1, 2. (a) O ā mea na faailoa atu e Iesu i ona soo a o lata i lona maliu? (Tagaʻi i le ata i luga aʻe o le matua.) (e) Aiseā e tāua ai ona manatua pea māfuaaga e tatou te talaʻi ai? (i) O ā manatu o le a tatou iloiloina?

I LE pō mulimuli o Iesu a o leʻi maliu o ia, na ia faamautinoa atu ai i ona aposetolo lona alofa tele iā i latou a o faia sa latou talanoaga umi. E lē gata i lea, na ia taʻua le talafaatusa i le vine lea na tatou talanoaina i le mataupu ua mavae. Na faaaogā e Iesu lenā talafaatusa e faalaeiau ai ona soo ina ia “saga fua tele mai,” e ala lea i le tumau ona talaʻi atu o le feʻau o le Malo.​—Ioa. 15:8.

² E lē gata na faailoa atu e Iesu i ona soo po o ā mea e tatau ona latou faia, ae pe aiseā foʻi e ao ai ona latou faia faapea. Na ia faailoa atu iā i latou māfuaaga e faia ai le galuega talaʻi. Aiseā e tāua ai ona tatou iloiloina nei māfuaaga? Pe a tatou manatua pea māfuaaga e tatau ai ona faaauau ona talaʻi, e uunaʻia ai i tatou ina ia tumau e “molimau i atunuu uma.” (Mata. 24:13, 14) O lea, seʻi o tatou tilofaʻia māfuaaga e fā faale-Tusi Paia e talaʻi ai. O le a tatou talanoaina foʻi meaalofa e fā mai iā Ieova e fesoasoani iā i tatou ina ia tumau ai ona fua mai.

3. (a) O le ā le māfuaaga e talaʻi ai o loo taʻua i le Ioane 15:8? (e) O le ā e faasino i ai fua o le vine i le talafaatusa a Iesu, ma aiseā e talafeagai ai lenei faatusatusaga?

³ O le māfuaaga sili e tatou te faia ai le galuega talaʻi, ina ia faamamaluina ai Ieova ma faapaia ai lona suafa. (Faitau le Ioane 15:1, 8.) Ia mātau, na faatusa e Iesu lona Tamā o Ieova i le galue vine po o se faifaatoʻaga o loo ia totōina se togāvine. Na faatusa e Iesu o ia lava i le vine po o se laau o le vine, ma o ona soo o lālā. (Ioa. 15:5) O lea, o fua o le vine ua talafeagai lelei ona faaata mai ai fua o le Malo lea e fuaina mai e soo o Keriso. Na fetalai atu Iesu i ona aposetolo: “Ua faamamaluina loʻu Tamā ona o lenei mea, i lo outou saga fua tele mai.” E pei lava ona taʻuleleia le galue vine pe a fuaina mai e vine ni fua lelei, e faapena foʻi ona taʻuleleia pe faamamaluina Ieova pe a tatou maelega e folafola atu le feʻau o le Malo.​—Mata. 25:20-23.

4. (a) O ā auala e tatou te faapaiaina ai le suafa o le Atua? (e) O ā ni ou lagona e faatatau i le faaeaga o le faapaiaina o le suafa o le Atua?

⁴ E faapefea ona faapaiaina le suafa o le Atua i la tatou galuega talaʻi? Talu ai o le suafa o le Atua e atoatoa ona paia, e lē mafai la ona tatou toe faaopoopo i ai se paia. E ui i lea, mātau le manatu na taʻua e le perofeta o Isaia: “E ao ona outou manatua e na o Ieova o ʻau e paia lava o ia.” (Isa. 8:13) O se tasi o auala e tatou te faapaiaina ai le suafa o le Atua, o le manatu i ai e silisili i isi suafa uma, ma fesoasoani i tagata ina ia manatu i ai o se suafa e paia. (Mata. 6:9) O se faataʻitaʻiga, pe a tatou faailoa atu le upu moni e faatatau i uiga matagofie o Ieova ma lona finagalo e lē suia mo tagata, o lenā ua tatou puipuia le suafa o le Atua mai i tala pepelo ma taufaaleaga a Satani. (Kene. 3:1-5) E lē gata i lea, e tatou te faapaiaina le suafa o le Atua pe a tatou taumafai e fesoasoani i tagata i le oganuu, ina ia iloa o Ieova e tatau ona “mauaina le viiga, ma le mamalu, ma le mana.” (Faaa. 4:11) Ua faapea mai Rune o se paeonia mo le 16 tausaga: “Ou te lotofaafetai i le mauaina o le faaeaga e molimau atu ai e faatatau i Lē na foafoaina mea uma. E uunaʻia ai aʻu ina ia faaauau pea ona talaʻi.”

5. (a) O le ā le māfuaaga e talaʻi ai o loo taʻua i le Ioane 15:9, 10? (e) Na faapefea ona faamamafa mai e Iesu le tāua o le tumau?

⁵ Faitau le Ioane 15:9, 10. O lo tatou alolofa moni iā Ieova ma Iesu, o se māfuaaga tāua lea e tatou te talaʻia ai le feʻau o le Malo. (Mare. 12:30; Ioa. 14:15) Na fetalai atu Iesu i ona soo e lē gata ia latou iai i lona alofa, ae ia “tumau ai i [lona] alofa.” Aiseā? Talu ai o le avea o se tasi o se soo moni o Keriso mai i lea tausaga i lea tausaga, e manaʻomia ai le tumau. Na faamamafa mai e Iesu le tāua o le tumau i lona taʻua o le upu “tumau” i le tele o taimi i le Ioane 15:4-10.

6. E faapefea ona tatou faaalia o loo tatou mananaʻo e tumau i le alofa o Keriso?

⁶ E faapefea ona tatou faaalia o loo tatou mananaʻo e tumau i le alofa o Keriso ma faafiafiaina pea lona finagalo? E ala lea i le tausia o ana poloaʻiga. E tai pei o loo fetalai mai Iesu, ʻIa usiusitaʻi mai iā te aʻu.’ Na faatonuina i tatou e Iesu ina ia tatou faia le mea na ia faia, auā na ia taʻua atili: “E pei ona ou tausi i poloaʻiga a le Tamā, ma ou tumau ai i lona alofa.” (Ioa. 15:10) O lea, na faataatia e Iesu le faaaʻoaʻoga mo i tatou.​—Ioa. 13:15.

7. O le ā le sootaga o le usiusitaʻi ma le alofa?

⁷ I le fetalaiga muamua atu a Iesu, na ia taʻua ai le sootaga o le usiusitaʻi ma le alofa: “O lē ua iai aʻu poloaʻiga ma tausi i ai, o ia lea e alofa mai iā te aʻu.” (Ioa. 14:21) E lē gata i lea, pe a tatou faataunuu le poloaʻiga a Iesu ia ō atu e talaʻi, ua tatou faaalia ai foʻi le alofa i le Atua, auā o poloaʻiga a Iesu e atagia mai ai le finagalo o lona Tamā. (Mata. 17:5; Ioa.  8:28) O lea, pe a tatou faaalia le alofa iā Ieova ma Iesu, o le a la faatumauina i tatou i lo la alofa.

8, 9. (a) O le ā le isi māfuaaga e tatou te talaʻi ai? (e) Aiseā e uunaʻia ai i tatou i fetalaiga a Ieova o loo i le Esekielu 3:18, 19 ma le Esekielu 18:23 ina ia faaauau ona talaʻi?

⁸ E iai se isi māfuaaga e faaauau ai ona tatou faia le galuega talaʻi. E tatou te talaʻi ina ia avatu se lapataʻiga. I le Tusi Paia, o loo taʻua ai Noa “o lē e talaʻi.” (Faitau le 2 Peteru 2:5.) O lana talaʻiga a o lumanaʻi le Lolo, na aofia ai se lapataʻiga i se faaumatiaga na faaloloʻi ane. Aiseā ua tatou manatu ai faapea? Mātau le fetalaiga lenei a Iesu: “Auā e pei o na aso a o leʻi oo i le lolo, na latou aai ma inu, na faaipoipo alii ma tamaʻitaʻi, seʻia oo lava i le aso na ulu atu ai Noa i le vaa; ma latou te leʻi ano i ai seʻia oo mai le lolo ma tafiesea ai i latou uma, o le a faapena foʻi le faatasi mai o le Atalii o le tagata.” (Mata. 24:38, 39) E ui i le lē ano ane o tagata, ae na faamaoni pea Noa e folafola atu le feʻau o le lapataʻiga na tuuina atu iā te ia.

⁹ I aso nei, o loo tatou talaʻi atu le feʻau o le Malo ina ia maua ai e tagata le avanoa e aʻoaʻoina ai le finagalo o le Atua mo le lumanaʻi. I le pei o Ieova, e tatou te matuā naunau ina ia talia e tagata le feʻau ma “ola ai pea.” (Eseki. 18:23) I le taimi e tasi, a o tatou talaʻi mai i lea fale i lea fale ma nofoaga faitele, e tatou te lapataʻia le toʻatele e mafai ai e faapea, o le a faaumatia e le Malo o le Atua lenei lalolagi faalēmataʻu.​—Eseki. 3:18, 19; Tani. 2:44; Faaa. 14:6, 7.

10. (a) O le ā le māfuaaga e talaʻi ai o loo taʻua i le Mataio 22:39? (e) Faamatala le auala na fesoasoani ai Paulo ma Sila i se leoleo o le falepuipui i Filipi.

¹⁰ O se isi māfuaaga tāua lenei e faaauau ai ona tatou faia le galuega talaʻi: E tatou te talaʻi ona o le alolofa i o tatou tuaoi. (Mata. 22:39) E uunaʻia i tatou e lenā alofa ina ia tumau i lenei galuega, auā e tatou te iloaina e ono suia loto o tagata pe a suia o latou tulaga. Seʻi manatu i le mea na tupu i le aposetolo o Paulo ma lana aumea o Sila. A o la iai i le aai o Filipi, na faafalepuipui i laʻua e tagata tetee. Ina ua oo i le vaeluapō, na faafuaseʻi ona lūlū se mafuiʻe ma matalatala ai faitotoʻa o le falepuipui. Na popole le leoleo o le falepuipui ona na manatu o ia ua sosola pagota, ma taumafai loa e pule i lona ola. Ae na alaga atu Paulo: “Aua neʻi e faia lenā mea iā te oe.” Na fesili mai ma le gatete lenei leoleo: “O le ā se mea e ao ona ou faia ina ia faaolaina ai aʻu?” Na la tali atu: “Ia e talitonu i le Alii o Iesu Keriso, ona faaolaina ai lea o oe.”​—Galu. 16:25-34.

11, 12. (a) E faapefea i le tala i le leoleo o le falepuipui ona fesootaʻi mai i la tatou talaʻiga? (e) O le ā e tatou te mananaʻo ia nofosauni e fai?

¹¹ E faapefea i le tala i le leoleo o le falepuipui ona fesootaʻi mai i la tatou talaʻiga? Ia mātau le manatu lenei: Na faatoʻā suia le loto o le leoleo ma talosaga atu mo se fesoasoani ina ua uma ona lūlū le mafuiʻe. I se tulaga talitutusa, o nisi tagata i aso nei o ē e leʻi talilelei mai i le feʻau o le Tusi Paia, atonu o le a suia o latou loto ma saʻili mo se fesoasoani pe a faafuaseʻi ona aafia i se faafitauli tugā.  O se faataʻitaʻiga, o nisi i a tatou oganuu ua faafuaseʻi ona vāea mai i galuega ua leva ona faigaluega ai, ma e matuā faateʻia ai i latou. O nisi atonu o loo matuā mafatia ona e leʻi leva ona malepe a latou faaipoipoga. Ae o nisi ua matuā faanoanoa ona ua maua i ni maʻi tugā, pe ona ua maliu sē e pele iā i latou. Pe a tulaʻi mai ni tulaga faapea, e ono tuufesili ai nisi o loo mafatia e faatatau i le uiga o le olaga, atonu o ni fesili e latou te leʻi mafaufau muamua i ai. E latou te ono taumānatu foʻi: ʻO le ā se mea e ao ona ou faia ina ia faaolaina ai aʻu?’ Pe a tatou feiloaʻi iā i latou, atonu o le a faalogo mai i la tatou feʻau o le faamoemoe mo le taimi muamua i o latou olaga.

¹² O lea la, o lo tatou faamaoni e faaauau i le galuega talaʻi, ua faamautinoa ai ua tatou nofosauni e avatu faamāfanafanaga i tagata i le taimi ua fia faalogo mai ai i la tatou feʻau. (Isa. 61:1) Ua faapea mai Charlotte o sē ua 38 tausaga o iai i le auaunaga faataimi atoa: “Ua matuā leai se faamoemoe o tagata i aso nei. E tatau ona tuu atu iā i latou le avanoa e faalogo ai i le tala lelei.” Ua faamatala mai e Ejvor o se paeonia mo le 34 tausaga: “Ua sili atu ona mafatia le toʻatele o tagata i aso nei, nai lo o se isi lava taimi. Ou te manaʻo e fesoasoani iā i latou. O le mea lenā e uunaʻia ai aʻu e talaʻi.” Ioe, o le alofa i tuaoi o se māfuaaga lea e sili ona lelei e faaauau ai ona tatou talaʻi.

13, 14. (a) O le ā le meaalofa o loo taʻua i le Ioane 15:11? (e) E faapefea ona tatou mauaina le olioli o Iesu? (i) E faapefea i lo tatou olioli ona aafia ai la tatou faiva?

¹³ I le pō mulimuli a o leʻi maliu Iesu, na ia faailoa atu ai foʻi i ona aposetolo ni meaalofa eseese o le a fesoasoani iā i latou ina ia tumau ai ona fua mai. O ā nei meaalofa ma e faapefea ona aogā iā i tatou?

¹⁴ Le meaalofa o le olioli. Po o se avega mamafa le usitaʻia o le poloaʻiga a Iesu e talaʻi? E leai. Ina ua māeʻa ona ia taʻua le talafaatusa i le vine, na taʻua e Iesu o le a olioli ē o loo talaʻia le Malo. (Faitau le Ioane 15:11.) O le mea moni na ia faamautinoa mai o le a tatou mauaina lona olioli. E faapefea? E pei ona taʻua i le amataga, na faatusa e Iesu o ia i se vine ma o ona soo o lālā. E faalagolago lālā vine i le vine. Pe a pipii pea lālā vine i le vine, o le a faaauau ona maua e lālā le vai ma mea e ola ai mai i le vine. I se tulaga talitutusa, o le faaauau pea ona tatou autasi ma Keriso e ala i le mulimulituʻi i ona tulaga aao, o le a tatou olioli ai e pei o ia ona o le faia o le finagalo o lona Tamā. (Ioa. 4:34; 17:13; 1 Pete. 2:21) Ua faapea mai Hanne o se paeonia mo le silia i le 40 tausaga, “O le olioli lea ou te mauaina pea pe a faia soʻu sao i le faiva, e uunaʻia ai aʻu ina ia faaauau i le auaunaga iā Ieova.” Ioe, o lenei olioli moni e faamalosia ai i tatou ia faaauau ona talaʻi e oo lava i oganuu e lē talilelei mai.​—Mata. 5:10-12.

15. (a) O le ā le meaalofa o loo taʻua i le Ioane 14:27? (e) E faapefea ona fesoasoani le filemu ina ia faaauau ona tatou fua mai?

¹⁵ Le meaalofa o le filemu. (Faitau le Ioane 14:27.) I le pō mulimuli a o lumanaʻi lona maliu, na fetalai atu ai Iesu i ona soo: “Ou te avatu iā te outou loʻu filemu.” E faapefea ona fesoasoani lenā meaalofa o le filemu iā i tatou ina ia fua mai? Pe a tatou tumau, e tatou te lagona pea le filemu i o tatou loto ona o le iloaina o loo tatou faafiafiaina Ieova ma Iesu. (Sala. 149:4; Roma 5:3, 4; Kolo. 3:15) Ua faapea mai Fred * o sē ua 45 tausaga o iai i le auaunaga faataimi atoa, “Ou te lagona le lēlavā i le galuega talaʻi, peitaʻi ou te maua ai le faamalieina moni ma se fuafuaga i loʻu olaga.” Maʻeu lo tatou lotofaafetai ona o le mauaina o le filemu o le loto lea e tumau!

16. (a) O le ā le meaalofa o loo taʻua i le Ioane 15:15? (e) Na faapefea ona tumau ona avea le ʻauaposetolo ma uō a Iesu?

 ¹⁶ Le meaalofa o le avea ma uō a Iesu. Ina ua uma ona taʻua e Iesu lona faanaunauga ina ia “faaatoatoaina” le olioli o le ʻauaposetolo, ona ia faamatala atu lea o le tāua o le faaalia o le alofa faataulaga. (Ioa. 15:11-13) Na sosoo ai ma lona faapea atu: “Ua ou taʻua outou o uō.” Maʻeu se meaalofa tautele o le avea ma uō a Iesu! O le ā na tatau ona faia e le ʻauaposetolo ina ia tumau ai ona avea ma uō a Iesu? Sa tatau ona latou “saga fua tele mai.” (Faitau le Ioane 15:14-16.) I le pe tusa o le lua tausaga muamua atu, na faatonu ai e Iesu ona aposetolo ina ia talaʻi atu e faapea: “Ua latalata mai le malo o le lagi.” (Mata. 10:7) O le māfuaaga lea na ia faalaeiau ai i latou i le pō a o leʻi maliu o ia, ina ia tumau i le faia o le galuega na latou amataina. (Mata. 24:13; Mare. 3:14) E leʻi faigofie le faataunuuina o le faatonuga a Iesu, ae na mafai ona latou taulau manuia ma tumau ai ona avea ma ana uō. E faapefea? E ala lea i le fesoasoani a le isi meaalofa na latou mauaina.

17, 18. (a) O le ā le meaalofa o loo taʻua i le Ioane 15:16? (e) Na faapefea ona fesoasoani lenā meaalofa i soo o Iesu? (i) O ā meaalofa ua faamalosia ai i tatou i aso nei?

¹⁷ Le meaalofa o le taliina o tatalo. Na fetalai Iesu: “[O le a] foaʻi mai iā te outou e le Tamā so o se mea tou te talosaga atu ai i loʻu igoa.” (Ioa. 15:16) E lē taumatea le matuā faamalosia o le ʻauaposetolo i lenei folafolaga! * E ui e latou te leʻi malamalama lelei e lē o toe umi ona maliu lea o lo latou Taʻitaʻi, ae e leʻi faapea ai o le a tuulafoaʻia i latou e aunoa ma se fesoasoani. Na nofosauni Ieova e tali mai i a latou tatalo mo so o se mea na latou manaʻomia ai se fesoasoani, ina ia faataunuu le talaʻia o le feʻau o le Malo. E leʻi umi ae o latou vaaia le tali mai o Ieova i a latou tatalo.​—Galu. 4:29, 31.

¹⁸ O le tulaga foʻi lenā i aso nei. A o tumau ona tatou fua mai, e tatou te olioli foʻi i le avea ma uō a Iesu. E lē gata i lea, e mafai ona tatou mautinoa e nofosauni Ieova e tali mai i a tatou tatalo mo se fesoasoani, ina ia fesagaʻia ai luʻi e tulaʻi mai a o tatou talaʻi atu le tala lelei o le Malo. (Fili. 4:13) Maʻeu lo tatou lotofaafetai ona o le faamanuiaga o le taliina o a tatou tatalo faapea le avea ma uō a Iesu! O nei meaalofa mai iā Ieova e faamalosia ai i tatou ina ia tumau ona fua mai.​—Iako. 1:17.

19. (a) Aiseā e faaauau ai ona faia so tatou sao i le galuega talaʻi? (e) O le ā e fesoasoani iā i tatou ina ia faamāeʻa ai le galuega a le Atua?

¹⁹ I lenei mataupu, na tatou talanoaina ai māfuaaga e fā e faaauau ai ona tatou talaʻi: ina ia faamamaluina ai Ieova ma faapaia lona suafa, e faaalia ai lo tatou alolofa iā Ieova ma Iesu, e tatou te avatu ai le lapataʻiga, ma faaalia ai lo tatou alolofa i tuaoi. E lē gata i lea, na tatou aʻoaʻoina ai ni meaalofa se fā: o le olioli, filemu, avea ma uō a Iesu, ma le taliina o tatalo. O nei meaalofa e faamalosia ai i tatou ina ia faamāeʻa le galuega a le Atua ua tuuina mai iā i tatou. Maʻeu le matuā faafiafiaina o Ieova pe a silasila mai o loo tatou galulue malolosi ina ia faaauau ona “saga fua tele mai”!