1, 2. (a) Yesuusi reyara albaanni rosaanosira maa kulinonsa? (Hanafote noo misile lai.) (b) Sabbankeemmo korkaata ganyine heda hasiissannonkehu mayiraati? (c) Konninni aanchine maa ronseemmo?

YESUUSI reyara albaanni noo hashsha soqqamaasinesira lowore kulinonsa, hattono wodaninni baxannonsata buuxisinonsa. Sai birxichira ronsummonte gede, woyinete haqqicho daafira lawishsha kulinonsa. Yesuusi konne lawishsha horoonsiˈre, rosaanosi “batinye guma laala” agurtannokki gede yaano, Maganu Mangiste sokka sabbakate loosinsanni kaajjitanno gede jawaachishinonsa.—Yoh. 15:8.

² Ikkirono Yesuusi rosaanosira maa assa hasiissannonsaro calla ikkikkinni hakkonne coye assa hasiissannonsahu mayiraatirono kulinonsa. Sabbakate looso loosa hasiissannonsa korkaata kulinonsa. Ninkeno konne korkaata afa hasiissannonkehu mayiraati? Sabbankeemmohu mayiraatiro ganyine hendeemmoha ikkiro, hexxo mudhinummokkinni dancha duduwo “gosa baalate” duduwa dandiineemmo. (Mat. 24:13, 14) Konninni aanchine sabbankeemmo gede assannonkeha shoole korkaata ronseemmo. Qoleno, guma laallanni heeˈrate kaaˈlitannonketa Yihowa uyinonketa shoole elto laˈneemmo.

3. (a) Yohaannisi 15:8 te kulloonni garinni sabbakate looso loosa hasiissannonkehu mayiraati? (b) Yesuusi coyiˈrino lawishshi giddo kulloonniti woyinete laalo maa riqibbanno?

³ Sabbakate looso loosa hasiissannonkehu qaru korkaati, dagate albaanni Yihowa ayirrannonna suˈmisi qullaawanno gedeeti. (Yohaannisi 15:1, 8 nabbawi.) Yesuusi Annasi Yihowa woyinete haqqe towaatanno loosaasinchi ledo, umosi woyinete haqqicho ledo, hattono rosaanosi sinnate ledo taashshino. (Yoh. 15:5) Konni daafira, lawishshu giddo kulloonniti woyinete laalo, Kiristoosi harunsaano laaltannoha Maganu Mangiste guma riqibbanno. Yesuusi soqqamaasinesira “Batinye guma laaltiniro, konninni Anniˈya ayirranno” yiino. Woyinete haqqicho dancha guma laalturo hatte haqqicho towaatanno manchi hagiidhannonte gede, dandiinummo deerrinni Maganu Mangiste sokka dudumbeemmoha ikkiro Yihowa ayirranno.—Mat. 25:20-23.

4. (a) Maganu suˈmi qullaawanno gede assa dandiineemmohu hiittoonniiti? (b) Maganu suˈmi qullaawanno gede assate qoosso afiˈrakkinni mayi macciishshamannohe?

⁴ Sabbakate loosinke Yihowa suˈmi qullaawanno gede assannohu hiittoonniiti? Ninke Maganu suˈmi roore qullaawa ikkanno gede assa didandiineemmo. Korkaatuno wonanni suˈmisi qullaawahonna xalalaho. Kayinni Isayaasi 8:13 togo yitanno: “[Manniˈya] ani Olantote Mootichi Kaaliiqi [“Yihowa,” NW] qullaawa ikkoommota hawoonke; waajjinannihu ane callaati.” Maganu suˈmi qullaawanno gede assa dandiineemmo doogga giddo mitte, suˈmisi wole baalante suˈmuwanni baxxinohu gede asse laˈˈatenna wolootuno suˈmisi qullaawa ikkinota huwattanno gede kaaˈlate. (Mat. 6:9) Lawishshaho, dhagge ikkitinota Yihowa akattanna isi mannu oosora hedinore wolootaho dudumbeemmoha ikkiro, Sheexaanu Maganu suˈmi daafira coyiˈrinori kapho ikkinota leellinsheemmo. (Kal. 3:1-5) Qoleno qoqqowinkera noo manni Yihowara “ayirrinyunna guweenyu” hasiisannosita huwatanno gede kaaˈlineemmoha ikkiro Maganu suˈmi qullaawanno gede assinanni heeˈnoommo. (Aju. 4:11) Ruuna yinanniti 16 diro suwisaancho ikkite soqqantino rodoo togo yitino: “Kalqete alame Kalaqaanchi daafira farciˈrate qoosso afiraˈyanni tashshi yaannoe. Tini agurummakkinni farciˈreemma gede assitinoe.”

5. (a) Yohaannisi 15:9, 10 te garinni sabbakate looso loosa hasiissannonkehu mayiraati? (b) Yesuusi cinca hasiissannota luphi asse xawisinohu hiittoonniiti?

⁵ Yohaannisi 15:9, 10 nabbawi. Yihowaranna Yesuusira noonke baxilli Maganu Mangiste sokka dudumbeemmo gede assannonke. (Maq. 12:30; Yoh. 14:15) Yesuusi rosaanosi ‘baxillisinni heedhanno’ gede kulinonsa. Mayira? Korkaatuno Yesuusi harunsaano ikkine lowo diro heeˈrate cinca hasiissanno. Yesuusi cinca hasiissannota xawisate Yohaannisi 15:4-10 te noo qummeeshshira calla, ‘heedhe’ yaanno qaale haammata hige qummi assino.

6. Kiristoosi baxillinni heeˈra hasiˈneemmota leellisha dandiineemmohu hiittoonniiti?

⁶ Kiristoosi hagiirsiisanna isi baxilli giddo heeˈra hasiˈneemmota leellisha dandiineemmohu hiittoonniiti? Isi hajajo agadhatenniiti. Haranchunni Yesuusi ‘Anera hajajammeˈˈe’ yiino. Ikkirono Yesuusi ninke asse yiinonkehu isi umisi assinoreeti; korkaatuno isi togo yiino: “Ani kiˈnera assoommore kiˈneno assitinanni gede lawishsha ikkaˈnera assoommo.” (Yoh. 15:10) Ee, Yesuusi umisi dancha lawishsha ikkinonke.—Yoh. 13:15.

7. Hajajamanna baxillu mayi xaadooshshe afiˈrino?

⁷ Yesuusi baxillunna hajajama xaadooshshe afidhinota xawisanni soqqamaasinesira “hajajoˈya adhannohunna wonshannohu baxannoeho” yiino. (Yoh. 14:21) Qoleno Yesuusi ‘hadhine sabbakke’ yiino hajajo ayirrinseemmoha ikkiro, Yihowara noonke baxille leellinsheemmo; korkaatuno Yesuusi hajajino hajajora  Buicho Yihowaati. (Mat. 17:5; Yoh. 8:28) Yihowaranna Yesuusira baxille leellinsheemmoha ikkiro, insano baxillinsanni heeˈneemmo gede assitannonke.

8, 9. (a) Sabbankeemmo gede assannonkehu wolu korkaati maati? (b) Hiziqeeli 3:18, 19 nna 18:23 noohu Yihowa qaali sabbankeemmo gede kakkayisannonkehu mayiraati?

⁸ Sabbaka agurreemmokki gede assannonkehu wolu korkaatino no. Sabbankeemmohu manna qorowisiisateeti. Qullaawu Maxaafi Nohi farciˈraasincho ikkinota kulanno. (2 Pheexiroosi 2:5 nabbawi.) Nohi Baote Wayi daara albaanni sabbakino sokka manna dagganni noo bao daafira kule qorowisiisa ikkitukki digattino. Hatto yineemmohu mayiraati? Yesuusi togo yiino: “Hakka waro baote wayi daara albaanni Nohi markaawe ei barri geeshsha, mannu itanninna aganni, adhanninna adhamanni no. Baote wayi daye baalanka fee haaˈre haˈra geeshsha diaffino. Manchi Beetti daanno yannano hattoota ikkitanno.” (Mat. 24:38, 39) Mannu adha giwirono, Nohi uyinoonnisita qorowishshu sokka ammaname duduwino.

⁹ Yannankera, Maganu Mangiste sokka dudumbeemmohu wolootu Yihowa mannu oosora hedinore affanno gedeeti. Ninkeno Yihowa gede mannu kulleemmonsa sokka macciishshe “lubbote heeˈrara” hasiˈneemmo. (Hiz. 18:23) Minunni mine haˈne, hattono lowo manni noowa sabbankeemmo woyite, mulenni Maganu Mangiste dagge tenne busha alame huntannota kulle manna qorowisiinseemmo.—Hiz. 3:18, 19; Dan. 2:44; Aju. 14:6, 7.

10. (a) Maatewoosi 22:39 te sabbaka hasiissannonkeha hiikkonne korkaata kulloonni? (b) Phaawuloosinna Silaasi Filiphisiyuusi katamira heedhe usuru mini agaraancho kaaˈlitino gara xawisi.

¹⁰ Agurrummokkinni sabbankeemmo gede assannonkehu wolu korkaati mannaho noonke baxilleeti. (Mat. 22:39) Mannu noo gari soorramanno woyite laonsano soorrantannota anfoommo daafira, sabbakate loosinkenni kaajjine uurrineemmo. Hanni soqqamaasinchu Phaawuloosiranna soqqanshote jaalisi Silaasira iillinonsare laˈno. Filiphisiyuusi katamira heedheenna giwannonsa manni usuru minira eessinonsa. Hakkiinni hashshu taalootira, baattote huxano kaˈe usuru mine shaffeenna usuru mini xullichuwa faˈnantu. Usuru mini agaraanchi usuranyu fule bainoha laweennasi isonoo shaara bise fushshiˈrino. Hakkiinni Phaawuloosi mancho “Ninke baalunku konne heeˈnoommona umokki galaffattooti” yee huurosi naggi asse coyiˈrino. Usuru mini agaraanchi mase, “Gateemmo gede maa asso?” yee xaˈmino. Hakkiinni insa “Atino minikki mannino gattinannina, Mooticha Yesuusa ammani” yitinosi.—Soq. 16:25-34.

11, 12. (a) Usuru mini agaraanchi xagge soqqanshonke ledo mayi xaadooshshe afidhino? (b) Sabbaka agura hasiissannonkekkihu mayiraati?

¹¹ Usuru mini agaraanchi xagge sabbakate loosinke ledo mayi xaadooshshe afidhino? Hanni tenne hedi: Kuni agaraanchi hedosi biddi assiˈre kaaˈlo xaˈmiˈrinohu baattote huxano kaˈu gedensaanni. Hatteente gede, konni albaanni Qullaawu Maxaafi halaale macciishsha giwino manni, heeshshonsa giddo buutote qarri iillannonsa woyite hedonsa  biddi assiˈre kaaˈlo xaˈmirara dandaanno. Lawishshaho, qoqqowinkera heedhannori giddo mitu lowo diro loossanni keeshshitino looso hedeweelcho hoogge baasa dadillitinoha ikkara dandaanno. Wolootu qolte maatensa diiganteenna qarrante nooha ikkara dandaanno. Mitoota buutote xibbi amadinonsaha, woy shiidhe manchittinoha ikkara dandaanno. Alba halaale macciishsha gibbinori togoo qarri iillannonsa woyite, ‘Isi kalaqammoommohu mayiraati?’ yite xaˈmitara dandiitanno. Insa ‘Gatate maa assa hasiissannoe?’ yite heddannoha ikkara dandiitanno. Togoo manninni xaandeemmo woyite, heeshshonsa giddo mite yite kulleemmonsa sokka macciishshate sumuu yitara dandiitanno.

¹² Konni daafira sabbakate looso agurrummokkinni ammanamme loosanke, mannu dancha duduwo macciishsha hasiˈranno yannara sheshifachishate kaaˈlitannonke. (Isa. 61:1) Sharlooti yinanniti 38 diro woˈma yanna soqqansho soqqantino rodoo togo yitino: “Xaa yannara mannu higannowa hoogino. Konni daafira, dancha duduwo macciishshanno tunceenya afiˈra hasiissannonsa.” Evoori yinanniti 34 diro suwisaancho ikkite soqqantino rodoono togo yitino: “Yannankera mannu albinni roore shete no. Konne manna kaaˈla hasiˈreemma. Tini qolte sabbakeemma gede assitannoe.” Ee, mannaho noonke baxilli agurrummokkinni sabbankeemmo gede kakkayisannonke!

13, 14. (a) Yohaannisi 15:11 te hiittenne elto kulloonni? (b) Ninkeno Yesuusi gede hagiidha dandiineemmohu hiittoonniiti? (c) Soqqanshotenni afiˈneemmo hagiirri kaaˈlannonkehu hiittoonniiti?

¹³ Yesuusi reyara albaanni noo hashsha soqqamaasinesira hexxo mudhitukki guma laaltanni heedhanno gede kaaˈlitinonsa elto kulinonsa. Tini elto maati? Ninke tenne eltonni horo afiˈra dandiineemmohu hiittoonniiti?

¹⁴ Hagiirre. Yesuusi sabbankeemmo gede hajajino hajajo duha ikkitinoni? Diˈˈikkitino! Yesuusi woyinete haqqicho daafira lawishsha coyiˈri gedensaanni, Maganu Mangiste sokka dudumbummoro hagiirraamma ikkineemmota coyiˈrino. (Yohaannisi 15:11 nabbawi.) Isinni isi afiˈrino hagiirre ninkeno afiˈra dandiineemmota buuxisinonke. Hiittoonni? Aleenni ronsummonte gede Yesuusi isonooto woyinete haqqicho ledo, rosaanosi qole sinnate ledo taashshino. Haqqicho, sinna irkisse amaddanno. Sinna waanna wole hasiissanno sagale afidhannohu woyinete haqqichora qaˈmidhe heedhuro callaati. Hatteente gede, Kiristoosi faale haˈne isi ledo noonke mittimma agadhine heeˈnummo geeshsha, isi Annisi fajjo wonshe afiˈrino hagiirre ninkeno afiˈra dandiineemmo. (Yoh. 4:34; 17:13; 1 Phe. 2:21) Hanee yinanniti 40 saˈˈanno diro suwisaancho ikkite soqqantino rodoo togo yitino: “Soqqamumma gedensaanni macciishshamannoe hagiirri, Yihowara soqqama agureemmakki gede assannoe.” Ee, soqqanshotenni afiˈneemmo hagiirri, mannu sokkanke macciishshannokki qoqqowira nafa hexxo mudhinummokki sabbankeemmo gede assannonke.—Mat. 5:10-12.

15. (a) Yohaannisi 14:27 te hiittenne elto xawinsoonni? (b) Keeru, guma laallanni heeˈneemmo gede kaaˈlannonkehu hiittoonniiti?

¹⁵ Keere. (Yohaannisi 14:27 nabbawi.) Yesuusi reyara albaanni noo hashsha soqqamaasinesira “keereˈya eemmoˈne” yiinonsa. Tini elto yaano Yesuusi keeri guma laalate kaaˈlannonkehu hiittoonniiti? Kaajjine sabbankeemmoha ikkiro, Yihowanna Yesuusa hagiirsiinsanni heeˈnoommota anfoommo daafira giddiidi keere afiˈneemmo. (Far. 149:4; Rom. 5:3, 4; Qol. 3:15) Ulfi yinannihu 45 diro woˈma yanna soqqansho giddo keeshshino rodii togo yiino: “Sabbakate loosi daafursannoeha ikkirono, giddiidi harshammo afiˈreemmonna hagiirru noo heeshsho heeˈreemmo gede kaaˈlinoe.” Ee, geedannoha giddiidi keere  afiˈnoommo daafira Yihowa galanteemmosi!

16. (a) Yohaannisi 15:15 hiittenne elto kulloonni? (b) Yesuusi soqqamaasine isi jaalla ikkite heeˈrate maa assa hasiissannonsa?

¹⁶ Yesuusi jaala ikka. Yesuusi, soqqamaasinesi hagiirri “woˈma ikkanno gede” halchannota coyiˈri gedensaanni, meessi horo agurre baxille leellisha hasiissannohu mayiraatiro xawisino. (Yoh. 15:11-13) Hakkiinni isi “jaallaˈya yoommoˈne” yiinonsa. Yesuusi jaala ikka kaajja eltooti! Soqqamaasinesi isi jaalla ikke heeˈrate maa assa hasiissannonsa? Insa ‘hadhe batinye guma laala’ hasiissannonsa. (Yohaannisi 15:14-16 nabbawi.) Yesuusi mitu lamu diri albaanni soqqamaasinesi togo yee hajajinonsa: “Hadhine, ‘Gordu Gashshooti gamba yiino’ yitine kulle.” (Mat. 10:7) Konni daafira isi jeefote hashsha, hanaffino loosinni kaajja hasiissannonsata kulinonsa. (Mat. 24:13; Maq. 3:14) Yesuusi hajajino hajajo wonsha shota ikka hooggurono, isi jaalla ikkite heeˈrate tenne assa hasiissinonsa. Togo assate kaaˈlannonsari maati? Tennera kaaˈlitinonsati wole elto no.

17, 18. (a) Yohaannisi 15:16 te hiittenne elto kulloonni? (b) Tini elto Yesuusi rosaano kaaˈlitannohu hiittoonniiti? (c) Xaa yannara kaaˈlitannonketi Yihowa uyinonke elto hiittenneeti?

¹⁷ Huuccattonkera dawaro afiˈneemmo. Yesuusi “Ane suˈminni huuccidhinannire baala Anniˈya aannoˈne” yiino. (Yoh. 15:16) Tini hexxo Yesuusi soqqamaasine baasa jawaachishshinonsati egennantinote! * Soqqamaasine hatte yannara huwattinokkiha ikkirono, Massagaanchinsa reyanno yanna rakke no; ikkirono kaaˈlo afidhanno doogo no. Maganu Mangiste sokka duduwate loosonsa loosa dandiitanno gede kaaˈlansara huuccidhuro Yihowa huuccattonsa macciishshannota addaxxa dandiitanno. Qoleno shiima yanna gedensaanni huuccidhino huuccattora Yihowa dawaro qolanna laˈino.—Soq. 4:29, 31.

¹⁸ Yannankerano kaajjine guma laallanni heeˈnummo geeshsha Yesuusi jaalla ikka dandiineemmo. Qoleno, Maganu Mangisteha dancha duduwo dudumbeemmo woyite xaadannonke guficho qeelleemmo gede kaaˈlankera Yihowa huucciˈneemmoha ikkiro isi kaaˈlannonketa addaxxa dandiineemmo. (Far. 46:1) Yihowa huuccattonkera dawaro qolannotanna Yesuusi jaalla ikkineemmota afanke lowo geeshsha hagiirsiissannonke! Tini Yihowa uyinonke elto guma laallanni heeˈrate kaaˈlitannonke.—Yai. 1:17.

19. (a) Sabbakate looso loosa agura hasiissannonkekkihu mayiraati? (b) Maganu looso umo fushshate mayi kaaˈlannonke?

¹⁹ Konni birxichira ronsummo garinni, Yihowa ayirrannonna suˈmisi qullaawanno gede, Maganohonna Yesuusira baxillenke leellishate, manna qorowisiisatenna wolootaho baxille leellishate agurrummokkinni sabbaka hasiissannonke. Yihowa uyinonke elto yaano, hagiirru, keeru, Yesuusi jaala ikkate qoossonna huuccattonkera afiˈneemmo dawaro Maganu uyinonke looso umo fushshate kaaˈlitannonke. Yihowa woˈmu wodaninkenni ‘batinye guma laalate’ sharrammanna laˈˈanno woyite lowo geeshsha hagiidhanno!