayó natúʼunyó xa̱ʼa Ndióxi̱ káchi Juan 15:9, 10? b) ¿Nda̱chun ni̱ka̱ʼa̱n ta̱ Jesús ña̱ xíniñúʼu ndakú koo iniyó?

⁵ (Kaʼvi Juan 15:9, 10). * Inka xa̱ʼa ña̱ nátúʼunyó xíʼin na̱ yiví kúúña kúʼvi̱ní-iniyó xíniyó Jehová xíʼin ta̱ Jesús (Mar. 12:30; Juan 14:15). Ta̱ Jesús va̱ása níka̱ʼa̱n kuitíra xíʼin na̱ discípulora ña̱ ná kuʼvi̱-inina kuninara, chi ni̱ka̱ʼa̱nra xíʼinna ña̱ ná kǒo kuxíkana nu̱úra. ¿Nda̱chun ni̱ka̱ʼa̱nra ña̱yóʼo? Saáchi xíniñúʼu ndakú koo iniyó ña̱ keʼéyó ña̱ kúni̱ Ndióxi̱ ku̱i̱ya̱ tá ku̱i̱ya̱. Ta̱ Jesús ni̱ka̱ʼa̱nra ña̱ xíniñúʼu ndakú koo iniyó tá ni̱ka̱ʼa̱nra ña̱ ná kǒo kuxíkayó nu̱úra, tuku ta tuku ni̱ka̱ʼa̱nra ña̱yóʼo nu̱ú Juan 15:4-10.

6. ¿Ndáa ki̱ʼva náʼa̱yó ña̱ kǒo kúni̱yó kuxíkayó nu̱ú ta̱ Cristo?

⁶ ¿Nda̱saa kivi na̱ʼa̱yó ña̱ kǒo kúni̱yó kuxíkayó nu̱ú ta̱ Cristo chi kúni̱yó sakusi̱íyó-inira? Xíniñúʼu keʼéyó chiñu ña̱ xáʼndara. Ña̱yóʼo kúni̱ kachiña, xíniñúʼuyó kuniso̱ʼoyó ña̱ káʼa̱nra xíʼinyó. Ña̱ ndúkúra nu̱úyó kúúña ná keʼéyó táki̱ʼva ke̱ʼé miíra, chi ni̱ka̱ʼa̱nra: “Nda̱a̱ táki̱ʼva kéʼíi̱ ña̱ káʼa̱n yivái̱ ta va̱ása kúxíkai̱ nu̱úra”. Xíʼin ña̱yóʼo xítoyó miíra sa̱ndákoo yichi̱ nu̱úyó (Juan 13:15).

7. ¿Nda̱saa kítáʼan ña̱ kuniso̱ʼoyó ña̱ káʼa̱n Ndióxi̱ xíʼin ña̱ kuʼvi̱-iniyó kuniyóra?

 ⁷ Ta̱ Jesús káxiní ni̱na̱ʼa̱ra ña̱ kuniso̱ʼoyó ña̱ káʼa̱nra iin kítáʼanña xíʼin ña̱ kuʼvi̱-iniyó kuniyó inkana, chi ni̱ka̱ʼa̱nra xíʼin ná apóstolra: “Na̱ xíniso̱ʼo ña̱ káʼi̱n kúú na̱ kúʼvi̱-ini xíni yi̱ʼi̱” (Juan 14:21). Tá kéʼéyó chiñu ña̱ xa̱ʼnda ta̱ Jesús ña̱ ku̱ʼu̱nyó natúʼunyó xa̱ʼa Ndióxi̱ xíʼin inka na̱ yiví, saá kúú ña̱ náʼa̱yó ña̱ kúʼvi̱-iniyó xíniyó Ndióxi̱. ¿Nda̱chun káʼa̱nyó ña̱yóʼo? Saáchi chiñu ña̱ xa̱ʼnda ta̱ Cristo nu̱úyó inkáchi íyoña xíʼin ña̱ kúni̱ yivára (Mat. 17:5; Juan 8:28). Xa̱ʼa ña̱ kúʼvi̱-iniyó xíniyóna, Jehová xíʼin ta̱ Jesús kúʼvi̱-inina xínina miíyó.

8, 9. a) ¿Ndáa inka xa̱ʼa kúú ña̱ xíkayó nátúʼunyó xa̱ʼa Ndióxi̱? b) ¿Nda̱saa chíndeé táʼan ña̱ káʼa̱n Ezequiel 3:18, 19 xíʼin 18:23 miíyó ña̱ natúʼunkayó xa̱ʼa Ndióxi̱?

⁸ Inka xa̱ʼa ña̱ káʼa̱nyó xíʼin na̱ yiví kúúña kúni̱yó ná kunda̱a̱-inina xa̱ʼa ña̱ kixi nu̱úna. Ña̱ Biblia káʼa̱nña xa̱ʼa ta̱ Noé ña̱ “ni̱xi̱kara na̱túʼunra xíʼin na̱ yiví” (kaʼvi 2 Pedro 2:5). * Ni̱ka̱ʼa̱nra xíʼinna xa̱ʼa ña̱ kixi tu̱ndóʼo nu̱úna ña̱ ndiʼi-xa̱ʼa ñuyǐví kán. ¿Nda̱chun va̱ʼa kúnda̱a̱-iniyó xa̱ʼa ña̱yóʼo? Ná kotoyó ña̱ ni̱ka̱ʼa̱n ta̱ Jesús: “Saáchi nda̱a̱ tá ni̱xi̱yo ki̱vi̱ saá tá kúma̱níka koon sa̱vi̱ kini, ndóona xíxina ta xíʼina, ta̱ ta̱a tíndaʼa̱ra ta ná ñaʼá tíndaʼa̱ná, nda̱a̱ ki̱vi̱ ni̱ki̱ʼvi ta̱ Noé ini tú arca ta kǒo níkandíxana nda̱a̱ tá ki̱xa̱a̱ sa̱vi̱ kini ta ndi̱ʼi-xa̱ʼa ndiʼina i̱xaará, saá koo tá ná kixa̱a̱ se̱ʼe Ndióxi̱” (Mat. 24:38, 39). Ni kǒo níkandíxanara, ta̱ Noé sa̱xínura chiñu ña̱ ta̱xi Ndióxi̱ ndaʼa̱ra ña̱ ka̱ʼa̱nra xíʼin na̱ yiví xa̱ʼa ña̱ kixi nu̱úna.

⁹ Tiempo vitin, xíkayó nátúʼunyó xíʼin na̱ yiví ña̱ va̱ʼa ná kunda̱a̱-inina nda̱saa kúni̱ Ndióxi̱ kundoo na̱ yiví. Nda̱a̱ táki̱ʼva íyo Jehová, saátu miíyó kúni̱yó ná sakuaʼa na̱ yiví xa̱ʼa Jehová ña̱ va̱ʼa kutakuna (Ezeq. 18:23). Tá xíkayó nátúʼunyó veʼe tá veʼe á nu̱ú chútú na̱ yiví kivi ku̱a̱ʼákana kunda̱a̱-ini xa̱ʼa ña̱ kixi Reino Ndióxi̱ sandiʼi-xa̱ʼaña ndiʼi ña̱ kini ña̱ íyo nu̱ú ñuyǐví yóʼo (Ezeq. 3:18, 19; Dan. 2:44; Rev. 14:6, 7).

10. a) ¿Ndáa xa̱ʼa kúú ña̱ xíniñúʼu kakayó natúʼunyó xa̱ʼa Ndióxi̱ káchi Mateo 22:39? b) Ka̱ʼa̱n nda̱saa chi̱ndeé táʼan ta̱ Pablo saátu ta̱ Silas xíʼin iin ta̱ ndáa veʼeka̱a chí ñuu Filipos.

¹⁰ Ná kotoyó ndáa inka xa̱ʼa kúú ña̱ xíniñúʼu natúʼunyó xa̱ʼa Ndióxi̱: kúʼvi̱-iniyó xíniyó na̱ yiví (Mat. 22:39). Kúnda̱a̱-iniyó ña̱ kivi nasa̱ma na̱ yiví tá ndóʼona iin tu̱ndóʼo. Xa̱ʼa ña̱ kúʼvi̱-iniyó xíniyóna xíkakayó nátúʼunyó xíʼinna. Ná ndakanixi̱níyó xa̱ʼa ña̱ ndo̱ʼo ta̱ apóstol Pablo xíʼin ta̱ Silas chí ñuu Filipos. Na̱ sáa̱-ini xíniñaʼá chi̱ka̱a̱nana veʼeka̱a. Soo iin kama, tá sava ñu̱ú, ndeéní ni̱ta̱an ta ni̱nuná ndiʼi yéʼé veʼeka̱a. Ta̱ ndáa veʼeka̱a nda̱kanixi̱níra ña̱ ke̱e ndiʼi na̱ ñúʼu ini veʼeka̱a, ta si̱lóʼo kaʼníra miíra. Soo ta̱ Pablo ni̱ka̱ʼa̱nra xíʼinra ña̱ ná kǒo keʼéraña. Ta̱ ndáa veʼeka̱a ni̱ndi̱ʼi̱kaví-inira ta ni̱nda̱ka̱tu̱ʼunra: “¿Ndáaña xíniñúʼu keʼíi̱ ña̱ va̱ʼa ka̱kui̱?”. Ta nda̱kuiinna yuʼúra: “Ka̱ndíxa ta̱ Jesús ta va̱ʼa ka̱kún” (Hech. 16:25-34).

11, 12. a) ¿Ndáaña sákuaʼayó xíʼin ña̱ ku̱u xíʼin ta̱ xi̱ndaa veʼeka̱a? b) ¿Nda̱chun kúni̱kayó natúʼunyó xíʼin na̱ yiví?

 ¹¹ ¿Ndáaña sákuaʼayó xíʼin ña̱ ku̱u yóʼo? Ta̱ ndáa veʼeka̱a na̱samara, soo ña̱yóʼo ku̱uña tá xa̱a̱ ndi̱ʼi ni̱ta̱an ta ndu̱kúra ña̱ ná chindeé táʼanna xíʼinra. Saátu vitin, sana sava na̱ yiví na̱ kǒo níxiin kuniso̱ʼo xa̱ʼa Biblia tá ya̱chi̱, kivi nasa̱mana tá ná kixi iin tu̱ndóʼo nu̱úna ta nda̱a̱ kivi ndukúna ña̱ chindeé táʼanyó xíʼinna. Savana ndákavaní-inina tá iin kama kǒoka chiñu káchíñuna, tá sándákoo táʼanna xíʼin ñá síʼína á yiína, tá káʼa̱nna xíʼinna ña̱ kúúmiína iin kue̱ʼe̱ ndeé á tá xíʼi̱ iin na̱ táʼanna nu̱úna. Tá yáʼana nu̱ú tu̱ndóʼo yóʼo, savana kíxaʼá ndákaniníxi̱nína xa̱ʼa ña̱ tákuna. Ta sana nda̱a̱ ndáka̱tu̱ʼunna táʼan ña̱ ni̱nda̱ka̱tu̱ʼun ta̱ xi̱ndaa veʼeka̱a: “¿Ndáaña xíniñúʼu keʼíi̱ ña̱ va̱ʼa ka̱kui̱?”. Tá ndáni̱ʼíyóna veʼena, sana nda̱a̱ vitinví kuni̱na kuniso̱ʼona ña̱ xíkayó nátúʼunyó.

¹² Ña̱kán, tá xíkakayó nátúʼunyó xa̱ʼa Ndióxi̱ kivi sandi̱koyó-ini na̱ yiví tá xa̱a̱ kúni̱na kuniso̱ʼona (Is. 61:1). Ñá Charlotte, xa̱a̱ yáʼaka 38 ku̱i̱ya̱ kúúñá precursora, ta káchiñá: “Tiempo vitin na̱ yiví ni va̱ása xíni̱na ndáaña keʼéna. Xíniñúʼunína ña̱ natúʼunyó xíʼinna”. Iin ñá hermana ñá naní Ejvor xa̱a̱ yáʼaka 34 ku̱i̱ya̱ kúúñá precursora ta káchiñá: “Tiempo vitin kúú ña̱ ndeéníka íyo ku̱a̱ʼá na̱ yiví na̱ ndákava-ini. Ta yi̱ʼi̱ kúni̱i̱ chindeé táʼi̱n xíʼinna, xa̱ʼa ña̱yóʼo xíkai̱ natúʼi̱n xa̱ʼa Ndióxi̱”. Xa̱ʼa ña̱ kúʼvi̱ní-iniyó xíniyó na̱ yiví, ña̱kán xíkakayó nátúʼunyó xíʼinna.

13, 14. a) ¿Ndáaña káʼa̱n Juan 15:11 xa̱ʼa? b) ¿Ndáa ki̱ʼva kusi̱í-iniyó táki̱ʼva kúsi̱í-ini ta̱ Jesús? c) ¿Nda̱saa chíndeé ña̱ si̱í íyo iniyó ña̱ natúʼunkayó xa̱ʼa Ndióxi̱?

¹³ Mií ñu̱ú tá kúma̱níka kuvi ta̱ Jesús, ni̱ka̱ʼa̱ntura xíʼin na̱ apóstolra xa̱ʼa ña̱ taxi Jehová ndaʼa̱na ña̱ va̱ʼa chindeé táʼanña xíʼinna ña̱ taxikana ku̱i̱ʼi á ña̱ keʼéna chiñura. ¿Ndáaña kúú ña̱yóʼo? Ta ¿nda̱saa chíndeé táʼanña xíʼinyó?

¹⁴ Ña̱ kusi̱í-iniyó. ¿Á iin ña̱ yo̱ʼvi̱ní kúú ña̱ keʼéyó chiñu ña̱ xa̱ʼnda ta̱ Jesús ña̱ ku̱ʼu̱nyó natúʼunyó xa̱ʼa Ndióxi̱? Su̱ví ña̱ yo̱ʼvi̱ kúúña. Tándi̱ʼi ni̱ka̱ʼa̱n ta̱ Jesús xa̱ʼa yitu̱n tú uva, ni̱ka̱ʼa̱nra ña̱ iin ki̱ʼva saá kusi̱í-iniyó tá ná natúʼunyó xa̱ʼa Reino Ndióxi̱ (kaʼvi Juan 15:11). * ¿Nda̱chun ni̱ka̱ʼa̱nra ña̱yóʼo? Táki̱ʼva xa̱a̱ sa̱kuaʼayó chi̱táʼanra miíra xíʼin yitu̱n tú uva ta ni̱ka̱ʼa̱nra na̱ discípulora kúú ndaʼa̱ tú yitu̱n. Ndaʼa̱ tú yitu̱n yóʼo ndákiʼinnú ti̱kui̱í tá ndíka̱a̱ xa̱ʼa mií tú yitu̱n káʼnu saáchi iin yitu̱n kúúvanú. Saátu miíyó kivi kusi̱í-iniyó táki̱ʼva kúsi̱í-ini ta̱ Jesús tá ná kutáʼanyó xíʼinra ta kundiku̱nyó yichi̱ra (Juan 4:34; 17:13; 1 Ped. 2:21). Ñá Hanne xa̱a̱ yáʼa 40 ku̱i̱ya̱ kúúñá precursora ta káchiñá: “Xa̱ʼa ña̱ ndiʼi yichi̱ kúsi̱í-inii̱ tándi̱ʼi kítai̱ servicio, ña̱yóʼo chíndeéña yi̱ʼi̱ ña̱ kúni̱kai̱ ndasakáʼnui̱ Jehová”. Xa̱ʼa ña̱ si̱íní íyo iniyó chíndeéña miíyó ña̱ kakakayó natúʼunyó xa̱ʼa Ndióxi̱ ni kǒo xíín na̱ yiví kuniso̱ʼona (Mat. 5:10-12).

15. a) ¿Ndáaña káʼa̱n Juan 14:27 xa̱ʼa? b) Ña̱ kǒo ndíʼi̱ní-iniyó, ¿nda̱saa chíndeé ña̱yóʼo miíyó ña̱ keʼékayó chiñu nu̱ú Ndióxi̱?

¹⁵ Ña̱ kǒo kundi̱ʼi̱-iniyó (kaʼvi Juan 14:27). * Mií ñu̱ú saá ta̱ Jesús ni̱ka̱ʼa̱nra xíʼin na̱ apóstol: “Táxii̱ yichi̱ nu̱úndó ña̱ ná kǒo kundi̱ʼi̱-inindó”. ¿Nda̱saa chíndeé ña̱yóʼo miíyó? Chindeéña miíyó ña̱ va̱ʼa koo ndakú-iniyó tá ku̱a̱ʼa̱nyó veʼe tá veʼe na̱ yiví, chi kúnda̱a̱-iniyó ña̱ sákusi̱íyó-ini Jehová xíʼin ta̱ Jesús. Ta ña̱yóʼo sándi̱koníña-iniyó (Sal. 149:4; Rom. 5:3, 4; Col. 3:15). Iin ta̱ hermano ta̱ naní Ulf xa̱a̱ ki̱ʼva 45 ku̱i̱ya̱ kúúra precursor ta káchira: “Tándíʼi kítai̱ nátúʼi̱n xa̱ʼa Ndióxi̱ kúnaaníi̱, soo  chiñu ña̱ kéʼíi̱ yóʼo sákusi̱íníña-inii̱ va̱ʼaní kúnii̱ kéʼíi̱ña”. Kúsi̱íní-iniyó ña̱ va̱ʼa kéʼéyó chiñu yóʼo ta nda̱a̱ va̱ʼa kúniyó.

16. a) ¿Ndáaña káʼa̱n Juan 15:15 xa̱ʼa? b) ¿Ndáaña xíniñúʼu keʼé na̱ apóstol ña̱ va̱ʼa kuukana migo ta̱ Jesús?

¹⁶ Ña̱ kutáʼanyó xíʼin ta̱ Jesús. Tándi̱ʼi ni̱ka̱ʼa̱n ta̱ Jesús xíʼin na̱ apóstol ña̱ kúni̱ra ná kusi̱í-inina, ni̱ka̱ʼa̱nra xíʼinna ña̱ ndáyáʼviní ña̱ ndixa kuʼvi̱-iniyó kuni táʼanyó (Juan 15:11-13). Tándi̱ʼi ni̱ka̱ʼa̱nra xíʼinna: “Káʼi̱n xíʼinndó ña̱ kúúndó migoi̱”. Ña̱ kutáʼanyó xíʼin ta̱ Jesús iin ña̱ va̱ʼaní kúú ña̱yóʼo. ¿Ndáaña xíniñúʼu keʼéka na̱ apóstol ña̱ va̱ʼa kuukana migora? Xíniñúʼu taxikana ku̱i̱ʼi á ña̱ keʼéna ña̱ kúni̱ Ndióxi̱ (kaʼvi Juan 15:14, 15). * Tá kúma̱níka u̱vi̱ ku̱i̱ya̱ kuvira, ta Jesús ni̱ka̱ʼa̱nra xíʼinna ña̱ ná ka̱ʼa̱nna ña̱yóʼo: “Reino Ndióxi̱ xa̱a̱ kuyatin kixa̱a̱ña” (Mat. 10:7). Mií ñu̱ú tá kúma̱níka kuvira, ni̱ka̱ʼa̱nra xíʼinna ña̱ ndakúní ná koo inina ta ná ndakundeékana natúʼunna xa̱ʼa Ndióxi̱ (Mat. 24:13; Mar. 3:14). Yo̱ʼvi̱va keʼéna ña̱ ni̱ka̱ʼa̱n ta̱ Jesús, soo kiviva keʼénaña tasaá kuukana migora. Ta íyoka inka ña̱ taxi Jehová ndaʼa̱na ña̱ chindeé miína.

17, 18. a)¿Ndáaña káʼa̱n Juan 15:16 xa̱ʼa? b) ¿Nda̱saa chindeéña na̱ discípulo ta̱ Jesús ña̱ ndakuiin Jehová yuʼúna? c) ¿Ndáaña kúú ña̱ táxi ndée ndaʼa̱yó ña̱ natúʼunkayó xa̱ʼa Jehová?

¹⁷ Ña̱ ndakuiin Ndióxi̱ oración ña̱ kéʼéyó. Ta̱ Jesús ni̱ka̱ʼa̱nra xíʼin na̱ apóstol, ndiʼi ña̱ ndúkúna xa̱ʼa ki̱vi̱ra, taxiva Jehová ña̱yóʼo ndaʼa̱na (Juan 15:16). Tu̱ʼun yóʼo chi̱ndeé táʼanníña xíʼinna. * Ta̱ Jesús xa̱a̱ ku̱nu̱mí kuvira ta kǒo níkunda̱a̱ va̱ʼa inina xíʼinña. Soo ndakiʼinvana ndée. Tá ná ka̱ʼa̱nna xíʼin Jehová ña̱ ná chindeérana ña̱ natúʼunna xa̱ʼa Reino, ndakuiinvara yuʼúna. Ta ni̱ya̱ʼa loʼo tiempo, xi̱nivana ña̱ nda̱kuiinra yuʼúna (Hech. 4:29, 31).

¹⁸ Saátu kúú tiempo vitin. Tá ná taxikayó ku̱i̱ʼi á ña̱ keʼéyó chiñu Ndióxi̱ kiviva kutáʼankayó xíʼin ta̱ Jesús. Ta kǒo kaka-iniyó ña̱ ndakuiinva Jehová ña̱ káʼa̱nyó xíʼinra ña̱ va̱ʼa kuchiñuyó xíʼin ña̱ ndóʼoyó tá xíkayó veʼe tá veʼe nátúʼunyó xa̱ʼara (Filip. 4:13). Kúsi̱íní-iniyó ña̱ ndákuiin Jehová ña̱ káʼa̱nyó xíʼinra ta saátu ña̱ kúú ta̱ Jesús migoyó. Ña̱yóʼo kúú ña̱ chíndeé miíyó ña̱ xíkakayó nátúʼunyó xa̱ʼa Ndióxi̱ (Sant. 1:17).

19. a) ¿Nda̱chun xíkakayó nátúʼunyó xa̱ʼa Ndióxi̱? b) ¿Ndáaña chindeé miíyó ña̱ kivi sáxi̱nuyó chiñu ña̱ ta̱xi Ndióxi̱ ndaʼa̱yó?

¹⁹ Táki̱ʼva sa̱kuaʼayó nu̱ú artículo yóʼo, ndákundeéyó nátúʼunyó xa̱ʼa Jehová chi kúni̱yó ndasakáʼnuyóra ta saátu ña̱ ndasayi̱i̱yó ki̱vi̱ra. Tá kéʼéyó ña̱yóʼo náʼa̱yó ña̱ kúʼvi̱-iniyó xíniyó Jehová xíʼin ta̱ Jesús, ta kúni̱yó ná kunda̱a̱-ini na̱ yiví xa̱ʼa ña̱ va̱xi nu̱úna ta saá náʼa̱yó ña̱ kúʼvi̱-iniyó xíniyóna. Ta ña̱ taxi ndée ndaʼa̱yó ña̱ va̱ʼa keʼéyó chiñu Jehová kúú ña̱yóʼo: ña̱ kusi̱í-iniyó, ña̱ kǒo kundi̱ʼi̱-iniyó, ña̱ kutáʼanyó xíʼin ta̱ Jesús xíʼin ña̱ ndakuiin Ndióxi̱ oración ña̱ kéʼéyó. Jehová kúsi̱íní-inira tá xítora ña̱ xíʼin ndiʼi níma̱yó chíka̱a̱yó ndée ña̱ keʼéyó chiñura.