1, 2. (a) Tokante kiko Hesus a papia ku su disipelnan e último anochi promé ku su morto? (Wak e promé plachi.) (b) Dikon ta importante pa nos kòrda pakiko nos tin ku prediká? (c) Kiko nos lo analisá den e artíkulo akí?

E ÚLTIMO anochi promé ku Hesus su morto, el a papia basta ratu ku su apòstelnan. Durante e kòmbersashon ei, el a sigurá nan ku e ta stima nan mashá. Ademas, el a konta nan e ilustrashon tokante un mata di wendrùif ku nos a analisá den e artíkulo anterior. Mediante e ilustrashon ei, Hesus a animá su disipelnan pa “sigui duna hopi fruta,” esta, pa nan perseverá den e trabou di prediká e mensahe di Reino.—Huan 15:8.

² Sinembargo, Hesus no solamente a bisa nan kiko nan mester a hasi sino tambe dikon nan mester a hasié. Sí, el a duna nan motibu pakiko nan mester a sigui prediká. Dikon ta importante pa nos tene na mente e motibunan pakiko nos tin ku sigui prediká? Pasobra e ora ei nos por sinti nos motivá pa perseverá den e trabou di duna “testimonio [na] tur nashon.” (Mat. 24:13, 14) Pues, ban analisá kuater motibu bíbliko pakiko nos tin ku prediká. Ademas, nos lo analisá kuater regalo  ku Yehova ta duna nos pa yuda nos perseverá segun ku nos ta duna fruta.

3. (a) Segun Huan 15:8, kiko ta e motibu di mas importante pakiko nos ta prediká? (b) Kiko e wendrùifnan den Hesus su ilustrashon ta representá, i dikon e komparashon ei ta apropiá?

³ E motibu di mas importante pakiko nos ta prediká ta pa duna gloria na Yehova i santifiká su nòmber. (Lesa Huan 15:1, 8.) Ripará ku Hesus a kompará su Tata, Yehova, ku un kunukero ku ta kultivá wendrùif. Ademas, Hesus a kompará su mes ku un mata di wendrùif i su siguidónan ku e ramanan. (Huan 15:5) Pues, apropiadamente e wendrùifnan ta representá e fruta di Reino ku e siguidónan di Kristu ta produsí, esta, nan predikashon. Hesus a bisa su apòstelnan: “Mi Tata ta ser glorifiká den esaki: si boso sigui duna hopi fruta.” Meskos ku un mata di wendrùif ku ta produsí bon fruta ta trese onor pa un kunukero, na un manera similar, nos ta duna gloria na Yehova ora nos ta hasi nos bèst pa prediká e mensahe di Reino.—Mat. 25:20-23.

4. (a) Den ki manera nos ta santifiká e nòmber di Dios? (b) Kiko bo ta pensa di e privilegio ku bo tin di santifiká Dios su nòmber?

⁴ Den ki manera nos predikashon ta santifiká e nòmber di Dios? Nos no por hasi e nòmber di Dios mas sagrado, pasobra e ta sagrado, òf santu, den sentido apsoluto. Pero tuma nota di loke profeta Isaías a bisa: “Ta e SEÑOR di ehérsitonan boso mester konsiderá komo santu.” (Isa. 8:13) Nos ta santifiká Dios su nòmber ora nos ta konsider’é, òf trat’é, komo un nòmber spesial, diferente for di tur otro nòmber, i ora nos ta yuda otro hende konsider’é komo santu. (Mat. 6:9, nota.) Por ehèmpel, ora nos papia e bèrdat tokante Yehova su maravioso kualidatnan i su propósito pa hende biba pa semper, nos ta defendé e nòmber di Dios i ta mustra ku loke Satanas a bisa ta mentira. (Gén. 3:1-5) Ademas, nos ta santifiká Dios su nòmber ora nos ta hasi esfuerso pa yuda hende den nos teritorio komprondé ku Yehova ta meresé “gloria, onor i poder.” (Rev. 4:11) Un ruman hòmber ku yama Rune, ku ta pionero pa 16 aña, a bisa: “Mi ta masha gradisidu ku mi tin e oportunidat di ta un testigu di e Kreador di universo. Esei ta motivá mi pa sigui prediká.”

5. (a) Segun Huan 15:9 i 10, ki motibu nos tin pa prediká? (b) Kon Hesus a enfatisá e importansia di perseveransia?

⁵ Lesa Huan 15:9, 10. Un otro motibu importante pakiko nos ta prediká e mensahe di Reino ta pasobra nos ta stima Yehova i Hesus ku henter nos kurason. (Mar. 12:30; Huan 14:15) Hesus no a djis bisa su disipelnan pa nan ta den su amor, ma pa nan “keda den [su] amor.” Dikon? Pasobra pa nos ta berdadero disipel di Kristu aña aden aña afó, nos mester di perseveransia. De echo, na Huan 15:4-10, bes tras bes Hesus a usa e palabra “keda” pa enfatisá e importansia di perseveransia.

6. Kon nos ta demostrá ku nos ke keda den Kristu su amor?

⁶ Kon nos ta demostrá ku nos ke keda den Kristu su amor i keda ku su aprobashon? Nos tin ku kumpli ku Hesus su mandamentunan. Ku poko palabra, Hesus ke pa nos obedes’é. Loke e ta pidi nos hasi ta loke e mes a hasi, pasobra el a bisa: “Meskos ku ami a kumpli ku e mandamentunan di mi Tata i ta keda den su amor.” Pues, ta bisto ku Hesus a pone e ehèmpel pa nos.—Huan 13:15.

7. Ki konekshon tin entre obedensia i amor?

 ⁷ Hesus a mustra bon kla ku obedensia ta konektá ku amor, ora el a bisa su apòstelnan: “Esun ku aseptá mi mandamentunan i kumpli ku nan ta esun ku stima mi.” (Huan 14:21) Ademas, ora nos ta kumpli ku Hesus su mandamentu di bai i prediká, nos ta demostrá ku nos ta stima Dios tambe, pasobra Hesus su mandamentunan ta reflehá e pensamentu di su Tata. (Mat. 17:5; Huan 8:28) I ora nos ta demostrá Yehova i Hesus ku nos ta stima nan, nan tambe ta stima nos.

8, 9. (a) Ki motibu mas nos tin pa prediká? (b) Dikon e palabranan na Ezekiel 3:18 i 19 i 18:23 ta motivá nos pa sigui prediká?

⁸ Un di tres motibu pakiko nos ta prediká ta pasobra nos ke spièrta otro hende. Beibel ta bisa ku Noe tabata “un predikadó.” (Lesa 2 Pedro 2:5.) Evidentemente, e mensahe ku Noe a prediká promé ku e Diluvio a inkluí un spièrtamentu tokante e binidero destrukshon. Dikon nos por bisa asina? Tuma nota di loke Hesus a bisa: “Pasobra meskos ku den e dianan ei promé ku e Diluvio, hende tabata kome i bebe, hòmber i muhé tabata kasa, te riba e dia ku Noe a drenta den arka, i nan no a hasi kaso te ora e Diluvio a bini i lastra nan tur bai kuné, asina presensia di e Yu di hende lo ta.” (Mat. 24:38, 39) Sí, aunke mayoria di hende no a skucha Noe, fielmente el a sigui proklamá e mensahe di spièrtamentu ku Dios a dun’é.

⁹ Awe, nos ta prediká e mensahe di Reino pa duna hende chèns di siña loke Dios ta bai hasi pa humanidat. Meskos ku Yehova, nos ke pa hende skucha e mensahe i “biba” pa semper. (Eze. 18:23) Na mes momento, ora nos ta prediká di kas pa kas i na lugánan públiko, nos ta spièrta mas tantu hende posibel ku e Reino di Dios lo bini i pone un fin na e mundu malbado akí.—Eze. 3:18, 19; Dan. 2:44; Rev. 14:6, 7.

10. (a) Ki motibu pa prediká Mateo 22:39 ta menshoná? (b) Konta kon Pablo i Sílas a yuda un wardadó di prezu na Filipo.

¹⁰ E di kuater motibu pakiko nos ta prediká ta pasobra nos ta stima nos próhimo. (Mat. 22:39) Amor pa próhimo ta motivá nos pa perseverá den e trabou akí pasobra nos sa ku hende su aktitut por kambia ora nan sirkunstansia kambia. Por ehèmpel, wak loke a pasa ora ku apòstel Pablo i su kompañero Sílas tabata na Filipo. Nan opositornan a benta nan den prizòn. Pero meianochi, diripiente un temblor a sagudí e prizòn i tur porta a bula habri. Komo ku e wardadó di prezu a kere ku e prezunan a hui, e tabata kla pa mata su kurpa. Ma Pablo a grit’é: “No hasi bo mes daño.” Tur spantá, e wardadó di prezu a puntra: “Kiko mi tin ku hasi pa mi haña salbashon?” Nan a bis’é ku e tin ku kere den Señor Hesus i lo e haña salbashon.—Echo. 16:25-34.

11, 12. (a) Kiko e relato tokante e wardadó di prezu ta siña nos? (b) Dikon nos tin ku sigui prediká?

¹¹ Kiko e relato ei ta siña nos tokante e  trabou di prediká? Ripará ku ta te despues di e temblor e wardadó di prezu su aktitut a kambia, i el a pidi yudansa. Awe tambe, algun hende ku ántes no tabata interesá den e mensahe di Beibel, kisas ta kambia nan aktitut i buska yudansa despues ku algu trágiko sosodé ku nan. Por ehèmpel, algun hende ta sinti nan aplastá i kibrá pasobra nan a pèrdè nan trabou diripiente, nan matrimonio a frakasá, nan a haña un malesa grave òf nan a pèrdè un ser kerí den morto. Ora kosnan asina sosodé, algun hende preokupá kisas ta kuminsá hasi pregunta tokante e nifikashon di bida. Podisé asta nan ta puntra nan mes: ‘Kiko mi tin ku hasi pa mi haña salbashon?’ E ora ei, kisas pa promé bes, nan ke skucha nos mensahe di speransa.

¹² P’esei, si nos ta sigui fielmente den e trabou di prediká, nos por konsolá hende na e momento ku nan ta kla pa aseptá esei. (Isa. 61:1) Charlotte, kende tin 38 aña den sirbishi di tempu kompleto, a bisa: “Awe hende ta sinti nan pèrdí. Nan mester haña oportunidat di skucha e bon notisia.” Ejvor, un ruman muhé ku tin 34 aña ta traha pionero, a bisa: “Awe, mas ku nunka, hopi hende ta sinti nan deprimí. Mi tin hopi gana di yuda nan, i esei ta motivá mi pa prediká.” Sí, amor pa próhimo ta un bon motibu pakiko nos tin ku sigui prediká.

13, 14. (a) Ki regalo Huan 15:11 ta menshoná? (b) Kon nos por tin mesun goso ku Hesus tin? (c) Kon e goso ei ta yuda nos den sirbishi?

¹³ E último anochi promé ku Hesus su morto, el a papia tambe ku su apòstelnan tokante diferente regalo ku lo a yuda nan perseverá segun ku nan tabata duna fruta. Kiko e regalonan akí ta, i kon nos por benefisiá di nan?

¹⁴ Goso. Akaso Hesus su mandamentu pa prediká ta un karga? Nò, al kontrario! Despues ku Hesus a konta e ilustrashon di e mata di wendrùif, el a bisa ku komo predikadónan di Reino nos lo tin mesun goso ku e tin. (Lesa Huan 15:11.) Kon asina? Manera a ser menshoná anteriormente, Hesus a kompará su mes ku e mata di wendrùif i su disipelnan ku e ramanan. E mata di wendrùif ta alimentá e ramanan; pues, tanten ku nan ta pegá na e mata, nan ta haña awa i nutrishon. Di mes manera, tanten ku nos ta keda den union ku Kristu, siguiendo su pasonan fielmente, nos por tin mesun goso ku e tin hasiendo e boluntat di su Tata. (Huan 4:34; 17:13; 1 Ped. 2:21) Un ruman muhé ku yama Hanne, kende ta pionero pa mas ku 40 aña, a bisa: “E goso ku mi ta sinti tur biaha despues di prediká ta motivá mi pa sigui den e sirbishi di Yehova.” No tin duda! Goso profundo ta duna nos forsa pa sigui prediká, asta den teritorionan kaminda hopi hende no ke skucha.—Mat. 5:10-12.

15. (a) Ki regalo Huan 14:27 ta menshoná? (b) Kon pas ta yuda nos sigui duna fruta?

¹⁵ Pas. (Lesa Huan 14:27.) Mas promé, riba e último anochi promé ku Hesus su morto, el a bisa su apòstelnan: “Mi ta duna boso mi pas.” Kon e regalo akí, esta, e pas di Hesus, ta yuda nos duna fruta? Ora nos ta den e trabou di prediká, nos sa ku nos tin e aprobashon di Yehova i Hesus. I esei ta duna nos pas. I na su turno, pas ta duna nos forsa pa sigui perseverá. (Sal. 149:4; Rom. 5:3, 4; Kol. 3:15) Ulf, un ruman hòmber ku tin 45 aña den sirbishi di tempu kompleto, a bisa: “Despues di prediká, mi ta keda  kansá. Pero e trabou akí ta duna mi gran satisfakshon i ta duna mi bida berdadero propósito.” Nos ta masha gradisidu ku nos tin pas mental.

16. (a) Ki regalo Huan 15:15 ta menshoná? (b) Kon e apòstelnan por a keda amigu di Hesus?

¹⁶ Hesus su amistat. Despues ku Hesus a bisa su apòstelnan ku e tabata ke pa nan goso “por ta kompleto,” el a splika nan e importansia di demostrá amor sin egoismo. (Huan 15:11-13) Kaba, el a bisa nan: “Mi a yama boso amigu.” Esei sí ta un regalo presioso: Hesus su amistat! Kiko e apòstelnan mester a hasi pa nan por a keda Hesus su amigu? Nan mester a “sigui duna hopi fruta.” (Lesa Huan 15:14-16.) Mas o ménos dos aña promé, Hesus a instruí su apòstelnan pa bai prediká i bisa: “E Reino di shelu a yega serka.” (Mat. 10:7) Pues, e último anochi, el a animá nan pa perseverá den e trabou ku nan a kuminsá. (Mat. 24:13; Mar. 3:14) No tabata fásil pa kumpli ku Hesus su mandamentu, pero nan por tabatin éksito i asina keda amigu di Hesus. Kon asina? Ku yudansa di un otro regalo.

17, 18. (a) Ki regalo Huan 15:16 ta menshoná? (b) Kon e regalo ei a yuda e disipelnan di Hesus? (c) Ki regalonan ta fortalesé nos awe?

¹⁷ Kontesta pa nos orashonnan. Hesus a bisa: “Kiko ku boso pidi e Tata den mi nòmber, lo e duna boso.” (Huan 15:16) E promesa akí sigur lo a fortalesé e apòstelnan mashá. * Ta bèrdat ku na e momento ei nan no a komprondé bon ku pronto Hesus lo a muri. Pero nan lo no a keda sin yudansa. Yehova tabata kla pa kontestá nan orashonnan i yuda nan kumpli ku e mandamentu pa prediká e mensahe di Reino. I asina a sosodé. Poko tempu despues, nan a mira kon Yehova a kontestá nan orashonnan pa yudansa.—Echo. 4:29, 31.

¹⁸ Awe ta meskos. Miéntras nos ta sigui perseverá segun ku nos ta duna fruta, nos por sigui disfrutá di Hesus su amistat. Ademas, nos por tin sigur ku Yehova ta kla pa kontestá nos ora nos pidié yuda nos vense opstákulo segun ku nos ta prediká e bon notisia di Reino. (Flp. 4:13) Nos ta masha kontentu ku Yehova ta kontestá nos orashonnan i ku nos por tin Hesus su amistat. E regalonan akí di Yehova ta fortalesé nos i yuda nos sigui duna fruta.—Sant. 1:17.

19. (a) Dikon nos ta sigui prediká? (b) Kiko ta yuda nos kaba ku e trabou ku Dios a duna nos?

¹⁹ Manera nos a analisá den e artíkulo akí, nos ta sigui prediká pa duna gloria na Yehova i santifiká su nòmber, pa demostrá ku nos ta stima Yehova i Hesus, pa spièrta hende i pa demostrá amor pa nos próhimo. Ademas, e regalonan di Yehova, esta, goso, pas, Hesus su amistat i kontesta pa nos orashonnan ta duna nos forsa pa kaba ku e trabou ku Dios a duna nos. Yehova ta keda masha kontentu ora e ta mira ku nos ta hasi esfuerso di henter nos kurason pa “sigui duna hopi fruta.”