1, 2. (a) Yini Jesu layitjela balandzeli bakhe ngaphambi kwekufa kwakhe? (Buka sitfombe lesisekucaleni kwalesihloko.) (b) Kubaluleke ngani kutsi sihlale sitikhumbula tizatfu letisenta sishumayele? (c) Sitawucoca ngani kulesihloko?

NGEBUSUKU bangephambi kwekufa kwakhe, Jesu wakhuluma nebaphostoli bakhe sikhatsi lesidze futsi wabacinisekisa kutsi ubatsandza kakhulu. Waphindze wabatjela nangemfanekiso lomayelana nemvini lesicoce ngawo esihlokweni lesendlulile. Ngekubatjela lomfanekiso, Jesu wakhutsata balandzeli bakhe kutsi ‘bachubeke batsela titselo letinyenti,’ lokusho kukhutsatela ekushumayeleni umlayeto weMbuso.​—Joh. 15:8.

² Jesu akazange agcine ngekutjela balandzeli bakhe loko lokufanele bakwente, kepha waphindze wabachazela tizatfu tekukwenta. Wabachazela kutsi kungani kufanele bachubeke nekwenta umsebenti wekushumayela. Kubaluleke ngani kutsi sihlolisise letizatfu? Nangabe sihlale sikhumbula kutsi kubaluleke ngani kutsi sichubeke sishumayela, sitawukhutsateka kutsi sichubeke sishumayela kuze “kube bufakazi etiveni tonkhe.” (Mat. 24:13, 14)  Kulesihloko sitawucoca ngetizatfu letine letiseBhayibhelini letisenta sishumayele. Ngetulu kwaloko sitawuphindze sicoce ngetipho letine Jehova lasiphe tona letitasisita kutsi sitsele titselo ngekucinisela.

3. (a) Ngusiphi sizatfu sekushumayela lesisitfola kuJohane 15:8? (b) Amelelani emagilebisi lasemfanekisweni waJesu futsi kungani lomfanekiso ufaneleka?

³ Sizatfu lesiyinhloko lesenta sishumayele kutsi sikhatimulisa Jehova futsi singcwelisa libito lakhe. (Fundza Johane 15:1, 8.) Naka kutsi Jesu wacatsanisa Babe wakhe Jehova nemlimi lolima emagilebisi. Jesu watifananisa nemvini, futsi balandzeli bakhe wabafananisa nemagala. (Joh. 15:5) Emagilebisi amelela titselo letitselwa balandzeli baKhristu. Jesu watjela baphostoli bakhe kutsi: “Babe uyakhatinyuliswa ngekutsi nichubeke nitsela titselo letinyenti.” Umlimi uyadvunyiswa nangabe umvini utsela emagilebisi lamnandzi. Ngendlela lefanako sisuke sidvumisa Jehova nangabe senta konkhe lesingakwenta kute sishumayele umlayeto weMbuso.​—Mat. 25:20-23.

4. (a) Singalingcwelisa njani libito laNkulunkulu? (b) Utiva njani ngelilungelo lonalo lekungcwelisa libito laNkulunkulu?

⁴ Silingcwelisa njani libito laNkulunkulu nasishumayela? Libito laNkulunkulu lingcwele ngalokuphelele, ngako ngeke sikhone kulenta libe ngcwele kakhulu. Kodvwa naka naku lokwashiwo ngumphrofethi Isaya, watsi: “[Jehova, NW] longuSomandla, nguye lekufanele nimati ngekutsi ungcwele.” (Isa. 8:13) Lenye indlela yekungcwelisa libito laNkulunkulu kutsi silehlukanise kulamanye emabito futsi sisite labanye kutsi balati ngekutsi lingcwele. (Mat. 6:9) Nasi sibonelo, nangabe sitjela labanye ngebuntfu baNkulunkulu lobuhle kanye nenjongo yakhe ngebantfu, sisuke sivikela libito laNkulunkulu ekuhlanjalatweni ngemanga aSathane. (Gen. 3:1-5) Siphindze silingcwelise nangabe sisita bantfu labasensimini yetfu babone kutsi Jehova ukufanele “kwemukela inkhatimulo, ludvumo, nemandla.” (Semb. 4:11) Rune losabe lihlahlandlela iminyaka lengu-16 utsi: “Kuyangijabulisa kwati kutsi nginiketwe litfuba lekuba ngufakazi weMdali wetintfo tonkhe. Loko kungenta ngifise kuchubeka ngishumayela.”

5. (a) Ngusiphi sizatfu sekushumayela lesitfolakala kuJohane 15:9, 10? (b) Jesu wasigcizelela njani sizatfu sekucinisela?

⁵ Fundza Johane 15:9, 10. Sizatfu lesibalulekile sekushumayela umlayeto weMbuso kutsi simtsandza ngalokusuka enhlitiyweni Jehova kanye naJesu. (Mak. 12:30; Joh. 14:15) Jesu watjela balandzeli bakhe kutsi bangagcini nje ngekuba selutsandvweni lwakhe, kepha ‘bachubeke babantfu labatsandvwa nguye.’ Leni? Kudzingeka sicinisele kuze sibe balandzeli baKhristu beliciniso. Jesu wagcizelela sidzingo sekucinisela ngekutsi alisebentise kanyenti ligama lelitsi “chubekani” embhalweni waJohane 15:4-10.

6. Sikhombisa njani kutsi sifuna kuchubeka sitsandvwa nguKhristu?

⁶ Singakhombisa njani kutsi sifuna kuhlale sitsandvwa nguKhristu futsi achubeke asemukela? Ngekutsi sigcine imiyalo yakhe. Jesu usicela kutsi simlalele futsi sente loko naye lakwenta, waze watsi: “Njengobe nami ngiyigcinile imiyalo yaBabe futsi wachubeka angitsandza.” Jesu wasibekela sibonelo lokufanele sisilingise.​—Joh. 13:15.

7. Lutsandvo kanye nekulalela kuhlobana njani?

⁷ Jesu wakwenta kwacaca kutsi kulalela kuhambisana nelutsandvo ngesikhatsi atjela baphostoli bakhe kutsi: “Loyo lowati  imiyalo yami futsi ayigcine, nguye longitsandzako.” (Joh. 14:21) Nangabe silalela umyalo waKhristu ngekutsi sishumayele, sikhombisa kutsi siyamtsandza Jehova ngobe imiyalo yaJesu ivela kuNkulunkulu. (Mat. 17:5; Joh. 8:28) Jehova naJesu batawuhlale basitsandza nangabe sikhombisa kutsi siyabatsandza.

8, 9. (a) Ngusiphi lesinye sizatfu lesisenta sishumayele? (b) Kungani emavi aJehova latfolakala kuHezekeli 3:18, 19; 18:23 asikhutsata kutsi sishumayele?

⁸ Lesinye sizatfu lesenta sichubeke sishumayela kutsi secwayisa bantfu. LiBhayibheli lichaza Nowa ngekutsi ‘ngumshumayeli.’ (Fundza 2 Phetro 2:5.) Ngaphambi kwaZamcolo washumayela kuze ecwayise bantfu ngenhlekelele lebeyiseta. Kungani sisho kanjalo? Naka kutsi Jesu watsi: “Ngobe ngesikhatsi usengakefiki Zamcolo, bantfu bebadla, banatsa, labadvuna batsatsa, labasikati bendza, kwadzimate kwaba lilanga Nowa langena ngalo emkhunjini, futsi abazange banake kwate kwefika Zamcolo wabakhukhula bonkhe, kuyawuba njalo nekuba khona kweNdvodzana yemuntfu.” (Mat. 24:38, 39) Ngekwetsembeka, Nowa wabecwayisa bantfu ngaZamcolo ngisho nobe bebangamnaki.

⁹ Lamuhla sishumayela umlayeto weMbuso kuze sinikete bantfu litfuba lekufundza ngenjongo yaNkulunkulu ngebantfu. NjengaJehova, natsi sifisa kutsi bantfu bangawulalela lomlayeto kuze bachubeke ‘baphila.’ (Hez. 18:23) Ngesikhatsi lesifanako nasishumayela emtini ngemuti nasetindzaweni letiphitsitelako, sisuke secwayisa bantfu labanyenti ngekutsi uMbuso waNkulunkulu utawufika futsi ubhubhise lelive lelinebantfu labangamhloniphi Nkulunkulu.—Hez. 3:18, 19; Dan. 2:44; Semb. 14:6, 7

10. (a) Ngusiphi sizatfu lesisenta sishumayele lesikuMatewu 22:39? (b) Chaza kutsi Pawula naSilasi bamsita njani umgcinijele eFiliphi.

¹⁰ Lesinye sizatfu lesibalulekile lesenta sichubeke sishumayela kutsi siyabatsandza bomakhelwane betfu. (Mat. 22:39) Lolutsandvo lusenta sichubeke sishumayela ngoba siyati kutsi bantfu bangashintja nangabe timo tabo tishintja. Cabanga ngalokwenteka kumphostoli Pawula kanye naSilasi. Ngesikhatsi basedolobheni laseFiliphi, bantfu labaphikisako babavalela ejele. Ekhatsi nebusuku kwatamatama umhlaba futsi iminyango yelijele yavuleka. Umgcinijele wesaba kakhulu acabanga kutsi letiboshwa tibalekile futsi besekafuna kutibulala. Kodvwa Pawula wamemeta watsi: “Ungatilimati!” Lomgcinijele lobekakhatsatekile wabuta watsi: “Yini lokufanele ngiyente kuze ngisindziswe?” Batsi kuye: ‘Kholwa yiNkhosi Jesu, futsi utawusindziswa.’​—Imis. 16:25-34.

11, 12. (a) Lendzaba yemgcinijele ihlobana njani nemsebenti wekushumayela? (b) Kungani sifuna kuchubeka sishumayela?

¹¹ Lendzaba yemgcinijele ihlobana kanjani nemsebenti wetfu wekushumayela? Naka kutsi ngemva kwekutamatama kwemhlaba lomgcinijele washintja simo sakhe sengcondvo futsi wacela lusito. Nalamuhla labo labasengakalemukeli liciniso bangashintja simo sabo sengcondvo futsi bacele lusito  nakuvela inhlekelele letsite. Nasi sibonelo, labanye ensimini yetfu bangalahlekelwa ngumsebenti bangakalindzeli futsi loku kungabashiya betfukile. Labanye bangasala betfukile ngemva kwedivosi. Kani labanye bangeva buhlungu nangabe banesifo lesingelapheki noma nabafelwa bantfu lababatsandzako. Bantfu nababhekana netimo letibuhlungu njengaleti bese batibuta imibuto lemayelana nenjongo yekuphila lebekuyimibuto lebebangayinaki ngaphambili. Mhlawumbe bayatibuta: ‘Yini lokufanele ngiyente kute ngisindziswe?’ Nasishumayela bangafuna kuwulalela kwekucala ekuphileni kwabo umlayeto wetfu losinika litsemba.

¹² Ngako-ke nasichubeka siwenta ngekwetsembeka umsebenti wetfu wekushumayela, sitawukhona kudvudvuta bantfu ngesikhatsi labakulungele ngaso kusilalela. (Isa. 61:1) Charlotte losabe semsebentini wasikhatsi sonkhe iminyaka lengu-38 utsi: “Bantfu lamuhla badidekile. Badzinga litfuba lekuva tindzaba letimnandzi.” Ejvor losabe lihlahlandlela iminyaka lengu-34 utsi: “Lamuhla bantfu labanyenti bacindzeteleke kakhulu kunasesikhatsini lesendlulile. Ngifuna mbamba kubasita, futsi loku kunginiketa umdlandla wekutsi ngiyoshumayela.” Kutsandza bomakhelwane sizatfu lesicinile sekuchubeka senta umsebenti wekushumayela.

13, 14. (a) Ngusiphi sipho lokukhulunywa ngaso kuJohane 15:11? (b) Singayitfola njani injabulo Jesu lanayo? (c) Injabulo isisita njani emsebentini wekushumayela?

¹³ Ngebusuku bekugcina ngaphambi kwekutsi afe, Jesu wakhuluma nebafundzi bakhe ngetipho lebetingabasita batsele titselo futsi bakhone kucinisela. Ngutiphi letipho, futsi tsine sizuza njani kuto?

¹⁴ Sipho senjabulo. Kulalela umyalo waJesu wekutsi sishumayele kutawuba ngumtfwalo yini? Cha. Ngemuva kwekucoca ngemfanekiso wemvini Jesu watsi njengebamemeteli beMbuso sitawutfola injabulo. (Fundza Johane 15:11.) Wasicinisekisa kutsi sitawutfola injabulo naye lanayo. Kanjani? Njengobe sicocile ngako ekucaleni Jesu watifananisa nemvini, futsi bafundzi bakhe wabafananisa nemagala. Umvini usekela emagala. Emagala atfola kudla nemanti kuphela nangabe anamatsele kulomvini. Ngalokufanako natsi sitawutfola injabulo lefana naleyo Jesu lanayo ngekwenta intsandvo yaBabe wakhe nangabe sihlala simunye ngekutsi silandzele tinyatselo takhe edvute. (Johane 4:34; 17:13; 1 Phet. 2:21) Hanne losabe lihlahlandlela ngetulu kweminyaka lengu-40 utsi: “Injabulo lengiba nayo nangabe ngibuya emsebentini wekushumayela iyangikhutsata kutsi ngichubeke ngenta umsebenti waJehova.” Ngalokucinisekile injabulo yetfu lesuka ngekhatsi isiniketa emandla ekuchubeka senta umsebenti wekushumayela nangaphasi kwetimo letimatima.​—Mat. 5:10-12.

15. (a) Ngusiphi sipho lokukhulunywa ngaso kuJohane 14:27? (b) Kuthula kusisita njani kutsi sitsele titselo?

¹⁵ Sipho sekuthula. (Fundza Johane 14:27.) Ekuseni ngebusuku bakhe bekugcina Jesu watjela bafundzi bakhe kutsi: “Nginishiya nekuthula.” Lesipho sisita kanjani kutsi sitsele titselo? Njengoba sichubeka sicinisela sitiva sinekuthula lokusuka ngekhatsi enhlitiyweni lesikutfola ngekwati kutsi Jehova naJesu bayajabula ngatsi. (Hla. 149:4; Rom. 5:3, 4; Khol. 3:15) Ulf losabe sisebenti sasikhatsi sonkhe iminyaka lengu-45 utsi: “Umsebenti wekushumayela ungenta ngitive ngikhatsele, kepha uyangenetisa futsi wenta kuphila kwami kube nenjongo.” Siyajabula ngekutsi sinekuthula lokuhlala njalo.

16. (a) Ngusiphi sipho lokukhulunywa ngaso kuJohane 15:15? (b) Yini lebeyingasita baphostoli kutsi bahlale babangani baJesu?

 ¹⁶ Sipho sekuba ngumngani waJesu. Ngemuva kwekutsi Jesu avete sifiso sakhe sekutsi injabulo yebaphostoli bakhe “iphelele,” wachaza kutsi kubalulekile kutsi babe nelutsandvo lwekutidzela. (Joh. 15:11-13) Wabese utsi: “Nginibita ngekutsi nibangani bami.” Kuba ngumngani waJesu kusipho lesikhulu kakhulu! Yini baphostoli lebekufanele bayente kuze bahlale babangani bakhe? Bekufanele ‘bachubeke batsela titselo.’ (Fundza Johane 15:14-16.) Eminyakeni lemibili ngaphambi kwaloko, Jesu wayala baphostoli bakhe watsi: “Njengobe nihamba, niboshumayela nitsi: ‘UMbuso welizulu sewusondzele.’” (Mat. 10:7) Ngako ngalobo busuku wabakhutsata kutsi bachubeke benta umsebenti lesebavele bawucalile. (Mat. 24:13; Mak. 3:14) Bebangakhona kulalela umlayeto waJesu ngisho noma bekumatima, futsi loko bekutawubenta bahlale babangani bakhe. Kunalesinye sipho lebesitawubasita kutsi bente kanjalo.

17, 18. (a) Ngusiphi sipho lokukhulunywa ngaso kuJohane 15:16? (b) Lesipho besitabasita njani bafundzi baJesu? (c) Ngutiphi tipho letisicinisako lamuhla?

¹⁷ Sipho sekuphendvulwa kwemithantazo yetfu. Jesu watsi: “Nobe yini leniyicela kuBabe egameni lami [utanipha] yona.” (Joh. 15:16) Kufanele kube lesetembiso sabacinisa kakhulu baphostoli! * Baphostoli baJesu bebangati kutsi Jesu utawufa masinyane. Kepha kufa kwakhe bekungasho kutsi sekute lotabasita. Jehova bekakulungele kuphendvula imithantazo yabo nabadzinga lusito kuze bachubeke balalela umyalo wekushumayela umlayeto weMbuso. Ecinisweni, ngemuva nje kwesikhashana batibonela indlela Jehova laphendvula ngayo imithantazo yabo yekucela lusito.​—Imis. 4:29, 31.

¹⁸ Kwenteka lokufanako nalamuhla. Sitawuba bangani baJesu nasichubeka sitsela titselo ngekucinisela. Ngetulu kwaloko singaciniseka kutsi Jehova ukulungele kuphendvula imithantazo yetfu yekuncoba tinkinga lesingabhakana nato nasishumayela tindzaba letimnandzi teMbuso. (Fil. 4:13) Sijabula kakhulu ngekutsi sitfola sibusiso sekuphendvulwa kwemithantazo yetfu kanye nekuba bangani baJesu. Letipho letivela kuJehova tiyasisita sichubeke sitsela titselo.​—Jak. 1:17.

19. (a) Yini lesenta sichubeke sishumayela? (b) Yini lesenta sicedzele kwenta umsebenti lesiwunikwe nguNkulunkulu?

¹⁹ Njengobe sesibonile kulesihloko, nasichubeka sishumayela sisuke sikhatimulisa Jehova futsi singcwelisa libito lakhe, sikhombisa kutsi siyamtsandza Jehova kanye naJesu, secwayisa bomakhelwane betfu futsi sikhombisa kutsi siyabatsandza. Ngetulu kwaloko, sipho senjabulo, kuthula, kuba bangani baJesu kanye nekuphendvulwa kwemithantazo yetfu kuyasisita kutsi sicedzele kwenta umsebenti lesiwunikwe nguNkulunkulu. Jehova ujabula kakhulu nakasibona senta konkhe lokusemandleni etfu kute ‘sichubeke sitsela titselo letinyenti’!