1, 2. 1) ¿Toni kiniluij Jesús imomachtijkauan youak achto ke momikiliskia? (Xikonita taixkopin ipeujyan tamachtilis.) 2) ¿Keyej moneki tikelnamikiskej keyej titanojnotsaj? 3) ¿Toni tikitaskej itech nejin tamachtilis?

YOUAK achto ke kimiktiskiaj, Jesús uejkauak iniuan tajtoj tatitanilmej. Kinyekiluij ke kinteltasojtaya. Uan, kemej tikitakej itech achto tamachtilis, kijtoj ke yejua katka kemej se uvajmekat. Ijkon, kinyolchikauak imomachtijkauan maj kisentokanij kitemakanij “miak takilome”, oso maj kisentokanij kiteixmatiltianij iTekiuajyo Dios (Juan 15:8).

² Sayoj ke Jesús amo sayoj kiniluij toni monekia kichiuaskej, ta no keyej monekia kichiuaskej. Kiniluij keyej monekia kisentokaskej tanojnotsaskej. ¿Keyej moneki tikelnamikiskej keyej titanojnotsaj? Porin techolinis maj tiksentokakan titanojnotsakan “tech nochi senmanauak” (Mat. 24:13, 14). Yejua ika, maj tikitakan keyej moneki titanojnotsaskej. Tikitaskej naui taman tein kijtoua Biblia. No ika titajtoskej naui taman tein techmaka Jiova tein techpaleuia maj tiksentokakan tiktemakakan takilot.

3. 1) Kemej kijtoua Juan 15:8, ¿keyej titanojnotsaj? 2) ¿Toni kiixnextia uvas itech neskayot tein ika tajtoj Jesús, uan keyej kinamiki maj kiixnexti nejon?

³ Tein okachi tayekantok tein kichiua maj titanojnotsakan yejua porin ijkon tikueyitaliaj Jiova uan titapaleuiaj maj mochipaujkatali itokay (xikonixtajtolti Juan 15:1, 8). Keman Jesús ika tajtoj uvajmekat, kijtoj ke iTajtsin katka kemej takat akin kitoka uvas. Kijtoj ke Jesús yejua uvajmekat uan ke itatojtokakauan katkaj uvasmayit (Juan 15:5). Yejua ika, uvas kiixnextiaj takilot tein imomachtijkauan Jesús kitemakaj, oso inintanojnotsalis. Jesús kiniluij tatitanilmej: “Nankiueyimouiskachiutinemij Notajtsin Dios kuak nankitemakaj miak takilome”. Keman uvajmekat kitemaka kuajkuali uvas, kuali ika tajtouaj akin kitoka. No ijkon, keman timochikauaj tikteixmatiltiskej iTekiuajyo Jiova, tikueyitaliaj yejuatsin (Mat. 25:20-23).

4. 1) ¿Keniuj titapaleuiaj maj mochipaujkatali itokay Dios? 2) ¿Keniuj tionmomachilia porin tikonpia tatiochiualis tiontapaleuis maj mochipaujkatali itokay Dios?

⁴ Kemej tikitakejya, keman titanojnotsaj, no titapaleuiaj maj mochipaujkatali itokay Dios. ¿Keniuj? Melauak ke amo ueli tikchiuaj maj mochiua okachi yektik, porin ipa senkis yektikya. Sayoj ke maj tikitakan tein kijtoj tanauatijkej Isaías: “Jiova akin kinixyekana tateuianij, yejua Akin moneki nankiitaskej kemej yektik” (Is. 8:13). Yejua ika, se taman kemej titapaleuiaj maj mochipaujkatali itokay Dios yejua keman tikitaj ke amo onkak okse tokayit tein okachi ueyi uan keman tikinpaleuiaj oksekin maj kiajsikamatikan ke yektik (Mat. 6:9, TNM, nota). Kemej neskayot, keman ika titajtouaj ikualtsitsin kualneskayouan Jiova uan tein motenkauak kinmakas taltikpakneminij, tikinpaleuiaj oksekin maj kiitakan ke nochi tein Satanás kijtouilij amo melauak (Gén. 3:1-5). No titapaleuiaj maj mochipaujkatali itokay keman tiktemouaj tikinpaleuiskej taltikpakneminij maj kiitakan ke Jiova kinamiki kiselis “mouistililis uan ne ueyipanchiualis uan ne chikaukakualtsiyo” (Apoc. 4:11). Rune, akin kiuika dieciséis xiujmejya kemej precursor, kijtoua: “Niktasojkamati maj akin kichijchiuak iluikak uan taltikpak nechpaleuiani maj nimochiua niitaixpantijkauj. Necholinia maj niksentoka nitanojnotsa”.

5. 1) Kemej kijtoua Juan 15:9, 10, ¿keyej no titanojnotsaj? 2) ¿Keniuj kinextij Jesús ke moneki se taxikos?

⁵ (Xikonixtajtolti Juan 15:9, 10.) No titanojnotsaj porin tikinteltasojtaj Jiova uan Jesús (Mar. 12:30; Juan 14:15). Jesús kiniluij imomachtijkauan maj kisentokanij itech inetasojtalis. ¿Keyej? Porin moneki se taxikos uan ijkon uelis se nemis kemej se yekmelauj itatojtokakauj Cristo. Itech Juan 15:4-10, Jesús kinextij ke moneki se taxikos keman kikuik tajtol se kisentokas uan okseki tajtolmej kemej nejon.

6. ¿Keniuj tiknextiaj ke tiknekij tiksentokaskej itech inetasojtalis Cristo?

⁶ ¿Keniuj tiknextiaj ke tiknekij tiksentokaskej itech inetasojtalis Cristo uan maj kiyolpakti tein tikchiuaj? Komo tiktakamatij itanauatiluan. Jesús sayoj techtajtania maj tikchiuakan tein yejua no kichiuak. Yejua kijtoj: “Kuak Nejuatsin niktakamatiu itanauatiluan de Notajtsin Dios, ijkuakon Nejuatsin niksentoka nikselijtiyas itetasojtalis” (Juan 15:10). Jesús technextilij keniuj tikchiuaskej (Juan 13:15).

7. ¿Keniuj tatakamatilis mouika ika netasojtalis?

⁷ Jesús senkis kinextij ke tatakamatilis mouika ika netasojtalis keman kiniluij itatitaniluan: “Nochi nekes ten kixmatoske uan kitakamatijtinemij notanauatiluan, yejuan  nojonkes melau nechyektasojtaj” (Juan 14:21). Uan no, keman titanojnotsaj kemej tanauatij Jesús, no tiknextiaj ke tiktasojtaj Dios. ¿Keyej? Porin tein Cristo technauatia maj tikchiuakan mouika ika tein kinemilia iTajtsin (Mat. 17:5; Juan 8:28). Uan keman tikinnextiliaj Jiova uan Jesús ke tikintasojtaj, yejuan kisentokaj techtasojtaj.

8, 9. 1) ¿Keyej no titanojnotsaj? 2) ¿Keyej techolinia maj tiksentokakan titanojnotsakan tein kijtoua Ezequiel 3:18, 19 uan 18:23?

⁸ Expatika taman tein kichiua maj tiksentokakan titanojnotsakan yejua porin tiknekij tikinnejmachtiskej taltikpakneminij. Biblia kijtoua ke Noé “tanojnotstinemia” (xikonixtajtolti 2 Pedro 2:5). Moajsikamati ke keman Noé kinnojnotsak taltikpakneminij no kinnejmachtij ke amo uejkaua mochiuaskia se Tetsaujkakiouit. ¿Keyej tikijtouaj nejon? Maj tikitakan tein kijtoj Jesús: “Achtopa ke ualaskia ne ueyi tetsaukakiouit, ijkuakon nochi in tagayot tatakuajtoyaj san, uan oksekin motauantijtoyaj san. Uan in oksekin tetatme uan tenanme kinijtantoyaj san ne teichpochuan para ma monamiktikan. Uan ijkon mochiutiualaya hasta kuak Noé kalayik tech [...] arca. Uan in tagayot amo kineltokakke de ke ualaskia ne tetsaukakiouat. Pero satepan kuak uala ya, ijkuakon nochi kinuiyak uan moaelsimijke. Uan [...] ijkon yeski, kuak nimoualuikas Nejuatsin ni Yektagatsin” (Mat. 24:38, 39). Maski taltikpakneminij amo kikakiaj, Noé kisentokak kinnejmachtij.

⁹ Axkan, tikteixmatiltiaj iTekiuajyo Dios porin tiknekij tikinpaleuiskej oksekin maj kimatikan keniuj kiixtalijtok Dios maj nemikan taltikpakneminij. Ijkon kemej Jiova, yekmelauj tiknekij maj kikakikan kuali tanauatilmej uan maj nemikan nochipaya (Ezeq. 18:23). No ijkon, keman titanojnotsaj kajkalpan uan kampa miakej panouaj techpaleuia maj tikinnejmachtikan okachi miakej ke iTekiuajyo Dios amo uejkaua kiixpolos tein amo kuali (Ezeq. 3:18, 19; Dan. 2:44; Apoc. 14:6, 7).

10. 1) ¿Toni tein kijtoua Mateo 22:39 kichiua maj titanojnotsakan? 2) ¿Keniuj Pablo uan Silas kipaleuijkej se takat akin tajpiaya kampa tetsakuayaj ompa Filipos?

¹⁰ Naujpatika taman tein kichiua maj tiksentokakan titanojnotsakan yejua porin tikintasojtaj taltikpakneminij (Mat. 22:39). Tikmatij ke uelis kipataskej inintanemilil keman mopata tein kipanotoyaj. Netasojtalis tein tikinpialiaj techolinia maj tiksentokakan titanojnotsakan. Maj tiknemilikan tein kinpanok tatitanil Pablo uan Silas itech xolal Filipos. Taixnamikinij kintsakkej. Sayoj ke, tajkoyouan talolinik uan nochi puertas tapoujkej. Akin tajpiaya ompa mouik porin kinemilij ke nochin cholojkaj, uan yejua ika yaya momiktiti. Sayoj ke Pablo kitsajtsilij maj amo kichiua. Takat kijtoj: “Xinechilikan toni moneki ma nikchiuas para ijkon nikpias ne nemakixtilis”. Yejuan kinankilijkej: “Xitakuautamati sayo iuan Totekotsin Jesucristo uan ijkon Totekotsin mitsmakixtis” (Hech. 16:25-34).

11, 12. 1) ¿Toni techmachtia ika tanojnotsalis tein kipanok takat akin tajpiaya kampa tetsakuayaj? 2) ¿Keyej tiknekij tiksentokaskej titanojnotsaskej?

 ¹¹ ¿Toni techmachtia ika tanojnotsalis nejin tein panok? Maj tikitakan ke takat kipatak itanemilil uan tajtanik nepaleuil satepan ke talolinik. No ijkon, xa sekin akin achto amo kinekkej kikakiskej tein Biblia tamachtia mopataskej uan tajtaniskej nepaleuil satepan ke kipanoskej se ouijkayot. Kemej neskayot, sekin moteltayokoltiaj keman kipolouaj inintekiuj, keman ininnamik kinkaua, keman kimatij ke kipiaj se ueyi kokolis oso keman momikilia aksa akin kitasojtayaj. Keman panoua seki taman kemej nejin, sekin peua motajtaniaj keyej tinemij. Xa hasta no kijtoskej tein kijtoj takat akin tajpiaya kampa tetsakuayaj: “Xinechilikan toni moneki ma nikchiuas para ijkon nikpias ne nemakixtilis”. Keman tikinajsij itech tanojnotsalis, xa yekinika kinekiskej kikakiskej kuali tanauatilmej tein tikteixmatiltiaj.

¹² Yejua ika, komo tiksentokaj titanojnotsaj, uelis tikinyolseuiskej taltikpakneminij keman kinekiskejya techkakiskej (Is. 61:1). Charlotte, akin kiuika treinta y ocho xiujmejya kemej precursora, kijtoua: “Axkan taltikpakneminij amo kimatij toni kichiuaskej. Moneki maj ueli kikakikan kuali tanauatilmej”. Uan Ejvor, akin kiuika treinta y cuatro xiujmejya kemej precursora, kijtoua: “Amo keman moajsinij tel miakej akin tel amo kuali momachiliaj. Nikneki nikinpaleuis, uan nejon necholinia maj nitanojnotsa”. Senkis moita ke netasojtalis tein se kinpialia taltikpakneminij moneki teolinis maj se kisentoka se tanojnotsa.

13, 14. 1) ¿Toni netetayokolil ika tajtoua Juan 15:11? 2) ¿Keniuj uelis tikpiaskej yolpakilis tein kipia Jesús? 3) ¿Keniuj yolpakilis techpaleuia itech totanojnotsalis?

¹³ Youak achto ke kimiktiskiaj, Jesús no ika tajtoj netetayokolilmej tein kinpaleuiskia itatitaniluan maj kisentokanij kitemakanij takilot. ¿Katiyejua nejin netetayokolilmej? Uan ¿keniuj techpaleuiaj?

¹⁴ Yolpakilis. ¿Ouij tekisa se tanojnotsas? Amo. Satepan ke Jesús ika tajtoj uvajmekat, techyekmatiltij ke tiyolpakiskej kemej yejua komo tikteixmatiltiaj iTekiuajyo Dios (xikonixtajtolti Juan 15:11). ¿Keyej? Kemej tikitakejya, yejua kijtoj ke uvajmekat kiixnextia yejua uan ke imakoujyo kinixnextia imomachtijkauan. Imakoujyo uvajmekat kiselia at uan tein kichikaua uvajmekat komo kisentoka itech moajsi. No ijkon, tejuan tikmachiliskej yolpakilis tein Jesús kimachilia keman kichiua itanejnekilis iTajtsin komo tiksentokaj iuan uan tiktojtokaj ineskayo ika nejmachkayot (Juan 4:34; 17:13; 1 Ped. 2:21). Hanne, akin kiuika panoua cuarenta xiujmej kemej precursora, kijtoua: “Yolpakilis tein nochipa nikmachilia satepan ke nitanojnotsati nechyolchikaua maj niksentoka niktekitili Jiova”. Kemaj, nejin ueyi yolpakilis techmaka chikaualis tein techpaleuia maj tiksentokakan titanojnotsakan, maski miakej amo kinekij techkakiskej (Mat. 5:10-12).

15. 1) ¿Toni netetayokolil ika tajtoua Juan 14:27? 2) ¿Keniuj yolseuilis techpaleuia maj tiksentokakan titanojnotsakan?

¹⁵ Yolseuilis (xikonixtajtolti Juan 14:27). No itech nejon youak, Jesús kiniluijka itatitaniluan: “Neyolseuilis de Nejuatsin namechtayokolijteuas”. ¿Keniuj iyolseuilis techpaleuia maj tiksentokakan titanojnotsakan? Keman tiksentokaj titanojnotsaj, tikmachiliaj yolseuilis porin tikmatij ke tikchiujtokej maj Jiova uan Jesús yolpakikan (Sal. 149:4; Rom. 5:3, 4; Col. 3:15). Ulf, akin kiuika cuarenta y cinco xiujmejya kemej precursor, kijtoua: “Nisioui satepan ke nitanojnotsati, sayoj ke nejin tekit kichiua maj kuali nimomachili uan maj niyolpaki”. Semi tiktasojkamatij tikmachiliskej nejin yolseuilis.

16. 1) ¿Toni netetayokolil ika tajtoua Juan 15:15? 2) ¿Keniuj tatitanilmej ueliskiaj kisentokaskej yeskij itasojikniuan Jesús?

 ¹⁶ Jesús mochiua totasojikniuj. Satepan ke Jesús kiniluij tatitanilmej ke kinekia maj senkis yolpakinij, kinmelauilij keyej motelneki se kinextis netasojtalis uan amo se kichias se kiselis teisa (Juan 15:11-13). Ompa, kiniluij: “Namejuan nannotasojikniuan”. ¡Tel kualtsin netetayokolil! ¿Uan keniuj tatitanilmej ueliskiaj kisentokaskej yeskij itasojikniuan Jesús? Monekia kisentokaskej kitemakaskej takilot (xikonixtajtolti Juan 15:14-16). Kemej ome xiuit achto, Jesús kinnauatijka maj kitematiltianij: “Iluikaktekiuajyot moualtokijya” (Mat. 10:7, TNM). Yejua ika, youak achto ke kimiktiskiaj, kinyolchikauak maj taxikouanij uan maj kisentokanij tanojnotsanij (Mat. 24:13, TNM; Mar. 3:14). Ouij kinkisaskia kitakamatiskej nejon tanauatil, sayoj ke ueliskia kichiuaskej uan ijkon kisentokaskiaj yeskiaj itasojikniuan Jesús. Uan moajsia okse inetetayokolil Jiova tein kinpaleuiskia.

17, 18. 1) ¿Toni netetayokolil ika tajtoua Juan 15:16? 2) ¿Keniuj nejon netetayokolil kinpaleuiskia imomachtijkauan Jesús? 3) ¿Toni netetayokolilmej techpaleuiaj axkan?

¹⁷ Jiova technankilia tonetataujtiluan. Jesús kiniluij tatitanilmej ke nochipa keman tajtaniskiaj teisa itokaykopa, Jiova kinmakaskia (Juan 15:16). Nejon netenkaualis xa semi kinyolchikauak. * Melauak ke Jesús yaya momikilitiya, se taman tein yejuan ayamo kiyekajsikamatiaj. Sayoj ke kisentokaskiaj kiseliskiaj nepaleuil. Keman kitajtaniskiaj Jiova maj kinpaleui maj kiteixmatiltikan iTekiuajyo, yejuatsin kinnankiliskia. Tein melauj, tepitsin satepan, kiitakej keniuj kinnankiliaya (Hech. 4:29, 31).

¹⁸ No ijkon panoua axkan. Komo tiksentokaj titanojnotsaj, tiksentokaskej tiyeskij tiitasojikniuan Jesús. Uan no, uelis tikyekmatiskej ke Jiova technankilis keman tiktajtaniskej maj techpaleui keman ouij techkisas titanojnotsaskej (2 Cor. 4:7). Semi tiktasojkamatij maj Jiova technankili keman tiktataujtiaj uan maj Jesús totasojikniuj. Nejin techmaka chikaualis tein techpaleuia maj tiksentokakan tiktemakakan takilot (Sant. 1:17).

19. 1) ¿Keyej tiksentokaj titanojnotsaj? 2) ¿Toni techpaleuis maj tiktamichiuakan tekit tein Dios techmakak?

¹⁹ Itech nejin tamachtilis tikitakej ke tiksentokaj titanojnotsaj porin tiknekij tikueyitaliskej Jiova uan titapaleuiskej maj mochipaujkatali itokay, tiknekij tiknextiskej netasojtalis tein tikinpialiaj yejuatsin uan Jesús, tikinnejmachtiskej nochin taltikpakneminij uan tiknextiskej ke tikintasojtaj. Uan no, tikitakej naui netetayokolilmej tein Jiova techmaka: yolpakilis, yolseuilis, Jesús mochiua totasojikniuj uan ke Jiova kinankilia tonetataujtiluan. Nejin netetayokolilmej techmakaj chikaualis tein techpaleuia maj tiktamichiuakan tekit tein techmakak. Jiova semi kiyolpaktis kiitas ke timochikauaj tiksentokaskej tiktemakaskej “miak takilome”.