1. ¿Imatataj Jesús yachachisqasninman nisqa wañuchisqa karqa chay diaj ñaupaj chʼisinpi? (Patapi kaj dibujota qhawariy).

JESUSQA wañuchisqa karqa chay diaj ñaupaj chʼisin, yachachisqasninwan casi tutantin parlarqa. Nerqataj paykunata mayta munakusqanta. Chantapis pasaj semanapi yachakorqanchej jina, chay chʼisillataj yachachisqasninwan uva sachʼa kikinchaymanta parlarerqa. Jesusqa uva sachʼa kikinchaymanta parlaspa, yachachisqasninta kallpacharqa ‘ashkhata poqonallankupajpuni’, nisunman Diospa Gobiernonmanta willanallankupajpuni (Juan 15:8).

2. 1) ¿Imata yachaytaj tukuy laya runasman predicamunallapajpuni yanapawasunman? 2) ¿Imatataj qhepan parrafospi yachakusunchej?

² Jesusqa yachachisqasninman nerqa predicamunankupuni kasqanta. Nillarqataj imajtinpunichus predicamunanku kasqanta. Noqanchejpis yachananchej tiyan imajtinchus predicamunanchejpuni kasqanta. Chayta yachaspaqa, sinchʼita sayaspa, mana saykʼuspataj ‘sumaj willaykunata tukuy laya runasman’ predicamusunchej (Mat. 24:13, 14). Chayrayku qhepan parrafospi yachakusunchej, imajtinchus predicamunanchejpuni kasqanta. Chantapis  yachakusunchej imaschus yanapanawanchejta tukuy sonqo predicamunallapajpuni.

3. 1) Juan 15:8 versículo nisqanman jina, ¿imaraykutaj predicamunanchejpuni kasqa? 2) ¿Imawantaj uva sachʼaj poqoynin kikinchakusqa?

³ Noqanchejqa predicamunanchej tiyan Jehová Diosta jatunchananchejrayku, sutintataj runasman rejsichimunanchejrayku (Juan 15:1, 8 leey). Jesús uva sachʼa kikinchaymanta parlashaspa, yachachisqasninman nerqa, pay uva sachʼa kasqanta, yachachisqasnintaj ramas kasqankuta, uva huertapi llankʼajtaj Jehová Dios kasqanta (Juan 15:5). Uva sachʼaj poqoynintaj kikinchakun Jesuspa yachachisqasnin Diospa Gobiernonmanta sumaj willaykunata willasqankuwan. Chayrayku Jesús yachachisqasninman nerqa: “Tatayqa jatunchasqa kanqa, qankuna ashkhata poqojtiykichej”, nispa. Jehová Diosqa kusikun Gobiernonmanta sumaj willaykunata tukuy sonqo willamojtinchej, imaynatachus uj tarpoj runa uvasta sumajta poqochispa kusikun, ajinata (Mat. 25:20-23).

4. 1) ¿Imaynatataj Diospa sutinta jatunchasunman? 2) ¿Kusikunchejchu Diospa sutinta jatunchaspa?

⁴ Predicamuspaqa runasta yanapanchej Diospa sutinta llimphupaj qhawanankupaj. Diospa sutenqa santo, llimphutaj. Chayrayku profeta Isaías nerqa: “Tukuy Atiyniyoj Tata Diosllata Santo Kajpaj qhawaychej”, nispa (Isa. 8:13). Noqanchejqa Jehová Diospa sutinta jatunchanchej, runasman Diospa sutinta jatunpaj qhawanankupaj yachachimuspa (Mat. 6:9). Jehová Dios may kʼacha kasqanta, imatachus tumpamantawan ruwananta runasman yachachimuspaqa, runasta entiendechinchej, Jehová Diosmanta Satanás llullasta parlasqanta (Gén. 3:1-5). Chantapis Jehová Diosta jatunchallanchejtaj runasman ‘Jehová Dioslla atiyniyoj, jatunchanapaj jina, yupaychanapaj jinataj’ kasqanta yachachimuspa (Apo. 4:11). Hermanonchej Renemanta parlarina. * Payqa 16 watastaña precursor jina llankʼashan, nintaj: “Jehová Diosman may agradecesqa kashani, testigon kasqaymanta. Chayrayku runasman predicallaytapuni munani”, nispa.

5. 1) Juan 15:9, 10 versículos nisqanman jina, ¿imaraykutaj predicamunanchejpuni kasqa? 2) ¿Imajtintaj Jesús yachachisqasninman nisqa ‘munakullawaychejpuni’ nispa?

⁵ (Juan 15:9, 10 leey). Diospa Gobiernonmanta predicamunallanchejtaj tiyan Jehová Diosta, Jesucristotawan munakusqanchejrayku (Mar. 12:30; Juan 14:15). Jesusqa yachachisqasninman nerqa: ‘Munakullawaychejpuni’, nispa. Jesusqa chayta yachachisqasninman nerqa, kamachisqasninman jina kausakoyqa mana facilchu kasqanrayku. Chantachá Jesusqa Juan 15:4 al 10 versiculospi yachachisqasninman nerqa: “Noqawan ujchasqallapuni kaychej”, nispa.

6. ¿Imaynatataj rikuchisunman Jesusta munakusqanchejta?

⁶ Jesuspa kamachiykunasninta juntʼaspaqa, payta munakusqanchejta rikuchinchej, paytaj allin ñawiwan qhawawanchej. Chayrayku Jesús jinata nerqa: “Kamachisqasniytachus juntʼankichej chayqa, munakuyniypi kallankichejpuni, imaynatachus noqapis Tataypa kamachisqasninta juntʼani, munakuyninpitaj kallanipuni, ajinata”, nispa. Noqanchejpis Jesús jina ruwasunman (Juan 13:15).

7. ¿Imaraykutaj Jesusta kasukunanchej kasqa?

⁷ Jesús nerqa payta kasukunanchejpuni kasqanta munakusqanchejrayku. Pay nerqa: “Pichus kamachisqasniyta japʼikuspa kasukojmin munakuwajqa”, nispa (Juan 14: 21). Jesusqa yachachisqasninman kamacherqa predicamunankuta. Chay kamachiyta kasukuspaqa Jesusta, Jehová Diostawan munakusqanchejta rikuchinchej. Imajtinchus Jesusqa Tatanpa yachachisqallanta parlaj (Mat. 17:5; Juan 8:28). Jehová Diosta, Jesustawan munakullasunpuni chayqa, paykunapis munakullawasunpuni.

8. ¿Imaraykutaj runasman predicanallanchejtaj kasqa?

⁸ Runasman predicanallanchejtaj tiyan Diospa juicio pʼunchayninpi salvakunankuta munasqanchejrayku. Chaymanta parlaspa, Noeqa niraj Jatun Para chamushajtin runasman nerqa imatachus ruwanankuta salvakunankupaj. Chayrayku Bibliaqa Noemanta nin “cheqan kajta willaj” kasqanta (2 Pedro 2:5 leey). Jesuspis Noej tiemponmanta parlaspa jinata nerqa: “Chay tiempomanta runasqa manaraj Jatun Para chayamushajtin, mikhusharqanku, ujyasharqanku, casarakusharqanku, arcaman Noé yaykunan pʼunchaykama. Paykunaqa mana reparakorqankuchu Jatun Para chayamunankama, tukuyninkutaj chinkachisqa karqanku. Ajinallataj kanqa noqa kutimunay tiempopis”, nispa (Mat. 24:38, 39). Noeqa runas mana uyarejtinkupis, Jehová Diospa kamachisqanta juntʼallarqapuni Jatun Para chamushasqanta willaspa.

9. ¿Imatataj reparachiwanchej Ezequiel 3:18, 19 chantá 18:23 versículos?

⁹ Noqanchejqa, Diospa Gobiernonmanta predicamunchej Diosninchej sumaj kausayta qonawanchejta runas yachanankupaj. Jehová Dios jinataj munanchej, predicasqanchejta tukuy runas uyarinankuta ‘kausanallankupajpuni’ (Eze. 18:23). Wasimanta wasi, plazaspi, waj lugarespitaj predicaspaqa, runasta reparachinchej tumpitamantawan Diospa Gobiernon sajra runasta chinkachinanta (Eze. 3:18, 19; Dan. 2:44; Apo. 14:6, 7).

10. 1) Mateo 22:39 versículo nisqanman jina, ¿imajtintaj runasman predicanallanchejtaj kasqa? 2) ¿Imaynatataj Pablowan Silaswan uj carcelerota yanapasqanku?

¹⁰ Runasman predicanallanchejtaj tiyan, paykunata munakusqanchejrayku (Mat. 22:39). Runasqa jatun llakiypi rikukusparaj Diosmanta yachakuyta munanku. Chayrayku paykunata munakusqanchejrayku predicamunallanchejpuni tiyan. Chaymanta parlaspa Pablomanta, Silasmantawan parlarina. Filipos llajtapi kashajtinku runasqa, ujllata contrankupi oqharikuspa paykunata carcelman wisqʼaykucherqanku. Chaupi tutata jinataj, ujllata jallpʼaqa sinchʼita ikhakorqa, carcelpa cimientosnintaj kuyurerqa. Chay ratopachataj punkuspis kicharirakorqanku. Carcelerotaj rijchʼariytawan cárcel punkusta kichasqasta rikuspa, yuyarqa presos ayqesqankuta, espadanta orqhospataj wañuchikuyta munasharqa. Pablotajrí sinchʼita qhaparispa nerqa: “¡Ama wañuchikuychu!”, nispa. Carcelerotaj Pablota, Silastawan taporqa: “Wiraqochisníy, ¿imatataj ruwanay tiyan salvasqa kanaypajri?”, nispa. Paykunataj kuticherqanku: “Señor Jesuspi creey, salvasqataj kanki”, nispa (Hech. 16:25-34)..

11. ¿Runas cambiayta atinkumanchu mana uyariyta munawajtinchejpis?

 ¹¹ Reparanchej jina chay carceleroqa jallpʼa sinchʼita ikhakusqantawanraj kausayninta cambiarqa. Kay tiempopipis, runasqa mayta ñakʼarisparaj kausayninkuta cambianku, Diosmantapis yachakuyta munanku. Wakin runasqa may llakisqa kashanku trabajonkumanta wijchʼuchikusqankurayku chayri divorciakusqankurayku. Wakintaj may llakisqa kashanku mana jampiy atina onqoywan ñakʼarishasqankurayku chayri familiarninku wañupusqanrayku. Runasqa chay jina llakiypi rikukusparaj piensanku imaynatachus kusisqa kausakuyta atisqankupi. Chay carcelero jinataj ninkuman: “¿Imatataj ruwanay tiyan salvasqa kanaypajri?”, nispa. Chayrayku llakiypi rikukoj runasqa predicacionpi uyariyta munawasunman.

12. ¿Imajtintaj predicamunallanchejpuni kasqa?

¹² Tukuy tiempo predicallasunchejpuni chayqa, ñakʼariypi rikukoj runasta sonqochayta atisunchej (Isa. 61:1). Hermananchej Carlamanta parlarina. Payqa 38 watastaña precursora jina llankʼashan, nintaj: “Runasqa mana yachankuchu imatachus kausayninkuwan ruwanankuta. Chayrayku allintapuni ruwanchej paykunaman sumaj willaykunata willamuspa”, nispa. Hermananchej Evamantañataj parlarina. Payqa 34 watastaña precursora jina llankʼashan, nintaj: “Kay tiempopi runasqa, manchay llakisqa kashanku ashkha problemaspi rikukusqankurayku. Noqataj paykunata yanapayta munani. Chayrayku tukuy sonqo predicamullanipuni”, nispa. Arí, runasta munakusqanchejrayku predicanallapuni.

13, 14. 1) ¿Imamantataj Juan 15:11 versículo parlan? 2) ¿Imatataj ruwasunman Jesús jina kusisqa kanapaj? 3) ¿Allinchu kasqa predicacionman rispa kusisqallapuni kananchej?

¹³ Jesusqa yachachisqasninman nillarqataj imatachus ruwanankuta tukuy sonqo predicamunallankupajpuni. Chaymanta astawan parlarina.

¹⁴ Kusisqallapuni kana. Jesusqa predicanata kamachiwarqanchej, chaytataj mana uj llasa qʼepita jinachu qhawananchej tiyan. Imajtinchus Jesús uva sachʼamanta parlaytawan, yachachisqasninman nerqa: “Chay imasta niykichej, qankunapis noqa jina kusisqallapuni kanaykichejpaj”, nispa (Juan 15:11 leey). Jesusqa uva sachʼawan kikinchakorqa, yachachisqasnintataj ramaswan kikincharqa. Sachʼasmanta parlaspa uj ramaqa qʼomerllapuni, sachʼaman ujchasqallapuni kajtin. Ajinallataj noqanchejwanpis, sichus Jesuswan ujchasqallapuni kasunchej chayqa, pay jinallataj kusisqa kasunchej Diospa munayninta ruwaspa. Chaypajqa Jesuspa “purisqanta sumajta” qhatinanchej tiyan (Juan 4:34; 17:13; 1 Ped. 2:21). Hermananchej Anamanta parlarina. Payqa 40 watas kurajtaña precursora jina llankʼashan, nintaj: “Predicacionman rispaqa may kusisqa kani. Chayrayku Jehová Diosmanta willallaytapuni munani”, nispa. Predicacionman rispa kusisqa kasunchej chayqa, runas mana uyariwajtinchejpis predicamullasunpuni (Mat. 5:10-12).

15. 1) ¿Imamantataj Juan 14:27 versículo parlan? 2) ¿Imatataj ruwanallanchejpuni kasqa sonqo tiyasqa kanapaj?

¹⁵ Sonqo tiyasqa kana (Juan 14:27 leey). Jesusqa yachachisqasninman nerqa: “Sonqo tiyaykuyniyta qankunaman qoykichej”, nispa. Predicallasunpuni chayqa, sonqo tiyasqa kasunchej, Jehová Diosta, Jesustawan kusichisqanchejrayku (Sal. 149:4; Rom. 5:3, 4; Col. 3:15). Hermanonchej Alfredomanta parlarina. Payqa 45 watastaña precursor jina llankʼashan, nintaj: “Predicacionman rispa mayta saykʼuspapis, kusisqa, sonqo juntʼasqataj kani”, nispa. Tukuypis may kusisqa kashanchej sonqo tiyasqa kasqanchejmanta.

16. 1) ¿Imamantataj Juan 15:15 versículo parlan? 2) ¿Imatataj Jesús yachachisqasninman nisqa amigosnillanpuni kanankupaj?

 ¹⁶ Jesuspa amigon kana. Jesús yachachisqasninman kusisqallapuni kanankuta niytawan, purajmanta munanakunankuta nerqa (Juan 15:11-13). Chantá Jesusqa yachachisqasninman nerqa: ‘Noqaqa amigosníy niykichej’, nispa. Chaywanpis Jesuspa yachachisqasnin amigosnillanpuni kanankupajqa, poqonallankupuni karqa, nisunman predicanallankupuni karqa (Juan 15:14-16 leey). Iskay wata ñaupajtataj, Jesusqa yachachisqasninman nerqa: “Rishaspataj willamuychej: ‘Cielopi kaj Gobiernoqa qayllapiña kashan’”, nispa (Mat. 10:7). Chayrayku Jesusqa wañuchisqa karqa chay diaj ñaupaj chʼisinpi, yachachisqasninman nerqa sinchʼita sayaspa predicamunallankutapuni (Mat. 24:13; Mar. 3:14). Jesusqa yacharqa predicay mana facilchu kananta. Yachallarqataj Jehová Diospa yanapayninwan, yachachisqasnin predicanallankutapuni, amigosnillanpuni kanankutataj.

17. 1) ¿Imamantataj Juan 15:7 versículo parlan? 2) ¿Jesuspa yachachisqasninta Jehová Dios yanapasqachu?

¹⁷ Diosqa imatachus mañakusqanchejta qowasunchej. Jesús nerqa: “Imallatapis Tataymanta sutiypi mañakojtiykichejqa pay qosonqachej”, nispa (Juan 15:7, 16). Jesús chayta nispa, yachachisqasninta maytachá kallpacharqa. * Imajtinchus payqa tumpamantawan wañuchisqa kanan karqa. Chayta Jesuspa yachachisqasnin mana sutʼita entiendejtinkupis, Jehová Dios paykunata yanapanman karqa predicanallankupajpuni. Ajinapunitaj karqa, Jesús wañupusqantawan yachachisqasnin Diosmanta mana manchachikuspa predicanallankupajpuni mañakojtinku, Jehová Dios paykunata yanaparqa (Hech. 4:29, 31).

18. ¿Imasta yachaytaj kallpachawasunman predicamunallapajpuni?

¹⁸ Kay tiempopipis Jehová Diosqa, wakichisqa kashan imatachus mañakusqanchejta qonawanchejpaj. Sichus Dios yanapanawanchejta mañakusunchej chayqa, pay yanapawasunchej predicanallapajpuni runas predicacionpi churanakuwajtinchejpis chayri mana uyariwajtinchejpis (Fili. 4:13). Chantapis sinchʼita sayaspa predicallasunpuni chayqa, Jesuspa amigollanpuni kasunchej. Jesuspa amigon kayta atisqanchejta yachay, mañakusqanchejtataj Jehová Dios uyarisqanta yachayqa, mayta kallpachawanchej predicamunallapajpuni (Sant. 1:17).

19. 1) ¿Imaraykutaj predicamunanchejpuni kasqa? 2) ¿Imastaj yanapawasunman tukuy sonqo predicamunallapajpuni?

¹⁹ Ñaupaj parrafospeqa yachakorqanchej predicamunanchejpuni kasqanta, Jehová Diosta, sutinta ima jatunchananchejrayku, Jehová Diosta, Jesucristotawan munakusqanchejrayku, runas juicio pʼunchaypi salvakunankuta munasqanchejrayku, runasta munakusqanchejraykutaj. Chantapis yachakorqanchej tukuy sonqo predicamunallapajpuni, kusisqallapuni kanata, sonqo tiyasqa kanata, Jesuswan amigos kanata, mañakusqanchejtataj Jehová Dios uyarinanta. Jehová Diostaj mayta kusikun tukuy sonqo predicajtinchej.