1, 2. (a) Ongulohi yahugunina manga Jesus inaa sa, okwa popi shike naalongwa ye? (Tala kethano lyopetameko.) (b) Omolwashike sha simana okukaleka momadhiladhilo kutya omolwashike hatu uvitha? (c) Otatu ka kundathana shike?

ONGULOHI yahugunina manga Jesus inaa sa, okwa li a popi ethimbo ele naayapostoli ye, nokwa li e ya shilipaleke kutya oku ya hole noonkondo. Shimwe ishewe, okwa li e ya lombwele kombinga yeyele lyomuviinu, ngaashi twa zi noku li kundathana moshitopolwa sha tetekele. Mokulongitha eyele ndyoka, Jesus okwa ladhipike aalongwa ye ya tsikile ‘okwiimika iiyimati oyindji,’ ano yu uvithe etumwalaka lyUukwaniilwa neidhidhimiko. — Joh. 15:8.

² Jesus ka li owala a lombwele aalongwa ye shoka ya pumbwa okuninga, ihe okwe ya lombwele wo kutya omolwashike ye na oku shi ninga. Okwe ya lombwele omatompelo gokuuvitha. Omolwashike sha simana tu ga kundathane? Ngele otwa kaleke momadhiladhilo kutya omolwashike twa pumbwa okutsikila okuuvitha, otashi ke tu inyengitha tu idhidhimike ‘mokuningila iigwana ayihe onzapo.’ (Mat. 24:13, 14) Onkee ano, natu kundathaneni omatompelo gane gopamanyolo kombinga yokuuvitha. Natango, otatu ka kundathana omagano gane ga za kuJehova, ngoka hage tu kwathele tu imike iiyimati neidhidhimiko.

3. (a) Etompelo lini lyokuuvitha tatu adha muJohannes 15:8? (b) Omandjembele ngoka ge li meyele lyaJesus otaga thaneke shike, nomolwashike tago opalele?

³ Etompelo lyetu lya simanenena lyokuuvitha, olyo okusimanekitha Jehova nokuyapulitha edhina lye mokati kaantu. (Lesha Johannes 15:1, 8.) Ndhindhilika kutya Jesus okwa yelekanitha He, Jehova, nomuneyana lyomiviinu. Jesus okwi iyelekanitha nomuviinu nenge nekota lyomuviinu, omanga aalanduli ye e ya yelekanitha niitayi. (Joh. 15:5) Onkene meyele ndyoka, omandjembele otaga thaneke iiyimati yUukwaniilwa, mbyoka hayi imikwa kaalanduli yaKristus. Jesus okwa li a lombwele aayapostoli ye a ti: “Tate ota simanekithwa, ne ngele tamu imi iiyimati oyindji.” Ngaashi naanaa omiviinu ndhoka hadhi imi omandjembele omawanawa hadhi simanekitha omuneyana, natse ohatu simanekitha Jehova, uuna tatu uvitha etumwalaka lyUukwaniilwa ngaashi tatu vulu. — Mat. 25:20-23.

4. (a) Omomikalo dhini hatu yapulitha edhina lyaKalunga? (b) Owu uvite ngiini sho wu na uuthembahenda wokuyapulitha edhina lyaKalunga?

⁴ Omomukalo guni iilonga yetu yokuuvitha hayi simanekitha edhina lyaKalunga? Tse itatu vulu okuningitha edhina lyaKalunga li kale eyapuki unene. Omolwashike? Omolwaashoka eyapuki nale. Ihe ndhindhilika shoka sha popiwa komuhunganeki Jesaja. Okwa ti: “Omuwa, Kalunga koongundu dhaakwiita, oye mu mu tale omuyapuki.” (Jes. 8:13, OB-1954) Ohatu yapulitha edhina lyaKalunga, moku li yoolola mo momadhina galwe agehe nosho wo mokukwathela yalwe ya tseye kutya eyapuki. (Mat. 6:9) Pashiholelwa, uuna tatu uvitha kombinga yomaukwatya gaJehova ga dhenga mbanda nosho wo yelalakano lye li na ko nasha naantu, kungawo otatu gamene edhina lyaKalunga kiifundja yaSatana. (Gen. 3:1-5) Shimwe ishewe, ohatu yapulitha edhina lyaKalunga, uuna tatu kambadhala okukwathela aantu moshitopolwa shetu, ya mone kutya Jehova okwa gwana “okusimanekwa omolweadhimo, esimano noonkondo.” (Eh. 4:11) Omumwatate Rune, ngoka a kokola ondjila omimvo 16, ota ti: “Okutseya kutya onda pewa ompito yokukala onzapo yOmushiti gweshito alihe, ohashi nyanyudha ndje. Osha kwathela ndje ndi kale nehalo lyokutsikila okuuvitha.”

5. (a) Etompelo lini lyokuuvitha lya tumbulwa muJohannes 15:9, 10? (b) Jesus okwa tsu ngiini omuthindo ompumbwe yokwiidhidhimika?

⁵ Lesha Johannes 15:9, 10. Etompelo ekwawo lya simana kutya omolwashike hatu uvitha etumwalaka lyUukwaniilwa, olyo kutya otu hole Jehova naJesus. (Mark. 12:30; Joh. 14:15) Jesus okwa li a lombwele aalongwa ye kutya naya ‘kale mohole ye.’ Omolwashike mbela? Omolwaashoka okukala omulongwa gwaKristus gwashili omumvo nomumvo, ohaku pula eidhidhimiko. Jesus okwa li a tsu omuthindo ompumbwe yokwiidhidhimika, sho a longitha oshitya “kaleni” iikando niikando muJohannes 15:4-10.

6. Ohatu ulike ngiini kutya otwa hala okukala mohole yaKristus?

⁶ Ohatu ulike ngiini kutya otwa hala okukala mohole yaKristus nokutsikila okukala twa hokiwa kuye? Ongele tatu vulika komalombwelo ge. Jesus okwe tu lombwele a ti: ‘Vulikeni kungame.’ Jesus okwe tu pula owala tu ninge shoka a ningile. Onkee ano, okwa gwedha ko a ti: “Ngashi ngame he vulika komalombwelo gaTate nonda kala mohole ye.” Odhoshili kutya Jesus okwe tu tulila po oshiholelwa. — Joh. 13:15.

7. Evuliko nohole oya pambathana ngiini?

⁷ Jesus okwa yelitha kutya okuvulika okwa pambathana nohole, sho a lombwele aayapostoli ye a ti: “Kehe ngoka ta taamba omalombwelo gandje nota vulika kugo, oku hole ndje.” (Joh. 14:21) Shimwe ishewe, ngele otwa ningi shoka Jesus e tu lombwela, sho a ti natu ye tu ku uvithe, kungawo otatu ulike kutya otu hole Kalunga. Omolwashike? Omolwaashoka shoka Jesus e tu lombwela, osha za kuHe. (Mat. 17:5; Joh. 8:28) Uuna tatu  ulukile Jehova naJesus kutya otu ya hole, otaya ka tsikila oku tu kaleka mohole yawo.

8, 9. (a) Etompelo lilwe lini tu na lyokuuvitha? (b) Omolwashike oohapu dhaJehova ndhoka tadhi adhika muHesekiel 3:18 nosho wo 18:23, tadhi tu inyengitha tu tsikile okuuvitha?

⁸ Otu na natango etompelo lilwe kutya omolwashike hatu tsikile okuuvitha. Ohatu uvitha tu londodhe aantu. MOmbiimbeli, Noa okwa popiwa e li “omuuvithi.” (Lesha 2 Petrus 2:5.) Manga Eyelu inaali ya, etumwalaka ndyoka Noa a li tu uvithile aantu, oli na okukala lya li lya kwatela mo elondodho kombinga yehanagulo ndyoka lya li tali ke ya. Omolwashike tatu tile ngawo? Ndhindhilika kutya Jesus okwa ti: “Ngaashi aantu ya li pethimbo ndiyaka lya tetekele eyelu, ya kala taa li notaa nu, taa hokana notaa hokanitha, sigo esiku ndyoka Noa a yi monguluwato, yo inaye shi tseya, sigo eyelu lye ya nolye ya hanagula po ayehe, osho tuu taku ka kala, uuna Omuna gwOmuntu te ya.” (Mat. 24:38, 39) Nonando aantu kaya li ya pulakene kuNoa, okwa tsikile okuuvitha nuulaadhi etumwalaka lyelondodho, ndyoka a li a pewa.

⁹ Natse kunena ohatu uvithile aantu etumwalaka lyUukwaniilwa, opo ya mone ompito yokwiilonga kombinga yehalo lyaKalunga li na ko nasha naantu. Ngaashi Jehova, natse otwa halelela aantu ya gandje eitulomo ketumwalaka noya tsikile ‘okukala nomwenyo.’ (Hes. 18:23) Sho tatu uvitha egumbo negumbo nosho wo pomahala gaayehe, ohatu londodha oyendji ngaashi tashi vulika kutya Uukwaniilwa waKalunga otawu ya wu hulithe po uuyuni mbuka wa kolokosha. — Hes. 3:18, 19; Dan. 2:44; Eh. 14:6, 7.

10. (a) Etompelo lini lyokuuvitha lya tumbulwa muMateus 22:39? (b) Hokolola nkene Paulus naSilas ya kwathele omulangeli gwondholongo muFilippi.

¹⁰ Etompelo lilwe natango lya simana kutya omolwashike hatu tsikile okuuvitha, olyo kutya ohatu uvitha, molwaashoka otu hole aantu ooyakwetu. (Mat. 22:39) Ohole ndjoka ohayi tu kwathele tu idhidhimikile okulonga oshilonga shika, tu na einekelo kutya aantu otashi vulike ya ninge omalunduluko, ngele oonkalo dhawo odha lunduluka. Natu taleni shoka sha ningilwa omuyapostoli Paulus naSilas. Moshilando Filippi, oya li ya tulwa mondholongo kaapataneki yawo. Ihe pokati kuusiku, ohaluka yowala evi olya tameke okukakama noonkondo nolya ndjingandjinga ondholongo nomiyelo odhe eguluka. Omulangeli gwondholongo, okwa dhiladhila kutya oonkwatwa adhihe odha fadhuka po nokwa li a hala okwiidhipaga. Ihe Paulus okwe mu igidha a ti: “Ino iningila uuwinayi nando owasha!” Omulangeli gwondholongo okwa pula a ti: “Ondi na okuninga shike, opo ndi hupithwe?” Oye mu lombwele ya ti: “Itaala Omuwa Jesus, e to hupithwa.” — Iil. 16:25-34.

11, 12. (a) Ehokololo lyomulangeli gwondholongo olya pambathana ngiini niilonga yetu yokuuvitha? (b) Otwa hala okutsikila okuninga shike?

¹¹ Ehokololo lyomulangeli gwondholongo olya pambathana ngiini niilonga yetu yokuuvitha? Ndhindhilika kutya omulangeli gwondholongo okwa li owala a lundulula iikala ye konima yekakamo lyevi, e ta pula a kwathelwe. Sha faathana, aantu yamwe kunena mboka ihaaya pulakene ketumwalaka lyOmbiimbeli, otashi vulika ya ka lundulule iikala yawo nokukonga ekwatho, ngele yi  iyadha moonkalo oondhigu. Pashiholelwa, aantu yamwe moshitopolwa shetu otashi vulika ya kanitha iilonga inaashi tegelelwa, mbyoka ya kala nokulonga ethimbo ele, noshe ya halutha. Yalwe otashi vulika ya dhengwa lela pomutima, omolwondjokana yawo ya teka. Natango, yalwe otashi vulika ya yemata, sho ya mono kutya oye na uuwehame wa kwata miiti nenge tashi vulika molwaashono ya silwa ngoka ye hole. Uuna oonkalo ndhoka dha holoka po, yamwe mboka ye li mudho otashi vulika ya pule omapulo kombinga yeityo lyonkalamwenyo, ndyoka kaaya li ya hala okuuva nale. Otashi vulika nokuli yi ipule taya ti: ‘Oshike ndi na okuninga, opo ndi hupithwe?’ Uuna twe ya tsakaneke, otashi vulika ya kale ya hala okupulakena ketumwalaka lyetu lyetegameno, oshikando shotango monkalamwenyo yawo.

¹² Onkee ano, ngele otwa tsikile okuuvitha nuulaadhi, kungawo otatu shilipaleke kutya otwi ilongekidha okugandja ehekeleko kaantu pethimbo mpoka tashi vulika yi ilongekidha oku li taamba ko. (Jes. 61:1) Omumwameme Charlotte, ngoka a kala miilonga yethimbo lyu udha uule womimvo 38, ota ti: “Aantu kunena kaye shi mpoka ye li. Oya pumbwa okuuva onkundana ombwanawa.” Omumwameme Ejvor, ngoka a kokola ondjila omimvo 34, ota ti: “Kunena, aantu oyendji oya gwililwa po pamaiyuvo, inaashi monika nando onale. Onda hala lela oku ya kwathela. Shoka oshi inyengitha ndje ndi uvithe.” Odhoshili kutya ohole yokuhola aantu ooyakwetu, oyi li etompelo lya simana lyokutsikila okuuvitha.

13, 14. (a) Omagano geni ga tumbulwa muJohannes 15:11? (b) Ongiini tatu vulu okukala nenyanyu ndyoka Jesus e na? (c) Enyanyu olya guma ngiini uukalele wetu?

¹³ Ongulohi yahugunina manga Jesus inaa sa, okwa li wo a lombwele aayapostoli ye kombinga yomagano gontumba, ngoka tage ke ya kwathela yi imike iiyimati neidhidhimiko. Omagano ngoka ogeni, nongiini tatu vulu okumona mo uuwanawa?

¹⁴ Omagano genyanyu. Mbela oshi li omutengi kutse okuvulika kelombwelo lyaJesus ndyoka tali ti natu uvithe? Hasho nando. Konima sho Jesus a popi eyele lyomuviinu, okwa ti kutya aauvithi yUukwaniilwa otaya ka kala ye na enyanyu. (Lesha Johannes 15:11.) Jesus okwe tu shilipaleka kutya enyanyu lye otali ka kala wo enyanyu lyetu. Ngiini mbela? Ngaashi sha popiwa metetekelo, Jesus okwi iyelekanitha nomuviinu, omanga aalongwa ye oniitayi. Omuviinu ohagu ambidhidha iitayi. Ngele iitayi oyi li kumwe nomuviinu, ohayi mono omeya niitungithi. Sha faathana, natse ngele otwa kala mekwatathano naKristus mokulandula oshinkoti she, otatu ka mona enyanyu lya fa ndyoka e na, sho ta longo ehalo lyaHe. (Joh. 4:34; 17:13; 1 Pet. 2:21) Omumwameme Hanne, ngoka a kokola ondjila uule womimvo dhi vulithe 40, ota ti: “Enyanyu ndyoka handi kala ndi na aluhe konima ngele nda zi muukalele, olya kwathela ndje ndi tsikile niilonga yaJehova.” Odhoshili kutya enyanyu lyashili ohali tu pe oonkondo tu tsikile okuuvitha, nokuli nomiitopolwa moka aantu ihaaya pulakene. — Mat. 5:10-12.

15. (a) Omagano geni ga tumbulwa muJohannes 14:27? (b) Omolwashike ombili hayi tu kwathele tu tsikile okwiimika iiyimati?

¹⁵ Omagano gombili. (Lesha Johannes 14:27.) Ongulohi yahugunina manga Jesus inaa sa, okwa lombwele aayapostoli ye a ti: “Ombili yandje mwene otandi yi mu pe.” Ongiini ombili ye, ndjoka yi li omagano, hayi tu kwathele tu imike iiyimati? Uuna tatu tsikile okuuvitha neidhidhimiko, ohatu kala tu uvite ombili, oshoka otu shi kutya Jehova naJesus oye tu hokwa. (Eps. 149:4; Rom. 5:3, 4; Kol. 3:15) Omumwatate Ulf, ngoka a kala miilonga yethimbo lyu udha uule womimvo 45, ota ti: “Okuuvitha ohaku lolodha ndje, ihe ohaku etele ndje ombili yashili nonkalamwenyo yi na eityo.” Inatu pandula tuu sho tu na ombili tayi kalelele!

16. (a) Omagano geni ga tumbulwa muJohannes 15:15? (b) Aayapostoli oya li taya vulu ngiini okutsikila okukala ookuume kaJesus?

 ¹⁶ Omagano guukuume. Konima sho Jesus a popi kutya enyanyu ndyoka aayapostoli taya ka kala ye na otashi vulika li kale “lya gwanenena,” okwe ya yelithile esimano lyokuulika ohole yashili. (Joh. 15:11-13) Opo nduno okwa ti: “Ngame otandi mu ithana ookuume kandje.” Okukala ookuume kaJesus, oku li omagano ge na ondilo! Aayapostoli oya li ye na okuninga shike, opo ya tsikile okukala ookuume ke? Oya li ye na ‘okuya ye ku uvithe nokutsikila okwiimika iiyimati.’ (Lesha Johannes 15:14-16.) Omimvo mbali manga shoka inaashi ningwa, Jesus okwa lombwele aayapostoli ye a ti: “Mokweenda kweni uvitheni, mu ya lombwele mu tye: Oshilongo shegulu she ya popepi.” (Mat. 10:7) Onkee ano, ongulohi ye ndjoka ya hugunina, okwe ya ladhipike yi idhidhimike miilonga mbyoka ya li ya tameka okulonga. (Mat. 24:13; Mark. 3:14) Okulonga shoka Jesus e ya lombwela kasha li oshipu, ihe oya li ya vulu okupondola nokutsikila okukala ookuume ke. Ngiini mbela? Okekwatho lyomagano galwe.

17, 18. (a) Omagano geni ga tumbulwa muJohannes 15:16? (b) Ongiini omagano ngoka ga li ga kwathele aalongwa yaJesus? (c) Omagano geni hage tu nkondopaleke kunena?

¹⁷ Omagano gokuyamukula omagalikano getu. Jesus okwa ti: “Shaa shoka tamu shi indile Tate medhina lyandje, oye ote shi mu pe.” (Joh. 15:16) Euvaneko ndika oli na okukala lya li lya nkondopaleke aayapostoli. * Nonando aayapostoli kaya li lela yu uvite ko kutya Jesus ota ka sa masiku, kaya li taya ka thigwa owala mombepo. Jehova okwa li i ilongekidha okuyamukula omagalikano gawo kombinga yekwatho kehe ya pumbwa, opo ya tsikile okuuvitha etumwalaka lyUukwaniilwa. Nziya konima yaashono, oya li ya mono nkene Jehova a yamukula omagalikano gawo. — Iil. 4:29, 31.

¹⁸ Shoka osho shi li nokunena. Sho tatu imike iiyimati neidhidhimiko, otatu nyanyukilwa uukuume wetu naJesus. Shimwe ishewe, otatu vulu okukala nuushili kutya Jehova okwi ilongekidha okuyamukula omagalikano getu uuna tatu mu pula ekwatho, moku tu kwathela tu sinde omashongo ngoka tashi vulika tu iyadhe mugo, sho tatu uvitha onkundana ombwanawa yUukwaniilwa. (Fil. 4:13) Inatu pandula tuu sho omagalikano getu haga yamukulwa naasho tu li ookuume kaJesus! Omagano ngaka ga za kuJehova, ohage tu nkondopaleke tu tsikile okwiimika iiyimati. — Jak. 1:17.

19. (a) Omolwashike hatu tsikile okukutha ombinga miilonga yokuuvitha? (b) Oshike hashi tu kwathele tu gwanithe po iilonga mbyoka Kalunga e tu pa?

¹⁹ Ngaashi twe shi kundathana moshitopolwa shika, ohatu tsikile okuuvitha tu simanekithe Jehova nokuyapulitha edhina lye, tu ulike kutya otu hole Jehova naJesus, tu londodhe aantu notu ulike kutya otu hole aantu ooyakwetu. Shimwe ishewe, omagano genyanyu, gombili, guukuume nogokuyamukula omagalikano getu, ohage tu tsu omukumo tu gwanithe po oshilonga shoka Kalunga e tu pa. Jehova ita ka kala tuu a nyanyukwa, sho e wete tatu ningi oonkambadhala dha mana mo tu ‘tsikile okwiimika iiyimati oyindji’!