1-2. (a) Äwa waut räd Jesus met siene Jinja dän Owent ver sienen Doot? (See daut Bilt aum Aunfank.) (b) Wuawäajen es daut needich em Denkj to hoolen, wuarom wie prädjen? (c) Äwa waut woa wie nu räden?

DÄN Owent ver sienen Doot unjahilt Jesus sikj lang met siene Apostel un säd dee noch eemol, woo sea hee an leewd. Hee vetald an uk een Jlikjnis von eene Wienstud, wua wie en dän väajen Artikjel aul von räden. Jesus säd, daut siene Nofolja “väl Frucht brinjen” sullen. Opp Griechisch bedieden dise Wieed, daut dee wieda sullen väl Frucht brinjen, aulsoo nich opphieren, de Norecht von daut Kjennichrikj to prädjen (Joh. 15:8).

² Jesus säd to siene Jinja nich bloos, waut dee doonen sullen, oba uk wuarom dee daut doonen sullen. Hee säd an de Jrind, wuarom see wiedaprädjen sullen. Fa ons es daut uk needich em Denkj to hoolen, wuarom wie nich opphieren sellen met prädjen. Daut woat ons halpen wieda Zeichnis to jäwen, “soo daut aule Velkja daut hieren” (Mat. 24:13-14). Nu woa wie veatlei seenen, wuarom wie no de Schreft no prädjen sellen. Un wie woaren uk vea Gowen von Jehova unjasieekjen, waut ons halpen wieda Frucht to brinjen.

3. (a) Waut es no Johanes 15:8 no een Grunt, wuarom wie prädjen? (b) Waut stalen de Wiendruwen en Jesus sien Jlikjnis väa, un wuarom es daut een paussendet Bilt?

³ Waut es de wichtichsta Grunt, wuarom wie prädjen? Wie wellen Jehova ieren un sienen Nomen heiljen (läs Johanes 15:1, 8). Jesus vejlikjt sienen Voda Jehova met eenen Wiengoadna, ooda eenen Goadenbesorja, waut sikj om eenen Wiengoaden kjemmat. Jesus säd, hee selfst wia de Wienstud, ooda de Staum, un siene Nofolja wieren de Ranken (Joh. 15:5). De Wiendruwen sent een Bilt fa de Frucht, waut Jesus siene Jinja brinjen, aulsoo fa daut Prädichtwoakj, waut dee doonen. Jesus säd to siene Apostel: “Mien Voda woat doaderch jeieet, wan jie väl Frucht brinjen”. Wan een Wiengoaden goode Wiendruwen drajcht, dan brinjt daut Iea opp dän Goadenbesorja. Un wan wie ons bastet doonen, om de Norecht von daut Kjennichrikj bekaunttomoaken, dan brinjt daut Iea opp Jehova (Mat. 25:20-23).

4. (a) Woo kjenn wie Gott sienen Nomen heiljen? (b) Woo denkjst du doaräwa, daut du de Mäajlichkjeit hast, Gott sienen Nomen to heiljen?

⁴ Woo woat Gott sien Nomen jeheilicht, wan wie prädjen? Wie kjennen Gott sienen Nomen nich noch heilja moaken, wäajen dee es aul gaunz un goa heilich. Oba de Profeet Jesaja säd: “Hool däm HARN, dee aules rejieet, heilich” (Jes. 8:13). Wie heiljen Gott sienen Nomen biejlikj, wan wie dän aus hecha talen aus irjenteenen aundren Nomen un wan wie aundre vestonen halpen, daut dee dän uk heilich hoolen sellen (Mat. 6:9). Wan wie de Menschen biejlikj de Woarheit lieren äwa Jehova siene besondre Ieejenschoften un äwa daut, waut hee sikj met de Menschheit väajenomen haft, dan halp wie dee vestonen, daut aul daut schlajchte, waut de Soton äwa Jehova jesajcht haft, Läajes sent (1. Mo. 3:1-5). Un wan wie ons em Deenst bemieejen de Menschen to wiesen, daut Jehova daut wieet es, “Harlichkjeit un Iea un Krauft to nämen”, dan doo wie sienen Nomen uk heiljen (Opb. 4:11). Rune, waut aul 16 Joa Pionia es, sajcht: “To weeten, daut ekj fa dän enstonen kaun, waut Himmel un Ieed jemoakt haft, doafäa sie ekj sea dankboa. Daut halpt mie, daut ekj wiedaprädjen well.”

5. (a) Wuarom doo wie no Johanes 15:9-10 no prädjen? (b) Woo muak Jesus daut dietlich, daut wie motten staunthauft bliewen?

⁵ Läs Johanes 15:9-10, Friesenbibel. * Onse Leew fa Jehova un fa Jesus es een tweeda Grunt, wuarom wie de Norecht von daut Kjennichrikj prädjen (Mar. 12:30; Joh. 14:15). Jesus säd to siene Jinja nich bloos, daut see en siene Leew sennen sullen, oba daut see en siene Leew bliewen sullen. Wuarom säd Jesus daut? Wiels hee wist, daut siene Nofolja wudden motten staunthauft bliewen toom wieda true Christen sennen. Om daut dietlich to moaken, brukt Jesus en Johanes 15:4-10 foaken de Wieed “blieft”, “bliewen” ooda “blift”.

6. Woo wies wie, daut wie en Jesus siene Leew bliewen wellen?

⁶ Woo wies wie, daut wie en Jesus siene Leew bliewen un am wieda jefaulen wellen? Wan wie am jehorchen. Hee well bloos, daut wie daut doonen, waut hee selfst uk deed, wiels hee säd: “Jrodsoo aus etj mienem Voda siene Jeboote jehole ha en enn siene Leew bliew” (Joh.15:10, Friesenbibel). Jesus es aulsoo ons Väabilt (Joh. 13:15).

7. Waut muak Jesus äwa Jehuarsom un Leew dietlich?

 ⁷ Jesus muak dietlich, daut Jehuarsom met Leew vebungen wia, aus hee to de Apostel säd: “Wäa miene Jebooten haft un helt, bewiest doamet, daut hee mie goot es” (Joh. 14:21). Jesus siene Jebooten komen von sienen Voda. Wan wie prädjen, soo aus Jesus sien Jeboot daut sajcht, dan wies wie doamet uk, daut wie Gott leewen (Mat. 17:5; Joh. 8:28). Un wan wie Jehova un Jesus Leew wiesen, dan kjenn wie en dee äare Leew bliewen.

8-9. (a) Waut es noch een Grunt, wuarom wie prädjen? (b) Woo halpen ons Jehova siene Wieed en Hesekiel 3:18-19 un 18:23, daut wie nich opphieren to prädjen?

⁸ Daut jeft noch eenen dredden Grunt, wuarom wie wiedaprädjen. Wie doonen de Menschen woarnen. De Schreft sajcht, daut Noah “Jerajchtichkjeit prädijd” (läs 2. Petrus 2:5). Aus Noah ver de Sintflut prädjen deed, säd hee secha uk, daut de Gottloose wudden venicht woaren. Wuarom kjenn wie daut sajen? Wäajen Jesus säd: “Soo aus daut don ver de Sintflut wia – see eeten un drunken, Mana frieden un Frues befrieden sikj, bat aun dän Dach aus Noah en daut Schepp nenjinkj, un see achten doa nich opp, bat de Sintflut kjeem un an aula utrod – soo woat daut sennen, wan de Menschensän jekomen es” (Mat. 24:38-39, NW). Wan de mieeschte Menschen uk nich horchen wullen, deed Noah de Menschen doawäajen wieda woarnen, soo aus Jehova daut haben wull.

⁹ Vondoag dän Dach moak wie de Norecht von daut Kjennichrikj bekaunt, daut de Menschen lieren kjennen, waut Gott sikj met de Menschheit väajenomen haft. Soo aus Jehova wensch wie ons daut, daut dee de Norecht aunnämen un “aum läwen [bliewen]” (Hes. 18:23). Oba wan wie von Hus to Hus gonen ooda aundatwäajen prädjen, dan doo wie de Menschen uk woarnen, daut Gott sien Kjennichrikj komen woat, om met de gottloose Welt een Enj to moaken (Hes. 3:18-19; Dan. 2:44; Opb. 14:6-7).

10. (a) Waut von Grunt finj wie en Matäus 22:39, wuarom wie prädjen? (b) Woo holpen Paulus un Silas eenen Jefenkjniswoaka en Filippi?

¹⁰ Een vieeda Grunt, wuarom wie prädjen, es, wiels wie onsen Näakjsten leewen (Mat. 22:39). Dise Leew halpt ons, daut wie wiedaprädjen, wiels wie weeten, de Menschen kjennen äare Meenunk endren, wan doa irjentwaut en dee äa Läwen passieet. Biejlikj deeden Jäajna Paulus un Silas en Filippi em Jefenkjnis stoppen. Oba medden en de Nacht wia doa een Ieedbäben, waut daut Jefenkjnis scheddad, soo daut doa aule Däaren opjinjen. De Jefenkjniswoaka docht, daut de Faustjenomne aula utjekleift wieren, un wull sikj selfst dootmoaken. Oba Paulus roopt met lude Stemm: “Doo die kjeenen Schoden [aun]”! De Jefenkjniswoaka fruach: “Waut mott ekj doonen, daut ekj seelich woa?” Paulus un Silas säden: “Jleew aun dän Harn Jesus Christus, dan woascht du . . . seelich” (Apj. 16:25-34).

11-12. (a) Waut lieet ons de Jeschicht von dän Jefenkjniswoaka äwa onsen Deenst? (b) Wuarom well wie wiedaprädjen?

 ¹¹ Waut lieet ons de Jeschicht von dän Jefenkjniswoaka äwa daut Prädichtwoakj? De Jefenkjniswoaka endad ieescht mol no daut Ieedbäben siene Meenunk un fruach no Help. Biejlikj soo kaun daut vondoag dän Dach uk bie dee Menschen sennen, waut nich no de biblische Norecht horchen wellen. Veleicht endren dee äare Meenunk un sieekjen no Help, wan dee irjentwaut schlemmet beläwen. Eenje velieren veleicht onverhofs äare Oabeit, waut see aul lang jehaut haben, un kjennen daut schia nich foten. Aundre sent truarich, wäajen äare Ehe tweijegonen es. Noch aundre sent veleicht gaunz vetwiewelt, wäajen dee enwoaren, daut dee eene schlemme Krankheit haben, ooda wäajen doa wäa jestorwen es, waut dee väl jeräakjent haben. Wan soont passieet, dan fangen väle aun, doaräwa notodenkjen, waut de Senn em Läwen es. Veleicht wundren dee mau rajcht soo aus de Jefenkjniswoaka: “Waut mott ekj doonen, daut ekj jerat woa?” Wan wie soone Menschen dan trafen, dan kjenn wie dee veleicht toom ieeschte Mol von de goode Norecht vetalen, waut Hopninj jeft.

¹² Wan wie tru wiedaprädjen, dan kjenn wie de Menschen halpen un treesten, wanemma dee reed sent, daut auntonämen (Jes. 61:1). Charlotte, waut aul 38 Joa em Voltietdeenst es, sajcht: “De Menschen vondoag dän Dach sent gaunz vebiestat. Dee brucken de Jeläajenheit, de goode Norecht to hieren.” Ejvor, waut aul 34 Joa Pionia es, sajcht: “Vondoag dän Dach sent väl Menschen soo doljeschloagen aus noch kjeenmol ea. Ekj well dee werkjlich halpen. Doawäajen doo ekj prädjen.” De Leew fa onsen Näakjsten es werkjlich een gooda Grunt toom wiedaprädjen.

13-14. (a) Äwa waut vonne Gow rät daut en Johanes 15:11? (b) Woo kjenn wie Jesus siene Freid kjrieen? (c) Woo halpt de Freid ons em Prädichtdeenst?

¹³ Dän Zeowes ver sienen Doot räd Jesus to de Apostel uk von Gowen, waut an halpen wudden, wieda Frucht to brinjen. Waut sent daut fa Gowen, un woo kjennen dee ons halpen?

¹⁴ Freid. Es prädjen fa ons eene Laust? Oba nä! Aus Jesus sien Jlikjnis von de Wienstud vetalt haud, säd hee, daut wie Freid haben wudden, wan wie prädjen deeden (läs Johanes 15:11). Hee vespruak mau rajcht, daut wie siene Freid haben wudden. Woo es daut mäajlich? Soo aus wie aul jeseenen haben, vejlikjt Jesus sikj selfst met eene Wienstud un siene Jinja met de Ranken. De Ranken kjrieen bloos Noarunk un Wota, wan dee aun de Wienstud bliewen. Biejlikj soo es daut, wan wie met Jesus veeent bliewen un en siene Footspoaren gonen. Wie woaren dan deeselwje Freid haben, waut hee haud – dee Freid, waut doavon kjemt, wan eena Gott sienen Wellen deit (Joh. 4:34; 17:13; 1. Pet. 2:21). Hanne, waut aul mea aus 40 Joa Pionia es, sajcht: “De Freid, waut ekj nom Deenst emma hab, halpt mie wiedatomoaken en Jehova sienen Deenst.” De Freid woat ons de Krauft jäwen, mau rajcht dan wiedatoprädjen, wan de mieeschte Menschen nich horchen wellen (Mat. 5:10-12).

15. (a) Von waut vonne Gow rät daut en Johanes 14:27? (b) Woo halpt de Fräd ons, wieda Frucht to brinjen?

¹⁵ Fräd (läs Johanes 14:27). Dän Owent ver sienen Doot säd Jesus uk to siene Apostel: “Mienen Fräd jäw ekj junt.” Wan wie prädjen, dan kjrie wie ennalich Fräd, wiels wie weeten, daut Jehova un Jesus sikj äwa ons freien, un daut es eene Gow, waut ons halpt wiedatomoaken (Psa. 149:4; Reem.  5:3-4, NW; Kol. 3:15). Ulf, waut aul 45 Joa em Voltietdeenst es, sajcht: “De Prädichtdeenst moakt mie meed, oba dee moakt mie uk tofräd un jeft mie werkjlich eenen Senn em Läwen.” Sent wie nich dankboa, daut wie opp iernst ennalich Fräd jefungen haben?

16. (a) Von waut vonne Gow rät daut en Johanes 15:15? (b) Woo kunnen de Apostel Jesus siene Frind bliewen?

¹⁶ Frind sennen met Jesus. Nodäm daut Jesus to de Apostel säd, daut see sikj sea freien sullen, läd hee dee ut, woo needich daut wia, woare Leew fa aundre to haben (Joh. 15:11-13). Dan säd hee noch: “Ekj hab junt Frind jenant”. Daut es eene wieetvolle Gow, ooda een Jeschenkj, daut wie kjennen met Jesus Frind sennen! Waut musten de Apostel doonen toom Jesus siene Frind bliewen? Dee musten “gonen un Frucht droagen” (läs Johanes 15:14-16). Ojjefäa twee Joa ea haud Jesus to dee jesajcht: “Wan jie gonen, prädicht un sajcht: Daut Himmelrikj es nu aune Däa” (Mat. 10:7). Doawäajen säd hee aun sienen latsten Owent, see sullen met daut Woakj wiedamoaken, waut see aunjefongen hauden (Mat. 24:13; Mar. 3:14). Jesus wist, daut wudd nich leicht sennen, oba dee wudden daut kjennen, un soo wudden dee siene Frind bliewen. Waut wudd dee halpen? Eene aundre Gow von Jehova.

17-18. (a) Von waut vonne Gow rät daut en Johanes 15:16? (b) Woo holp dise Gow Jesus siene Jinja? (c) Waut vonne Gowen jäwen ons vondoag dän Dach Krauft?

¹⁷ Gott horcht no onse Jebäda. Jesus vespruak: “De Voda [woat] junt jäwen, om waut jie en mienem Nomen bäden” (Joh. 15:16). Daut mott de Apostel werkjlich sea jestoakjt haben! * Dee wia daut noch nich gaunz kloa, daut Jesus boolt stoawen wudd. Aus hee dan storf, feelden dee sikj woomäajlich auleen. Oba dee wieren nich auleen, wiels Jehova no äare Jebäda horcht un an holp to prädjen. Un daut dieed goanich lang, bat see beläwden, woo Jehova an biestunt, aus see am no Help fruagen (Apj. 4:29, 31).

¹⁸ Soo es daut uk vondoag dän Dach. Wan wie wiedaprädjen, dan bliew wie Jesus siene Frind. Un wie kjennen ons uk secha sennen, daut Jehova no onse Jebäda horcht un ons halpt, wan ons daut schwoa felt de goode Norecht von daut Kjennichrikj to prädjen (Filip. 4:13, NW). Wie sent sea dankboa, daut Jehova onse Jebäda aunnemt un daut wie Jesus siene Frind sennen kjennen! Dise Gowen von Jehova jäwen ons Krauft, soo daut wie wieda Frucht brinjen kjennen (Jak. 1:17).

19. (a) Wuarom doo wie wiedaprädjen? (b) Waut halpt ons Gott sien Woakj derchtofieren?

¹⁹ En disen Artikjel hab wie veatlei jeseenen, wuarom wie wiedaprädjen: Wie wellen Jehova ieren un sienen Nomen heiljen, wie wiesen Jehova un Jesus onse Leew, wie woarnen de Menschen un wie leewen onsen Näakjsten. Un wie haben uk von vea Gowen jerät, waut ons Krauft jäwen, Gott sien Woakj derchtofieren. Daut sent Freid, Fräd, Frind sennen met Jesus un daut Gott no onse Jebäda horcht. Jehova freit sikj sea, wan hee sitt, woo wie ons aunstrenjen wieda “väl Frucht [to] brinjen”!